شد القلوع يا مراكبي ... مافيش رجوع يا مراكبي

السبت، يناير 13، 2007

إحنا بس بنهدي النفوس

من كام سنة كنت مسافر لأوروبا والدول المتقدمة اللي بيقدموا فيها مع الكباب طحينة .. كانت زيارة عمل .. وكان معايا مهندس زميلي صرماح الطباع .. يعني بيحب الصرمحة .. كل شوية يسيبني ويروح يتصرمح طول النهار وأقابلة ساعة الأكل بس بالليل .. ومش عايز أغتابه بقى كفاية كدة .. المهم قبل السفر بيوم لقيته قالب عليا الدنيا وأول ما شافني قال لي
.
صرماح: إلحقني يا مراكبي .. إلحقني
المراكبي: فيه إيه؟ خير
صرماح: مصيبة .. جواز السفر ضاع مني ومش لاقيه
المراكبي: نعم؟ إنت بتستهبل؟ ده إحنا مسافرين بكرة
صرماح: إنت هاتبستفني .. المهم قول لي .. أعمل إيه؟
المراكبي: نعمل إيه .. نعمل إيه .. آه .. جاتلي فكرة
صرماح: إلحقني بيها الله يخليك
المراكبي: إنت تروح تلف كل الأماكن اللي إتصرمحت فيها إمبارح والنهاردة وتسأل على جواز السفر .. جايز يكون حد لقاه وسلمه للأمانات
صرماح: ماشي .. وإنت هاتعمل إيه؟
المراكبي: أنا بقى هأتصل بسفارتنا وأشوف إيه الحل لو مالاقيناش جواز السفر لا قدر الله
صرماح: ماشي .. سلام .. ادعي لي
المراكبي: ياللا .. ربنا معاك
.
وطبعا في أوروبا والدول المتقدمة بيكون فيه في الفنادق مكاتب استعلامات تقدر منها تعرف كل حاجه حتى لو عايز تعرف القرد مخبي أولاده فين .. رحت لقيت واد حليوة شبه ليوناردو دي كابريو بتاع فيلم إسماعيل ياسين في المحيط .. قاعد على مكتب فخم مكتوب عليه .. نساعدك في أي شيء .. قربت منه وسألته
.
المراكبي: هاللو سير
دي كابريو: مساء الفل يا عسل .. إتفضل شد كرسي وأقعد
المراكبي: ميرسي بيكو .. عندنا مشكلة يا باشا .. واحد صاحبي ضاع منه جواز سفره ومش عارفين إيه الإجراءات في الحالة دي .. أصل إحنا مسافرين بكرة
دي كابريو: دي حاجة بسيطة جدا .. هو صاحبك ده جنسيته إيه يا هندسة؟
المراكبي: إحنا المصريين أهمه .. إيجيبشيان يعني
دي كابريو: آه .. مصريين .. شوف بقى يا فللي .. إنت عليك وعلى سفارتكوا .. ماليكش حل عندي
المراكبي: طيب بليز .. ممكن تدلني على تليفوناتهم؟
دي كابريو: طبعا .. رقبتي .. الأرقام أهي .. وكمان التليفون أهه .. مساء الخييير
.
طلبت السفارة .. لسة هأقول ألو .. لقيت صوت واحدة الخالق الناطق تحية كاريوكا وهي بتهزأ عبد الوارث عسر في فيلم شباب إمرأة .. وشي إصفر وبلعت ريقي وقلت
.
المراكبي: ألو
تحية: ألو .. نعم
المراكبي: لو سمحتي حضرتك .. فيه عندنا مشكلة .. واحد صاحبي ضاع منه جواز سفره ومش عارفين إيه الإجراءات في الحالة دي .. أصل إحنا مسافرين بكرة
تحية: وصاحبك ده ما عندوش لسان يتكلم .. إنت بتتكلم بالنيابة عنه ليه؟
المراكبي: حضرتك هو راح يدور على جواز السفر .. وأنا قلت أستغل الوقت وأعرف إيه الإجراءات احتياطي يعني
تحية: وهو يعني مش عارف ياخد باله من حاجته؟
المراكبي: حضرتك ده من ضغط الشغل وكده يعني .. المهم فيه حل؟
تحية: آه فيه .. خليه ييجي عندنا وإحنا نعمل شوية إجراءات ونطلع له وثيقة سفر يسافر بيها مادام ما فيش وقت يطلع فيه جواز سفر جديد
المراكبي: متشكرين حضرتك
.
قفلت السكة وأنا بأشتم في صاحبي طبعا .. وليوناردو دي كابريو قاعد مبتسم ليا وكأنه فاهم الحوار اللي دار بيني وبين تحية .. المهم ربنا ستر وصاحبي لقي جواز السفر في مول من المولات .. لكن إيه اللي فكرني بالحكاية دي؟ هأقول لكم ليه .. قريت في جريدة الأخبار في عدد يوم 2 يناير 2007 في صفحة 14 مقالة بعنوان .. دكتور مفيد شهاب غاضبا ..منشورة هنا كمان .. وكان ملخصها إن الدكتور مفيد شهاب كان رئيس بعثة الحج المصرية الرسمية .. إضطرإنه يتخانق مع السفير المصري هناك علشان السفارة ما ساعدتش البعثة دي في تسهيل حركتها في الحج لدرجة إن دكتور مفيد تاه في منى وما عرفش يوصل الخيام وتعب وقعد على الأرض .. وده مين؟ وزير .. ورئيس البعثة المصرية
.
الغريبة بقى إن السفير يرد ويقول إيه .. إن القرار الجمهوري بتشكيل البعثة ما وصلوش رسمي .. رغم إنه سمع عنها في الجرايد طبعا .. لكن حجته إنه لازم يوصله قرار رسمي علشان يقدر يخاطب السلطات السعودية .. وهنا بقى الكلام .. يعني لو أي مصري حصل ليه أي حاجة برة مصر .. السفير هايستنى قرار رسمي علشان يساعده؟ دي حاجة مطمئنة جدا جدا .. ده أنا بأحمد ربنا وأبوس رجلي وش وظهر إني حجيت تبع بعثة دولة تانية وكانوا شايلينا على كفوف الراحة
.
إوعى حد يقلق ولا حاجة .. إحنا بس بنهدي النفوس .. وأهو الوزير عاملوه زي صاحبي إياه بالظبط .. منتهى المساواة يا إخواننا .. إطمننوا

التسميات: ,

46 Comments:

Blogger مُزمُز said...

هههههههههههههههههههههههههههه

ده إيه البوست المسخرة ده أنا وقعت من كتر الضحك وانت بتحكي عن دي كابريو بتاع فيلم إسماعيل ياسين وللا وانت بتحكي عن تحية كاريوكا
هههههه

بس سيبك ده معناه إن مصر مفيهاش محسوبية وللا تفضيل بسبب المناصب يعني بدل ماتتريق تقدم شكر للدولة والنظام العادل بدل ما انتوا بتتلككوا دايما كده يا بتوع المعارضة

بس كويس إنك رجعت بالسلامة وماحصللكش حاجة هناك وإللا كنت تلاقي نفسك تايه كده

الأحد, يناير 14, 2007

 
Blogger مُزمُز said...

آه صحيح نسيت أعبر عن سعادي بإني أول معلق على الموضوع بكده دي تكون المرة الأولى ليا في التاريخ الكوني للتعليق اللي أعلق فيها أول واحد عند أي حد وشوف الصدف جت فيك انت يللا يا عم شفت الشرف اللي نلته
هههه
سلااام

الأحد, يناير 14, 2007

 
Blogger tah2an said...

مهازل السفارت المصرية على مدار الكرة الارضية لا تنتهي

والواحد له ذكريات أليمة مع كل سفارة !!!

مش عارف ليه افتكرت فيلم جائنا البيان التالي

وحسبنا الله ونعم والوكيل

الأحد, يناير 14, 2007

 
Blogger أُكتب بالرصاص said...

مصدقك والهل يا مراكبي
من غير حلفان

في سفارة بلدك ..بيعاملوك كأجنبي حتى يثبت العكس
وان ثبت العكس
ليلتك مش فايتة

مصريتنا وطنيتنا
حماها الله
الله
الله

الأحد, يناير 14, 2007

 
Anonymous كبير المتشردين said...

تصدق حظك حلو بجد انك بتقف في ناس محترمة دي طلعت زوق يا راجل احمد ربنا غيرك بيروح السفارة بيقوله اصل احنا اجازة في مصر عيد الثورة بيروح يجي تاني يوم يقلوله اصل المسئول امه ماتت بعد ما رجع من العزا كان عيد الفلاحومش بالادب العالي الي كلمتك بيه لا ده باسلوب احسن من كده بكتير انت عايز يا عم انت انت ايه الي جايبك هنا يا اخ

الأحد, يناير 14, 2007

 
Blogger tamer said...

اصعب حاجة هنا فى مصر الروتين


مخلى صورتنا زى الزفت

تنفذ القانون جميل لكن ربنا مدينا عقل وفية حاجة اسمها روح القانون

شكر على البوست

تحياتى

الأحد, يناير 14, 2007

 
Blogger يا مراكبي said...

مزمز

معارضة مين ياعم؟ إنت هتلبسني تهمة ولا إية؟ ده أنا حتى بحب النظام جدا جدا جدا

طبعا الحمد لله إني رجعت سليم ولو إني ما كنتش عايز أرجع من هناك أصلا

الأحد, يناير 14, 2007

 
Blogger يا مراكبي said...

مزمز تاني

يادي الهنا يادي الهنا .. أحلى من الشرف مافيش

الأحد, يناير 14, 2007

 
Blogger يا مراكبي said...

tah2an

إنت طقهان برضه؟ أهلا بيك .. منورنا

أنا بقى إفتكرت فيلم العار

ياللا .. مستنيين إصدار البلوج بتاعك

الأحد, يناير 14, 2007

 
Blogger يا مراكبي said...

أُكتب بالرصاص

أيوة والله مظبوط .. ده حتى بيحصل كده برضه في سفارة مصر اللي في الجيزة

الأحد, يناير 14, 2007

 
Blogger يا مراكبي said...

كبير المتشردين

أنا في الحقيقة حاولت ما أقولش اللي حصل بالظبط لحسن الحكومة تتضايق مني ولا حاجة .. زي ما عادل إمام قال في مسرحية شاهد ما شافش حاجة: سيد بيه قشطة لحسن يطلع قريبكم ولا حاجة

الأحد, يناير 14, 2007

 
Blogger يا مراكبي said...

tamer

الحقيقة أنا لما باروح أي سفارة لينا برة بحس على طول إني في مجمع التحرير .. باشم ريحة الوطن على طول .. شامم الريحة؟

الأحد, يناير 14, 2007

 
Blogger mano said...

دة شىء متوقع من سفارتنا المبجله فى اى مكان
بس بجد ضحكت من قلبى
و الحمد لله طلع فى مساواه
انا كده اطمنت على مستقبل البلد

الأحد, يناير 14, 2007

 
Blogger هانى said...

هيا دى مصر

ولو قولت لاا انا مصمم

هيا دى مصر

حتة شوف رد اللى البت اللى فى السفارة رد دبلوماسى فعلاا

الله يخربت الكوسة هيا اللى جيبنا وراء

الأحد, يناير 14, 2007

 
Blogger يا مراكبي said...

mano

لا ما تقلقيش وإطمني على مستقبل البلد قوي .. أنا ما مشيتش منها إلا لما إطمنت إنها في أيدي أمينة

الأحد, يناير 14, 2007

 
Blogger يا مراكبي said...

هاني

أهلا بيك .. هي الكوسة بس اللي جابتنا ورا؟ ده البصل دخل في الموضوع كمان اليومين دول

الأحد, يناير 14, 2007

 
Blogger YASSER said...

فعلا عندك حق السفارات المصريه هى استمرار لمعاناه المواطن المصرى لأن الدوله ماهانش عليها ان اللى هرب من مصر يفقد لذة المرمطه والاهانه وبعدين علشان ماتعيشى فى الدور وتنسى نفسك يعنى اعتبرها تطعيم ضد الكرامه علشان لما ترجع بلدك الصدمه تكون هينه

الاثنين, يناير 15, 2007

 
Blogger Carmen said...

هيا دى مصر يا مراكبى

الانسان فيها دايما مواطن من الدرجة ال14

حتى وهو براها



هى دى اول زيارة ليا للمدونة


بس حلوة قوى

الاثنين, يناير 15, 2007

 
Blogger Memo said...

ههههههههههههههههه
هههههههههههه
حتي الوزير المصري يا ربي
اجراءات و بلاوي زرقه
حسبنا الله ونعم الوكيل

الثلاثاء, يناير 16, 2007

 
Blogger يا مراكبي said...

To all my friends who visited me, I am still in Dubai and I can not reply in Arabic language. I will be back soon, thanks for all visitors.

Translation (targama:

Ela kol elasdeka2 elly zarony, ana lessa fe dubai we mesh 2ader arod bel3araby, en shaa allah harga3 2orayeb we shokran lekol elzowar.

الثلاثاء, يناير 16, 2007

 
Blogger Sampateek said...

اللي ليه ضهر متضربش على اسكرفه
او اللي ليه شراع ميتضربش على مركبه

عادي في المعادي
و سفاح المعادي
و يا رب يا هادي


تحياتي

الثلاثاء, يناير 16, 2007

 
Blogger يا مراكبي said...

yasser

أيوة .. مهم قوي التطعيم ضد الكرامة ده علشان لما الواحد يرجع تاني يقدر يعيش ويرجع ياخد على قفاه بصدر أو بقفا رحب

مش إنت كنت ياسر وأصغر من كده؟ مرة واحدة لقيتك بقيت أبومحمد وعندك 250 سنة .. وليه واقف على تاني بوست من ساعتها؟

عموما .. دايما منورني ومشرفني

الأربعاء, يناير 17, 2007

 
Blogger يا مراكبي said...

Carmen / Marwa

أهلا بيكي وشكرا لإضافتي عندك .. دي ثقة كبيرة .. ويشرفني متابعتك طبعا

أنا ولله الحمد أسوأ معاملة إتعاملتها لحد دلوقت هي من الدرجة الخامسة وما وصلتش للدرجة 14 دي .. لكن مسيري أوصل لها قريب

نورتيني

الأربعاء, يناير 17, 2007

 
Blogger يا مراكبي said...

memo

أهلا بيكي

إنتي عارفة موقف الوزير والسفير ده مخلي شكلنا وحش قدام الجنسيات التانية ولما يحصل أي لخبطة في أي حتة على طول يقولوا .. شوفوا .. زي الحكومة المصرية بالظبط .. يعني بقينا مثل يحتذي بيه بسم الله ما شاء الله

الأربعاء, يناير 17, 2007

 
Blogger يا مراكبي said...

Sampateek

لأ مش معقول .. أنا قعدت أقول مين سمباتيك دي .. دي واحدة مدونة جديدة ولا إيه؟ طلعت كلبوزة هانم شخصيا .. حمد الله عالسلامة ومبروك تصليح البلوج

الإسم ده نيولوك بتاع أول يناير برضة؟

ممكن بس تقوليلي اسكرفه دي تبقى أنهي حتة في الجسم؟

أهلا بيكي وشرفتينا

الأربعاء, يناير 17, 2007

 
Blogger أبو محمد said...

والله ياعم مراكبى أنا ماغيرتش الا اسمى من ياسر لأبو محمد ولما لاقيت سنة الميلاد اختياريه قلت الغيها بدل ماكل شويه عداد عمرى يزيد قدام عينى ولسه شايف حكاية ال 250 سنه بعد ماانت الله يسترك قولتيلى عليها يمكن المسئولين عن البلوج شايفين كده وجايز علشان ماكنتش فاضى بعد تانى بلوج افتكرونى اتحنطت وبقيت موميا

الأربعاء, يناير 17, 2007

 
Blogger شــهــروزة said...

هههههههههههه
مستغرب لية يا مراكبى؟؟
العجيبة فعلا لو حصل العكس

اذا كان المصرى مالوش قيمة فى بلده ولا مكاتب وسفارات وملاحق وقنصليات بلده
منتظرين يبقا له قيمة فيييين؟؟

اللى يجننك يا جدع
ان ولاد المفكوكة بيقبضوا مرتباتهم دى من جيوبنا احنا
ومع ذلك
زى القطط
ولا بحمد ولا بجميل
طيب كويس ان طلعتلك تحية كاريوكا

أنا كنت باخلص ورق فى العباسية بالقاهرة
بتاعت الشئون المالية اللى مفروض باتنقل لقطاع تانى واخلى طرفى من عندهم عملتلى زى زوزو حمدى الحكيم
مش تحية كاريوكا؟؟
لحد ما اضطريت ارفع صوتى لزاهى بذات نفسه

بوس ايدك انها طلعت كاريوكا
نياااهااااهاااااااا

الأربعاء, يناير 17, 2007

 
Blogger يا مراكبي said...

شهروزة

إنتي طلع لك زوزو حمدي الحكيم؟ لأ ده أنا محظوظ بقى .. تحية كاريوكا أرحم طبعا .. أنا أعرف سفارات بلاد تانية بيطلع لهم في سفاراتهم حاجات زي الباشمهندسة نانسي عجرم .. أيوه الله حظوظ

أما الحاجة الأهم اللي إنت قولتيها فهي إن إحنا اللي بندفع مرتبات الموظفين .. مرة واحد صاحبي فرنساوي شد في الكلام مع ظابط هناك في مرسيليا .. راح صاحبي زعق له وقال له .. إنت عارف أنا مين؟ أنا مواطن دافع للضرائب .. يعني إنت والحكومة بتاعتك دي كلها مرتباتها من جيبي أنا واللي زييي

أيوة والله قال له كدة .. بس بالفرنساوي

الخميس, يناير 18, 2007

 
Blogger Human said...

ههههههههههههه
لا ماتخفش احنا مطمنين على الآاااااااااخر
إن شاء الله هنشتغل وعايزة اتجوز هتتجوز ولو سافرنا برا هيشيلونا من على الارض شيل ( مش عشان يرمونا فى المحيط طبعا ) .... يا مراكبى إنت بس كفاية تتكلم مع حد اجنبى على النت وتقوله إنك مصرى وتشوف تعليقاته او خلفيته عن بلدك عاملة ازاى
ولا فاكر مجموعة الشباب بتوع جامعة المنصورة اللى محدش عبرهم وتاهو وقالوا عليهم ارهابيين .. ولا الاتنين رجال الاعمال اللى اتقبض عليهم فى اليابان تقريباً ومحدش عبرهم
عادى يعنى
إلا صحيح دى كابريو ده عرف عربى منين ؟ يا هندسة

نستنى اقول إن دى اول مرة ادخل هنا وبجد ما شاء الله مدونتك جميلة
سلام عليكم

الخميس, يناير 18, 2007

 
Blogger mansourawy said...

بصراحة الموضوع تحفه
مقدرتش امسك نفسى من الضحك
اخويا نايم جمبى وبيقول ايه الهبل ده
كسفتنى يراجل
المهم ملخص كلامك
تحية اللى اكلمت عنها موجودة ف كل مكان ف المصالح الحكومية
والروتين مضيعنا كلنا
اما بخصوص الوزير الموقور ففعلا تعب بصراحة بس اكيد معدتش هتكرر تانى
قصدى
هيسافر بعد كدا تبع الدولة العربية اللى انتى خرجت تبعها
متنساش تقوله عليها
سلامى وتحياتى

الخميس, يناير 18, 2007

 
Blogger الوردة السوداء said...

عادى
هى دى بلدنا
دايما مستهترة بينا
تقول ايه ياعم عبده
اقول حسبى الله ونعم الوكيل

الخميس, يناير 18, 2007

 
Anonymous sampateek said...

الاسكرف في الزمخشري يعني القفا
لامؤخذة
و دمتتم

الخميس, يناير 18, 2007

 
Blogger raspoutine said...

انت عارف يا مراكبى
انا سافرت مع والدى اماكن كتير بره مصر وانت دلوقتى فكرتنى بموقف مشابه لموقف صاحبك والدى الجواز بتاعه اتسرق من شقته واتسرق معاه كمان مبلغ واللى سرقه واحد يعرف والدى ومصرى
المهم الوالد راح يطلع باسبور من القنصليه بتاعتنا هناك وغلبو على ماطلع جواز سفر تانى والدى ساعتها كان زعلان جدا ومتنرفز ازاى المصرى يتهان كده والدى قالى ان الجواز الاخضر المصرى ايام البعينات كنت تروح بيه اى دوله وانت حاطط رجل على رجل كان ليه هيبه هيبه وطن وشعب وريس وابطال واقفين على الجبهه
عشان كده كانت الدول الاوربيه قبل العربيه بيحترمونا وسفارتنا كانت بتخدمنا لكن دلوقتى لاعاد فى بطولات ولا ابطال ولا شعب ولا ريس ولا حكومه مبقاش فى غير كباريهات شارع الهرم اللى فتحه ابوابها للعرب اربع وعشرين ساعه قيمتنا وهيبتنا قلت يا مراكبى والله قلت بره وجوة

الخميس, يناير 18, 2007

 
Blogger يا مراكبي said...

human

أولا شكرا ليكي على زيارتك ومجاملتك الظريفة وأهلا بيكي دايما

ومن غير ما أخش على النت ولا حاجة .. طبعا أنا بحكم مجال عملي أعرف أجانب أكتر من المصريين وعارف رأي الفرنجة فينا كويس .. لكن علشان ربنا أنعم عليا بنعمة التفوق في مجال عملي تلاقيهم مش مصدقين إن أنا من مصر بجد .. تخيلي .. مع إني باين عليا جدا

وطبعا مش هتصدقيني إن دي كابريو ده كان من أصل عربي .. أصل البلد اللي زرتها دي فيها كل جنسيات الدنيا وعرب كتير

نورتيني وبالتوفيق

الخميس, يناير 18, 2007

 
Blogger يا مراكبي said...

mansourawy

شرفتني والله يا دكتور ومتشكر كتير إنك ضفتني عندك .. وياريت تقدم إعتذاري لأخوك العزيز

وبعدين يا ريتها كانت تحية كاريوكا لما كانت بتكلم شكري سرحان .. دي لما كانت بتكلم عبد الوارث عسر .. والفرق مفهوم طبعا

وبالنسبة للدولة اللي طلعت معاهم فهي مش سر .. الكويت .. ومستوى الخدمة والإهتمام عايز بوست لوحده لأنك مش هاتصدق هما بيقدموا خدمات قد إيه .. وبنص السعر اللي في مصر

الخميس, يناير 18, 2007

 
Blogger يا مراكبي said...

الوردة السودة

أسوأ حاجة إن ده بقى العادي .. كنت بأكلم والدي النهاردة قعد يحكيلي على حاجات كتير زي كدة وفي الآخر قال لي .. إوعى ترجع .. تخيلي

شرفتيني بزيارتك

الخميس, يناير 18, 2007

 
Blogger يا مراكبي said...

raspoutine

أيوة كان لينا هيبة لما كان لينا موقف .. زي أي دولة لسة ليها موقف دلوقت .. والحدق يفهم

أشكرك على زيارتك .. نورتني

الخميس, يناير 18, 2007

 
Blogger Carmen said...

اشكرك يا مراكبى


وربنا ما يبتليك بمعاملة الدرجة ال14 كفاية ال6

الجمعة, يناير 19, 2007

 
Blogger No Fear said...

السلام عليكم
مبروك الدوري

متضايقش خالص المصري في بلده مهان هيكون بره متكرم و خصوصا لو عرفت أن الناس بتشتغل في السلك الدبلوماسي دلوقتي بإختبارات الله أعلم مين اللي بيحطها.

يعني مش فارق معهم المصريين المغتربيين اللي هم أصلا بيشتغلوا علشان يساعدوهم
ياسيدي جت علي دي يعني
سلام

الجمعة, يناير 19, 2007

 
Blogger Amira said...

اكيد الخواجة فهم

ولا مش عارف الكلام

كفاية السمعة

انت تتحدث مع السفارة
واى سفارة بقى

دى مصرية

اكتر من كدة وربك بيزيح

الجمعة, يناير 19, 2007

 
Blogger A L A B D E L R H M A N . said...

مساء الخير يامراكبي
مش عارف اقولك اية ههههه بس بجد بوست دموا خفيف اوى وهدى النفوس اوىى اووى



.العَبدِالرَحَمن

الجمعة, يناير 19, 2007

 
Blogger يا مراكبي said...

No Fear

على رأيك .. يعني هي جت على دي .. أنا أشوف لي جنسية تانية تكون سفارتها هاتهتم بيا أحسن

السبت, يناير 20, 2007

 
Blogger يا مراكبي said...

Amira

شكرا لزيارتك الجميلة دي

الخواجة كان عارف من الأول إيه اللي هايحصل لي .. أصلة عدى عليه زيي كتير .. بس هو ما حبش يحرجني وسابني أعرف لوحدي .. أو تلاقيه خاف إني ما أصدقوش لو إتكلم وحش عن سفارة بلدي

السبت, يناير 20, 2007

 
Blogger يا مراكبي said...

A L A B D E L R H M A N

مساء الفل .. منورني والله

طبعا بيهدي النفوس .. بس ماحدش يستندل ويروح يقول لحكومة

السبت, يناير 20, 2007

 
Blogger nor said...

أضم صوتي لمزمز...
مش بيقولوا برضه المساواة في الظلم عدل
لكن المشكلة اني شايف ان مفيد شهاب.... ده عمل ذي خيل الحكومة اللي لما كبر بقى ثقل عليهم... وقريبا هيضحوا بيه في العيد ذي صدام..

دايما اسمع النصيحة العجيبة دي وانت مسافر من طوب الأرض اياك وانت في أي دولة وخاصة لو أجنبية انك تروح للسفارة المصرية... لأن قيمتك في مصر بتلازمك في أي مكان ويمكن بتقل حبتين
...
اصلي أحيانا بتكون المناصب هناك على عكس المعتاد عبارة عن جايزة نهاية الخدمة مش موقع أمني هام لمتابعة الأحداث في الدول الأخرى..

الجمعة, فبراير 02, 2007

 
Blogger يا مراكبي said...

nor

بالظبط كده .. المناصب دي بره كلها تظبييطات ومجاملات وخلافه وكأن مافيش فكرة عن طبيعة عمل السفارات بالنسبة للدولة أو الأفراد

نورتنا أخيرا

السبت, فبراير 03, 2007

 

إرسال تعليق

Links to this post:

إنشاء رابط

<< Home