مفترق الطريق ... صلاح جاهين

ساعات أقوم الصبح قلبي حزين
أطل بره الباب .. ياخدني الحنين
اللي اشتريته انباع .. واللي لقيته ضاع
واللي قابلته راح .. و فات الأنين
واأرجع وأقول
لسه الطيور بتفن .. والنحليات بتطن
والطفل ضحكه يرن
مع إن .. مش كل البشر فرحانين
.
حبيبي سكر مر طعم الهوي
فرق ما بينا البين ما عدناش سوا
حرام عليك يا عذاب .. نبقي كده أغراب
دا البعد والله جرح من غير دوا
.
آدي اللي كان و آدي القدر و آدي المصير
نودع الماضي .. و حلمه الكبير
نودع الأفراح .. نودع الأشباح
راح اللي راح ماعادش فاضل كتير
.
إيه العمل في الوقت ده يا صديق
غير إننا عند إفتراق الطريق
نبص قدامنا .. على شمس أحلامنا
نلقاها بتشق السحاب الغميق
وأرجع وأقول
لسه الطيور بتفن .. والنحليات بتطن
والطفل ضحكه يرن
مع إن .. مش كل البشر فرحانين

تعليقات

‏قال غير معرف…
hi ahmed
this is good words
إيه العمل في الوقت ده يا صديق"
غير إننا عند إفتراق الطريق"
all of us feel like you
‏قال بنت القمر
يا مراكبي
توارد افكار غريب..وان كنت سبقتك بيوم..
يبدو ان الكلمات الحلوة والحيه الي مش بتموت رنت في ودننا جميعا في نفس الوقت
وكل واحد وليه اسبابه وملابساته
وفي نفترق الطريق ربنا يلهمك الطريق السليم وبكرة يكون افضل من النهارده
تحياتي
‏قال يا مراكبي
وأنا برضه بأتمنى ليكي ولكل الناس إن ربنا يلهمهم الخيار السليم لما يواجهوا مفترق طريق .. وخصوصا إنها كتير قوي فوي

أشكرك
‏قال حزينه
مش كل البشر فرحانين

حزينه
‏قال يا مراكبي
حزينة

ليه بس المود ده؟ إيه اللي وصلك للبوست القديم قوي ده؟

عموما أنا في المود ده دلوقت برضه .. هأحاول أخرج منه

المشاركات الشائعة من هذه المدونة

في الذكرى السنوية العاشرة

عايز أرقص تانجو

عيناها وشفتاها