كبر الجي .. وروق الدي

بعد نشر البوست اللي قبل اللي فات لقيت الحاجة مراتي بتقول لي: إنت مش تبطل بقى تنكد على الناس؟ كل مرة كده تكتب عن مشاكل البلد وتدوس على الجروح ؟ مش تكتب حاجة تخلي الناس تفرفش كده؟ وطبعا أنا بصفتي راجل البيت وكلمتي هي اللي بتمشي دايما ..قصدي بتمشي أحيانا .. هي ما بتمشيش أصلا علشان عندها كساح .. قررت إني أكتب موضوع خفيف .. وعلى رأي الواد إياه في فيلم مرجان أحمد مرجان .. هأكبر الجي .. وأروق الدي .. ونحب ننوه للسادة المستمعين اللي مش متابعين أحداث الدوري المصري .. إن "الجي" هي إختصار لكلمة الجمجة .. و"الدي" هي إختصار لكلمة الدماغ .. والله أعلم .. وممكن تغطوني وتصوتوا لو عايزين
.
ومادام نويت المرة دي أكبر الجي وأروق الدي .. يبقى هي دي الفرصة الوحيدة اللي هأقدر أعرض فيها آخر أبحاثي اللغوية اللي لا هتقدم ولا هتأخر زي كلام الناس بتاع جورج وسوف .. والبحث ده عنوانه هو ظاهرة البخل الجماعي .. واللي خلاني أعمل البحث ده هو مجموعة من الأصدقاء المصريين اللي بينتموا لمدينة ساحلية شهيرة مش عايز أقول إسمها .. لكن هما وروني النجوم في عز المغرب بسبب البخل بتاعهم .. وبخل إيه بقى .. من النوع الجماعي .. وطبعا زي كل مرة هألاقي واحد ييجي ويسألني ويقول لي يا أسطى مراكبي: هو فيه بخل فردي وبخل جماعي؟ أقول له كالعادة برضه :إنت جيت للي هيفيدك .. البخل الجماعي ده موجود من زمان وعندي الأدله من الشعر العربي القديم .. شوفوا كده
.
أقاموا الديدبان على يفاع
وقالوا لا تنم .. للديدبان
فإن آنست شخصا من بعيد
فصفق بالبنان على البنان
تراهم خشية الأضياف خرسا
ويأتون الصلاة بلا أذان
.
والأبيات دي معناها كده بالهجايص إن جماعة البخلاء دول حطوا ناضورجي فوق مكان عالي وقالوله: إوعى تنام يابن ال .. ولو لمحت أي حد جاي من بعيد تنبهنا وتصقف سوسة على طول .. وتلاقيهم عايشين من غير صوت لحسن حد يسمعهم ويتضايف عندهم .. لدرجة إنهم بيصلوا من غير أدان
.
حلوة مش كده؟ شوفوا بقى الأبيات التانية دي
.
قوم إذا إستنبح الأضياف كلبهم
قالوا لأمهم .. بولي على النار
.
واضحة دي وألا عايزة تفسير؟ يعني إذا البوبي بتاعهم "هوهو" وده معناه إن فيه ضيف جاي من بعيد .. تروح أمهم اللي عمالة تطبخ الأكل في قدرة على النار تجري تطفي النار بمياه الصرف الصحي .. وياريت ما حدش يربط بين البيتين دول وبين موضوع البوليس اللي بيكبس على جماعة حشاشين يقوم واحد فيه يعمل بي بي على الفحم أو بيسموه الولعة ولا مؤاخذه

.

وطبعا إنتم متخيلين كان إيه رد فعل أصحابي إياهم لما عرضت البحث ده .. لدرجة إنهم بدأو يبحثوا في إن أصولهم بتنتمي للقبائل العربية اللي إتكلم عنها الشعر ده وألا لأ .. ما علينا .. إحنا بكده نكون وصلنا لنهاية البرنامج .. نرجوا أن تكونوا قد إستمتعم بالعرض المقرف ده .. ونكون كبرنا الجي وروقنا الدي .. ونراكم في موضوع نكد بعد كده على طول إن شاء الله .. أي خدمة