شد القلوع يا مراكبي ... مافيش رجوع يا مراكبي

الخميس، يونيو 28، 2007

مها

لم أكن أتوقع أن يكون ذلك الحدث السعيد هو بداية لشهور طويلة من الخلاف مع زوجتي .. فبعد ساعات قليلة من ولادة ابنتنا الجديدة .. كنت قد قررت أن أسميها .. مها .. أما زوجتي فقد كانت تريدني أن أختار اسما بين ثلاثة أسماء اختارتهم هي بنفسها .. لكنني كنت مصرا للغاية على أن أختار .. مها
.
لم تستنج زوجتي من إصراري على ذلك الاسم سوى أنني كنت أحب في الماضي فتاة ما تدعى أيضا مها .. هذا ما تخيلته هي وصدقته تماما .. قالت لي أنني لا أريد أن أنسى فتاتي المزعومة تلك .. ولذلك السبب أصر على أن أسمي ابنتنا على اسمها كي أظل أذكرها دائما .. عبثا حاولت أن أقنعها بأن ذلك هراء بلا شك .. فما دفعني لاختيار ذلك الاسم هو شدة جمال معناه .. ورقة حروفه .. وسهولة نطقه .. إنه اسم رائع بالفعل .. لكن دون جدوى
.
كانت زوجتي تكره مها الصغيرة وتبغضها .. اختزلت فكرة فتاتي الافتراضية في تلك الطفلة الرضيعة المسكينة .. كانت تتركها تبكي كثيرا وتجوع كثيرا .. كانت وكأنها تعاقبني أنا وفتاتي الخيالية بأن تهمل في رعايتها لمها الصغيرة
.
وبعد طول عناء .. جاءني الفرج عندما اتصل بي صديق دراستي تليفونيا ذات يوم ليزف إلي بأن زوجته قد وضعت بنتا جديدة .. أسموها أيضا .. مها .. كان أمرا ملفتا ومدهشا جدا لزوجتي .. أخيرا اقتنعت بأن ذلك الاسم هو اسم جميل وجذاب .. فالجميع يقبلون على إطلاق ذلك الاسم على بناتهم في هذه الأيام
.
لن تدرك زوجتي أنني كنت أتنافس مع صديق دراستي سنوات طويلة على حب مها

التسميات:

الخميس، يونيو 21، 2007

وإحنا نايمين

في سنة 1997 أوبعدها بشوية صحي الشعب المصري على خبر إن فيه مهرجان سياحة وتسوق في دبي وحاجات غريبة كده .. بعدها بشوية بدأت الناس تتكلم عن دبي وعن جمالها وعن تقدمها وعن التبادل التجاري الضخم اللي هناك وكأن دبي دي إكتشاف جديد أو كأنها بلد طلعت من تحت الأرض فجأة .. لكن الحقيقة غير كده خالص .. الحقيقة هي إنهم شغالين بيبنوا في بلدهم من أكتر من خمسة وعشرين سنة وإحنا كنا نايميين .. أنا عارف إن رقم 25 سنة ده رقم سحري بالنسبة لكم .. لكن خلينا في موضوعنا دلوقت

.

يعني تصدقوا مثلا إن ميناء جبل علي اللي هو أكبر ميناء صناعي في العالم تم افتتاحه سنة 1979 وكان فيه 67 رصيف للسفن العملاقة؟ وكان قبلها بسنة واحدة بس لسه مخلصين مشروع توسعة ميناء راشد اللي وصلوه لخمسة وتلاتين رصيف؟ وإنهم في سنة 1979 تم افتتاح مصنع الألومونيوم الأكبر في العالم؟ وإن طيران الإمارات إشتغلت سنة 1985؟ طبعا كلنا كنا فاكرين إن الحاجات دي كلها لسه معموله قريب جدا
.
في ال 25 سنة السحريين اللي فاتوا لو بصينا على مستوى العالم هنلاقي إن دبي بقت هي الأولى في تجارة إعادة التصدير وعندهم أكبر مصنع ألومونيوم وأعلى فندق وأعلى ناطحة سحاب وأكبر مركز للتسوق وأكبر جزر صناعية وأكبر ميناء بحري وأكبر معدل نمو اقتصادي
.
وعلى مستوى الشرق الأوسط بقى عندهم أكبر مركز للمال وأكبر برج للمكاتب وأكبر سوق حرة وأكبر مطار وأكبر شركة طيران وأكبر تجمع لشركات التكنولوجيا والإعلام والإنترنت وأكبر منطقة حرة وأكبر مدينة للإعلام وأكبر حوض جاف
.
بيدخلهم سنويا حوالي 6 مليون سائح ونفسهم يوصلوهم ل 15 مليون سائح سنة 2015 .. المطار بيستقبل 25 مليون راكب سنويا ونفسهم يوصلوهم ل 120 مليون راكب في العشر سنين اللي جايه .. دخل الإمارة السنوي أكتر من 37 مليار دولار .. شوفوا دول يطلعوا كام باللحلوح المصري وقولولي مصر بتعمل كام لحلوح في السنة؟ أنا شخصيا بأشارك في جزء من مشروع إنشاء مطار جبل علي اللي هيكون من أكبر مطارات تداول البضائع في العالم
.
من أحلى الكلمات اللي قالها أمير دبي هي إن الأمم بتتقدم على الأمم الأخرى حسب تقدم اقتصادها .. والاقتصاد هو عصب الحياة في الماضي والحاضر والمستقبل .. العرب كانوا الأعلى في العالم بين الأمم لما كانوا هما اللي مسيطرين على الاقتصاد العالمي .. إزاي؟ إخترع العرب الشراع المثلث للسفن البحرية فقدرت السفن تبحر من غير ما تستنى الرياح الشديدة .. اعتمدوا على علم الفلك وحركة النجوم علشان يبحروا بالليل مش بالنهار بس .. إخترعوا البوصلة فقدوا يبحروا لما الدنيا تكون مغيمة والنجوم مش باينه في السماء .. الخلاصة .. قدروا يبحروا في كل وقت وتحت أي ظروف فقدروا يسبقوا بتجارتهم كل الأمم التانية .. قدروا يتاجروا حتى في محاصيل سريعة التلف .. سيطروا على الاقتصاد العالمي فكانوا أعلى الأمم .. لحد ما جت أمم تانيه اخترعت السفن اللي بالمحركات البخارية وسبقونا .. الوقت بيمر والعالم بيجري وماحدش هيستنانا
.
وفي النهاية .. أحب أهدي البوست ده لحبايبنا بتوع الاقتصاد وأصحاب القرار في بلدنا وسمعوني سلام البريء بريء بيء اللي بيلق في الشكمانات .. وخلينا نايمين

التسميات:

الأربعاء، يونيو 13، 2007

أحييكم من إستاد القاهرة بالكويت


مراسلينكم بالكويت المراكبي وأولادة بيحيوكم من إستاد القاهرة بالكويت من وسط عشرتاشر طماشرألف متفرج مصري بيشجعوا منتخبنا في مباراته الودية مع منتخب الكويت .. إحنا بعون الله رجولة وكفاءة وجدعنة ومحافظين على كل أصول التشجيع المصري الأصيل وعلى كل الشتايم الكلاسيكية الخاصة بالصحافة والحكام .. وبعون الله هزينا الملعب جامد وفرقتنا كسبت الماتش واحد واحد .. وأنا وأولادي من موقعنا هنا بنقول لكم إننا بجد بجد حسينا لمدة ساعتين وكإننا في مصر .. ساعتين بس .. مش عارف ليه ماتشات الكورة ما بتطولش أكتر من كده؟

التسميات:

الأربعاء، يونيو 06، 2007

في الذكرى السنوية العاشرة

في الذكرى السنوية العاشرة لجوازي .. بأقعد أفكر في حاجات كتير قوي .. ياترى لو رجع بيا الزمن عشر سنين لورا وما كنتش إتجوزت .. مش كان زماني دلوقت بأصحى الصبح متأخر شوية بدل الميعاد السخيف اللي بأضطر أنزل فيه مع الأولاد الصبح علشان باص المدرسة اللي بييجي الساعة ستة ده؟ مش كان زماني بأروح البيت بعد الشغل وأنتخ وأنام بدل ما أقعد أذاكر للأولاد ساعتين بسرعة علشان هيناموا بدري؟ مش كان زماني ما بأروحش السوق كل إسبوع مرتين علشان أشتري طلبات البيت اللي ما بتخلصش؟ أو أفضل كل صيف وكل شتا وكل عيد ألف المحلات كعب داير على شراء ملابس الأولاد وأحتار في المقاسات والألوان والأذواق .. والأسعار؟
.
مش كان زماني أقدر أنزل عالقهوة وأقعد مع أصحابي في أي وقت وفي أي يوم زي ما أنا عايز من غير ما أقعد أمهد إسبوع للخروجة دي؟ مش كان زماني أقدر أفتح قناة ميلودي براحتي وأبوس الواوا وأتفرج على الباشمهندسة نانسي عجرم و الباشمهندسة روبي والباشمهندسة كارول سماحة من غير ما أكون خايف من أي قصف جوي بالحلل والأطباق؟ مش كان زماني بأخش البيت وما ألاقيش الأولاد بيقولولي إتأخرت ليه وكنت فين .. والحاجة أمهم ساكتة ولا كأنها مسلطاهم عليا؟ مش كان زماني مش غصب عني بأروح الملاهي وأفضل أركب ده وأنزل دي لحد ما يتهد حيلي؟ أو نروح حمام السباحة وأفضل شايل المفعوصة الصغيرة على قلبي بالساعات وواخد بالي من الإتنين التانيين ليروحوا كده وألا كده؟
.
مش كان زماني حوشت كل الفلوس اللي إتصرفت دي كلها على أثاث البيت وحفل الزفاف ومصاريف الولادة والأطباء والمدارس والأكل والشرب والملابس والمناسبات الاجتماعية والعيش والعيشة واللي عايشينها؟ مش كان زماني دلوقت بقيت مليونير وكل البنات بتحبني وكل البنات بتغير؟
.
في الذكرى السنوية العاشرة لجوازي .. لو رجع بيا الزمن عشر سنين لورا .. كنت إتجوزت بدري عن كده بثلاثة سنين كمان .. وكان زماني بأكتب بوست عنوانة .. في الذكرى السنوية الثالثة عشر لجوازي

التسميات: