شد القلوع يا مراكبي ... مافيش رجوع يا مراكبي

الجمعة، سبتمبر 14، 2007

كبر الجي .. وروق الدي

بعد نشر البوست اللي قبل اللي فات لقيت الحاجة مراتي بتقول لي: إنت مش تبطل بقى تنكد على الناس؟ كل مرة كده تكتب عن مشاكل البلد وتدوس على الجروح ؟ مش تكتب حاجة تخلي الناس تفرفش كده؟ وطبعا أنا بصفتي راجل البيت وكلمتي هي اللي بتمشي دايما ..قصدي بتمشي أحيانا .. هي ما بتمشيش أصلا علشان عندها كساح .. قررت إني أكتب موضوع خفيف .. وعلى رأي الواد إياه في فيلم مرجان أحمد مرجان .. هأكبر الجي .. وأروق الدي .. ونحب ننوه للسادة المستمعين اللي مش متابعين أحداث الدوري المصري .. إن "الجي" هي إختصار لكلمة الجمجة .. و"الدي" هي إختصار لكلمة الدماغ .. والله أعلم .. وممكن تغطوني وتصوتوا لو عايزين
.
ومادام نويت المرة دي أكبر الجي وأروق الدي .. يبقى هي دي الفرصة الوحيدة اللي هأقدر أعرض فيها آخر أبحاثي اللغوية اللي لا هتقدم ولا هتأخر زي كلام الناس بتاع جورج وسوف .. والبحث ده عنوانه هو ظاهرة البخل الجماعي .. واللي خلاني أعمل البحث ده هو مجموعة من الأصدقاء المصريين اللي بينتموا لمدينة ساحلية شهيرة مش عايز أقول إسمها .. لكن هما وروني النجوم في عز المغرب بسبب البخل بتاعهم .. وبخل إيه بقى .. من النوع الجماعي .. وطبعا زي كل مرة هألاقي واحد ييجي ويسألني ويقول لي يا أسطى مراكبي: هو فيه بخل فردي وبخل جماعي؟ أقول له كالعادة برضه :إنت جيت للي هيفيدك .. البخل الجماعي ده موجود من زمان وعندي الأدله من الشعر العربي القديم .. شوفوا كده
.
أقاموا الديدبان على يفاع
وقالوا لا تنم .. للديدبان
فإن آنست شخصا من بعيد
فصفق بالبنان على البنان
تراهم خشية الأضياف خرسا
ويأتون الصلاة بلا أذان
.
والأبيات دي معناها كده بالهجايص إن جماعة البخلاء دول حطوا ناضورجي فوق مكان عالي وقالوله: إوعى تنام يابن ال .. ولو لمحت أي حد جاي من بعيد تنبهنا وتصقف سوسة على طول .. وتلاقيهم عايشين من غير صوت لحسن حد يسمعهم ويتضايف عندهم .. لدرجة إنهم بيصلوا من غير أدان
.
حلوة مش كده؟ شوفوا بقى الأبيات التانية دي
.
قوم إذا إستنبح الأضياف كلبهم
قالوا لأمهم .. بولي على النار
.
واضحة دي وألا عايزة تفسير؟ يعني إذا البوبي بتاعهم "هوهو" وده معناه إن فيه ضيف جاي من بعيد .. تروح أمهم اللي عمالة تطبخ الأكل في قدرة على النار تجري تطفي النار بمياه الصرف الصحي .. وياريت ما حدش يربط بين البيتين دول وبين موضوع البوليس اللي بيكبس على جماعة حشاشين يقوم واحد فيه يعمل بي بي على الفحم أو بيسموه الولعة ولا مؤاخذه
.
وطبعا إنتم متخيلين كان إيه رد فعل أصحابي إياهم لما عرضت البحث ده .. لدرجة إنهم بدأو يبحثوا في إن أصولهم بتنتمي للقبائل العربية اللي إتكلم عنها الشعر ده وألا لأ .. ما علينا .. إحنا بكده نكون وصلنا لنهاية البرنامج .. نرجوا أن تكونوا قد إستمتعم بالعرض المقرف ده .. ونكون كبرنا الجي وروقنا الدي .. ونراكم في موضوع نكد بعد كده على طول إن شاء الله .. أي خدمة

التسميات:

124 Comments:

Anonymous غير معرف said...

بردو انا اول تعليق
بصراحة مش لاقية كومنت عشان انا مش فاهمة حاجة
صيام بقى كل سنة وانت طيب

الجمعة, سبتمبر 14, 2007

 
Blogger tota said...

يعني مافيش حل وسط اما تنكد علي الشعب اما تقرفه وتقلب معدته
بس بصدق يعني هوه انت كتبت البوست ده قبل الفطار ولا بعده؟؟
من الواضح انك كنت في حاله شعريه مايعلم بيها الاربنا
ربنا معاك
سلامي ليك يامراكبي

الجمعة, سبتمبر 14, 2007

 
Blogger كراكيب عادل said...

كل سنة وانت طيب يا مراكبي

طيب مش خايف مركبك يروج ناحية المدينة دي

بس تعرف البلد دي مع كل دة

مجتمع منتج وهايل وياريت مصر بكل محافظاتها زيهم

عالم معندهاش وقت للمجاملات ولا السرمحة

انا مش من هناك علي فكرة

العكس خالص

:)

الجمعة, سبتمبر 14, 2007

 
Blogger loumi said...

العزيز احمد باشا
انا بس نفسي المودام
بما إنها صاحبة فكرة بوست يفرح من غير نكد تقراه وتقولنا إيه رأيها
والله انتوا الإتنين زي العسل
وربنا يسعدكم
بس نصيحه ما تبقاش تسمع كلامها وإلا انت قاصد عشان بعد كده تقول إن هي السبب
إنا بس جايه اهدّي النفوس
:):):)
بس ابقا قول لي دي محافظه ايه عشان ما ابقاش اروح عندهم احسن الكلب بتاعهم يهوهو وإلا حاجه
:)
أصل انا ما اعرفش غير مدينه ساحليه واحده وما اظنش إنك تقصدها
ههههههههههه
تحياتي ورمضان كريم
سلام خاص جدا جدا للمدام

الجمعة, سبتمبر 14, 2007

 
Blogger Tamer Nabil said...

البخل دة موجود من زمان وهبعيش الى اخر الزمان

تحياتى

الجمعة, سبتمبر 14, 2007

 
Blogger only spot said...

ربنا يكفينا شر البخل بس لان ظروف المديته ديه مش ولا بد ولانهم بيعيشو على موسم الطلبه والدراسه وبيكون ده الموسم بتاعهم وطول السنه الحال واقف اتعرف عنهم انهم بخله جدا ويكفيك شرهم دول الى موجودين فى الصعيد اما لو كنت تقصد اهل المدينه التانيه الى منهم الى قارفنا فى عشتنا فدول الله يهديهم
بس مش زى اهل المدينه الى فى الصعيد
دى اول مره اعلق عندك تحياتى ليك على البوست ورمضان كريم

الجمعة, سبتمبر 14, 2007

 
Blogger Amr Ahmed said...

الا هي ايه البلد دي
هه
ههه؟

ايه
هه

قول متخافش

هههههههههههه
كل سنة وانت طيب

السبت, سبتمبر 15, 2007

 
Blogger Gid-Do - جدو said...

مراكبى

دانت ياجدع بتشرح الشعر بطريقة ـ ربنا ما يحكمك فى تلامذة ـ قال الكلب يهوهو ـ انت لية مش عاوز تقول انك كنت فى وسط جماعة دمايطة على وزن اسيطة ـ دة مش بخل دة حرص حتى اسالهم راح يقولولك تتعشى ولا تنام خفيف ـ تبات هنا ولا اللوكاندة احسن ـ دة مش بخل دة صراحة والصراحة راحة
نصيحة ـ اكتب فى النكد احسن لايق عليك وعلينا أو اقلب على الحواديت ليك فيها بدل ما نضرب انا وانت ـ انت علشان كتبت وانا علشان ترجمت

ملحوظة: ياجماعة الكلام اللى فوق دة كلام الست رمزية جارة المراكبى فى البيت اللى فى اول الشارع ـ شايف بقى لما انا كبرت الجى وروقت الدى عملت اية

السبت, سبتمبر 15, 2007

 
Blogger أميرة ويلز said...

انا مش عارفة ايه اللى جابنى هنا مرتين فى يوم واحد

انا عايزاك تبلغ كلمتين للحجة بقى انا زعلانة منها اوى عشان هى السبب فى البوست دة
ماهى لو الفرفشة كدة يبقى بلاش منها خالص مالها البلاوى اللى مالية البلد دة حتى شر البلية مايفرفش

مع السلامة بقى عشان اتقرفت اوى الصراحة

بقولك صحيح طب مش تنورنا انت فين
اهو طبق القطايف تاه فى السكة
مش مهم القطايف المهم الطبق دة تراث عائلى

السبت, سبتمبر 15, 2007

 
Blogger فى القلب said...

مركبى
أنا حاسه أن البوست ده ليه تكمله
عشان نربط الحكايه ألى حصلتلك

بس أنت عايز تشوقنا صح

أكل صعامك الأبرار
صوم مقبول

السبت, سبتمبر 15, 2007

 
Blogger الشنكوتي الكبير said...

ههههههههه
كل سنه وانت طيب الصيام اشتغل اهو واثاره بانت
عموما بوست يجنن
وعلى فكره انا لاحظت ان فيه ناس من بلاد مشهوره بالبخل الشديد بيكونوا كرماء جدا وناس من حتت مشهوره بالكرم بيطلعوا هجاصين وكلها اشاعات
ما علينا
انت ازيك كده
سلاااااااااااااااااام

السبت, سبتمبر 15, 2007

 
Blogger بيجاسوس المصرى said...

معلش انا جاى بره الموضوع خالص

انا جيت اقولك كل سنة وانتى طيب و بصحة و خير و سعادة دايما بأذن الله يا باشمهندش

السبت, سبتمبر 15, 2007

 
Blogger همسات said...

بس انا على أيامى كان اسمها كبر الجيم
واشترى الدال
:)
ما علينا
المهم نكبرهم ونروقهم على الاخر
:)
كل سنة وانت طيــــــب

السبت, سبتمبر 15, 2007

 
Blogger المهندس السري said...

طريقة جميلة و سلسلة في شرح الشعر، و لو أنها مقرفة حبتين شوية، شكرا يا بشمهندس يا جامد غل البوسط الحلو ده

السبت, سبتمبر 15, 2007

 
Blogger اسكندراني اوي said...

هههههههههههههههههههههههههههههههههههههههههههههههههههه
عسل يا مراكبي يا خبررررررررر ابيض عليك
انا حقول اسم المحافظه واخد عشرين ريال
بس كده حتزعل ناس كتييير منك اوي
هههههههههههههههههههه


واضيفك من الشعر بيت
انهم طققو القرد

يا جدع حد يشرح ابيات الشعر بالشكل ده
اه يا نافوووووووووووخي
اللهم اني صايم

السبت, سبتمبر 15, 2007

 
Blogger اتفضل عندنا said...

ههههههههههههههههه
اموت انا في الكلام بالهجايص ، لا بجد لازم تنزل شرحك ده في كتاب هتكسب منه دهب....اما ياخويا بالنوسبه لاخوانا اياهم، فانا برده اتعاملت معاهم مره وكانت هي المره، خاصة ان انا العرق الشرقاوي بتاعي دايما ينقح عليا فتخيل بقي واحده من اللي عزموا القطار علي الغدا في وسط القبيله دي

السبت, سبتمبر 15, 2007

 
Blogger طـعـمـة said...

سبحان الله
ماتخليك في النكد أحسن يا مراكبي ؟
الهجايص مش لايقة عليك
:D

السبت, سبتمبر 15, 2007

 
Blogger عدى النهار said...

ونراكم في موضوع نكد بعد كده على طول إن شاء الله .. أي خدمة

ده كان كلامك.. وكما هو معروف عنك.. كلمتك مابتنزلش الأرض

يظهر علينا بقينا شعب نكدى وإحنا مش داريين. إنجاز آخر يُضاف لصاحب الضربة الجوية

السبت, سبتمبر 15, 2007

 
Blogger تخاريف خاصه! said...

كل سنه وحضرتك طيب..ومكبر الجى ومروق الدى
دايما يارب...
:)

رمضان كرييييييييم

الأحد, سبتمبر 16, 2007

 
Blogger Epitaph said...

هههه
انا عجبني التفسير والشرح للابيات
الابيات هي اللي هجايص مش الشرح

هههههه


كل سنة وحضرتك بخير و اشرتك كلها يا رب
:)

الأحد, سبتمبر 16, 2007

 
Blogger Esmat said...

كل سنة وانت طيب
و رمضان كريم عليك وعلى المدام
و تقبل الله منكم العمل الصالح وغفر لكم
وانشاء الله السنة الجاية تقضى رمضان فى مصر-قريت تعليقك عند شهر وعرفت انك لم تقضى رمضان فى مصر منذ 5 سنوات
انا منذ 7 سنوات وزوجى الغلبان منذ اكثر من 14 سنة
يعنى احنا غلابة اكتر منك
و رمضان كريم

الأحد, سبتمبر 16, 2007

 
Blogger daktara said...

اولا كل سنة وانت طيب
ثانيا البوست حلو
ثالثا اللون الاصفر علي الخلفية الزرقاء تعبلي عيني قوي
كبر الخط او غير اللون


رمضان كريم


انظر حولك
د. خالد عزب

الأحد, سبتمبر 16, 2007

 
Blogger mariam said...

على كده الحاجه لو قرت البلوج بتاعى هتقول ايه
هى عندها حق طبعا بلاش نكد

سؤال1 ما هو الديدبان؟
سؤال 2 ما هو اليفاع؟

مفيش شعر اسهل من كده شويه

هو البرنامج ده على الأولى و لا التانيه
انا بسأل بس علشان بلاش افتح التليفزيون يعنى

انا بقى مستنيه الموضوع النكد
اصل هو ده المود بتاعى

الأحد, سبتمبر 16, 2007

 
Blogger الشنكوتي الكبير said...

نبأ هاااااام
هبه اختي هتنشر اول كتاب ليها في الأسواق يا ناس
والمفاجأه ان الكتاب هو السلسله اللي كانت بتنشرها في مجلة بص وطل
يوميات اتنين مخطوبين "عمر و ساره"
الموقع بتاع بص وطل نشر الخبر وحاطين الصوره وهي بتمضي العقد
استعدوا عشان تشتروا الكتاب
اهم حاجه ان الكتاب فيه بس اللي هي كتبته مش اللي الناس كتبوه
لأن الفكره ناس حاولت تستغلها وتكتب فيها اللي على مزاجهم

صدقوني هتعجبكم قوي
وممكن تقرأو ا الأجزاء الأولى من ارشيف مجلة بص وطل
والحاضر يعلم الغايب والغايب يسأل الحاضر
سلاااااااااااااااام

الأحد, سبتمبر 16, 2007

 
Blogger يَحيى المِصري said...

كل سنة و إنت طيب يا مراكبي
خد بالك إنت كلمتك مابتمشيش لأنك إنت الراجل الديبلوماسي بتاع البيت و لازم تترفع عن الصغائر دي عشان مسيرة البيت تمشي مش لأي سبب تاني

بس بوست جامد

الأحد, سبتمبر 16, 2007

 
Anonymous E7na said...

السلام عليكم و رمضان كريم
يا ريت تتفضلوا تزورونا و تقولولنا رأيكم
Trateesh Kalam

الأحد, سبتمبر 16, 2007

 
Blogger الأباصيرى said...

شوف ياعم المراكبى
انا مش هتكلم على البوست دة

أنا قولت أزيدك من اشعر بيت
وأتكل على الله وأرجع أشتغل


يا أيها الخارج من بيته …… وهاربا من شدة الخوف
ضيفك قد جاء بزاد له…… فأرجع وكن ضيفا على الضيف .

الأحد, سبتمبر 16, 2007

 
Blogger مروة جمعة said...

صباح الورد
والله أنا بشوف تعليقاتك يا باشمهندس عند مدونين جيران ..وبتبقى حلوة ..قلت أدخل كده ..:)..كلام جميل كلام معقول ..لكن ..حكاية بالهجايص دي "الترجمة الهجايصية"فكرتني بالعزيز أحمد زكي - الله يرحمه- وهو بيقول لسعيد صالح ..في العيال كبرت - أبوووك هيسيب البيت يا سلطان ..هاهاهاها!..كويس انك فهمتني حكاية الجي والدي دي!..اكتب ومايهمكش ربنا معاك ..كل سنة وانت طيب وبالنسبة لكلمتك التي لا تمشي ..في حملة تطعيم ..بس ورا الشمس! تحياتي :)

الاثنين, سبتمبر 17, 2007

 
Blogger Esmeralda said...

بص يا ريس
اولا كل سنه و انت طيب
ثانيا فيما يخص البخل الجماعي او ان جماعه معينه يكون مشتركه فى صفه ما لأ و الاكاده تكون مشهورة بيها فده اعققد انه ممكن يكون ارث ثقافى ينتقل من جيل لجيل
حاجه كده زى اليهود مثلا
على طول فى جماعات و مش بيحاولوا الاندماج او موضوع الماديه بتاعهم لاحساساهم دايما بانهم مش مستقرين فى المكان اللى هما فيه
حاجه اتعودوا عليها طول عمرهم و ورثوها لاولادهم

الاثنين, سبتمبر 17, 2007

 
Blogger القلم السكندري said...

السلام عليكم

ازيك ياباش مهندس

وايه الروقان ده والابحاث الهايلة دي

بس بصراحة اليت التالي في :

قوم اذا استنبح
كان هيكمل رونق بحثك

قوم إذا استنبح الركبان كلبهم ***قالوا لامهم بولي علي النار

فأمسكت بولها أن تجود به***

وما بالت به الا بمقدار

الا هي اسم البلد ايه؟؟

الاثنين, سبتمبر 17, 2007

 
Blogger القلم السكندري said...

بالمناسبة

كنت في مرة في امسية كدة

وكان المدعو فيها شاعرين من البلد اياها اللي بتقول عليها

ففي واحد فيهم بعد الامسية بيتكلم علي بلده

وقعد بقي يرد علي الاشاعات .. واخد بالك انت من كلمة الاشاعات دي.. اللي بتقول انهم بخلا

وهات شعر بقي

ياضيفنا لو زرتنا لوجدتنا***نحن الضيوف وأنت رب المنزل

التاني قال ياجماعة متصدقوش الكلام ده

انت رب المنزل يعني عندك فاتورة الكهربا والمية ادفعهم مدام انت رب المنزل


الخلاصة:

وشهد شاهدج من أهلها


وكل سنة وانتو طيبين

الاثنين, سبتمبر 17, 2007

 
Blogger gohayna said...

كل سنه وانت طيب يا مراكبي ويارب تبقي بالف خير وصحه وسعاده

وجديد التجديد دا خالص والله

موضوع لايت وشيق وجميل

صحيح اللغه بعافيه شويه بس تحفه والله

تسلم ايدك يا مراكبي

كل عام وانت بالف خير يا سيدي

رمضان كريم

الاثنين, سبتمبر 17, 2007

 
Blogger Sampateek said...

hhhhhh
الله يروق بالك يا مراكبي زي ما ضحكتني
على ريحة البيبي اقصد على سيرة البيبي
في ناس كمان بيخافوا يعملوا بيبي لحسن يجوعوا
ههههههههههه

الاثنين, سبتمبر 17, 2007

 
Blogger М€ŝЋМΣŞĦ said...

احييييك علي البحث الرائع ده .. لقد توغلت في عبق التاريخ
:D

بس نوعيه الشعر مش ولابد .. واضح ان اللي كاتبها مكانش عنده صفيحه ميه يطفي بيها النار


وكمان ممكن نلاحظ نوع من عقوق الوالدين عند قديم البخلاء , حيث ان الولد مقامش يطفي النار بنفسه ..لا .. امر والدته انها تطفيها .. ودي قله ادب بصراحه

الثلاثاء, سبتمبر 18, 2007

 
Blogger أُكتب بالرصاص said...

يا عم يا ماراكبي
رمضان كريم
بلاش سيرة الأكل دي

والفحم والحاجات اللي تخلي الواحد يجوع

وبلاش سيرة الحاجات التانية اللي تخلي الواحد يرجع

:)

صباح الخير
عليك

الثلاثاء, سبتمبر 18, 2007

 
Blogger ابن عمر said...

جزاكم الله خيرا
بس كبر الخط
هو انت نظرك مش ضعيف
مثلى

الثلاثاء, سبتمبر 18, 2007

 
Blogger يا مراكبي said...

أشكركم جميعا على التعليقات الجميلة دي .. هأرجع لكم تاني بس لما أستأذن من الحاجة في إني أستخدم الكومبيوتر لأني كلمتي بقى لها يومين تحت الأرض

وبالنسبة للناس اللي بتشوف الخط صغير يا ريت يروحوا فوق عند

View

وبعدين يختاروا

Text size

وبعدين يختاروا

Largest

هيلاقوا الخط مظبوط

أنا راجع إن شاء الله .. أنا جامد جدا

الثلاثاء, سبتمبر 18, 2007

 
Blogger lamada said...

معلش يا عم مراكبى تعليقى اتحذف
يلا ملناش نصيب نكتب واحد جديد
انا مفهمتش حاجه من الشعر لكن شرح حضرتك للابيات كان وافى ومليان بالبلاغه ومعانى الجمال فى الابيات صراحه
انا رايى كنت ضفت الحلزونه ياما الحلزونه
يلا كل سنه وانت مكبر الدى ومروق الجى

الأربعاء, سبتمبر 19, 2007

 
Blogger koukawy said...

ده احنا روقنا و كبرنا الجي و الديعلي الاّخر
بس وجعتني من كتر ما كبرت و خصوصا بقي الصيام و انت فاهم

الأربعاء, سبتمبر 19, 2007

 
Blogger ابن بلد said...

رغم إنى مش فاهم حاجة

لكن كويس

وربنا يقويك

الأربعاء, سبتمبر 19, 2007

 
Blogger اعشق فى اليل ضوء القمر said...

بص بقى يا هندسه
كفايه كده بخل بقى

الأربعاء, سبتمبر 19, 2007

 
Blogger أحمد سلامــه said...

لو قريت البوست دلوقتي هكلفته بصراحة
عندي امتحان اطفال يوم السبت
وانت عارف كتاباتك بتمخمخني جدا
معادنا يوم الاتنين ياصديقي العزيز
دعواتك يا مراكبي

الخميس, سبتمبر 20, 2007

 
Blogger Rania said...

ايه دة يا مراكبى
؟
انت بتقول على اخونا الاصله الحلوين الكرمه الدميطة
الى هما بتوع دمياط يعنى
انهم بخله
وية شوية تقول راس البر كمان منتجع اى كلام ووحش و مش نضيف قول قول ماهو خلاص
توء توء توء توء مكنش العشم
:))))
كل سنه و انت طيب مع انى مفهمتش حاجة من البحث
بس قلت هقرا البوست تانى بعد الفطار
مفيش حد هنا دمياطى يا ناااااااس؟
هههههههههه
تحياتى
و رمضان كريم يا بشمهندس

الخميس, سبتمبر 20, 2007

 
Blogger david santos said...

Thank for posting.

جمال عبد الناصر,

15/1/1918/ - 28/9/1970

The Great, Gamal Abdel Nasser

السبت, سبتمبر 22, 2007

 
Blogger الأباصيرى said...

بقالى يومين بفتكر فى اول البيت اللى انت كاتبة
تقريبا كان كدة

قوم إذا أكلوا أخفوا كلامهم
وأستوثقوا من رتاج الباب والدار
قوم إذا أستنبح الأضياف كلبهم قالوا لامهم بولى على النار

السبت, سبتمبر 22, 2007

 
Blogger صاحب البوابــة said...

عموماً كل سنة وانت طيب

:)

اكثر ما اعجبني

موضوع كلمتك في البيت التى اصيبت بالكساح مؤخراً

:)

الأحد, سبتمبر 23, 2007

 
Blogger سجدة said...

انا مش فاهمة اى حاجة
طب ايه دخل دا فى دا
ومين المدينة الساحلية دى
واضح البوست حالة ذهنية متعسرة شوية

الأحد, سبتمبر 23, 2007

 
Blogger يا مراكبي said...

المجهولة الأولى

ولا أنا كمان فاهم حاجة .. ما أنا صايم برضه

هو مين اللي كتب البوست ده؟

الأحد, سبتمبر 23, 2007

 
Blogger يا مراكبي said...

tota

أنا إفتكرت دلوقت حكاية جحا وحماره لما الناس ما كانش بيعجبها أي حل من الحلول

:-D

أنا بأفكر أقفل المدونة وأريح دماغي وخلاص .. مش أريح؟

:-D

البوست كتبته في حالة السمو اللافكري اللي قبل الفطار على طول وما كنتش شايف اللي قدامي

الأحد, سبتمبر 23, 2007

 
Blogger يا مراكبي said...

كراكيب عادل

ما أنا عارف إنك من العكس خالص وعارف إنت منين بالظبط .. لكن طبعا ما ننكرش إن المدينة دي من أحد قلاع الصناعات اليدوية في مصر

كل سنة وإنت دايما بصحة وسلامة

الأحد, سبتمبر 23, 2007

 
Blogger يا مراكبي said...

loumi

أنا مش عارف ليه الحاجة مراتي ليها الشعبية دي أكتر مني مع إنها مش بتدون ولا بتكتب أي حاجة؟ ولا يمكن علشان إنتوا شوام زي بعض وليكوا في المكدوس؟

عموما بأشكرك على تهدئة النفوس .. وأنا سمعت كلامها بس مجاملة مش ضعف ولا خوف ولا حاجة أبدا

:-D

نورتينا

الأحد, سبتمبر 23, 2007

 
Blogger يا مراكبي said...

Tamer Nabil

ومش البخل بس اللي هيفضل لآخر الزمان .. كل صفات الدنيا كده برضه ودي سنة الحياة

أهلا بيك

الأحد, سبتمبر 23, 2007

 
Blogger يا مراكبي said...

only spot

تقصدي مين باللي قارفنا ده؟ هو فيه حد قارفنا في عيشتنا وأنا مش واخد بالي؟

;-)

أهلا بيكي دايما وكل عام وأنتم بخير

الأحد, سبتمبر 23, 2007

 
Blogger يا مراكبي said...

Amr Ahmed

إنت عارف إني ما بأخافش وشجاع جدا جدا

دي كانت مجينة إفتراضية لزوم الحبكة الدرامية مش أكتر

ما توديناش في داهية بقى

كل سنة وإنت طيب

الأحد, سبتمبر 23, 2007

 
Blogger يا مراكبي said...

Gid-Do - جدو

ربنا يخليك لينا إنت والست رمزية جارتنا وما يحرمناش منكم أبدا .. ودايما كده تكبروا الجي وتروقوا الدي

أنا برضه قل للحاجة كده وهي ما صدقتنيش .. قلتها الناس بتموت في النكد قد عينيها

وبالنسبة لطريقة شرح الشعر فدي الطريقة الحديثة لتطوير التعليم اللي هتوصل المعلومة بسهولة .. بس لسة بدري عقبال ما الناس تفهمني

:-D

الأحد, سبتمبر 23, 2007

 
Blogger يا مراكبي said...

أميرة ويلز

تنوريني يا أميرة حتى لو كل دقيقة .. ده بيتك ومطرحك

بس طبعا من وحي البوست ده ممكن أقول: يا بخت من زار وخفف

هههههه

أنا ما أقدرش أقول كده للحاجة .. قوليلها إنتي أنا ما أقدرش .. مش خوف منها لكن حرصا على مشاعرها

إنتي بعتي الطبق على أي دولة؟
أنا ما يرضينيش إن تراث العيلة يضيع

يجيله بكام الطبق ده؟

:-D

الأحد, سبتمبر 23, 2007

 
Blogger يا مراكبي said...

فى القلب

البوست كان ليه تكملة ووقع مني في السكة .. هنسك عالموضوع ده لحد هنا وخلاص

كل سنة وإنتي والأسرة بخير .. تقبل الله منا ومنكم

الأحد, سبتمبر 23, 2007

 
Blogger albardeya said...

يعنى ايه ؟
النهاردة أكبر الجي , وأروق الدي , وبكره أدلع المي وبعده أهيص العي


أنا مش موافق ...

كل سنة وانت طيب

الأحد, سبتمبر 23, 2007

 
Blogger أحمد سلامــه said...

اااه يا مراكبي
كبر الجي
وروق الدي
يعني نظبط الـ دي جي
جود فيري جود
سمعني احلى صدى صوت
جمال ابيات الشعر الولانية دي
مقريتهاش قبل كده
التانيين دول كنا قرفينا وقارفينهم في ثانوي
بس الاولانيين دول روعة
وتشكر الشرح

الاثنين, سبتمبر 24, 2007

 
Blogger bastokka طهقانة said...

الواحد يكتب تعليق و لا يشد السيفون؟
في الايام المفترجة دي

الاثنين, سبتمبر 24, 2007

 
Blogger يا مراكبي said...

الشنكوتي الكبير

هو فعلا الوقت اللي قبل الفطار بساعة ده بيكون الواحد فيه عامل دماغ جامدة جدا

:-D

والبخل بتاع المدن إياها ده مش قاعدة طبعا نعممها على الكل وخلاص .. لكنها الأغلبية يا عزيزي

منورني بجد

الاثنين, سبتمبر 24, 2007

 
Blogger يا مراكبي said...

بيجاسوس المصرى

إنت تنورني برة الموضوع أو جوة الموضوع

أهلا بيك دايما وكل سنة وإنت طيب ودايما بالتوفيق

الاثنين, سبتمبر 24, 2007

 
Blogger يا مراكبي said...

همسات

أنا على أيامي ما كانش فيه اللغة دي خالص من أصله .. أنا بأتعلمها من الأولاد على فكرة

كل سنة وإنتي طيبة

الاثنين, سبتمبر 24, 2007

 
Blogger يا مراكبي said...

المهندس السري

أنا برضه قلت إن إنت اللي هتفهم طريقتي في شرح الشعر .. أيوة كده رجعت لي ثقتي بنفسي

أهلا بيك دايما .. كل سنة وإنت والمغرب كلها بخير

الاثنين, سبتمبر 24, 2007

 
Blogger يا مراكبي said...

اسكندراني اوي

خد 30 ريال بس ما تقولش على إسم المدينة .. مش عايز مشاكل الله يخليك

:-D

ماله شرح الشعر بس؟ مش لازم نبسط المواضيع شوية للناس وألا إيه؟

:-D

كل سنة وإنت طيب

الاثنين, سبتمبر 24, 2007

 
Blogger يا مراكبي said...

اتفضل عندنا

والله أنا خبرتي في الهجايص مش قد كده لكن بنحاول .. ممكن لو عندك خبرة في الموضوع ده يبقى تساعدينا في تأليف الكتاب ونضمن نجاحه

إنتي طلعتي من الشرقية؟ طيب قولي لجوزك إن فيه مدون وعائلته جايين عندكوا في كندا لزيارة قصيرة بتاع شهرين كده

:-D

الاثنين, سبتمبر 24, 2007

 
Blogger يا مراكبي said...

طـعـمـة

انا قلت كده برضه .. النكد ليه شعبية جامدة جدا

عموما البوستس الجاية كلها هتكون نكد ما تقلقيش

:-D

الاثنين, سبتمبر 24, 2007

 
Blogger MOSLIM said...

انت يابنى مصمم تنكد علينا
انا هقول للمدام تخليك تبطل تكتب خالص

الاثنين, سبتمبر 24, 2007

 
Blogger يا مراكبي said...

عدى النهار

أنا كلمتي لا يمكن تنزل الأرض أبدا .. لكن ممكن تنزل تحت الأرض طبعا .. طراوة أكتر

:-D

وبعدين حب النكد الجماعي ده إنجاز على فكرة .. دي حقيقة زي ما إنت بتقول كده بالظبط

تحياتي

الاثنين, سبتمبر 24, 2007

 
Blogger يا مراكبي said...

تخاريف خاصه

وإنتي طيبة .. بس تكبير الدماغ مش يأقدر علية غير مرة واحدة كل كام سنة .. أصل أنا من اللي واجعين دماغهم على طول

ربنا يوفقك في العذاب اللي إنتي فيه .. إسأليني أنا على كليات القمة .. قال قمة قال

الاثنين, سبتمبر 24, 2007

 
Blogger يا مراكبي said...

Epitaph

ده تعليق جديد من نوعه .. أول مرة آخد بالي إن أبيات الشعر كمان هي نوع من الهجايص

:-D

نورتي

الاثنين, سبتمبر 24, 2007

 
Blogger kaed said...

عزيزى أحمد
أنا كبرت دماغى لغاية مابقتش بعرف أقلع الفانلة
هاهاهاهاهاهاه
رمضان كريم

الاثنين, سبتمبر 24, 2007

 
Blogger يا مراكبي said...

Esmat

كل سنة وانت طيبة وأسرتك الكريمة دايما بخير وسعادة

وكان الله في عونك إنتي وزوجك الكريم

كلنا في الهم .. غلابة

نورتي

الاثنين, سبتمبر 24, 2007

 
Blogger دكتور حر said...

سلامات للمراكبي

أولا احيك على المدونة لأني لسه أول زياره
وثانيا أكثر ما يسعدني اني الاقي مدون كبيير كده بيكيفني قوي
ثالثا
كويس جدا اني جيت بعد لما خدت دش التوبيخ على كآبة المواضيع
عشان آجي انا على الفريش

ورمضان كريم ودمت بخير

الثلاثاء, سبتمبر 25, 2007

 
Blogger يا مراكبي said...

daktara

كل سنة وانت طيب وومتشكر جدا على زيارتك وإطراءك

وبالنسبة للخط أحب أكرر الآتي

بالنسبة للناس اللي بتشوف الخط صغير يا ريت يروحوا فوق عند

View

وبعدين يختاروا

Text size

وبعدين يختاروا

Largest

رمضان كريم يا دكتور

الثلاثاء, سبتمبر 25, 2007

 
Blogger يا مراكبي said...

mariam

أي حد هيحاول يكتب عن أحوال البلد هيلاقي نكد طبيعي .. مش مصطنع يعني

هي أحوال بلادنا كده

الديدبان = الحارس

اليفاع = مكان مرتفع

وده بقى ما بيجيش غير على القمر الصحراوي .. جنب النايل سات على طول

:-D

النكد المرة الجاية إن شاء الله

إنتظرونا

الثلاثاء, سبتمبر 25, 2007

 
Blogger اسكندراني اوي said...

شاكر ليك الزياره يا هندسه
وياريت تشرفنا في

http://elarasoly.blogspot.com/

وتقولي رايك
محتاجين المشوره

الأربعاء, سبتمبر 26, 2007

 
Blogger زُمُرده said...

السلام عليكم
ياسلاآآآآم يا مراكبي
هو انت كده بتفرحنا؟
يعني ده بوست خمسه فرفشه ولا ايه؟
البخل قديم جدا
ولو البخل اتعدم...مش هتحس بالكرم
لأن الدنيا هتبقى حاجه واحده
ومادام الإختلاف راح...يبقى كله طبق الأصل
هو انت اكيد رحتلهم في غير رمضان
معلش المره اللي جايه اعمل حسابك
ونصيحه ..كبر...و روق بس على التوافه
واوع تعمل كده في الحاجات الكبيره
تضيع وتضيعنا وياك
سلام

الأربعاء, سبتمبر 26, 2007

 
Blogger عمرو غريب said...

كل سنة وانت طيب يا مراكبي و رمضان كريم

الخميس, سبتمبر 27, 2007

 
Blogger بنوتة من وسط البلد said...

لا فعلا انت كبرت الجى وروقت الدى
ولايطت التي

انت لو كنت مشهيصنا على الحوار من الاول ما كنش حصل ده كله

وع العموم الحمد لله .. ده كان تووء سفاااهم واحنا معجننا الموضوع
واخدش وشين ورنيش وبقى زى الفل

هتفطرنا على ايه النهاردة بقى ؟؟

الخميس, سبتمبر 27, 2007

 
Blogger mthlykaweyy said...

هاى
ازيك عامل ايه
انا مثلى قوى قرات مقالك وعجبنى بجد
انت ذو عقليه وتفكير جميل

اسمحلى اعرفك بنفسى انا من المثليين العربولدت فى مجتمع ينبذ المثليين ويعاديهم ويكرهم على شىء ليس باديهم

فى جين ان كل العالم المتحضر اعترف بالمثليه

اكبر صريحين علميين فى العالم كله اعترفوا بعد الدرسات العلميه ان المثليه امر طبيعى والذى بهم معظم اطباء وعلماء العالم وذلك بعد الدرسات

بجانب الدرسات العلميه الحديثه التى اجريت على الحيونات والحشرات ايضا
ووجدت ان المثليه امر طبيعى وعادى

ولكن كما تعلم فى بلادنا الشيوخ هم علماء ويفسروا القرءان حسب ما هم مقتنعون به فاخلطوا بين اللواط والمثليه

والعلم اثبت اختلاف الهيوبلاتومس وهى المنطقه الموجوده للدماغ للمثليين عن المغايرين

العيب فى الشيوخ وليس فى الدين
كما سبق وان فسروا سابقا ايه فى القرءان على ان الارض بيضاويه وظلوا نصف قرن يعتقدون هذا وكل الناس تناضل من اجل رايهم الى ان اتى العلم واثبت انها كرويه

وبعدها ادركوا انهم اخطاوا

علاوه عن المجتمع الذى يمارس الكراهيه والنبذ ومعاده المثليين

انا فاكر كويس كل يوم
كنت بقعد بليل وافتكر اى حد قلى كلمه جرحتنى فى المدونه
وابكى طول الليل وكنت اشعر بالحزن جدا
بجد نفسنا كلنا نحب بعض بدون كراهبه او ضغينه

ما اردت ان اقوله لك اننا نمد ايدينا اليك بكل الحب والصداقه
واريد ان نكون اصدقائكم

انا هعطيك اميلى
h_h6497@yahoo.com

ممكن تضفنى وتكلمنى
هنتظرك

وعلى فكره بجد انت مدونتك حلوه وعجبانى
مووووووت جدا بجد انت تفكيرك جميل اوى جدا
سانتظرك تاتى مدونتى
وتضيف اميلى

هتوحشنى جدا
باى باى

28 سبتمبر, 2007 12:47 م

ملحوظه انتم كلكم مدعوون الى مدونتى لمن يريد ان يعرف ما هى المثليه

ومن يريد صداقتى فالاميل تركته فى الاعلى فليضيفه وبكلمنى على المسنجر
بس هستناك انت بالخصوص
باىباى

الجمعة, سبتمبر 28, 2007

 
Blogger يا مراكبي said...

الشنكوتي الكبير

ألف مبروك ليكم ودايما بالتوفيق

عقبال ما تكتي يوميات إتنين متجوزين

:-P

الجمعة, سبتمبر 28, 2007

 
Blogger يا مراكبي said...

يَحيى المِصري

كل سنة و إنت طيب

أيوة كده لقيت حد فاهمني .. هي فعلا ديبلوماسية مش حاجة تانية زي ما الناس فاكرة

:-D

منورني .. ربنا يوفقك

الجمعة, سبتمبر 28, 2007

 
Blogger يا مراكبي said...

E7na

وعليكم السلام ورمضان كريم

يشرفني زيارتكم طبعا وأهلا بيكم

الجمعة, سبتمبر 28, 2007

 
Blogger يا مراكبي said...

الأباصيرى

الله الله على الشعر اللي إنت بتقرضه ده

:-D

تقرضه دي كلمة عربية فصحى على فكرة ومش معناها بتقرقض حاجة

:-D

منورني بجد .. طمني عنك دايما

الجمعة, سبتمبر 28, 2007

 
Blogger يا مراكبي said...

مروة جمعة

صباح الورد .. ده إسم البلوج بتاعك وألا دي تحية الصباح بجد؟

:-D

فكرتيني بالمسرحية الجميلة بتاعة العيال كبرت .. أنا حافظها كلمة كلمة من وأنا صغير

أنا كلمتي محتاجة جردل تطعيم مش مجرد مصل .. محتاجة حملة التطعيم كلها

:-D

نورتي

الجمعة, سبتمبر 28, 2007

 
Blogger يا مراكبي said...

Esmeralda

أنا طبعا ما بأحنش التعميم الغير موضوعي .. لكن أكيد بتكون فيه ظروف بتفرض على جماعة بحالها إنها تضطر تسلك سلوك ما لحد ما يتحول الموضوع لموروث ثقافي حتى لو زالت الأسباب اللي إضطرتهم لكده

كل سنة وإنتي طيبة .. أخبار أزميرالدو إيه؟

الجمعة, سبتمبر 28, 2007

 
Blogger يا مراكبي said...

القلم السكندري

يا إخواننا .. بأدعو الجميع لقراءة تعليق صديق البرنامج العزيز: القلم السكندري

المفروض أعمل تحديث و أضيف بيت الشعر اللي كان ناقص .. بس ما حبيتش أقرف الناس زيادة مني

وأهم حاجة في تعليقك هي: شهد شاهد من أهلها

تحية جامدة جدا

الجمعة, سبتمبر 28, 2007

 
Blogger يا مراكبي said...

gohayna

هو صحيح موضوع لايت وجديد لكن مش بسببي .. حكم القوي بقى

:-D

كل سنة وإنتي طيبة ويارب يوفقك في شغلك وحياتك كلها

الجمعة, سبتمبر 28, 2007

 
Blogger يا مراكبي said...

Sampateek

أهلا أهلا بعمدة جده كلها

أخبارك إيه إنتي والأسرة الكريمة؟

كل سنة وإنتم طيبين

مين بقى دول اللي بيخافوا يعملوا بيبي لحسن يجوعوا؟ دول عايزين بحث تاني جامد قوي

الجمعة, سبتمبر 28, 2007

 
Blogger يا مراكبي said...

М€ŝЋМΣŞĦ

حلوة "عبق" التاريخ دي

وطبعا ما كانش الصفيح طلع ساعتها ولا حتى الكوز

:-D

وبعدين أنا لما تعمقت شوية في البحث لقيت إن الولد كان لسة عامل بيبي وما كانش عنده فائض يطفي بيه النار .. علشام كده قال لمامته تقوم هي بالمهمة دي

:-D

منور

الجمعة, سبتمبر 28, 2007

 
Blogger يا مراكبي said...

أُكتب بالرصاص

كلامك كله أوامر يا عزيزي

أنا بعد كده هأعمل تحذير في أول كل بوست عن الآثار الجانبية لقراءة البوست علشان نبقى على نور

كل سنة وإنت طيب .. رمضانك فين السنة دي؟

السبت, سبتمبر 29, 2007

 
Blogger يا مراكبي said...

ابن عمر

وجزاكم الله خيرا أيضا

هو أنا نظري مش ضعيف لكن جالي السنة اللي فاتت إستجماتيزم حاد جدا خلاني ألبس نظارة للقراية والكومبيوتر .. ياللا

وبالنسبة للخط أحب أكرر الآتي

بالنسبة للناس اللي بتشوف الخط صغير يا ريت يروحوا فوق عند

View

وبعدين يختاروا

Text size

وبعدين يختاروا

Largest

أهلا بيك

السبت, سبتمبر 29, 2007

 
Blogger يا مراكبي said...

lamada

يا سلااام .. أبيات الشعر بتاعة الحلزونة دي كانت هتخلي البوست أحلى بكتير

ياريت تبقي تبعتيلي رباعيات الحلزونة دي علشان أنا مش متمكن منها قوي .. وأهو كله بثوابة .. هأشوفك برضة

كل سنة وإنتي طيبة .. نورتي

السبت, سبتمبر 29, 2007

 
Blogger يا مراكبي said...

koukawy

لأ طبعا مش فاهم .. أنا برئ وصغير في السن وما بأفهمش الحاجات دي

:-D

كل سنة وإنتي طيبة

السبت, سبتمبر 29, 2007

 
Blogger يا مراكبي said...

ابن بلد

ولا أنا فاهم قوي على فكرة

:-D

أهلا بيك

السبت, سبتمبر 29, 2007

 
Blogger يا مراكبي said...

اعشق فى اليل ضوء القمر

مش أنا والله .. ده حتى أنا إيدي مخرومة

:-D

أخبار القمر والهلال إيه؟

السبت, سبتمبر 29, 2007

 
Blogger يا مراكبي said...

أحمد سلامــه

ربنا يوفقك في الإمتحان وأهلا بيك في أي وقت

السبت, سبتمبر 29, 2007

 
Blogger يا مراكبي said...

Rania

أنا ما جيبتش سيرة حد بعينه ولا بلد بعينها .. ما تجيبيليش مشاكل وخليكي محضر خير

:-D

قال رأس البر قال

كل سنة وإنتي طيبة بس من تحت الضرس كده عشان بتوقعي بيني وبين إخواننا الحلوين دول

:-D

السبت, سبتمبر 29, 2007

 
Blogger يا مراكبي said...

david santos

Thank you for reminding us by the passing date of our great Gamal Abdel Nasser, really many thanks.

السبت, سبتمبر 29, 2007

 
Blogger يا مراكبي said...

الأباصيرى
تاني مرة

أنا مش عارف أشكرك إزاي على أبحاثك المستمرة دي .. ده كتير عليا قوي

ما تعرفش بقى بقية القصيدة كانت إيه؟ هل كان فيه حمامات عمومية في الخلاء ساهتها؟

نورتني تاني

السبت, سبتمبر 29, 2007

 
Blogger يا مراكبي said...

صاحب البوابــة

كل سنة وانت طيب وبألف صحة وسلامة

كلمتي لا يمكن تنزل الأرض أبدا

الشلل الرباعي بقى ربنا يبعد عنك

:-D

السبت, سبتمبر 29, 2007

 
Blogger يا مراكبي said...

سجدة

هو مش البوست بس اللي في حالة ذهنية متعسرة .. دي بقت حالة عامة في رمضان بسبب تضارب مواعيد النوم واللانوم

نعوضهالك المرة الجاية إن شاء الله

السبت, سبتمبر 29, 2007

 
Blogger يا مراكبي said...

albardeya

يعني هو أنا اللي كنت موافق؟ ده حكم القوي يا عزيزي

كل سنة وانت طيب

السبت, سبتمبر 29, 2007

 
Blogger يا مراكبي said...

أحمد سلامــه
تاني

تشكر جدا على العودة لهنا مرة تانية .. وأول مرة أعرف إن الأبيات دي كان فيه منها بيدرسوه في ثانوي

جايو مش على أياني بقى .. أصلي كنت علم رياضة

:-D

منورني والله

السبت, سبتمبر 29, 2007

 
Blogger يا مراكبي said...

bastokka طهقانة

خلينا في السيفون أحسن .. ده أهم حاجة

أنا هأركب كومبينيشن هنا في المدونة إحتياطي

:-D

السبت, سبتمبر 29, 2007

 
Blogger يا مراكبي said...

MOSLIM

من غير توصية ولا حاجة .. هي المدام أصلا نفسها فعلا إني أبطل كتابة علشان بتاخد من وقتي اللي أصلا مضغوط جدا

خليك محضر خير

السبت, سبتمبر 29, 2007

 
Blogger يا مراكبي said...

kaed

كويس إن عندك فانلله في الأيام دي .. ده إنت راجل مقتدر بقى؟

هههههه

كل سنة وإنت طيب

السبت, سبتمبر 29, 2007

 
Blogger يا مراكبي said...

دكتور حر

أهلا وسهلا بيك

أنا لا مدون كبير ولا حاجة .. ده بس من ذوك

عموما هو كان بوست واحد فرفشه علشان ننول الرضا لكن هنرجع تاني للكآبة على طول

:-D

إبقى تعالي إتنكد معانا بعد كده

هههههه

السبت, سبتمبر 29, 2007

 
Blogger يا مراكبي said...

اسكندراني اوي

وهي دي محتاجه مشورة؟ ده عمل عظيم جدا وربنا يجازيكوا عنه كل الخير

نحن جميعا للرسول فداء

تحية جامدة جدا

السبت, سبتمبر 29, 2007

 
Blogger Hannoda said...

أنا هنوده من الوحة ..أحب أن أبلغكم ان أنا ماعرفتش المدينة... :(

انت واضح انك تعبان منهم قوي ي ي
:)

بس حلو البوست ده اللي أخدني من التهييس لأبيات شعرية بستغرب لما ألاقي حد حافظها و بحس بشيء من (الحسد)ه

لاموءاخذة يعني


تحياتي للمراكبي سيّد الكولكشنات أم دم خفيف

كل سنة و انت طيب و رمضان كريم

السبت, سبتمبر 29, 2007

 
Blogger يا مراكبي said...

زُمُرده

وعليكم السلام ورحمة الله

هو البوست كان خمسة فرفشة بس شكله كده قلب بغم مش عارف ليه

وبعدين قصدك إيه إني رحت لهم في غير رمضان؟ يعني في رمضان هأشوف الكرم كله هناك وألا إيه؟ حوشوا الكرم المدلدق هناك يا إخواننا .. حد يلم معايا

:-D

هي آخر مرة أكبر دماغي خلاص .. ده حتى فيه زملاء مش عارفين يقلعوا الفانلة بعد ما دماغهم كبرت

:-D

منورة

السبت, سبتمبر 29, 2007

 
Blogger يا مراكبي said...

عمرو غريب

كل سنة وانت طيب ودايما بالصحة والسلامة ورمضان كريم

السبت, سبتمبر 29, 2007

 
Blogger يا مراكبي said...

بنوتة من وسط البلد

لأ بالراحة عليا .. أنا مش جامد قوي في اللغة دي .. أنا مش قدك

وإن كان على الفطار فده مش تخصصي .. أنا لما أروح هأعرف الحاجة عاملة إيه .. وأي حاجة هتعملها هتبقى حلوة وهناكلها غصب عننا

:-D

نورتي

السبت, سبتمبر 29, 2007

 
Blogger shreef said...

يا سلام عليك يا مراكبي بس كويس انك شرحتلنا يعني ايه كبر الجي و روق الدي علشان مليش في اللغة لامؤاخذه المهم فكرتني و الله بالشعر الفظيع ده و خصوصا الابيات ديه و المهم انت مكملتش الناس مسكتتش كملوا الابيات بس بصراحة اجادة في التشبيه المهم بالنسبة لحالة البخل الجماعي تفتكر انها ممكن تكون حق ولا شعب بيستظرف؟؟..المهم ما علينا..سلام يا باشمهندس

السبت, سبتمبر 29, 2007

 
Blogger عمرو غريب said...

بعد اذنك لي طلب عندك لو استطعت بما انك عايش في الكويت
دلوقتي انا اشغال في موقع رياضي ومطلوب مني الحصول علي معلومات بأستمرار عن الاعب عمرو سماكة و احمد فتحي لاعبا كاظمة الكويتي فأنا عاوز اعرف منك مواقع الجرايد الكويتية العادية و الرياضية الي بتنزل علي النت بصورة يومية وكذلك لو في مواقع بردو رياضية للكرة الكويتية بتنزل علي النت فأرجوك لو بتعرف مواقع مواقع رياضية او جرائد بتنزل علي النت بصورة يومية تبعتلي لينكات هذة المواقع او الجرايد

تحياتي لك
بالتوفيق
عمرو غريب مدونة بيت الرياضة

الأحد, سبتمبر 30, 2007

 
Blogger لماضة said...

هههههه
والله يا مراكبى ما ااخرلك طلب انت تأمر ياعم
القصيده اهية
******
قصيدة الحلزونة


الحلزونة والحلزون اتقابلوا فى خرم الاوزون
الحلزونة جوة متاهة,والحلزون لما استناها ,
هربت وقعت جوه البير , السما بتمطر مسامير,
الحلزون مكفوف واسير ,الحلزونة انتحرت فجاة
والحلزون خبطته عربية,عدت فى ميدان التحرير

قصيدة من الشعر الحر
هاقول كل حاجه هاقول كل حاجه
اغنى واهوهو ,امأمأ واصوصو ,هانهق وانونو
لكن فى النهاية باحب السنونو باحب السنونو باحب السنونو
=============================================

كبر ال G وروق ال D

يلا يا سيدى
ادعيلى بس هههههه

الأحد, سبتمبر 30, 2007

 
Blogger يا مراكبي said...

mthlykaweyy

شكرا للزيارة .. وبأعتذر منك لأن وقتي مضغوط جدا وده اللي بيخليني مش بأقدر أتواصل مع أي حد لضيق الوقت

الأحد, سبتمبر 30, 2007

 
Blogger يا مراكبي said...

Hannoda

حمد الله على سلامة الرجوع

وبعدين ما فيش حسد في حفظ الشعر .. فيه حسد في الأجازات بس

وش بيغمز طبعا

كل سنة و إنتي طيبة و رمضان كريم عليكي وعلينا

الأحد, سبتمبر 30, 2007

 
Blogger يا مراكبي said...

shreef

زي ما قلت إنت كده .. أنا ما كملتش الأبيات لكن ما حدش قعد ساكت .. كتير تطوعوا وكملوا الأبيات

لكن طبعا يشكروا جدا

حالة البخل الجماعي بتبقى ظاهرة ليها أسبابها وظروفها وبتبقى فعلا حقيقة ومش خيال

المهم إنها ما تفضلش لازقة حتى بعد زوال السبب

الأحد, سبتمبر 30, 2007

 
Blogger يا مراكبي said...

عمرو غريب

هو أنا طبعا سايب الكويت من شهرين لكن طبعا يسعدني مساعدتك .. بعت لك عناويين مواقع الجرائد الكويتية في تعليق على مدونتك بيت الرياضة

ياريت يكون ده كافي ليك

الأحد, سبتمبر 30, 2007

 
Blogger يا مراكبي said...

لماضة

بجد بجد أنا ضحكت من كل قلبي لما لقيت التعليق ده

أصل أنا فاكر إن قصيدة الحلزونة والسنونو دول عجبوني قوي ساعة الفيلم بس ما قدرتش ألحق أحفظ منهم أي حاجة .. السن بقى

تشكري يا دكتورة على المتابعة الجميلة دي

الأحد, سبتمبر 30, 2007

 
Blogger إنـســانـة said...

هما كلمتييييييين وبسسسسسسسس

يعععععععععععععع

و

هههههههههههههههههه

الثلاثاء, أكتوبر 16, 2007

 
Blogger يا مراكبي said...

إنـســانـة

جميل التعلييق ده

أعجزتي فأوجزتي

الخميس, أكتوبر 25, 2007

 

إرسال تعليق

Links to this post:

إنشاء رابط

<< Home