شد القلوع يا مراكبي ... مافيش رجوع يا مراكبي

الأحد، أغسطس 05، 2007

عيناها وشفتاها

كان يحبها بجنون لدرجة لم نعهدها في أحد من قبل .. كان لا يرى سواها إذا نظر إلى أي شيء .. كان لا يتنفس إلا عبيرها .. كانت كل الأصوات هو صوتها .. كانت هي كل الأشياء .. وبالرغم من ذلك كان يرى أن لديها سحرا خاصا إستودعته الحياة في عينيها وشفتيها .. كانت عندما يلقاها تسحره عيناها .. وكانت عندما تتحدث يراقب شفتيها .. كانت عيناه تجول بين عينيها وشفتيها في شغف ودأب ودون كلل .. كان يحس بأنهما مأوى الحب والحنان في هذا الكون
.
ظل هكذا إلى أن فرقتهما الأيام وسار كل منهما في طريقه .. لكنه لم ينس أبدا تلك العيون وتلك الشفاة .. إلى أن أحب مرة أخرى .. لم يدري لماذا إنجذب إليها لأول وهلة .. إلى أن إكتشف أن لديها نفس العيون التي أحبها من قبل .. نفس السحر الخاص الذي طالما أسره .. لكنها لا تملك نفس الشفاة التي عشقها .. وربما كان ذلك هو السبب في فراقهما بعد ذلك .. ربما أحب عينيها ولم يحبها هي نفسها
.
لم يكن أمرا مدهشا بعد ذلك أن يترك حبيبته الثالثة التي كان يتغزل في شفتيها كل يوم .. فقد كانت شفتاها تشبه نفس الشفاة التي سحرته قبل ذلك .. لكنها لم تكن تحمل نفس العيون التي كان يبحث عنها .. كان نوعا من الجنون بلا شك
.
ظل هكذا سنوات طويلة .. يبحث عن نفس العيون ونفس الشفاة إلى أن تملكه اليأس والملل وقرر أخيرا أن يقدم على الإنتحار
.
تزوج

التسميات:

115 Comments:

Blogger اسكندراني اوي said...

طب ده اسميه ايه
حاله من العشق
الحنين للحبيب الاول
ام دوران حول الاحساس
يبدو ان الذكريات تصنع العديد من المعجزات
______________________________

ثم تعالى هنا
انتحر .....تزوج
يااااا راجل
تخونك حله المحشي لما كنت عاوز ترقص تانجو

تحياتي


ملحوسه : ممكن تكبر الفنط شويه لحسن تقريبا الواحد عينيه بقت على اده

الأحد, أغسطس 05, 2007

 
Blogger يا مراكبي said...

وبعدين بقى في الأسافين العابرة للقارات دي؟

دي مجرد قصة وماليش أي علاقة بيها أبدا أبدا أبدا

إستر عليا الله يسترك

:-D

بالنسبة للفونت إتبع الخطوات التالية: في الإنترنت إكسبلورر روح فوق عند
View

وبعدين إختار
Text Size

وبعدين إختار
Largest

هتلاقي الفونت كبير وزي الفل

أي خدمة

الأحد, أغسطس 05, 2007

 
Blogger اسكندراني اوي said...

من بعض ما عندكم يا فندم
هههههههههههههههههههه

الأحد, أغسطس 05, 2007

 
Blogger يا مراكبي said...

ماشي .. شكلنا كده هنقضيها أسافين .. هنسيب التدوين والتيجان ونركز في الأسافين .. ماشي

:-D

المهم ياريت تكون جربت تكبير الفونت

الأحد, أغسطس 05, 2007

 
Blogger اسكندراني اوي said...

تيجي نقلبها اسافين
اشمعنى يعني زنزتمه واحمد وشهروزه قلبوها مراجييييييييييييييييييح

انا بما اني مبحبش مايكروسوفت فبستعمل فاير فوكس

CTRL+++

وكبر براحتك
ها حتعمل متونه التاجات امتى
؟؟؟؟؟؟

الأحد, أغسطس 05, 2007

 
Blogger عدى النهار said...

ومن العيون ما قتل.. والشفايف أيضاً

فقط عندما يكون المُحب مجنون

(:

الأحد, أغسطس 05, 2007

 
Blogger يا مراكبي said...

اسكندراني اوي

فكرة ممتازة .. نبدأ بمدونة التيجان وممكن نعمل التاج على إكسل فايل

وبعدها على طول نخش في مدونة الأسافين .. وهيكون شعارنا: الأسفين كالماء والهواء .. ونحط أغنية المطرب السكندري مصطفى قمر: يا ناس أنا دوبت في أسافينه .. أسافينه .. أسافينه

ههههههههه

الأحد, أغسطس 05, 2007

 
Blogger يا مراكبي said...

عدى النهار

كلامك مظبوط .. ولو إن أحيانا بيكون المحب عاقل .. عاقل جدا

دايما منورني

الأحد, أغسطس 05, 2007

 
Blogger Sampateek said...

heeeeeeeeeeeh
de tanheda
heya el ta3lee2 el wa7eed



ezayak?

الأحد, أغسطس 05, 2007

 
Blogger يا مراكبي said...

Sampateek

إزيك يا حاجة؟ فينك؟ شكلك غطسانه في مصر غطس جامد قوي

أنا رحت جدة إسبوع وجيت شغال في مكتب القاهرة دلوت وإن شاء الله هأروح تاني بعد إسبوعين

إبقي طمنينا عليكي وعالأسرة الكريمة

وبلاش التنهيدة دي علشان ما نخوفش الشباب الصغير من الجواز

:-D

الأحد, أغسطس 05, 2007

 
Blogger Gid-Do - جدو said...

مراكبى

انا حجيب من الاخر لانى معدش اخاف من حاجة ـ ميزة ان الواحد كبر فى السن والعيال كبرت والمسئولة اتشالت ـ انا معرفش من الستات غير جنسيتين المصرية والامريكية ـ بحكم المعاملات مش بحكم اللى ممكن يجى فى دماغك ـ المصرية بتكون قبل الجواز مهمتها الرئسية فى الحياة انها تتجوز ولذلك بتعمل تسويق لنفسها ـ ماركتنج ـ على اعلى مستوى ـ سواء بالتعليم والشياكة فى كل حاجة من لبس لكلام حلو الى اخر قايمة الشياكة الى ان يفتح الله عليها وتتجوز وبعد كدة تبقى استغفر الله العظيم زفت فى كل شئ مع جوزها وزى العسل مع ولادها ـ وتبقى كدة حققت حلم حياتها ـ زى واحد كان نفسة يدخل كلية معينة فى الجامعة فذاكر فى الثانوية العامة وطلع من الاوائل ودخل الكلية بعد الدخول افتكر انه خلاص ما دام دخل يبقى مضمون له التخرج وبطل يذاكر لحد ما استنفذ مرات الرسوب واترفد والمصيبة الكبرى انه زعلان علشان اترفد ـ هذا مثال حى للست المصرية وكلهم كدا واى حاجة تانية تبقى مجرد شواذ لا يقاس عليها

التعليق طول لكن لابد من الاستمرار ـ الامريكية الجواز بالنسبة ليها ارتباط عاطفى لانها ممكن من غير جواز تاخد اللى هيا عاوزاة وتعيش وتخلف عيال كمان لو عاوزة ـ اذا الزوج بالنسبة ليها حبيب وعشقيق وصديق ورفيق وصاحب وونيس ـ بتكلبش فية وبتكون معاة شريكة حياة وانا عاوز اكتب شريكة حياة دية مليون مرة ـ بعد كل الكتابة دية ده الفرق بين الزوجة المصرية والامريكية ـ المصرية مبتعرفش تستهجا كلمة شريكة حياة واحسن وصف لها هى النكدية وليست العشرية كما تقول الاغنية ـ يمكن كلامى ينفع حد ورزقى على الله ـ متحامل يمكن ـ بس دية الحقيقة بعد تمانية وعشرين سنة نكد ـ اقصد جواز ـ ومازال النكد مستمر ـ تحياتى

الأحد, أغسطس 05, 2007

 
Blogger حــلم said...

مراكبى
الكلام كان ماشى حلو وجميل
وبنقول أهى رومانسيكية حلوة مفتقدينها
نقراها بأة
:)
بس فى الآخر قلبت بجد
وتمت الخطوة التى لا مفر منها إلا للعقلاء
:)

عايزين نعمل عندك استفتاءعلى المعادلة دى يا باشمهندس
valid or not

الزواج = الانتحار

؛)

الأحد, أغسطس 05, 2007

 
Blogger فى القلب said...

كده يامركبى يا خويا تسمى الجواز أنتحاربأنا بأول عليك طيب وابو العيال
والنبى الواحد مخبى فى قلبه وساكت يعنى أحنا اوى ألى مرتحين

الأحد, أغسطس 05, 2007

 
Blogger اسلام رفاعى said...

عذرا للتحليق خارج السرب
ادعوك للمشاركة فى حملة رفع الظلم عن طلاب الاسكندرية المختطفين
التفاصيل فى مدونتى
ارجوك انشرها

الأحد, أغسطس 05, 2007

 
Blogger أميرة ويلز said...

ههههههههههههههههه

طبعا اللى اتجوزها لا فيها عيون ولا شفايف

ربنا يشفيه هو وكل اللى زيه

الأحد, أغسطس 05, 2007

 
Blogger اعشق فى اليل ضوء القمر said...

يا مركبى
القصه جميله جدا
وفيها تعبير جمليه عن حال العاشق وأحواله لكن هل المفروض حال العاشق لعشيقته يكون فقط فى الشفايف و العيون
مع أن كل من العين و الشفاه تتغير بمرور العمر وبعمليات التجميل كمان
يعنى من الآوحش و الأحلى
يريت البوست الجديد يكون كيف يختار بجد الحبيب حبيبته
يعنى بما أنك متجوز ولا نخليها على جنب

الأحد, أغسطس 05, 2007

 
Blogger أميرة ويلز said...

مراكبى معلش تسمحلى ارد على كلام جدو

ماينفعش خالص تقارن بين مصر وامريكا ياجدو طب عيشنا انت فى امريكا وشوف هيحصل ايه

لما تبقى ثقافة الراجل ان الست هى اللى متحملة مسؤلية كل شىء وادق التفاصيل الخاصة بيه هى بتعملهاله مابيعتمدش على نفسه فيها دة غير اولادها واعباء المنزل واعباء الحياة نفسها فى مصر
لما يبقى الراجل مابيتنازلش عن اى جزء من حقوقه زى الاكل فى معاد معين
واللبس النضيف والبيت الى بيبرق والست بتعمل كل دة

تبقى هتلاقى وقت عشان تسوق نفسها زى زمان
دة هى تتمنى ونفسها ومنى عينها تفضل جميلة وتحتفظ بحب جوزها

اذا المراة الامريكية شريكة حياة لان الحياة نفسها بتبقى شركة بكل المقاييس ومن كل النواحى المسؤلية كلها بتبقى شركة مش الراجل بيصرف ويرمى الفلوس ويدخل البيت ينام ويخرج

والست قايمة نايمة جوة دوامة داخل البيت

وعايزها تفضل جميلة وشيك
دة انت تحمد ربنا انها لسة عايشة قايمة بواجباتها على اكمل وجه
مش تقولى امريكا ومصر

خالص تحياتى معلش طولت عليكوا

الأحد, أغسطس 05, 2007

 
Blogger Esmeralda said...

ده واحد فاضى اظاهر
كويس ان الموضوع وقف عند الشفايف و العيون بس
اعققد ان كل حد ليه سحره
مقدرش ادور على سحر عيون حد فى حد تانى
تعب نفسه
و الله بلاش انتحار و الكلام ده
فيه ناس هنا كتير لسه مدخلوش دنيا

الأحد, أغسطس 05, 2007

 
Blogger Gid-Do - جدو said...

أميرة ويلز

صديقى المراكبى ـ اسمحلى ارد على الاميرة
ابنتى الحبيبة ـ بتقولى فى مدونتك ان عمرك اربعة وعشرين سنة ـ ماشى ـ من الاخر بردة اللى ميعرفش يقول عدس ـ دة مثل مصرى ـ البنت الامريكية اللى انت متعرفيش عنها حاجة بتشتغل من سن ستاشر سنة بتروح الجامعة وبتدفع مصريفها من شغلها وهى طافحة الكوتة فى الشغل الى ميرحمش بتجرى من الشغل للجامعة للمذاكرة ومعظم الاهل ما بسعدوش ولادهم فى حاجة ـ بعد ما بتتجوز ـ هى اللى شيله كل شئ فى البيت من نظافة وتربية عيال ـ المدرس فى المدرسة على سبيل المثال بيقول للتلميذ هات ماما مش بابا لما بيكون فية شئ يخص التلميذ ـ السوبر ماركت كلة ستات بتشترى طلبات بيوتها والرجالة فى البارات بيسكروا او فى الملعب بيلعبوا جولف بعد الشغل ـ الست الامركية بيتعمل اد عشر ستات مصريات جوة البيت وخارج البيت ـ صحيح معندهات وقت للطبيخ ـ لكن الاهل جاهز فى السوبر ماركت ـ وبرضة بتعمل الكلام اللى انا قلت علية فى التعليق السابق ـ المصرية بتعرف تتكلم كتير زى سيادتك كدة لكن فعل قليل وانا عندى الدليل وياريت تيجى امريكا علشان تشوفى بيعينك وبعدها تقولى ابعدنى من هنا لانك مش راح تستحملى اكتر من شهر وبعدها راح تعرفى يعنى اية واحدة ست فى امريكا ـ تحياتى

الأحد, أغسطس 05, 2007

 
Blogger مـحـمـد مـفـيـد said...

اغيب وأعود أجدك متألقا اكثر وأكثر
وحشني بلوجك جدا

الاثنين, أغسطس 06, 2007

 
Blogger يا مراكبي said...

Gid-Do - جدو

تحية جامدة جدا جدا لجدو العزيز الجامد قوي

ده أنا أشيل البوست بتاعي وأحط تعليقك .. هيكون أحسن بكتير

بس ياريت ماحدش من الجنس اللطيف يزعل من التعليق ده لأنه فعلا موضوعي بجد .. يمكن بس ما نقدرش نعمم ده بنسبة 100% على كل المصريات لكن هي الغالبية كده .. والمفاجأة كمان إن العرب والأجانب عارفين عننا كده

واحد شاي لجدو يابني

الاثنين, أغسطس 06, 2007

 
Blogger يا مراكبي said...

حلم

أنا أقدس الحياة الزوجية .. ما توديناش في داهية

أنا مش مسؤول عن هذا الإستفتاء .. خليني جنب الحيط

الاثنين, أغسطس 06, 2007

 
Blogger يا مراكبي said...

فى القلب

مش أنا اللي بأقول .. ده بطل القصة مش أنا .. إنتوا هتلبسوني تهمة ليه بس؟

ولو إني أنا كمان مخبي في قلبي وساكت برضه

ههههههه

الاثنين, أغسطس 06, 2007

 
Blogger يا مراكبي said...

أميرة ويلز

هههههه .. لأ يا سمو الأميرة .. كان عندها عينين وشفايف وودان وإيدين ورجلين .. ما كانتش معوقه قوي كده

هههههه

منورة

الاثنين, أغسطس 06, 2007

 
Blogger يا مراكبي said...

إسلام رفاغي

البيت بيتك .. وأهلا بيك في أي وقت

الاثنين, أغسطس 06, 2007

 
Blogger يا مراكبي said...

اعشق فى اليل ضوء القمر

طبعا العيون والشفاف مجرد وموز في القصة مش أكتر

وبعدين بلاش أنا اللي تسلألوه عن الحاجات دي .. أنا بأتكسف يا إخواننا

وإنت ما ترضاليش الأذية برضه

:-D

الاثنين, أغسطس 06, 2007

 
Blogger يا مراكبي said...

Esmeralda

هو فعلا تعب نفسه لأنه كان بيدور على سراب

عجبتني قوي جملة: كويس ان الموضوع وقف عند الشفايف و العيون

وبعدين مش أنا اللي بأقول إنتحار .. ده بطل القصة .. إنتي عارفاني بأشجع الجواز قد إيه

وش بيعيط

الاثنين, أغسطس 06, 2007

 
Blogger يا مراكبي said...

مـحـمـد مـفـيـد

ألف حمد الله على سلامتك .. ربنا يتقبل إن شاء الله .. أنا كنت هناك برضه من عشر أيام

أنا دايما بأسعد بزيارتك وبتقديرك ده .. دايما كلك ذوق

الاثنين, أغسطس 06, 2007

 
Blogger صاحب البوابــة said...

ماشي يا عم الرومانسي

:)

تحياتي

الاثنين, أغسطس 06, 2007

 
Blogger أميرة ويلز said...

كدة ياجدو يعنى طلعنا احنا برده الحيطة المايلة

عامة برده الراجل هو اللى بتبقى عينه فارغة والست بتعمل كل دة وبتبقى حلوة وزى العسل وبرده مابيعجبش

اخ منكوا تاكلوا وتنكروا كدة على طول
وبتمدوا لبرة وخلاص ماحضرتك عايش عمرك بره مصر هتقول ايه غير كدة

عامة مصر اتغيرت كتير حتى اسأل مراكبى اهو موجود فيها اليومين دول

اتمنى تستوعبنى سعة صدرك
انا كنت اتمنى الاقى فى كلامك اى تلميح عن الراجل المصرى او تلميح عن المشاركة
مش عارفة يعنى صحيح انا مارحتش اميركا بس حضرتك بتظهر نص الحقايق

من معلوماتى المتواضعة بلاقيهم متشاركين فى تربية الاولاد بطريقة كبيرة والاعباء المنزلية ايضا وان كان فى حالات زى مانت بتقول بارات والكلام دة فهى حالات نادرة مش كل الناس اكيد
او فى اوقات فراغهم مش طول اليوم يعنى

على الاقل فى نوع من التحضر فى المعاملة ولو مشاركة وجدانية
خليك منصف هى معاملة الرجل الشرقى زى معاملة الغربى والاعباء اللى بتتحملها المراة هى هى

ماهى الست بتشتغل من الصبح لغاية الساعة 4 العصر فى القطاع الخاص وجوزها بيرجع قبل منها مش بيعمل قشاية فى البيت
وهى بترجع المفروض تحط راسها على المخدة لكن بتطبخ وبتنضف البيت وبتذاكر للولاد
كمان حضرتك بتقول ان الشىء الوحيد اللى مش بيتحملوه هو الطبيخ

حضرتك بتستهون بدة اللى بياخد نص نهار يومها تقريبا
وياريت بيعجب

انا طولت عليك معلش بس برغى فى المفيد واللى بحكيه بنفذه
مش حكى وخلاص
على فكرة انا سعدت بالحوار دة جدا
واتمنى اكون ابنتك الحبيبة زى ماوصفت وتستوعب صغر سنى بس تكون منصف

تحياتى ليك ياجدو

الاثنين, أغسطس 06, 2007

 
Blogger nirfana said...

الاول صباح الخير
الثاني بجد ضحكتنى من قلبي لدرجة ان عيونى بكيت
من كتر الضحك


النهاية رهيبة
بتعكس المأساة فعلا اللى بيقع فيها كل انسان وميقدرش يفوق منها الا لما يعبر فيها ويتذوقها


الحب زى المخدر بالزبط
اول مرة تاخد فيها حباية مخدر بتحس بنشوة غريبة وبتعتاد عليها
بعد كده تفضل تجرى من صنف لصنف ومش قادر توصل لأول احساس

ومن كتر زهقك
بتنتحر بحالتين
يا اما تاخد جرعة زايدة
يا اما تحاول تبطله نهائيا و تتجوز

:(:(



الله يسعدك
الحياة قدامك جميلة




على فكره
وحشتنى زيارتك

الاثنين, أغسطس 06, 2007

 
Blogger Gid-Do - جدو said...

أميرة ويلز

بعد اذنك يامراكبى ـ والف شكر على سعة صدرك ـ ودة كلاكيت اخر مرة مع الاميرة هنا

الابنة الحبيبة
انا وانتى بنتكلم فى موضوع قتل بحثا فى مدونات كتيرة ـ وليا تعليقات فية ـ وكاتب بوست اسمه البنات البنات اظرف الكائينات اللنك بتاعة اهه

http://ramo46.blogspot.com/2006/03/blog-post_31.html

لو عاوزة تكملى الحوار يبقى احسن نسيب مدونة الراجل اللى ملوش ذنب دة وافتحى الموضوع عندك ونقتله بحثا ـ للعلم انا بموت فى البنات وديما متحيز ليهم ـ وياسمين حفيدتى اغلى عندى من ميت ولد ـ خلقتى كدة ـ فانا مش ضد البنات لكن .... نسيب لكن دية لما تفتحى الموضوع عندك لو لسه عاوزة وجع قلب ـ تحياتى

الاثنين, أغسطس 06, 2007

 
Blogger Gid-Do - جدو said...

مراكبى

الاشتباك مع اميرة ويلز ـ المقيمة فى مصر ـ نسانى اشكرك على الواحد شاى وعلى الجرائة اللى نزلت عليك ـ بسبب تعليقى ـ من غير ما تحسبها جامد وبناء علية انا بعتبر وقوفك جانبى كان زى الاعتراف تحت التعذيب لا تاخذ به المحكمة عند سماع القضية ـ وانت فى حل تقدر تتبرأ من كلامك فى اى وقت وانا مقدر موقفك انت لسة برضة صغار ومحتاج لتانجو من وقت للتانى ـ وان كنت انت اولا واخيرا اللى بتدى للحريم سكة يفوتوا منها ـ ويتمرجحوا علينا

الاثنين, أغسطس 06, 2007

 
Blogger Reemo said...

طيب والغلابه اللى عايزين لسه ينتحروا قصدى يتجوزوا
دول يعملوا ايه
ولا انتوا تحبو وتعشقو عيون وشفايف
( مع غمزه خبيثه)
وبعدها تتجوزوا
وترجعو تقولوا انتحار

شكل مصر
ورجوع مصر
فكرنا بالذى مضى
وبدأنا نعيش الماضى
بعيونه وشفايفه
ولا ايه؟؟
;)

الاثنين, أغسطس 06, 2007

 
Blogger اسكندراني اوي said...

جدو يا جااااااااااامد
ايه دا ايه دا
من الاخر احييييييك
مراكبي ابسط يا عم

الاثنين, أغسطس 06, 2007

 
Blogger بالله المستعان said...

هههههه
هو هنا ديما بيحصل كدا
الحب في النهاية بيتقلب محشي
ههههههههههههههه

الاثنين, أغسطس 06, 2007

 
Blogger يا مراكبي said...

صاحب البوابـة

مين رومانسي ده .. أنا؟

ده أنا غلباااااان

منورني

الاثنين, أغسطس 06, 2007

 
Blogger يا مراكبي said...

nirfana

أنا مش عارف أحييكي إزاي على التوصل لتفسير الحب التفسير الرائع ده .. المخدر الأول اللي الواحد يفضل يدور على شعور مماثل له

وده مش غريب على متخصصة نفسية متمكنة زيك

نورتيني .. وأنا يسعدني زيارتك طبعا .. جاي حالا

الاثنين, أغسطس 06, 2007

 
Blogger يا مراكبي said...

Gid-Do - جدو

المدونة كلها تحت أمرك يا جدو .. البيت بيتك وأنا سعدت جدا جدا بحوارك الرائع ده مع سمو الأميرة

وبالنسبة للجرأة اللي نزلت عليا دي فسببها إن الحاجة ما بتدخلش عالإنترنت طول ما هي في مصر .. فرصة أفضفض وأطلع اللي جوايا بقى

الاثنين, أغسطس 06, 2007

 
Blogger يا مراكبي said...

أميرة ويلز

إستمتعت جدا بحوارك مع جدو العزيز .. إعتبري البيت بيتك في أي وقت

نورتينا

الاثنين, أغسطس 06, 2007

 
Blogger يا مراكبي said...

Reemo

تعليقك ده تحفة بصراحة

أولا ده كان بطل القصة مش أنا .. فيه شخص عزيز قال لي الناس هتفتكر إن البطل ده هو أنا ومش هتعرف تدافع عن نفسك كويس المرة دي

أحلى تعبير هو اللي قولتيه ده: شكل رجوع مصر
فكرنا بالذى مضى
وبدأنا نعيش الماضى
بعيونه وشفايفه

كويس إن الحاجة ما بتقراش الحاجات دي دلوقت وإلا التهمة كانت ثبتت عليا

وش بيغمز جامد

الثلاثاء, أغسطس 07, 2007

 
Blogger يا مراكبي said...

اسكندراني اوي

جدو جامد جدا على فكرة .. عقبالنا لنا نبقى جامدين زيه كده

منورني دايما

الثلاثاء, أغسطس 07, 2007

 
Blogger يا مراكبي said...

بالله المستعان

إيه اللي جاب سيرة المحشي دلوقت بس؟ إنتي بتلمحي لإيه؟

هتلبسيني تهمة وألا إيه؟

بلاش الأسافين دي

:-D

الثلاثاء, أغسطس 07, 2007

 
Blogger thanafy said...

Al-Salamu Alikum Ya Marakby,
It is a good idea to start a new blog called "Asafeen", and I'm so sorry Ged-do El3aziz as you know I'd like to help "Behab Akhdam" and since I have ur phone and address.....I think I found the first client for the new blg....I' afraid Ged-do someone will need to put the tent in the backyard..
Salam
Thanafy

الثلاثاء, أغسطس 07, 2007

 
Blogger يا مراكبي said...

thanafy

أهلا وسهلا بالمؤسفن الأول وأول مشارك في مدونة أسافين

The First Asfeener

أنا كنت متأكد إن اللي هيحبوا يخدموا كتير قوي .. ولله في لله طبعا

ههههههه

وعموما يا جدو ما تقلقش .. أنا دلوقت بقى عندي جنينة كبيرة حوالين البيت .. إبقى تعالى أقعد معايا جنب الخيمة بتاعتي .. وفي الفرونت يارد كمان

الثلاثاء, أغسطس 07, 2007

 
Blogger أحمد سلامــه said...

يمكن ده الوهم اللي هوابتاع الحب الاول ده والذي منه
يمكن اول مرة اقرالك قصة
اتمنى كالعادة تكون قصة
انت معارفك كلهم كده ??
؟؟

الثلاثاء, أغسطس 07, 2007

 
Blogger عمرو غريب said...

يا عم حرام عليك

الثلاثاء, أغسطس 07, 2007

 
Blogger Amr Ahmed said...

هو اللي مكانش عاوز يحب تاني

الثلاثاء, أغسطس 07, 2007

 
Blogger يا مراكبي said...

أحمد سلامــه

هو الحب الأول ده فعلا وهم زي ما بتقول؟ وألا الموضوع جه على جرح من الجروح؟

تعليقك فيه جملة خبيثة:اتمنى كالعادة تكون قصة

وطبعا معارفي مش كلهم كده .. أغلبهم بس

وش بيغمز تاني

الثلاثاء, أغسطس 07, 2007

 
Blogger يا مراكبي said...

عمرو غريب

ماشي .. بكرة نشوف وهأبقى افكرك

:-D

الثلاثاء, أغسطس 07, 2007

 
Blogger يا مراكبي said...

Amr Ahmed

قصدك ما كانش عايز يحب رابع

ماهو كان لازم يزهق برضه .. مش كده وألا إيه؟

الثلاثاء, أغسطس 07, 2007

 
Blogger bastokka طهقانة said...

ما انا نفختهم مفيش فايدة
الراجل قاطع شحن
متقليش لا عنين و لا رجلين ده هوبليس كيس
اسحرله؟
اوروفوار

الثلاثاء, أغسطس 07, 2007

 
Blogger يا مراكبي said...

bastokka طهقانة

إيه ده يا حاجة .. كده شردتي للراجل

تلاقيكي بس نفختيهم على درجة غير درجة شفايف الحبيبة القديمة .. إبقي أسأليه: أنفخهم على كام؟

هتلاقي الحال يمشي على طول .. أي خدمة

الثلاثاء, أغسطس 07, 2007

 
Blogger Anima said...

تعالى تعالى تعالى تعالى

انتحر

تزوج


انا كمان اعرف واحدة انتحرت
اتجوزت المسكينة

الأربعاء, أغسطس 08, 2007

 
Blogger نـــــــور said...

هناك بيت من الشعر كثيرا ما أقف عنده وأتأمله وأشعر بأنه معبر جدا .. وهو

نقل فؤادك ما شئت من الهوى *ما الحب إلا للحبيب الأولِ

يمر المرء بمنازل كثيرة*ويبقى الحنين للمنزل الاولِ


تحياتي لك

الأربعاء, أغسطس 08, 2007

 
Blogger shams said...

و تفتكر الجواز هو الحل

الأربعاء, أغسطس 08, 2007

 
Blogger يا مراكبي said...

Anima

هو الستات كمان بينتحروا بالطريقة دي؟ أنا كنت فاكرها حالة رجالية بس

بس مين صاحبتك دي؟ صاحبتك قوي يعني؟

الأربعاء, أغسطس 08, 2007

 
Blogger امام الجيل said...

عندما قرر الانتحار
تزوج
وان لم يتزوج ترى كان سينعم بكل هذا الحب وكل هذه المودة والعاطفة والود طول حياته ؟؟؟؟؟؟؟؟؟

الأربعاء, أغسطس 08, 2007

 
Blogger بالله المستعان said...

انا بلمح لحاجه
لالا عيب كدا
طن فيا الخير يامركبي
مينفعش المعامله دي بينا
سلملي ع الحاجه بس ياباشمهندس
هههههههههه
:D

الأربعاء, أغسطس 08, 2007

 
Blogger Epitaph said...

الجواز كان انتحار لاوهامه
لكن بداية حياة


بالنسبة لتعليق جدو
هو حقيقي لحد كبير موقف الزوجة المصريو
ماشية علي مبدأ
I did not stop loving you, I just stopped showing that
والحقيقة الزوج بيمشي بنفس المبدأ برضه

يلا
شر مش لابد منه
:)

الأربعاء, أغسطس 08, 2007

 
Blogger Hannoda said...

عارف؟؟

لسة لحد إنهاردة مافهمتهوش.. أقصد الحب الأول

قوي
باقي
محتفظ برقته.. سحره.. أسطوريته الرومانسية رغم جمود و سرعة و مادية الحياه

مفهمتش حاجة تانية
إنه مابيمنعش القلب يحب.. ويندمج
ومهما إندمج و عاش و سعد و إرتاح

تلاقيه بيسلم على قبك كل فين و فين
ويقولك .. اييييه ياعم
اخبارك ايه مع الناس التنيين
فتقوله.. أنا تمام و عال العال
بس ماحدش من الناس التنيين حصل نصك ولا ربعبك

رغم إنه مايملك أفضل المواصفاتلكنه يملك أصفى إحساس

يادي الحب الأول

الأربعاء, أغسطس 08, 2007

 
Blogger يا مراكبي said...

نـــــــور

إحساسك بالأبيات الشعرية دي سليم وطبيعي للغاية .. هيفضل دايما للحبيب الأول بريق خاص مهما طال الزمن ومهما تعددت الأحبه بعده

وش بيتنهد

الأربعاء, أغسطس 08, 2007

 
Blogger يا مراكبي said...

shams

حل لإيه بس؟ مافيش مشاكل والحياة كويسة إن شا الله

:-D

الأربعاء, أغسطس 08, 2007

 
Blogger gohayna said...

ممكن الواحد ينجذب لحاجه معينه في ملامح الي بيحبه

ولو محصلش ما يتمناها بيدور عليها في كل وجه بيقابله

نوع من الاشتياق والحنين لصوره ملازماه وبتمثله الحب
زي كدا لما بندور في وشوش الناس علي ملامح حبيب غايب

او تتشابه نبره صوت سمعناها مع صوت عشقنا الاستماع ليه
وتيجي كدا نغزه في القلب ونقول ياااااااااااه
نفس الصوت

لكن للاسف بيكون مع شخص وملامح ونبرات تانيه مختلفه


ايه الكلام الي فوق دا؟

نقلبها هزار شويه بقي

هو بجد الجواز انتحار ؟

علي كدا تلات تربع الارض ميتين من زمان والباقي بيشاور عقله خلاص

وهتفضي وتبقي فله والله

عقدتني يا مراكبي
انا لسه مدخلتش دنيا

وشكلي هقفل الباب ومدخلش خالص من العقد الي عمالها اخدها دي

ربنا يستر


تحياتي ليك ويارب تكون اجازتك سعيده

الأربعاء, أغسطس 08, 2007

 
Blogger loumi said...

العزيز احمد
فكرتنى بقصه السياره الحمرا
:):):)
عندما نبتعد عن من نحب نظل نبحث عن ملامحهم فى كل الوجوه
ولكن ان نعشق عيون وشفاه فهذا جنون حقا
فلا يمكن ان يختزل الانسان فى صورة نبحث عنها
ونهمل فكر هذا الانسان وروحه
كالعاده نهايه
لوزعيه
هو العزاء فين؟
قصدى نبعت ورد على انهى قرافه؟
يووووووووووووووووووووووه
قصدى مبروك

الأربعاء, أغسطس 08, 2007

 
Blogger يا مراكبي said...

إمام الجيل

سؤالك مهم جدا .. لكن لا يسعني الإجابة عليه إلا بمقولة الباشمهندس جحا الشهيرة: إخص على اللي إتجوزوا بعدي وما سألونيش .. وإسفوخس على اللي إتجوزوا قبلي وما نصحونيش .. وعجبي

الخميس, أغسطس 09, 2007

 
Blogger يا مراكبي said...

بالله المستعان

ماهو واضح الخير اللي بتقصديه مادام بتسلمي على الحاجة

أصيلة والله .. دايما بتسعي في الخير

:D

الخميس, أغسطس 09, 2007

 
Blogger القلم السكندري said...

وأخيرا قرر الانتحار..

تزوج


انتحار لابد منه فرارا من الانتحار الآخر

مشكور يا مراكبي وده اول تعليق ليا بصراحة اللي جذبني لمدونتك تعليق ليك علي بوست كدة في حتة تانية

خليها في سرنا بقي

وطبعا بشكر جدو جدا جدا جدا علي اكرامه لينا بخلاصة تجربته وخبرته في الحياة

مع أن بصراحة الواحد بيحس أن الصنف

التاني كله.........

ولا بلاش

بس هنعمل ايه بقي

مضطرين نشجع المنتج الوطني

والبلدي يوكل

الخميس, أغسطس 09, 2007

 
Anonymous غير معرف said...

قريت لك بوستات كتير انت دمك خفيف و سلم على الحاجه ام العيال كتير اوى سلام

الخميس, أغسطس 09, 2007

 
Blogger يا مراكبي said...

Epitaph

الجواز بداية حياة؟ في الموروثات المصرية بيقولوا عن اللي بيتجوز إنه بيخش دنيا .. وكأنه قبل الجواز كان في الآخرة .. مع إني شايف العكس

:-D

المهم إن في آخر تعليقك قلتي الحق في الآخر .. شر لابد منه .. شر

الخميس, أغسطس 09, 2007

 
Blogger mo'men mohamed said...

كويس
زادوا واحد
على رأى واحد صاحبى
على العموم
جزاك الله خير السلام عليكم

الخميس, أغسطس 09, 2007

 
Blogger يا مراكبي said...

Hannoda

آه .. عارف

نفسي آخد تعليقك ده وأعمله بوست مخصوص

يادي الحب الأول

الخميس, أغسطس 09, 2007

 
Blogger يا مراكبي said...

gohayna

بتسألي ايه الكلام الي فوق دا؟ دي إسمها فضفضة بتخرج الذكريات اللي جوه الواحد من غير ما يحس

أنا بجد سعيد جدا بفضفضة الزملاء كلهم هنا

وبعدين ما تآخديش على كلامي يا دكتورة .. المتزوجين أجدع ناس .. وبعدين القصة دي رجالي مش حريمي

أشكرك على السؤال .. بس أنا مش في أجازة للأسف

الخميس, أغسطس 09, 2007

 
Blogger يا مراكبي said...

loumi

إيه الليي فكرك بالسيارة الحمراء دلوقت بس؟

الأسافين كترت قوي هنا

العيون والشفايف مجرد رمز للحب الأول .. ولو تحبي تباركيله بصحيح إبقى إطلعي عليه بقرص ومنين يوم الصباحية

:-D

منورة

الخميس, أغسطس 09, 2007

 
Blogger يا مراكبي said...

القلم السكندري

أهلا بيك

شكلنا كده إتقابلنا في مدونة بتتكلم عن الأسانسير .. صح؟

خليها في سرنا بقي فعلا

خد بالك أحسن البلدي ممكن يكون تقيل على المعدة

نورت

الخميس, أغسطس 09, 2007

 
Blogger يا مراكبي said...

غير معرف

متشكر جدا على الإطراء ده

الخميس, أغسطس 09, 2007

 
Blogger hend said...

اه احنا شكلنا هنبلغ المدام ونعمل خير واحنا بنحب نوجب معاك اوى هههههههههه
بجد ده بقى ايه حنين ولا حب دفين

الجمعة, أغسطس 10, 2007

 
Blogger shreef said...

يا سلام عليك يا مراكبي بس للاسف زي ما بيقولوا الحب بهدلة لكن بصراحة حلوة لان في الاخر انت قولت انه انتحر و انا افتكرته انتحر بجد لكن انت كملت و قولت انه اتجوز يعني بالنسبة ليك دا انتحار..الا قولي يا بشمهندس انت بتتكلم عن حد تعرفه انت مثلا لان السرد الدقيق ده لازم يكون الواحد عاشه علشان يوصفه..قول متقلقش المكان مش متراقب..تحياتي ليك..سلام

الجمعة, أغسطس 10, 2007

 
Blogger يا مراكبي said...

mo'men mohamed

مين دول اللي زادوا واحد؟ أنا شايفهم نقصوا واحد

:-D

الجمعة, أغسطس 10, 2007

 
Blogger يا مراكبي said...

hend

إنتو كلكم طلعتوا فتانين وأنا هأبطل أقول لكم على أي حاجة خالص بعد كده .. من هنا ورايح مارشات عسكرية ونشرات أخبار

قال حنين وحب دفين قال

:-D

الجمعة, أغسطس 10, 2007

 
Blogger يا مراكبي said...

shreef

إبن اللذين ده لا عمري شوفته ولا عرفته ولا عايز أعرفه

ده صاحب واحد صاحب واحد صاحبي

الظاهر إنه كان يوم أغبر يوم ما حكيت عنه

:-D

الجمعة, أغسطس 10, 2007

 
Blogger hend said...

عاجبنى اوى اوى اوى الديبيت اللى ورا البوست كالعادة .... بجد انا بحب اوى اشوف التعليقات اللى عندك على كل بوست و مبحبش ادخل اسيب تعليق عشان عارفة ان دمى تقيل و هبوظ خفة الدم المتناهية دى ...

بس قلت اطرطش شوية دم تقيل عندكم هنا فى البوست دا ... اهو اى دم يتطرطش حقنا للدماء ... دمى انا احسن من دم حد تانى يتسيح هنا ...الحمد لله ان المدام فى مصر بتاخد اجازة من المدونة بس يا عالم لما تفتح و تشوف اللى اتقال من وراها دا كله...

عيناها و شفتاها .... طب اذا الاخ دا كان فضل يحب فى الاخت دى و توكلوا على الله اتنيناتهم و انتحروا ... تزوجوا ... الحلوة دى مش كانت هيطلعلها تجاعيد و بكرة كمان تلبس نضارة كعب كباية و شفايفها يفسوا ؟؟؟ و يروح يدور على صورة منقحة من الصورة البهتانة اللى فى البيت ... شئ مثير للشفقة اوى ... مش كان يحب تفكيرها و لا ذكائها و لا طيبتها احسن و ابقى ....

الحب الاول ...

تكلمتم عنه فى التعليقات ... لم اجربه بعد ... أعتقد انها خيانة لزوج المستقبل ... ذلك الرجل الذى اتمنى ان اعطيه تلك المشاعر الرقيقة الاولى للحب ... ذلك الرجل الذى اريده ان يعلم جيدا انى لم احب احد قبله و لم استهلك مشاعرى مع احد قبله و ان مشاعرى له هو فقط لم يسبقه الىّ احد ... اتمنى ايضا ان يكون الحال كذلك معه ..انا اول امرأة يحبها

بعض الاصدقاء يشككون فى احتمالية حدوث ذلك ... لأن الحب يتلاشى بعد الزواج و لن احب اذا ابدا... و انى افوت علىّ اشخاص من الممكن ان تنجح العلاقة و تنتهى بالزواج ... لكنى مازلت متعلقة بفكرة عذرية المشاعر ... هل انا على صواب ام على الخطأ و انه حقا مثلما قال جدو و كثير من التعليقات الاخرى انه لا يوجد حب بعد الزواج و لا يوجد غير النكد و الشقاء وحلم العودة الى عمر ما قبل الزواج ؟

الجمعة, أغسطس 10, 2007

 
Blogger أحمد المصري said...

لازم دايما آخر كلمة تحمل المفاجأة الجميلة..رائع فعلا0
بس لازم يعني حتة اقتران الإنتحار بالزواج؟..طبعا المعنى ضاحك بس مش شايف إنه منطق خاطىء..ولا عشان انا مش مجرب؟

الجمعة, أغسطس 10, 2007

 
Blogger shaimaa said...

الرجالة فعلا
ميعرفوش يكدبوا
يا عينى عليكى يا حاجة

الجمعة, أغسطس 10, 2007

 
Blogger حسن ارابيسك said...

قلبي معاك
قصدي معاه
مشكله حينما يحب البعض حباً حقيقياً
ولا يُكتب لهذا الحب أن يعيش ويوثق برباط أبدي
يظل من أحب هذا الحب بجنون يبحث دائماً عن محبوبه أو محبوبته في شكل نسخه وصورة كربونيه فيمن أحب
ويظل دائما هكذا للأسف يبحث عن ملامح ليس إلا وينسى حتى ولو صادفه العثور على نسخه طبق الأصل فلن يجد روح من أحب
وتلك المشكلة البحث عن ملامح
وليس البحث عن روح يشعر معها بالتوحد والحب بعيداً عن أشكال وتفاصيل وملامح لن تجدي في حب حقيقي يبحث فيه عن عشق يتفانى من أجله
إذن لا عزاء لصاحبك فيما جنى على نفسه ولكن كل العتاب له فيمن ظُلم معه

الجمعة, أغسطس 10, 2007

 
Blogger ياسر سليم said...

طبعاً هى خطوة مجنونة انه يفكر فى الزواج

مش كان يقعد يستنى كمان عشرين تلاتين سنه وممكن كان يلاقيها قبل ما ينتحر

يلا


ربنا يرحمه

السبت, أغسطس 11, 2007

 
Blogger يا مراكبي said...

hend
التانية

متشكر جدا جدا على إطرائك بخصوص التعليقات .. وفي الحقيقة لازم نشكر أصحاب الفضل ده وهما الإخوة الزملاء والمعلقين .. ربنا يخليهم ليا دايما

وبعدين زيارتك لينا تسعدنا حتى لو مش كوميدية . .أهلا بيكي في أي وقت وبأي شكل تحبيه

أنا فعلا شايل هم اليوم اللي الحاجه هتفتح فيه المدونة وتقرأ كل اللي فاتها .. هأحاول أستخبى في القطب الجنوبي ساعتها .. خليكي إنتي بس محضر خير

أرجع بقى لتعليقك واسئلتك

في الحقيقة ما فيش قاعدة ثابته نقدر نعممها على كل الناس .. مش كل الناس بتعيش تجربة الحب الأول .. ومش كل الناس بتتجوز نتيجة الحب الأول .. مش كل الناس بتعيش في نكد بعد الجواز سواء بعد حب أو بدون حب .. كل حالة ليها خصوصيتها

المهم بجد إن الواحد يدعي لربنا بإنه يصلح له الحال ويكتب له الخير

نورتيني

السبت, أغسطس 11, 2007

 
Blogger يا مراكبي said...

أحمد المصري

متشكر على الإطراء الجميل

وبالنسبة لسؤالك .. المنطق ممكن يكون خطأ أو صح حسب الحالة .. الموضوع ده مش قاعدة أبدا

منور

السبت, أغسطس 11, 2007

 
Blogger يا مراكبي said...

shaimaa

مش أنا الراجل ده .. مش أنا

لازم يعني تندهي عالحاجة؟

السبت, أغسطس 11, 2007

 
Blogger يا مراكبي said...

حسن ارابيسك

قلبي معاك دي خبيثة قوي .. بس ماشي

فعلا بتبقى مشكلة كبيرة جدا إن الإنسان يبحث عن ملامح وليس عن روح .. بيبقى بحث دون جدوى

لكن عجبني كتير تعبيرك العاقل جدا ده: لكن كل العتاب له فيمن ظُلم معه

ده بجد صوت العقل اللي كتير بنفتقده في أغلب الأحوال

السبت, أغسطس 11, 2007

 
Blogger يا مراكبي said...

ياسر سليم

ياخبر أبيض .. وهو العمر فيه كام عشرين أو تلاتين سنه علشان يستنى حاجة جايز ما تحصلش؟ خليه يتجوز ويخش دنيا ويخلف له كام عيل .. أهو يبقى كسب أي حاجة وخلاص

حلو البق التقليدي ده؟ أي خدمة

السبت, أغسطس 11, 2007

 
Blogger أميرة ويلز said...

مراكبى

تصدق انا كمان استمعت والله

وكان نفسى نكمل مناقشة وانا فتحت موضوع عندى مش هيبعد كتير عن الحوار دة

ياريت تبقى تيجى تقولى رايك

بس خليك صريح

تحياتى ليك

السبت, أغسطس 11, 2007

 
Blogger momken said...

الحب كماء البحر .. كلما ازددت منه شربا .. ازددت عطشاً

الـــحـــب
ليـس بأن نعـيش في أحلام الحالـمين , وآهات العاشقين
فهذا مـا عرف مـن الحب إلا قشوره
ولم يتغلغل في بـحـوره
أو يقرأ سطوره

تحياتى

السبت, أغسطس 11, 2007

 
Blogger khaled said...

عيناها وشفتاها

شكلك كنت صايع يا مراكبى

احلى حاجه بقه البوست ده يروج لزوجتك

الأحد, أغسطس 12, 2007

 
Blogger Doba said...

نبأ هام لكل الأعزاء تتفضل الأستاذة المبجلة الصغنونة من غير فذلكة وينكى هانم بتقديم مسرحيتها الجميلة بساقية عبد المنعم الصاوى وذلك يوم الخميس المقبل الساعة السابعة مساءً بقاعة الحكمة وعلى الحاضر أن يعلم الغايب لمساندة أختنا العزيزة وينكى الغالية

http://pinsywinsy.blogspot.com/

تحياتى وأمنياتى بالتوفيق للجميع
هبة

الأحد, أغسطس 12, 2007

 
Blogger يا مراكبي said...

أميرة ويلز

أنا بأشكرك على متابعتك ودعوتك الجميلة دي .. هآجي عندك حالا .. إنتي عارفه إني دايما صريح مادام الحاجة مش واقفة جنبي

:-D

الأحد, أغسطس 12, 2007

 
Blogger يا مراكبي said...

momken

ده كلام كبير قوي قوي: الحب كماء البحر .. كلما ازددت منه شربا .. ازددت عطشاً

حقيقي تعبير معبر جدا وجديد عليا في نفس الوقت

تحية جامدة جدا .. وأهلا بيك

الأحد, أغسطس 12, 2007

 
Blogger يا مراكبي said...

khaled

أنا صايع؟ ده أنا غلبااااااان

وبعدين ليه بتحبوني قوي كده؟ كله أسافين كده؟

الأحد, أغسطس 12, 2007

 
Blogger يا مراكبي said...

Doba

علم وشكرا

أهلا بيكي .. وربنا يوفقها

الأحد, أغسطس 12, 2007

 
Blogger sarah la tulipe rose said...

قرر انه ينتحر ..فتزوج!!
طب علي الله المدام متكونش قريت الكلام دة!
بس ليه دايما بيبصوا للجواز علي انه كدة..ليه مش العكس؟

الأحد, أغسطس 12, 2007

 
Blogger kaed said...

ولو يامراكبى
برضة مش حعملها و أدبس .. قصدى أتجوز

الاثنين, أغسطس 13, 2007

 
Blogger يا مراكبي said...

sarah la tulipe rose

أنا ما بأخافش من المدام .. أنا جامد جدا وما يهمنيش

الحمد لله إن ما عندهاش وصلة إنترنت في البيت دلوقت

وبعدين قصدك إيه بالعكس؟ يعني قصدك إنه يتجوز الأول وبعدين ينتحر وألا ينتحر الأول وبعدين يتجوز؟

الاثنين, أغسطس 13, 2007

 
Blogger يا مراكبي said...

kaed

يا قائد يا أخويا .. الجواز علينا حق

ما تحاولش

الاثنين, أغسطس 13, 2007

 
Blogger S H A H said...

وحشتني والله يا مراكبي و وحشت الكويت كلها

ان شاء الله تكون مبسوط فين ما تكون

انا بقى داخل اسلم مش داخل اعلق على البوست الجامد ده

و عقبال ما انتحر انا كمان بقى

الاثنين, أغسطس 13, 2007

 
Blogger محمد said...

أزيك يا حاج مراكبي
عامل أيه
وحشتونا وحشتونا وحششتونا
معلش بقى حمدالله على السلامة متأخرة قوي
أزيك نفسي أشوفك
أنا على فكرة جبت 403.5 من 410 ودخلت طب فم وأسنان القاهرة زي ما كنت عايز
أبقى أبعتلي أميلك علشان أكلمك
مزمز كمان بيسلم عليك قوي قوي
وبيقولك وحشني

الاثنين, أغسطس 13, 2007

 
Blogger يا مراكبي said...

S H A H

الله يخليك ويبارك فيك .. سلملي عالسالمية جدا علشان دي كانت عشرة جامدة قوي

أول مرة أشوف حد نفسه ينتحر .. قصدي يتجوز

:-D

نورتني بجد

الاثنين, أغسطس 13, 2007

 
Blogger يا مراكبي said...

محمد علي

بجد بجد أنا فرحت جدا لما لقيت تعليقك اللي فيه الخبر السعيد ده .. ألف ألف مبروك .. أيوه كده إتخرج بسرعة علشان أسنان أخوك بايظة عالآخر ومحتاجة عمره

هأستناك لحد ما تتخرج وتتدرب فيا

الاثنين, أغسطس 13, 2007

 
Blogger كراكيب عادل said...

ازيك واحشني جداا

اية اخبارك ؟؟

تعرف انا بكتبلك التعليق دة من مقابل شقتك في الكويت حتي قدام مني يافطة الدكتورة صبرية صالح وشايف تحت مطعم اسطمبولي قلت افكرك عموما الشارع هيترصف قريب والجو ابتدا يتحسن والمشغل الي تحت لسة متاجرش هههههههه انا قلت اديلك شوية اخبار

بالنسبة للعيون والشفايف مش يمكن لو اتجوز بطل قصتك ام العيون الحلوة والشفايف كان ممكن ينتحر بجد

يعني الواقع حلو ولو اقتنع بالزوجة
هيلاقي حجات كتير جميلة مستخبية

الزوجة الصالحة نعمة يا عم الحج

بلا عيون بلا شفايف هو انا هتجوز موديل ولا هاختار زوجة ونرجع للحديث الشريف

اكيد عارفة

تحياتي من السالمية ارجع بقي
:(

الاثنين, أغسطس 13, 2007

 
Blogger قلب أبيــض said...

يعنى ايه كلمة وطن
سؤال محتاج من كل واحد فينا اجابة
شاركونى برايكم
قلب أبيض

الثلاثاء, أغسطس 14, 2007

 
Blogger bastokka طهقانة said...

فين؟
شرم و لا الساحل؟
و لا مقضيها نوادي و بسينات

يلا
متنساش العوامة


اوروفوار

الثلاثاء, أغسطس 14, 2007

 
Blogger يا مراكبي said...

كراكيب عادل

إنت اللي واحشني والله .. وياريت دايما توافيني بأخبار السالمية .. أنا شميت ريحتها من أول ما شوفت تعليقك .. شامم؟

أنا قعدت إسبوع في مصر .. وبعدين إسبوع في السعودية .. وبعدين إسبوع في مصر ومسافر الجمعة الجاية تاني إن شاء الله

بالنسبة بقى للعيون والشفايف والزوجة وأم العيال والحاجات دي .. أنا ما بأتكلمش في السياسة زي ما إنت عارف .. لكن اللي أنا عارفه إنك شوية وهتغير رأيك لأن عندك في السالمية عيون وشفايق من اللي عالفرازة

وش بيغمز

الأربعاء, أغسطس 15, 2007

 
Blogger يا مراكبي said...

قلب أبيــض

يعنى ايه كلمة وطن؟

تاني بتيجي على جرحي .. الموضوع ده أخد معايا وقت طويل جدا

عموما هآجي أشوف الموضوع وأشكرك على الدعوة

الأربعاء, أغسطس 15, 2007

 
Blogger يا مراكبي said...

bastokka طهقانة

متشكر على سؤالك .. لا فيه شرم و لا فيه ساحل ولا مقضيها نوادي و بسينات .. شغال مل يوم في مكتب القاهرة من 9 الصبح ل10 بالليل وكمان طلعت إسبوع جده في النص كده

آخر مرة أخدت فيها أجازة كان السنة اللي فاتت وكانوا 13 يوم بالعدد

مسيرها تروق وتحلى إن شاء الله

الأربعاء, أغسطس 15, 2007

 
Blogger ღღ فــوضــى الــحــواس ღღ said...

بوست رائع .. القصة حالمة و رقيقة فعلاً ذكرتنى برواية أحسان عبد القدوس الوسادة الخالية
"في حياة كل منا وهم كبير اسمه الحب الأول"
اعتقد كان لازم تسمى البطل صلاح
بالتوفيق

السبت, سبتمبر 01, 2007

 
Blogger يا مراكبي said...

ღღ فــوضــى الــحــواس ღღ

خلاص المرة الجاية نمشيها صلاح علشان خاطرك

:-D

متشكر جدا على زيارتك وعلى تشجيعك

نورتي

السبت, سبتمبر 01, 2007

 

إرسال تعليق

Links to this post:

إنشاء رابط

<< Home