وإحنا نايمين

في سنة 1997 أوبعدها بشوية صحي الشعب المصري على خبر إن فيه مهرجان سياحة وتسوق في دبي وحاجات غريبة كده .. بعدها بشوية بدأت الناس تتكلم عن دبي وعن جمالها وعن تقدمها وعن التبادل التجاري الضخم اللي هناك وكأن دبي دي إكتشاف جديد أو كأنها بلد طلعت من تحت الأرض فجأة .. لكن الحقيقة غير كده خالص .. الحقيقة هي إنهم شغالين بيبنوا في بلدهم من أكتر من خمسة وعشرين سنة وإحنا كنا نايميين .. أنا عارف إن رقم 25 سنة ده رقم سحري بالنسبة لكم .. لكن خلينا في موضوعنا دلوقت

.

يعني تصدقوا مثلا إن ميناء جبل علي اللي هو أكبر ميناء صناعي في العالم تم افتتاحه سنة 1979 وكان فيه 67 رصيف للسفن العملاقة؟ وكان قبلها بسنة واحدة بس لسه مخلصين مشروع توسعة ميناء راشد اللي وصلوه لخمسة وتلاتين رصيف؟ وإنهم في سنة 1979 تم افتتاح مصنع الألومونيوم الأكبر في العالم؟ وإن طيران الإمارات إشتغلت سنة 1985؟ طبعا كلنا كنا فاكرين إن الحاجات دي كلها لسه معموله قريب جدا
.
في ال 25 سنة السحريين اللي فاتوا لو بصينا على مستوى العالم هنلاقي إن دبي بقت هي الأولى في تجارة إعادة التصدير وعندهم أكبر مصنع ألومونيوم وأعلى فندق وأعلى ناطحة سحاب وأكبر مركز للتسوق وأكبر جزر صناعية وأكبر ميناء بحري وأكبر معدل نمو اقتصادي
.
وعلى مستوى الشرق الأوسط بقى عندهم أكبر مركز للمال وأكبر برج للمكاتب وأكبر سوق حرة وأكبر مطار وأكبر شركة طيران وأكبر تجمع لشركات التكنولوجيا والإعلام والإنترنت وأكبر منطقة حرة وأكبر مدينة للإعلام وأكبر حوض جاف
.
بيدخلهم سنويا حوالي 6 مليون سائح ونفسهم يوصلوهم ل 15 مليون سائح سنة 2015 .. المطار بيستقبل 25 مليون راكب سنويا ونفسهم يوصلوهم ل 120 مليون راكب في العشر سنين اللي جايه .. دخل الإمارة السنوي أكتر من 37 مليار دولار .. شوفوا دول يطلعوا كام باللحلوح المصري وقولولي مصر بتعمل كام لحلوح في السنة؟ أنا شخصيا بأشارك في جزء من مشروع إنشاء مطار جبل علي اللي هيكون من أكبر مطارات تداول البضائع في العالم
.
من أحلى الكلمات اللي قالها أمير دبي هي إن الأمم بتتقدم على الأمم الأخرى حسب تقدم اقتصادها .. والاقتصاد هو عصب الحياة في الماضي والحاضر والمستقبل .. العرب كانوا الأعلى في العالم بين الأمم لما كانوا هما اللي مسيطرين على الاقتصاد العالمي .. إزاي؟ إخترع العرب الشراع المثلث للسفن البحرية فقدرت السفن تبحر من غير ما تستنى الرياح الشديدة .. اعتمدوا على علم الفلك وحركة النجوم علشان يبحروا بالليل مش بالنهار بس .. إخترعوا البوصلة فقدوا يبحروا لما الدنيا تكون مغيمة والنجوم مش باينه في السماء .. الخلاصة .. قدروا يبحروا في كل وقت وتحت أي ظروف فقدروا يسبقوا بتجارتهم كل الأمم التانية .. قدروا يتاجروا حتى في محاصيل سريعة التلف .. سيطروا على الاقتصاد العالمي فكانوا أعلى الأمم .. لحد ما جت أمم تانيه اخترعت السفن اللي بالمحركات البخارية وسبقونا .. الوقت بيمر والعالم بيجري وماحدش هيستنانا
.
وفي النهاية .. أحب أهدي البوست ده لحبايبنا بتوع الاقتصاد وأصحاب القرار في بلدنا وسمعوني سلام البريء بريء بيء اللي بيلق في الشكمانات .. وخلينا نايمين