شد القلوع يا مراكبي ... مافيش رجوع يا مراكبي

الأحد، سبتمبر 02، 2007

لامؤاخذة .. تخطيط إستراتيجي

من اولها ياجماعة كده بالصلاة عالنبي .. اللي عنده سكر أو ضغط ما يكملش قراية علشان ماحدش يقول ما حذرتناش ليه وحاجات كده .. أصل أنا النهاردة نفسي أتكلم عن موضوع قبيح إسمه التخطيط الإستراتيجي ولا مؤاخذة
.
وعلشان أبسط الموضوع قوي أحب في البداية أشرح حاجة مهمة جدا جدا فيه ناس كتير ما تعرفهاش .. وهي إن أي فرد بيكون ليه إستهلاك من كل المواد اللي خلقها ربنا .. يعني كل واحد فيكم بيستهلك كمية معينة من الحديد والأسمنت والخشب والنحاس وأسلاك الكهربا .. زي بالظبط ما بتستهلكوا الأكل والمياة والملابس .. طبعا واحد ييجي ويقولي يا كابتن مراكبي .. إزاي بس بناكل حديد وأسمنت؟ إنت كبرت وخرفت والا إيه؟ أقول له إنت جيت للي هايفيدك .. ركز معايا وشوف
.
مش أي حد في الدنيا بييجي عليه يوم ويتنيل على عينه؟ آسف .. قصدي يتجوز على عينه؟ يعني هيحتاج شقة .. والشقة يعني حديد وأسمنت وألومونيوم .. خشب وسيرامبك وحنفيات .. سراير ودواليب وترابيزات وكراسي .. لمبات وملايات ومخدات .. تليفزيون وتلاجة وغسالة .. نزود على كده إننا محتاجين مدن جديدة تساعنا .. وطرق ومجاري وكهربا .. مدارس وسينيمات وكازينوهات .. مصايف ومستشفيات ووسائل مواصلات .. الخلاصة .. كل واحد فينا ليه معدل إستهلاك من كل الحاجات دي. طيب إجمالي الإستهلاك بتاع الدولة كلها من كل الحاجات دي بنحسبه إزاي؟ بسيطة يا معلم .. نضرب معدلات الإستهلاك في عدد السكان .. سهلة دي؟ لا سحر ولا شعوذة
.
وهنا بقى مربط الحمار .. عدد السكان ده بيزيد بمعدل ممكن حسابه بالتقريب .. وبالتالي نقدر نعرف تقريبا هنكون كام جثة بعد 10 سنين .. وبعد 20 سنة .. وبعد 50 سنة .. وبالتالي نقدر نستنتج من الأرقام دي قد إيه هنحتاج شقق ومدارس ومستشفيات وخلافه .. وبالتالي هنقدر نستنتج بالتقريب إستهلاكنا المتوقع من كل المواد .. ومنها هنعرف على طول إحنا محتاجين نعمل كام مصنع أسمنت في السنين اللي جاية .. وكام مصنع ألمونيوم .. وكام محطة مجاري وكام محطة كهربا .. وممكن على أساس كده نخطط للمدن الجديدة للمستقبل البعيد .. وبالتالي ما تحصلش أي مفاجآت أوأزمات في المستقبل

.

هو ده يا إخواننا اللي بيسموه التخطيط الإستراتيجي .. يعنى التخطيط البعيد المدى .. وطبعا لا يخفى عليكم إن دي أكتر حاجة متخصصة فيها مصر طبعا .. وألا فيه أي موتور عنده رأي تاني؟ بس الواو الأولانية بتاعة موتور عليها سكون على فكرة .. ماشي؟ أي خدمة .. سلام

التسميات:

132 Comments:

Anonymous غير معرف said...

هوا منين بيودى على فين

الأحد, سبتمبر 02, 2007

 
Blogger فى القلب said...

بحجز مكان يا باشا
وهقراء وأرجع تتتتتتتتتانى

الأحد, سبتمبر 02, 2007

 
Blogger فى القلب said...

طب أنا قرأت
ورجعت
بس رجعت مش زى ما روحت
حاسه كده يا مركبى يا خويا أنك ضربتنى على راسى بحاجه


طب وأنا أفكر فى بكره ليه بالطريقه دى
مش ممكن ربنا يبعت النهارده
دهب يقوت مرجان والحجات بتاعه أحمدك يا رب دى
وله فى ذلك حكم

ويمكن يبعتلنا قنبله نوويه تشيل العالم كله بكره الصبح
ممكن

عشان كده أنا بعلنها من مكانى هذا وانا طلعلى قبه بينه من دماغى من أثر ضربتك فى دماغى

أنى بفكر فى اللحظه دى وبس

الأحد, سبتمبر 02, 2007

 
Blogger Epitaph said...

ايوة...يعني ايه اللي حصل بقي؟

هو البوست ده نازل عليه رقابة
يعني لمسئولين الدولة فقط؟

المفروض كل مواطن اول ما يتولد يسلموه مع شهادة الميلاد جردل فيه شيكارة اسمنت العبارة في الشكارة و سيخين من حديد عز و لوحين خشب

هي الدولة ح تتعب نفسها بالكلام ده
مش كفاية عليه الخيار الاستراتيجي
تيجي تقول معرفش ايه

سلاماتي
:)

الأحد, سبتمبر 02, 2007

 
Blogger اسكندراني في الغربة said...

طيب يا عم المراكبي مش الاختراع الي بتقول علية دا الي اسمة تخطيط
محتاج حد يخطط
ويكون لية نظرة مستقبلة مش باصص تحت رجلية
ومحتاجين كمان وزارة تقوم على تنفيذ التخطيط
يعني محتاجين حكومة يكون من ضم خططها الاساسية حاجة اسمها تخطيط
يعني محتاجين يكون المعلم الكبير بيفكر في حاجة غير التوريث
وان شاء الله بعد كل دا ما يحصل
الي حينفذ التخطيط حيطلع حرامي ويخربها
---------
عارف النشيد القومي بتاع سعد زغلول؟

الأحد, سبتمبر 02, 2007

 
Blogger حسن ارابيسك said...

الحقيقة
التخطيط الاستراتيجي
مصطلح تعبني قوي في البحث وراء أصله اللغوي في قواميس حكومات مصرية متعددة تعاقبت وتكالبت علينا
المصطلح يعني

أفيونة الحكومات والعقار رقم واحد لديها في تبنيج الشعوب ان كل شئ على مايرام كل شئ تحت السيطرة كل شئ محسوب بدقة الأن أوبعد خمسون عام
نطمئن على أنفسنا نطمئن ‘علىمستقبل أولادنا
النداء الأول وليس الأخير
كل شئ تحت السيطرة

الأحد, سبتمبر 02, 2007

 
Blogger أحمد المصري said...

يعني كده برضه مستني قصة الاقيك كاتب عن الترجيع الإستراتيجي..ده كلام..الله يجازيك عقابا بقى حطلب منك خدمة..ابن خالتي عامل مدونة جديدة نرجو انك تنورها..HTTP://LEEHANA.BLOGSPOT.COM
سلااااااااااام0

الأحد, سبتمبر 02, 2007

 
Blogger Hannoda said...

بتتكلم عن حاجة إندثرت في بلدنا .. كده زي حاجات تانية كتير

مش تحس كده يا مراكبي إن مصر ما بقاش ليها حد

ماحدش حاططها فوق راسه وشاغل نفسه و بيها و حاطط همها قدام عنيه

الأحد, سبتمبر 02, 2007

 
Blogger loumi said...

العزيز
احمد باشا
إحنا فى مصر ولا مؤاخذه
ماشيين ببركه دعا الوالدين
وإلا ليك راي تاني؟
لو ليك قول
:):):)
امبارح كنت باقرأ فى المصري اليوم عن الخريطه الذهنيه
وان ملك البحرين بيستخدمها عشان يبقا شايف مستقبل بلده عامل ازاي
وإن ناس كتير بتستخدمها في كل المجالات لانجاز اكبر قدر فى اقل وقت وبأقل جهد
ولا عزاء لاحد
تحياتي
شكراً على التنويه فى بداية البوست
:):):)

الأحد, سبتمبر 02, 2007

 
Blogger Gid-Do - جدو said...

لاحول ولا قوة الابالله ـ المراكبى ـ رجع مصر من كام اسبوع وواضح ان مخه لسع
ياصحبى ارجع روح حتة تانية علشان عقلك يردلك وعلشان خاطر ولادك لسه محتاجين اب عاقل اكتر من اى حاجة تانية

انا من ساعة ما وعيت على الدنيا وانا اعرف ان مصر فيها المجالس القومية المتخصصة ودول احسن عقول فى المحروسة وشغلهم النظر والتخطيط والبحث وتقديم الاقتراحات للمستقبل لكن واضح ان كل اقتراحتم بتتحول على اقرب صفيحة زبالة ـ والمصيبة ان واحد معروف عنه انه الملك المتوج فى مصر كلها لظرفنى تجدنى ـ هو دلوقت المشرف على هذة المجالس علشان تعرف القدر الكبير اللى بلدنا بتبص بية للمستقبل

الأحد, سبتمبر 02, 2007

 
Blogger ابن حـجـر الـعـسـقـلانـى said...

فيه بيت شعر للشاعر على سلامة بيقول

ا" اللى بنى مصر لا خطط و لا سطر "ا

و مفيش كلام تانى يتقال يا رجالة

الأحد, سبتمبر 02, 2007

 
Blogger يا مراكبي said...

غير معروف

أنا اللي فاكره إن أوتوبيس 921 كان بيروح من بولاق الدكرور لحد شبرا الخيمة

الاثنين, سبتمبر 03, 2007

 
Blogger يا مراكبي said...

في القلب

ماعاش اللي يضربك على دماغك .. تلاقيكي بس خبطي في في حاجة وإنتي داخله المدونة

وبعدين ولا تزعلي نفسك خالص ..فكري في اللحظة دي وبس .. يعني هتكوني أحسن من كبارات البلد؟

أما المعتوهين اللي زيي بتوع التخطيط والحاجات الهبله دي يترموا بره البلد

جتنا البلاوي ملينا البلد

:-D

الاثنين, سبتمبر 03, 2007

 
Blogger شــــمـس الديـن said...

مش عارفة

بس عايزةاتباسط شوية و اقول بلغة الشباب بتوع الايام دي

باشا , استاذ و رئيس قسم كمان

بس البلد دي اللي ماسكينها شوية سواقين ميكروباسات !!!!!

تدوينة كالعادة في الجون

الاثنين, سبتمبر 03, 2007

 
Blogger أحمد سلامــه said...

مفيش احسن من الخطاطين المصريين
او صدقني زي ما بقولك كده
الخطاط من دول يرقعلو كام يافته على كام تصريح
وعيش وخطط يا مؤمن وكنتاكي وماك وبالهنا والشفا

الاثنين, سبتمبر 03, 2007

 
Blogger دنــــيــــــا مـحـيـرانـي said...

يا عيني يا باشا مهندس عقده شويه في مصر جوها خلك تقول كلام غريب
تخطبط ايه يا باشا
نحن في زمن المسخ
تحياتي
--------------------------------
انا عايزه خدمه
انا راسلتك علي الايميل وواضح
انه لم يصل
مش مهم انا غلسه و هاطلب برضه
دلوقتي انا عايزه اضيف
google Reader
زي الاي انت عاملها تحت اسم قرأت لك
عايزه اضيفها
في مدونتي انا دخلت علي الصفحه و فضلت اخرج من حاجه و ادخل علي حاجه و اعمل add
بس مش عارفه اعملها و انزلها علي مدوناتي فممكن تشرحلي انت عملتها ازي و اضافتها ازي
و اشرح براحه و ياريت توضحلي بالعربي عشان اختك ضائعه في الانجليزي
معلش انا بتقل عليك و عارفه انك مشغول دائما بس مساعده قليله تاخذ ثواب عليها
ايميلي اهو inyeg@yahoo.com
و شكرا كتيررر علي مساعدتك ليه شكرا

الاثنين, سبتمبر 03, 2007

 
Blogger thanafy said...

I heard something like this before but "feeen ya 3abd al-rahiem......"
Yes, it usualy comes with "Elmajales" Elmotkhasesah and "Elkhyar" El-estratejey, sorry because half people are tired and want to sit..."Elmajales" and the other have are tired from eating "Lahma/hopper" and now thy are looking for "Elkyar wa El-tmatem".
Marakby, sorry to tell you that next time if I do not see the old style back, I will remove you from the favorites -:) but I would recomend you to "Terga3 lebaladak wa habybaic ya Mrakby ya akhoya in kietwit.

الاثنين, سبتمبر 03, 2007

 
Blogger LOJAIN said...

والله انت و جدو هتخلصوا علينا بشوية الكلام اللى بيضيع دماغتنا المتكلفة

واحد شاى لبيتون هنا يابنى
هييييييييييييييييييه اما نرد

ياسيدى الفاضل
تم سؤال احدى الفتيات الفاضلات بواسطة الاستاذ عمرو اديب من فترة بسيطة
يقولها فيها
مين د / احمد نظيف؟؟
و كان الجواب
هى هى هىىىىىىىىىىىى
محرفشىىىى!!
الحلوة متعرفش مين احمد نظيف
عايز الناس تعرف يعنى ايه تخطيط اتسارتيجى
وبعدين بقى يقوموا يخدوا كلامك و يعملوه فيلم عايز حقى 2
وتروح انت فى الرجلين


ٌRegards:
Lojain :)

الاثنين, سبتمبر 03, 2007

 
Blogger عدى النهار said...

وليه لامؤاخذه!؟

إحنا برضه اللي حاصل عندنا بدرجة إستراتيجي لكنه تخبيط مش تخطيط

وعلشان ماحدش يفهمنى غلط.. أنا لا أقصد الخبطات الإستراتيجية إياها اللي بيتهبش فيها فلوس البلد

ولا أقصد الخبطة الإستراتيجية الكبرى الخاصة بالجمل بما حمل

الاثنين, سبتمبر 03, 2007

 
Blogger Anima said...

ما تيجي تضربنا احسن

اطلع انا منها دي شؤون مصرية

الاثنين, سبتمبر 03, 2007

 
Blogger محمد said...

بص يا حاج مراكبي
إحنا دلوقت لو بصينا هنبص على وحدة حلوة في فيديو كليب أو أورة ماشية في الشارع لكن حكاية إننا نبص لمستقبلنا دي حاجة شلناها من دماغنا من زمان
وعلشان كدة مستقبلنا هيبقى زي الفل إن شاء الله
وأوضاعنا في مصر دلوقت ما تتديش ولا تخطيط استراتيجي ولا يحزنون
إحنا آخرنا الفرجة على الدول الأوروبية وتقدمها ونقعد نحلم ولو بطلنا نحلم هنموت
إحنا في مصر عايزين ناس مـخها منفتح دماغها عالية تقدر تحط خطط سليمة لمواجهة أزمات المستقبل ولكن هذه النوعية قد تكون قليلة أو منعدمة في المؤسسات المصرية
وحاجة كويس منك يا حاج زي ما عودتنا بموضوعاتك الكويسة إنك تفتح لنا باب التخطيط الإستراتيجي
يمكن حد تاني يفهم
معلش على الإطالة

الاثنين, سبتمبر 03, 2007

 
Blogger BaTaBeeT said...

LOL
that was hilarious:D
bas begad..kol el kalam da sa7...w ye7'alik te7es be how strategic we r

wana eli kont nawya a3ml masters fil strategic management :D....bala nila

my 1st visit here..nice blog

الاثنين, سبتمبر 03, 2007

 
Blogger shreef said...

تخطيط استراتيجي تصدق ان جبت في المادة ديه مقبول باين اه مقبول بس بصراحة كانت مادة لذيذة و بعدين يا بشمهندس دا احنا اجدع دولة في العالم تخطط اه صدقني احنا احسن دولة تخطط بس تخخط لي ايه متفهمش معرفش اناس ديه بتفكر ازاي دا يا راجل مش عارفين يخططوا اصلا لمدينة عايزهم يخططوا لدولة صلى على النبي يا بشمهندس احنا اجدع ناس تخطط على الارض بمعنى تلاقيهم يحطوا خطط خمسية و ستيه و سبعية و بعد السنين ديه متعرفش اصلا ان كان في خطط معمولة علشان حاجة اصلا قال تخطيط استراتيجي هو واحد قالها من الناس اللي فوقي احنا ماشيين ببركة دعا الوالدين لو كان في تخطيط يا بشمهندس كان زمنا بقينا دولة متقدمة..يلا ما علينا سلام

الثلاثاء, سبتمبر 04, 2007

 
Blogger Rania said...

احنا التخطيط بقى عندنا كيف و مزاج
يعنى الوزرا يطلعوا يقولوك احنا بنخطط للقضاء على البطاله
احنا بنخط للقضاء على الامية
احنا بقى بنخطط علشان الزيادة والسكانية
و احنا بردة بنخطط علشان
ارتفاع مستوى معيشة الافراد
بس استنى انهم يقولا التنفيذ سنه كام؟
بجد محدش بيقول
تحياتى

الثلاثاء, سبتمبر 04, 2007

 
Blogger mesh2dra said...

السلام عليكم

بصفتي مسئولة رفيعة المستوى في البلد
حرد عليك واقولك
" والله وفي الحقيقة احنا في خطتنا الثلاثية اننا نستصلح 855 مليون فدان ونزرعهم قمح " للتصدير"
وقصب السكر
وخاصة ان احنا بقينا ننافس دل العالم الكبرى في مسألة التصدير دي
واخد لي بالك
وبالنسبة للمشروعات السكنية فاحنا عندنا
754 مليون فدان حنبني عليهم فيلات وقصور للشباب
حديثي التخرج
من الناحية دى اطمن
وعندنا فائض في الميزانية السنة دى
اعلى من السنة اللي فاتت ب 6 مليار و
799
مليون دولار
من الناحية دى اطمن"

بصفتى بقى مش قادرة
احب اقول لحضرتك
هو احنا مخططين
اصلا لأخر اليوم ده
يحصل فيه إيه

حضرتك قلتلي انت عايش فين
؟

سلاماتي:)

الثلاثاء, سبتمبر 04, 2007

 
Blogger يا مراكبي said...

Epitaph

أولا كل المدونات عليها رقابة ما عدا اللي بتتكلم في قلة الأدب

ثانيا .. إيه اللي جاب سيرة السادة المسؤلين دلوقت؟ دول أسيادنا وتاج رأسنا وأحسن ناس بتفهم

ثالثا .. عجبتني قوي قوي فكرة جردل الرمل والأسمنت دي .. أهو حاجة كده تتوزع زي التطعيمات على بطاقة التموين

هههههه

مين الخيار الإستراتيجي ده؟ أنا آخر حاجة حضرتها كان البطيخ الإستراتيجي

الثلاثاء, سبتمبر 04, 2007

 
Blogger يا مراكبي said...

اسكندراني في الغربة

يا عمنا هتودينا في داهية .. إيه بس اللي جاب سيرة المعلم الكبير والتوريث والحاجات دي؟ وبعدين كان الله في عونهم .. هيفضوا لإيه وألا إيه؟

ربنا يجعل كلامنا خفيف

طبعا أنا فاكر النشيد القومي لسعد زغلول

مافيش فايدة يا صفية
غطيني وصوتي عليا

مش هو ده؟

الثلاثاء, سبتمبر 04, 2007

 
Blogger يا مراكبي said...

حسن ارابيسك

أيواااه .. تبنيج الشعوب .. الله ينور عليك

أنا من يوم ما وعيت على الدنيا وأنا بأسمع فعلا الكلمة دي: كل شيء تحت السيطرة .. فين السيطرة اللي كل حاجة تحتها دي؟ مش عارف

أي حد يلاقي سيطرة - غير الأمن - يبقى يقولنا وينوبه فينا ثواب

الثلاثاء, سبتمبر 04, 2007

 
Blogger يا مراكبي said...

دنيا محيراني

أستأذن الجميع في تخطي الترتيب علشان بس أرد على موضوع الريدر

في الحقيقة أنا ما عملتوش لنفسي إنما شخص عزيز جدا هو اللي عملهولي وبيقولك الخطوات كالتالي

افتحي صفحة جوجل

واعملي
تسجيل دخول

اختاري حسابي

ومنها اختاري خدمة قارئ

علي شمال صفحةالقارئ
يوجد مربع اخضر

أضيفي اليه لينكات المدونات المفضلة واحدةوراء الأخري

من
اسفل الصفحة اختاري مانج سبسكربشن

علمي علي كل المدونات واختاري انشاء
مجلد ونقلهم اليه

من اعلي الصفحةاختاري تاجز

اختاري المجلد ليكون
بابليك

اختاري اد كليب تو يور بلوج

حددي اللون وعدد المدونات في الريدر
واظهار مصدرها

انسخي اللينك اسفل الصفحة وضعيه في السايد بار في القالب

الثلاثاء, سبتمبر 04, 2007

 
Blogger يا مراكبي said...

أحمد المصري

القصة جاهزة بس قلت نكسر الملل شوية علشان الناس اللي بتتعب وبتيجي لحد هنا ما نطفشهاش

مبروك على مدونة إبن خالتك .. هآجي أشوفها طبعا

الثلاثاء, سبتمبر 04, 2007

 
Blogger يا مراكبي said...

Hannoda

أنا الموضوع ده ملاحظه من كذا سنة .. تحسي إن بلدنا مالهاش صاحب بيسأل عنها من فوق وكل واحد بيعمل اللي هو عاوزه وبدون أي رقابة وفي كل المجالات .. اللي عايز يعمل أي حاجه يعملها بغض النظر هي صح أو لا

كله ماشي بمبدأ: أنا ومن بعدي الطوفان

تنهيده كبيره

الثلاثاء, سبتمبر 04, 2007

 
Blogger يا مراكبي said...

loumi

طبعا ماشيين بالبركة .. كلامك هو اللي يمشي طبعا

:-D

بلاش نجيب سيرة الأفكار الجديدة اللي في الخليج علشان لما بأتكلم عنهم الناس بتزعل مني

أنا لفيت وعارف إيه اللي بيتعمل في الكويت وقطر والبحرين والإمارات والسعودية ومتعقد خلقه .. خليني ساكت أحسن

نورتي

الثلاثاء, سبتمبر 04, 2007

 
Blogger يا مراكبي said...

Gid-Do - جدو

أنا ياجدو برة مصر من إسبوعين ونص .. أنا سليم .. أنا سليم .. أنا حي

أنا أعرف موضوع المجالس القومية ده من زمان برضه .. وأعرف كمان مكان صفيحة الزبالة إياها اللي بيحفظوا فيها الاقتراحات المستقبلية .. كانت قريبة من بيتنا القديم

مين ده اللي بيشتغل بنظام ظرفني تجدني؟ قصدك مين؟ هو واحد بس بجد بجد يا جدو؟

الثلاثاء, سبتمبر 04, 2007

 
Blogger Mahmoud said...

يامراكبى -إسلوبك جميل ويستحق القراءة بجدارة - وطريقة تفكيرك جميل ومختلفة - أتمنى لك المزيد من النجاح والتوفيق - تحياتى

الثلاثاء, سبتمبر 04, 2007

 
Blogger يا مراكبي said...

ابن حـجـر الـعـسـقـلانـى

وعجبي

هو ده الشعر الحديث اللي بجد بجد بيواكب الزمن المعاصر

شكرا للإضافة

وأهلا بيك

الثلاثاء, سبتمبر 04, 2007

 
Blogger يا مراكبي said...

شــــمـس الديـن

متشكر جدا على الإطراء .. معرفش بيقولوها إزاي بلغة الشباب الروش بصراحة

أنا معاكي في موضوع سواقين الميكروباص ده .. ده أنا حتى أفتكر إني شفت وزير سايق على خط الجيزة فيصل فيصل فيصل

:-D

أهلا بيكي

الثلاثاء, سبتمبر 04, 2007

 
Blogger يا مراكبي said...

أحمد سلامــه

أنا مستعد أشاركك في مشروع اليفط ده .. ده بيكسب دهب

إيه رأيك يا معلم؟

الثلاثاء, سبتمبر 04, 2007

 
Blogger يا مراكبي said...

دنــــيــــــا مـحـيـرانـي

أنا حذرت في البداية وإنتوا اللي كملتوا قراية .. أنا ماليش دعوة

فعلا .. زمن المسخ في كل شيء

قال تخطيط قال

سؤالك عن الريدر رديت عليه فوق على فكرة

الثلاثاء, سبتمبر 04, 2007

 
Blogger يا مراكبي said...

thanafy

ده تهديد جامد قوي .. كله إلا الفيفوريت الله يخليك

أنا بأعلن أهو .. العلم لا يكيل بالبتنجان وانا بأسحب كلامي كله .. والبري بيء بيلق في الشكمانات هو مبدأي الأول

يمشي الحال كده؟

الثلاثاء, سبتمبر 04, 2007

 
Blogger مهندس سري said...

ههههههههههههههههه
يخرب بيت عقلك يا مراكبي
هو انت انتقلت من القصص للسياسة
ما كنت فحالك إيه اللي رجعك مصر
أنا متأكد من حاجة واحدة: انك لو فضلت هناك كتير حتتجنن أحسن لك بشد قلوعك و تهاجر مرة تانية
سلام يا باشا
و كـــود لاك

الثلاثاء, سبتمبر 04, 2007

 
Blogger omar مشروع بطل said...

الكلام دع عيب فى مصر ولا مؤاخذة

احنا عندنا نوع تانى من التخطيط

نشوف الموارد اللى عندنا قد ايه وتكفى قد ايه من الشعب بقية الشعب نخلص عليه !!!!

الأربعاء, سبتمبر 05, 2007

 
Blogger خمسة فضفضة said...

السلام عليكم ورحمة الله وبركاته

في اوروبا والدول المتقدمه بيمارسوا التخطيط الاستراتيجي علي اصوله

اما في مصر فنمارس التخبيط الاستراتيجيبحرفنه عاليه وماحدش يقدر يوصل للتقدم الفظيع اللي وصلنا له في هذا المجال

ويجعله عامر



خالص تحياتي

الأربعاء, سبتمبر 05, 2007

 
Blogger Sharm said...

في ايه

انا مش فاهم حاجة

حاسس ان في حد جه ضربني على قفايا و طلع يجري

طب والله العظيم انا حاسس انى مصدع دلوقتى

الأربعاء, سبتمبر 05, 2007

 
Blogger امرأة تقول الذي لا يقال said...

لو فكرنا في الموضوع ده بجد دماغنا هتنفجر

والتفكير في الحاجات دى مش مسؤوليتنا
:q

الأربعاء, سبتمبر 05, 2007

 
Blogger بيدو said...

سلام عليكم

ازيك يا مراكبى دي اول زيارة ليا ومش الاخيرة واتمنى زيارتك لمدونتى المتواضعة
أما بالنسبة للتخطيط الاستراتيجي فأنا شايف اك بتتجنى على كبارات البلد وبتقول انهم مش بيخططوا وده مش صح انت عارف دول ليل نهار بيخططوا بس في حاجات مهمة مش حاجات خايبة زي اللى احنا بندور عليها وبتهمنا الناس دي اهتمامتها كبيرة دول بقالهم كم سنة بيخططوا للتوريث وبقالهم كم سنة بيخططوا لبيع البلد وبقالهم كم سنة بيخططوا يموتونا بدري ويقضفوا اعمارنا بمبيدات مسرطنة ومياه ملوثه هو ده التخطيط يا معلم مش الكلام الفاضى بتاعنا ده طرق ومستشفيات
دي ناس دماغها عاليه
وسعدت بزيارة مدونتك

الأربعاء, سبتمبر 05, 2007

 
Blogger يا مراكبي said...

LOJAIN

سك على الشاي يابني .. هات بانجو أحسن

وبعدين إيه شاي ليبتون ده؟ بلاش دلع .. فيه شاي التموين أبو خشب وبس

وبعدين كمان ممنوع الإعلانات هنا

مين بقى أحمد تظيف اللي الحلوة مش عارفاه ده؟

:-D

الأربعاء, سبتمبر 05, 2007

 
Blogger يا مراكبي said...

عدى النهار

اللي قلت عليه ده هو الحاجة الوحيدة اللي أنا شايفها بيتخطط لها إستراتيجيا زي ما الكتاب بيقول بالظبط لدرجة تدعوا للإعجاب فعلا .. ماهم بيعرفوا يخططوا أهو .. بس مش في الخير طبعا

الأربعاء, سبتمبر 05, 2007

 
Blogger يا مراكبي said...

Anima

تصدقي بقى المرة دي بالذات مش شئون مصرية .. دي شئون عربية كمان بس مش كلهم

أهلا بيكي

الأربعاء, سبتمبر 05, 2007

 
Blogger يا مراكبي said...

محمد

طبعا مادام إهتمامنا بالفيديو كليب يبقى نقول للمستقبل شكرا ومع السلامة ونشوفك في ظروف تانية أحسن من كده

مصر فيها ومنها العقول المتفتحه لكنها عمرها ما بتوصل لأماكن القيادة والتأثير وهو ده سر التخلف اللي إحنا فيه

للأسف

الأربعاء, سبتمبر 05, 2007

 
Blogger يا مراكبي said...

BaTaBeeT

ما هو أنا سبقتك في الموضوع ده .. بعد ما كنت واحد من السبعة اللي نجحوا من ال 44 اللي كانوا في تمهيدي الماجستير في هندسة القاهرة .. الدكتور بتاع التخطيط عقد اللي خلفوني وخلاني أسحب ورقي ورحت درست في الجامعة الأمريكية

حتى دراسة التخطيط مش التخطيط نفسه فيها مشكلة تخطيط

وعلى رأيك .. بلا نيله

نورتيني

الأربعاء, سبتمبر 05, 2007

 
Blogger يا مراكبي said...

shreef

الراجل ده بيتكلم صح .. أنا طول عمري أسمع عن الخطط الخمسية .. وهي خمسية علشان الحسد .. بيخافوا لا نتحسد وخمسة وخميسة علىنا وعلى بلدنا

أصل الحاجات دي بتتنظر على فكرة

الأربعاء, سبتمبر 05, 2007

 
Blogger يا مراكبي said...

Rania

أيوااااه .. ممكن فعلا تلاقي حد بيقول إننا بنخطط .. بس إمتى؟ الله أعلم

الأجانب بيقولوا عننا إننا بنستعمل كلمة "إن شاء الله" إستعمال خاطيء .. بقينا بنستعملها للتسويف لشيء مش عايزين نحط له ميعاد أو جدول زمني

ربنا يرحمنا

الأربعاء, سبتمبر 05, 2007

 
Blogger يا مراكبي said...

mesh2dra

أهلا أهلا بالمئولة الكبيرة قوي .. أنا عرفت على طول إنك من السادة المسؤلين أول ما شفت التصريحات الجامدة دي

شكلك حزب وطبي

:-D

لو عايزة تعرفي أنا عايش فين يبقى لازم تعرفي من البوست ده إني جاي من المريخ طبعا

مش عايزة سؤال أبدا

منورة

الأربعاء, سبتمبر 05, 2007

 
Blogger يا مراكبي said...

Mahmoud

متشكر جدا على الزيارة والإطراء الجميل ده .. ربنا يوفقك وتمتعنا كمان وكمان

أهلا بيك

الخميس, سبتمبر 06, 2007

 
Blogger يا مراكبي said...

مهندس سري

سياسة؟ أعوذ بالله .. مين اللي جاب سيرة السياسة بس .. الشر بره وبعيد

ماتوديناش في داهية ياعمنا

عموما أنا سافرت خلاص من 3 أسابيع .. من غربة لغربة مش فارقه

منورني دايما

الخميس, سبتمبر 06, 2007

 
Blogger hend said...

زمان واحنا فى الاعدادية كان عندنا درس عن تزايد سكان العالم التالت بكميات ماهولة رغم المجاعات وكانوا قالوا لو الزيادة دى مقلتش تبقى مشكلة ولازم مجاعة ولا اعصار ولا كارثة بيئية علشان تقلل الزيادة دى
فالظاهر والله اعلم ان الحكومات لما ملقتش بيحوق فينا اى حاجة قررت انها تقوم بخطوتها وتعمل هى كارثة وتموت الشعب بالسكتة القلبية وده هو المفهوم بتاع الاستراتيجية دى
شفت باه اننا مذاكرين كويس

الخميس, سبتمبر 06, 2007

 
Blogger esraa said...

طب مانت تنفع وزير تخطيط اهو

امال ليه بس بيقولو اننا معندناش كوادر شبابيه(:

بس هو الجواز كده السبب في كل المشاكل

تحياتي

الخميس, سبتمبر 06, 2007

 
Blogger gohayna said...

هو غرقه سودا ومش باين منها طلوع ابدا يا مراكبي



كل ما نحبو لقدام
نجري لورا بالخطوه السريعه مارش


حاجه تهد الحيل بصراحه والله


ايه يا ابني جرعه التفائل دي قبل رمضان


فكر بايجابيه شويه


فكر ان من كتر البشر الي هيبقوا موجودين

الجريمه هتزيد

والناس هتخلص علي بعض

وكدا يخف العدد وبالتالي نستمتع بالموارد اكتر واكتر واكتر


ايه رايك مش فكلره جهنميه


كل سنه وانت طيب يا مراكبي

الخميس, سبتمبر 06, 2007

 
Blogger يا مراكبي said...

omar مشروع بطل

ماهو أنا قلت ألحق أتكلم في الحاجات العيب دي قبل رمضان ما ييجي

بس بجد فكرة ممتازة جدا إننا نخلص على باقي الشعب دي علشان الموارد تكفي .. ممكن نعمل قرعة

أحييك جدا

الخميس, سبتمبر 06, 2007

 
Blogger يا مراكبي said...

خمسة فضفضة

وعليكم السلام ورحمة الله وبركاته

إحنا أساتذة في التخبيط الإستراتيجي ده

ده حتى فيه دول كتير حاولت تقلدنا فيه وفشلت فشل ذريع .. أصل دي قدرات خاصة بينا إحنا بس

شرفتينا

الخميس, سبتمبر 06, 2007

 
Blogger М€ŝЋМΣŞĦ said...

معلش .. بس انا نفذت نصيحتك و مقريتش البوست لاني بالفعل عندي حاله اكتئاب و قافل موبايلي و مش بكلم حد .. مفيش غير النت اللي باقيلي في الدنيا

عشان كده انا قولت الف واسلم علي كل اللي اعرفهم .. يا عالم المره الجايه حاجي ازور المدونه امتي ؟

اصلي داخل جيش .. و شكلي كده داخلها ظابط .. يعني 3 سنين

الخميس, سبتمبر 06, 2007

 
Blogger يا مراكبي said...

Sharm

مادام حسيت بوجع في القفا يبقى إنت من الناس اللي بتفهم .. خدها قاعدة من أخوك

ومن أعراض القهم كمان غير موضوع وجع القفا ده هو الصداع

ده حتى أنا عايش على البنادول بقى لي سنين بسبب كده

أهلا بيك في النادي

الخميس, سبتمبر 06, 2007

 
Blogger يا مراكبي said...

امرأة تقول الذي لا يقال

التفكير في الحاجات دي شكله كده مش من مسؤلية حد أصلا

يمكن دي مسؤلية الكائنات الفضائية ولا حاجة

:-D

الخميس, سبتمبر 06, 2007

 
Blogger آلام وآمال said...

حضرتك شفت الفيلم بتاع الارهاب والكباب
فاكر الراجل الاسمراني اللي اول مشهد له كان في الحمام وواحد من بره عمال يخبط عليه عشان يخلص

كان الراجل ده له جملة مشهورة اوي وبقت لزمة ف لسنة الناس ( طبعا اياميها الكلام ده لكن دلوقت اللزمات كترت ) ها افتكرتها ولا لسة

لو مفتكرتهاش ابقى فولي والمرة الجاية اقولهالك

:)

الجمعة, سبتمبر 07, 2007

 
Blogger مهندس سري said...

إلحق يا بشمهندس
الدور لحقك في الإعترافات، ولااااااااااااااازم تعترف
حتفهم كل حاجة لما تزور مدونتي

الجمعة, سبتمبر 07, 2007

 
Blogger دنــــيــــــا مـحـيـرانـي said...

شكرا جدا علي الرد و الاهتمام
بس برضه ايميلي لم يصلك ليه
انت غيرت الايميل

الجمعة, سبتمبر 07, 2007

 
Blogger بالله المستعان said...

بيتهيالي مصر جامده في التخطط الاستراتيجي للكباري
بس هو في تخطيط استراتيجي للكباري اصلا

خير خير بتحصل في احسن البلاد
ومساء الخييييييييير ع الاستراتيجين

الجمعة, سبتمبر 07, 2007

 
Blogger frozen love said...

حفلة الصحبجيةالرابعة وعيد ميلادها يوم الاتنين الجاي 10 \9 \2007
بجد يا جماعة نفسي كلنا نتجمع اليوم ده..بقالنا كتير قوي متجمعناش وكل واحد مشغول في حاجة...مستنيكم يومها الساعة 8 بساقية الصاوي"قاعة الحكمة...

الجمعة, سبتمبر 07, 2007

 
Blogger ادم المصري said...

بس دا ياعمنا للناس الاذكيا
ياعني مش عندنا

الجمعة, سبتمبر 07, 2007

 
Blogger اعشق فى اليل ضوء القمر said...

يا مركبى
التخطيط الإستراتيجى
فكره جميله للكتابه عنها
مع إن مصر من الدول أكثر تخطيطا لرجوع للخلف لكن ده مينكرش إنها بتخطط
زمان يعنى من ثلاث سنين كان فيه دكتور فى الكليه بيقول لينا إن معدل تقدم الدول معدل إستهلاك الفرد من الكهرباء بما إن كل حاجه بتشتغل بالكهرباء يعنى مصانع وشريكات ومزارع و.. و.. و.. و
نحسب مجموع إستهلاك الكهرباء ونقسمها على عدد السكان وبالتالى الناتج معدل إستهلاك الكهرباء للفرد
وعلق على كده بإن أكثر الدول إستهلاك للكهرباء للفرد أمريكا و الدول الآروبيه
لذلك سنفضل من دول العال الثالث

الجمعة, سبتمبر 07, 2007

 
Blogger القلم السكندري said...

لا طبعا مين قال؟؟

احنا اول ناس عندنا تخطيط استراتيجي؟؟

موافقون ولا (السكين تشاور علي الرقبة نيابة عن محمد صبحي في تخاريف)

مشكور يا باش مهندس

الله يصبرنا

الجمعة, سبتمبر 07, 2007

 
Blogger أميرة ويلز said...

هاهاها

ايه البوست دة

ياعم كلمنا بالهجايس استراتيجى ايه بس

وطبعا مافيش حد يقدر يقول حاجة احنا بتوع الاستراجيات والتخطيطات كلها ياباشا

انا مالى انا

انا جيت اقولك كل سنة وانت طيب بمناسبة ان التوقيت الشتوى بدأ ورمضان على الابواب
والمدارس كبست علينا بعيد عنك والجو الكئيب بتاع الشتا دة
وحضرتك انا مابدخلش نت فى رمضان فيبقى لكوا وحشة الصراحة بس لو حصل معجزة ودخلت هبقى اجى امسى عليك برده

كل رمضان وانت بخير سلاماتو

الجمعة, سبتمبر 07, 2007

 
Blogger david santos said...

Thanks for posting and have a good weekend

السبت, سبتمبر 08, 2007

 
Blogger كراكيب عادل said...

هندسة كل سنة وانت طيب الاول

موضوع التخطيط دة عندنا لسة هنخططلة

ومن فشل في التخطيط فقد فقد خطط للفشل

وصلت يعني احنا عالم بنخطط بس للفشل

ابقي خلي في المدونة عرق سوس ولا حاجة الواحد يبل ريقة

وحشتني

السبت, سبتمبر 08, 2007

 
Blogger Taher said...

يعنى من الاخر مفيش امل فى البلد دى

السبت, سبتمبر 08, 2007

 
Blogger صاحب البوابــة said...

كل عام وأنتم بخير

يهل رمضان من بعيد

حاملاً لي أحلى الذكريات دائماً

أصدق العبرات حتماً

أخلص العبادات دوماً

لرمضان عندي مكانة خاصة

ولكم أنتم أيضاً

يا أحبابـــي

فكل عام وأنتم بخير

وأنتم إلى الله أقرب وعلى طاعته أدوم

السبت, سبتمبر 08, 2007

 
Blogger أبو أمك said...

ويا ترى التخطيط ده بالطول ولا بالعرض ؟

الأحد, سبتمبر 09, 2007

 
Blogger عمرو المصري said...

حين تهدم بيوت الله بأيدي المسلمين

وحين يقتل المسلمون بأيدي المسلمين

وحين يسمح المسلمون بان يدنس الكفرة بيوت الله

حين يحدث كل هذا في بلاد المسلمين


فماذا تنتظرون ؟؟؟؟؟


تابعونا الان
في

فماذا تنتظرون


فقط
علي
ارض الحرب

الاثنين, سبتمبر 10, 2007

 
Blogger يا مراكبي said...

بيدو

والله عندك حق .. هما فعلا بيخططوا بس في إتجاهات معاكسة تماما وبينجحوا في تنفيذ مخططاتهم دي كمان

تعرف .. لو حد فيهم وجه مجهوده ده في الإتجاه الصح هيعيشوا في رفاهية برضه لكن زود عليها بقى راحة البال والمجد ورضا ربنا أولا وأخيرا

شرفتني ويسعدني زيارتك طبعا

الاثنين, سبتمبر 10, 2007

 
Blogger يا مراكبي said...

hend

برافوا عليكي .. شاطرة من يومك .. هو ده التخطيط الحديث: لو ماجاتش مصيبة تآخد الناس تحاول الحكومة تتصرف بنفسها .. وبكده الموارد هتكفي الكل

هو ده الكلام

الاثنين, سبتمبر 10, 2007

 
Blogger يا مراكبي said...

esraa

وزير تخطيط مرة واحدة؟ ربنا يكرمك

كل الكوادر الشبابيه ياإما بيموتوها جوه البلد .. ياإما بيدفعوها للرحيل

هو ده المخطط اللي معمول للمخططين

نورتي

الاثنين, سبتمبر 10, 2007

 
Blogger يا مراكبي said...

gohayna

كل سنة وإنتي طيبه يا دكتورة .. ده إيه الأفكار الجامده دي؟ معدلات جريمة وناس هتخلص على بعض .. منتهى التفاؤل بصراحه

عموما هو برضه أحد الحلول ما نقدرش ننكر كده

:-D

الاثنين, سبتمبر 10, 2007

 
Blogger يا مراكبي said...

М€ŝЋМΣŞĦ

أنا سعيد إنك جيت تسلم عليا قبل ما تروح الجيش .. معلش .. وعسى أن تكرهوا شيئا وهو خير لكم .. وعسى أن تكرهوا شيئا ويجعل الله فيه خيرا كثيرا

إن شاء الله ربنا يهون

الاثنين, سبتمبر 10, 2007

 
Blogger شـــــهــــروزة said...

رمضان كريم
وكل سنة وانت بخير

ربنا يهون غربتك وانت مع عائلتك يا رب
سلامى للعائلة الكريمة

الاثنين, سبتمبر 10, 2007

 
Blogger رينـــــــــــا said...

السلام عليكم ورحمه الله وبركاته
كل عام وانت اللى الله اقرب وعن المعصيه ابعد ان شاء الله
كل عام وانتم با الف خير

الاثنين, سبتمبر 10, 2007

 
Blogger Aardvark EF-111B said...

كلمه أولها كآخرها و أوسطها حاء

الاثنين, سبتمبر 10, 2007

 
Blogger اسكندراني اوي said...

يا هندسه
يا هندسسسسسسسسسسسسسه

الكلام دا مش في مصر يا حبيبي

هنا بلد الفهلوه وهولا هووووووووووووب

هههههههههههههههههههه

بوست جميل يل مراكبي

كل سنه وانت طيب
رمضان مبارك
مبارك عليكم الشهر
من العايدين



رمضان كريم

الاثنين, سبتمبر 10, 2007

 
Blogger يا مراكبي said...

آلام وآمال

أنا إستعنت بصديق وقال لي هو مافيش غيره اللي كان بيقول إن في أوروبا والدول المتقدمة بيقدموا مع الكباب طحينة

صح كده؟ وألا الصديق ده كفتجي؟

الثلاثاء, سبتمبر 11, 2007

 
Blogger يا مراكبي said...

مهندس سري

أنا جاي أهو

بس لو لقيت حاجة فها إعترافات مش هأقدر عليها .. هأفلسع على طول

الثلاثاء, سبتمبر 11, 2007

 
Blogger يا مراكبي said...

دنــــيــــــا مـحـيـرانـي

لا شكر على واجب

عموما الغيميل بتاعي بيستقبل مش أقل من 50 رسالة يوميا .. ممكن تبقي تعملي

Request for Receipt Notification

علشان يأكد لك إن الإيميل وصل

عنواني هو
a_s_elkady@yalla.com

الثلاثاء, سبتمبر 11, 2007

 
Blogger يا مراكبي said...

بالله المستعان

معلش .. أنا عارف إني خرفت شوية في البوست ده

أوعدك إني هأبطل كلام في الحاجات الوحشة دي

كباري إيه اللي بيعملولها تخطيط دي .. صلي على النبي

الثلاثاء, سبتمبر 11, 2007

 
Blogger يا مراكبي said...

frozen love

والله كان نفسي أقابلكم وأسمعكم .. بس للأسف وجودي في مصر كان محدود وكان علشان شغل كمان

ربنا يوفقكوا

الثلاثاء, سبتمبر 11, 2007

 
Blogger يا مراكبي said...

ادم المصري

هما الأذكياء المصريين موجودين .. مش خيال علمي يعني

لكنهم مش في مواقع القيادة للسف .. علشان كده بيبان إن شكلنا أغبياء

الثلاثاء, سبتمبر 11, 2007

 
Blogger يا مراكبي said...

اعشق فى اليل ضوء القمر

حلو موضوع التخطيط للرجوع لخلق ده

كلام أستاذك ده سليم .. وفيه معدلات تانية كمان

منها مثلا مساحة الأسوا والحدائق والمنتزهات والطرق بالنسبة لعدد أفراد الشعب

وكل المعدلات دي في مصر مضروبة بالجومة القديمة

الثلاثاء, سبتمبر 11, 2007

 
Blogger يا مراكبي said...

القلم السكندري

موافقون يا معلم

أنا رافع إيدي ورجلي كمان أهو

نورتني

الثلاثاء, سبتمبر 11, 2007

 
Blogger يا مراكبي said...

أميرة ويلز

أيوة على رأيك .. خلينا في الهجايص

وبما إن سمو الميرة ما بتدخلش نت في رمضان .. يبقى دي فرصة أنشر فيها كل الحاجات المعارضة للنظام

ولو إن ما فيش نظام أصلا

:-D

إبقي شقري في رمضان

الثلاثاء, سبتمبر 11, 2007

 
Blogger يا مراكبي said...

david santos

Thanks for your kind visit

الثلاثاء, سبتمبر 11, 2007

 
Blogger يا مراكبي said...

كراكيب عادل

دايما بتتحفنا بالتعليقات والحكم الجامدة: من فشل في التخطيط فقد فقد خطط للفشل

الله ينور عليك

أنا فعلا بأفكر أحط زير زكوز على باب المدونة وأهو كله بثوابه

وحشتنا يا عمنا

الثلاثاء, سبتمبر 11, 2007

 
Blogger يا مراكبي said...

Taher

طبعا لازم دايما يكون فيه أمل .. بس بشروط

يعني لازم نآخد بالأسباب مش نستنى كده وخلاص

الثلاثاء, سبتمبر 11, 2007

 
Blogger إنـســانـة said...

ياسلااااااااام .. بقا هو ده؟؟؟؟

الثلاثاء, سبتمبر 11, 2007

 
Blogger Sampateek said...

عارفة انك مشغول جدا
بس لازم اقولك
رمضان كريم
و جرب الاوبن بوفيه بتاع قرية النخيل اللي على الكورنيش بيعملوا فطار و سحور جميل قوي كل سنة
ربنا يوفقك
تحياتي

الثلاثاء, سبتمبر 11, 2007

 
Blogger max.adams said...

موتور دا يعني محرك يعني بيصب في خانة جهاز و بصراحة ما أكدبش عليك يا مستر مراكبي أنا أكبر جهاز في جمهورية التوت الديموقراطيه و لهذا أنا عندي رأي آآخر وهو التخطيط ده ممكن يقولنا أحنا هنطلع القمر امتى ولا أنت قصدك تعرف هنحتاج كام حمام و كام ماسورة مجاري و كام محطة ميه و كام محل فول و كام مدينه وهنحتاج كام سفاح عشان يقلل الضغط شويه أصل أنا دماغي ساحت من الكلام الكتير اللي في الجون ده

ومربط الحمار أن الحكاية دي مين اللي بينفذها في جمهورية التوت الديموقراطيه عشان مجلس الشيوخ يكلمه ينجز الموضوع؟؟؟!!!!

أنا معجب جدا بالموضوع يا مستر مراكبي و ألف شكر أنا فعلا استفدت

الثلاثاء, سبتمبر 11, 2007

 
Blogger يا مراكبي said...

صاحب البوابة

أشكرك جدا جدا على التهنئة .. كل عام وأنت بخير .. أعانكم الله على صيام وقيام شهره الفضيل .. وكل عام وأنتم بخير

الثلاثاء, سبتمبر 11, 2007

 
Blogger يا مراكبي said...

أبو أمك

ويا ترى التخطيط ده بالطول ولا بالعرض ؟

تعليق تحفه بصراحة

هو تخطيط بالورب
Diagonal

:-D

الثلاثاء, سبتمبر 11, 2007

 
Blogger يا مراكبي said...

عمرو المصري

تعليق مؤلم

يشرفنا زيارتك طبعا

الثلاثاء, سبتمبر 11, 2007

 
Blogger يا مراكبي said...

شـــــهــــروزة

أشكرك جدا يا شهرو على التهنئة الجميلة دي وعلى الشعور الجميل ده

كل سنة وإنتي طيبة ونفرح بيكي قريب

الثلاثاء, سبتمبر 11, 2007

 
Blogger MAKSOFA said...

قريت وعرفت حاجه مكنتش عارفاها بصراحه ، بس قبل ما أعلق رحت للطبيبه بتاعتي علشان تقيس الضغط لقيته 130 علي 90 يعني عالي شويه ، بس أكيد موش بوستك السبب لأن الحقيقه لسه جايه من مصر أول أمبارح

الثلاثاء, سبتمبر 11, 2007

 
Blogger يا مراكبي said...

رينـــــــــــا

وعليكم السلام ورحمه الله وبركاته

كل عام وأنت وزوجك الكريم بأفضل صحة وسعاجة وكذلك الأسرة الكريمة جميعا

تقبل الله منا جميعا

الثلاثاء, سبتمبر 11, 2007

 
Blogger يا مراكبي said...

Aardvark EF-111B

ليه بس كده؟ بلاش ربنا يكرمك

الثلاثاء, سبتمبر 11, 2007

 
Blogger يا مراكبي said...

اسكندراني اوي

سمعت .. سمعت .. بتزعق ليه بس؟

وبعدين ما إسمهاش الهولاهوب .. إسمها الهيلاهوب

وتحط اللمبة على أي حتة تنور

ههههههه

كل سنة وإنت طيب وتنورني دايما

الثلاثاء, سبتمبر 11, 2007

 
Blogger يا مراكبي said...

إنسانة

أيوه هو ده .. شفتي الدنيا؟

يحي العظام وهي رميم

الثلاثاء, سبتمبر 11, 2007

 
Blogger نـــــــور said...

كل عام وانت بخير وإلى الله اقرب وعلى طاعته ادوم ... ورمضان كريم


!البوست فعلا ...دمار

والبوست اللي قبله جميل ، القصة جميلة وماشاء الله اسلوبك تحفة .. فعلا بلاش منها الهندسة ..

:)

تحياتي

الثلاثاء, سبتمبر 11, 2007

 
Blogger يا مراكبي said...

Sampateek

ربنا يخليكي وحمد الله على سلامتكم

كل سنة وإنتم طيبين .. هأروح أجرب البتاع ده على مسؤليتك .. أنا عرفت إنه عالبحر من عند شارع صاري في إتجاه الجنوب

نورتوا جده تاني

الثلاثاء, سبتمبر 11, 2007

 
Blogger يا مراكبي said...

max.adams

أهلا أهلا بالفنكوش الكبير

عايزنا نخطط نطلع القمر؟ طيب نطلع لنهائيات كأس العالم الأول

ههههههه

متشكر قوي على الإطراء ده ونةرتني

الثلاثاء, سبتمبر 11, 2007

 
Blogger يا مراكبي said...

MAKSOFA

وبجد كنتي في مصر وطلع 130 على 90 بس؟
طيب ده أنا كان هيجيلي سكتة قلبية لما رحت هناك

عموما سلامتك .. وحمد الله على سلامتك .. وربنا يصلح الحال

الثلاثاء, سبتمبر 11, 2007

 
Blogger يا مراكبي said...

نـــــــور

ده كلام كبير قوي .. أشكرك جدا على الإطراء الجامد ده

أنا سعيد إن آخر بوستس عجبوكي كده .. أرجوا إن يكون فيهم ولو قدر ضئيل من الفائدة

كل عام وأنتم بخير وربنا يتقبل

الثلاثاء, سبتمبر 11, 2007

 
Blogger Tamer Nabil said...

مش فارقة كتير


هيا جت على الحديد وهتوقف

تحياتى

الثلاثاء, سبتمبر 11, 2007

 
Blogger malak said...

ايه الكلام الكبير ده بس متنساش ان احنا اكيد اكيد فى مصر


تحياتى


كل عام وانت بخير رومضان كريم

الثلاثاء, سبتمبر 11, 2007

 
Blogger اعشق فى اليل ضوء القمر said...

يا مركبى
تقبل الله منا ومنك
وكل عام وأنت بخير

الثلاثاء, سبتمبر 11, 2007

 
Blogger ياسر سليم said...

السلام عليكم ورحمة الله وبركاتة

كل عام وانت بخير

غفر الله لنا ولك فى رمضان

و ثبتنا على الخير بعد رمضان

الأربعاء, سبتمبر 12, 2007

 
Blogger mariam said...

كل سنه وانت و الأسره بخير
رمضان كريم
ربنا يتقبل منا جميعا

الأربعاء, سبتمبر 12, 2007

 
Blogger Reemo said...

كل سنه وانت طيب يا بشمهندس
رمضان كريم
ربنا يبلغك رمضان ويعوده عليك بالخير ان شاء الله
آميـــن

الأربعاء, سبتمبر 12, 2007

 
Blogger يا مراكبي said...

Tamer Nabil

على رأيك .. يعني جت على دي؟ ما هي كل حاجة بايظة أصلا

منورني

الأربعاء, سبتمبر 12, 2007

 
Blogger يا مراكبي said...

malak

طبعا .. ما بأتكلم عن حالة فريدة في العالم بنتميز بيها وهي: عدم التخطيط

أهلا بيكي وكل سنة وإنتي طيبة

الأربعاء, سبتمبر 12, 2007

 
Blogger يا مراكبي said...

اعشق فى اليل ضوء القمر

تقبل الله منا جميعا وكل عام وأنتم بخير

تحياتي

الأربعاء, سبتمبر 12, 2007

 
Blogger يا مراكبي said...

ياسر سليم

آمين آمين أمين

اللهم إستجب دعاءنا

تحياتي ليك

الأربعاء, سبتمبر 12, 2007

 
Blogger يا مراكبي said...

mariam

أشكرك يا مريم وكل عام وأنتم جميعا بخير

الأربعاء, سبتمبر 12, 2007

 
Blogger يا مراكبي said...

Reemo

كل سنة وإنتي طيبة وإن شاء الله السنة الجاية تكوني أحسن وأحسن بإذن الله

كل عام وأنتم بخير

الأربعاء, سبتمبر 12, 2007

 
Blogger زُمُرده said...

السلام عليكم
ايه الكلام ده يامراكبي
هو انت مش عارف انك بتتكلم عن حاجه كل الناس بتتكلم عنها
ناس توصفها وناس تمدحها
وناس تخطط وناس تنفذ
ناس تخطو تتقدم وناس تسمع وتتفرج
مادمت بتتكلم عن مصر
اوقولك اللي انت بتتكلم عنه ده موجود من زمااااااااان
بس دلوقتي بقى شفاف
زي العفاريت الكل يتكلم عنها ومحدش شافها
اما خارج مصر.....الله اعلم
في شمس منوره في عقول بشر بتبني مستقبل
واحنا عايشين على ذكرى الفراعنه
أمال انت فاكر ابو الهول سكت ليه؟
اصله زهق من تمجيد الماضي
ربنا معاك...خد بالك من دماغك
سلام

الأربعاء, سبتمبر 26, 2007

 
Blogger يا مراكبي said...

زمردة

حلو قوي موضوع التخطيط اللي موجود بس شفاف ده

يعني تخطيط شبحي .. إسم جديد جدا .. إيه رأيك؟

عموما أنا ما أقدرش أوعدك إني آخد بالي من عقلي لأنه بيطير كل ما أفكر في حال بلادي

نورتينا

السبت, سبتمبر 29, 2007

 
Blogger osama said...

ههههههههههههههههههه ، جميل اوي، اخيرا عرفت يعني ايه تخطيط استراتيجي ... بس هوه فعلا التخصص عشانه بيكون دقيق ...شويتين بيحتاج وقت طويل عشان تظهر نتائجه .. وبالتالي نحن دائما بنستبدل التخطيط الاستراتيجي عبر عملية احلال وتبديل معروفة في علم النفس بالخيار الاستراتيجي اوفر واحسن .. لك خالص التحية .. يسعدني زيارتكم لمدونتي ...

الأحد, سبتمبر 30, 2007

 
Blogger يا مراكبي said...

osama

سيبك إنت .. طبعا الخيار الإستراتيجي أهم

والأحلى والأجمل هو البرتقال الإستراتيجي والمانجا الإستراتيجية وماننساش طبعا أبو الإستراتيجية كلها: العنب العنب العنب

أهلا بيك

الأحد, سبتمبر 30, 2007

 

إرسال تعليق

Links to this post:

إنشاء رابط

<< Home