مين قال لك إني أحقر واحد


أكتر حاجة تهزك من جوه .. لما تلاقي في الواقع تفسير لآية من آيات القرآن قدام عينيك .. وده اللي حصل لي بالظبط من أول يوم وصلت فيه للسعودية علشان الحج .. أول ما دخلت مسجد الرسول عليه الصلاة والسلام قعد قدامي حجاج مكتوب على ظهرهم بعثة الحج من كوسوفو .. واحد بس فيهم بيعرف يقرأ عربي وياعيني كلهم ملمومين حواليه علشان يسمعوه وهو بيقرأ القرآن .. وطبعا بيبصولي بانبهار علشان بأقرأ القرآن بسلاسة .. فحمدت ربنا على النعمة العظيمة دي
.
بعدها بشوية رحنا نزور مسجد قباء لقيت بعثة الحج بتاعة كندا وأمريكا .. رحت جبل أحد لقيت ناس من الشيشان .. رحت المسجد الحرام شوفت في الطواف ناس من الصين وكازاخستان ونيجيريا والسنغال .. وكالعادة .. واحد بس بيعرف عربي وبيدعي في الطواف والباقيين بيرددوا وراه .. كلمة كلمة .. وحرف حرف
.
شفت ناس جاية من كل حتة في أفريقيا وأوروبا وآسيا والأمريكتين .. يعني من كل حتة في العالم .. فلقيت نفسي لاإراديا بأفتكر الآية القرآنية العظيمة دي من سورة الحج


وده لأني شفت على الطبيعة إن فعلا الناس دي كلها جايه من كل فج عميق .. ومن بلاد ما نتخيلش إن فيها ناس ممكن تفكر تيجي تحج .. أو إن فيها مسلمين أصلا .. وتفسير الآية إن ربنا سبحانه وتعالى أمر سيدنا إبراهيم إنه يبني الكعبة وبعد ما خلص البناء .. ربنا أمره إنه يطلع فوق جبل ويدعو الناس للحج .. طبعا ما كانش فيه حد في المنطقة دي ولا كان يمكن إن سيدنا إبراهيم يوصل صوته لأي حد .. لكن ربنا سبحانه وتعالى قال له .. إنت عليك الدعوة بالحج .. وأنا عليا البلاغ للناس .. ومن ساعتها وربنا بيبلغ كل الخلق وبييجوا يحجوا من كل مكان بعيد .. وبيقولوا لبيك اللهم لبيك .. يعني بيلبوا دعوة ربنا سبحانه وتعالى
.
طيب ليه الناس دي كلها جت من الأماكن الغريبة البعيدة دي ودفعت فلوس كتيرة وسابت أولادها ومصالحها وكل حاجة؟ على طول جت في دماغي آية تانية من سورة إبراهيم بتقول


ده اللي فعلا حسيت بيه .. إن قلوبنا بتهوي للأماكن العظيمة دي .. قلوبنا بتتحدف حدف على هناك .. ودي لوحدها نعمة كبيرة من ربنا سبحانه وتعالى .. ده غير الخير الوفير اللي لاقيته في البلاد دي .. وحجم المنشآت المهول اللي شفته هناك .. ودي إستجابة ربنا لدعوة سيدنا إبراهيم اللي موجودة في الآية الكريمة دي
.
وطبعا في وسط الجمع الرهيب المتنوع ده من الناس .. ممكن تلاقي الغني والفقير .. القوي والضعيف .. لكن الحج لازم يساوي بين الكل .. والأفضلية بتكون للأتقى .. إن أكرمكم عند الله أتقاكم .. لكن تلاقي لسة فيه ناس بتتأفف من الفقراء أو اللي أقل في المستوي .. وده غريب جدا .. إذا كان ربنا سبحانه وتعالى رضي إن الراجل الفقير ده يبقى عبد ليه زيه زيك .. تيجي إنت ما ترضاش بيه أخ ليك في دين الله؟ هو ده التكبر اللي خلى إبليس ما يسجدش لآدم لأنه مقتنع إنه أحسن منه .. وده الطبع اللي لسة موجود بيننا لحد دلوقت
.
مرة واحد عمل ذنب وراح لشيخ علشان ينصحه إزاي يكفر عن ذنبه ده .. فنصحه الشيخ إنه يدور على أحقر واحد في المدينة ويبوس رأسه .. مشي الراجل وقعد يدور ويدور.. لحد ما لقي راجل شكله مبهدل وفقير جدا .. جري عليه وراح باس رأسه .. رفع الراجل الفقير رأسه وقال له .. مين قال لك إني أحقر واحد في المدينة؟ بوس رأس نفسك .. إنت اللي أحقر واحد في المدينة .. علشان دايما فاكر إن فيه حد أقل منك .. يا متكبر
.
خلونا نتعلم من الموضوع ده درس مهم .. وهو إن ما حدش يفتكر إنه هو أحسن واحد .. إيش عرفك إن إنت أحسن واحد؟ أو إنك أحسن من زميلك ده؟ مش يمكن اللي إنت فاكره أقل منك ده .. يكون عند ربنا أحسن منك مليون مرة؟ وبعدين الأهم من ده كمان إن أصلا ربنا خلقنا كلنا مكملين لبعض .. محتاجين لبعض .. كأننا جسم واحد .. مايهمش إذا كنت أنا الجزمة اللي في قدم الجسم ده .. وإنت الإيدين بتاعة الجسم ده .. وصاحبنا التاني هو الرأس بتاعة الجسم ده .. المهم إن كلنا مكملين لبعض .. وفي الأول والآخر .. إن أكرمكم عند الله أتقاكم
.
طبعا الكلام ده مش كله من تأليفي .. لكني اقتبست بعضه من عدة محاضرات سمعتها أثناء الحج من الشيخ مدحت .. وهأبقى أعرفكم عليه في بوست تاني إن شاء الله .. وللحديث بقية

تعليقات

‏قال hebaz
جزاك الله خيرا بجد
عارف أنا بحس بخجل من نفسى لما بشوف ناس من جنسيات أخرى أد أيه بتتحمل مشقة الحج أو مشقة تعلم اللغة العربية أو حفظ القران و تجويدة و أحنا الى ربنا هدانا بهدايا و عطايات كثيرة ولا فارق معانا و لا بنحاول نعمل مجهود إلا أقل القليل!
لدرجة أن الدين عندنا بأة تهمة او شىء يدعوا البعض للنفور!!!
بس برضة حرجع و أقول أنى لما بقابل كل من اتى من فج عميق ليعمل عمل فى سبيل الله و السلام او يبذل مجهود لله بحس بقوة و شحن رهيب و انى لازم أبقى أحسن من كدة بكتير ده أحنا وجب علينا مساعدة المسلمين و غير المسلمين لأن ما عطانا الله من لغة و اسلام من دون مجهود من جانبنا ما هو إلا مسئولية كبيرة سنسأل عنها يوم الدين
ربنا لا تزغ قلوبنا بعد أذ هديتنا
معلش طولت
تحياتى
‏قال mariam
طبعا حاجة عظيمه انك تشوف آيات ربنا بتتحقق ادامك. سبحان الله فعلا الناس مستعده تروح تحج من اى مكان فى الارض.
بالنسبه بقى لموضوع التكبر فحاجة غريبه فعلا ان الناس تتكبر على بعض، مع ان ربنا ساوى بين الناس كلها.
يعنى نفسى اعرف ايه شعور حد لما يحس انه احسن من حد تانى. مع ان كل واحد فينا له ميزه، يعنى لو انا كويسه فى حاجه. اكيد انت احسن منى فى حاجة تانيه.
اساسا الانسان اللى شايف نفسه احسن من كل الناس يبقى مريض
تحياتى
‏قال غير معرف…
حمدا لله على سلامتك
وحج مبرور وذنب مغفور باذن الله
وتقبل الله طاعتكم

ازيك كدة؟
‏قال zordeak
حمد الله عالسلامة يا مراكبى


تقبل الله منك

يا بختك بجد .., كلنا نفسنا كنا نبقى فى الرحلة العظيمة دى ..


أعظم رحلة فى حياة البنى ادم


يا رب اوعدنا يا رب
‏قال No Fear
السلام عليكم
أنا كنت عاوز أكتب تعليق كبير بصراحة قلت أختصر و أقول علي النقطتين

سبحان الله
حمد الله على السلامة يا مراكبى
حج مبرور وعقبال العوده
بس احنا عايزين سبحة و ماء زمزم
‏قال يا مراكبي
hebaz

إعتبري البلوج كله بتاعك وطولي زي ما إنتي عايزة .. كلامك كله رائع

عندي إتنين صحابي مسلمين .. واحد أمريكي وواحد إيطالي وفعلا هما تعبانين جدا في فهم الدين بسبب حاجز اللغة .. إحنا في نعمة كبيرة ولا إحنا داريانين خالص
‏قال يا مراكبي
mano

التكبر على الآخرين ده مرض فعلا بس للأسف موجود جوه أغلب الناس بدرجات متفاوتة .. حتى أنا مش بأنجو منه أحيانا .. لكن لازم نحاول كلنا إننا نعود نفسنا إننا ما نحقرش أي حد في أي مكان .. وإلا بنكون بنغرف من الذنوب غرف من غير ما ناخد بالنا
‏قال يا مراكبي
شهروزة

الله يسلمك وعقبالك إن شاء الله

أنا كويس والحمد لله .. فضل من الله ونعمة
‏قال يا مراكبي
zordeak

متشكر على زيارتك يا دكتور .. وإن شاء الله ربنا يكتب لك الحج قريب .. أنا سافرت كتير جدا لكن فعلا زي ما إنت قلت السفرية دي أعظم سفرية في حياتي على الإطلاق
‏قال يا مراكبي
No Fear

إعتبر البيت بيتك وإكتب كتير زي ما إنت عايز في أي وقت .. لكن إنت برضة أعجزت فأوجزت لما قلت .. سبحان الله
‏قال يا مراكبي
pegasuselmasry

متشكر كتير .. بس مش فاضل معايا غير الطواقي والمسواك .. يمشي معاك؟
‏قال samvet
روحانياتك رائعة
واسلوبك فى الكلام جميل بارك الله فيك
وتقبل منك حجك

وفلا الحج مش عبارة عن مناسك وحركات وكلمات
انما فيه دروس وعبر ترسخ فى العقول لمدى الحياة
وجزاكم الله خيرا
‏قال يا مراكبي
mansourawy

متشكر كتير على الإطراء يا دكتور .. فعلا إحنا محتاجين نعرف إيه المغزي الروحي من أي عبادة أو مناسك أكتر من تنفيذها كحركات وخلاص

وأنا هناك الناس كانت مثلا بتسألني .. هو صح كدة لما طولوا الشاخص بتاع الجمرات؟ هو صح كده لما نسعى بين الصفا والمروة في الطابق التاني أو التالت بعني مش على الجبل نفسه تحت؟ ودي كلها أسئلة بتدل على تركيزهم في الحركات والأماكن أكتر من الغرض الروحي لإحياء السنن وتذكر المواقف تقربا من الله
‏قال Ahmed Shokeir
مافيش فعلا اجمل من إن الواحد يلاقي تفسير للىيات القرانية على ارض الوقع وغن الانسان يقدر يربط بين الواقع وبينها
‏قال يا مراكبي
ahmed skheir

كلامك مظبوط .. دايما منورني يا حاج .. ما إحنا دفعة 1427 هجرية سوا .. ربنا يوعدنا كمان وكمان
‏قال frozen love
معاك للاخر..وده مبداي اصلا...فعلا انا بتعامل اني جزء من المجتمع..وده سر نجاح الشعوب التانية...وبالنسبة للحج فده معجزة الهية اني ربنا يضع حب البيت في قلوب الناس
‏قال يا مراكبي
frozen love

أحييك على إنك بدأت بنفسك في تطبيق المبدأ ده .. وياريت كمان تحاول تنشر المبدأ ده بين أصحابك ومعارفك في المرحلة التانية
‏قال Unknown
أحسبك ولا أزكيك على الله أن هذه علامات قبول الحج وأسأل الله تعالي ألا يزيغ قلبك بعد إذا هداك ويهب لك من لدنه رحمه أنه هو الوهاب ، وربنا يجمعنا في مستقر رحمته
‏قال يا مراكبي
أحمد عبد العزيز / عابر سبيل

أدعو الله عز وجل أن نكون كما تظن .. وجزاك الله خير الجزاء
‏قال Tamer Nabil Moussa
الحمد الله على نعمة الاسلام


اشكرك المقال الاكثر من رائع


تحياتى
‏قال يا مراكبي
tamer

طبعا نعمة الإسلام أفضل نعمة منحها لينا ربنا سبحانه وتعالى .. شكرا على متابعتك
جزاك الله خيرا

على الموضوع القيم


تحياتى
‏قال يا مراكبي
ana mean

أشكرك كتير على زيارتك .. بس على فكرة .. إنت ميييين؟
‏قال علي الالفي
الف مبروك و ربنا يتقبل منك
و سبحان الله فعلا من كل فج عميق
المهم يا سيدي تكون رجعت بذنب مغفور ان شاء الله
‏قال يا مراكبي
tafaseel

أهلا بمطرب بورسعيد اللي كل المدونين بيتكلموا عنه وأنا نش عارف أتحصل على ولا أغنية ليه علشان أسمعها

أتمنى ن ربنا سبحانه يكون غفر لنا الذنوب وعقبالك
‏قال Hannoda
كنت فاكرة اني ما فيش جواي رة تكبر وكنت بحمد بنا دايما على كده

لكن لما قريت البوست حسيت اني موهومة و اني فعلا متكبرة

بس برضه حمدت ربنا اني قادرة اقرى و اسمع و استوعب و احس باخطائي

نفسي اشوف الحجاز و مسجد الرسول و كل الناس اللي بتتكلم عنهم دول
‏قال يا مراكبي
Hannoda

وأنا كمان برضه لسه فيا جزء من الكبر .. برغم إني أنا اللي كاتب البوست ده ومقتنع بيه

ربنا يعافينا جميعا وياريت تنوي وتيجي ولو عمرة .. حقيقي هتتغير حياتك تماما

المشاركات الشائعة من هذه المدونة

في الذكرى السنوية العاشرة

عايز أرقص تانجو

عيناها وشفتاها