شد القلوع يا مراكبي ... مافيش رجوع يا مراكبي

الجمعة، نوفمبر 16، 2007

من روائع قلة الأدب العربي

أفتكر إن أول ما طلع الدش والريسيفر .. كان ليه سمعة كده مش كويسة .. كانوا بيقولوا إنه بيجيب حاجات قبيحة وقليلة الأدب ولامؤاخذة .. وكنت كل ما أسمع إن فيه حد ركب دش ألاقيه يحلف ويقول لي: بس أنا مش من الناس إياهم يا مراكبي .. أنا والله العظيم ركبت النايل سات بس .. ومن كتر ما الجملة دي إتكررت قدامي كتير .. جه عندي شعور إن النايل سات ده حاجة كده وكأنك داخل مسجد .. ولازم تقلع الجزمة برة على الباب قبل ما تشغل التليفزيون وحاجات كده
.
لحد ما جه اليوم اللي قررت فيه إني أركب الدش ده أنا كمان .. وطبعا لأني من أهل التقوى والصلاح أصريت على النايل سات بس زيي زي الإخوة الأفاضل إياهم بالظبط .. وأول ما إشتغل التليفزيون لقيت النايل سات ده إيه .. ولعة ولعة ولعة .. وأذكر إن لم تخني الذاكرة إن أول لقطة شفتها كانت لجزء عريان من صدر مغنية مش عايز أقول إسمها وكانت بترقص وتقول: أخاصمك آه .. أسيبك لا .. ما علينا .. أرزاق
.
ومرة من سنتين كان عندي مدير أمريكي .. لقيته بيشتكيلي ويقوللي:
المدير الأمريكي: أنا زهقت قوي من الدش المركزي اللي عندنا في العمارة .. مليان قنوات كتيرة مالهاش لازمة
المراكبي: أيوة .. علشان ظابطينه على القمر الأوروبي فتلاقي معظم القنوات إباحية وجنسية
المدير الأمريكي: صح .. حاجة مملة قوي .. الواحد يقعد يقلب سنة لحد ما يلاقي قناة مفيدة
المراكبي: وياريت على كده وبس .. ده أغلب القنوات دي باللغة الإيطالية كمان
المدير الأمريكي: أيوة عندك حق
وبعدين مرة واحدة لقيته إتنفض وبيقولي: إيه ده؟ تعالى هنا .. إنت عرفت منين إن أغلبها قنوات إباحية؟ وعرفت منين إن أغلبها باللغة الإيطالية؟ إنت بتتفرج عليها ومتابعها وألا إيه؟
المراكبي: نعم يا عمر .. أمال مين اللي كان بيقلب في القنوات دي دلوقت وزهق منها؟ ماي ماذر؟ تلاقيك زهقت من النظري ونفسك في العملي .. مش كده؟
المدير الأمريكي: طب خلاص خلاص .. إنت هتسيحلي وألا إيه؟
المراكبي: أيوة كده إتعدل .. مديرين آخر زمن .. وبعدين عيب عليك لما تفتكر إني بأتفرج على الحاجات دي .. أنا بس حاطيتها في الفيفوريت مش أكتر
وبعد فترة صمت ووجوم
المراكبي: إنت نفسك في حاجة تتفرج عليها أحلى من كده؟
المدير الأمريكي وهو مشرئب الأوداج وبلهفة شديدة: أيوة .. إيه إيه؟
المراكبي: ركب النايل سات وإدعيلي
.

.
.ملحوظة: ما حدش يفتكر إن الأوداج دي حته قبيحة وألا حاجة

التسميات:

75 Comments:

Blogger Bella said...

مرحبا اخي العزيز

الأوداج عرقان كبيران محيطان بالرقبة ويُقال فلان منتفخ الأوداج من شدة الغضب او السرور حيث ينتفخ هذا العرقان.


صراحة قلة الأدب العربي جاوزت كل الحدود واصبحت المفضلة عندنا لاتحتوي الا على قنوات اخبارية وروتانا طرب لان بها أغاني محترمة

وبعض القنوات العربية المعروفة بأنها صديقة للاسرة ولا نتفرج عليها اذا قدمت اي كليب

مثل دبي وابو ظبي ودبي وان وأم بي سي

وروتانا زمان

واغلب القنوات الاخبارية العربية فقط وخلاص.

غير كده ممكن الواحد يكون بيقلب في امان الله يلاقي مشهد خارج في كليب من كليبات الزمن القبيح اللى عايشين فيه

فالافضل عمل قائمة مفضلة وخلاص

ربنا يعين الجميع على هذه المصائب

الجمعة, نوفمبر 16, 2007

 
Blogger Epitaph said...

looooool :D

We did not have satallite but recently, this year, due to "thanyway 3amma" and studies...

But regulations were set...arab sat, nile sat, NO melody and mazzika and songs channels..:D wadomtom..so you have abundance of good channels everywhere..no need for the provokative ones that my contaminate the code of ethics we're trying to implant into the youngsters (inclusing my 10 year old Heba and 15-year-old Hadeer, my sisters ) :D

الجمعة, نوفمبر 16, 2007

 
Blogger MAKSOFA said...

أظاهر أنك مركب الهوت بيرد من زمان ، ومديرك هو اللي كان مركب النايل سات

الجمعة, نوفمبر 16, 2007

 
Blogger Esmat said...

انا فاكرة اول ال ام بى سى مابدات كانوا المذيعات لابسين بكم ومحترمين وفجاءة الدنيا
كلها إتقلبت وبقت المناظر تتعب ايه كمية
العرى دى كلهافى افلام ومسلسلات واغانى

المصيبة ان ولد زميل ابنى فى المدرسة والدته
طبيبة بتسيبه وبتروح شغلها وابنى حكى لى
ان اول والدته ما تمشى يفتح قنوات الهوت بيرد ويقعد يتفرج علي بعض القنوات المخلة

الخطر هنا الناس اللى بتسيب ولادها ادام
التليفزيون بدون رقابة اوتشفير للقنوات
التليفزيون بقى شيطان فعلا فى البيت
اذا كان نايل سات او غيره
ربنا يستر بجد

الجمعة, نوفمبر 16, 2007

 
Blogger القلم السكندري said...

سلام عليكم ياباش مهندس


ازيك وازي النايل سات دلوقتي


قلة الأدب العربي في تطور مستمر والحمد لله

وانت عارف التكنولوجيا الجديدة بتتجه دوما نحو صغر الحجم

ومما اصابته التكنولوجيا بتطويرها ملابس النساء وخصوصا علي الفضائيات

أضف بقي لخواص الفايبريشنز المتنوعة.. وخلافه الخ الخ


وأهو كله في التطوير

بوست جميل يا هندسة

وبعتذر عن التغيب للفترة الماضية بسبب بعض الظروف

تحياتي

الجمعة, نوفمبر 16, 2007

 
Blogger اسكندراني اوي said...

ههههههههههههههههههههههههه

يا مراكبي

الدشات وسنينها والوصلات وايامها

وخصوصا بقى لو عزبنجي والغربه واكله دماغه

بوست حلو يا مراكبي

الجمعة, نوفمبر 16, 2007

 
Blogger Taher said...

ههههههههههههههههه

ده امريكى تعبان صحيح

هاتله اريال حطهوله على السطح يجيبله القناة الاولى والتاينة ورضا

الجمعة, نوفمبر 16, 2007

 
Anonymous غير معرف said...

Ya Marakby Byh,
Send you friend back home he is not quilified to stay in the mid east.
BTW, Walahy I'm not kidding, what is he hotbird? I'm afraid to google it since I have the PC in the living area and "El-Maaryid" my litte kids could jumb over me any time.
Salam Ya hoby. THanafy

الجمعة, نوفمبر 16, 2007

 
Blogger koukawy said...

,وحشني خفة دمك الحقيقه

الجمعة, نوفمبر 16, 2007

 
Blogger فى القلب said...

هههههههههههههه

واللهى معاك حق والغريبه أن أحنا بقينا نبص أن ده عااااادى خالص و الأولاد قاعدين ميضرش ثقافه على فكره أنا بتكلم على النايل ثات برده

مكنتش أعرف أن ليك خفه الدم دى كلها يا باشمهندس

الجمعة, نوفمبر 16, 2007

 
Blogger حسن ارابيسك said...

الراجل الأمريكاني ده حظه وحش قوي
يعني لو كان بدر شوية وجه في التلاتينات والاربعينات كده مش كان حظه بقا حلو وكانلو حب يغير الصنف كان نزل على شارع محمد علي يشوف الأسطوات العوالم اللي أجسامهم على حق واللي كانت الواحده منهم تفصل خمسه سته من بتوع دلوقتي يعني كان شاف نسوان ليها رفارف والشللت على حق والصدور زي المركبات المدرعة كانت النسوان نسوان كانت الواحده منهم تفرخ منها خمسين واحدة زي روبي وتلاتين واحده زي نانسي وعشرين واحده زي هيفاء وعشان تعرف شارع محمد على ده زمان هو الدش بتاعنا اللي سبقنا بيه العالم كله
المهم الراجل كان بيتكلم معاك بدبلوماسية انت ماخدتش بالك منها للحقيقة

المهم شويه جد بقا
انا بالنسبة لي عامل لي جدول جنب التليفزيون كاتب فيه البرامج الحوارية اللي أنا بحبها وبستمتع بيها من وجه نظري ومواعيدها وبالتالي بتجنب مشاهده اي شئ رخم لاني كمان اكره عملية البحث في القنوات وكمان اليوم ها يكفي ايه ولا ايه ولا ايه

الجمعة, نوفمبر 16, 2007

 
Blogger mohamed said...

عندك حق فعلا قله الادب العربى
خير مسمى لما يحدث هذة الايام
والمشكله بقى ان احنا من كتر ما بنشوف الخطا بقينا فكرينه هو دا الصح
لاننا بنقارنه بخطا اكبر وبنعتقد بعد كدة انه هو دا الصح للاسف طيب اايه الحل نشوف ايه ولا نتفرج على ايه
نغمض عينينا والله احسن
ربنا يرحمنا
تحياتى

الجمعة, نوفمبر 16, 2007

 
Blogger أُكتب بالرصاص said...

أخويا يا ماراكبي


تعرفش معهد بيعلم إيطالي ؟

اصلى عايز افهم ايه الي بيدور في الدنيا

وياريت لو عندك وصلة طويلة شوية

وابعتي حتة من الاوداج
وكمان حتة من بيت اللوح

وبيقول لك ساويرس هايعمل قناتين تانيين يحارب بيهم الفضيلة

التي نحرت على اعتاب الأو تي في
والشوربة هاتكون في القناتين الملحق

الجمعة, نوفمبر 16, 2007

 
Blogger يَحيى المِصري said...

هاهاهاهاهاهاها

تصدق برضه زمان كان زمايلي في المدرسة اللي كانوا مركبين الدش يقعدوا يقولوا ع اللي فيه و بصفتي كنت من أهل الصلاح (الله يرحم أيام البراءة) أقاوم فكرة تركيبه في البيت لغاية برضه وافقت على النايل سات بس و أنا مش عامل قنوات مفضلة لأن بصراحة مش لاقي قناة تستاهل
لأ بس أنا عاصرت التطور الطبيعي لقنوات النايل سات زمان ماكانتش كده

الجمعة, نوفمبر 16, 2007

 
Blogger Amr Ahmed said...

اه منك انت

متابع اللي بالايطالي واللي بالفرنساوي

ماشي يا سيدي

ربنا يوفقك

الجمعة, نوفمبر 16, 2007

 
Blogger soma said...

قشطه يا مراكبى

اللى انت بتحكيه دا بقى حاجه تقرف ولازم الهبل دا كله يتشفر عشان الولاد والبنات،، عشان محدش دماغه تبوووووووووووووظ

وبنرجع نسأل حالات الأغتصاب والتحرش والمخدرات وغيره من مصايب وبلاوى بتنشر بشكل وبائى ليه
دا الواحد مبيأمنش على نفسه يدخل البلكونة دلوقتى

وربنا يرحمنا من الحجات العجيبه فعلا اللى بتحصل فينا ولينا من الإعلام وغيره وربنا يتسر

الجمعة, نوفمبر 16, 2007

 
Blogger أميرة ويلز said...

هههههههههههههه

يعنى اشمعنى القنوات دى اللى اتكلمت عنها عندك 20 قناة دينية متخصصة

قصادهم قول 15 قناة اغانى نص كم

منهم 3 قنوات اغانى مش معمولة لغرض الاغانى خالص

اهم محطوطين قصاد بعض وهو حال الدنيا بقى فى كدة وفى كدة
وكل واحد وذوقه

الجمعة, نوفمبر 16, 2007

 
Blogger shreef said...

عندك حق و الله يا بشمهندس بس بصراحة هي تقدر تقول قلة ادب بطريقتين سواؤ بتقديم المحتوى الاباحي الزبالة اللي بيخرج لينا في صورة فيديو كليبات و اصوات زبالة اصلا و قلة ادب نت ناحية المستوى المتدني او البرامج اللي بتقدمها القنوات ديه يعني مفيش حاجات فعلا تشجع ان الواحد يشوفها اصلا اللهم الا بعض القنوات اللي الحقيقة الواحد بتابعها دايما و انا هذكر مثال بس على حاجة بعتبرها سابقة عربية و هي حاجة زي الجزيرة الوثائقية مثلا و ديه عشقي بئى فعلشانم كدا تقدر تقول نايل سات او غيره كلهم سواء دا حتى انا شايف ان النيلسات اسوء من اقمار تانية يعني على اي حاجة تانية بيقولوا ده اباحي صريح لكن عندنا بيخبوا الحاجات ديه جوا الافلا و الكليبات..يلا بئى ما علينا هنعمل ايه...مفيش فايدة...سلام يا بشمهندس

الجمعة, نوفمبر 16, 2007

 
Blogger آلام وآمال said...

نايل سات اخر زمن صحيح
ههههه

بس حضرتك متأكد ان الأخ المدير ده أمريكي فعلا؟

:D

الجمعة, نوفمبر 16, 2007

 
Blogger لماضة said...

هههههههههههه
ايه ده يا عم مراكبى
فكرتنى بالحديث ده دار بينى وبين والدى برضه شبيه ليه
بس انا فجرتله مفاجاه
شفرت كل القنوات دى
نيهاهاهاها

السبت, نوفمبر 17, 2007

 
Blogger max.adams said...

أول ما الدش طلع كان فسق و مفسده ولما بقى عند كل الناس بقى عادي لما وصلة النت ظهرت بقت هي اللي كخه و فسق و فجور بس سيبك

الاحترام جوه اللي عايز يبقى محترم هيبقى لأن محدش هيقدر يعمل رقابه في عصر السماوات المفتوحه


دا المدير الأمريكي ده طلع مزيكا

السبت, نوفمبر 17, 2007

 
Blogger bastokka طهقانة said...

و انا اطالب ادارة النايل سات بنشر برامج الايطالية من اجلك يا اما بقى ينزلوا ترجمة بالعربي
====
انا مسحت كل قنوات الاياه لكسكلياه دي من عندي اه طهقان مش مستحمل تربنة جديدة و بعدين يتفرج على المستورد و يقرف من المحلي و حال البلد يقف
!!!!!
فين الحاجة سيباك علينا ليه اليومين دول
يا حاااااااااااااجة
شوفي مرااااااكبي
:))))
اوروفوار

السبت, نوفمبر 17, 2007

 
Blogger زُمُرده said...

السلام عليكم
دمك خفيف موووت
تخيل كده لو كل القنوات برامج اخباريه و ثقافيه وبرامج محترمه سواء دينيه او حواريه او رياضيه او غيره
مكناش هنعرف اهميتها
إلا لو شفنا الأسوأ او على الأقل سمعنا عنه
بمعنى لو كل الدنيا لون واحد يبقى مفيش فرق بين الحلو والوحش
لازم نعرف السيء علشان نقدر الكويس
*****
كل عصر فيه الحلو والوحش
زمان كمان كان عندهم دش وستلايت بشكل آآخر
وفي المستقبل كمان هيكون
******
هات ورقه واكتب فيها معاد
برنامج ديني وثقافي ورياضي وحواري وفني وسينما وغيره
ورتب يومك تاخد من كل بستان زهره
بس ايييييه زهره معطره بالفايده

السبت, نوفمبر 17, 2007

 
Blogger doha said...

ههههههههههههه
انت هلكتنى من الضحك
انا ركبت النايل سات بس هههههههههه
والله امال لما النايل سات كدة امال الاوروبى شكله ايه
عجايب
عندى تعليق صغنون يامراكبى
هو المدير الامريكى
قال هتسيحلى
اكيد المدير ده متربى فى حوارى شيكاغو
يااما والدته من شبرا
ابقى اتاكدلنا من الموضوع ده
تقديرى واحترامى
لصاحب البوست
سلامات

السبت, نوفمبر 17, 2007

 
Blogger Sampateek said...

طبعا اسلوبك المشوق المعتاد و نكهتك الساخرة المستساغة بتخليني اشتاق لكتاباتك .. متبقاش تتاخر علينا
اما بقى عن موضوع البوست فده موضوع خطير جدااااااا و نظرية المؤامرة واضحة و جليه فيه مليون المية القنوات الاباحية دي اوروبية موجهه لان الاوربي مش محتاج يقعد قدام الدش يشوف كاني و لا ماني عنده المقررات سهلة لكن العربي المزنوق في برافانات من العيب و الحرام و اللي ميصحش مش محتاج اكتر من مفتاح او ترباس و يقفل الاوضة و يتفرج
و الكارثة انه حسب ما نما لعلمي ان القنوات دي بتدعوا لممارسات شاذة تدمر صحة الناس و تحول حياتهم الى حظيرة حيوانات يعني الضرر واضح

دور قنوات النايل سات محصور و غير واضح في مناهضة القنوات دي مفروض يكون في توعية و ارشاد و تعريف للناس بالحلال و الحرام و ربنا يستر على شبابنا

مقلتليش بقى تردد القنوات دي اية علشان اتاكد بنفسي؟
هيهيهيهيهيهيه


ربنا يهدينا جميعا و يبعد عنا الباطل


تحياتي

السبت, نوفمبر 17, 2007

 
Blogger Esmeralda said...

طلبت من بابا الله يرحمه ان يجيب لنا دش
رفض رفض تاااااااااام و اتريق عليا و كان رده ( ايوه عشان يجيب لنا الافلام الموبؤه ) من الواضح ان معناها الافلام اللى فيها وباء
الخيبه الاساسيه بقي ان التلفزيون كان ساعات بيلقط من اللى حوالينا و خصوصا اسرائيل و قناه على ما اتذكر اسمها سيجما
دلوقت اخويا رافض بس مركب وصله و رده ان الدش فيه 500 قناه مش حاشوفهم و الوصله بتجيب اللى احنا عايزينه بس
فى الوقت الحالى مفيش وقت اتابع لا دش و لا بانيو

بتضحكنى بجد :)

السبت, نوفمبر 17, 2007

 
Blogger إنـســـانـة said...

ههههههههههههههه

فضحتنا قدام الاجانب الله يسامحك يابو مها
:D

السبت, نوفمبر 17, 2007

 
Blogger اتفضل عندنا said...

ههههههههه
و النبي ضحكتني.....فكرتني بحدوته كده هابقي احطها علي البلوج عندي

كل واحد يخلي باله من اوداجه بقي

السبت, نوفمبر 17, 2007

 
Blogger Carmen said...

موضوع جميل قوى يا مراكبى

للاسف

ان قلة الادب العربية بقت افظع من اللى بيحصل فى الدول اللى بنطلق عليها متحررة سواء كانت اوروبا او امريكا


لا

احنا تفوقنا عليهم بصراحة

فى الذوق الصادم

والخروج عن الاداب العامة

وكل حاجة سيئة

والمشكلة الاكبر ان ناس كتير مش حاسة انى دى مشكلة

وشايفين ان هو ده التقدم والتحضر

اننا نخرج على كل الاعراف والقيم والاخلاق


وبقيت القنوات المحترمة هيا اللى نقطة فى بحر من التفاهة والانحلال وليس العكس


ربنا يستر على الاجيال الجاية اللى عايشة دلوقتى على ان ده العادى

السبت, نوفمبر 17, 2007

 
Blogger أحمد المصري said...

دايما آخر جملة هيا اللي بتبقى جايبه الإبداع كله..يا بتاع النايل سات 0

السبت, نوفمبر 17, 2007

 
Blogger نـــــــور said...

هههههههه

تسلم ايدك وفمك .. بضحك من قلبي لما بدخل مدونتك ..

تحياتي لك يا باشمهندسنا..

السبت, نوفمبر 17, 2007

 
Blogger мσнη∂ιš said...

ناس معندهمش زمة ولا أخلاق
قلي إيه من فضلك الفريكوينسي بتاع القنوات الإيطالية عشان بحب اليوفنتوس أوي ؟؟

الأحد, نوفمبر 18, 2007

 
Blogger بيتنا القديم said...

"ركب النايل سات وإدعيلي"..!!
تعرف يا صديقي الصدوق..!!
من زمااااااااااان كنت بتعب نفسياً لما اشوف حد بيستعبط ومنفض لكل ناصح ومأضيها..زي صاحبك الأمريكاني..وان كنت اقصد الناس اللي من شريعتنا ..المهم لأتني بؤل لنفسي الله ياض طب ما الحلال بين والحرام بين والواحد لما ضرسه بينقح عليه بيجري علي الدكتور يعني عارف اللمم والكخ..محدش بقا عبيط في الزمن ده..!!
وعلي رأي خالتي أطاطا اللي بيشيل قربة بـ(....)علي نافوخو...!!
بالحق
ما تتأخرش في تدوينك يا مااااااان
(:

الأحد, نوفمبر 18, 2007

 
Blogger None said...

هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه


كل مااقرا البوست عشان اعلق اقع علي الارض من الضحك

بس بجد بقي انت خلتني اخد بالي والله من حاجه مهمه جدا ... ان اللغه الوحيده اللي جوزي بيعرف يتكلمها غير العربي هي الايطالي ..وانا ماكنتش فاهمه اشمعني يعني ساب اللغات كلها ومسك في الايطالي ..!!

الأحد, نوفمبر 18, 2007

 
Blogger teatcher said...

يبدو يامركبي إن العقلية العربية عقلية مستهلكة استهلاكًا سيئًا لما تنتجه المدنية الحديثة من وسائل تكنلوجية، عقلية لا تعرف كيفية توظيف هذه التكنولوجيا فيما ينفع، يبدو أن على الغرب عندما يصدر انا هذه التكنولوجيا فإن عليه أن يضع لنافي المانول كيفية استخدامها في ما ينفع ........العيب فيهم مش فينا وعجبي

الأحد, نوفمبر 18, 2007

 
Blogger adhm said...

كنا زمان بنعيب على تركيا كمية المسخرة الموجودة عندهم فى قنواتهم
تقريبا كدة احنا غلبناهم بشارع الهرم سات دة
بالمناسبة انت مستريح للتفسير بتاع اوداجة دة

ولا تحب تضيف حاجة


الأحد, نوفمبر 18, 2007

 
Blogger طـعـمـة said...

الواحد كل يفرح بافتتاح قناة محترمة
يلاقي 10 قنوات نص كم طلعوا قصادها

كان ماله الراديو؟
والله كانت أحلى سهرة أيام المدارس
نسمع قال الفيلسوف وتسجيلات من زمن فات وألف ليلة وليله إللي بتخلينا نطلق العنان لعقولنا وخيالنا
ولما نحب نزود الجَمال في السهرة شوية
ندور على كتاب ممكن نكون قريناه 5 مرات قبل كده
بس صدقني كان كل مرة بنكتشف فيه حاجة جديدة

والله كانت أيام جميلة

الاثنين, نوفمبر 19, 2007

 
Blogger Najwan said...

ههههههههههههههههههههههه
عجبتى جدا
انا مش شوفتش الحاجت الى انت بتتكلم عليها دي خالص
انا مظبطه 10 قنوات ورا بعض مبتفرجش إلا عليها من روتانا سينما لحد زووم دا اخرى :)
بس تصدق مدونتك عجبتنى انا هحطك عندى بعد اذنك

الاثنين, نوفمبر 19, 2007

 
Blogger شـــــهــــروزة said...

خخخخخخخخخخخ
أنا بأحترم جداااا المديرين اللى من الفصيلة دى

نايل سات مين يا عم الحاج
صلى عالنبى كدة فى سرك
دة احنا اكتشفنا ان الأقمار الأوربية حشمة ورحمة عن النايل سات

بس برضة الدش نعمة
كفاية انه جعل كل السماوات مفتوحة ومبقتش حاجة تستخبى
بقا كله على عينك يا تاجر
وبقا اى حد بيتجاوز بيفكر ألف مرة قبل ما يعملها لأنه عارف ان الفضائيات اللى فى كل البيوت دلوقتى حتشرشحه لامؤاخذة

انما بقا لو عالمزز والحركات اياها
فعادى دلوقتى
منكتر ما بقوا ماليين الشوارع والجامعات الخ الخ الخ
دخلنا فى مرحلة الطبيعى

الاثنين, نوفمبر 19, 2007

 
Blogger Ammar Jarrar said...

ههههههه
بوست جميل
بس انا افتكر ان عند الغرب بتبقى القنوات اللي من اياها الناس بتشفرها والباقي بيتعرض بعض نص الليل لما الاطفال ينامو يعني
اما عندنا..
فالخلع والمياصة وقلة الادب والـ والـ بيتعرض قدام الصغار عادي 24 ساعة ومافيش رقابة ولا نيلة
وزوروني كل بوست مرة :)

الاثنين, نوفمبر 19, 2007

 
Blogger Hannoda said...

فعلا يا مراكبي.. قنواتنا بقى فيها كمية من قلة الأدب المستفزة جدا جدا

على فكرة أنا مش قادرة أفهم سبب البعد تماما عن طباعنا كعرب

بجد فكر فيها كده؟؟
ليه اساسا.. هو لما نعمل اعلام مطابق لأفكارنا و دينا ده حايخفض المشاهدة و المكسب
لأ بدا

لإن الاعلام هو اللي بيغير أذواق الناس و بيتحكم فيها مش العكس

يعني أنا أفتكر أيام ما طلع الكليب بتاع أخاصمك آه كان مفجع بالنسبة لينا.. كنا حسين بصدمة من العري اللي فيه و الحركات المايعة

لما بفتكر ده دلوقت بضحك
عشان لما بشوفه دلوقت بحسه عادي مافهوش حاجة

معني كده ان الاعلام بيغير ذوقنا و ثقافتنا ..

طيب ليه مادام هم اللي فايديهم عجلة القياده

ليه رايحي لقلة الأدب

مش عارف و الله العظيم

أنا كده اتنرفزت
بس انت ماقلتش برضه.. هي ايه الأوداج ؟؟

الاثنين, نوفمبر 19, 2007

 
Blogger دكتور حر said...

عزيزي المهندس أحمد

المشكله اصبحت في المسميات
وأصبحت في الحد الذي يسمح الناس لأنفسهم باقترافه

وأصبحت في تجاهل الناس لما هو صحيح وغير صحيح وعدم وزن ذلك بالدين

لكن برده
يبقى النايل سات كده حلو قوي

الاثنين, نوفمبر 19, 2007

 
Blogger حــلم said...

أتارى الواد كوكو ابنى سبع سنين بيقوللى المستر قعدنى جنب مزة حلوة فى الفصل ههههههه..الحقيقة انى كل ما اشفر حاجة تطلع حاجات..وبالاقى بنتى عارفة المليون مطرب ومطربة مش عارفة ازاى..مافيش غير دريم وان ..بس البركة فى القنوات الرياضية اللى عمالة تفتح ومحتلةالشاشة اربعة وعشرين ساعة..بس تقدر يا مراكبى تعيش من غير تليفزيون يوم واحد حتى لو مش مركز معاه؟مستحيل

الاثنين, نوفمبر 19, 2007

 
Blogger MKSARAT said...

اولا صديقى العزيز جدا وحشنى كلامك الجميل واديك رجعت بتألق
انت عندك حق والله اللي بيحصل على القنوات الفضائية بقى اية اخر لعلعة
تحس ان المغنيات بتتنافس ازاي يا تثير الراجل يا يتكرة في مراتة ومشاء الله عليهم المخرجين منورين بابداعتهم في التصوير
انت عارف يا مراكبي المشكلة اننا بقينا هدف سهل جدا لأي غزو ثقافي
وللأسف الطريق بقى مننا فينا لتنفيذ رغباتهم في تكسير قيمنا
اقولك على حاجة كمان ابقى لاحظها كدة
طول الاسبوع بتيجي شوية افلام تحفة ىخر الليل وايام الجمعة والسبت الاجازة ينقوا اعفن افلام ويعرضوها
هي بقت رائع قلت ادب عربي وقلة انتماء ولو قعد اقول قلة دية للصبح مش هخلص
بجد احيك على البوست الجميل
صحيح قولي المدير الامريكي ازاي قالك انت هتسيحلي بالانجليزي وصلى هدفك وتحياتي القلبية لك ولقلمك

الاثنين, نوفمبر 19, 2007

 
Blogger شيمـــــاء said...

هههههههههه
عجبنى اوى وصلة الردح بتاعتك
:)

الاثنين, نوفمبر 19, 2007

 
Blogger سها said...

هم مش عارفة 400 والا 500 قناة
بس انا باتفرج على mbc 2,4, action ,onetv
واولادي على mpc3, arteenz, spacetoon
وزوجي على قنوات الاخبار والرياضة وبرنامجي العاشرة مساء و90 دقيقة
والباقي مالوش لازمة
لو يتمنوا القنوات دي ويدوني الفرق

تحياتي

الثلاثاء, نوفمبر 20, 2007

 
Blogger يا مراكبي said...

Bella

أشكر لك أولا تعربفك للأوداج .. أعتقد أنني لابد أن أحدث الموضوع بأنا أضيف إليه هذا التعريف

عمل قائمة للقنوات المفضلة هو الحل الأمثل بلا شك .. وخصوصا أن ما يعرض في قنوات الأغاني قد فاق كل التوقعات من الجرأة والوقاحة .. فما من مرة أطلع عليها إلا وأصاب بدهشة شديدة من هذا المستوى .. وأتوقع أن تكون تلك القنوات هي خطوة على طريق القنوات الإباحية العربية قريبا

أهلا بك


********************


Epitaph

مبروك الساتيلايت .. إنتي دخلتي عصر الفضاء كده

وأنا سعيد إنك والأسرة بتفكروا كويس جدا في الحفاظ على أخلاقيات إخواتك الأصغر

بقى لي كتير ما سمعتش الكلمة دي
Code of ethics
تحياتي ليكي إنك فكرتينا بيها .. هتندثر خلاص


*****************


MAKSOFA

كده برضه تشكي فيا؟ هو مش من زمان قوي يعني .. من 8 سنين بس
:-D


**********************


Esmat

كل حاجة بتبدأ بشكل محترم إلى حد ما وبعد كده شوية شوية يبدأ الإستدراج للسوأ .. أمال هيكسبوا منين؟ هو ده اللي بيكسب دلوقت

أما الأبناء .. كل الأبناء .. بقى التليفزيون شريك لينا في تربيتهم .. وعلشان كده بقينا مش عارفين أولاجنا طالعين لمين

ربنا يعافينا جميعا


***************


القلم السكندري

قلة الأدب العربي هي الحاجة الوحيدة اللي بتتطور بسرعة جدا عن أي شيء آخر .. ولله الأمر من قبل ومن بعد

وأهم تطور حصل هو الملابس .. بقت بتكتشف أكتر ما بتستر .. ربنا يستر

إنت تنورني في أي وقت .. كفاية عليا تشريفك


**************


اسكندراني اوي

أنا ارف إن البوست كان هيعجبك وخصوصا الجزء اللي ما خانتنيش فيه الذاكرة

هههههه

هي المدام فين دلوقت؟

وش بيغمز


*******************


Taher

فكرة حلوة فكرة الإيريال دي .. أنا رأيي إن كان كفاية عليه القناة السادسة والثامنة

ههههههه

هما لسة شغالين القنوات إياها دي؟


***************


غير معرف
THanafy

ههههههه

ربنا يخليلك المقاريض

لما يناموا بقى إبقى إستطلع القمر الأوروبي براحتك .. وإلا إنت بتنام قبلهم؟

:-D

عجبتني وإنت بتستخدم كلمة جوجل كفعل مش كإسم .. أصحابي الكنديين والأمريكان هما اللي علموني الحكاية دي

منورني دايما


********************


koukawy

متشكر قوي ربنا يخليكي .. يارب تكوني بخير


*******************


فى القلب

هو ده اللي نفسي أقوله .. إن ده بقى العادي .. يعني اللي جاي هيكون أسوأ وبعد كده عادي برضه

أنا سعيد إن البوست عجبك .. منوراني بجد

****************

الثلاثاء, نوفمبر 20, 2007

 
Blogger زُمُرده said...

السلام عليكم
شكرا على التعليق ع كلامي
المره دي واللي فاتت

الثلاثاء, نوفمبر 20, 2007

 
Blogger اعشق فى اليل ضوء القمر said...

السلام عليكم
انت عارف يا هندسة
هندسة بجد
أنت خلتنى أقعد امام الدش وأتفرج و اشوف إيه إللى بيجرى ده
انا برجع من شغلى يدوب شاور سريع وبعديها لقمة و اقعد على النت نصف ساعة ورايح فى النوم لخمس ساعات ثم اقوم لصلاة الصبح و اذهب لعملى الساعة 6.30
فيه حاجات إيه ده
لكن بوست خفيف
وقوى جدا هو ده المركبى

الأربعاء, نوفمبر 21, 2007

 
Blogger أحمد سلامــه said...

ههههههههه
ضحكت انت عليا بالعنوان
كنت بدور على ابيات شع من اياهم
لقيت العملية 3d المرادي
:)
هتستنى ايه من بلد مملة وساقطة اعلاميا ومن النايل سات
اكتر ما يقرفني
ان معظم الفضلات اللي فيه ان لم تكن كلها
مدموغة بالختم المصري
مقدمة ومؤخرة
رغم كوكتيل الجنسيات اللي فيه
---------------
اسيبك لا

الأربعاء, نوفمبر 21, 2007

 
Blogger عمر افندى و ابوه said...


انا و انتى القدر جمعنا على غير ميعاد فى المكان ده و باللون الاحمر اللى بيعبر عن مكنون حبى و هكذا من الكلام اللى
بيثبتوا بيه البنات...

خلينا مع الصور اللى كشفته و و هو لا يعلم ان هناك كاميرا تراقبه و تراقب تصرفاته

تابع

قصة حب

عمر افندى على موقعه


www.omarafandy.com

الأربعاء, نوفمبر 21, 2007

 
Blogger خمسة فضفضة said...

السلام عليكم ورحمة الله وبركاته



مش حرام عليك تقعد الراجل الامريكاني قدام قنوات النايل سات ، مش خايف عليه لا ينحرف ، طب هايقول علينا ايه دلوقتي

عموما عاوزه اطمنك بما ان الموضوع حصل الاوداج يبقي خرج من ايدينا وربنا يستر عليه وان عدت عليه 24 ساعه يبقي هايعيش ،احنا اللي عملنا اللي علينا والباقي بقي علي النايل سات


:-D

تحياتي

الأربعاء, نوفمبر 21, 2007

 
Blogger Semsem said...

بص يا مراكبي
الراجل مديرك دا حله بسيط بلا دش بلا وجع دماااغ
قله يخطف رجله اخر الإسبوع يقضي الويكإند بتاعته في دبي يفرفش شوية و يرجع مزاجه فلَه و يظبطك يا جميل

سلااام

الأربعاء, نوفمبر 21, 2007

 
Blogger mohamed said...

الف مبروك ع الدش يا باشمهندس
فعلاً الدش بقى قمة المسخرة بس ده التطور الطبيعى للتلفزيون
وبعدين احنا عايشين عصر الحرية كل واحد يغطى الحتة اللى هو عايز يغطيها ويعرى اللى عايز يعريه دى اسمها حرية يا باشمهندس وعلى راى وزير التلفزيون انت معاك ريموت الحاجة اللى متعجبكش غير على غيرها

الخميس, نوفمبر 22, 2007

 
Blogger بنت القمر said...

الدش زمان كان سئ السمعه والبيت اللي فيه كان يعتبر منحل والنت في الاول زيه واللي كان مدخا نت كانه بيتفرج طول الوقت علي حاجات خارجه طبيعه الاشياء
الاول مستهجن وبعدين عادي
وبعدين بستغرب ليه طب ما الشوو تايم ببلاويها بتخرج من النايل سات
تحياتي

الخميس, نوفمبر 22, 2007

 
Blogger عدى النهار said...

واضح من كلامك والتعليقات إن البلد ماسابتش حاجة منيلة إلا وأبدعت فيها
مسؤل الترفيه إياه ماكانش ممكن يخرج منه أقل من كده

الخميس, نوفمبر 22, 2007

 
Blogger loumi said...

نعم
نعم
نعم
يعني إنت عايزني اصدق
إن المدير الامريكاني بتاعك ده
إسمه عمر؟؟؟
هههههههههههههههههه
ههههههههههه
ههههه
شر البلية ما يضحك
تحياتي

الجمعة, نوفمبر 23, 2007

 
Blogger الشنكوتي الكبير said...

اولا ازيك يا باشا
تصدق بقى انا جبت النايل سات برده
وكنت زعلان قوي علشان مفيهوش حاجه من اللي بالي بالك
وبعدين يا اخويا الاقي ان الكليبات بقت انيل من الأفلام اياها
تحس انك قاعد في سوق للغواني
كل واحده تطلع تعرضلك هي ممكن تقدملك ايه وترجع تغور شويه علشان تطلع اللي انئح منها

بس فرحت قوي لما عملوا قناة او تي في
واكتشفت انهم بيجيبوا الأفلام بالليل ان كت يعني مش قاطعين حاجه يا معلم
بس هي في مشكله صغيره
اني انا بنام بدري علشان شغلي الصبح
واصلا برجع متأخر من الشغل
يعني تقريبا مش بشوف التلفيزيون خالص
يعني لحد دلوقتي لسه مشوفتش اي حاجه على او تي في
من اللي بسمع عنها

عموما لو عايز تتفرج بجد ابقى سيبك من الأوروبي
واتفرج على العرب سات
اصل العرب اتطوروا قوييييييييي
ومش قادر اقولك
ولا عزاء للمحترمين

سلااااااااااااام يا صديقي

الجمعة, نوفمبر 23, 2007

 
Blogger يا مراكبي said...

حسن ارابيسك

ههههههه

شارع محمد علي .. ورفارف وشلت .. ومصرح بأطوال وبروز .. هههههه

تحفه يا أبو علي بجد .. هو ده الدش اللي نفتخر بيه بجد

فاتتنا الأيام الجميلة دي .. مش كده؟

أنا هأعمل زيك كده لما أرجع أتفرج على التليفزيون تاني في يوم ما إن شاء الله


*****************


mohamed

اللي إنت قلته ده هو الكلام الخطير بعينه .. التعود على الخطأ بيوصلنا لإعتقاد إن ده هو الصح

ربنا يرحمنا فعلا


**************


أُكتب بالرصاص

حمد اللع بالسلامة .. طولت الغيبة .. إبقى طمنا عليك يا راجل

وبعدين إنت مش محتاج تتعلم إيطالي .. أصل الحاجات دي زي الكورة كده .. لغة عالمية بتتفهم حتى بالإشارة .. أو بنظرة عين

ههههههه

ملحوظة: اللوح مالوش بيت على فكرة


************



يَحيى المِصري

أنا بقى معاصر الدش من ايام الأنالوج والمانفللة .. كان ساعتها المخرة الجامدة جدا ما تجيش ربع اللي موجود دلوقت .. وساعتها كان حاجة جامدة جدا وفضيحة يعني

ولسه هنشوف اللي جاي إيه


************


Amr Ahmed

ولسه هأبقى أقولكم على الحاجات اللي بالألماني والروسي كمان .. منهى الحنان

ههههههههه


************


soma

كتر التعود على الحاجات دي فعلا بيؤدي بطرق غير مباشرة إلى مشاكل أكبر بكتير زي اللي قولتي عليها .. وخصوصا إن المشاكل اللي بتعوق الشباب عن الحلول الشرعية السليمة بقت رهيبة

ولدرجة الخوف من الوقوف في البلكونة بجد .. ده مش هزار


******************


أميرة ويلز

قنوات الأغاني نص كم؟ ياريت تيجي عالنص كم .. دي بقت كت وميني وميكرو ومش هاقدر أكمل

وبعدين الخطاب الديني احالي كلنا عارفينه .. محتاج مراجعة في طرق جذب الشباب .. محتاج تجديد

لأن أي حد بينجذب بسهولة للمرح وخصوصا لما الضغوط تكتر


**************


shreef

حلوة فكرة قلة الأدب بطريقتين دي

لكن زي ما قلت إن الغث بقى كتيييييير و السمين بقى قليل ونادر وسط الطوفان ده

لكن طبعا مش عايزين نقول ما فيش فايدة .. ولازم نحاول .. ولو إن بيني وبينك: هو مافيش فايدة فعلا


*****************


آلام وآمال


ههههههه
أيوة كان أمريكي بجد وجد .. بس طبعا اللي أنا كاتبه ده فانتازيا المؤلفين بقى .. بإعتبار إني مؤلف وحاجات كده

ههههه


****************


لماضة


شفرتي كل القنوات دى؟ حرام عليكي ياشيخة .. سيبي قناة واحدة متنفس حتى

ههههههه

ربنا يستر منك يا بتاعة الجراحة
هههههه


************

الجمعة, نوفمبر 23, 2007

 
Blogger همسات said...

ههههههه
دمك خفييييييييييف جدااااااااااا

السبت, نوفمبر 24, 2007

 
Blogger كراكيب عادل said...

الجمهور عايز كدة

ههههههههههههههههه

قال الجمهور عايز كدة طيب ما انا وانت والناس دي جمهور ومش عايزين

هو فية حد من غيرنا علي الكوكب دة كائنات تاني عايزين ؟؟

حاجة تغيظ اوعي تكون عايز وظلمتك :)

السبت, نوفمبر 24, 2007

 
Blogger يا مراكبي said...

max.adams

كلام جميل .. اللي عايز يبقى محترم هيبقى محترم .. لأن محدش هيقدر يعمل رقابه في عصر السماوات المفتوحه .. صح .. الرقابة لازم تكون ذاتية ونابعة من جوانا

كل الأجانب اللي إشتغلت معاهم كانوا مزيكا على فكرة

هههههههه


****************


bastokka طهقانة

ترجمة بالعربي أحسن لو سمحتي
ههههه
وبعدين إنتي اللي قلتي مش أنا: وبعدين يتفرج على المستورد و يقرف من المحلي و حال البلد يقف
ههههه
وأنا بأكرر وبعلو صوتي .. أنا ما باخافش من الحاجة .. بس ده بيني وبينكم طبعا


**************


زُمُرده

متشكر جدا على الإطراء
وقصدك كده إن ماحدش بيعرف قيمة أمه إلا لما يشوف مراة أبوه .. مش كده؟ ههههه

أشكرك على نصيحة الجدول والورقة دي .. بس أنا ما عنديش تليفزيون .. عندي دش بس
ههههه


****************


doha

أيوة المدير الأمريكي قال هتسيحلي .. بس قالها بالأمريكاني
ههههه

وبعدين هو مش من شبرا ولا حاجة .. هو كان من حواري تكساس

منور


*****************


Sampateek

الكلام ده عني أنا؟ ربنا يكرمك ويخليكي

نظرية المؤامرة دي سليمة جدا جدا جدا في الموضوع ده بالذات .. يمكن ما تكونش حقيقية في موضوعات تانية لكن الموضوع ده تحديدا بيبقى مؤامرة ومدروسة كمان

التردد هأسيبهولك في الكونترول .. علشان تتأكدي بنفسك من غير أي وش بيغمز ولا حاجة

هههههه

ربنا يعافينا إحنا وإنتم جميعا


****************

السبت, نوفمبر 24, 2007

 
Blogger يا مراكبي said...

Esmeralda

أولا .. ياريت تدليني على تردد قناة سيجما دي

ثانيا أنا برضه لا متابع الدش ولا البانيو .. فكرتيني إني بقلى لي كتير ما إستحميتش .. أشكرك بشده

هههههه

إزي أزميرالدو؟ ليه في الدش برضه؟


*************


إنـســـانـة


أنا هأمسح التعليق ده قبل ما الحاجة تفتكر مها تاني .. ربنا عالمفتري

*************


اتفضل عندنا

في إنتظار حكايتك مع الأوداج .. أصل أنا بأحب الأوداج دي قوي
ههههههههه

وأنا بقى المرة الجاية و النبي هأحكيلك عن حكايتي مع مديري الكندي .. فيها أزداج برضه

هههههه

*************


Carmen

أنا مش مصدق نفسي .. إنتي كارمن بجد؟ عاش من شافك

وأنا رأيي من رأيك .. إحنا تفوقنا على الأجانب فى الذوق الصادم فعلا وإحنا بهبلنا فاكرينه تقدم وتحضر

ربنا يستر بجد .. نورتينا فعلا

****************


أحمد المصري


المهم الخلاصة .. ما إنت عارف

أهلا بيك

************


نـــــــور

ربنا يكرمك ويخليكي .. ده من ذوقك

************

мσнη∂ιš

بتحب اليوفينتوس برضه؟ عليا أنا الكلام ده؟ وبعدين أنا ما ليش في الكلام ده خالص

50 دولار بس وأنا أبعت لك النرددات على الإيميل

هههههه


***********


بيتنا القديم

فعلا عندك حق .. إحنا بنكدب على نفسنا .. وده أسوأ أنواع الكدب فعلا

ربنا يهدي الجميع

أنا فعلا بأتأخر في التدوين .. بقى وقتي المتاح للتدوين ربع اللي كان متاح قبل كده .. الحمد لله إني لسة متواصل معاكم


************


None

إمممممم .. شكلي كده والله أعلم أعرف جوزك .. لو مهندس مدني يبقى أنا أعرفه

وبعدين بلاش الشك ده في الراجل .. خليكي ستر وغطا عليه وخلاص

هههههههه

******************

teatcher

طبعا وأكيد ومؤكد إننا مستهلكين ومش منتجين ولا مبدعين .. ومادام رضينا بالوضع ده يبقى لازم هنستقبل اللي الآخرين هيعملوه لينا زي ما هو وخلاص سواء يناسبنا ولا لأ .. ده مش في الإعلام بس .. ده في أي إنتاج لأي سلعة .. وبالتالي هيصدروا لينا اللي ينفع مصالحهم هما مش إحنا


****************

السبت, نوفمبر 24, 2007

 
Anonymous nirfana said...

كل مكان فيه السىءوالحسن
سواء كان ستا لايت أو لايف لايت ( وش مطلع لسانه )

انت عليك تختار اللى يناسبك
وسلاماتى للمدير

الأحد, نوفمبر 25, 2007

 
Blogger Esmeralda said...

شكلك مش متابعنى لانك معلقتش و الا كنت عرفت ان مفيش ازميرالدو من اسبوع

الحمد لله
قدر الله و ما شاء فعل

الأحد, نوفمبر 25, 2007

 
Blogger Hannoda said...

ايه ده يا بشمهندس
أنا الوحيده اللي ماعبرتنيش
:(

الأحد, نوفمبر 25, 2007

 
Blogger يا مراكبي said...

adhm

تركيا والناس اللي زيهم على قد ما عندهم مسخرة على قد ما عندهم إخلاص وجد في العمل أحسن مننا مليون مرة

وبالنسبة لتفسير الأوداج .. فأنا ما أقدرش أضيف .. أنا أضيف؟ ده أنا غلبااااااااان

لكن بنرحب بأي إضافة منك طبعا

شكلها كده منطقة مش ولابد في جسم الإنسان .. صح؟


***************


طـعـمـة

ياريت قنوات نص كم .. دول زي ما أنا قلت قبل كده من غير كم خالص
فين أيام الراديو على رأيك .. كانت أيام مليانة ثقافة وإحترام بحق وحقيق .. ما كانش فيه مناظر خالص

فعلا كانت أيام جميلة

*****************


Najwan


فيه حد برضه لسه ما شافش الحاجات دي؟ أمال زووم اللي بتتفرجي عليها دي إيه؟غير زووم العادية؟ دي حاجة زووم خالص

ههههههه

متشكر على إهتمامك وتقديرك للمدونة .. أهلا وسهلا بيكي

***************


شـــــهــــروزة

منورة بجد

بس اللي فهمته كده من تعليقك إن النايل سات بقى في الشوارع والميادين .. لايف .. من غير تركيب دش ولا إيريال ولا حاجة .. حاجة ببلاش كده

كله بقى رخيص يا شهروزة .. كله بقى طبيعي .. عادي



*****************



Ammar Jarrar

عندك حق .. في أوروبا والدول المتقدمة بيكون للحاجات دي
Rating

يعني تصنيف حسب درجة الإباحية اللي فيها .. وتحذيرات قبل عرضها وحاجات تانية كتير

لكن عندنا .. سوق التلات .. قرب قرب .. أي حاجة في أي وقت

مسخرة فعلا

نورتني



**************



Hannoda

بغض النظر عن الأوداج .. إنتي قاتي المفيد بصراحة .. ليه ما يبقاش إعلامنا مناسب لطباعنا وثقافتنا؟ لأن أولي الأمر اللي في إيديهم الإعلام هما اللي مخلينيه كده

طيب ليه مخليينه كده؟

مش هأقدر أقول علشان نا أخبطش في الحلل .. والمعنى في بطن الشاعر

قال تعالى: يأيها الذين آمنوا لا تتخذوا اليهود والنصارى أولياء بعضهم أولياء بعض ومن يتولهم منكم فإنه منهم إن الله لا يهدي القوم الظالمين

فترى الذين في قلوبهم مرض يسارعون فيهم يقولون نخشى أن تصيبنا دائرة فعسى الله أن يأتي بالفتح أو أمر من عنده فيصبحوا على ما أسروا نادمين


**********

الاثنين, نوفمبر 26, 2007

 
Blogger hana said...

نايل ساات ههههههههه
دة عليه قنواااات غريبة وعجيبة
وقنوات لاغانى اجنبى حقيرة بجد دة دمااار
لعقول البشر والله هههههههههههههه
على الاقل الأوربى واضح وصريح لكن
اهوة لكن حتى احلى الوحشين طلع اوحش منهم هههههههههههه
لا بجد فى خلل فى كل ما يقدم ويبث لشعب عربى له قيم ودين وعادات وتقاليد
النايل سات عليه بجد اشياء مخجلة وحتى الطرب بقى مجرد اجسام عارية بلا صوت ولا هدف ولا معنى !!
انا لما أقلب فى القنوااان صدفة اشوف حاجات بجد الواحد يخجل يشوفها
ربنا فى عون الجميع

الاثنين, نوفمبر 26, 2007

 
Blogger يا مراكبي said...

دكتور حر

إنت أثرت نقطة كويسة وهي الحد الذي يسمح الناس لأنفسهم باقترافه

الحد ده بيتحرك للأسوأ يوم بعد يوم فعلا

والنايل سات كده حلو قوي طبعا .. صناعة بلادنا بقى هههههه


*************


حــلم

أنا بأحيي كوكو على النضج المبكر ده .. آدي الأولاد ولا بلاش .. مش خيبانين زينا .. ههههه

أنا فعلا عايش من غير تليفزيون نظرا لضيق الوقت ومن زمان قوي .. والبركة في الحاجة والأولاد هما اللي بيقولولي إيه آخر الأخبار والتطورات .. ولو إنهم بيخبوا عليا تطورات الفيديو كليب مؤخرا

ههههه

أهلا بييكي


*************


MKSARAT

متشكر جدا على كلامك الجميل وإطلااءك ده

اللي بتقوله ده ما هو إلا تأكيد على نظرية المؤامرة اللي فعلا بتعمل غزو ثقافي منظم ومدروس لشعوبنا العربية والإسلامية .. والمؤامرة دي مش من بره بس .. ده فيه اللي بيعاونهم من جوه كمان .. ودول كتير للأسف .. وحسبي الله ونعم الوكيل

المدير الامريكي ازاي قال انت هتسيحلي بالانجليزي؟ هأنزل ترجمة بالإنجليزي في التحديث .. ههههه


**************


شيمـــــاء

طبعا كان لازم أردحله .. ناس تخاف ما تختشيش صحيح .. هههههه

منورة



*************


سها

هما 923 قناة بالظبط .. أنا إشتغلت في التعداد بتاعهم قبل كده .. ههههه

بس لو عايزة يتمنوها ويدوكي الفرق يبقى مش هتاخدي حاجة .. لأن تمن القنوات دي في نظري ونظر الناس رخيص قوي .. صفر

أهلا بيكي

**************


زُمُرده

لا شكر على واجب .. وتنورينا في أي وقت .. كفاية علينا تشريفك


**************



اعشق فى اليل ضوء القمر


ربنا يكرمك ويعينك .. كلنا هذا الرجل

ورغم إني أنا السبب إني خليتك تشوف الحاجات دي .. بس أديك إستفدت وشوفت إيه اللي بيجرى في الدنيا علشان تتجنبه في بيتك بعد كده

الله المستعان .. منورني دايما وبأشكرك على الإطراء الجامد ده

****************


أحمد سلامــه

هههه .. فعلا العنوان كان بيوحي بأبيات من الأدب العربي الامؤاخذة .. بس قلنا نعرضهم لايف عالهواء أحسن

عجبتني كلمة بلد ساقطة إعلاميا دي .. ولو إنها ساقطة في حاجات تانية كتير

واللي عجبني أكتر .. تعبيرك المبتكر التحفة ده: مدموغة بالختم المصري مقدمة ومؤخرة

أسيبك لا .. إييييه .. فكرتني بالغالية

*************


عمر افندى و ابوه

أهلا بيك وشكرا على دعوتك

************


خمسة فضفضة

وعليكم السلام ورحمة الله وبركاته

هههههه

هو اللي كان عايز ينحرف .. أعمله إيه؟ قلت أخليه يشوف النايل سات
هو الأوداج دي أعراضها إيه يا دكتورة؟ طمنيني الله يسترك


***********


Semsem


أنا بأروح دبي كتير على فكرة .. وشايف من خبرتي إن النايل سات فيه "شفافية" أكتر من دبي بكتيييييير .. صدقني بجد

نورت


************

الاثنين, نوفمبر 26, 2007

 
Blogger ادم المصري said...

استاذي
ههههههههههههههه
انا بجد مش عارف اقول ايه
.
.
انا لحد دلوقتي مش ركبت النيل ولا السات
.
.
بس لانت ايه رايك
هل بجوز شرعا
ولا ايه ؟
لحسن انا بحاف بصراحه من الجماعه الافاضل دول
هههههههههه
تحياتي يا استاذ
والسلام

الاثنين, نوفمبر 26, 2007

 
Blogger يا مراكبي said...

mohamed

أنا سمعت كتير موضوع الريموت وغير القناة والحاجات دي .. بس بيني وبينك .. ده إسمه عذر أقبح من ذنب

كويس إن بقى عندتا حرية إننا نغير القنوات بالريموت كنترول


*************


بنت القمر

مين الشو تايم ده؟ أصل أنا ماليش في القنوات الناطقة باللغة الفرنسية

هو الشوتاين ده أنقح من الأوروبي يعني؟

تحياتي

****************


عدى النهار

إحنا طبعا مبدعين في الهيافة بس .. دي حاجة واضحة جدا .. لكن مين بقى مسؤل الترفيه إياه اللي قصدك عليه؟ قول .. ماتخافش

*************


loumi
هههههه .. لأ طبعا إسمه مش عمر خالص .. أنا بس فرشتله الملاية علشان كان عايز يلبسني أنا التهمة إياها
على فكرة .. مديري الأمريكي ده كان متجوز دمشقية برضه

نورتينا

*****************

الشنكوتي الكبير
أهلا أهلا
أنا كويس والحمد لله .. أشكرك على سؤالك

أنا بقى من يوم ما جيبت النايل سات وأنا بالاقي فيه اللي بالي بالك .. واللي مش بالي بالك كمان

هههههه

ولا عزاء للمحترمين بصحيح .. دي حكمة بجد

منورني

****************



همسات

متشكر جدا .. أهلا بيكي



*****************


كراكيب عادل


إنت دايما كده .. ظالمني
ههههههه
ههههههههههههههههه


******************

nirfana

حلوة لايف لايت دي .. وش بيغمز .. إشمعنى إنتي يعني

هههههههههههه

نورتينا


*********************



Esmeralda


في الحقيقة أنا كنت فعلا مسافر ومش متابع الزملاء من أكتر من إسبوع .. حقيقي زعلت جدا من الخبر اللي قولتيه ده .. عموما .. وعسى أن تكرهو شيئا وهو خير لكم .. وعسى أن تكرهو شيئا ويجعل الله فيه خيرا كثيرا

****************

Hannoda

ما أعبركيش إزاي بس؟ هو أنا أقدر؟ أنا بس كنت مشغول جدا

وبعدين إنتي أكتر واحدة بتحبها الحاجة مراتي علشان بتعبري عن شعورها في الغربة


**************


hana

أديكي قولتيها .. على الاقل الأوربى واضح وصريح

وبجد بنشوف حاجات الواحد يخجل يشوفها وبالذات قدام الأولاد

ربنا فى عون الجميع بجد


****************


آدم المصري


أهلا بيك .. عامل إيه في مشروعك دلوقت؟ إن شاء الله تكون بخير

وبالنسبة لسؤالك عن مشروعية تركيب النايل سات من عدمه فأنا بأنصح إنك تلحقلك فتوى من الفتاوى اللي بتترمي ليل نهار دي من دار الإفتاء .. دول شغالن جامد جدا في الموضوع ده ومش هيغلبوا

منور

الاثنين, نوفمبر 26, 2007

 
Blogger MKSARAT SAYED SAAD said...

على فكر حبيت اقلك حاجة قبل الموضوع ما يوصل للجنة التحكيم الدولي
صفحات المكسرات رفعت عليك قضية تأخير لأنك بقالك فترة مازورتهاش انا حبيت اخلص زمتى علشان بعد كدة انا مش مسؤل

الثلاثاء, نوفمبر 27, 2007

 
Blogger يا مراكبي said...

MKSARAT SAYED SAAD

وأنا هآجي جري قبل ما الموضوع يروح للنيابة

منورني

الجمعة, نوفمبر 30, 2007

 
Blogger سهر الليالى said...

ههههههههههههه
بوست حلو اوى
هى فعلا فى حاجات كتير فى الدنيا باظت وربنا يرحمنا

بس الناس كلها تقولك يا اخى انت معاك الريموت كنترول غير زى ما انت عاوز ما كل حاجة فيها الحلو وفيها الوحش
ويطلعلك بتاع دريم يقولك أوووووعى ايدك والريموت كنتروووووووول

ههههههههههه
حيرونا والله

تحياتى

الاثنين, ديسمبر 03, 2007

 
Blogger يا مراكبي said...

سهر الليالي

طبعا الواحد معاه رموت كنترول يقدر يختار بيه الكويس والوحش .. مش في التليفزيون بس .. ده في أي حاجة في الدنيا

لكن ده بقى فيه هجوم شرس من الوحش ده وبقى حصار وكتر قوي لدرحة إنه قرب يبقى الخيار الوحيد المتوفر

هي دي المشكلة الأكبر

الأربعاء, ديسمبر 05, 2007

 

إرسال تعليق

Links to this post:

إنشاء رابط

<< Home