مقال عن الزواج
بصفتي أحد قدامى المتزوجين .. رأيت أن أكتب إليكم خلاصة خبرتي و نصائحي في مقال لكنني آثرت لسلامة لنفسي أولا و لكم ثانيا و طبعا ماحدش فيكوا يرضى لي الأذية و المعنى في (بطن) الشاعر في الذكرى السنوية العاشرة
في الذكرى السنوية العاشرة لجوازي .. بأقعد أفكر في حاجات كتير قوي .. ياترى لو رجع بيا الزمن عشر سنين لورا وما كنتش إتجوزت .. مش كان زماني دلوقت بأصحى الصبح متأخر شوية بدل الميعاد السخيف اللي بأضطر أنزل فيه مع الأولاد الصبح علشان باص المدرسة اللي بييجي الساعة ستة ده؟ مش كان زماني بأروح البيت بعد الشغل وأنتخ وأنام بدل ما أقعد أذاكر للأولاد ساعتين بسرعة علشان هيناموا بدري؟ مش كان زماني ما بأروحش السوق كل إسبوع مرتين علشان أشتري طلبات البيت اللي ما بتخلصش؟ أو أفضل كل صيف وكل شتا وكل عيد ألف المحلات كعب داير على شراء ملابس الأولاد وأحتار في المقاسات والألوان والأذواق .. والأسعار؟ . مش كان زماني أقدر أنزل عالقهوة وأقعد مع أصحابي في أي وقت وفي أي يوم زي ما أنا عايز من غير ما أقعد أمهد إسبوع للخروجة دي؟ مش كان زماني أقدر أفتح قناة ميلودي براحتي وأبوس الواوا وأتفرج على الباشمهندسة نانسي عجرم و الباشمهندسة روبي والباشمهندسة كارول سماحة من غير ما أكون خايف من أي قصف جوي بالحلل والأطباق؟ مش كان زماني بأخش البيت وما ألاقيش الأولاد بيقولولي إتأخرت ليه وكنت فين .. والحاجة أمهم ساكتة ولا كأنها مسلطاهم
تعليقات
بتاكل لوحدك بتشرب لوحدك ..
بتنام بليل لوحدك..
لما تعوز تتكلم تدور في موبايلك على صديق يسمعك دا إن لقيت
لما تكون حزين متلاقيش صديق يستحملك
لما تكون سعيد متلاقيش حد يشاركك
بيتك مهرجل هدومك مش نضيفه .. جيبك فاضي من كتر الأكل بره البيت لأن مفيش أكل جوه ..
هي دي الحياه اللي بتتمناها ؟؟
روح لمراتك اشكرها على وجودها في حياتك