شد القلوع يا مراكبي ... مافيش رجوع يا مراكبي

الاثنين، يوليو 26، 2010

أنا شربت حشيش يا سعاد


يحدث في مصر أن يستيقظ المواطن المصري من نومه ذات يوم فيجد وسائل الإعلام المختلفة تتحدث عن البدء في تغيير الساعة ليتم العمل بنظام التوقيت الصيفي .. وبرغم أنه لا أحد يعلم حتى الآن ما هي جدوى ذلك النظام في العصر الحالي إلا أنه يحدث وخلاص .. ولكن ليست تلك هي المشكلة .. المشكلة أنه يحدث في مصر أن يستيقظ نفس المواطن المصري في يوم آخر ليجد نفس وسائل الإعلام تتحدث عن العودة إلى العمل بنظام التوقيت الشتوي خلال شهر رمضان – ولا أحد يعلم أيضا لماذا – ثم تعود البلاد للعمل بالتوقيت الصيفي مرة أخرى بعد انقضاء شهر رمضان المبارك وكل عام وأنتم بخير وبوسه من هنا وبوسه من هنا

كما يحدث في مصر أن يستيقظ المواطن المصري مرة أخرى – هو نايم على طول أصلاً – ليجد خبراً موتوراً عن وجوب الحصول على ترخيص قبل تعليق زينات رمضان وذلك توفيراً وترشيداً لإستهلاك الكهرباء .. فيقع أطفال الحي في حيرة لأن أوراق الزينة التي أعدوها وألصقوها بالصمغ والنشا لا تعمل بالكهرباء ومع ذلك فهم عرضة للمخالفة والتنكيل

يحدث في مصر أن تتفق دول حوض النيل على توزيع جديد للحصص فيما بينها .. فيستيقظ المواطن المصري إياه على تصريح من المسؤلين مؤكدين أن النهر سيظل للأبد يجري من الجنوب للشمال ولا سبيل لتغيير الظواهر الطبيعية .. ومؤكدين أنه لا مساس بحصة مصر من مياه نهر النيل وكأن صنبور نهر النيل موجود عندنا في ميدان التحرير ونحن الذين نتحكم في منابعه .. لا أدري أي ثقة تلك التي يتحدث بها مسؤلينا حفظهم الله من انقطاع المياه من الكومبينيشن والشطاف بعد دخول الحمام نتيجة إسهال قوي

وبمناسبة الصحف والتصريحات .. من الغريب أن الصحف هي الأخرى تتناول الأخبار بطريقة مبتورة تماماً .. فلو صرح أحد المسؤلين وقال: أنا أحب مصر .. تجد أن عنوان الخبر قد تحول فجأة إلى: المسؤل الفلاني يصرح ويقول أنا أحب .. بس كده .. فتتجه أنت فوراً إلى تفاصيل الخبر المثير و كلك فضول لمعرفة قصة الحب تلك التي تجرأ وأعلنها ذلك المسئول فتجدها لا هي قصة ولا هي مناظر .. هذا بالإضافة إلى أن المواطن المصري الذي يستيقظ صباحاً - زي ما احنا عارفين – يجد على الرصيف عند بائع الجرائد جريدتين: واحدة قومية تؤكد أن الحياة بمبي وأنا جنبك وأنت جنبي .. وواحدة تانية أمينة صادقة صريحة بالألوان الطبيعية الداكنة وعندما يفاضل بينهما ليشتري إحداهما .. يفيق ويستغفر ربه ويتجه إلى عربية الفول

ثم يحدث في مصر أن يتحدث العالم كله عن أزمة كبيرة في مصر بسبب نقص المعروض من خام الحشيش المخدر .. هكذا يتحدث الجميع عن هذا الأمر ببساطة وكأننا نتحدث عن نقص في المعروض من السكر والشاي مثلاً .. وكأن الحشيش سلعة أساسية جداً يتعاطاها الجميع قبل الأكل وبعده .. فأتساءل: أين ذهب الحشيش؟

لكنني بعد متابعة دقيقة للأخبار التي أسمعها حين أستيقظ – كمواطن مصري – أستطيع أن أجزم أن مسؤلينا هم من تسببوا في نقص الحشيش في البلاد .. فأنا أتخيلهم الآن في سهرة حشيش جماعية .. مساء الخير .. ويتبادلون الجوزة فيما بينهم .. ثم يصيح كبيرهم بعد أخذ نفس عميق: احنا نعمل ايه في الشعب بكره يا شباب؟ كرررررر (صوت الجوزة) فيرد آخر من بعيد: والله يا معلمي احنا نعلن بكره التوقيت الصيفي .. كررررر .. فيرد آخر من وسط المجموعة: تمام كده .. وأول ما ييجي رمضان نلغيه تاني .. وأول ما يخلص رمضان نرجعه تاني .. فيضحك الجميع .. هع هع هع هااااااع .. مساء الخيييير .. هأو أو أآآو

 
وهكذا كل ليلة .. في كل ليلة يصدرون قرار محششا يختلف عن الآخر .. ويستيقظ المواطن المصري في كل صباح ليتفاجأ بالإبداع والتميز والتفرد في القرارات .. فيختلط عليه الأمر بين اليقين والحلم .. ويعيش محششا هو الآخر في وضح النهار

المهم .. شربت حشيش النهارده؟

التسميات: ,

37 Comments:

Blogger اسكندراني اوي said...

ما تجيب نفس بقى خليك حلو

الاثنين, يوليو 26, 2010

 
Blogger bastokka طهقانة said...

قال يعني لما المغرب ياذن الساعة 7 يبقى الناس صامت اقل من لما ياذن 8 و الناس تزقطط و تقول هيه صومنا يوم الا ساعة
و لا يمكن التوقيت الصيفي مكروه مع الصيام


اجدد حاجة شوفتها في مصر و ازبهليت منها
لما روحت اشتري كانز بيبسي دايت
و البياع قالي لو عايزاها ساقعة بكذا و لو عادية يبقى بكذا الا ربع
قلتله اشمعنى
قالي الربع جنيه تمن التبريد
(وش مبرق فقد علامات التعبير و مش فاهم حاجة)
هي دي مصر يا مراكبي

الاثنين, يوليو 26, 2010

 
Blogger candy said...

بجد رااااااائع

لسة كنت بتكلم مع حد على حتة أن حكومتنا بقت محششة دى ، بس كان الكلام على نظام التعليم.

ولو حضرتك بتقرا أهرام السبت هتلاقى عبد العظيم درويش بيأكد نفس الظاهرة.

الموضوع بقى واضح جدا !! الريحة طلعت علينا.

وموضوع التوقيت الصيفى والشتوى دا بالذات ، واحد زى صلاح منتصر صوته اتنبح وموت نفسه وياما ناس محترمة ومتخصصة فى مجال الطيران وغيرها قالت أن الموضوع دا سلبياته كتير ومالوش إجابايات خااااالص !!!

ومع ذلك ماتعرفش ليه اصرار الحكومة على الموضوع دا ؟؟؟؟

الواحد بجد مش عارف يعمل إيه مع الحكومة دى ... نفسى افجر نفسى فى مجلس الوزرا وأيد اكيد اكيد هابقى شهيدة :)

عنوان التبك عجبنى بجد
وسورى على الأطالة

الاثنين, يوليو 26, 2010

 
Blogger MR.PRESIDENT said...

اقول ايه غير قولة نجم
ياصياد الطيور يا خال صباعك علي زناد الموت

وأقول برضوا قولة بيرم
ولما عدمنا بمصر الملوك جبوك ( الأمريكان ) يا (مبارك) قعدوك
علي العرش تمثل دور الملوك
لا مصر استقلت ولا يحزنون

وعلي فكرة مش المسؤلين هما اللي بيشربوا الحشيش دا اسرائيل هيا اللي عايزة تعمل مشكلة للحكومة وتفوق الشعب شوية :))))))))))


ربك يستر يا مراكبي
وسير بينا يا مراكبي
لبر الأمان
دا لو كان فيه أصل بر
أو كان فيه أمان

يلا باي
قصدي السلام عليكو

الاثنين, يوليو 26, 2010

 
Blogger لورنس العرب said...

بالنسبة للتوقيت واللعب فيه
هما بيغيروه عشان الناس يقولوا لبعض كل سنه وانت طيب
وبالنسبه لباقي المشاكل التي ذكرتها فأحب أقول لك كل سنه وانت طيب

الاثنين, يوليو 26, 2010

 
Blogger خمسة فضفضة said...

عادي عادي
هي دي مصر يا مراكبي
بس عشان انت بتغيب عنها بتبقي مستغرب
:((

الاثنين, يوليو 26, 2010

 
Blogger سومه...مجنونه فى بلد عاقل said...

حكومه المساطيل ترحب بكم

الاثنين, يوليو 26, 2010

 
Blogger promise is promise said...

والله العظيم هم يضحك وهم يبكى بجد

وبعدين فعلا حكايه التوقيت الصيفى دى تموت من الضحك تحس ان المسؤلين عندهم شعره ساعه تروح وساعه تيجى
هههههههههههههههههه

ولا عزاء لاصحاب العقول

الثلاثاء, يوليو 27, 2010

 
Blogger reem said...

يااااااااااااه اخيرا عرفت الحشيش بيروح فين

عارف انا كنت مستغربه جدا وبسأل هو الحشيش دا مهم اوى كدا
ليه الناس مهتمة بانه قل او بقى مش موجود
وكل ما اسأل حد يقولى اه طبعا دا مهم جدا جدا ويقولو انه شئ عادى جداوان نسبه كبيرة جدا بتتعاطى الحشيش

يعنى احنا بقينا مغيبين اوى كدا ؟؟؟

التوقيت بقى دا بجد شئ يضحك
ومش فاهمة يعنى ايه ساعة بدرى الناس تفطرها ؟؟
يعنى المغرب بياذن بدرى ساعة طيب ماهو الفجر بردو هياذن بدرى ساعة

مش هى هى بردو ولا انا اللى مش فاهمة ؟؟؟

الثلاثاء, يوليو 27, 2010

 
Blogger norahaty said...

الحمد لله الف حمد وشكر:)
مشربتش لا النهاردة
ولا أى يوم تانى أشكرك
يااااااااااااااااااارب

الثلاثاء, يوليو 27, 2010

 
Blogger norahaty said...

مسئوليُنا بيعلمونا
الأدب يافندم وبيربونا
بالتعليمات اياها من
صنف قدموا الساعة
اخروا الساعة
بيربونا !

الثلاثاء, يوليو 27, 2010

 
Blogger Sally said...

بس في اوبشن في اللي بيشرب حشيش مش موجود عندهم
الا وهو
ان المحشش بيجي عليه وقت ويفوق ويوزن كلامة كدا زي الناس الكويسين

الثلاثاء, يوليو 27, 2010

 
Blogger حنين said...

مساء الخيييييييييييييييييييير
حلو البوست جدا
دائما تمتعنا
باسلوب رائع فى كتاباتك
تسلم افكارك
وعجبتنى اوى
المهم شربت حشيش النهارده
تحياتى

الثلاثاء, يوليو 27, 2010

 
Blogger فتاه من الصعيد said...

هو حد لاقيه علشان نشربه :((

لو لقيت ابقا ماتقوليش :)

مقاله ساخره موجعه

تحياتي

الثلاثاء, يوليو 27, 2010

 
Anonymous غير معرف said...

انا سمعت ان فى دول غربيه بتوزع الحشيش على المواطنين ببطاقه زى بطاقة التموين كدا وهو ده العدل الى احنا مفتقدينه هنا فى مصر ,, يعنى لو الحكومه فيها عدل هتوزع الحشيش بالحصه على كل المواطنين ومحدش يبقى احسن من حد وهما يقلوا قرارات محششه واحنا نعمل افعال محشششه ....

ولا عزاء لمصر الفرعونيه والاسلاميه

جوجو

الأربعاء, يوليو 28, 2010

 
Blogger Barracuda said...

سؤال بيخبط في راسي كل شوية: بعد كل مرة أشوف فيها ا لبلاوي دي أو اتفرج على البرامج الحوارية اللي مافيهاش غير الهم ولا حاجة تفرح، يا ترى المصريين قادرين على حكم أنفسهم فعلا؟

تحياتي

الأربعاء, يوليو 28, 2010

 
Blogger فاتيما said...

من ساعة ما اتنشر البوست
و انا اروح و آجى
اقول هلاقى تعليق مناسب اكتبه
معرفش

غير

ان ما كتبته ف التدوينة دى
اسود بس .. و دون أى عسل
للأسف

تحياتى ليك يا نبع الحكمة

الأربعاء, يوليو 28, 2010

 
Blogger Ramy said...

مش لاقى كومنت بصراحة

لنا الله يا استاذ مراكبى

تسلم ايدك (:

الأربعاء, يوليو 28, 2010

 
Blogger М€ŝЋМΣŞĦ said...

إيه البوست إللى بالألوان الطبيعية دي ؟

تصدق أنا أول مرة أسمع حوار التوقيت الشتوى فى رمضان ده ؟

وبعدين أيام عبد الناصر استخدموا التوقيت الصيفى عشان الناس تنام بدرى و توفر كهربا .. دلوقتى الناس مبقتش تنام بدرى و الحكومة بتقطع الكهربا بالليل .. يعنى يسيبولنا الساعة زى ما هى بدل ما الواحد مبقاش عارف يجمع كام على ال GMT عشان يظبط ساعته صح

الأربعاء, يوليو 28, 2010

 
Blogger أع ـقل مـ ج ـنـونــة said...

هي الحكومة بس اللى بقت محششة

دول سطلو الشعب معاهم

مبقيناش عارفين مين صح ومين غلط

واحنا فين وامتي وازاى ؟؟؟؟؟؟؟؟؟؟

بص يامراكبي ياخويا .. احنا من زمان واحنا بنقول لنا الله

والبقية ف حياتك

ومزاء الخيررررررررر " كركرركررررررركرررر" ^_^

الخميس, يوليو 29, 2010

 
Blogger كلمات من نور said...

لا وخد الخبر داه كمان : بيدرسوا تطبيق قانون غلق المحلات التجارية من السابعة مساءا ترشيدا للكهرباء .......كده بقى الكل يروح بعد 7 فعلا يحشش علشان ينسى رزقه اللي راح من 7 ل 10 او 11 والا يعمل ايه؟؟؟؟؟؟؟؟؟؟؟؟؟؟؟؟؟؟؟

الخميس, يوليو 29, 2010

 
Blogger زهرة said...

لو جت على قد الحشيش يبقى ربنا كرمنا آخر كرم ..

بس مفيش دولة هبلة بتفضل تنطط عقاربها كل شوية كدة الا إحنا ..

مرة توقيت صيفى ومرة شتوى ..

ما يمكن ساعه الكومة واقفة !

وموضوع الكهربا دة حقيقى اكتر حاجة بتنرفز .. لما الواحد يصحى الصبح على جو لا يطاق علشان الكهربا مقطوعه وترجع تقطع تانى من الساعه 8 مثلا لحد 12 بالليل

ولو مقطعتش فى الوقت دة تقطع من 1 ولحد الفجر

المهم انها لازم تقطع اكتر من مرة فى اليوم ..

واهو توفير للكهربا اللى شاحه .. واجهزة بتبوظ .. وجو لا يطاق .. وكفايه كدة :(

حلو الحشيش يا مراكبى ^_^

الخميس, يوليو 29, 2010

 
Blogger العيسوى الصغير said...

الحشيش كالماء والهواء راح الحشيش ربنا يستر فى الاتنين التانيين

الجمعة, يوليو 30, 2010

 
Blogger ادم المصري said...

باشا
والله ما ليك عليا حلفان
هههههههههههه
كل الناس متاثرين بنقص الحشيش
..
.
.
لكن في المجمل كدا كل سنه وانت طيب ورمضان كريم
وربنا رحمنا ويتوب علينا بقي

الجمعة, يوليو 30, 2010

 
Blogger Tarkieb said...

كان زمان قرش الحشيش بقرش كل حاجة غليت دلوقتى زي ما الدولار كان بسبعين قرش دلوقتى بكام؟ اما المية سبحان الله بتغلى على طول....بس انت حطيت ايدك على حاجة بجد حلوة وهي التصريحات اللي بتفقع ولكن استندارد....ومتربيين عليها ...مثلا زلزال في بلاد فيحان تلاقي تصريح بثانية من سفير مصر الفيحانى يخرج يقول المصريين في دولة فيحان بخير ....مع ان مفيش مصري بيهوب ناحية اي سفارة مصرية عشان لو حد راح بيتقالهم يا تتدفع يا تتدفع يا تتدفع وبعدها يالا ياد من هنا...

السبت, يوليو 31, 2010

 
Blogger شفـقــة و إحســــان said...

هى دى مصر ولو محصلش كده فيها مانقعدش فيها

الاثنين, أغسطس 02, 2010

 
Blogger rovy said...

أول تعليق و أول مرور ليه أستاذ أحمد
سعدت بمرورى كثيرا ..
بوست رائع و واقعى مع الاسف ..
تحياتى لك ..

الثلاثاء, أغسطس 03, 2010

 
Blogger dodda said...

هى حصلت؟؟
حشيش وسعاد؟؟
اشرب بقى
:)

الخميس, أغسطس 05, 2010

 
Blogger hend...hanady said...

تصدق انا نفسى افهم هى العالم دى شربه ايه بس قلت نظرا لانهم عندهم كتير فى جراب الحاوى فممكن ميكنش حشيش لانهم للفقرا مش مقاهم خالص

بس سؤال بغض النظر عن التوقيت اللى هيهبلنا هو ليه نرجع التوقيت تانى بعد رمضان وبعدين ب 20 يوم يرجع كما كان ده هبل ده بأه ولا ايه

ورمضان كريم ................والدنيا هتتملى مواعين

الجمعة, أغسطس 06, 2010

 
Blogger الجواز و سنينه said...

ما يحدث سيدى فى مصر
هى حاله ناتجه عن نقص الحشيش

اعرف ان يتكلموا عن نقص الغذاء نقص الدواء لكن نقص الحشيش صراحه دى جديده على اى بلد إلا لو كان هذا التقص يضر بأمن و سلامه الافراد فيها
و اظاهر ان فيه ناس كتير عايشه عليه علشان تنسى نفص المواد الغذاء و الماء و الدواء و الفساد
و عليه نطالب بزياده حصه مصر من الحشيش حتى ننسى باقى النواقص

السبت, أغسطس 07, 2010

 
Blogger mrmr said...

مادام المواطن المصرى كل يوم الصبح يجد ما لا يسره اقترح انه ما يصحاحش الصبح يصحا باليل
اعتقد ده اسلم الطرق اللى تودى فى داهيه

بالزمه ابقى لف سيجاره للواد اليتيم اللى مش لاقى ده
تحياتى يا مراكبى

السبت, أغسطس 07, 2010

 
Blogger واحد من العمال said...

السلام عليكم

حكومتنا أصلها فاضيه ومن كتر الأنجازات مش عارفه تنجز لنا أيه ولا أيه !!!
فتخبطنا توقيت صيفى وبعد شويه شتوى
وشويه ترشيد وشويه أستهبال
وكده يبقوا شغالين تمام
وكله بيشتغل كله أرزاق !!

وكل عام وأنت بخير يامراكبى

السبت, أغسطس 07, 2010

 
Blogger ليس فقيرا من يحب said...

ههههههههههههههههههه

الله عليك اسلوبك جميل جداااااااااا

وهو ده الهم اللى يضحك ويبكى

طبعا احنا اليومين دول حر حضرتك عارف محتاجين

قرار محشش جرىء من شيخ محشش جرىء

لشعب محشش مش جرىء بان صوم رمضان حرام فى الحر ده

وبناء عليه ذوى الكروش يصدرولنا قرار محشش جرىء

بان رمضان اتلغى السنه دى

احب انا الهيبرة شدددددددددددددددددددددددددددددددد بس هات نفس ينوبك ثواب لاحسن دماغى خلااااااص خرمانه

مساءك سكر

الأحد, أغسطس 08, 2010

 
Blogger SAYED SAAD said...

باش مهندس احمد القاضي
الاول كل عام وانت بالف صحة ورمضان كريم عليك وعلى الاسرة الكريمة
وعذا عن الخطأ في كتابة الاسم

انت معاك حق فعلا كأننا ماشين بالمشقلب من حال سئ لأسوأ فكرتني بمقاله جتلي على الاميل لكاتب سعودي في جريدة المدينة اسمه جميل الفارسي عنوان مقالته مصر تمرض ولكنها لا تموت
فعلا مصر المرض اشتد عليها بس انشاء الله مش هتموت
المهم بقي الحشيش تفتكر هيفرق دلوقتى

كون بخير
سيد سعد

الاثنين, أغسطس 09, 2010

 
Blogger Cinderella said...

بجد بوست فعلاً مصرى
من حد مصرى عايش قى مصر بيشرب من نيلها زى ما بيقولوا
هى دى مصر مسئوليين مجانيين
دماغهم أتسطلت من كتر الحشيش
وفعلا قال يعنى التوقيت هيفرق ما الناس هتصوم نفس عدد الساعات هى هى
بلد ليها العجب والله

الاثنين, أغسطس 09, 2010

 
Blogger Gid-Do - جدو said...

كل رمضان وانت طيب ياحمد

مصر دى كوكب لوحده لا تنطبق عليه قوانين العقل والمنطق

لم يبدء رمضان بعد وكل المحاور المرورية اصبحت محلك سر

الثلاثاء, أغسطس 10, 2010

 
Blogger koukawy said...

رمضان كريم الأول
ووحشني البلوج جداااااااااا
بس بنتي بقي ما كنتش لسسه متعوده علي الحياه الجديده
و بالنسبه لموضوع الساعه لا تعليق عشان انا صايمه

الجمعة, أغسطس 13, 2010

 

إرسال تعليق

Links to this post:

إنشاء رابط

<< Home