شد القلوع يا مراكبي ... مافيش رجوع يا مراكبي

السبت، يوليو 28، 2007

مصر مراة أبويا

جاي من بلاد بره وكان معانا أجانب كتير على الطيارة .. نافخ صدري بقى وأنا نازل في مطار بلدي .. وأول ما خرجنا لصالة الوصول .. إخص .. لقيت الموكيت مبقع ومتوسخ وكأن الكلب عامل عليه بي بي .. كنت مكسوف جدا من الأجانب اللي كانوا معانا .. وصدري اللي كان منفوخ على 28 بقى زي الكاوتش اللي عايز شامبر .. ياللا مش مشكلة .. بلدي ووحشاني
.
وقفني الباشمهندس بتاع الجمارك وكأنه إكتشف مهرب مخدرات .. سألني: إيه اللي معاك ده؟ قلت له فيديو وسعره جوة الإعفاء الجمركي المسموح به .. طبعا رأسه وألف شوز إنه لازم يتجمرك .. ليه؟ قال علشان أنا بأسافر كتير وجيت مصر مرتين السنة دي والإعفاء ده صالح لزيارة واحدة! ما لاقيتش حل غير إني أقلب عالوش بتاع اللمبي في فيلم بوحه لقيتهم سمحولي بالمرور على طول .. ده غير إن اللي كان معايا أصلا ما كانش فيديو .. ده كان ميكروييف .. ياللا مش مشكلة .. بلدي ووحشاني
.
الشخص اللي كان مستنيني بره لقيته حافي من غير عربية .. ليه؟ قال إن النظام الجديد هو إننا ننزل كل الشنط ونطلعها في أوتوبيس .. ويمشي بينا الأوتوبيس ده لحد أماكن إنتظار السيارات البعيد وهناك ننزل الشنط تاني .. فاصل كده من التعذيب للناس وعقاب ليهم على إنهم جم لمصر .. بس ياللا مش مشكلة .. بلدي ووحشاني
.
الطريق بقى من المطار للبيت .. ملاهي مولد النبي ومدرسة السيرك القومي في قيادة السيارات .. اللي يعدي من على يمينك .. واللي يطلع من طريق جانبي من غير ما يبص على الطريق الرئيسي .. والإشارة اللي بتيقى حمراء والناس بتمشي عادي .. واللي يزنق واللي يكسر .. واللي إيده على الكلاكس كل ثانيتين وكأن العربية بتمشي بالكلاكس .. والعربيات الكارو اللي إنقرضت من العالم كله إلا عندنا .. وألا بقى تحفة الزمان والمكان اللي إسمه الميكروباص .. وألا الإختراع الأنقح منه وهو التوك توك الرهيب .. كان هيجيلي إنهيار عصبي لحد ما وصلت للبيت .. .. بس ياللا مش مشكلة .. بلدي ووحشاني
.
كل ما أروح أشتري حاجة أو آكل في أي مكان .. بأحس إن اللي بيقدموا الخدمة عايزيني أحمد ربنا إنهم رضيوا يعبروني أصلا .. مع إني أنا العميل وأنا اللي دافع الفلوس .. ومن غيري أنا واللي زيي ممكن يجوعوا .. فيه حالة عامة من التعالي على العميل مش عارف ليه .. ده غير السرقة اللي عيني عينك وعدم الوضوح ونقص المعلومات .. رحت أشتري تليفزيون بيتعلق عالحيطة .. وبعد ما دفعت الفلوس لقيت البياع بيقول لي: مش عايز تشتري بقى الحامل اللي بيتعلق عليه التليفزيون؟ طبعا أنا صعقت .. يعني ممكن أشتري بنطلون من غير سوستة؟ أو عربية من غير كاوتش؟ يعني أنا من الصبح قاعد بأختار التليفزيون اللي هيتعلق عالحيطة والبياع مخبي عليا إنه من غير حامل التعليق .. يعني كنت هاروح البيت وأستغل التليفزيون بدل ترابيزة المكواه؟ بدأت أتنرفز .. بس بلدي ووحشاني
.
رحنا رحلة لشاطئ قريب .. وساعة الرجوع وصفولي الطريق الدائري علشان بعيد عن الزحمة .. أخدت الطريق الدائري ده ولقيته ضلمة كحل .. حاجة مرعبة جدا .. والأسوأ بقى إن ما فيش ولا يافطة ممكن تدلك على أي إتجاه .. ده طبعا من منطلق إننا أولاد بلد والمفروض نكون عارفين طرق بلدنا وعيب لما يحطو يفط .. طبعا تهت والدنيا كانت ضلمة وهوب .. طلعت بالعربيه على الجزيرة اللي بتفصل بين تقاطعين وكانت العربية هتتقلب بينا وكنا هنموت وما كنتوش هتشوفوا البوست ده أبدا .. الحمد لله قدر ولطف وحصل خير.. بلدي ووحشاني .. وسع ياجدع .. سيبنى منك له .. بلدي ووحشاني يا جدعان
.
كل ده حصل لي في 4 أيام بس .. أمال لما هأكمل إسبوعين هيحصل لي إيه تاني؟ أنا مش عارف مصر بتعمل فينا كل ده ليه؟ مش مصر هي أمي؟ فيه أم بتعمل في أولادها كده؟ طبعا لأ .. يبقى مصر مش ممكن تكون أمي أبدا .. هي أكيد مراة أبويا .. ايوة مراة أبويا .. هو ده الإستنتاج السليم للي بيحصل ده .. بلدي ووحشاني يا جدعان

التسميات:

106 Comments:

Blogger عدى النهار said...

حمد الله على السلامة يا مراكبى

ولو إن كلامك مش جديد إلا إنك كملت به على الحتة اللي كانت فاضلة عندى بعد ما قرأت عدد الجمعة من "المصريون" إتفضل http://www.almesryoon.com/

السبت, يوليو 28, 2007

 
Blogger دنــــيــــــا مـحـيـرنـي said...

حمد لله علي السلامه يا مراكبي مرحبا بك في بلدك كل الكلام ده بياكيدك علي نغمات الاغنيه الشهيره
يبقي انت اكيد في مصر
امال ازي ماتوحشكش من غير لما تفتكر الحركات ده
غني غني
يبقي انت اكيد في مصر
ههههه الف حمدلله علي السلامه

السبت, يوليو 28, 2007

 
Blogger hend said...

حمدالله على السلامة
وكويس ان ده بس اللى حصل يعنى لا شنط ضاعت فى المطار ولا حركات قرعة اننا ليا خالى معاه الجنسية الهولندية وبييجى فى السنة اكتر من 3 مرات كل مره لازم تضيع شنطه وعلشان ترجع له على طول المسءولين بيقولوله استخدم الباسبور الهولندى انما لو استخدمت المصرى يبقى هتستنى كتير يعنى احفادك ان شاء الله يستلموها
هى دى بلدنا

السبت, يوليو 28, 2007

 
Blogger حــلم said...

آه يا مراكبى
هى دى مصر بجد
آخر مرة كنت فى سفر داخلى كنت مركزة جداً علشان افكر جوزى بالحفرتين اللى على شمال الطريق وإلا هتبقى تالت مرة نقع فيهم
الطريق اللى باسافر عليه دايماً فيه رادار.. لو زودت عن 100 كم هتلاقى اللجنة بتسحب الرخص
لما حصلت مرة قبل كدة ما جبهاش غير واحد لواء معرفة والا هتلف عليها كعب داير
لكن احنا كمصريين بنقدر نتصرف.. يعنى لما تلاقى عربيات النقل مؤدبة وماشية يمين وسرعتها ستين كيلو.. وتلاقى الاخوة اللى جايين من الطريق المقابل بيقلبولك نور فى عز النهار تعرف على طول ان فيه لجنة وتلتزم.. تلتزم بال مائة كم اللى ممكن يخنقوا .. لأننا عمرنا ما هنمشى على اكتر من 120 اساساً
والقانون مش ممكن يتعدل
بتيتاً
حمدا لله على سلامتك وقدر ولطف
مش عايزة اتكلم على باقى الحاجات
مانت قاعد شوية وهتكتشف بنفسك
وساعتها هتطلع مش مرات ابوك
لأن ساعات مرات الاب بيبقى فى قلبها شوية رحمة
هتطلع ريا

السبت, يوليو 28, 2007

 
Blogger Gid-Do - جدو said...

مراكبى

حمد الله على سلامتك وسعيد برجوعك الى مدونتك والينا اصدقائك المنتظرين لاخبارك

بعد اذن السيادة

احيه ولابيه ... احيه ولابيه ... احيه ولابيه... احيه ولابيه

النقط بين كل احية عبارة عن فيديو لطم على جدودى

دانا بوضب نفسى علشان انزل واعيش نهائى فى مصر كمان كام شهر لانى قررت اطلع معاش مبكر قال اية زهت من امريكا
----
دانا اشتريت بطيخة وفتحتها وكان شكلها مش عجبنى رمتها فى الزبالة وبعد كام يوم عديت على السوبر ماركت قولتلهم اللى حصل وورتهم ايصال الشراء خيرونى ما بين اخد واحدة تانية ولا اخد فلوسى مع الاعتذار الشديد عن سؤء الخدمة الغير مقصود
----
فى بداية وصولى امريكا ـ من اكتر من ربع قرن ـ عزمنا شقيق زوجتى ـ المقيم فى امريكا من سنوات واللى قدم لنا على اوراق الهجرة ـ على العشاء فى مطعم عادى قريب من البيت بعد ما قعدت وحركت الكرسى حسيت بحاجة بتشد فى بنطلونى البولى استر طلع جزء خشن فى الطرابيزة شبك فى البنطلون وخد كام فاتلة من قماش البنطلون فقلت لشقيق زوجتى ادينى خسرت بنطلون علشان العشوة بتاعتك ضحك وطلب من الجارسون انه يجيب مدير المطعم ـ جية المدير شاف البنطلون اعتذر ونقلنا لطربيزة تانية وقال لشقيق زوجتى روح اشترى بنطلون وهات الايصال واحنا ندفع تمن البنطلون ـ قالى شقيق زوجتى خلاص ياعم جالك بنطلون جديد ـ انا مصدقتش الحكاية وقلت انت بتتريق عليا انت فاكر مدير المطعم حيدفع تمن بنطلون دة ولا فى المنام دة بس بيتخلص من الموقف بلباقة ـ حاول يقنعنى انى اروح اشترى بنطلون مهما كان التمن انا اعتبرت الموضوع تهريج ـ عدى كام يوم ولقيت شقيق زوجتى داخل بيقول اية رايك فى البنطلون دة ـ كان بنطلون جينز ماركة غالية فى ذلك الزمن ـ وقال انا حبيت اوريك عمليا ان المحل رايح يدفع تمن البنطلون مش بيهرج معانا لكن انت مش مصدق ـ وخسرت انا بنطلون وكسب شقيق زوجتى بنطلون جينز غالى التمن ووفى مدير المطعم بكلامه

بعد اذن السيادة مرة تانية

احيه ولابيه ... احيه ولابيه ... احيه ولابيه... احيه ولابيه

النقط بين كل احية عبارة عن فيديو لطم على جدودى

السبت, يوليو 28, 2007

 
Anonymous غير معرف said...

يا باشا حمد لله عالسلامة أنت فكرتني بنفسي لما سيبت بلدنا ونزلت أشتغل في القاهرة من يجي 7 سنين أو أكتر ولما رجعت البلد شوفت حاجات ما عمريش خدت بالي منها علشان كنت متعود عليها وبأشوفها كل يوم نفس الإحساس جالي لما رجعت مصر بعد أول سفر ليا ، المشكلة مش في الناس اللي عايشه في مصر المشكلة في اللي بيخرج ويرجع تاني

السبت, يوليو 28, 2007

 
Blogger كراكيب عادل said...

ارجع يا عم الحاج متعملش مشاكل عندك

بلدهم وعجباهم

علي اساس اننا قال مش مصريين

وش بيغمز

:)

السبت, يوليو 28, 2007

 
Blogger bluestone said...

لا لا لا حمد لله على السلامة الأول
ولانها بلدك ووحشاك .. فعلا .. فلازم تستحمل بقى .. أمال لو قاعد فيها على طول . كانت هتوحشك اكتر طبعا ..

واحمد ربنا ان انت ماخدتش ميعاد الطيارة مرتين مختلفتين والطيارة طلعت في ميعاد تالت عشان دي مصر للطيران .. او قضيت ساعات من الهناء الصافي المطار .. صالات الانتظار المريحة والمعلومات المتكاملة عن كل شيء في المطار .. وفي الطيارة لدرجة ان واحد ينصحك انك تخلي حاجتك المهمة على رجلك مش في المكان المخصص للشنط في الطيارة لان الحاجات ممكن ماترجعش وانت وحظك ..

وبعدين اعذرني انت اللي تستاهل
ايه اللي يخليها توحشك اصلا ... ؟

صباح الفل

السبت, يوليو 28, 2007

 
Blogger ياسر سليم said...

المهم

حمدلله على السلامة

وانا أقول مصر نورت ليه :)

واحنا لازم نستحمل مصر

اذا احنا ما استحملنهاش .. مين اللى يستحملها ؟

الغريب !؟

السبت, يوليو 28, 2007

 
Blogger Esmeralda said...

ايوه بقي بتوع بره يجوا و يبكتونا
ايه الجديد يا ريس
شويه كده و تاخد هى اول طلعه كده المهم لما تسافر تانى تظبط نفسك على جو بره

السبت, يوليو 28, 2007

 
Blogger امام الجيل said...

بلدى ووحشانى
شفت بقى انت قلتها يبقى لازم تتعامل زى ما اهلها بيتعاملوا وتعرف الفرق يعنى اذا كانوا عاملوك كويس مش كنت هتحس بغربة ههههههه وانهم بيعاملوك كاجنبى مثلا
يلا بقى نعمل ايه

السبت, يوليو 28, 2007

 
Blogger فى القلب said...

ألف حمد الله على سلمتك ياعم
كده أنت بأيت فى أرض الوطن
أصل أحنا مبنطمنش على بعض فى ارض الوطن
ألا لما بنحكى لبعض الحكيات دى
تانى حاجه أحنا خلاص حصلنا مناعه
يعنى أطمن مش هيحصلك حاجه بعد كده
لأنك خلاص خت المصل
فمهما يحصل هتشوفه عاااااااادىىىىىىى
ومره تانيه حمدالله على سلمتك

السبت, يوليو 28, 2007

 
Blogger اسكندراني اوي said...

حمد الله على السلامه يا سيدي
وشك ولا القمر
نورت مدونتك
ونورت مصر
ايه يا هندسه دول اربع تيام امال لما تطول شويه حيحصل ايه
هي دي مصر يا مراكبي
كل الدنيا بنظام
ومصر بنظام تاني خالص
ربنا يقويك
.........................
استاذنك اقول لجدو كلمه
اوعى يا جدو
بجد والله مش بهزر
حتتعب اوي اوي
احنا هنا لما بننزل اجازه بتعب
ما بلك بقى من اللي جاي من بلاد بتحترم الانسان

تحياتي يا مراكبي
وعودا حميدا

السبت, يوليو 28, 2007

 
Blogger اعشق فى اليل ضوء القمر said...

السلام عليكم ورحمه الله
عودا أحمد
أحمد مين مش عارف
لكن بلدك ووحشاك
لو وحشاك بجد
أتفرج عليها فى التلفزيون أحسن
ولو الناس إللى فيها وحشينك أستحمل وحط على أنفك 1.50جنيه لمون منزوع القشر
وهتلقيها زى مهيا مرات أبوك برده
أتمتع وأعمل كأنها رحله سفارى مع إختلاف المكان والمبدأ
ده أنت لسه موقفتش فى طبور العيش
لو وقفت هتقول إيه
أقولك بلاش نكد وكفايه كده
وحمد لله على السلامه

السبت, يوليو 28, 2007

 
Blogger Bella said...

اخي العزيز
حمد الله على السلامة

قلبت علينا المواجع ليه بس

المطار ده حديث ذو شجون
مش بس بيعاملوك وانت جاي على انك تاجر مخدرات ومهرب بلاوي زرقا

لا بيعاملوك على انك لاقي الفلوس اللى جايب بيها اي حاجة على الناصية
ولا كأنك تعبت ولا شقيت واتغربت
كأنك لقيت زكيبة فلوس وهم قاعدين وازاي انت تتنعم وهم لا

غير طبعا الاسئلة الامنية وكأنك مخبي الارهابي كارلوس في الشنطة الكبيرة وتلاقي الظابط ماسك الباسبور وبيقلب في الاختام اللى هي اصلا بتاعتهم وكأنك مزورها وبيسألك بنص عين على تاريخ مغادرتك في امتحان عسير ياويلك لو نسيت وقلت الساعة واحدة بعد منتصف الليل وسهى عليك وحطيت التاريخ اللى قبله بيوم

ماانت غايب بقالك سنة وممكن تنسى

لكن على مين تنسى ازاي ياارهابي

غير طبعا العربية اللى عجلها مكسور وحالتها بالبلا

انا طبعا ربنا تاب على ورجعت قبل مايطبقوا نظام العربيات اللى بتقف بعيد دي

لكن قبلها برضه كانت تبقى مصايب وبلاوي اللى يلمس العربية وحتى مايفكرش يرفع معاك شنطة محتاج اكرامية رغم ان انت معاك اللى شايلين وحاطين كل حاجة

ووانت خارج من المطار نقطة التفتيش اللى برة بتبص في العربية تعد اللى خارجين وتشوف يمكن تكون طلعت كارلوس من الشنطة وحطيته في الدواسة ولا حاجة

مصايب الشارع والمرور دي بقى لها مواويل محتاجة ربابة علشان نحكيها

انما نقول ايه

بلدنا وبنحبها

حتى لو مليانة مطبات وكل مطب في مكان شكل والعربية تلعب اكروبات بين المطبات وانت طبعا مسبقا معاك خريطة بكل مطب والا العربية ح تاكلهم وتودع العفشة بقى

وكفاية كده احسن مرارتي مفقوعة وبافكر اغيرها بمرارة كاوتش

السبت, يوليو 28, 2007

 
Blogger Bella said...

كلمة لجدو

والله ياجدو رغم اني نفسي تيجي واشوفك

لكن صراحة ماانصحكش تستقر هنا على طول
ح تندم لو عملت كده

السبت, يوليو 28, 2007

 
Blogger loumi said...

العزيز احمد
حمدلله على السلامه
نورت مصر
ايوة بقا شويه المصريين اللى راجعين من بره حيقعدوا يقلبوا علينا المواجع
وششششششششششششى بيعيط
ههههههههههههههههه
عارف احنا تقريبا اتعودنا على كل السلبيات الموجوده واصبحنا نتعايش معاها
بس بجد انا فى مرة سافرت سوريا ورجعت عملت اكثر من مشكله من ساعه ما نزلت ارض المطار لحد ما ركبت العربيه فى طريق العوده للمنزل
بس برضه مصر ام الدنيا
تقدر تنكر؟
انكر
والله لا انت ناكر
وشوف بقا اللى هيحصلك
ههههههههههههههههههههههه
على اخر الاجازة حتكون اتعودت يا باشا
حمدلله عالسلامه
ونورت مصر
صنيه بسبوسه ومن غير قشطه
مرات ابوك اكلتها و قالت انك ما تستاهلهاش
هههههههههههههههههههه
نورت مصر
وحمدلله على سلامتك والاسره الكريمه من الحادثه
تحياتي

السبت, يوليو 28, 2007

 
Blogger يا مراكبي said...

عدى النهار

الله يسلمك ويبارك فيك

أنا عارف إن طبعا كلامي مش جديد .. والمسؤلين زي ما إنت عارف مش مسؤلين .. وربنا هيحاسبهم على كل موقف حصل لواحد زيي .. كلكم راع وكلكم مسؤل عن رعيته

أشكرك على المتابعة دايما .. ومتشكر على التصييت اللي عملتهولي عندك في المدونة

الأحد, يوليو 29, 2007

 
Blogger يا مراكبي said...

دنــــيــــــا مـحـيـرنـي

ههههههه

أنا فعلا بأغني الأغنية دي من يوم ما وصلت لحد حتى وأنا نايم .. وبجد بجد فيه هنا حاجات ما بتحصلش غير في مصر بس وهو ده التميز

:-D

الأحد, يوليو 29, 2007

 
Blogger أُكتب بالرصاص said...

أه
يا ماراكبي


بتفكرني بنفسي لما بانزل اجازات

نفس الملاحظات ونفس المطبات

اه ياني

بس انا لسه ماشفتش التوك توك

على كل حال

نورت مصر

وكل سنة وانت طيب


والموضوع
بعد إذنك اختاره ليكون من حصاد المدونات

الأحد, يوليو 29, 2007

 
Anonymous غير معرف said...

بصو ياجماعة ياللى عايشين برة اللى فى الامارات واللى فاميركا والسعودية وقطر وغيرو وغيرو هيا دى مصر بلدنا وبنحبها بنحبها وهيا مبقعة وزحمة ودوشة ومتعودين عليها كدة واللة حضاراتكو سافرتو خلاص واللى مش عاجبو امة وهيا على حالها يتبرى منها ومينزلهاش تانى .....يااااااة اد اية حزينة بجد بقى مصر بقت مرات ابوكو

الأحد, يوليو 29, 2007

 
Blogger يا مراكبي said...

hend

بلاش موضوع البسبور الأجنبي ده علشان بيوجعني جامد .. كل ما بأسافر ومعايا أجانب زمايلي في نفس الشركة وبأشوف فرق المعاملة بيني وبينهم بأتقهر جامد

والأنقح بقى إن الأجانب دول ممكن يكونوا أصلا عرب ومعاهم جنسية أجنبية .. تلاقيهم بيتعاملوا أحسن مني دايما

ده موضوع تاني كبير

الأحد, يوليو 29, 2007

 
Blogger يا مراكبي said...

حلم

تعليقك بيوضح الصورة أكتر وأكتر

أنا مش فاهم فيها إيه لو زودوا السرعة المسموح بيها عن 100؟ طبعا الطرق متنفذة بطريقة سيئة تخلي أي سرعة هتكون خطيرة لأن الحفر والمطبات بتكسر أي عربية

وكمان إيه الحكمة من سحب الرخص واللف وراها كعب داير؟ هل الغرض منها التعذيب وخلاص؟ ممكن الواحد يدفع المخالفة وهو واقف بدل الهم ده

عموما إبقى قوليلي أنهي طريق ده اللي بتمشي عليه والحفرة في الكيلو كام ينوبك ثواب

الأحد, يوليو 29, 2007

 
Blogger gohayna said...

اولا حمدلله علي السلامه يا مراكبي

وثانيا لازم تلاقي حاجه مختلفه في مصر
امال هتحس ازاي انك فيها يا حج
دا كلام برضه

مش لازم تشوف كل الحجات دي عشان تعرف وتتاكيد انك اكيد اكيد في مصر

احمد ربنا بقي انك وصلت بالف سلامه
ووسع صدرك اكتر من كدا لسه الي جاي اكتر

ههههههههههههههه
ربنا يهنيك يارب

حمدلله علي سلامتك مره تانيه
تحياتي

الأحد, يوليو 29, 2007

 
Blogger يا مراكبي said...

Gid-Do - جدو

واحشني يا جدو والله .. وتعليقك ده بجد مشرفني ومنور المدونة

المواقف اللي حضرتك حكيت عليها دي فعلا حقيقية وأكتر منها كمان .. وهو ده الإسلوب اللي بيحقق مبيعات عالية جدا لأي مكان .. المبدأ الرئيسي هو إن المستثمر يبص لقدام مش يبص لتحت رجليه .. يشتري المستقبل وإستمراريته .. مش نهبش ونجري

نرجع بقى لموضوع رجوعك لمصر .. الموضوع ده محتاج مناقشة موضوعية لا يتسع المجال هنا ليها .. لأن موضوع العودة من عدمه محتاج إنك تعمل مقارنة شاملة لكل نواحي الحياة .. ممكن اللي تلاقيه ميزة هناك يكون عيب هنا والعكس .. لكن المهم إنك تشوف المحصلة النهائية إيه ولصالح مين

فيه كمان نقطة تانية .. كل واحد فينا هيشوف المميزات والعيوب دب من وجهة نظر مختلفة وفقا لظروفه المادية والإجتماعية والثقافية وأهدافه المستقبلية

الخلاصة .. مش هتلاقيني أقول لك إوعى ترجع مصر .. ولا هتلاقيني هأقولك لازم ترجع مصر .. لكن أنا مستعد أساعد في تحديد بنود المقارنة اللي هأعملها لو انا كنت مكانك

منورني بجد .. وربنا يوفقك للإختيار السليم

الأحد, يوليو 29, 2007

 
Blogger يا مراكبي said...

المجهول الأول

أهلا بيك

فعلا .. المشكلة بتكون عند اللي بيخرج من البلد وبعدين يرجع تاني .. لكن اللي قاعد جواها بيلمس أي تغيير بالتدريج وبيتعود عليه .. أم اللي جاي من بره فلازم يطصدم فجأة

ده بيسموه
Culture Shock

الأحد, يوليو 29, 2007

 
Blogger يا مراكبي said...

كراكيب عادل

واحشني يا راجل .. أخبار الجو عندك إيه؟ هدت ال52 وألا لسة؟

والله إنت عارف إننا قلبنا عالبلد إزاي .. ونقدنا ليها ده نابع من حبنا ليها وحرصنا عليها

هو فيه حد فينا متغرب بمزاجه؟

الأحد, يوليو 29, 2007

 
Blogger يا مراكبي said...

bluestone

الله يسلمك .. كويس إنك نورتيني علشان كنت محتاج فنجان قهوة يعدل دماغي

مصر للطيران أنا مقاطعها من حوالي 6 سنين وأكتر بسبب شوية مواقف صغيرة بايخة حصلت لي فيها .. بتاع 15 موقف كده تقريبا

أنا بلدي واحشاني بجد والله .. بس بجد بجد فيها حاجات كتير إتغيرت وما بقتش هي اللي كانت في خيالي

أنا سألت اصحابي عن الحكاية دي وأكدولي إن إحساسي ده مظبوط .. فعلا البلد إتغيرت .. للأحسن طبعا علشان الرقابه

الأحد, يوليو 29, 2007

 
Blogger Hannoda said...

مصر هي مصر أمي و تاج راسي بس المشكلة في اللي عايشين فيها
وإن جيت للحق.. المشكلة فمشاكلهم.. ربنا يكون في عونّا و عونهم

حمد الله على السلامة يا مراكبي .. وكل أجازة و إنت طيب

الأحد, يوليو 29, 2007

 
Blogger shams said...

حمد الله على السلامة يا مراكبي
و على فكرة هم المصريين لما يحبوا يبقوا منظميين لازم يبوقا خنوقيين

الأحد, يوليو 29, 2007

 
Blogger طـعـمـة said...

حمد الله على السلامة يا مراكبي

صدقني وعن تجربة شخصية
طول ما أنت برة مصر
هتفضل مصر أمك وأختك وبنتك ونور عينك

أول ما تيجي مصر بقى
هتكتشف إنها كانت سجانة في سجن النِسا

بس برضه بلدك ووحشاك :)

الأحد, يوليو 29, 2007

 
Blogger Reemo said...

حمدالله على السلامه يا مراكبى
مش عارفه ايه الجديد فى اللى قلته
ماهو ده كان بيحصل من بدرى
هو ايوه الموضوع زاد وبقى تعذيب ومفهوش اى آدميه
بس برده هرجع واقولك ان ده الطبيعى
هى دى مصر
متقلقش انت بس تلاقيك علشان لسه واصل ومش أخدت عى الأتموسفير
او علشان حاطط فى دماغك انها اجازه
بص لما تستقر صدقنى الوضع هيتغير تمام
اكيد الأحوال مش هتنصلح
كلا البته
انت اللى هتتعود
:)))
حمدالله على السلامه
نورت مصر
تحياتى

الاثنين, يوليو 30, 2007

 
Blogger يا مراكبي said...

ياسر سليم

الله يسلمك .. مصر منورة بيك

وأنا مستحمل أهو .. ده أنا ماسك نفسي جامد كمان

بلدي ووحشاني بقى

الاثنين, يوليو 30, 2007

 
Blogger MOD said...

السلام عليكم
دي اول زيارة لمدونتك
وعلشان اكون صادق في تعليقي
انا شايف انك غلطان لانك كتبت كل اللي شفته
انا مغترب زيك وفي نفس البلد الكويت
لكن شايف ان لما يكون بيت الواحد مننا نظيف الناس بتقول عليه نظيف ولما يكون مش نظيف الناس بتقول دا مش نظيف
ومصر بيتنا كلنا هتلمنا في الاخر مفيش غربة تدوم
ولو الواحد ربنا كرمه ومات وسط اهله
فترابها هيلم عظمه
البلد وحشة علشان الناس بقت وحشه لكن مش علشان هيه وحشة
يبقى الزاي نقول عليها مرات ابونا
ياريت تعيد تفكير في الموضوع ده تاني
اجازة سعيدة
تحياتي

الاثنين, يوليو 30, 2007

 
Blogger يا مراكبي said...

Esmeralda

إحنا مش بتوع بره ولا حاجة .. إحنا كنا من جوة عادي جدا بس اللي جوه هما اللي بيتغيروا على فكرة

عموما أنا يوم بعد يوم بترجع لي الذاكرة شوية شوية .. كل يوم هنا بيبقى فيه مفاجأة ليا

الاثنين, يوليو 30, 2007

 
Blogger يا مراكبي said...

امام الجيل

فكرتك سليمة .. لعلمك المعاملة دي فعلا بتحسسني إني إبن بلد .. كنا رجالة وهنقف وقفة رجالة .. أنا من البلد ديييييي

:-D

ربنا يهدي

الاثنين, يوليو 30, 2007

 
Blogger أشياء أخرى said...

حمدا لله على السلامة
معلش
اصلها ما طلعتش امناالحقيقية
دي طلعت متبنيانا

الاثنين, يوليو 30, 2007

 
Blogger fares said...

عذرا للتحليق خارج السرب ارجو منكم التضامن معي في حمله نقطه ماء تساوي حياه
تحياتي

الاثنين, يوليو 30, 2007

 
Blogger يا مراكبي said...

فى القلب

الله يسلمك ويبارك فيكي

أنا فعلا بدأت التطعيم من لحظة خروجي من الطيارة .. وكل يوم بآخد جرعات منشطة

وعندي أمل إني في خلال الأيام الجاية أوصل للعادي ده اللي أشرتي إليه وأمسح البوست ده ساعتها

:-D

نورتي

الاثنين, يوليو 30, 2007

 
Blogger امرأة تقول الذي لا يقال said...

وانا اقول مصر نورت ليه
ألف حمدا لله على السلامة

بغض النظر عن الغرض من الموضوع لان انا مش ناقصة حرقة دم
بجد لما شوفتك كاتب ملاهي مولد النبي دي فطست من الضحك
اسمها مراجيح مولد النبي يا باشمهندس (;
بس واضح ان بلاد برة أثرت عليك

الاثنين, يوليو 30, 2007

 
Blogger يا مراكبي said...

إسكندراني قوي

الله يخليك .. وحشتني يا راجل والله .. إنت مش هتنزل مصر السنة دي وألا نتقابل في الدوحة وخلاص؟

أنا لسه هأحكيلك عن اللي حصل لي في الأربع أيام اللي بعدهم .. فيه هنا مغامرات كل يوم على فكرة

منورني

الاثنين, يوليو 30, 2007

 
Blogger Xee said...

هههههههههههههههههههههههههه
هههههههههههههههههههههه
و الله يا باشمهندس ضحكتني جدا باسلوب عرضك لحال مصر

حمدالله على سلامتك الاول و سلامة الاسرة على وصولك مصر و حمدالله على السلامة من الحادث
مش قد السواقة بتسوقو ليه أصلا؟
هههههههههههههه

و بعدين يا باشمهندس عادي يعني خليك فريش انت في رحلة
:)

بجد المعنى الحقيقي لكلمة وطن للأسف في ناس كتير بيحسو بيه طول ماهما برة الوطن ، وللأسف انا واحد من الناس دول

تحياتي

الاثنين, يوليو 30, 2007

 
Blogger daktara said...

www.picstalk.blogspot.com
مدونة جديدة
شقية
اوعي تفوتك متابعتها

انظر حولك
د. خالد عزب

الاثنين, يوليو 30, 2007

 
Blogger أحمد سلامــه said...

ياراجل جيت ليه
خليها وحشاك
كده اريح
انت كده على ما تسافر هتحتاجلك عشرين تلاتين سنه عشان توحشك تاني
مصر جميلة قوي
من فوووووق
ومن بره
تحياتي يا صديقي
سلامي

الثلاثاء, يوليو 31, 2007

 
Blogger رينـــــــــــا said...

ههههههههههههههههههههههه
ههههههههههههههههههههههههههه
مش قادرة امسك نفسى من الضحك
معلش حضرتك بس نسيت مصر عامله ازاى
حضرتك اخدت على النظام والمعامله الكويسه والنظافه
بس حضرتك مش فى الكويت
انت فى مصر :D
بذمتك بعد كل دا لسه وحشاك؟؟
حمد الله على السلامه يا بشمهندس

الثلاثاء, يوليو 31, 2007

 
Blogger يا مراكبي said...

اعشق فى اليل ضوء القمر

وعيكم السلام ورحمة الله وبركاته

فكرة اللليمون دي هايلة على فكرة .. تصدق إن طول رحلة الطيارة وأول ما بتهبط على أرض المطار بأكون في قمة الشوق والحنين لكل حاجة في البلد؟ الشعور ده بيدمروه من أول ما أخرج من الطيارة

أنا على فكرة وقفت بالساعات في طابور العيش ده وأنا صغبر .. وده اللي عودني على قوة تحمل أي طوابير بعد كده مهما طال زمنها

:-D

الثلاثاء, يوليو 31, 2007

 
Blogger يا مراكبي said...

bella

أهلا بيكي

المفروض أعمل تحديث وأضيف تعليقك ده للبوست لأنه بيكمل الصورة المشرفة اللي مصر بتستقبل بيها القادمين من الخارج سواء كانوا مصريين أو اجانب

وكل السلبيات دي معروفه للمسؤلين وسايبينها كده عادي جدا .. ده بيسموه بره سياسة الوش المكشوف اللي ما بيتكسفش

ولو بجد لقيتي المرارة الكاوتش إبقى إشتريلي معاكي دستة علشان أغير فيهم كل ما واحدة فيهم تتفقع

نورتيني

الثلاثاء, يوليو 31, 2007

 
Blogger خمسة فضفضة said...

السلام عليكم ورحمة الله وبركاته

هي دي مصر يا عبله....اممممم قصدي يا مراكبي


اعتقد انها لسه ما وصلتش لمرحلة مرات الاب بس نقدر نقول انها داخله عليها بخطي ثابته...هههههه

وعموما يا باشمهندس احمد ...اهلا بيك في وطنك

الثلاثاء, يوليو 31, 2007

 
Blogger يا مراكبي said...

loumi

الله يسلمك ويبارك فيكي .. إيه موضوع صينية البسبوسة القرديحي دي من غير قشطة ومن غير لحمة؟ حتى دي كمان بقت نص كم؟

:-D

إن شاء الله قبل ما أمشي هأبقى أحكيلكم عن التغيير والتعود اللي بيحصل لي يوم بعد يوم ..أنا فعلا بدأت أتعود على حاجات سلبية كتير وبأعتبرها عادي جدا

على فكرة .. كنت في سوريا قريب ولقيتها إتغيرت كتير للأحسن .. كان بقى لي 5 سنسين ما روحتهاش

منوراني وشكرا على سؤالك عننا

الثلاثاء, يوليو 31, 2007

 
Blogger Bella said...

اوعدك اول ماألاقي مرارات كاوتش كويسة مش مضروبة ح اعمل حسابك في دستة
وممكن نبقى نعمل بيها شغل حلو واهو نلاقي مبلغ كويس يعيننا على نوائب الدهر وبالمرة ننقذ اخواننا المصريين الغلابة اللى مرارتهم مفقوعة ومش لاقيين تصريف

الثلاثاء, يوليو 31, 2007

 
Blogger يا مراكبي said...

أُكتب بالرصاص

خليك مستعد علشان هتقول آه كتير قوي

والمدونة كلها تحت أمرك في أي وقت .. ده شرف ليا إني أطلع في حصاد المدونات

ترجع بالسلامة إن شاء الله

الثلاثاء, يوليو 31, 2007

 
Blogger يا مراكبي said...

المجهول أو المجهولة التاني

أهلا بيكي أولا

أول درجة من درجات حب البلد هو إنك تعرفي عيوبها وتقولي عليها وتدعوا لإصلاحها .. وأغلب الناس اللي بره دول مش مسافرين بمزاجهم أبدا لكن مضطرين .. ودايما نفسهم إن بلدهم تكون أحسن ويرجعوا يتمتعوا بيها من تاني

لكن غلط كبير إننا ما نحاولش نصلح منها ولو بالكلام حتى .. لازم بلادنا تكون أحسن من كده .. لكن نقول إنها عاجبانا على كده يبقى ده مش هيخلينا نتقدم أبدا

نورتي .. والخلاف لا يفسد للود قضية أبدا

الثلاثاء, يوليو 31, 2007

 
Blogger يا مراكبي said...

gohayna

حاضر يا دكتورة .. هأوسع صدري على الآخر .. بس إكتبيلي على موسع للشعب الهوائية علشان قربت أتخنق

كان نفسي تزورينا في الكويت لكن ما حصلش نصيب .. بس عموما لسه إيدينا طايله هناك لو إحتجتي أي حاجة

ربنا معاكي

الثلاثاء, يوليو 31, 2007

 
Blogger يا مراكبي said...

Hannoda

أنا كنت قلت لك قبل كده إن فيه فرق كبير بين مصر والمصريين .. بين الأماكن والناس

مصر المكان طول عمرها جميلة .. لكن المشكلة بقت في أغلب الناس اللي عايشين فيها .. وده موضوع شرحه يطول

أنا في مصر مش في أجازة على فكرة .. أنا مداوم في فرع القاهرة

منورة

الثلاثاء, يوليو 31, 2007

 
Blogger تخاريف خاصه! said...

يا باشمهندس خليك متفاااائل..

مش بلدك ووحشاك...خلاص...
:)
وبعدين ايه حكايه مصر مراة ابويا..
:D
مصر دى كل ذنبها...ان احنا شعبها...

بس سيبك..المهم الف حمد الله ع السلامه
نورت مصر..

الثلاثاء, يوليو 31, 2007

 
Blogger mariam said...

حمد الله على السلامه
اخيرا عدت لأرض الوطن

يمكن لأنك بعيد مستغرب شويه

لكن انت كده اكيد اكيد فى مصر

ده العادى بتاعنا

على العموم كويس انك مشيت على الطريق الدائرى
لو جربت محور 26 يوليو هتحمد ربنا
مع انه منور يعنى
بس يكفى السرعه الجنونيه

اهلا بيك فى مصر

الأربعاء, أغسطس 01, 2007

 
Blogger يا مراكبي said...

shams

فعلا .. أنا تعبت من كتر النظام اللي هنا .. نفسي فس شوية فوضى شوية بقى

:-D

الأربعاء, أغسطس 01, 2007

 
Blogger يا مراكبي said...

طعمة

فعلا كلامك مظبوط .. طول ما أنا بره بيبقى عندي حنين جارف .. بأحضر أ تجمع مصري مهما كان .. بأدافع عنها بالكلام في كل لحظة

وأول ما آجي ألاقي حاجات كتير تخليني أتضايق منها

الظاهر مكتوب علينا نحبها من بعيد لبعيد

الأربعاء, أغسطس 01, 2007

 
Blogger يا مراكبي said...

reemo

هههههه

طبعا أنا عارف إني أنا الل غصب عني لازم أتعود .. لكن أنا بجد شاغلني موضوع المسؤلية .. أكيد كل حاجة من اللي أنا حكيت عنها دي ليها حد مسؤول عنها وشغلته إنه يحسن ويصلح منها .. ولا إن الدنيا تكون سايبة وماحدش مسؤول عن حاجه؟

الأربعاء, أغسطس 01, 2007

 
Blogger فى القلب said...

عندى تاج ليك يا جميييل
أرجو الذهاب ألى مدونه مكان فى القلب وأخذه
أنا كنت كاتبه اسمك وانا بجاوب على سؤالأمرره لمين بس مش عارفه ملقتش اسمك على البوست
عموما حصل خير
التاج فى انتظار حضرتك

الأربعاء, أغسطس 01, 2007

 
Blogger يا مراكبي said...

MOD

وعليكم السلام ورحمة الله وبركاته .. أهلا بيك

البروفايل بتاعك مقفول على فكرة .. كنت أحب أشوف مدونتك

إنت طبعا متضايق علشان بننشر غسيلنا اللي مش نظيف على الملأ وهي فعلا حاجة بتضايق .. لكن أنا أحب أطمنك إن مافيش حاجة مستخبية أبدا والعالم كله شايفنا وبيزورنا وبيلمس كل السلبيات من غير ما نتكلم عنها

وأنا شايف إنك وصلت لنفس النتيجة: مصر جميلة .. لكن المشكلة في الناس .. أو خلينا نقول المشكلة في تدهور سلوك أغلب الناس

واللي بنعمله هنا ده ما هو إلا تغيير المنكر بالقلب .. وده أضعف الإيمان

عموما سعدت بزيارتك ورأيك .. وأهلا بيك دايما

الأربعاء, أغسطس 01, 2007

 
Blogger يا مراكبي said...

أشياء أخرى

الله يسلمك وأهلا بيكي بين المدونين

إنتي متكده إنها كده تبقى متبنيانا؟

الأربعاء, أغسطس 01, 2007

 
Blogger يا مراكبي said...

fares

إنت تنور في أي وقت .. البيت بيتك

الأربعاء, أغسطس 01, 2007

 
Blogger يا مراكبي said...

امرأة تقول الذي لا يقال

مصر منورة بيكي .. الله يسلمك

حلوة قوي مراجيح مولد النبي دي .. كلامك مظبوط .. أنا شكلي فقدت الذاكرة

ههههههه

أشكرك جدا لى الملاحظة دي .. فيه حاجة كمان ولا هي دي بس؟

الأربعاء, أغسطس 01, 2007

 
Blogger Hannoda said...

يارب ناسها يرجعوا يبقوا شبها.. ويا رب نفضل كده على طول ندمع و إحنا بنقرى كلام بعض عنها


أنا فهمت من كلامك إنك مداوم في مصر فعلا .. ربنا معاك.. جامده قوي إن الواحد يكون في مصر لمده أسبوعين و كمان يشتغل و يعمل نفسه مش واخد باله من كل اللي نفسه فيه

ربنا يوفقك

أخبار الحاجة و الأولاد ايه.. معاك؟
:)

تحياتي

الأربعاء, أغسطس 01, 2007

 
Blogger shreef said...

ايوه يا باشمهندس هي مرات ابوك سوري يعني في اللفظ بس هي فعلا كدا هنعمل ايه تاني بس اللي عاجبني في اليلة ديه كلها ان ده كله في اربع ايام فقط امال اللي عايشين فيها يابشمهندس يعملوا ايه دول على كدا لازم ياخدوا شهادات معتمدة على قدرة المواطن المصري على تخطي الصعاب مهما كانت اشكالها بس بجد الحمد لله انك طلعت سليم من الحادثة ديه انت عارف بئى بلدك ووحشاك فلا تؤاخذها على ما فعلت بك...تحياتي ليك

الخميس, أغسطس 02, 2007

 
Blogger يا مراكبي said...

xee

الله يسلمك .. وبعدين أنا سواق قديم وما بأخبطش في الجمال وأنا رايح وأنا جاي زيك

هههههههه

بس فعلا شعورنا بالبلد من برة غير من جوة خالص

هأسمع كلامك وهأعتبرها رحلة .. لحد ما ييجي اليوم اللي الواحد يتعود فيه على كل ده من تاني

الخميس, أغسطس 02, 2007

 
Blogger يا مراكبي said...

daktara

المدونة جميلة جدا بجد .. أحييك عليها .. وشكرا على دعوتك يا دكتور

الخميس, أغسطس 02, 2007

 
Blogger Anima said...

الحمد لله على السلامة
الحمد لله قدر ولطف وحصل خير

بس العربيات الكارو عندنا كمان و كل اللي وصفته عندنا نسخة منه

يالله بلادنا و حنعمل ايه

الخميس, أغسطس 02, 2007

 
Blogger Blank-Socrate said...

أغرب حاجه ان فى نت و قدرت توصلنا
بلدنا و عارفنها !!!!!!!او السبب انك زرتنا قبل تغير الاسعار

الخميس, أغسطس 02, 2007

 
Blogger يا مراكبي said...

أحمد سلامــه

هو ده الكلام اللي بيوجع فعلا مع إنه صحيح: مصر جميلة قوي
من فوق
ومن بره

هو ده إحساسي اللي حسيته بالظبط

ربنا يصلح الحال

منورني بجد

الخميس, أغسطس 02, 2007

 
Blogger يا مراكبي said...

رينـــــــــــا

الله يسلمك .. كان نفسي نشوفكم إنتي وزوجك العزيز في الكويت بس أنا سيبتها خلاص

عموما أديكي عرفتي إيه اللي بيحصل للي بيطول بره علشان تبقى تفكري نفسك كل شوية باللي بيحصل هنا وما تتعوديش جامد على النظام .. ماشي؟

تروحوا بالسلامة إن شاء الله

الخميس, أغسطس 02, 2007

 
Blogger يا مراكبي said...

خمسة فضفضة

وعليكم السلام ورحمة الله وبركاته

فكرتيني برأفت الهجان

هههههه

عموما لينا كلام تاني بعدين عن مفهوم الوطن

نورتي

الخميس, أغسطس 02, 2007

 
Blogger يا مراكبي said...

Bella
تاني

حتى كمان المرارة الكاوتش فيه منها مضروب؟ ده إيه الهم ده

عموما أنا مستعد للمشاركة في المشروع ده .. فكرته جديدة وهيكسب دهب

نورتيني وأشكرك على المتابعة

الخميس, أغسطس 02, 2007

 
Blogger بالله المستعان said...

ههههههههه
حمد لله ع السلامه

هي دي مصر
وكلنا بنعشقها
:)

الخميس, أغسطس 02, 2007

 
Blogger اه يا دماغى said...

هههههههههههههههههههه

معلش بلدى وحشانى يلا

حتعمل ايه

بس بصراحة دى معاتاتى اليومية

كل اللى انت قولته صح مية فى المية

بس حنعمل ايه

حمدلله على السلام

الخميس, أغسطس 02, 2007

 
Blogger اسلام رفاعى said...

على سلامتك وياريت تستمر فى بلدك مفيش احسن من الوطن وتشيل بقى شعار شد القلوع يامراكبى مفيش رجوع وتحط شعار
مش هنبطل مش هنسافر مش هنسيب

الجمعة, أغسطس 03, 2007

 
Blogger shaimaa said...

متقولش مصر
هتخليى ابدا اجز على سنانى و اكلك انت والاجانب

طظ فى الاجانب
البلد نبقى عايزينها احسنم علشانا
وبعدين اللى بيعملوا القرف ده
ناس زيى وزيك و زى كل واحد

يعنى مش مصر

الشعب المهبب هو اللى بينيلها
وبعدين يعنى اسم الله انت و غيرك عملتوا ايه

هربتوا وسافرتوا وسبتوها للاوباش هما اللى يصلحوها او يخربوها

مفروسة جدا من كل واحد يسافر او عايز يسافر ويقولى اصل مصر عملت وسوت

عارفة هترد وتقولى مصر وانا كنت هاقعد اعمل فيهاايه
انا عايز اتجوز واربى عيال و معيش متبهدل طول عمرى
بس يا سيدنا اللى عايز حاجة حلوة بيتعب فيها علشان يحس بحلاوتها مش بيهرب

بلا هم
حرقت دمى على الصبح
الله يسامحك

الجمعة, أغسطس 03, 2007

 
Anonymous Rodrigo said...

Oi, achei teu blog pelo google tá bem interessante gostei desse post. Quando der dá uma passada pelo meu blog, é sobre camisetas personalizadas, mostra passo a passo como criar uma camiseta personalizada bem maneira.(If you speak English can see the version in English of the Camiseta Personalizada. Thanks for the attention, bye). Até mais.

الجمعة, أغسطس 03, 2007

 
Blogger يا مراكبي said...

تخاريف خاصه!

ده أنا إتهريت تفاؤل .. نفسي في شوية كآبة بقى

عموما أنا بدأت أتعود وبقيت بأضحك كمان لما بأشوف حاجات زي كده .. يعني داخل في المود بقوة وبسرعة

نورتي يا دكتورة

الجمعة, أغسطس 03, 2007

 
Blogger يا مراكبي said...

mariam

الله يسلمك

أنا جربت المحور كمان .. وتقريبا قدرت أحدد المشكلة التانية غير موضوع الضلمة واليفط .. الطرق مرصوفة بطريقة سيئة جدا وبالتالي لازم نمشي على سرعات بين التمانين والتسعين كيلو في الساعة .. أكتر من كده بتكون العربية معرضه إنها تطير في الهوا بسبب المطبات والرصف اللي مش منتظم

شوفتي دقة الملاحظة

أما المشكلة التالتة فهي سلوك السائقين .. وبال1ات النقل والميكروباص .. وحتى الملاكي كمان

الجمعة, أغسطس 03, 2007

 
Blogger يا مراكبي said...

فى القلب تاني

هأروح حالا وآخد التاج .. عموما ده رابع تاج عايز يترد عليه لحد دلوقت

أنا جاوبت 8 تيجان قبل كده على فكرة .. أبعتهوملك؟

:-D

أشكرك جدا على إهتمامك

الجمعة, أغسطس 03, 2007

 
Blogger يا مراكبي said...

Hannoda

طبعا شغلي في مصر في الفترة دي خلاني أحتك بحاجات كتير ما كنتش هأشوفها لو كنت في أجازة بس

بتسألي الحاجة والأولاد معايا؟ أنا اللي معاهم

:-D

الجمعة, أغسطس 03, 2007

 
Blogger يا مراكبي said...

shreef

طبعا أنا بجد بجد بأحيي كل اللي عايشيين هنا لأنهم بيستحملوا اللي مش ممكن اي حد يستحمله بره .. ويمكن ده يكون أحد أسرار نجاح المصريين بالخارج

ربنا يصلح الأحوال

الجمعة, أغسطس 03, 2007

 
Blogger يا مراكبي said...

Anima

الله يسلمك

إيه ده؟ عندكوا كده كمان؟ عندك مراة أب إنتي كمان؟

الأمهات راحوا فين اليومين دول؟

الجمعة, أغسطس 03, 2007

 
Blogger يا مراكبي said...

Blank-Socrate

بلاش سيرة الأسعار دي أحسن أنا مش مصدق نفسي .. لدرجة إني معتقد إن كل الناس بتضحك علي

أصلي متفاجئ بسعر كل حاجة هنا .. غلاء مش منطقي أبدا

الجمعة, أغسطس 03, 2007

 
Blogger أميرة ويلز said...

الاخ العزيز يامراكبى

اهلا بيك فى بلدك

ماهى دى بلدك مصر

ولما اى حد يقرا البوست دة يعرف انه اكيد اكيد اكيد فى مصر

تحياتى

الجمعة, أغسطس 03, 2007

 
Blogger يا مراكبي said...

بالله المستعان

هي دي مصر دلوقت .. بس بنتمنى إنها تكون أحسن من كده بكتير وعلى طول

نورتي

الجمعة, أغسطس 03, 2007

 
Blogger david santos said...

The purchase of weapons for Mubarak to the Bush terrorist will be for making peace, or will be for taking the American terrorism for the Egipto?

The great people of the Egipto that is intent.

Of these two cannot come nothing of good.

David Santos (Portuguese)

الجمعة, أغسطس 03, 2007

 
Blogger نفسنا said...

ندعوكم لزيارة العدد الثالث من مجلة نفسنا
ومن لدية القدرة على الكتابة ويريد الكتابة معنا يراسلنا
nafsena@gmail.com

الجمعة, أغسطس 03, 2007

 
Blogger يا مراكبي said...

اه يا دماغى

أنا كمان دماغي وجعتني على فكرة .. كل ما أقع في مطب في الشارع بأقول للي جنبي: هو المهندس ولا الموظف اللي الشارع ده يبقى تبعه أو من مسؤلياته ما بيجيش هنا ولا ما بيشتغلش أصلا ولا إيه؟

آه يا دماغي أنا كمان

السبت, أغسطس 04, 2007

 
Blogger يا مراكبي said...

اسلام رفاعى

والله أنا كنت كده فعلا لحد ما إضطريت للرحيل قهرا .. أنا ما كنتش عايز أمشي أبدا .. ودي حكاية قديمة وطويلة هأبقى أحكيها بعدين

نورتني

السبت, أغسطس 04, 2007

 
Blogger يا مراكبي said...

shaimaa

إيه ده كله؟ كله ضرب ضرب ما فيش شتيمة؟

أنا يا ستي ما هربتش .. وكنت عايش كويس جدا جدا في مصر وما كنتش موافق على مبدأ السفر ده أبدا ولا كنت محتاج له ماديا أصلا

وليه مشيت دي قصة محتاج فعلا أحكيها بس في الوقت المناسب بعدين .. لكن لازم تعرفي إن فيه جيش من أحسن المهندسين مشيوا من مصر في سنة 2003 وسنة 2004 ودي حاجة تستدعي الدراسة على فكرة

لكن أنا معاكي إن فيه فرق شاسع بين مصر .. والمصريين .. بس مش كلهم .. مصر نفسها بأماكنها وجوها من أجمل ما يمكن .. لكن المشكلة بقت في سلوك الناس في كل مكان

السبت, أغسطس 04, 2007

 
Blogger يا مراكبي said...

Rodrigo

Thank u for your visit .. I undestand the English part .. the iea of the T-shirts was really interesting.

Thanks again.

السبت, أغسطس 04, 2007

 
Blogger همسات said...

مش عارفة كان فىمشكلة كل اما اجى اعلق
بس الحمد لله اتصلحت
_ _ _ _ _ _ _ _ _ _

اولا حمد الله على السلامة
ثانيا ده الطبيعى فى بلدنا دلوقتى وهتلاقى منه كتير
ما هو طبيعى يحصل كدة طول ما طبقة المثقفين والمفكرين مش يسوا حاجة
واللى معاه قرش يسوى زيه حتى لو بالسرقة المهم يبقى ليك ضهر
قريت فى الدستور مقالة لأمين هويدى
بيقول ان المفسدين اللى ليهم ضهر بس هما اللى مش بيتمسكوا لكن الباقى عادى
وعادى عادى طول ماافى الحاجات دى
يبقى اتبس فانت اكيد فى مصر
:)))))))))

السبت, أغسطس 04, 2007

 
Blogger حزيــــــــــــــــــن said...

ايه يا بشمهندس مش بتزورنى ليه
مرأيك فى اخر قصيده عندى
رايك يهمنى

السبت, أغسطس 04, 2007

 
Blogger يا مراكبي said...

أميرة ويلز

نورتيني لتاني مرة في إسبوع وحد يا سمو الأميرة

ياترى اللي بيحصل عندنا ده فيه زيه في إنجلترا عندك؟

:-D

الأحد, أغسطس 05, 2007

 
Blogger يا مراكبي said...

david santos

Your statement is really expressive .. thanks for the visit and for the realiistic statement.

الأحد, أغسطس 05, 2007

 
Blogger يا مراكبي said...

نفسنا

بأشكركم على الدعوة وأحييكم على الإستمرارية

نورتوني

الأحد, أغسطس 05, 2007

 
Blogger يا مراكبي said...

همسات

طبعا .. إذا كان المثقفين أو الناس اللي المفروض إنها بتفهم بقت هي الطبقة المهمشة بينما المناصب كلها أو أغلبها راحت لغير المتخصصين يبقى دي النتيجة الطبيعية اللي إحنا شايفينها .. وده بيسموه الإنهيار الأوتوماتيكي للدولة من غير تدخل خارجي .. كل ما عليكي إنك تسندي المنصب للي ما بيفهمش فيه

نورتي

الأحد, أغسطس 05, 2007

 
Blogger يا مراكبي said...

حزين

أهلا بيك

إعذرني لأني كنت ولا زلت مشغول جدا وجدولي ملخبط وبأخش عالنت تخاطيف

أنا هآجي عندك حالا

متشكر جدا على إهتمامك ده

الأحد, أغسطس 05, 2007

 
Blogger نـــــــور said...

بجد انت كأنك بتوصف صور حية ، أنا لسة راجعة من اسكندرية وألله ع اللي شوفناه في الطريق وهناك والخدمات وغيره

زي ما انت بتحكي واكتر .. الله المستعان
وحمدا لله على سلامتك مع انها متأخرة اوي

تحياتي

الأربعاء, أغسطس 08, 2007

 
Blogger يا مراكبي said...

نـــــــور

الله يسلمك ويبارك فيكي .. مش متأخرع ولا حاجة .. تنوري في أي وقت

أنا كنت ناوي أحكي على اللي شوفته بعد كده بس ات كفاية نكد لحد كجه

الأربعاء, أغسطس 08, 2007

 
Blogger حسن ارابيسك said...

الحقيقة مش عارف اقول ايه
انا فعلا كل ما اسافر وارجع سريع سريع كده أحس بالفرق الهايل والشايع في حاجات كتير
أولها من ساعه ما أركب عربيتي من المطار حس اني مش عارف اسوق وكأني لأول مرة اسوق
ويروح مني على طول حلم القيادة الجيملة في كل بلد بازورها من غير اي قلق واي توتر ويعدين سرعان ما أذوب في ذلك المهرجان مهرجان كل حاجه فيه متشقلبه
لكن اللي عاوز اقوله رغم كل ده بحب مصر قوي وبتمنالها كل خير وما بدعيش غير على اللي كانوا السبب
وعارف ان مصر جميله وحلوه وناسها طيبين
وعارف كويس جداً ان احنا مش متخلفين زي بلاد في بينا وبينهم فرق كبير في مستوى الخدمات
لكن كل المشكلة ان احنا عندنا حاله من الفنتازيا في كل حاجه
لكن سبحان الله ومع ذلك تلاقي ننفسك بتحب البلد دي متعرفش ازاي حاجه رباني كده كل اللي اقدر عليه ربنا يصلح حالها ان شاء الله

الجمعة, أغسطس 10, 2007

 
Blogger يا مراكبي said...

حسن ارابيسك

من أروع الكلمات اللي سمعتها هي ان احنا عندنا حاله من الفنتازيا في كل حاجه

حقيقي تعبير مختصر ومعبر جدا جدا .. تحية خاصة ليك يا أبو علي

السبت, أغسطس 11, 2007

 
Blogger اميرة بهي الدين said...

تصدق ، موضوع مرات ابويا ده بيوجعني اوي ، هي امي وامك بس ايه بقي ، امي قليله الحيله ، امكانياتها قليله ، تقولي الخير كتير وبيتسرق ، ماشي مش حاقاوحك ، لكن بعد الخير مااتسرق برضه رجعت او فضلت قليله الحيله ... ماعلينا
هي مش مرات ابويا وخلاص
هي امي بس هي !!!!

السبت, مارس 27, 2010

 

إرسال تعليق

Links to this post:

إنشاء رابط

<< Home