شد القلوع يا مراكبي ... مافيش رجوع يا مراكبي

الثلاثاء، يناير 30، 2007

تاجين مرة واحدة .. أحمدك يا رب

إمبارح لسه بنقول يا فتاح يا عليم عالصبح وبنرش مياة قدام المحل قصدي قدام المكتب لقيت الصديق العزيز عمرو أحمد صاحب مدونة أريدك أنثى .. هي إسمها كدة .. بيقترح إنه يمرر لي تاج .. وبرضة ماحدش يقول لي يعني إيه تاج .. لكن اللي مكتوب تحت ده بيسموه تاج وخلاص .. ومطلوب الاجابة عليه .. بعدها بيوم لقيت برضة الصديقة العزيزة دينا فهمي صاحبة مدونة بالعربي الفصيح بتمرر لي تاج تاني رهيب بيسأل عن خمس حاجات ماحدش يعرفها عني .. يعني فضايح وجرسة وحاجات كدة .. طبعا بأشكر الأصدقاء علي التاجين دول وهأرد عليهم بالترتيب كالتالي

.

التاج الأول

.
اية اللي حيحصل لايميلك لما تموت؟

.

أهو الإيميل ده هو اللي هيعرف الناس إني خلاص ودعت .. لأني لما بكون أوف لاين يبقى معناها إني يا إما نايم يا إما ميت .. وطبعا الإيميل هايتملي ويطف وتبظ منة الرسائل

.
اديت الباس وورد لحد قبل كده؟

.

لأ .. بس الموضوع ده في بالي فعلا .. يمكن أكتبه في ورقة مع وصيتي

.
لو اه كانت طبيعة علاقتك بيه اية؟

.

كويس إني قلت لأ قبل كده علشان أفلسع من السؤال ده

.

اسمك؟

.

أحمد ثروت القاضي

.
اسم الدلع المشهور وسط اصحابك؟

.

في العيلة بيقولولي حمادة وأصحابي بتوع الجامعة بيقولولي عبد الخالق

.

عمرك؟

.

أربعة وتلاتين و10 شهور .. لسة صغنون

.
برجك؟

.

برج القادة .. برج الحمل .. منتهى التواضع

.
مجال دراستك؟

.

كنت متخرج من كلية الهندسة جامعة القاهرة وبعد كده درست شوية إدارة مشروعات في الجامعة الأمريكية .. كانت أيام جميلة .. أقصد الجامعة الأمريكية طبعا

.
شخصيتك نوعها ايه؟

.

أحب النظام والدقة والعمل بروح الفريق وجاد جدا في شغلي .. بأحاول أكون مخلص لله سبحانه وتعالى .. وبأحب الفكر والأدب والشعر والموسيقى ولعب البولينج بنظام الهوك .. إسمه كدة

.
السفر بالنسبة لك؟

.

دي أكتر حاجة بحبها والحمد لله ربنا أنعم عليا بالسفر الكتير لأماكن كتيرة

.
المود بتاعك؟

.

أحيانا بال و أحيانا سيكام .. حسب حالة الإرسال

.
وقت فراغك بتعمل فيه ايه؟

.

ما عنديش وقت فراغ .. حتى كل هواياتي بقى ليها أوقات في الجدول الإسبوعي بتاعي

.
الاكلة المفضلة؟

.

كل اللي تعمله مراتي جميل .. وكل اللي يجيبه ربنا كويس

.
الصفات اللي خدتها من بابا؟

.
كل الصفات الجميلة وبالذات الصدق والصراحة والإخلاص والتعامل بنبل مع الآخرين

.
الصفات اللي خدتها من ماما؟

.

هي ماتت من زمان قوي بس يمكن أخدت منها حبي للفنون

.
اكتر 6 حاجات بتكرهها؟

.

الكذب
النفاق
التفاخر بالمعاصي
الأنانية وعدم الإكتراث بالآخرين
القلوب العمياء
عدم الخوف من الله ويوم الحساب

.
اكتر 6 حاجات بتحبها؟

.

قراءة القرآن
خطبة الجمعة لو مفيدة
الإنترنت
لقاء الأصحاب
السفر
الإنجازات

.
الشغل بالنسة لك؟

.

هو اللي خلى للواحد قيمة وكيان .. وعلى قد ما تخلص فيه هتلاقي مردود رائع .. وأنا بحب مجال شغلي جدا وخصوصا إني بأشتغل في تخصص نادر شوية

.
ايه الكمبيوتر والانترنت بالنسبة لك؟

.

أنا بدأت الحاجات دي من أيام المنافيللة والمكواة الرجل .. وهما جزء من كياني وتكويني .. بدأت أشتغل على الكومبيوتر سنة 1988

.
نيجي بقى للتاج التاني
.
الخمس حاجات اللي ماحدش يعرفها عني هي
.
إني رقيق جدا وحساس جدا على عكس ما الناس تعرفني
إني أمنية حياتي إني أكون غني جدا وأصرف عالفقراء كتير
إني جبان وخايف إني أفتح شغل خاص
إني بتجيلي أحلام يقظة كتير وأتخيل نفسي قارئء قرآن .. مذيع .. مغني .. عازف .. أو لاعب كرة قدم .. وأنا بأعتبر ده مركب نقص دفين جوايا
إني كتير بحس إن إيماني ناقص وأحيانا فيه رياء .. وكل ما أتوب أرجع للغلط تاني

.

خلص التاجين .. تحياتي لعمرو ودينا .. وأحب أمرر التاجين دول للمدونات دي

.

كلبوزة لكن سمباتيك
كهف للنشوة
No Fear
شهروزة
daylight
frozen love
arranging my papers
أ فكار حرة لتامر

.


وكل تاج وإنتم طيبين

التسميات:

43 Comments:

Blogger 198392cjh said...

Hello! Mozilla Firefox web browser has updated,Please visit my blog,Free download Quickly

الثلاثاء, يناير 30, 2007

 
Blogger Amr Ahmed said...

ايه يا استاذ احمد
ماله اسم المدونة

علي فكرة ده اسم قصيدة للرائع نزار قباني

بس ايه حكاية عبد الخالق دي

يعني علشان عبد الخالق ثروت ولا ايه؟

تحياتي

الثلاثاء, يناير 30, 2007

 
Blogger nikogetcat said...

This is very nice blog. do you konw Mozilla Firefox web browser?I really loved it,I hope you may want to download and try. thank you.

الثلاثاء, يناير 30, 2007

 
Blogger يا مراكبي said...

إسم مدونتك ملفت جدا جدا .. أنا بأعشق لفظ أنثى أكتر من أي وصف نسائي تاني

لو زعلان قول لي وأنا أشيل الجملة اللي زعلتك فورا

فعلا إسمي الكامل هو أحمد عبد الخالق ثروت القاضي

الثلاثاء, يناير 30, 2007

 
Blogger إنـســانة said...

لا إجابات راسية ومنظمة ومحددة
مش بس نجحت ده حضرتك جبت مجموع كمان
عايزين الحلاوة بقا

بس الله يكرمك ويكتر من تيجانك يارب
يعنى ايه البولينج بنظام الهوك؟؟؟؟

والسلام ختام

الثلاثاء, يناير 30, 2007

 
Blogger hebaz said...

يادى الزنقة
أول مرة حد يمررلى تاج أهىء أهىء لأو المفروض أقول حاجات محدش يعرفها بتهيألى ربنا ستار حليم و بلاش فضايح بس علشان خاطرك يا مراكبى نحاول
بس أيه محاسن الصدف ديه
هندسة القاهرة و إدارة مشروعات!! ده بينجو جامد جدا
بس لو مفيهاش بواخة ممكن أعرف أيه التخصص النادر الى بتعمل فية؟
( مهندسة حشرية صحيح ) تحياتى

الثلاثاء, يناير 30, 2007

 
Blogger دينا فهمي said...

ايه يا سيدي الكروتة دي؟؟
حسة انك كنت بتجاوب وكان وراك حاجة (:

بس بجد كلامك حلو
ربنا يحقق لك أحلامك ويبعد عنا وعنك الرياء

الثلاثاء, يناير 30, 2007

 
Blogger شــهــروزة said...

يا لهوى عالفضايح يا ولااااد؟؟
لازم الزنقة دى يا أحمد؟؟

يعنى كدة الشعب كله يعرف عنى حاجات مخبياها وابقا مكسوفة بقا وكدة؟؟

المفترض يعنى انى باتكسف
نيااهااهاااااا


بالفعل أخجلتنى لما مررت لى التاج
ليا الشرف انى اقبله منك ومن اللى مرروه ليا
لأنكم لكم مكان خاص لدى
وحسستنونى انكم فاكريننى


على فكرة
انا كمان برج الحمل
بصرة

الثلاثاء, يناير 30, 2007

 
Blogger mano said...

اشكرك جدا على تمريرك التاج ليا
ده شرف كبير

الأربعاء, يناير 31, 2007

 
Blogger يا مراكبي said...

إنسانة

ربنا يجبر بخاطرك .. الحلاوة لما آجي مصر إن شاء الله .. أنا فعلا نفسي أشوف كل البلوجرية الأعزاء

بالنسبة للبولينج .. طريقةالهوك أو الإسكروو هي الطريقة اللي الكورة بتمشي فيها في مسارات منحنية .. وده تكنيك المحترفين .. وهو تكنيك ضروري علشان الكورة تدخل على البنز من جنب وبالتالي نقدر نتحكم في وقوع البنز يمين وشمال زي ما إحنا عايزين

ولازم ثقوب الكرة تتخرم مخصوص حسب مقاس صوابع كل واحد على حدة علشان الإبهام بيدخل كله جوة الكورة

أرجو إني أكون مفهوم شوية

الأربعاء, يناير 31, 2007

 
Blogger يا مراكبي said...

hebaz

متشكر كتير على ذوقك

أنا كنت مهندس مدني والتخصص اللي بأشتغل فيه هو المنشآت الحديدية .. وبيستخدم في المشاريع الصناعية العملاقة زي محطات الكهربا ومصانع الأسمنت ومعامل تكرير البترول وماشابه

كل الناس تعرف المنشآت الخرسانية ومهنسين مدني وعمارة .. لكن ما يعرفوش المنشآت الحديدية اللي نص الشغل فيها بيتبع هندسة الميكانيكا اللي إضطريت أتعلمها بعد التخرج

الجزء التابع للمدني هو التصميم واللوحات التفصيلية وما شابه

والجزء التابع للميكانيكا هو التصنيع والتقطيع واللحام والإختبارات الغير إتلافيه والدهانات والتركيبات

والحمد لله ربنا أنعم عليا بتعلم كل ده قبل ما أبقى مدير

إنتي بقى تخصص إيه؟

الأربعاء, يناير 31, 2007

 
Blogger يا مراكبي said...

دينا فهمي

ده أنا كنت هاكروت أكتر من كدة كمان .. أنا كنت بأجاوب على الأسئلة وأنا مكسوف ووشى أحمر

عموما متشكر تاني على التاج بس ما تعمليش فينا كدة تاني

الأربعاء, يناير 31, 2007

 
Blogger يا مراكبي said...

شهروزة

على قد ما أنا عارف إنك جريئة .. على قد ما أنا عارف إنك فعلا هاتبقي محرجة لما تردي على التاج

بس كان لازم نعرف عنك شوية حاجات ولا هاتفضلي مستخبية عننا كتير؟

الأربعاء, يناير 31, 2007

 
Blogger يا مراكبي said...

mano

ده إحنا اللي نتشرف .. شكرا لذوقك وربنا يعينك

الأربعاء, يناير 31, 2007

 
Blogger مُزمُز said...

ماشاء الله
إيه يا عم الإجابات السريعة والواثقة دي؟
لأ لأ بصراحة مهندس مهندس يعني

عموما شكرا جدا على التاج وعلى إنك فاكرني يعني وإنشاء أجاوب على طول بس أنا لسة بحضر إجابات
وبصراحة التاج التاني ده صعب جدا

الأربعاء, يناير 31, 2007

 
Blogger الأباصيرى said...

الاكلة المفضلة؟.كل اللي تعمله مراتي جميل .. وكل اللي يجيبه ربنا كويس.

ههههه تقدر تقول غير كدة



إني بتجيلي أحلام يقظة كتير وأتخيل نفسي قارئء قرآن .. مذيع .. مغني .. عازف .. أو لاعب كرة قدم .. وأنا بأعتبر ده مركب نقص دفين جوايا

دة انت زييى بالضبط كل ما أزهق من الحياة أعيش فى حياة تانية أكون فيها حاجة جديدة .. ضابط، دكتور او حتى زبال

تغيير المود حلو بردة وبيخفف الاحساس بالملل

الأربعاء, يناير 31, 2007

 
Blogger يا مراكبي said...

مزمز

على فكرة موضوع إني مهندس ده مأثر عليا بجد مش هزار في كل تفاصيل حياتي .. زي سبعاوي في فيلم عائلة زيزي بالظبط

ياللا شد حيلك في التاجين .. مستنيينك

الأربعاء, يناير 31, 2007

 
Blogger mansourawy said...

استمتعت بقراية ردودك

الأربعاء, يناير 31, 2007

 
Blogger يا مراكبي said...

الأباصيري

لأ ده أنا جامد جدا وكلمتي هي اللي لازم تمشي .. تمشي برة طبعا

بجد منورني دايما

الأربعاء, يناير 31, 2007

 
Blogger يا مراكبي said...

mansourawy

الله يكرمك على مجاملتك الجيلة يا دكتور

الأربعاء, يناير 31, 2007

 
Blogger hebaz said...

و نعم المهندسين المجتهدين :)
اه أكيد أنا عارفة المشئات الستيل
هية مش منتشرة أوى فى مصر إلا فى المصانع بأة و كدة و اه أحتكيت بيها من بعيد كدة و فعلا هندسة الميكانيكا متوغلة معاها علشان مثلا لو مصنه نشوف مسارات خط الإنتاج و أحتياجات المساحات و نظم التبريد و التهوية الى ممكن تكون مخصوصة لنوعية معينة من خطوط ال،تاج و كمان لو تعقيم و نوعيات معينة من البلاطات أو الأرضيات و الأسطح....خير خير ربنا معاك :) بس هايل أنك أتعلمت دة كلة :)
طبعا دلوقت خمنت أنى معمارية زميلة بس بينى و بينك مش لاقية نفسى لح دلوقت لأن مفيش أستقرار فى شغل المكاتب فى مصر يعنى من الأخر العمارة مش جايبة همها معايا
تحياتشى

الأربعاء, يناير 31, 2007

 
Blogger mano said...

اشكرك مره تانيه على تمرير التاج لى
و اعتذر عن بعض الغموض فى اجاباتى
و قد غيرت بعض الاجابات
اذا اردت الاطلاع عليها
شكرا

الأربعاء, يناير 31, 2007

 
Blogger يا مراكبي said...

hebaz

بصفتي من محبي العمارة والفنون .. أحب أقول لك إني فاهم شعورك ده تجاه الشغل في مصر

العمارة والفنون بيدوروا كتير حوالين الجمال في كل الأشياء .. والحياة في مصر ما بقاش فيها جمال .. وصعب إنك تتطلعي حاجة جميلة في وسط ظروف مش جميلة لناس مهمومين غير مستعدين لإستقبال الجمال

للأسف

الأربعاء, يناير 31, 2007

 
Blogger يا مراكبي said...

يا إخواننا .. أخوكوا مزنوق

حد يبعت لي البتاع ده اللي بيشغل أغاني مصاحبة في البلوج علشان حاولت كتير ومش شغال .. الظاهر إني راحت علي في البرمجة خلاص

الأربعاء, يناير 31, 2007

 
Blogger koukawy said...

انا يا سيدي البروفايل بتاعي مش غامض
مانا كل حاجه عني مكتوبه في
مغامرات كوكو الكميل
مش انا كوكو الكميل
ميرسي علي دخولك البلوج عندي
و هستناك علي طول

الأربعاء, يناير 31, 2007

 
Blogger يا مراكبي said...

koukawy

يعني لازم أقرأ البلوج كله علشان أعرف إنت مين؟ ماشي يا عم .. ربنا يقدرني وأعرف أخلصه

الأربعاء, يناير 31, 2007

 
Blogger مُزمُز said...

حليت خلاص

تعالى بقى وشوف الفضايح

الأربعاء, يناير 31, 2007

 
Blogger الوردة السوداء said...

ايه الاجبات الدبلوماسية دى

وبعدين انت مش ملاحظ انك مقولتش مرتك من الست حاجات اللى انت بتحبهم


انا بس بحب اهدى النفوس

الأربعاء, يناير 31, 2007

 
Blogger Dr. Tantawy said...

أول مره ادخل مدونتك تبقى تاج ههههه

اجاباتك لذيذه اوي :) كانها بوست مش مجرد اجوبه اسأله هههه

انت الخبره المفروض تعلمنا بقه .. احنا ولادك يا عم الحج

ايه اخبار الكويت ؟؟

الخميس, فبراير 01, 2007

 
Blogger maksofa said...

طبعا الأجابات خلتنا نعرف الكثير عن طبيعه شخصيتك


بس اللي ما حيرني بجد

ايه علاقه حماده
بعبد الخالق ؟

الخميس, فبراير 01, 2007

 
Blogger يا مراكبي said...

مزمز

هو فيه فضايح؟ أنا جاي حالا

الخميس, فبراير 01, 2007

 
Blogger يا مراكبي said...

الوردة السوداء

أصيله والله .. دايما ماشية في الخير


وبعدين إحنا بنتكلم عن الحاجات اللي ببنحبها مش الأشخاص اللي بنحبهم

بلاش كده . إنت ما ترضيش ليا الأذية برضه

الخميس, فبراير 01, 2007

 
Blogger يا مراكبي said...

Dr. Tantawy

متشكر كتير على ذوقك وأهلا بيك يا دكتور .. منورني

وبعدين أنا مش كبير قوي كده وعندي إستعداد أتعلم من أي حد مهما كان عمره

الكويت كويسة وبتسلم عليك

الخميس, فبراير 01, 2007

 
Blogger يا مراكبي said...

مكسوفة هانم

نورتينا بجد

حمادة ده الدلع المصري المعتاد بتاع أحمد

أما عبد الخالق فده بسبب إن إسمي الرسمي أحمد عبد الخالق ثروت القاضي

تحياتي

الخميس, فبراير 01, 2007

 
Blogger tamer said...

شخصية رائعة انت احى حمادة

ربنا يوفقك فى حياتك يارب


بالنسبة للتاج انت حدفتة ليا ههههه

وفية كمان كم مدونة بعتتة ليا بش مش عارف هكتب واقول اية لانى معرفشى اكنب حاجة عن نفسى وان كتبت هيبقى دمها تقيل

تحياتى

الخميس, فبراير 01, 2007

 
Blogger محمد said...

أهو معلومات أكيدة كما قالت لطيفة
وأدينا إتعرفنا عليك وقربنا منك شوية
على فكرة أنا بقالى فترة مدخلتش على مدونتك
بس تقريبا حصل بعض التظبيط في السايدبار

الجمعة, فبراير 02, 2007

 
Blogger nor said...

ايه ده ياعم المهم...
طب بالراحة.. انت هتهدنا ولا ايه!!؟

جميل ان الواحد يكونراضي وسعيد بالوضع اللي هو فيه في شغلة
ربنا يحفظها عليك نعمة ويحفظها من الزوال

الجمعة, فبراير 02, 2007

 
Blogger الأباصيرى said...

دا انت ظبط المدونة أهه


مبروووك :) وعقبال الشعر ياباشا

الجمعة, فبراير 02, 2007

 
Blogger يا مراكبي said...

tamer

متشكر كتير على المجاملة الجميلة دي

ماتهربش من التاج .. إنت عايز تستخبى عننا وما نعرفش عنك حاجه وألا إيه؟

أي حاجة هاتكتبها هيبقى برضه دمها خفيف

السبت, فبراير 03, 2007

 
Blogger يا مراكبي said...

محمد علي

أهلا بيك وأنا مقدر الزنقة اللي إنت فيها بسبب الثانوية .. ربنا معاك

إكتشفت إن السايد بار بينزل لتحت لو البوست كان طويل شوية .. حاجة غلط في البلوجر والله أعلم

منور

السبت, فبراير 03, 2007

 
Blogger يا مراكبي said...

nor

يا عم أنا لا مهم ولا حاجة .. إعتبروني أقل واحد فيكم .. كل ده هايزول في يوم وأنا ما بتغرش بكل ده

نورتني وحمدالله على سلامتك من سوهاج

السبت, فبراير 03, 2007

 
Blogger يا مراكبي said...

الأباصيري

إكتشفت إن السايد بار بينزل لتحت لو البوست كان طويل شوية .. حاجة غلط في البلوجر والله أعلم

بأفكر أجيب شعري على جنب يمكن الحال يتعدل زي المدونة

هلا والله بيك

السبت, فبراير 03, 2007

 
Blogger frozen love said...

انا اسف على التاخير..كنت مسافر وجيت..بشكرك جدا انك افتكرتني بالتاج..وانا رديت عليه خلاص في مدونتي

تحياتي

السبت, فبراير 03, 2007

 

إرسال تعليق

Links to this post:

إنشاء رابط

<< Home