ظرفني تعرفني

حبيت أطمنكم قبل ما أسافر من مصروقلت أزف إليكم خبر سعيد وهو إني خلصت كل الأوراق الرسمية المطلوبة مني بسهولة ويسر وسلاسة في البول .. قصدي سلاسة في الإجراءات .. حققت النجاح الرائع ده في الوقت القصير جدا ده رغم الروتين والبطء الموجودين في كل المصالح الحكومية .. كل ده وما إحتاجتش الحكومة الإلكترونية في أي حاجة .. وده لأني طبقت نصيحة الأعداء قبل الأصدقاء ومشيت على مبدأ معروف جدا وهو: ظرفني تعرفني
.
ولكي تعم الفائدة .. حلوة تعم دي؟ حبيت أوضح المعنى اللغوي للمبدأ السلكاوي ده .. وكمان إيه الكلمات المترادفة اللي بتدي نفس المعنى علشان الكل يبقى فاهم وواعي ومصحصح للموضوع ده .. وخصوصا إنه بقى مصدر مهم من مصادر الدخل القومي .. وعلشان كمان الزملاء اللي مسافرين بره يفهموها من أول مرة يتعرضوا ليها وما يبقاش شكلهم وحش وكأنهم جايين من كوكب آخر
.
وكلمة ظرفني مصدرها هو إنك تحط فلوس في ظرف وتديها لحد ما تعرفوش لكنه مسئول عن معاملة رسمية .. وبعد ما يستلم منك الظرف هتلاقي إنكم سبحان الله تعرفوا بعض من زمان وتلاقيه حريص إنه يقضيلك مصلحتك بسرعة حتى لو قانونا ما تمشيش .. الظرف ده بقى تطور شكله مع الزمن وبقى أحيانا درج مكتب وأحيانا لا فيه ظرف ولا فيه درج مكتب .. تديله الفلوس في إيده أو جيبه على طول .. أما في المستويات الأعلى من كده فبيكون شكله هو تحويلات بنكية لحساب الشخص اللي بقى معرفة ده .. والأعلى من كده كمان بيكون الحساب ده برة مصر خالص .. وغالبا في سويسرا
.
المرادف التاني على طول وغالبا ليه أصول سواحلية هو: إبرز تنجز .. وإبرز هنا معناها إنك تطلع الفلوس .. مش معناها اللي جه في بالكم ده وبيحصل في الحمام .. أما كلمة تنجز فدي معناها إن مصلحتك مقضية إن شاء الله بمجرد تحقق فعل الإبراز.. أكرر مرة تانية .. الإبراز مش التبرز .. بس شوفتوا الجرس الموسيقي؟ ظرفني تعرفني .. وإبرز تنجز .. مزيكا والله
.
المرادف التالت بقى هو: أبجني تجدني .. الباء تحتها كسرة وشدة على فكرة .. وأبجني هنا بتعني تماما ظرفني بالفلوس أو إبرز الفلوس .. ومصدرها اللغوي مجهول لحد دلوقت وإن كان فئة العوالم والراقصات زمان كانوا بيقولوا على الفلوس أوباييج .. ما علينا .. أما كلمة: تجدني .. فمعناها واضح ومرتبط بالمعرفة والإنجاز اللي إتكلمنا عنهم فوق .. سهلة مش كده؟
.
نيجي بقى للمرادفات الأقل تأثيرا واللي الواحد مننا بيتنح شوية لحد ما يفهم معناها .. وهي على سبيل المثال لا الحصر: كل سنة وإنت طيب يا بيه .. أي خدمة .. كلك نظر .. كلك مفهومية .. فتح مخك .. إرمي بياضك .. داوو مرضاكم بالصدقة .. وطبعا زي ما إنتم شايفين إنها كلها كلمات معناها الظاهري ما يديش أبدا إحساس بإن المقصود منها دفع الفلوس أو التظريف أو الإبراز أو التأبيج
.
وطبعا أنا عارف إن فيه فئة ضالة ومغرضة من أعداء النجاح هيطلعوا ويقولوا إن كل ده إسمه رشوة .. وأنا أحب أرد عليهم بأعلى صوت وأقول لهم عيب لما نقول كده على ولاد بلدنا .. وخصوصا إن الموضوع ده واصل لكل المستويات .. وهي دي الطريقة اللي بتسرع كل المصالح حتى لو كانت إيه .. أما صحيح شعب كسول وغاوي عطله وتنبله.. مش عايزينا ننجز وألا إيه؟