في الذكرى السنوية الحادية عشرة

في الذكرى السنوية الحادية عشرة لجوازي .. بأقعد أفكر في حاجات كتير قوي .. ياترى لو رجع بيا الزمن حداشر سنة لورا وما كنتش إتجوزت .. مش كان زماني بأروح البيت بعد الشغل وأنتخ وأنام بدل ما أقعد أذاكر للأولاد ساعتين بسرعة علشان هيناموا بدري؟ مش كان زماني ما بأروحش السوق كل إسبوع مرتين علشان أشتري طلبات البيت اللي ما بتخلصش؟ أو أفضل كل صيف وكل شتا وكل عيد ألف المحلات كعب داير على شراء ملابس الأولاد وأحتار في المقاسات والألوان والأذواق .. والأسعار؟
.
مش كان زماني أقدر أنزل عالقهوة وأقعد مع أصحابي في أي وقت وفي أي يوم زي ما أنا عايز من غير ما أقعد أمهد إسبوع للخروجة دي؟ مش كان زماني أقدر أفتح قناة ميلودي براحتي وأبوس الواوا وأتفرج على الباشمهندسة نانسي عجرم و الباشمهندسة روبي والباشمهندسة كارول سماحة من غير ما أكون خايف من أي قصف جوي بالحلل والأطباق؟ مش كان زماني بأخش البيت وما ألاقيش الأولاد بيقولولي إتأخرت ليه وكنت فين .. والحاجة أمهم ساكتة ولا كأنها مسلطاهم عليا؟ مش كان زماني مش غصب عني بأروح الملاهي وأفضل أركب ده وأنزل دي لحد ما يتهد حيلي؟ أو نروح حمام السباحة وأفضل شايل المفعوصة الصغيرة على قلبي بالساعات وواخد بالي من الإتنين التانيين ليروحوا كده وألا كده؟
.
مش كان زماني حوشت كل الفلوس اللي إتصرفت دي كلها على أثاث البيت وحفل الزفاف ومصاريف الولادة والأطباء والمدارس والأكل والشرب والملابس والمناسبات الاجتماعية والعيش والعيشة واللي عايشينها؟ مش كان زماني دلوقت بقيت مليونير وكل البنات بتحبني وكل البنات بتغير؟
.
في الذكرى السنوية الحادية عشرة لجوازي .. لو رجع بيا الزمن حداشر سنة لورا .. كنت إتجوزت بدري عن كده بثلاثة سنين كمان .. وكان زماني بأكتب بوست عنوانة .. في الذكرى السنوية الرابعة عشر لجوازي

.

موضوع ذو صلة: في الذكرى السنوية العاشرة