شد القلوع يا مراكبي ... مافيش رجوع يا مراكبي

الأحد، أبريل 04، 2010

إنت لسه صاحي؟

إنت لسه صاحي؟

كانت تلك هي العبارة التي قالها لي صديقي الأجنبي عندما كنا نتحدث عن الأمل الذي تجدد مؤخرا في الساحة السياسية المصرية

قالها لي ببساطة هكذا: إنت لسه صاحي؟

ربما لم تكن الترجمة غير دقيقة

ربما أنا من أحسست أنه يسخر مني

ربما لم يكن يقصدني أنا شخصيا بالتحديد وكان يخاطبني كمندوب عن شعب مصر

لكنني لست مندوبا عن شعب مصر

لا أدري من هو المندوب عن شعب مصر؟

لما يحب حد يخاطب الشعب المصري .. يتكلم مع مين؟ جملة أذكرها جيدا عندما رأيت فيلم ''وا إسلاماه'' والمنقول عن قصة حقيقية من تأليف علي أحمد باكثير .. الجملة قالها رسول المغول عندما حضر إلى مصر طالبا من شعبها الإستسلام دون مقاومة أو حرب .. وكانت ملكة مصر حينها ''شجرة الدر'' قد قتلت للتو هي ومن قبلها قطبي السياسة المصرية حينذاك: أقطاي وعز الدين أيبك

لا أدري هل يتجه المشهد السياسي الحالي نحو ذلك المشهد أو تلك اللقطة التي تذكرتها من ذلك الفيلم؟ لا أدري .. يبدو أنني أهذي

إنت لسه صاحي؟

عندما كرر صديقي الأجنبي تلك العبارة مرة أخرى كان قد إختلط علي الأمر .. فربما كان ذلك سؤالا يحتاج مني إلى إجابة .. ربما كان يريدني أن أجيب بنعم أو لا

لأحاول الإجابة إذا .. لكن أي إجابة أختار؟

هل اقول نعم؟ أيوة أنا صاحي؟ هل أنا صاحي فعلا؟ وصاحي لإيه بالظبط؟ هل أنا على تمام المعرفة بأن بلادي تضن على مواطنيها بحياة كريمة دون سبب واضح؟ هل أنا أدري أن الفساد لم يترك موضعا في وطني دون أن يلوثه ويغطيه بالسواد؟ نعم أنا أعلم كل ذلك .. فأخبار التدهور والفساد لم تعد مجرد أخبار نقرأها أو نسمعها من هنا وهناك .. بل نحن نلمس ذلك بالفعل

إذا أنا صاحي وأعلم تماما كل ما يدور حولي في هذا الوطن .. لكن ماذا فعلت بعد أن عرفت ولمست ذلك الإنهيار؟ لا شيء .. ولماذا أنا فقط الذي يجب أن يفعل شيئا؟ لماذا لا يتحرك الآخرون ليفعلوا شيئا؟ نفس السؤال الذي أسمعه من الآخرين .. كلنا ينتظر أن يتحرك الآخرون أولا .. فلا يتحرك أحد

إنت لسه صاحي؟ يكررها للمرة الثالثة وأنا لم أقرر بعد هل أجيب بنعم أم لا .. أكتشف أن إجابتي بنعم هي إجابة مخجلة ومشينة .. كيف لي أن أكون صاحي وأعي كل هذا الفساد ثم أغض الطرف عنه؟ إذا فلتكن إجابتي هي لا .. أنا مش صاحي .. يسألني صديقي الأجنبي سؤالا أكثر إحراجا: طيب وهتصحى إمتى؟

لا أدري من جديد .. هل هذا السؤال موجه إلي أنا شخصيا أم أنه سؤال عام موجه لشعب مصر؟

قلت له أنني لست مندوبا عن شعب مصر

يضيق علي الخناق أكثر ويعفيني من الإجابة نيابة عن شعب مصر .. يسألني عن موعد إستيقاظي أنا شخصيا .. أعجز عن الإجابة

أكتشف أنني أنا أيضا أبحث عن مندوب يتحدث بالنيابة عني ويتحرك هو لمقاومة التدهور ويخوض الحرب ضد الفساد ثم يمنحني وطنا جميلا هانئنا

أنا أبحث عن ذلك الشخص .. وأنت تبحث عن ذلك الشخص .. الجميع يبحثون عن ذلك الشخص .. وبينما نحن جميعا مشغولين في رحلة البحث تلك .. لا يتحرك أحد ولا يتغير شيء ولا يبق من الوطن سوى أطلال ربما ننساها بعد ذلك

إنت لسه صاحي؟

التسميات:

37 Comments:

Blogger norahaty said...

الاجابة صعبة
اوى

الأحد, أبريل 04, 2010

 
Blogger norahaty said...

انجاززززززززز
للمرة التانية

الأحد, أبريل 04, 2010

 
Blogger norahaty said...

وللأسف احناصاحيين
وواعيين بما يحدث
وليتنا نايمين
او حــتى
متخدرين لكننا
صاحيين ومنتظريين من
ياخذ لنا حقنا أو يأتنا.

الأحد, أبريل 04, 2010

 
Blogger norahaty said...

عندى اقتناع
برأى قرأته
لبهاء طاهر
أن نيلنا وطبيعة
ارضنا جعلتنا شعب
(مسالم )أكثر من اللازم
بحيث اننا لم يحدث لشعبنا
او لبلدنا تحديداً تغير عن طريقنا احنا يامصرين لكن
عن طريق :مستعمر او جيش
لكن مفيش ثورة شعبية مصرية
حقيقية على مدى التاريخ
ويقصد بثورة شعبية هنا ثورة حقيقية تقوم وتستمر ةتنجح!!

الأحد, أبريل 04, 2010

 
Blogger norahaty said...

وانا يظهر الصاحية
الوحيدة النهاردة
ياباشمهندس على
بلوجر وووووو
صباح الفل .

الأحد, أبريل 04, 2010

 
Blogger sabry abo-omar said...

يعنى أيه صاحى الأول , ممكن أكون بأحس بس مش بأقدر أتكلم أو أعبر أو أقوم بأى فعل .. يبقى أيه فايدة الصحيان بس وجع عالفاضى .. أكيد النوم أحسن بدل ماأتألم ومش أقدر أقاوم لأ أنا نايم فعلا ومش هاصحى وإذا صحيت هانام بسررعة علشان ماأحسش بحد. أنتوا هاتتضحكوا عليا ماأحنا نايمين كلنا من زمان.. صوت واحد بيشخر أهه كمان

الأحد, أبريل 04, 2010

 
Blogger اميرة بهي الدين said...

في عام 2005 ، كتبت مقالا في جريده روز اليوسف التي يكرهها الجميع ، اسميتها الغضب نوما ، او النوم غضبا لااذكر بالضبط ، لكني احسها وثيقه الصله بما كتبته اليوم ، ان رغبت في قراءتها ، سارهقك قليلا ، ادخل علي مدونه قوس قزح ملون ، وهناك ابحث عن الغضب نوما او النوم غضبا ، وعندما تجدها ، اقرها من فضلك ويهمني رايك ، لماذا لم استسهل واضع لك اللينك مباشره ؟؟؟ ربما لاني رخمه وعايزاك تتعب نفسك شويه !!! مساء المساء !!! اه ، حتلاقي لينك المدونه في الانفو علي بروفيلي في الفيس بوك ، مش بقولك رخمه !!!!!!!!!!

الأحد, أبريل 04, 2010

 
Blogger ـ-ـ- أحمد عبد العدل-ـ-ـ said...

:(
فى وقتها تمام ،، تسلم الأيادى

الأحد, أبريل 04, 2010

 
Blogger كلبوزة لكن سمباتيك said...

انت صاحي و حتصحى امتى؟
قوله لما الكابوس يخلص

الأحد, أبريل 04, 2010

 
Blogger محمد عبد الغفار said...

الحمد لله صاحى ، ولكنى غير مؤيد للبرادعى

الأحد, أبريل 04, 2010

 
Blogger راجى said...

معرفة الواقع خير من الغفلة ، وهذا اضعف الايمان

الأحد, أبريل 04, 2010

 
Blogger hana said...

لا صاحيين ولا ناييميين
يعني مابين اليقظة والنوم
لا قادرين نصحى ونتحرك
ولا عارفين ننام ونحلم
مرهقين مصابيين بالصدمة
المهم ثبات الحالة
اللي مش عاوزة تتغير دي مؤلم جداً
عشان تتغير لازم نفوق كدة ونركز ويطلع صوتنا بجد
انا مش فاهمة مني حاجة فاهم حاجة يا باشمهندس :d


لك اسلوب في السرد من أروع ما رأيت على فكرة
إحترامي وتقديري

الأحد, أبريل 04, 2010

 
Blogger Bothayna said...

صاحي غير واعي
الصاحي ممكن يبقى مفتح عينيه ومش شايف
وبيتحرك زي آلة
الواعي هو اللي مخه صاحي
لما بيحس بالألم بينتفض
ويقول آه
احنا بقينا زي أسد عجوز
الفار مبهدله ومش عارف يطوله او حتى يتوجع
او زي واحد من كتر التلطيش جسمه نحس
احمد .. هو انت لسه صاحي؟

الأحد, أبريل 04, 2010

 
Blogger بيتنا القديم said...

لما تحب تخاطب شعب مصر..يبقا فعلاً انت صاحي وده معناه خلل في تطبيق الخطط الحكومية لتخدير الشعب ده عشان يكمل مسيرة نوم الـ7 تلاف سنة اللي بدأها زعيم الأسرة التالتة..!

الأحد, أبريل 04, 2010

 
Blogger من كل بستان زهرة said...

الوطن عمره ما هيبقى اطلال
ولاعمرنا هننسى وطنا

الوطن ده هو كيان عايش داخل أعماقنا

هو انتماء هو الوجود أصلا
لازم كلنا نبقى جزء من تاريخ هذا الوطن

مش مجرد نجمه بتدور في فلكه
والفساد الي غطى وطنا احنا جزء منه
سكوتنا ده الجزء الأكبر
أحنا الي نتحمل مسؤلية الوضع الي وصل ليه
ولازم بقى نصحى علشان لو فيضلنا نايمين

خلاص مش هنقوم تاني
مصر فيها كتيير أوي من القياديين الرائعين
الي ممكن ينتشلوا مصر من الحاله الي هي فيها
ولازم كلنا نلتف حولهم
علشان بلدنا ترجع تاني

الأحد, أبريل 04, 2010

 
Blogger osama said...

مساء الخير ياباشمهندس
يبدو ان الجميع يبحث عن ذلك الوطن الجميل الذى ضاع فى زحمة انشغالنا
اعتقد ان البحث عن الآخر الذى يمارس عنا مسئؤلية الوطن هو تعبير عن عدة افكار ، فكرة الاعتذار وفكرةعبثية البحث
ووربما فكرة التأكيد على ان هذا البحث نفسه هو فكرة متكررة لاتكف عن بعث نفسها
تحياتى

الأحد, أبريل 04, 2010

 
Blogger همس الاحباب said...

مع الاسف كل ما ذكرته صحيح
كلنا هذا الشخص
صاحى ويعى كل ما يدور حوله
ونائم ومغيب وفى انتظار الخلاص من الاخرين
ولا نتحرك كاشخاص قيد أنملة لتغيير الواقع الذى نعيشه

تحياتى

الأحد, أبريل 04, 2010

 
Blogger ماجد العياطي said...

حقيقي يمكن يكون قاصد حاجه تاني

لكن خاطره طيبه جدا منك يااخي مراكبي

الناس كانت بتتكلم من فتره على ازمة الحشيش وكانه هو النفس اللي بنتفنفسه

وسابت العيش والميه والتلوث والفقر والازمات بانواعها

يمكن الناس ما حستش باازمه الا لما فاقت من التخدير

وقالك انت لسه صاحي

جزاكم الله خيرا يااخي الكريم

وامتعنا دوما بمقالاتك الجميله

الاثنين, أبريل 05, 2010

 
Blogger sal said...

انا متأكد يا مراكبى انك صاحى
وواعى انك صاحى....
أن الكثير من العراقيل موضوعة في الطريق وأنه لولا الاهتمام الشخصي والبذل والصبر والتضحية لن يتحقق اى نجاح
المهمة مهمة فردية، بمعنى أن الفرد يجب أن يقوم بها بنفسه ولا ينتظر أن يقف معه أحد.
المعرفة والوعى مسألة تراكمية
والبدايات غالبا ما تكون صغيرة
***********

صاحى على عينى
نايم ماشى
بس احلام يقظة لا

تحيتى وتقديرى

الاثنين, أبريل 05, 2010

 
Blogger قلم رصاص said...

أيوا صاحي
وان غد التغيير لآاااااااتِ

:::::::::::

"نفس السؤال الذي أسمعه من الآخرين .. كلنا ينتظر أن يتحرك الآخرون أولا .. فلا يتحرك أحد"

الجمله دي لخصت بها الحال يا استاذنا

لكن رغم كدا يغمرني التفاؤل

تقبل مروري

الاثنين, أبريل 05, 2010

 
Blogger سلسبيل said...

لما الواحد يكون صاحي وسط مجموعه من الموتي..دا ف حد ذاته بيبقي نقمة عليه..
وهو للاسف بيبقي عنده شويه ضمير باقيين مانعينه من انه زي ما علاء ولي الدين رحمه الله عليه قال
يعمل نفسه ميت...ويخلي المركب تمشي
مش عارفه نعمل ايه بصراحه
الواحد ساعات بيقول ياريتني ماكنت فاهم اللي بيحصل
كانت مش هتفرق معايا ساعتها وهقول مع اللي بيقولو ان الدنيا حلوة والخير كتير وكله تمام
بس المصيبه ان فيه شريحه كبيره بدأت تظهر من المثقفين المستضعفين ف الارض
اللي شايفين الغلط..وعارفين انه غلط
ومافيش بايدهم اي شئ يقدرو يعملوه غير انهم ياكلو ف نفسهم زي مابنعمل
ايوة احنا صاحيين يامراكبي
بس ف الغالب هنحتاج اقراص منومه قريب علشان معادتش فارقة
بوست رائع كالعاده يا استاذ
وف الجون

اه تنويه صغنن عارفه انه متأخر
حبيت بس ابدي اعجابي الشديد بكتاب الحياه بدون كاتشاب...بجد عمل جميل جدا..وفي انتظار باقي الاصدارات :)

الاثنين, أبريل 05, 2010

 
Blogger إنـســـانـة said...

للأسف آه لسة صاحيين .. أكبر دليل على كدة إننا بنتألم من اللى بيحصل وبنعاصره .. لو كنا نايمين مكناش خدنا بالنا أصلا إن في حاجة غلط بتحصل

الاثنين, أبريل 05, 2010

 
Blogger Haytham Alsayes said...

السلام عليكم

ازيك يابشمهندس بصراحة انت صاحي وكلنا صاحيين بس مش عارفين نعمل ايه
انا عاوز اسألك سؤال بس ياريت تجاوبني عليه بماحضرتك اكبر منى سنا وخبرة وثقافة ممكن اعرف حركة البرادعي للتغيير دى عتنجح والناس عتبقي وراه ولا لا وحماسي الشديد له مراهقة سياسية زى مابيقوله من جانبى ؟

انا عارف ان التغيير ات غصب عن الجميع ايماني بربنا وقضية بلدى بديني الثقة بس امتي ؟


ما قدرش اوصف مشاعري اتجاه البرادعي واللي بيقوله بس خايف يتفرعن وفي ناس بتطمني بتقولي بدل مش من المؤسسة العسكرية يبقي مش فرعون بجد انا متلخبط ومش عارف اعمل ايه


معلش طولت عليك بس حبيت افضفض ليس الا

تحياتي لك

الاثنين, أبريل 05, 2010

 
Blogger آخر أيام الخريف said...

سؤال صعب .. واجابته اصعب...

الاثنين, أبريل 05, 2010

 
Blogger Ahmed Mubarak said...

المهم صاحي صح ولاصح مع الموجه .. صاحي بتفكير ولا باندفع .. صاحي بامل ولا صاحي متعلق بغيرك ..

الاثنين, أبريل 05, 2010

 
Blogger osama44 اسامه 44 said...

هى خاله بين النوم والصحيان
الاجابه فى عاية الصعوبه والخجل

الثلاثاء, أبريل 06, 2010

 
Blogger micheal said...

حاسس أننا عايشين حاليا في مسرحية هزلية عبثية كله بيقوم بدوره فيها
:(
تحياتي

الثلاثاء, أبريل 06, 2010

 
Blogger norahaty said...

صدقت يامايكل
هذا ما أحسه
مجرد شو لكن
لا نيةولاعزيمة
للتــغير:(

الثلاثاء, أبريل 06, 2010

 
Blogger صدى الصمت - عاشقة الورد - said...

فى الحقيقة أغلب الناس وأعتقد أنا منهم بيدور على مندوب يقوم بكل المهام الصعبة بدلاً منه ثم يأتى هو ليحصد أروع الثمار دون مجهود كبير
فكلنا نحلم بكثير من الأشياء ونريد أن نصحوا فنجدها امامنا
بس أكتر حاجة عجبتنى بجد إنك أخيراً إستجبت لمطالبنا وكبرت حجم الخط شوية عشان أنا كان نظرى قرب يضيع
سلامى للجميع عندك

الأربعاء, أبريل 07, 2010

 
Blogger vision said...

نعم نحتاج لبطل نلتف حوله....هل شاهدت فيلم فى فور فنديتا؟v for venddetta

الأربعاء, أبريل 07, 2010

 
Blogger !!! عارفة ... مش عارف ليه said...

والله أفتكر إن العجلة دارت

ولو كتير مننا مش صاحيين

إلا إن البعض مصحصح على الأخر

وكمان بقى في نوع جديد من الصاحيين

بدأ يكون له وجود فعلا على أرض الواقع

واتولد من رحم الطفرة التكنولوجية

وأكبر مثل على كده حركة 6 إبريل

وافتكر أن قادم الأيام ستحمل الكثير إن شاء الله

وبإذن الله كلنا نصحى

السبت, أبريل 10, 2010

 
Blogger Gid-Do - جدو said...

سلام عليكم ياحمد
معلش مقدمة لابد منها- فى عالم الحيوان الذى خلقة الله على الفطرة لابد من وجود قائد للقطيع - الافيال على سبيل المثال تقود القطيع انثى فى قطيع الذئاب نفس الحال - لابد من قائد يلتف عليه الناس - وفى مصرنا الحبيبة قضت ثورة يوليو ومن حكموا مصر من بعدها على ظهور اى قيادة شعبية فحرم الشعب من زعيم وطنى يتلتفون حوله - حتى وان كان خارج الشلة الحاكمة- والى ان يظهر هذا الزعيم يصبح الموقف محلك سر ويصبح التقدم الى الخلف وليس الى الامام - الخوف ياسيدى الذى اورثوه فى جينات هذاالشعب جعل السلبية والمشى جنب الحيط طريقة حياة للتغلب على البطش والقهر - فيه كتير جدا من الشباب فى هذا البلد متحمس وبكل اسف بيستغل من اصحاب المصالح لكن اذا ظهر القائد الشعبى سوف يصحح المسار - وانا على يقين تام ان الدكتور البرادعى لا يصلح لهذا وان كنت اظن ان السيد/ عمرو موسى هو ذلك الرجل

الأحد, أبريل 11, 2010

 
Blogger IBN BAHYA - إبــن بهيـــــــــــــة said...

السلام عليكم
أيوه يا باشمهندس لسه صاحي .. الشعب المصري والله دايما صاحي بس بيعمل نفسه نايم كام قرن كده وفجأة تلاقيه مصحصح جدا وتحس إنه عمره ما نام ..

الشعب المصري كده والله .. تاريخه بيقول كده .. عمره في حياته من عشرة آلاف عام .. عمره ما غير بإيديه حكامه .. لازم ييجي فارس ويرفع سيفه في وجه الظلم وتلاقي الشعب كله التف من وراه .. جم منين ؟ كانوا فين ؟ ما تعرفش .. بس ده تاريخ بلدنا .. بهية..

أرق تحياتي

الأحد, أبريل 11, 2010

 
Blogger Dr Ibrahim said...

للأسف كلنا صاحيين !

الاثنين, أبريل 12, 2010

 
Blogger Esmat said...

بنرجع نشوف الدنيا فى بلادنا وسنة عن سنةالتغير بيزيد سوء فى كل شىء،بنهرب تانى فعلا واملنا نجى تانى نلاقى مصر اللى بنشوفها فى الافلام القديمة،إن يكون هناك مندوب يمثل شعب،أشك انها تحدث فريبا ،شعب مصر منقسم لمصالح فردية خاصة لا يهمهم مصر الوطن ومستقبل افضل للقادم من الاجيال،همهم يكتنزوا دول حبوا نفسهم وباعوا مصر اصبحت مشروع تجارى وطول مادول موجودين صاحيين لنفسهم،الأمل ضعيف والإحباط كاسر الناس وصاحيين بس بيتوهوا نفسهم
اللهم إرفع غضبك ومقتنا عنا 

الجمعة, أبريل 16, 2010

 
Blogger يا مراكبي said...

أشكركم جميعا على تعليقاتكم البناءة .. وأعتذر عن غيابي لفترة ليست بالقصيرة وفقا لمعايير عالم التدوين .. أعود إليكم جميعا لمتابعة مدوناتكم في القريب العاجل

كل تقديري لكم

السبت, أبريل 17, 2010

 
Blogger كلمات من نور said...

قل لصديقك

يا عزيزي كلنا في مصر نيام...



أسرة منتدى زبد البحر يتمنى منكم التواجد معنا في منتدى عالم المدونيين والمدونات

http://mhg1962.ba7r.org/forum.htm

الأحد, أبريل 18, 2010

 

إرسال تعليق

Links to this post:

إنشاء رابط

<< Home