لامؤاخذة .. تخطيط إستراتيجي

من اولها ياجماعة كده بالصلاة عالنبي .. اللي عنده سكر أو ضغط ما يكملش قراية علشان ماحدش يقول ما حذرتناش ليه وحاجات كده .. أصل أنا النهاردة نفسي أتكلم عن موضوع قبيح إسمه التخطيط الإستراتيجي ولا مؤاخذة
.
وعلشان أبسط الموضوع قوي أحب في البداية أشرح حاجة مهمة جدا جدا فيه ناس كتير ما تعرفهاش .. وهي إن أي فرد بيكون ليه إستهلاك من كل المواد اللي خلقها ربنا .. يعني كل واحد فيكم بيستهلك كمية معينة من الحديد والأسمنت والخشب والنحاس وأسلاك الكهربا .. زي بالظبط ما بتستهلكوا الأكل والمياة والملابس .. طبعا واحد ييجي ويقولي يا كابتن مراكبي .. إزاي بس بناكل حديد وأسمنت؟ إنت كبرت وخرفت والا إيه؟ أقول له إنت جيت للي هايفيدك .. ركز معايا وشوف
.
مش أي حد في الدنيا بييجي عليه يوم ويتنيل على عينه؟ آسف .. قصدي يتجوز على عينه؟ يعني هيحتاج شقة .. والشقة يعني حديد وأسمنت وألومونيوم .. خشب وسيرامبك وحنفيات .. سراير ودواليب وترابيزات وكراسي .. لمبات وملايات ومخدات .. تليفزيون وتلاجة وغسالة .. نزود على كده إننا محتاجين مدن جديدة تساعنا .. وطرق ومجاري وكهربا .. مدارس وسينيمات وكازينوهات .. مصايف ومستشفيات ووسائل مواصلات .. الخلاصة .. كل واحد فينا ليه معدل إستهلاك من كل الحاجات دي. طيب إجمالي الإستهلاك بتاع الدولة كلها من كل الحاجات دي بنحسبه إزاي؟ بسيطة يا معلم .. نضرب معدلات الإستهلاك في عدد السكان .. سهلة دي؟ لا سحر ولا شعوذة
.
وهنا بقى مربط الحمار .. عدد السكان ده بيزيد بمعدل ممكن حسابه بالتقريب .. وبالتالي نقدر نعرف تقريبا هنكون كام جثة بعد 10 سنين .. وبعد 20 سنة .. وبعد 50 سنة .. وبالتالي نقدر نستنتج من الأرقام دي قد إيه هنحتاج شقق ومدارس ومستشفيات وخلافه .. وبالتالي هنقدر نستنتج بالتقريب إستهلاكنا المتوقع من كل المواد .. ومنها هنعرف على طول إحنا محتاجين نعمل كام مصنع أسمنت في السنين اللي جاية .. وكام مصنع ألمونيوم .. وكام محطة مجاري وكام محطة كهربا .. وممكن على أساس كده نخطط للمدن الجديدة للمستقبل البعيد .. وبالتالي ما تحصلش أي مفاجآت أوأزمات في المستقبل

.

هو ده يا إخواننا اللي بيسموه التخطيط الإستراتيجي .. يعنى التخطيط البعيد المدى .. وطبعا لا يخفى عليكم إن دي أكتر حاجة متخصصة فيها مصر طبعا .. وألا فيه أي موتور عنده رأي تاني؟ بس الواو الأولانية بتاعة موتور عليها سكون على فكرة .. ماشي؟ أي خدمة .. سلام