شد القلوع يا مراكبي ... مافيش رجوع يا مراكبي

الأحد، يونيو 06، 2010

الذكرى السنوية الثالثة عشرة

في الذكرى السنوية الثالثة عشرة لجوازي .. بأقعد أفكر في حاجات كتير قوي .. ياترى لو رجع بيا الزمن تلاتاشر سنة لورا وما كنتش إتجوزت .. مش كان زماني بأروح البيت بعد الشغل وأنتخ وأنام بدل ما أقعد أذاكر للأولاد ساعتين بسرعة علشان هيناموا بدري؟ مش كان زماني ما بأروحش السوق كل إسبوع مرتين علشان أشتري طلبات البيت اللي ما بتخلصش؟ أو أفضل كل صيف وكل شتا وكل عيد ألف المحلات كعب داير على شراء ملابس الأولاد وأحتار في المقاسات والألوان والأذواق .. والأسعار؟
.
مش كان زماني أقدر أنزل عالقهوة وأقعد مع أصحابي في أي وقت وفي أي يوم زي ما أنا عايز من غير ما أقعد أمهد إسبوع للخروجة دي؟ مش كان زماني أقدر أفتح قناة ميلودي براحتي وأبوس الواوا وأتفرج على الباشمهندسة نانسي عجرم و الباشمهندسة روبي والباشمهندسة كارول سماحة من غير ما أكون خايف من أي قصف جوي بالحلل والأطباق؟ مش كان زماني بأخش البيت وما ألاقيش الأولاد بيقولولي إتأخرت ليه وكنت فين .. والحاجة أمهم ساكتة ولا كأنها مسلطاهم عليا؟ مش كان زماني مش غصب عني بأروح الملاهي وأفضل أركب ده وأنزل دي لحد ما يتهد حيلي؟ أو نروح حمام السباحة وأفضل شايل المفعوصة الصغيرة على قلبي بالساعات وواخد بالي من الباقيين ليروحوا كده وألا كده؟
.
مش كان زماني حوشت كل الفلوس اللي إتصرفت دي كلها على أثاث البيت وحفل الزفاف ومصاريف الولادة والأطباء والمدارس والأكل والشرب والملابس والمناسبات الاجتماعية والعيش والعيشة واللي عايشينها؟ مش كان زماني دلوقت بقيت مليونير وكل البنات بتحبني وكل البنات بتغير؟
.
في الذكرى السنوية الثالثة عشرة لجوازي .. لو رجع بيا الزمن تلاتاشر سنة لورا .. كنت إتجوزت بدري عن كده بثلاثة سنين كمان .. وكان زماني بأكتب بوست عنوانة .. في الذكرى السنوية السادسة عشر لجوازي
.

التسميات:

40 Comments:

Blogger آخر أيام الخريف said...

عقبال 13 الف سنة يا باشمهندس :))) ربنا يخليكوا لبعض

الأحد, يونيو 06, 2010

 
Blogger ♥♥ شذا ♥ الروح ♥♥ said...

ههههههههههههههههه

أول زياره ليا بمناسبه حلوه كده

هههههههههههه

بس شكلك يأس أووى من الزواج بس هى دى سنة الحياة يا فندم

ربنا يسعدك يارب ويحفظك

ويمكن حضرتك زوج مثالى واحسن من غيرك بكتير اوووى

معلهش كأس وداير علينا كلنا
أنتم السابقون ونحن اللاحقون
هاااااااااااا دنيـــــــــــــــا

هههههههههههههههههههههه
بتمنالك حياه سعيده من أعماق قلبى ويارب يجعل ايامك كلها فرح وسعاده
عجبتنى مدونتك أوى
أسمحلى بالمرور دومآ
مودتى

الأحد, يونيو 06, 2010

 
Blogger ♥♥ شذا ♥ الروح ♥♥ said...

اسمحلى هضيف المدونه عندى للمتابعه

كون بخير دومآ أستاذى الفاضل

الأحد, يونيو 06, 2010

 
Blogger sal said...

هههههههههه

يا صديقى عقبال السادس عشر
والسادس والعشرين والسادس والثلاثين
وهلما جرا...وعقبال السادس من اكتوبر وتنجح فى انشاء حائط الصواريخ الذى يقيك من قصف الحلل والاطباق

والله زمان انت فكرتنى فى حاجة كنت ناسيها
هههههههه
ربنا يكرمك ويسعدك

والف مبروك

الأحد, يونيو 06, 2010

 
Blogger موناليزا said...

عقبال الذكرى المئوية:)

الأحد, يونيو 06, 2010

 
Blogger ماجد العياطي said...

صحيح هو انت هتروح فين يعني

ما هي هي تلاتاشر خمستاشر

كده كده البوست ده كان هيتكب

احييك على شجاعتك

تحياتي

الأحد, يونيو 06, 2010

 
Blogger MR.PRESIDENT said...

البوست عجبني جدا .. وهابي عيد جواز داي يا هندزه ..

ويا بخت العيال وأم العيال بيك .. والله ..

وبجد ان سعيد ليك في المناسبة دي ابويا وامي كسروا ال33 سنة بس طبعا ولا حد بيفكر التاني .. ولسان كل واحد منهم .. ما انا كنت عازب ومرتاح .. انا ايه اللي رماني علي وجع القلب..

تحياتي

الأحد, يونيو 06, 2010

 
Blogger دودو said...

هههههههه
حتى هنا كمان
كل سنه وانتم طيبين وعقبال 50 سنه
وبعدين يعنى انتى بتشتكى من 13 سنه ؟

يعنى انا حقى اكرم البطل اللى عندى داخل على 20 سنه ومابيشتكيش
:))
ولو ان كلامك ده هيجنى عليه
ههههههههههههههه
يالا ذنبه فى رقابتك


وكل سنه وانتم طيبين وبخير وسعاده يارب

الأحد, يونيو 06, 2010

 
Blogger М€ŝЋМΣŞĦ said...

حسيت من كلامك إنك بتعدد متع الحياة .. مش بتتذمر منها.

جايز كل واحد فينا بيحب يكون ليه لحظة حرية.. لحظة سلام مع نفسه .. بس يا ترى لو حد فينا كانت عنده الحرية دى و فلوس الدنيا كلها.. ده يساوى إنك ترجع البيت يوم.. وبدل ما كان الواحد بيدور على الحرية يدور على الدفء و ميلاقيهوش موجود ؟

أنا عن نفسى مبحبش السقعة

هابى أنيفيرسرى
تحياتى

الأحد, يونيو 06, 2010

 
Blogger كلمات من نور said...

عقبال اليوبيل الفضي والذهبي والماسي

مش فاكرة الأخير إيه ....تحياتي

الأحد, يونيو 06, 2010

 
Blogger مهندس مصري said...

كل سنة و انت طيب يا بشمهندس
ربنا يخلي لك العيال و امهم
:)

الأحد, يونيو 06, 2010

 
Blogger sakayar said...

إيه يابشمهندس ؟ جبت ورا ليه ف آخر البوست
:)
كل سنة وحياتكم سوا مليانة خير وسعادة ورضى من ربنا

الأحد, يونيو 06, 2010

 
Anonymous غير معرف said...

عقبال 100 سنة فى حب ومودة وفرح يارب ويبارك لك فى الاولاد وتروح الملاهى وحمام السباحة والمول يارب (نور nour)

الأحد, يونيو 06, 2010

 
Blogger اميرة بهي الدين said...

بص ياقاضي
كل اللي انت بتقوله ده هو اللي بيدي الحياه طعم وبيخلق الذكريات ويديك ماده تكتب عنها ، الاطفال حمام السباحه العيد والمدارس المذاكره والهدوم ،
انا بقي اعرف رجاله ، قرروا يحوشوا الفلوس ويبوسوا الواو وقعدوا كده فاضيين ملوك زمانهم لكن زمانهم طفش من ام كآبتهم والفلوس طارت زي العصافير ونفسهم في حتت عيل يسلوا بيه شيخوختهم ..
كل سنه وانت طيب ياقاضي وربنا يطرح لك البركه في اولاد ويحافظ لك علي مراتك الست الكمل اللي مستحملاك انت وعيالك اساسا ، وبالمناسبه ابقي روح بوس الواو عند اي حد من اصحابك مايفرقش مع مراته انك تزورهم ساعه تتفرج علي ميلودي وتشوف الباشمهندسات كلهم براحتك !!!
كل سنه وانت طيب ياجميل وقلوبنا مع زوجتك الصامده الصابره وربنا يقويها

الأحد, يونيو 06, 2010

 
Blogger حرروف said...

مبروك اعادها الله عليك بالخير واليمن والبركات

:))))))))))))))))))

الأحد, يونيو 06, 2010

 
Blogger Esmat said...

بالهناء والسعادة، وكل يوم وأنتم طيبيين،وبعد تخيلك الحياة بدون واجباتها المفروضة..حزنت على سنيين فاتت وليه مش إرتبطت بدرى شوية،الظاهر فى كل ماذكرت عن متاعب أقصد مآثر الزواج,هى دى الحياة بصحيح

وعقبال ماتحتفل بسنيين جاية كتير
وتحتفل بذكرى زواج جميع أولادك يا رب 

الأحد, يونيو 06, 2010

 
Anonymous يوسف said...

إيه ياباشا!
هو كل سنة هتكتب نفس البوست ولا إيه!
أنا شفت البوست ده قبل كده

الأحد, يونيو 06, 2010

 
Blogger (green eyes) said...

كل عيد زواج وانت بخير وكل الاسرة الكريمه بصحه وسعاده
كل حاجه في الدنيا فيها الحلو وفيها الوحش
ولو مكنتش اتجوزت مكنتش هتلاقي حد يقولك يا بابا
ومكنتش هتلاقي حد يحبك وتحبه وتخاف عليه زي اسرتك :)

كل سنه وانت طيب

الأحد, يونيو 06, 2010

 
Blogger اسكندراني اوي said...

حلو يا قاضي
انا فاضلي كام شهر واكتب بوست بنفس العنوان
بس التفاضيل حتختلف كتير
هههههههههههههههههههههههههه
كل عيد جواز وانت طيب يا راجل يا طيب

الأحد, يونيو 06, 2010

 
Blogger فتاه من الصعيد said...

هههههههه

اشمعنى تلات سنين؟؟ دي فتره الخطوبه ولا ايه :) ..

كل سنه وحضرتك بخير ... وعقبال الانيفرسري ..

تحياتي

الأحد, يونيو 06, 2010

 
Blogger من كل بستان زهرة said...

متقلقش يا مراكبي كلها ثلاث سنين
وتبقى الذكرى السادسة عشر للزواج

بس ايه الحب ده كله
انا مشفتش راجل زيك خااااااالص
بتذاكر للأولادوبتجيب طلبات البيت
وبتلف مع المدام على لبس الأولاد
وبتوديهم الملاهي والنادي
وبتمنع نفسك عن مشاهدة ميلودي

انت زوج عظيم
الرجاله اليومين دول بيرموا كل حاجه على الزوجه
انت مفيش منك
ربنا يخليلك زوجتك وتتعبك كمان وكمان
ماهو ده أحلى تعب

الأحد, يونيو 06, 2010

 
Blogger حاجات جوايا said...

كل سنة وحضرتك طيب يا فندم
عقبال يارب ما تحتفل بعيد زواج اولادك الخمسين
ربنا يخليكوا لبعض
دمت بكل الخير

الأحد, يونيو 06, 2010

 
Blogger كيكى عوووووو said...

ايييه دنيا
كل سنة وانتوا بخير وصحه
عوووو

الأحد, يونيو 06, 2010

 
Blogger max.adams said...

طبعاً لأني ما أظنش انك بتعمل كل النشاطات دي بالملل اللي حسيته في الكتابه ، أكيد اللبس بتاع الأولاد لما يلبسوه بينسيك شكل المحل كان عامل ازي ، و انبساطهم وهم طالعين من الملاهي ، بيطير بيك على البيت ، و أكيد المفعوصه الصغنونه على ايدك بتخليك أخف 15 كجم من الوزن العادي ...
ألف مبروك و ربنا يهنيك بيهم و يهنيهم بيك ، و يا بخت المدام و الأولاد بحضرتك ، و يا بختك بيهم :)

الأحد, يونيو 06, 2010

 
Blogger يــوم جــديد said...

3 سنين ؟؟

دا تراجع عن البوست في آخر سطوره ولا ايه ؟؟
عموما الرجوع للحق فضيلة :)
وكل عام وأسرتك الصغيرة سعيدة

الأحد, يونيو 06, 2010

 
Blogger Me7'o said...

هههههههههههه

أحلى حاجة عند حضرتك قفلة البوست

بس الظاهر إن الحاجة وصلت عند جهاز الكمبيوتر وحضرتك فى آخر فقرة فى البوست
:))))

وترجع حضرتك 3 سنين على الثالثة عشر لكى تصبح حسب الله السادس عشر :))))

تحياتى وربنا يباركلكم فى بعض

الأحد, يونيو 06, 2010

 
Blogger سومه...مجنونه فى بلد عاقل said...

هههههههههههه بتعدل موقفك بسرعه
عشان متتعلقشى ها :))

الأحد, يونيو 06, 2010

 
Blogger Mona said...

عقبال سنوات وسنوات وسنوات وربنا يسعدك ويخلى لك اسرتك هو فيه أحلى من كده - تحياتى :)

الأحد, يونيو 06, 2010

 
Blogger محمد عبد الغفار said...

ربنا يسعدكم ويقدركم على مسئولياتكم

الاثنين, يونيو 07, 2010

 
Blogger мαησηα said...

هههههههههههههه

كان زمانك ماعندكش 3 قمرات وظابط

بتنسى الدنيا وهما ف حضنك ولما تشوف بسمتهم بتحس ان الدنيا مافيهاش هم وحزن وقلق

وماكنش زمانك بتلاقى حد يقسم معاك الهم

ويهون عليك الدنيا وقرفها

ولا تلاقى حد يطبطب عليك ويخلى باله منك وانت تعبان

صح ولا ايييييييييييه ؟؟

فينك يا حاجة ههههههه

وبعدين ال يعنى ال بتبقى زعلان اوى

وانت نازل السووووق علينا

ياابيه

بردو ههههههههههههههه

كل سنة وانتوا طيبين وبخير ومع بعض

احلى زوجين يارب

وربى يضلل عليكوا بالخير والبركة المودة

يارب اللهم اميييييييييييييييين

ادعيلى محتاجة دعواتك

الاثنين, يونيو 07, 2010

 
Blogger إنـســـانـة said...

انا حاسة إني قريت البوست ده كتييييييييييير قبل كدة ... جدد يا هندسة .. قولنا فى الذكرى الـ13 ايه اللى انت حاسه بجد

:D

واوعي تنسى تسلملي ع البت مها .. أزعل أوي
:$

الاثنين, يونيو 07, 2010

 
Blogger زهرة الجنة said...

كل سنة وانتم طيبين وديما مبسوطين

عقبال الذكري المئوية يا باشمهندس

الثلاثاء, يونيو 08, 2010

 
Blogger ali younes said...

ككككككك
ككككك
ههههههههههههه
هههههههههه

حرام عليك والله حرام عليك
انا بضحك وبعيط في نفس ذات الوقت
انت بجد مشكلة
وبعدين انت لازم تكشفنا امام الاعادء

هي نفس علاقة توم وجيرى

مهندس / علي يونس

ali-younes2.blogspot.com

ali-younes.blogspot.com

الأربعاء, يونيو 09, 2010

 
Blogger رضا الكومى said...

سلام عليكم
إزى حضرتك يا بشمهندس
لك وحشة والله
يبدو إنى جيت فى الوقت المناسب
بمناسبة الذكرى الثالثة عشرة للزواج
ويا رب تكون والأسرة الكريمة فى أتم صحة وأفضل حال

الأربعاء, يونيو 09, 2010

 
Blogger Sharm said...

انت كتبت البوست ده قبل كده !!

الأربعاء, يونيو 09, 2010

 
Blogger bentelghrob said...

أول زياره لمدونتك وكويس انها مناسبه سعيده
عقبال مليون سنه يارب
على فكره انا كمان قربت احط شمعه فى تورتت حياتى الزوجيه
بس انتوا نفسكوا طويل كويس انها ال13
دا انا كل مااختلف مع زوجى اقول له هدى اللعب يابعلى احنا قدامنا الزمن طويييييييييييل ويارب عقبال مايكون العيد ال13 عندى
ربنا يهنيكوا ويسعدكوا
انا مدونه بنت الغروب رد لى الزياره
تحياتى

الأربعاء, يونيو 09, 2010

 
Blogger يا مراكبي said...

أشكركم جدا على شعوركم الطيب ده

شكر الله سعيكم

وما نجيلكوش في حاجة وحشة

:-))))

الخميس, يونيو 10, 2010

 
Blogger ♥♥ شذا ♥ الروح ♥♥ said...

ههههههههههه


حضرتك بتسمى الذكرى السنويه لزواجك شىء وحش

خلاص انا من هنا بعلنها على الملاء مش هتجوز

ما يمكن جوزى يعمل فيا كده برده

قال يا مأمنا للراجل يامأمنا للميه فى الغربال

وعجبى

لاء انا زعلانه منك ليه مش علقت على بوستى الاخير لن اتنازل والا هتقوم الحرب بين بلوجرنا وبلوجركم عندك مانع

اصل البوست ده يفرق معايا اصله جايلى اهداء من مدون

يلا شد حيلك
منتظراك يا مراكبى
اقعد بالعافيه

الخميس, يونيو 10, 2010

 
Blogger noha gamal said...

كل سنة وانت طيب ياباشمهندس وعقبال اليوبيل الماسي انا سعيدة ان اول تعليق ليا فى مدونتك يكون تهنئة بزكرى سعيدة وغالية عليك ربنا يسعدك انت والمدام العمر كله ان شاء الله

الخميس, يونيو 10, 2010

 
Blogger ماجد القاضي said...

السلام عليكم

أولا: كل عام وإنت بخير.

ثانيا: بوست طريف، يبدو أني سأكتب شيئا مشابها له قريبا جدا عندما تحل ذكرى زواجي (الحداشر)!

ثالثا: أنا متابع مدونتك منذ فترة لكن لم يتسنَّ لي التعليق إلا الآن، أسجل إعجاب بأسلوب كتابتك.. وبالمناسبة قرأت عن كتاب الحياة بدون كاتشاب قبل أن أعرفك.

رابعا: يسعدني مزيد من التواصل معك من خلال زيارتك لمدونتي المتواضعة ومشاركتك فيها.

خامسا وهو المهم: أمهم الحاجة قرأت البوست ده؟!!!


تحياتي.

السبت, يونيو 19, 2010

 

إرسال تعليق

Links to this post:

إنشاء رابط

<< Home