تنتخبوا مين؟ وحبيبكم مين؟
حكاية البوست ده بتبدأ من التاريخ السحري ده: سنة 1981
.
ده رونالد ريجان .. الرئيس الأمريكي رقم 40
حكم من 20 يناير 1981 وحتى 20 يناير 1989
.
.
وده جورج هيربيرت بوش .. الرئيس الأمريكي رقم 41حكم من 20 يناير 1989 وحتى 20 يناير 1993
.
.
وده بيل كلينتون .. الرئيس الأمريكي رقم 42
حكم من 20 يناير 1993 وحتى 20 يناير 2001
.
.
وده جورج بوش الإبن .. الرئيس الأمريكي رقم 43
وده جورج بوش الإبن .. الرئيس الأمريكي رقم 43حكم من 20 يناير 2001 وقاعد لحد 20 يناير 2009
.
.
وده باراك أوباما .. الرئيس الأمريكي رقم 44
وده باراك أوباما .. الرئيس الأمريكي رقم 44هيحكم من 20 يناير 2009 وكبيره لحد 20 يناير 2015
.
.
وده أخوكم المراكبي .. الرئيس الأمريكي رقم 45أنا شايف إني أسهل ليا إني أترشح في أمريكا بصراحة .. مش كده وألا إيه؟
ملحوظة: البوست ده مالوش أي إسقاطات سياسية .. بلاش نصطاد في المياه العكرة
تعليقات
اخترنااااااااااك اخترانااااااااك
بس اوعى يقولك التعليقات وامضاءات الناس دي مضروبة
ونجيبلك بعد كده عيش وحلاوة
مش ملاحظ ان كلهم مبتسمين حتي انت كمان
يا تري بيضحكوا علي ايه ولا علي مين ؟؟؟
عموما يا سيدي هانقف وراك ونعضدك بكل اللي نقدر عليه بس انت ابقي افتكرنا
بس دى جديده
طب متأيد راف نادر
بس دي خلاص بقت سهلة .. هي حتة حملة صغننة وأنا هادور لك علي الشعار .. انت تشد الرحال من دلوقتي علشان لازم تبقي مقيم خمستاشر سنة متواصلة هناك
وأمانة ياشيخ دعوة زيارة مش مضروبة علشان أودي العيال ديزني
:D
والله فكرة تحفة و أنا هأنتخبك من قبل ماتترشح
وأهى فرصة عشان أمسك أنا كمان حكم ولاية من الولايات وأبقى أول ست فى مصر تمسك العمودية
ههههههههه
لانك لم تدفع اشتراك الحزب لسنتين سابقتين
ههههههه
حلوة بجد
بس حاول تفتكرنا اول ما ربنا يكرمك وتدخل البيت الابيض
يعنى ايه بقى أسهل فى أمريكا ... آدى آخرة قعدتك برة مصر ياباشمهندس متابعتش التطورات الفظيعة اللى عملها أبو جمال فى مصر
باباشمهندس الانتخابات الأخيرة كانت انتخابات تعددية ... يعنى كل واحد عاوز يترشح يقف جنب أخوه فى الصف باللى عاوز يلبسه .. وزى ماتيجى بقى طربوش ،شبشب حمام ، لبس احرام حتى احنا مبنمنعش حد
وبعدين ييجى الشعب (أو من ينوب عنه ) وينقى .. آى نعم الناس انضربت آآآآآه
وكمان فى لجان اتقفلت آآآآه
وفى لجان اتفبركت عينى عينك آه
بس ميمنعش ان الشعب طلع فى الكاميرا وهو بينقى .. ودى شوية دى؟ ده أنا حتى فكرت أترشح بس طلع سنى صغير
متاخدش بالك بقى من شوية الأحداث الصغيرة اللى حصلت بعد كده .. كله قضاء وقدر
ولا أراكم الله مكروهاً فى مرشحِ لديكم
ومتنساش تاخدنا معاك بقى علشان تلاقى حد تخطب فيه ويسقف ويعيط وحاجات كده
تحياتى
ويجعله عااامر
وكمان تعالى هنا .... انت مش بترد ليييية ؟؟؟؟؟
انت هتعمل ريس من دلوقتي و تنفضلنا
:)
و لازم كل ست عاقلة تسيب لجوزها يوم في الاسبوع يرفه فيه عن نفسه
و يبرطع
اوروفوار
الصراحة أنا شايفة إن بلدنا أولي بيك
وإحنا بقى حنعملك شغل هايل حنقول اخترناك،واديها كمان حرية
وما تنساش بقى بعد عمر طويل تسيب الكرسي لفادى
ملحوظة:برضة أنا من ناحيتى ما فيش أى إسقاطات سياسية دة أنا غلبااااان
والله ما تغلى عليك ابدا ..وانا من دلوقت اوصيت افراد العائلة الكريمة بضرورة التصويت لك سواء تقدمت للترشيح ام تراجعت لاسباب لا داعى لذكرها... وانت اولى من الغريب!!
وحتى اللحظة الحاسمة لاداعى للهتاف وسندعك تعمل فى صمت ..
بص يا سيدنا الاول تتجوز واحده امريكيه وهنا لازم ام الولاد تضحي وتتنازل دي مرحله موقته
ها تحصل علي الجنسيه بعد تلات سنوات
وطبعا ها تكع دم قلبك مش مشكله!! كله ها يتعوض في الاخر
بعد كده تدخل العمل السياسي في الولايه
ولو الحظ حالفك في سلسله مش طويله من المناصب وبعد الانتساب لحزب من الاتنين الكبار تاخد القصه من 5_ 7 سنين وتقدر تترشح مباشره وفي بث حي علي الرئاسه
وتبقي تدعي لي
وام الولاد تدعي عليا:)))))))
انا وصلت لحد صورتك و فطست على روحى من الضوحك ...
الله يحظك يا شيخ
لأ أطمن ...أنا معاك قلبا و قالبا يا ريس ...
تعرف أنا سعيدة لأن الراجل دا وصل للحكم ( بغض النظر عن سياسته و اللى هيعمله ) لسبب واحد وحيد ..
أنه أسمر البشرة و دى اول مرة القاعدة هتنكسر ...
لما كنت بتفرج فى الأفلام الأمريكية على مشاهد بيكون رئيسهم فيها أسمر زى العنصر الخامس و غيرها ...كنت بوقل السينما طول عمرها تستبق القادم بس كانوا مستبعدين التاريخ قوى
دلوقتى عجلة التغيير دارات بسرعة شديدة و حصل التوقع دا
و دى بشرة خير
و مش بعيد يا نبع حكمتى
هوه هيلاثوا احسن منك فين ؟؟
بس بعد القعاد فى المكتب البيضاوى تبقى تفتكر أختك فاتيما بقى بكام كوماندزر حلوين كدا عشان ييجوا يخطفولى يويف من قلب الأسر
ماشى ؟
تيت تيت الصياد
تنتخبو مين الصياد
هيعتقلو مين الصياد
يعني ممكن يجيي يوم كده ونلاقي المنشيتات في الجرايد الأمريكية بتقول أول فرعون يحكم أمريكا في تاريخها
ساعتها هاتلاقينا كلنا بنتلزق فيك واستفيد من وراك واطلع بكتاب عن رئيس امريكا عنك بالطبع ومصور فيهكل تعليقاتك ايام التدوين
تحياتي
حسن أرابيسك
تبقى انت اول رئيس ينجح خمرى من اصل مصرى
و و الله لو حصل دة احنا هنعيش :)
ولا تنسى أجرة الطائرة والسكن
:)
تصور انك قولت حقيقة علمية
ان ترشيح المواطن لمصرى فى الانتخابات الامريكية اسهل له من الــ
اووف
ما انت قولت بلاش اسقاطات سياسية
خلاص مش هتكلم بقى
و الله عندك حق
امتى ب نشوف بلدنا حصلت ربع الديموقراطية المدنية اللي الناس دول عايشينها
طيب ثمنها
طيب1 على ألف منها
يااااااااااه.. حلم مستحيل باين عليه كده
ده حتى عبد الناصر اللي حبته كل الناس بجنون ما كانش بالانتخاب
ألف مبروك على الرئاسة
لا يمكن تكون التعليقات مضروبة .. فيه باس وورد ويوزر نيم وحاجات ما يعرفوهاش
هههههه
مش عايز حلاوة .. أنا بحب السدق
هأنساك طبعا .. الندالة كنز لا يفنى
ههههه
وعليكم السلام ورحمة الله وبركاته
لازم طبعا أكون مبتسم .. مش زيي زيهم وألا إيه؟
هههههه
هما مش الأمريكان لوحدهم .. فيه دول تانية كتير عندها الحق ده
منها مصر مثلا
ههههههه
ما أخبيش عليكي .. أنا عايز أترشح لرئاسة أمريكا مخصوص عشان يدخلوني ملاهي ديزني ببلاش (رئيس أمريكا بقى) وبالمرة أشوف مارلين مونرو عالطبيعة ... هههههه
سيبك إنتي من العمودية .. أناهأمسكك وزارة الخارجية بدل كونداليزا رايس اللي شكلها يخض دي .. تمشي معاكي الوزارة دي؟
أنهي حزب ده؟ أنا ما أعرفش غير حزب وداد قلبي يا بوي
ههههههه
ينفع إشتراك عداد الكهرباء؟
مش عاجبني البيت الأبيض ده .. أنا هأختار شقة 3 أوض وصالة في قلب واشنطن عالنيل على طول
أنا تابعت بشغف تعليقك الوافي المفصل .. لكن فيه سؤال محرج
هو إمتى كانت الإنتخابات اللي بتقول عليها حصلت في مصر دي؟ كانت إنتخابات بجد وجد؟
أنا متأكدإن ما فيش إسقاطات .. يجعل كلامنا خفيف عليهم
هو إنت إتصلت بيا هنا قبل كده؟ جايز المدونة كانت "مشغولة" والا حاجة
ههههه
أنا في كامل قواي العقلية .. أؤكد ذلك .. ومن غير مسقعة ولا حاجة
ممكن الواحد يخرج يرفه عن نفسه 4 أيام بدل اليوم الواحد اللي إقترحتيه ده؟
آه ممكن .. مافيش حاجة بعيدة على ربنا
كان نفسي أترشح في مصر .. ياللا حصل خير
مافيش حد في البلد جي عنده إسقاطات سياسية خلاص .. ما فيش منها فايدة .. هههه
حلوة حكاية أسيب الكرسي لفادي دي .. ممكن كمان أولاد فادي بالمرة؟
إيه الأسباب اللي ما فيش داعي لذكرها دي؟ هو فيه قلق عندنا وألا إيه؟
إحنا في بلد ديمقراطي .. ماحدش يخاف .. تعيش الحكومة
أنا معجب جدا جدا بنصيحتك الغالية .. وبالذات موضوع الجواز من أمريكية ده .. دي أحلى حاجة في الموضوع حتى لو ما كسبتش الرئاسة ... هههه
إوعي الحاجة مراتي تسمعك
شوفتيني وأنا رئيس أمريكا؟ أنفع مش كده؟ ههههههه
وإن كان على الكوماندوز .. ده أنا أبعتلك ساعتها حاملة طائرات عشان خاطر يوسف
تحبي أبعتك صعايدة من عندنا من البلد؟ جاهزين من دلوقت لو عايزة
يعملوا اللي يعملوه في الصياد مش مشكلة
أنا المراكبي مش الصياد .. الحمد لله
هههه
طيب ما تشارك في الحملة الإنتخابية بتاعتي بالمرة وممكن تستخدم فيها برضه تعليقاتي في المدونات
بس لازم تترجمها من العربي للفرنساوي عشان الشعب الأمريكي يفهمني
ياريت تصميم لشعار الحملة الإنتخابية بالمرة بقى يابو علي .. حاجة كده زي الهلال والجمل
أنا مبسوط جدا إنكم أجمعتم على إن فوزي بالرئاسة هيكون من مصلحتكم .. ده معناه إن الشعب حاسس إني قريب منه
كده هأترشح وأنا مطمئن
إنت أمريكي الأول وألا لأ؟
الإنتخابات اللي هأدخلها دي في أمريكا البلد مش أمريكا المحطة
شكلك كده كنت هتلبخ وتخبط في الحلل .. كويس إنك لحقت نفسك
ألا أخبار الحلل إيه اليومين دول؟
هههههه
الله يبارك فيكي .. لازم تشرفيني في البيت الأبيض تشربي حاجة
عبدالناصر كان رئيس بالإنتخاب وبنسبة 99 و9 في المائة .. إقري التاريخ كويس .. بس هو اللي إنتخب نفسه
ههههههه
والنبى كنت راجل طيب مكانش يومك
بس انت اللى جبته لنفسك حد يعمل عملتك دى ويفكر مجرد تفكير او حتى يحلم بس انه يرشح نفسه للرياسه
اخبار الشمس اللى انت رحت وراها ايه؟؟؟؟؟
بالريس الجديد لامريكا
يعنى حاساه حيبقى احسن من بوش وقراراته
يمكن علشان اصله مسلم
مش عارفه
بس ياريت
على فكرة حتبقى ريس حلو اوى
حزينه
بس يا خواتى كلهم اسم الله عليهم بيض وحمر حتى الاسمرانى اوباما شكله احلى منى :))
احسن تهرب من الجوايز
شمس إيه بس اللي رحت وراها؟ إحنا عندنا ديمقراطية في أمريكا .. مش زي عندكم .. هههههه
اللي بيرشح نفسه ما بيروحش وراء الشمس .. الشمس دي كانت زمان أيام الحنية .. دلوقت فيه ما هو أسوأ
لمعلوماتك .. السياسة الأمريكية العامة والمخططات طويلة المدى ما بتختلفش بإختلاف الرئيس .. لكن الأسلوب أو الطريقة بتختلف من رئيس للتاني حسب الحزب اللي هو جاي منه .. جيمقراطي وألا جمهوري؟
أنا بقى حاجة تانية خالص .. بجد هأعجبكم جدا .. بس إنتخبوني
لما تبقي الرئيس رقم 45 اوعي تنسانا بشغلانه هناك ولا حاجة
بدل ما الناس تقول المنحة ياريس هيقولولك الفيزا ياريس
ابقى اعمل حسابك بقى وخلى فى جيبك أد 80 مليون فيزا كده
ومتنساش أخوك الصغير فى أى شغلانة صغيرة كده ان شا لله عمدة نيويورك حتّى
حلو البوست بتاع البطيخ ده .. مافيهوش أي إسقاطات خاااالص
ههههه
كلهم حلوين وبيض وحمر؟ طيب وأنا .. مش زيهم وألا إيه؟ ما أنفعش رئيس لأمريكا؟
أنساك؟ أنا هأنساك برضه؟
هأنساك طبعا .. ده العادي بتاعي
ههههه
لو على 80 مليون فيزا يبقى مش مشكلة .. أمريكا بلد فاضيه ومافيهاش غير 350 مليون نسمه رغم إنها قد مصر 50 مرة
وإن كان على نيويورك .. إطمن هأحجزهالك
ما ينفعش محافظة الجيزة؟ تمشي بيها حالك دي اليومين دول؟
هي من جهة أسهل فهي فعلا أسهل
:) طبعا اسهل وسهل جدا كمان
اعتبر تعليقي هنا هو نفسة ترشيحك للمنصب القادم
المهم إن يكون تعليقك مالوش أي إسقاطات سياسية .. أنا هأعتبره كدا عشان الحاجات دي بتجيب حساسية في مصر
وش بيغمز
وإنت كمان شامم من تعليقك كده ريحة الإسقاطات السياسية .. إوعى تفتكر إنك بعيد .. هيجيبوك هيجيبوك .. ههههه
منور
أحلى حاجة فيك هي التواضع بصراحة .. حاجة واضحة جدا .. 5 ولايات بس؟ ده إنت شوية وممكن تتواضع أكتر وتقولي أمسك رئيس مكانك ... ههههه
أنا هأكون رئيس ديمقراطي .. هألغي حكام الولايات وهأكون الحاكم الأوحد
بس أمانة أول ماتمسك غير لون البيت الأبيض عشان الزمالك
بس متنساش بالون الأبيض لون النيل
ملحوظة كويسة .. وبما إني أهلاوي صميم فقد قررت تغيير لون البيت الأبيض إلى أزرق .. أنا شفت الأهلي لابس كده إمبارح في ماتش الإتصالات
أنا بحب النيل جدا .. ممكن أنقله أمريكا معايا؟ وألا أجيب أمريكا عند النيل أسهل؟
الصوره الاخيره صدمتني صراحه
تفاجأت فيها من وين طلعت
البوست جد رهيييييييييب :)
واخترناك اخترناك
فلتسمح لى بهذه المساحة الإعلانية
اذا أردت ان تكتشف من وراء مقتل سعاد حسنى ، فالاجابة لدى فى المدونة
سري للغاية
www.toptop-secret.blogspot.com
أنا سعيد إن البوست عجبك
شكلي كويس وأنا رئيس أمريكا؟
ههههه
إذا كان عالطاقية والعياط عند الحائط تبقى بسيطة .. الغاية تبرر الوسيلة .. وإبقوا قابلوني بقى لو وقفت جنبهم بعد كده .. إلا لو دفعولي كويس طبعا .. هههههه
انا بقى غلسه وهصطاد ف الميه العكره
ههههههههههه
يللا ابقى اجيبلك بقى عيش وحلاوه انت وايمن نور ههههههههههههه
هس هس هس خلاص خلينا ساكتين احسن احسن نروح انا وانت بلد اللى يروح ما يرجعش
ومانلاقيش حد يجيبلنا مش حتى
هههههههههههههههه سلام يا عميل الامريكان
هههه شفت الزمبه دى
ههههههههههههه
ياسيادة الريس انا نفسى فى تأشيرة من زمان اروح اجيب شامبو بانتين عائلى اتنين فى واحد وعلبة مكسرات وعلبة كريم اولاى توتال ايفكتس لمقاومة آثار علامات البشرة السبع وبار شيكولاتة اكس لارج...بس كده
الموبايلات بقى والكاميرات الديجيتال حضرتك حتوزعها هدايا علينا طبعا
مش احنا اللى انتخبناك!!!!
:)))))))
وانت ريس المركب ... بس اوعى تكون المركب الغرقانه وتطلع منها براءة ... ولاتكون ابن عز ومركبك حديد استانلس من ابو عشرتاشر الف
عموما احنا هنخصخصلك كل اصواتنا بس افتكرنا ولو بمترفى متر من ابو جنيه....ندفن فيه احلامنا
أصل الموضوع ده محتاج له ترتيب و تخطيط ، يعني لو الحزب الديمقراطي تبقى عايز قبل الانتخابات ركود ، و لو الحزب الجمهوري تبقى عايز بعد الانتخابات حرب ، و لو الحزب الوطني تبقى عايز تقعد لسنة 2050 :)
عامه واحنا نلاقي احسن منك
موافقة
الله أعلم إذا كان ما نشرته أنت صحيحا أم لا .. فالله أعلم بالسرائر
أنا برضه عميل الأمريكان؟ طيب ياريت .. دي حتى تبقى لعبت معايا عالآخر
أنا ما بحبش العيش والحلاوة .. أنا عايز مربة تين
طيب ومش عايزه حاجة من عند الخضري أو الفكهاني بالمرة؟
هههههه
إنتخبوني تجدوا ما يسركم .. وإبقوا قابلوني
الحديد الإستانلس نزل سعرة من 45 ألف جنيه للطن لحد 30 ألف جنيه للطن .. شغلتي بقى وحافظها
هههه
ما فيش متر بجنيه دلوقت .. أقل حاجة بألف جنية .. وبعدين الأحلام إندفنت من زماااان
وكأنك حاسسس بيا
أنا فعلا بأفكر أعمل حزب جديد في أمريكا إسمه الحزب الوطني .. هو ده النموذج الناجح اللي بعون الله هيرفعني للسما ويخليني أقدر أغير من قانون الإنتخاب وهالغي الفقرة بتاعة مدتين رئاسيتيين دي
مين بومبوني ده اللي هأوزعه؟ أنا هأوزع ساندويتشات فول وطعمية إحياء لذكريات مسقط رأسي .. ومن غير عيش كمان
ده الرئاسة دي حاجة سهلة خالص مش صعبة زي ما الناس فاكرة
ويعني هما الرؤساء إياهم كانوا أحسن مني في إيه؟
إنتخبوني بس وأنا هأبسطكم عالآخر
ياعم هو فيه حد واخد باله؟ كله أي كلام وخلاص
ههههه
أعتبر دي موافقه عليا؟
( برقبتى يا ريس ) كما قالها المشير عامر لعبد الناصر وخربت الدنيا ..
كلنا وراك لحد ما توصل بإذن الله للرئاسة أو السجن ، المهم توصل لحاجة ..
سعدت بقراءتى لمزيد من قصصك فى موقع القصة العربية وأدعوك لقراءة قصصى هناك أو فى مدونتى المتواضعة دخل الشتا .
اتصدق بالله تتابع الصور خلانى لثانيه اتخيل انه مش بعيد انك لو اترشحت تكسب
يا عالم محدش عارف بكره فيه ايه ؟؟!
ههههه .. المهم أوصل لأي حاجة إن شاء الله أوصل طنطا حتى .. هههه
أشكرك على متابعتك ويشرفني زيارتك طبعا
أنا ما حبيتش أبدأ بصورتي أنا تواضعا بس .. المفروض أكون ف الأول .. هههه
تصور تبقي رذيس امريكس لطيف جدا
بس وحياتك بتوافيقلي علي الهجره بسرعه بقي احنا صحاب اهو
و متقوليش مفيش محسوبيات ساعتها لازم يبقي فيه