شد القلوع يا مراكبي ... مافيش رجوع يا مراكبي

السبت، أكتوبر 13، 2007

كفاءة كفاءة

سيداتي آنساتي سادتي (طبعا باين إن سيداتي إتقالت بنفس مفتوحة .. وآنساتي إتقالت بنفس مفتوحه قوي .. وسادتي تأدية واجب وخلاص) نحب نشرح لكم النهاردة نموذج من النماذج الحسابية اللي درسناها في كلية الهندسة الله يرحمها ويرحم أيامها .. والنموذج ده بيبين طريقة حساب الكفاءة العامة .. يعني إيه؟ شوفوا معايا
.
بيقولوا إن لو عندك إتنين موظفين شغالين في مكتب في مصلحة حكومية وكل واحد منهم بيشتغل بكفاءة 90% (الشر برة وبعيد) يبقى الكفاءة العامة للمكتب كله تتحسب إزاي؟ الكفاءة العامة هي حاصل ضرب كفاءة الإتنين الموظفين
يعني 90% × 90% = 81% .. مفاجأة مش كدة؟
.
طيب لو عندنا 3 موظفين في المكتب إياه .. وكل واحد كفاءته هي 90% برضه .. يبقى الكفاءة العامة للمكتب ده كام؟ هي حاصل ضرب كفاءة التلاتة موظفين
يعني 90% × 90% × 90% = 73% .. شوفتوا الرقم صغر إزاي؟
.
طيب لو عندنا 4 موظفين في المكتب اللي زهقنا منه ده .. وكل واحد كفاءته هي 90% برضه .. يبقى الكفاءة العامة للمكتب ده كام؟ هي حاصل ضرب كفاءة الأربعة موظفين
يعني 90% مضروبة في بعضها 4 مرات = 66%.. أصغر وأصغر
.
طيب لو عندنا 5 موظفين .. وكل واحد كفاءته هي 90% برضه .. يبقى الكفاءة العامة للمكتب تبقى كام؟ هي حاصل ضرب كفاءة الخمسة موظفين
يعني 90% مضروبة في بعضها 5 مرات = 59% يعني أنيل وأنيل
.
وعلشان ما أطولش عليكم .. لو عندنا في مصر 70 مليون مواطن .. وخير اللهم إجعله خير كان كل واحد فيها بيشتغل بكفاءة 90% برضه .. ممكن حد يحسب ويقولي الكفاءة العامة لمصر تبقى كام؟ إضربوا كده 90% في 90% سبعين مليون مرة وشوفوا هتطلع كام .. حسبتوها؟ مصدومين مش كده؟ أيوة .. الإجابة تقريبا صفر .. أيوة صفر
.
اللي أنا عايز أقوله إننا لازم نشتغل بكفاءة أقرب ما تكون لل 100% علشان الكفاءة العامة ما تقلش قوي كده لحد ما تبقى صفر .. يعني الإتنين موظفين لو كانوا بيشتغلوا بكفاءة 99% مش 90% هتكون الكفاءة العامة هي 98% ولو كانوا تلاتة موظفين يبقى 97% وهكذا وهكذا وهكذا
.
اللهم قد بلغت .. اللهم فأشهد .. سلام

التسميات:

161 Comments:

Blogger عدى النهار said...

كل سنة وإنت طيب وأعاد الله الأيام علينا أجمعين بكل خير

يبقى الراجل عنده حق فى رفض أى مشاركة فى الحكم من باب الحرص على مستوى الكفاءة العامة

شوف قلبه عالبلد إزاى وإحنا اللي ظالمينه

السبت, أكتوبر 13, 2007

 
Blogger يا مراكبي said...

عدى النهار

كل سنة وإنت طيب وبألف صحة وسلامة

تصدق أنا كمان كنت ظالم الراجل .. ده على كده طلع هو اللي بجد بجد قلبه على البلد وإحنا مش داريانين

إن بعض الظن إثم

السبت, أكتوبر 13, 2007

 
Blogger نـــــــور said...

كل سنة وحضرتك طيب وعساكم من عواده بالخير واليمن والبركات

مش عارفة ليه متخيلة شكلك وانت بتكتب المقالة دي مفقوع!!

حاسة الكلام كدا .. مكتوب بمرارة مفقوعة!!

ربنا يصلح حالنا يارب

وكل سنة وانت طيب تاني

السبت, أكتوبر 13, 2007

 
Blogger Mohndis المهندس السري said...

عيد فطر سعيد يا بشمهندس ينعاد عليك بالصحة و العافية
كان الله في عون مصر و المصريين
أما احنا المغاربة خلينا ساكتين أصل في رقابة و الفاهم يفهم

السبت, أكتوبر 13, 2007

 
Blogger Aardvark EF-111B said...

تصحيح

مكتب فيه 5 أفراد

2 بتسعين

1 بثلاثين

2 زي قلة أهلهم

يبقى الكفاءة

Efficacy=[([2x0.9]+[1x0.3]+[2x0.0])/5]%
Result=42%

وتصلي ركعتين شكر لو في مكتب بالمنظر ده

المعادلة المركبة بتاعت سيادتك تنطبق لو شغل الخمسة معتمد على بعض
و ده مابيحصلش لأن المصالح عندنا 5 يقوم مقامهم واحد فاهم إللي بيعمله

أنا رخم و بايخ و إلغيني لو مش عاجبك و كل عام و أنتم بخير

الأحد, أكتوبر 14, 2007

 
Blogger يا مراكبي said...

نور

لو جت على المرارة بس يبقى كويس جدا .. فيه أمراض تانية كتير بتيجي للواحد لما يفكر في أحوالنا .. منها على سبيل المثال لا الحصر: السكر والضغط وقرحة المعدة والشلل الرعاش والهلاوس السمعية والبصرية

:-D

قولي يا باسط

كل سنة وإنتي طيبة

الأحد, أكتوبر 14, 2007

 
Blogger يا مراكبي said...

Mohndis المهندس السري

كل سنة وإنت وأهل المغرب كلهم بخير وسعادة

الرقابة موجودة في كل حتة .. زينا زيكم بالظبط وأكتر .. لكن ربنا يسترها معانا ومعاكم

الأحد, أكتوبر 14, 2007

 
Blogger يا مراكبي said...

Aardvark EF-111B

هههههه

حلو التصحيح ده .. يعني الحقيقة أسوأ بكتير كمان من اللي أنا توقعته

يبقى الحمد لله إني شخص متفائل

تعليقك لا رخم ولا حاجة .. بالعكس

وأنا مش من عادتي إني ألغي أي حاجة أبدا

الأحد, أكتوبر 14, 2007

 
Blogger mesh2dra said...

خير اللهم إجعله خير كان كل واحد فيها بيشتغل بكفاءة 90% برضه


هو حضرتك متفائل اوى كده ليه
كل واحد بيشتغل بكفاءة 90 %
؟!!!!
بعد الشر


بيشتغلوا بكفاءة 90 % والنتيجة صفر
يعنى احنا وصلنا لما تحت الصفر:S

*****

كل سنة وحضرتك طيب وبخير و خير دايما

عيد سعيد ان شاء الله

سلاماتي

الأحد, أكتوبر 14, 2007

 
Blogger يا مراكبي said...

mesh2dra

أنا قلت 90% علشان ما حبيتش أنكد على القراء .. لكن الحقيقة أسوأ من كده بكتير .. أنا عارف بس مش عايز أقول

:-D

ياللا

كل سنة وإنتي طيبة وعيد سعيد

الأحد, أكتوبر 14, 2007

 
Blogger No Fear said...

السلام عليكم
أولا
كل سنة و حضرتك طيب
و عيد سعيد عليك و علي الأسرة كلها إن شاء الله
..
بمناسبة البوست
كلمة واحدة
يا نهار أسود

الأحد, أكتوبر 14, 2007

 
Blogger كلاكيت تانى وتانى said...

انا مقدرتش اكمل البوست بتاعك عشان موضوعك دة لازم اصلا يتعملة مليون بوست وبوست دة ازمة مجتمعنا ووسيلة المجتمعات الصغيرة فى التقدم والازدهار اللى احنا مش عارفين نوصلها زى الصين واندونيسيا ودول صغرى كتير اعتمدت ع الكفاءة بس
احنا هنا بنغير كل موضوعاتنا وحياتنا فى اطار سياسى طبعا ماهو شيخ الازهر عملها اشمعنى انت
واذا كان رب البيت بالدف
كفاءة موضوعك اخر كفاءة بس مين يفهم
تحياتى

الأحد, أكتوبر 14, 2007

 
Blogger يا مراكبي said...

No Fear

وإنت بالصحة والسلامة

تعليقك تحفة بصراحة

أعجزت فأوجزت

وخير الكلام ما قل ودل

الأحد, أكتوبر 14, 2007

 
Blogger osama said...

ديما بخرج من البوست اللي بتكتبه باستفادة ... ...مرة عن ازاي نحسب الخطة الاستراتيجية ومرة نحسب الكفاءة .. وطبعا مش الاستفادة اني بس عرفت الطرق لان الاهم الاستفادة من ما وراء كتابه السطور ... لكن يمكن بيجذبني الجديد ...
دمت بكل ود...
خالص تحياتي

الأحد, أكتوبر 14, 2007

 
Blogger يا مراكبي said...

كلاكيت تانى وتانى

إنت كلامك مظبوط .. كل الأعمال لو تم إنجازها بكفاءة .. هيتغير شكل البلد تماما

والكفاءة هي = حجم الإنجاز بالنسبة للوقت

يعني ننجز أكتر في نفس الوقت أو ننجز الل إحنا متعودين عليه في وقت أقل

ساعتها هتفرق بلدنا كتير في أقل وقت ممكن .. بس على رأيك .. مين يفهم؟

ياترى عندك مدونة؟ أنا مش عارف أوصل لعنوانها

الأحد, أكتوبر 14, 2007

 
Blogger يا مراكبي said...

osama

تعليقك ده هو قمة سعادتي .. أسعد أيامي لما أعرف إن اللي بأقوله بيوصل للناس وممكن حد يفهمه ويأثر فيه

جايز نكون في يوم من الأيام سبب ولو صغير جدا للإصلاح

تحيات ليك

الأحد, أكتوبر 14, 2007

 
Blogger kaed said...

كل سنة و إنت طيب يا هندسة
يابنى علشان نشتغل بكفاءة 90% لازم نكون بنقبض على قد الشغل دة ودة المستحيل بعينة فى ظل كادر المرتبات الموجود حاليا
وسليملى على الزوغان

الأحد, أكتوبر 14, 2007

 
Blogger Epitaph said...

:D
سبحان الله


انا من رأيي دع الخلق للخالق
ربك يحلها ينفخ في صورتنا

كل سنة و حضرتك طيب و عيد سعيد عليك و علي اسرتك الكريمة

لا بس بجد
تدوينة كفاءة الصراحة
:)

الأحد, أكتوبر 14, 2007

 
Blogger يا مراكبي said...

kaed

إمممممم

دي وجهة نظر محتاجة بحث .. لأن الزيادة في المرتبات مش هتيجي إلا لو الناس إشتغلوا بكفاءة عالية وتدور عجلة الإنتاج بأضعاف ما هي عليه الآن وبالتالي هتزيد الأرباح

لازم الناس تشتغل في الأول شغل جامد في أول كام شهر لحد ما تحصل الطفرة وبعد كده هنقدر ندفع المرتبات المحترمة .. غير كده لأ

وما ينفعش نقول طب يدقعوا مرتبات كويسة في الأول وإلا هنكون رجعنا لقصة البيضة الأول وألا الفرخة

تحياتي

الأحد, أكتوبر 14, 2007

 
Blogger يا مراكبي said...

Epitaph

ماشي .. مش هاجيب في سيرة الناس تاني وهأتبع مبدأ دع الخلق للخالق

:-D

كل سنة وإنتي طيبة وكويس إن التدوينة عجبتك .. أهو يبقى فيه حاجة تطلع كفاءة في البلد دي على الأقل

الأحد, أكتوبر 14, 2007

 
Blogger آلام وآمال said...

الله يكرمك اتأكد تاني كده من النموذج ده يمكن تكون نسيت حاجة كده ولا كده
:D

وانا مستنيك اهو وربنا يسهل
:)

الأحد, أكتوبر 14, 2007

 
Blogger يا مراكبي said...

آلام وآمال

أنا بقى لي ساعتين عمال أراجع المعادلات الحسابية من تاني من ساعة ما جاني تعليقك لكن مش لاقي حاجة غلط

هأبعت الموضوع لدكتور صاحبي في الجامعة جايز لعل وعسى يكون فيه أمل وتطلع معادلاتي غلط

ربنا يسهل

:-D

الأحد, أكتوبر 14, 2007

 
Blogger بيتنا القديم said...

عامل ايه في الغربة يا بن عمي

انشالله تكون بخير وسلامة

العيد في مصر حاجة تانية وانت عارف

مراكب في النيل وموتسيكلات الساعة

بعشرين جنية...وحناطير

بتتحنطر...وسعد الصغير...وكورنيش

النيل وحاجة صاقعة ببس ترمس ترمس...

والبرج وجمال وحصنة في الهرم...وكل شئ لا

تجده سوي في بلدك سوي شئ واحد...إحترام

إبن البلد..!!

كل سنة وانت والاسرة بخير

وإديها تانجو

الأحد, أكتوبر 14, 2007

 
Blogger اسكندراني اوي said...

كل سنه وانت طيب يا هندسه

ايه الكلام الكبييير اوي اوي ده

والله يا هندسه الحسابات دي مهمه جدا ان الناس كلها تقراها
لحسن العمليه بقت تيكيلم تيكيلم خالص

ربنا يهدي الحال

تحياتي لك يا عزيزي

الأحد, أكتوبر 14, 2007

 
Blogger М€ŝЋМΣŞĦ said...

كل سنه وانت طيب

عشان كده التخصص مطلوب .لانه البديل الوحيد لرفع الكفاءه الفرديه

الأحد, أكتوبر 14, 2007

 
Blogger لماضة said...

انجليزى ده يا مرسى
هههههه
معلش اصلى كنت ادبى
قصدى علمى علوم
بفهم فى الجثث بس
بس الموضوع ده كبير يا مراكبى هتقلبهم علينا كده
بجد موضوع
كفآآآآآآآآآآآآءة
كل سنه وحضرتك بالصحه والسلامه والاسره الكريمه بخير
واضح ان كحك الحاجه كان كفآاااااءه قوى

الأحد, أكتوبر 14, 2007

 
Blogger Anima said...

احمد ربنا انهم بيشتغلوا بكفاءة 90%

ايه انت حتتبطر عالنعمة (مش متأكدة ازا كنتم بتقولوا تتبطر دي)

سلاموا عليكم

الأحد, أكتوبر 14, 2007

 
Blogger Amr Ahmed said...

بغض النظر عن البوست

وعن نسبة كفاءة المصريين

المبالغ فيها طبعا

90% يا باشمهندس

انت مجتش مصر من امتي

كل سنة وانت طيب يا هندسة

عيد سعيد

الأحد, أكتوبر 14, 2007

 
Blogger doha said...

كنت عايز من حضرتك تحسبلنا برضه حسبة كدة
احنا عندنا خمسة فى المكتب
وبما انى شغال فى الحكومة
فااعلى واحد عندنا فى المكتب بيشتغل بكفاءة نسبتها
عشرين فى المية
واقل واحد سالب عشرين فى المية
واحد عشرين فى المية
والتانى
عشرة فى المية
والتالت
عشرة فى المية
والرابع سالب عشرة فى المية
والخامس
سالب عشرين فى المية
كنت حابب اعرف نسبة كفاءة المكتب
مع العلم
انى المكتب ده
بتقوم عليه اعمال
المنطقة كلها
وبتعتمد عليه المصلحة اعتماد كلى
ولك كل الشكر والاحترام

الأحد, أكتوبر 14, 2007

 
Blogger يا مراكبي said...

بيتنا القديم

ولو إنك يتغلوش عالموضوع لكن بجد بجد وحشتني كل الحاجات الحلوة اللي إنت حكينها عن مصر دي .. أنا بقى لي كتير قوي بعيد عن الحلجلت دي حتى لما كنت في مصر

ناقصنا بس الإحترام؟ دي بقى فاكرها كويس وبأحسها كل ما أنزل أجازة .. من أول نزولي من الطيارة

كل سنة وإنت طيب .. قلبت علينا المواجع

الأحد, أكتوبر 14, 2007

 
Blogger Ehab said...

السلام عليكم و رحمه الله و بركاته
كل سنه و حضرتك طيب يا هندسه

و الله تفكير هندسي سليم
و فاكرتني بايام هندسه ...مع اني سايبها من كام شهر بس

و مالكوش دعوه بالراجل
:D

الأحد, أكتوبر 14, 2007

 
Blogger loumi said...

العزيز الباشمهندز
أحمد
هو إنت دايماً تفاجئني بحاجات كده
بس بجد هو في حد في اي مصلحه حكوميه ممكن يكون بيشتغل بكفائة 90%؟
مستحيل
هوغالبا في واحد بين كل 3 مكاتب بيشتغل بكفائة 70% بس
والباقي إنت عارف بقا عشان ما نغمش الناس يعني كفايه إنت نكدت عليهم
هههههههههههههههههه
كل عام وانت بخير
والأسرة الكريمه

ألا إنتوا بتاكلوا كعك على أنهي طريقه؟
تحياتي للحاجه خاصة
:)

الاثنين, أكتوبر 15, 2007

 
Blogger بيتنا القديم said...

العيد فرحة
يا سلام
واجمل فرحة
يا سلام
تجمع شمل بعيد وقريب
سعدنا بيها
سعدنا بيها
بيخليها
بيخليها
ذكري جميلة لبعد العيد
غنو معايا غنو
غنو
وقولوا ورايا قولوا
قولوا
كتر يا رب في اعيادنا
واطرح فيها البركة وزيد
جانا العيد اهو جانا العيد
جانا العيد اهو جانا العيد
.........................
من مأثورات صفاء ابو السعود
قبل الزواج من الشيخ صالح كامل
اللي خلي كل ايامها عييييييييييد
وعجبي
ـــــــــــــــــــــــــــــــــ
كل عام وانتم بخير

الاثنين, أكتوبر 15, 2007

 
Blogger يا مراكبي said...

اسكندراني اوي

كل سنه وانت طيب

أدينا بنحاول ننور شمعة صغيرة في الظلام .. يمكن ربنا يكرمنا


تحياتي الغالية ليك

الاثنين, أكتوبر 15, 2007

 
Blogger يا مراكبي said...

М€ŝЋМΣŞĦ

جملتك سليمة جدا .. كل العالم المتقدم بيؤمن دلوقت بمدأ التخصص .. دي أحسن طريقة للحصول على نتايج عالية

منور

الاثنين, أكتوبر 15, 2007

 
Blogger يا مراكبي said...

لماضة

أنا بقى كنت علمي رياضة قسم أدبي

هههههههه

وبعدين مين دول اللي هنقلبهم علينا .. صباح الخير .. هو فيه حد صاحي؟

كل سنة وإنتي طيبة .. وأحب أوضح إن الحاجة مراتي ما عملتش كحك السنة دي

:-(

يعني شوفوني بأي حاجة ينوبكوا ثواب

الاثنين, أكتوبر 15, 2007

 
Blogger يا مراكبي said...

Anima

أنا بحمد ربنا وبأبوس رجلي وش وظهر

:-D

تتبطر دي كلمة مصرية برضه .. يعني مشتركة بيننا وبينكم

:-D

كل عام وأنتم بخير

الاثنين, أكتوبر 15, 2007

 
Blogger يا مراكبي said...

Amr Ahmed

هي ال 90% زادت عن كده وأنا مش داريان وألا إيه؟

هه؟

طمني الله يخليك

:-D

كل سنة وإنت طيب

الاثنين, أكتوبر 15, 2007

 
Blogger يا مراكبي said...

doha

والله أحرجتني جامد جدا

أنا معادلاتي الحسابية دي مش متصممه على إنها تقبل أرقام سالبة أبدا .. إنت كده هتخليني أعمل بحث تاني خالص عن الحالة دي

ولو إني شايف إنكم تغطوني وتصوتوا أحسن

بقى كفاءة بالسالب؟ يا نهار أسود ومنيل

الاثنين, أكتوبر 15, 2007

 
Blogger يا مراكبي said...

Ehab

وعليكم السلام و رحمه الله و بركاته
كل سنه و إنت طيب

سايب الهندسة من كام شهر ولحقت تنسى؟ كويس جدا جدا .. إنت كده مية مية

:-D

وبعدين أنا ما جيبتش يرة الراجل إلا بالخير .. هتلبسنا تهمة وإلا إيه؟

:-D

نورتني

الاثنين, أكتوبر 15, 2007

 
Blogger يا مراكبي said...

loumi

أنا قلت 90% علشان أبعد عن الكآبة شوية في العيد .. لكن أنا عارف إنها مش محصلة 50% حتى

وكفاية النكد اللي في آخر البوست

:-D

كل سنة وإنتي والأسرة الكريمة بخير

مافيش عندتا كحك السنة للأسف .. هي دي الطريقة الجديدة جدا بتاعتنا

:-D

الاثنين, أكتوبر 15, 2007

 
Blogger يا مراكبي said...

بيتنا القديم
تاني مرة

حلوة أعنية صفاء أبو السعود دي

ما فيش حاجة بقى لهيفاء وهبي؟

:-D

منور من تاني

الاثنين, أكتوبر 15, 2007

 
Blogger خمسة فضفضة said...

السلام عليكم ورحمة الله وبركاته

كل سنة وانت طيب يا باشمهندس

شوف حضرتك بناء علي حسابات الكفاءة دي يبقي نسبة الكفاءة العامه في مصر هي -1000000 في الميه
واهو ربنا ساترها معانا ببركة دعا الوالدين

قول ياباسط


تحياتي وعيد سعيد

الاثنين, أكتوبر 15, 2007

 
Blogger hamsaa said...

تحياتي اليك كل ما تعلمنا اصبح الله يرحمه
كتاباتك جميلة جدا جدا
اشكرك على تواصلك معي و اعدك بالتواصل معك دائما فما تكتبه يستحق القراءة فعلا
همسه

الاثنين, أكتوبر 15, 2007

 
Blogger بيجاسوس المصرى said...

هى بلد كسلانة اصلا يبقى فين الكفاءة
اللى ممكن تكون 100 فى 100

كل سنة و انتى طيب يا باشمهندس و عيد سعيد عليك و على الاسرة جميعا

الاثنين, أكتوبر 15, 2007

 
Blogger يا مراكبي said...

خمسة فضفضة

وعليكم السلام ورحمة الله وبركاته

كل سنة وانت طيبة يا دكتورة

وبعدين حرام عليكي .. الكفاءة العامة لمصر مليون في المائة بس؟ بحبحي إيدك شوية بلاش بخل وظلم للبلد

:-D

ربنا يخليلنا دعاء الوالدين الجامد قوي ده

الاثنين, أكتوبر 15, 2007

 
Blogger Tarek said...

Dear Ahmed,

I like the idea of this article so much, and if you don't mind, I've translated and published your post on Global Voices Online.

http://www.globalvoicesonline.org/2007/10/15/egypt-efficiency/

الاثنين, أكتوبر 15, 2007

 
Blogger يَحيى المِصري said...

بص يا معلم أنا معاك إن الواحد لازم يشتغل 110 في المية

بس الحسبة اللي إنت عاملها غلط من الناحية الرياضية
لأن ممكن نعتبر كفاءة 90 في المية تكافئ إحتمالية صواب 90 في المية
فتبعا لنظرية الإحتمالات عملية الضرب لحساب الكفائة الكلية تتم فقط في حالة العمليات المتتالية المعتمدة على بعض
فإذا كانت العمليات غير معتمدة على بعض يبقى الكفائة الكلية تساوي كفاءة عملية واحدة

بس خلاص

الاثنين, أكتوبر 15, 2007

 
Blogger شقاوة شعب said...

يا خبااار ده احنا كدة لازم نشتغل بكفاءة تزيد عن الألف فى الماية
لان دول 70 مليون مش هجص يعنى


ربنا يسترها معاكى يا مصر

وكل سنة وحضرتك طيب

الاثنين, أكتوبر 15, 2007

 
Blogger Tamer Nabil said...

ياسلام سلم

اول مرة اعرف كدة

خلاص بقى لامشاركة بعد اليوم وللو وجدت يبقى النسبة لاتقل عن 100 فى المية

هههههه

تحياتى

الاثنين, أكتوبر 15, 2007

 
Blogger Hannoda said...

في الأول

لما شفت الرقم رايح فين حسيت بإحباط شديد جدا

جدا

و مخبّيش عليك.. كنت على وشك اني ألطم

بس لما وصلت لآخر البوست
وحسيت بالروح اللي اتكتب بيها
روح واحد بيتكلم بمرح ممزوج بعصبية و نرفزة و هم مستخبيين وبيدلّوا على حد خايف ع البلد ده

و ماتقولش بتبلّى عليك

و بعدين لقيتك خاتم بالكلمتين دول
اللهم قد بلغت .. اللهم فأشهد

قلبي إرتاح و إطمنت ان البلد ده فيها ناس لسة كده

الاثنين, أكتوبر 15, 2007

 
Blogger Hannoda said...

ايييه ده

نسيت أقولك
كل سنة و انت طيب
:)

الاثنين, أكتوبر 15, 2007

 
Blogger البرديــــــة المصرية said...

الاول كل سنة وانت طيب والسنة الجاية تكون فى مكة ان شاء الله

فيه ملحوظة بس يا باشمهندس
احنا مستحيل كفاءة الفرد عندنا توصل لنسبة تسعين ولا تمانين ولا حتى خمستاشر
ببساطة كوادر العمل عندنا فى كل المجالات معظمهم جه على مقولة الرجل الغير مناسب فى المكان الغير مناسب

يعنى موظف معين ممكن عشان وسطة جابته أو مجموعة اللى جابه هنا أو الشركة باباه مديرها أو هو اساسا متعين لان لازم حد يتعين والسلام

فيه مشكلة اكبر وهى ازاى نختار الكوادر صح قبل ما نفكر نزود انتاجيتها او كفاءتها

ودمتم بخير

الثلاثاء, أكتوبر 16, 2007

 
Blogger Sampateek said...

يعني ايه كفاءة اصلا؟؟
مش دي اللي هي تحت الكبد؟
مالها هي بعافية و لا اية؟
مش فاهمة عايز اية يعني
نقطع نفسنا بقى؟


تحياتي

الثلاثاء, أكتوبر 16, 2007

 
Blogger إنـســانـة said...

مش عارفة بس فكرتنى بقانون تناقص الغلة الحدية اللى هارونا بيه فى كلية الإقتصاد الله يرحم ايامها بردو

بس عشان مش ازعل حضرتك ونظراتك .. احنا نلاقى شغل الأول وبعدين نبقى نفاصل فى الكفاءة على مهلنا إن شاء الله

:'(

وكل سنة وحضرتك بخير وطيب

ويجعله عامر

صحيح .. انا كل ماجى هنا الاقى فاينتنى بوستات كتيرة جداااااااااا واعقد اقرا واعلق .. بيجلى ساعتها إحساس الطالب البليد اللى جاى متأخر ع الحصة مش عارفة ليه

يلا مش مشكلة

سلااااااااام عليكم

الثلاثاء, أكتوبر 16, 2007

 
Blogger الأباصيرى said...

ايوة مش فاهم برضة

أنت عايز أية دلوقتى

يعنى م الأخر تحب
نوفرلهم الكلة ولا نعملهم سندوشتات حلاوة بالقشطة

الثلاثاء, أكتوبر 16, 2007

 
Blogger esraa said...

انت عندك حق في كلامك
ولازم يكون عندنا ضمير


كل سنة وانت طيب

ويارب يكون كان عيد سعيد عليك

الثلاثاء, أكتوبر 16, 2007

 
Blogger mariam said...

الحمد لله انى مش بحب الحسابات
بس الغريبه انك بتفترض اننا بنشتغل بنسبة 90% و الكفاءه طلعت صفر

طيب لو افترضنا اننا بنشتغل بنسبة 50% رغم انى اشك فى ذلك
الكفاءه هتكون تحت الصفر بقى و لا ايه

بس انت كده طمنتنى ان سعد زغلول كان عنده حق لما قال مفيش فايده

الثلاثاء, أكتوبر 16, 2007

 
Blogger يا مراكبي said...

hamsaa

بصراحة .. أنا شايف إن فعلا كل اللي بيدرسوه بقى الله يرحمه لأن ولا حاجة منه بتتطبق

متشكر جدا على متابعتك وإطرائك

الثلاثاء, أكتوبر 16, 2007

 
Blogger بنت القمر said...

لا والله طب ازاي بقا
طب في حل احسن بلاش موظفين خالص عشان الحكومه تشتغل عدل لا بجد نظريه صعبه اوي
يعني مثلا لما الموظفين بيزيدوا بيتكلوا علي بعض في الشغل ولا بيأسفنوا في بعض ولا ايه؟ مش فاهمه
وبعدين الموظف المصري بعد حساب الاجازات والاعياد والمرضي والاعتيادي اكتشفوا انه بيشتغل 27 دقيقه في النهار كمان بكفاءة تعبانه اتاري البلد حالها مال
تحياتي

الأربعاء, أكتوبر 17, 2007

 
Blogger القلم السكندري said...

السلام عليكم

أولا كل سنة وانت طيب

ثانيا:

بدون تعليق


ولا اقولك؟؟

تحيا مصر

!!!

ربنا يرحمنا رحمته

ومعلش بقي ملقيتش بيت شعر المرة دي

غير هو بيت يتيم

وكم في مصر من المضحكات***ولكنه ضحك كالبكي

تحياتي ياباش مهندس

الأربعاء, أكتوبر 17, 2007

 
Blogger اعشق فى اليل ضوء القمر said...

يا هندسه
كل مره تطلع بحكايه جديده مره
كبر الجى جى
ومره تخطيط إستراتيجى
ومره مش عارف إيه وقال إيه
كفاءة كفاءة
يا عم إنت غاوى توجع قلبى وخلاص
فكرتنى فى شغلى بعد مارحت بإسبوع صاحبت الشركة تجمعت بينا وقالت لو فيه خمسه بس مخلصين هيكون حال المصنع أحسن طبعا من جوايا بضحك صاحبة المصنع ياريت تقراء البوست بتاعك علشان تفهم المشكله مش فى خمسه وبس

الأربعاء, أكتوبر 17, 2007

 
Blogger gohayna said...

يا مراكبي

كل سنه وانت بالف خير وصحه وسلامه



ويارب ايامك كلها تبقي عيد في عيد
انت والاسره الكريمة


اما الموضوع فانت يعيني محروق كدا وانت بتتكلم

الراجل عنده حق

بيعمل لمصلحتنا

احنا الي فاهمينه غلط

الراجل بجد تعب معانا خالص


المهم يا سيدي

كل سنه وانت بالف خير

ويارب يهنيك دايما دايما


تحياتي ليك جدا

الخميس, أكتوبر 18, 2007

 
Blogger حسن ارابيسك said...

تعرف انا من زمان وأنا أقول يارب شفته فين شفته فين ...أه في الجهاز المركزي للمحاسبات الدور الأول
أو في الجهاز المركزي للمحاسبات الدور التاني
أو في الجهاز المركزي للمحاسبات الدور التالت
أو في الجهاز المركزي للمحاسبات الدور الرابع
أو في الجهاز المركزي للمحاسبات الدور الخامس
أو في الجهاز المركزي للمحاسبات الدور السادس
أو في الجهاز المركزي للمحاسبات الدور السابع
أو في الجهاز المركزي للمحاسبات الدور الثامن
أو في الجهاز المركزي للمحاسبات الدور التاسع

الخميس, أكتوبر 18, 2007

 
Blogger sayed saad said...

مش عارف لية مش مستريح لنظرية بتاعتك دية يا مراكبي بس من كلامك
وصلت لحاجة جميلةو قوية
هو ان كتير بيبان كبير فعيون الناس لكن هو اقل بكثير فوق ما نتصور
وبالتالي نلاقي نفسينا ادينا للأشياء حجم اكبر من حجمها
تحياتي اليك يا صاحب السهل الصعب

الخميس, أكتوبر 18, 2007

 
Blogger امام الجيل said...

يعنى مفيشششششش فايدة
بس معقول يعنى فى الغرب الكفاءة بتصل لكده
منكم نستفيد
بس ازاى ده يتحقق
يعنى الناس بتختلف فى امكانياتها عن بعض
اممممممم
معلومة جديدة ومهمة اوى
ثانك يوووووو

الخميس, أكتوبر 18, 2007

 
Blogger mohamed said...

كل سنة وانت طيب يا باشمهندس
هى طريقة الحساب دى صحيحة اذا كان كل الافراد عملهم مرتبط ببعض بمعنى انى لو فيه واحد شغال بنسبة 90% وواحد بيكمل على شغلة برده نفس النسبة معناها انى لو الاولانى جالة عشرة هيعطل واحد والتناى هيعطل واحد من التمانيه يعنى الموضوع منقدرش نقول الموضوع مطلق
وشكراً

الخميس, أكتوبر 18, 2007

 
Blogger سلسبيل said...

يامراكبي
ليه الاحصاءات المحبطه دي
بس اللي انا مش فاهماه...
مالكفاءه بتاعت العيال بتوع الثانويه العامة يا حبايبي بتعدي ساعات ال 99% وساعات الله اكبر كده بتعدي ال 100% وبرضه التعليم مافلحش ولا هما شخصيا بيفلحو ف مستقبلهم بعد كده...تفتكر العيب ف الكفاءه ...ولا نستوردها دي كمان هههههههههههههههههه
عموما انا رايي ان العيب ف ال 70 مليون بجد ياجماعه كده كتير اوي عايزين نخفف الحموله ههههههههه قصدي نتخلص من شويه البشر دول...حد يشوفلهم عباره تانيه ولا طياره تالته ولا قطر عاشر...نفسنا نخف عن نفسنا شويه عشان الدنيا بقت كتمه وحر وبصراحه كده ماهو من الحسبه دي يااما نزود الكفاءه..يااما نقلل السكان وبما اننا لو عملنا ايه الكفاءه مش حتزيد فبقول نخلص م السكان احسن واوفر
مش كده برضه؟؟

الخميس, أكتوبر 18, 2007

 
Blogger يا مراكبي said...

بيجاسوس المصرى

كلمة "بلد كسلانة" دي طبعا إنت بتعني بيها غالبية الشعب .. بذل أقل مجهود وإنتظار أكبر مردود .. وده مستحيل طبعا

كل سنة و انت طيب وتكون في أفضل حال

الجمعة, أكتوبر 19, 2007

 
Blogger يا مراكبي said...

Tarek

That is really great .. thank you very much for your intrest and kind effort .. it gives me pleasure for sure.

الجمعة, أكتوبر 19, 2007

 
Blogger يا مراكبي said...

يَحيى المِصري

خلاص بقى خليها في سرك .. إستر عليا الله يسترك

ما إنت شايف أهو إن الناس صدقت المعادلات بتاعتي .. لازم تجرسني يعني؟

أمسح تعليقك ده دلوقت؟

:-D

كل سنة وإنت طيب .. نورتني

الجمعة, أكتوبر 19, 2007

 
Blogger امرأة تقول الذي لا يقال said...

غريبة أوي الحكاية دي
بجد استعجبت

منك نستفيد

الجمعة, أكتوبر 19, 2007

 
Anonymous غير معرف said...

Ya 3amy Enta hatkhom wala eyh !!!
it is going to be -INSHAA Allah- (5*0.9)/5 unless they are dependent. if you are getting one paper to be done by 5 of them seqntial then u r right,but for parallel work NO Ya Marakby Ya akhoyah !!!!
Thanafy....Mohandes adeem ayam ElKambayooter(Computer)abu fatalah (string)....Salam Ya hoby

الجمعة, أكتوبر 19, 2007

 
Blogger زمردة said...

السلام عليكم ورحمة الله وبركاته
يعني ايه كفاءة؟ :D
اول مرة اسمع عنها في بلدنا :D
انا اللي بسمعه هنا
ان بشوية فهلوة تلقى الجيب اتملى
لكن شغل وكفاءة :D
عيب :D
ربنا يهدي الجميع
سلمت يداك
بوست كفاءة
وكل سنة وحضرتك طيب

الجمعة, أكتوبر 19, 2007

 
Blogger Rania said...

هو بصراحة يعنى و فى الواقع و مش فهمة حاجة يعنى , بس انت ادرى هندسة بقى بس مش عارفة ازى لو ضربنا 90% اربع مرات يحصل كدة
ه
عموما لك تاج عندى
و يا ريت مترحرجنيش تانى بالعمليات الحسابية دى

الجمعة, أكتوبر 19, 2007

 
Blogger طـعـمـة said...

سبحان الله
!!!!!

تفتكر الصين - تلت سكان العالم - الكفاءة العامة عندها كام ؟

الجمعة, أكتوبر 19, 2007

 
Blogger david santos said...

The regime of Mubarak and his minions is every day to transgress human rights. More than 10,000 Sudanese refugees are arrested and more than 100 have been killed.
Illustrative of the world arrogance and the atrocities committed against the Sudanese refugees by this criminal regime of Mubarak.

الجمعة, أكتوبر 19, 2007

 
Blogger يا مراكبي said...

شقاوة شعب

ولا ألف في المائة ولا حاجة .. هو نقرب يس للمائة في المائة وهيمشي الحال

لكن طبعا يارب يسترها علينا دايما

كل سنة وإنتي طيبة

الجمعة, أكتوبر 19, 2007

 
Blogger فى القلب said...

يا با شمهندس

البوست ده قنبله و اللهى قنبله

حقيقى الناس المثقفه الى زى حضرتك بتفدنا جاااااااااامد جدا

يااااه بقه معقوله درجه التخلف بتعتنا بالشكل ده

ده أحنا فعلا عايشين برحمه ربنا و عطفه بسسسسسسسسسسسسسسسسسسسسسسس

الجمعة, أكتوبر 19, 2007

 
Blogger يا مراكبي said...

Tamer Nabil

ياعمنا إيه اللي جاب سيرة نسبة المشاركة والحاجات دي بس .. إحنا ما بنتكلمش في السياسة خالص .. المدونة دي للهجايص بس

ربنا يجعل كلامنا خفيف عليهم

هههههه

منور

السبت, أكتوبر 20, 2007

 
Blogger يا مراكبي said...

Hannoda

مش عارف أشكرك إزاي على فهمك العالي ده ليا وللبوست كمان

لو بجد تعرفي بحب بلدي قد إيه

أنا حتى في كل شغلي وفي كل الدول اللي لفيتها دايما بأحاول أعمل دعاية لبلدي .. ودايما بأحاول أخلي نفسي في صورة كويسة قدام الكل علشان أكون دعاية كويسة لبلدي

يارب يصلح لنا الأحوال جميعا

وكل سنة إنتي بألف صحة وسلامة

السبت, أكتوبر 20, 2007

 
Blogger كراكيب عادل said...

شوف يا اخي ازي ؟؟ !!

علشان كدة البلد كل ما تكتر في العدد بتقل الكفاءة

والله انا كنت فاكر ان المهام الكبيرة اذا قسمت علي عدد اكبر هانت

اتاري الموضوع فية معادلات

يالا حصل خيييييييييييير

السبت, أكتوبر 20, 2007

 
Blogger hend...hanady said...

ده انت متفائل اوى لو فيه 10 الاف موظف بس فى مصر بيشتغلوا بكفاءة 60% بس كان حالنا اتغير
كل سنة وانت طيب

السبت, أكتوبر 20, 2007

 
Anonymous koki said...

يا بيبي العبرة في الصلابة

سيبك من الكفاءة

السبت, أكتوبر 20, 2007

 
Blogger shreef said...

طيب هوا ليه الكفاءه العامة بتقل اصلا يابشمهندس ياريت تعرفنا ليه اصل اخوك يعني في الرياضة او اي حاجة تتعلق بالعمليات الحسابية ابيض..مش ابيض اوي يعني بس اهو انت فاهم بئى مع اني كلية تجارة بس ما علينا..المهم انا عايز اعرف هي ليه بتقل اصلا هوا ليه لما العدد بيزيد الكفاءه بتقل اذا كان ده اللي بتوضحه الارقام فا على اي اساس يعني الكلام ده و بعدين حتى لما الكفاءة للشخص بئت 99 في المية مهي بردو بتقل يعني بردو اكيد هتوصل لعدد معين و هتبئى صفر..هوا غالبا ليها تفسير بس هستنى تفسير حضرتك لاني معنديش القدرة على التخيل مع الارقام بالذات؟؟...عموما منتظر رد حضرتك...سلام

السبت, أكتوبر 20, 2007

 
Blogger sayed saad said...

السلام عليكم ورحمة الله
يا مراكبي بقالي كام يوم كل ما انوي اكتب تعليق ليك اتلخبط مع افكاري وارجع اقرا البوست بتاعك تاني نظرية الكفاءة دية بيها الحمد لله بلدنا بقت زي الفل لا نافعة طابلة ولا طار
بس في حاجة عاوز اقولك عليها
لو طبقت نظريتك دية على امريكا
او اوروبا هيبقى الحال متشابه معانا ودة مش صح
لو ان عندي شك في تطبيق النظرية دية
بس انا هقولك على حاجة انا عارف ان في سلبيات كتير جدا فبلدنا وفينا
بس بردة في حاجات جميلة تحياتى

الأحد, أكتوبر 21, 2007

 
Blogger رينـــــــــــا said...

كل سنه وانت طيب يا اخى الكريم
ربنا يصبرنا يااااااارب ويخلص المصريين من عذابهم
قول امين :D

الأحد, أكتوبر 21, 2007

 
Blogger دكتور حر said...

م .أحمد

لفته جميله
بس مرعبه ومخيبه لللآمال وكمان محبطه

ده لو اتحسبت اساسا 90 % يبقى مش عايزين حاجه من الدنيا تاني

كل عام وأنتم بخير

وأستأذنك في وضع رابط لكم عندي

الأحد, أكتوبر 21, 2007

 
Blogger أحمد سلامــه said...

يعني معني كده ان مفيش تقدم لدولة عادية الا لو كان الموظفين بيشتغلو بنسبة 100%
طيب وبردو معني كده ان في دول كفاءات الناس فيها اعلى من 100%
يعني الامارات مثلا الكفاءة فيها ممكن يكون متوسطها ميقلش عن 95 % بما انك جار ليهم وتعرف اكتر
واخيرا ان مجهود الفلرد في بلدة هنا 100 في 100 بيضيع لانة بيتاثر بالعالم الكفاءة اللي حواليه
---------------------
كل سة وانت طيب

الاثنين, أكتوبر 22, 2007

 
Blogger hana said...

بس هوة فين الشغل والوظائف
ما خلاص بقى اتلغت ههه
يعنى الكفاءة صفر مهما حاولنا
نغيرها

بس بجد عمليه حسابية
جامدة جدا يا باشمهندس
تحياتى لك

الاثنين, أكتوبر 22, 2007

 
Blogger zordeak said...

فكرة حلوة جداااااااا

كويس انى فى طب


علشان مفكرش بالاسلوب ده

لو كنت بفكر بالاسلوب ده كنت اكتشفت ازاى ان البلد ماشية على صامولة ومسمار وربك هو الستار

كل سنة وانت طيب يا باشمهندس


وعلى فكرة

بعتلك تاج

:p

الثلاثاء, أكتوبر 23, 2007

 
Blogger Rozza!.......فاقد الذاكرة said...

كل عام وانتى بخير
الي عاوز افهمه انو لو اتنين اشتغلوا 99 % حيكون وضع البلد كويس, طيب لو شغلوا ضميهم بالشغل حتكون المعادلة ده صح؟
99% X 99% X conscience=150%
مجرد سؤال عشان افهم رياضيات

الثلاثاء, أكتوبر 23, 2007

 
Blogger أحمد المصري said...

انا جاي اقولك كل سنة وانت طيب وبقالي كتير اوي مقريتش كلامك الرائع..معلش بقى ..عدنا والعود أحمد0

الثلاثاء, أكتوبر 23, 2007

 
Blogger مُزمُز said...

أنا الحساب عندي في الضياع

فمش فاهم العمليات دي

بس تقدر تقول إني فهمت قصدك

:)

الثلاثاء, أكتوبر 23, 2007

 
Blogger يا مراكبي said...

البرديــــــة المصرية

كل سنة وانت طيب .. أنا فعلا قريب جدا من مكة والحمد لله

الرجل الغير مناسب فى المكان الغير مناسب أوالعكس هو أساس إنهيار أي نظام .. وهو السبيل الوحيد والسهل والسريع لتحقيق إنهيار أوتوماتيكي لأي دولة

وبالتالي أنا فعلا معاك في إن إختيار الكوادر صح هو فعلا أهم قبل ما نفكر نزود او كفاءتها .. لأن إختارنا السليم هيحقق لنا كفاءة مبدئية عالية جدا من الأول

الثلاثاء, أكتوبر 23, 2007

 
Blogger يا مراكبي said...

Sampateek

بالظبط كده .. الكفاءة دي هي اللي تحت الكبد وفوق الكلاوي على طول

فطرنا بقى وبقينا نجيب في سيرة الأكل

وبعدين ولا تقطعي نفسك ولا حاجة .. أنا اللي هأقطع نفسي .. عنك إنتي

الثلاثاء, أكتوبر 23, 2007

 
Blogger يا مراكبي said...

إنـســانـة

قانون تناقص مين؟ مين الغلة الحدية ده؟ لو عندك ترجمة بالإنجليزي يبقى أفيدينا

أنا شايف إنك لسة "عاطلة يا جدعان" في البروفايل .. ربنا يبعت لك الشغل بس المهم الكفاءة بقى .. ماشي؟

وبعدين تيجي بدري أو تيجي متأخرة مش مهم .. المهم إنك نورتينا

الثلاثاء, أكتوبر 23, 2007

 
Blogger يا مراكبي said...

الأباصيرى

ياعم أنا مش عايز حاجة .. إيدك إنت على 20 دينار وأنا ألغيلك البوست ده

:-D

فيه إختيارات تانية غير الكلة؟

الأربعاء, أكتوبر 24, 2007

 
Blogger يا مراكبي said...

esraa

الضمييييييير

بقى لي كتير ما سمعتش الكلمة دي

ياللا

كل سنة وإنتي طيبة

الأربعاء, أكتوبر 24, 2007

 
Blogger يا مراكبي said...

mariam

كمان هنبدأ من 50% مش من 90%؟ لا يبقى أروح من هنا أحسن

وأحب أكرر إن سعد باشا زغلول قال: مافيش فايدة يا صفية .. غطيني وصوتي عليا

الأربعاء, أكتوبر 24, 2007

 
Blogger شــــمـس الديـن said...

السلام عليكم و رحمة الله و بركاتة

ازيك يا باشمهندز ... عامل ايه ؟؟

بس بجد مش عارفة المقالة مش عارفة حاسة ان المثال اللي حضرتك بتقولة دا لا ينطبق علي مصر لانه ببساطة المصريين كلهم مش بيشتغلوا في بوتقة واحدة

غزيزي الفاضل ... حضرتك مش عايش في مصر و مش مطحون فيها علشان تحكم عليها كدا ...

اولا هي ملحوظة ذهنية بسيطة قبل البدء في اي كلام ...القطاع العام و الموظفين اللي مضايقك اللي فيه و صورة الموظف اللي بتطلع في افلام السبعينات اصبح لا وجود له لان البلد ببساطة تم بيعها في المزاد العلني للي يدفع اقل ( كل شئ تباع حتي البنوك ) بدل ما يصلحوا اللي موجود ... دا اولا


ثانيا بقي اساسا لما باعوا البلد معادش بقي فيها فكر كل اللي فيها مجرد ناس معاها فلوس و بتدجور علي كسب سريع فقط ...لكن انه يتوجد صناعة حقيقية في مصر فدا اصبح درب من دروب الخيال ... يعني كل شئ بمعني كل شئ اصبح يستورد من الخارج دا حصل نتيجة لبيع البلد بطرقة عشوائية ...

بالاضافة الي ان الغلاء بقي بشع و نظرا لانه مفيش انتاج فاصبحت السلع الخدمية غالية و دا دليل علي فشل النظام الاقتصادي المصري ( يعني التليفون زاد و الكهرباء زادت بشكل بشع )


لما القطاع العام اللي كان ماسك قطاع الحديد و الصلب (اللي كان بينقب عن المعادن و يستخرجة من المناجم ) اتباع و مسكة حوت الحديد اللي بقي بيجيب الحديد من الخردة و السعر علي 1500% اثر دا علي البناء و بقي اقتناء شقة في حتة محترمة درب من دروب الخيال لاي شاب متخرج

الواحد علشان يعيس مستور لازم يكون دخلة مش اقل من 1000 جنية شهريا علشان يقدر يواجة الزيادةف ي الاسعار و الاكل و المواصلات ... قول لي بقي مين في مصر من الناس الطبيعية اللي زيينا بيقدر ياخد المبلغ دا علشان يكفي نفسة و يكفل لنفسة حياة كريمة ؟؟؟

الموضوع اعقد من مجرد حسبة بسيطة حضرتك قومت بها .... الموضوع كبير بجد و اهم شئ ان الارادة السياسة و اليات اتخاذ القرار تتغير علشان ينصلح حالنا ....

دمت في حفظ و رعاية الله

الأربعاء, أكتوبر 24, 2007

 
Blogger يا مراكبي said...

بنت القمر

سبة وعشرين دقيقة ده كان زمااااااان

ياريتنا كنا حافظنا على ال 27 دقيقة دول .. كان حالنا بقى أحسن شوية من اللي إحنا فيه ده

ما علينا

نورتينا

الأربعاء, أكتوبر 24, 2007

 
Blogger Ammar Jarrar said...

نفضل بزيارة مدونتي الجديدة
http://archimanager.blogspot.com
عمار جرار من فلسطين

الأربعاء, أكتوبر 24, 2007

 
Blogger يا مراكبي said...

القلم السكندري


وعليكم السلام ورحمة الله

كل سنة وانت طيب

تحياتي لصاحب التعليقات الشعرية المميزة دايما

الأربعاء, أكتوبر 24, 2007

 
Blogger None said...

ياااااااااااااااسلاااااااام

دا كل دا كمان علي اساس يعني _ خير اللهم ما اجعله خير _ كل موظف هايشتغل بكفاءة 90 %


دا انت متفائل اوي ياراجل ...اصفار ايه اللي بتقول عليها ..دا انت لو طبقت معادلتك دي واقعيا النتيجه هاتكون سالب ما لا نهايه ( مالا نهايه ملهاش علامه في الكيبورد!!)

الأربعاء, أكتوبر 24, 2007

 
Blogger يا مراكبي said...

اعشق فى اليل ضوء القمر

كل الناس قلبها وجعها مني؟ الظاهر الحاجة عندها حق

إوعى صاحبة المصنع تقرأ الكلام ده لتقفل المصنع من أولها

الأربعاء, أكتوبر 24, 2007

 
Blogger يا مراكبي said...

gohayna

كل سنه وانتي بالف وصحه وسلامه

طبعا أنا محروق يا دكتورة .. يعني أنا مثلا قاعد أتفسح برة مصر؟ ما إنتي عارفه البير وغطاه

أما الراجل فطبعا عنده 70 مليون حق .. وألا أنتي عندك كلام تاني؟

قولي كده لو عندك كلام تاني؟

:-D

الأربعاء, أكتوبر 24, 2007

 
Blogger إنـســـانـة said...

اترجم يافندم ومترجمش ليه يعنى هو انا صغيرة ؟

وبعدين اساسا احنا بناخدهم بالعنجليزى يابويي

ما علينا

خد عندك .. قانون تناقص المنفعة الحدية هو

law of diminishing marginal return

او

law of diminishing return

وايوتها خدمة احنا عاطلين وقاعدين ومهيسين كمان وكفاءة جامد اوى

ماشى ياابو مها؟؟؟

سلااااااام
:D

الخميس, أكتوبر 25, 2007

 
Blogger عمرو غريب said...

التخصص شي جميل و مفيد

الخميس, أكتوبر 25, 2007

 
Blogger أميرة ويلز said...

بارك الله فيك على المعلومات اللى بتتحفنا بيها دى
احنا ناقصين احباط ؟؟

طب شغلونا بس واحنا هنشتغل بكفاءة

الخميس, أكتوبر 25, 2007

 
Blogger أميرة ويلز said...

على فكرة يامراكبى انا كل مااجى ارد على البوست النت يفصل ودة اللى اخرنى :(

الخميس, أكتوبر 25, 2007

 
Blogger يا مراكبي said...

حسن ارابيسك

هههههه

كل دي أدوار في الجهاز المركزي للمحاسبات وحالنا لسه بالشكل ده؟

أنا أعتقد إنه موجود في الدور ال13 في مجمع التحرير

:-D

منور والله يا أبو علي

الجمعة, أكتوبر 26, 2007

 
Blogger يا مراكبي said...

sayed saad

وأنا كمان مش مسترح للنظرية دي برضه

بس نعمل إيه؟ هي الحقيقة دايما كده

بس المهم إنك تعرفه إنك لازم تحس دايما إن أداءك أقل من اللازم علشان دايما يكون عندك تحسين مستمر

وهو ده الجديد بره

الجمعة, أكتوبر 26, 2007

 
Blogger يا مراكبي said...

امام الجيل

سعد زغلول قال ما فيش فايدة من مائة سنة ولسه برضه مافيش فايده بجد

وبالنسبة للغرب ففعلا الكفاءة العامة للخدمات بتفوق ال 90% فعلا لأن أغلب الناس شغالة بكفاءة تصل لل 100% بجد وجد

You welcome

:-D

الجمعة, أكتوبر 26, 2007

 
Blogger يا مراكبي said...

mohamed

نداء إلى كل المهندسين اللي لسة فاكرين حاجات من أيام الجامعة: ما تسيحوليش الله يكرمكم .. إستروا عليا وخلوها في سركم وخلاص

:-D

مش مهم طريقة الحساب يا محمد .. المهم الفكرة اللي وراء الموضوع

دايما بالتوفيق

الجمعة, أكتوبر 26, 2007

 
Blogger يا مراكبي said...

سلسبيل

أنا معاكي طبعا .. أسهل حل هو إننا نخف الحمولة .. قنبلة نوويه تآخد في وشها بتاع 70 مليون ويفضل كام واحد تتوزع عليهم ثروة البلد اللي فاضله وهيبقوا مليارديرات

ههههه

اللي أنا أعرفه بقى إن فيه دول تعداد سكانها أضعاف أضعاف أضعافنا وقدرت تلاقي حلول تخلي شعوبها تعيش في رفاهية من غير ما يضحوا بفرد واحد يخفوا بيه الحمولة

الجمعة, أكتوبر 26, 2007

 
Blogger يا مراكبي said...

امرأة تقول الذي لا يقال

هي من ناحية إنها حكاية غريبة فهي مش غريبة لكن جديدة شوية

أنا مستعجب أكتر منك على حالنا بجد

منورة

الجمعة, أكتوبر 26, 2007

 
Blogger يا مراكبي said...

Thanafy

تعليقك ظريف جدا جدا .. إنت بجد مهندس من أيام الكومبيوتر أبو فتله؟

طب حضرت المسطرة الحاسبة والحاجات الغريبة دي؟

ربنا يديك الصحة وتنورنا كمان وكمان

السبت, أكتوبر 27, 2007

 
Blogger mohamed said...

حلو جدا موضوعك بجد
جميل عندك حق وعلى فكرة كفائه 90%دى مش كتير
دىقليله جدا ورقم سلبى كمان لان ببساطه لو كل واحد عمل اللى عليه المفروض تبقى الكفائه 100%الطبيعى يعنى بس بردة مش عاوزين كدة تخيل بقى لو حد ابتكر وفكر وعمل اكتر من اللى عليه هتزيد الكفائه عن 100%وبالتالى هيبقى حاصل الضرب مع كتر الاعداد نتيجته اكبر وبالتالى هيبقى فيه حاجة اسمها تقدم حاجة اسمه نمو سمعنا عنها قبل كدة لما كانوا كانوا بيقولولنا فى الابتدائى ان بلدنا بلد نامى
مجرد سمعنا
شكرا على الموضوع ويارب الناس تفكر بقى
سلاااااااااااام

السبت, أكتوبر 27, 2007

 
Blogger Esmat said...

تحية لك
الحقيقة مرة أوى لكن الاسباب كتيرة
وحتلاقى كفاءة الاداء فى المنطقة العربية معدومة بالشكل ده طبعا فى المؤسسات الحكومية فقط
لكن القطاع الخاص غير
إحنا محتاجين نرفع شعار إنسف حكومتك القديمة
ونستورد حكومة من الصين
أو من تايوان أو كوريا يا سيدى
وشوف كفاءتنا حتبقى إزاى
تحياتى لك الموضوع جد خطير

السبت, أكتوبر 27, 2007

 
Blogger rony said...

انا احب اقول لحضرتك برضه فكره بنفذها عندنا فى الشغل لزياده الكفاءه الانتاجيه للعاملين بمصلحه الضرائب اسم الله على مقامكم المصريه الاو وهى:
لو مكتب فيه موظف واحد بيشتغل 90% يبقى كفاءته 90% مفيش اختلاف عليها
لو مكتب فيه اتنين موظفين واحد فيهم كفاءته 90%....نعمل نفسنا مش شايفين واحد ويبقى الكفاءه الانتاجيه للمكتب 90% ....وهلم جرجر
ودى اخر ماتوصلت اليه ابحاثنا ودراستنا فى مجال التنميه البشريه

السبت, أكتوبر 27, 2007

 
Blogger doha said...

فينك ياباشا
وحشتنا
تدويناتك الجميلة

الأحد, أكتوبر 28, 2007

 
Blogger يا مراكبي said...

زمردة

وعليكم السلام ورحمة الله وبركاته

إحنا طبعا بنعتذر إننا جبنا سيرة الألفظ الوحشة دي زي الكفاءة والتخطيط والذي منه

بعد كده كل الكلام هيبقى عن الفهلوة وبس

نورتينا

الاثنين, أكتوبر 29, 2007

 
Blogger يا مراكبي said...

Rania

هو لو ضربنا 90% بالجزمة هتطلع نتيجة أجمل من كدة بكتير .. هندسة بقى

فيه تاج ليا؟
ده إن شاء الله هيكون سادس تاج لسة ما رديتش عليه

الاثنين, أكتوبر 29, 2007

 
Blogger شئ مني said...

انا مؤمنة جدا بالتقان والاخلاص في العمل
لما يكون في ايدي شغلانه واهملها نص نص او حتى بنسبة 90 % زي ما حضرتك قلت
يبقى غيري هيعمل معايا كده يبقى كلنا هنعمل مع بعض كده يبقى المحصلة صفر زي ما حضرتك قلت
وهو ده المناخ العام في كل مجال في مصر
بس بيبقى اخطر في مجالات زي الصحة والتعليم
حقيقي جريمة
ربنا يستر على ولادنا

الاثنين, أكتوبر 29, 2007

 
Blogger يا مراكبي said...

طـعـمـة

الصين؟ سبحان الله .. الأرقام الخاصة بحجم الناتج المحلي للصين بالنسبة لعدد سكانهم المهول بتقول إن كفاءة الشخص الصيني بتكون تقريبا 100% .. وأنا على فكرة شفت الموضوع ده بعيني مع العمالة الصينية في الخليج

الاثنين, أكتوبر 29, 2007

 
Blogger يا مراكبي said...

david santos

Welcome back and thank you for participation here

الاثنين, أكتوبر 29, 2007

 
Blogger يا مراكبي said...

فى القلب

قنبلة مرة واحدة؟ وناس مثقفة؟ ربنا يكرمك على الكلام الجامد ده

وزي ما إنتي قلتي: لولا رحمة ربنا وكرمة وعطفة كان ممكن تصحي الصبح ما تلاقيش البلد من أساسة

منورانا

الاثنين, أكتوبر 29, 2007

 
Blogger يا مراكبي said...

كراكيب عادل

حبيب قلبي .. إزيك؟

شوفت بقى بتوع الحساب والجبر والهندسة بيوجعوا قلبنا إزاي؟

حصل خير صحيح

الاثنين, أكتوبر 29, 2007

 
Blogger يا مراكبي said...

hend...hanady

عشرة آلاف موظف من السعين مليون؟ ده أنا أرمي نفسي من فوق برج دبي بعد ما يخلص

وكمان 60% كفاءة؟ يعني مش 90% حتى؟

ربنا يستر علينا

كل سنة وإنتي طيبة

الاثنين, أكتوبر 29, 2007

 
Blogger يا مراكبي said...

koki

الصلابة جزء من الكفاءة ومش العكس على فكرة

الاثنين, أكتوبر 29, 2007

 
Blogger يا مراكبي said...

shreef

كلامك حسابيا مظبوط .. والمعنى من البوست هو إننا لازم نكون أقرب ما يكون لل 100% يعني نكون 99.999999999 في المائة مثلا .. وهو ده المفروض في أي حد بيشتغل في أي مكان

وفيه أماكن ما فيهاش أي إحتمال لإن الكفاءة تقل عن 100% أصلا كمان لما يكون مكان العمل فيه خطورة جسيمة على الناس

الاثنين, أكتوبر 29, 2007

 
Blogger اعشق فى اليل ضوء القمر said...

يا مركبى
شوف بقى لمابتكون بتكلم وصح كلمتك بتوجع وبتقف فى الزور

الاثنين, أكتوبر 29, 2007

 
Blogger يا مراكبي said...

sayed saad

وعليكم السلام ورحمة الله

في الحقيقة هو الموجود برة إن أغلب الناس بتشتغل بكفاءة 100% وهو ده المفروض .. مش عجبة يعني

وعلشان كده بتلاقي كفائتهم العامة دايما عالية جدا .. لكن مش 100% طبعا

منور يا صاحب المكسرات

الثلاثاء, أكتوبر 30, 2007

 
Blogger يا مراكبي said...

رينـــــــــــا

كل سنه وانتي بألف صحة وسلامة

أنا قلت آمين أهو

بس عذاب المصريين ده عبارة عن أحوال وألا عبارة عن أشخاص؟

الثلاثاء, أكتوبر 30, 2007

 
Blogger يا مراكبي said...

دكتور حر

طبعا النظرية مرعبة جدا .. هي صحيح مش سليمة قوي لكن الفكرة الأساسية صحيحة

أهلا بيك وبأشكرك على إضافتي عندك .. ده شيء يشرفني

الثلاثاء, أكتوبر 30, 2007

 
Blogger تخاريف خاصه! said...

ده احنا على كده كفاءتنا هنا..تحت الصفر!!!!!

الله المستعااااان

:D

الثلاثاء, أكتوبر 30, 2007

 
Blogger يا مراكبي said...

أحمد سلامــه

سؤالك ده في محله: يعني معني كده ان مفيش تقدم لدولة عادية الا لو كان الموظفين بيشتغلو بنسبة 100%؟

الإجابة: أيوة .. وهو ده الصح والقاعدة .. ومش من المفروض يكون هو الإستثناء

قال رسول الله صلى الله عليه وسلم: إن الله يحب إذا عمل أحدكم عملا أن يتقنه

الثلاثاء, أكتوبر 30, 2007

 
Blogger يا مراكبي said...

hana

أنا عارف إن الكفاءة صفر من زمان بس أهو الواحد بيولع شمعة بدل ما نشتم الضلمة

:-D

متشكر قوي على الزيارة والإطراء

الثلاثاء, أكتوبر 30, 2007

 
Blogger يا مراكبي said...

zordeak

حلوة قوي حكاية إن البلد ماشية على صامولة ومسمار دي .. ههههه

بعتلي تاج؟ ولا كأني سمعت حاجة

:p

الثلاثاء, أكتوبر 30, 2007

 
Blogger يا مراكبي said...

Rozza!.......فاقد الذاكرة

كل عام وانتى بخير

يا صديقي إحنا مش عايزين 150% ولا حاجة .. يلرب بس نقرب لل 100% وخلص .. يبقى فضل وعدل من ربنا

منورني دايما

الثلاثاء, أكتوبر 30, 2007

 
Blogger يا مراكبي said...

أحمد المصري

كل سنة وانت طيب وتنورني دايما في أي وقت .. أهلا بيك وحمد الله عالسلامة

الثلاثاء, أكتوبر 30, 2007

 
Blogger يا مراكبي said...

مُزمُز

مش مهم العمليات الحسابية .. المهم إنه وصل ليك المغزى اللي وراها

منورني

الثلاثاء, أكتوبر 30, 2007

 
Blogger يا مراكبي said...

شــــمـس الديـن

وعليكم السلام و رحمة الله و بركاتة

أنا بخير والحمد لله

طبعا ما أقدرش أنكر إن تعليقك فيه جوانب عالية جدا من الصحة والحقيقة .. وأنا فعلا مقدر إن الموضوع كبير .. وأكبر بكتير من مجرد حسبة ساذجة أنا إبتكرتها

التغييرات السريعة جدا اللي بتمر بيها مصر فعلا بتخلي الواحد يحس وكأنه بقى له 100 سنة برة البلد

ربنا يسترها على بلادنا .. أو اللي هيفضل من بلادنا .. وأشكرك على التعليق الجميل ده

الثلاثاء, أكتوبر 30, 2007

 
Blogger يا مراكبي said...

Ammar Jarrar

أهلا بيك ويشرفني زيلرتك طبعا

الثلاثاء, أكتوبر 30, 2007

 
Blogger يا مراكبي said...

None

إيه رأيك بقى؟
كل ده وأنا فارض من الأول 90% .. يعتي الحقيقة أسوأ بكتييييييير

بس إنت لفتي نظري لحاجة .. إنهم لازم يخترعوا في الكيبورد رمز السالب مالانهاية علشان المستخدمين المصريين

برافو عليكي

الثلاثاء, أكتوبر 30, 2007

 
Blogger hana said...

صحيح نضىء شمعة بدال ما نعلن الظلام
بس عارف انا اشوف انه العمل باى دول اخرى يمكن أعلى مستوى وكفاءة
مش عارفة ليه
عندنا بمصر المستوى متدنى للغاية
مش عارفة يمكن لانه الرواتب غير مجزية
ولا لانه البلد مش بتعرف اذااى تدير
العمالة وتنسقها بشكل جيد
دة حتى لما خلوا العمل خاص حطوا قدامه مليون مشكله
تخلى اللى عندة كفاءة يجيله احبااط
ههههه
سلام يا باشمهندس
تحياتى لك

الثلاثاء, أكتوبر 30, 2007

 
Blogger hana said...

اة على فكرة

باشكرك كثير لزيارتك مدونتى
تحياتى لك

الثلاثاء, أكتوبر 30, 2007

 
Blogger يا مراكبي said...

إنـســـانـة

مها تاني؟ ما فيش فايدة؟ كل يوم أسافين كده؟

هنعديها المرة دي .. زي كل مرة يعني

:-D

أنا على فكرة طلبت الترجمة علشان كل المحاسبة اللي أعرفها وإتعلمتها كانت بالإنجليزي

الثلاثاء, أكتوبر 30, 2007

 
Blogger يا مراكبي said...

عمرو غريب

وفعلا إحنا بلد بتكره التخصص فعلا

الثلاثاء, أكتوبر 30, 2007

 
Blogger يا مراكبي said...

أميرة ويلز

الله يبارك فيكي .. خلاص هأبطل معلومات من دي .. آخر مرة خلاص

إنتي تنوري في أي وقت وولا يهمك تأخير ولا غيره

الثلاثاء, أكتوبر 30, 2007

 
Blogger يا مراكبي said...

mohamed

الله ينور عليك

فعلا الكفاءة لازم تكون 100% ومش أقل .. ومش بعيد ولا صعب ولا حاجة .. ده هو ده الصح والمفروض .. وزي ما إنت قلت إحنا بلد نامي .. يعني محتاجين مجهود وكفاءة تهد الجبال علشان نلحق الركب

الثلاثاء, أكتوبر 30, 2007

 
Blogger يا مراكبي said...

esmat

حلو تعبير: إنسف حكومتك القديمة

في الحقيقة أنا مندهش لأن حكوماتنا مش عايزة حتى تقلد التجارب الناجحة لدول تانية وفيه منها القريب مننا كمان

فيه تعمد لعدم الإصلاح يا عزيزتي

الثلاثاء, أكتوبر 30, 2007

 
Blogger يا مراكبي said...

rony

بنحيي الباحثة القديرة روني على النتايج الرائعة اللي توصلت ليها أثناء شغلها في قلب الحدث .. قلب الحكومة المصرية

إحنا نغمض عينينا عن اللي أقل من 90 في المائة دول ويادار ما دخلك شر

الأربعاء, أكتوبر 31, 2007

 
Blogger يا مراكبي said...

doha

متشكر جدا على السؤال .. مشاغل الشغل وضيق الوقت بس هما اللي مأخريني هنا شوية

الأربعاء, أكتوبر 31, 2007

 
Blogger يا مراكبي said...

شئ مني

بالظبط كده

لو كل واحد قل عن 100% هتبقى النتيجة العامة صفر

وفيه مجالات لا تحتمل ما هو أقل من 100% أبدا .. لكن ما فيش فايدة برضة

وبجد بجد .. ربنا يتر علينا

الأربعاء, أكتوبر 31, 2007

 
Blogger يا مراكبي said...

أعشق في الليل ضوء القمر

ما هي الحقيقة دايما كده يا عزيزي: صادمة

الأربعاء, أكتوبر 31, 2007

 
Blogger يا مراكبي said...

تخاريف خاصه!

حسابيا مش ممكن تنزل تحت الصف .. بتقف لحد الصفر وبس

لكن فعليا .. طبعا إحنا تحت الصفر بكتيييييير

الأربعاء, أكتوبر 31, 2007

 
Blogger يا مراكبي said...

hana

أهم شيء بيفرق بين دولة والتانية هو التخطيط .. وبعد كده متابعة التخطيط ده

إحنا بقى الكلمة الوحشة دي لسة ما وصلتش عندنا

وبعدين لا شكر ولا حاجة .. أنا يسعدني زيارتك طبعا

الأربعاء, أكتوبر 31, 2007

 
Blogger hana said...

التخطيط
فعلا لا وصلنا للتخطيط ولا هنوصل
انا حاسة اننا واقفين مكاننا
دة اذا مكناش بنرجع للخلف
البلد دى بجد عاوزة تخطيط ومتابعة
تانية خالص
فى كل المجالات

تحياتى لك

الخميس, نوفمبر 01, 2007

 
Blogger يا مراكبي said...

hana

التخطيط .. جيتي عالجرح تاني

ياريت تشوفي ده

http://yamarakby.blogspot.com/2007/09/blog-post.html

منوراني دايما

السبت, نوفمبر 03, 2007

 

إرسال تعليق

Links to this post:

إنشاء رابط

<< Home