شد القلوع يا مراكبي ... مافيش رجوع يا مراكبي

الأحد، أغسطس 26، 2007

طفل آخر جديد

بعد أن ترددت كثيرا .. أدارت قرص الهاتف لتتصل بزوجها في مكتبه لكنها لم تجده .. فكرت ثانية ثم قررت أن تتصل به على هاتفه المحمول .. وبعد فاصل من الرنين الطويل جاء صوته مقتضبا كعادته معها في تلك الأيام الأخيرة .. كان يبدو من طبيعة الأصوات التي تأتي إليها عبر الهاتف أنه في مطعم ما تحوطه الموسيقى الهادئة .. يبدو وكأنه مكان يتجمع فيه العاشقون
.
سألته عن ذلك المكان الذي هو فيه .. لكنه تهرب من الإجابة .. كانت تعلم أنه سيتهرب منها .. لابد وأنه مع تلك الموظفة الجديدة التي وظفها لديه مؤخرا ثم تعلق بها .. هكذا أخبرتها زوجة شريكه في العمل منذ شهرين .. استجمعت شجاعتها وفاجأته بسؤالها عن تلك الموظفة .. أجابها ببرود وثبات بأنها بالفعل بصحبته الآن في ذلك المطعم
.
تماسكت قليلا ثم أخبرته بأن ابنه الصغير يريد أن يحادثه .. أعطت السماعة للصغير .. تحدث الصغير بصوت ضعيف ليقول: أبي .. أريدك بسرعة .. فأنا مريض وأريدك أن تصحبني إلى الطبيب .. فالوقت متأخر الآن
.
وبعد مرور أقل من نصف ساعة .. حضر الزوج بسرعة ولهفة .. احتضن الصغير وحمله إلى الخارج ليذهب به إلى الطبيب .. وبعد أن خرجا .. دخلت إلى غرفتها .. أخذت تمشط من شعرها الذي صبغته باللون الذهبي كشعر تلك الموظفة الجديدة .. ارتدت ثيابا تكشف أكثر مما تستر .. تعطرت بشدة وجلست على طرف الفراش .. لقد أدركت أنه قد حان الوقت لكي تنجب طفلا آخر

التسميات:

88 Comments:

Blogger مهندس سري said...

يااااااااااااااااااااه ، ايه ده يا راجل، يا سلام على البوسط اللي زي صاحبه في الطعامة، ألا بالحق الراجل صاحبك ما عندوش دم وايد
شد قلوعك يا مراكبي
و كود لاك

الأحد, أغسطس 26, 2007

 
Blogger كراكيب عادل said...

درع بشري

:)

الاثنين, أغسطس 27, 2007

 
Blogger S H A H said...

لازم اعترف اني و انا بقرلك بفضل مشدود لاخر سطر بجد

اتحفتني

قصة على قد قرها على قد ما هيا مثيرة بجد

الاثنين, أغسطس 27, 2007

 
Blogger shams said...

حبيب قلبي سيب الهندسة و اتجة للتاليف

الاثنين, أغسطس 27, 2007

 
Blogger Marvel - واحد زهقان said...

كريمة مختار قالتها حكمة: الراجل مايربطوش في بيته غير العيال

قصة هايلة واسلوب متميز :D

الاثنين, أغسطس 27, 2007

 
Blogger اسكندراني اوي said...

نعم يا خويااااااااااااا

طفل اخر
تعتقد دا الحل

ولا حياه جديده
هو دا الحل

مش تقولي طفل اخر

يا مراكبيييييييييييييييي

الاثنين, أغسطس 27, 2007

 
Blogger فى القلب said...

روعه روعه روعه
يا لا رقتها وتفهمها وعقلها الواسع
وحبها لزوجها وبيتها
كل ذلك ظهر فى بضع كلمات
شكرا لك يا مركبى أنك أوضحت جانب داخلى فى المرأه
أبدعععععععععععععععععععععععععععت

الاثنين, أغسطس 27, 2007

 
Blogger مـحـمـد مـفـيـد said...

حبيبي أحمد باشا
أشهد بأنك فنان كبير وكاتب جامد جداً
بجد مبدع

الاثنين, أغسطس 27, 2007

 
Blogger عدى النهار said...

إيه يا عم الحاج الجوز (الزوج) المضروب ده
(:

الاثنين, أغسطس 27, 2007

 
Blogger Rania said...

تحفة زى العادة طبعا
بس فعلا
طفل اخر ليس هو الحل
الحل يكمن فى العلاقة بين الرزوج و الزوجة ىو كيفية التجديد و اشتعال الحب اكثر من الاول
و القضاء على الحياه الرتيبة و التى تجعل الزوج يفكر فى امراه اخرى
اعتقد ان طفل اخر سوف يجعل الحياه رتيبه و ممله اكثر من الازم انهم احباب االلله اكيد
و ايضا لا يمكن تصور بيت بدون طفقل فانهم نعمة من الله
و لكن فى هذة القصة اعتقد ان طفل اخر يعنى انشغال الزوجة بطفللاها عن زوجها
و يعنى ايضا اهمال للزوج
اكتر من الازم
تحياتى لك يا مراكبى

الاثنين, أغسطس 27, 2007

 
Blogger خمسة فضفضة said...

السلام عليكم ورحمة الله وبركاته

والله الست دي قمة في الزكاء
وصدق اللي قال اغلبيه بالعيال يغلبك بالمال ....ههههههه


تحياتي لحضرتك وكل سنة وانت طيب

الاثنين, أغسطس 27, 2007

 
Blogger حــلم said...

هو دة الكلام
قصة قصيرة زى ما الكتاب بيقول

التشويق والحبكة والفكرة قبل كل شىء

جميلة يا مراكبى
مش عايزة اقول زى اخواننا بتوع موقع القصة
ان السرد جاء على مستوى الحدث وان البناء الفنى جيد ومتماسك وان الشخوص عبرت عن ذواتها ببراعة رغم الاختزال

خلينا حلوين
القصة جميلة يا مراكبى
:)

الاثنين, أغسطس 27, 2007

 
Blogger A L A B D E L R H M A N . said...

مساء الخير وكل سنة وانتو طيبين
بمناسبة قروب رمضان

بوست جميل يامراكبي
وحيرة اجمل



تحياتى
.العَبدِالرَحَمن

الاثنين, أغسطس 27, 2007

 
Blogger Hannoda said...

تفتكر في زوجة بالعقل ده كله؟؟

وتفتكر ده عقل؟؟

ولاذ يأس
ولا تحايل على المشاعر و الطبيعة

ولا تسليم بأمر واقع أصبح معتاد عليه في حياتنا

بصرف النظر عن كلالتساؤلات التي أثارتها قصتك القصيرة جدا

إلا انها جميلة جدا
وبما أن المجاملة لا مكان لها هنا
فأنا عاوزة أسألك.. هي الكتابات اللي تخليق تاخد لفة طويلة جوة نفسك و انت ماشي بخطى بطييئة لحد ما ترجع متنح ومش عارف حاجة

ينفع نقول عنها ايه؟؟؟؟؟؟؟؟

الاثنين, أغسطس 27, 2007

 
Blogger كراكيب نـهـى مـحمود said...

قد ايه جميل

الاثنين, أغسطس 27, 2007

 
Blogger أميرة ويلز said...

هى دى الست العاقلة الكاملة
هى الاصل برده مهما يلف ويدور برة البيت لازم يرجع لبيته ومراته وولاده

بس هو عينه فارغة اوى كل دة عشان الشعر الاصفر

بوست حلو اوى يامراكبى بس انت بتتأخر ليه كدة؟؟؟

الاثنين, أغسطس 27, 2007

 
Blogger أحمد المصري said...

بصراحة انا متفق مع شمس في تعليقه00
سيب الهندسة واتجه للتأليف..واهه أحسن من الغربة00قصصك جميلة جدا0

الاثنين, أغسطس 27, 2007

 
Blogger Anima said...

يابني الكلام ده كان ايام زمان

اما دي الوقت هي لو عايزة تربطه حتربطه بمؤخر صداق كبير قوي

و الحمدلله انهم عملوا عندنا مدونة اسرة جديدة يعني الراجل ما يقدرش يفارق مراته


و كمان الراجل في حياته مش حيلاقي واحدة احلى من مراته و لو لف العالم كله

الا هي ايه اخبار الحاجة؟
ههههههههه

الاثنين, أغسطس 27, 2007

 
Blogger اسكندراني في الغربة said...

لو جرحت المرأة بأخري
استحمل يا معلم الي يحصل
صح كدة؟؟

الاثنين, أغسطس 27, 2007

 
Blogger Gid-Do - جدو said...

مراكبى

بعد ما اخدت عشرة على عشرة من العزيزة حلم على القصة بصفتها ناقد حريف اقول لك مبروك على القصة ـ وبصراحة قصة فى الجون

تعالى بقى نترجم دة لواقع ـ فية واحد مهندس كنت اعرفه ـ صدفة دية مش تلقيح عليك ـ عايش فى مصر اتجوز اللى بيحبها وكان عندة مكتب لاعمالة والشغل مزدهر فى بداية الثمانينات ـ عين فية سكرتيرة حب السكرتيرة واتجوز السكرتيرة وجبها تعيش مع الزوجة الاولى فى نفس الشقة الزوجة الاولى راحت لااهلها ورجعت بعدين علشان كان معاها طفل ورضيت بالامر الواقع ـ اخونا كان قلبة كبير ومبيحبش يغضب الله حسب كلامة عين السكرتيرة رقم اتنين وبعدها بقت الزوجة رقم تلاتة ـ وقطعت اخبارة عنى

مع راجل زى دة لابد من الحرص على مستقبل الاولاد ـ بمنع الحمل ـ تحياتى

الثلاثاء, أغسطس 28, 2007

 
Blogger بالله المستعان said...

بجد يا باشمهندس بحب اسلوبك جدا
في الكتابه
بجب اوي نهاياتك الغير متوقعة

بس الزوجه دي متامره
هههههههههه

تحياتي لك يا مركبي
متجول في بحور الحياة
ولا يسكن الا بقلوب البشر

الثلاثاء, أغسطس 28, 2007

 
Blogger coca said...

جميل

الثلاثاء, أغسطس 28, 2007

 
Blogger يا مراكبي said...

مهندس سري

متشكر جدا جدا على الكلام الجميل ده .. بس ماله صاحبي مش عاجبك ليه؟ علشان يعرف بنت شقرا وإنت لأ؟

:-D

منورني دايما

الأربعاء, أغسطس 29, 2007

 
Blogger يا مراكبي said...

كراكيب عادل

بالظبط كده .. طول عمرك تفهمها وهي طايرة

الأربعاء, أغسطس 29, 2007

 
Blogger يا مراكبي said...

S h a h

ده بس من ذوقك .. متشكر جدا جدا

أهلا بيك دايما

الأربعاء, أغسطس 29, 2007

 
Blogger يا مراكبي said...

shams

ده كلام كبير قوي .. هتخليني أصدق إني بأعرف أكتب وألا إيه؟

ولو إنها فكرة برضه .. ما هو العلم لا يكيل بالبتنجان اليومين دول

أهلا بيك

الأربعاء, أغسطس 29, 2007

 
Blogger يا مراكبي said...

Marvel - واحد زهقان

حلوة حكمة كريمة مختار دي .. بس أنا كل اللي فاكره ليها كان إعلانات تنظيم الأسرة .. عكس الحكمة دي خالص

متشكر قوي على التعليق ده .. بس إنت لسه برضضه زهقان؟

الأربعاء, أغسطس 29, 2007

 
Blogger يا مراكبي said...

اسكندراني اوي

خلاص يا بيه .. حرمت خلاص

أستر عليا الله يسترك

مشيها طفل جديد بدل حياة جديدة بس خليها في سرك

الأربعاء, أغسطس 29, 2007

 
Blogger يا مراكبي said...

فى القلب

متشكر جدا على الإطراء الرقيق ده .. دي بجد شهادة أعتز بيها وخصوصا إنها من الجنس الآخر

منورة

الأربعاء, أغسطس 29, 2007

 
Blogger يا مراكبي said...

مـحـمـد مـفـيـد

تعليقك ده بأعتبره وسام بجد

أشكرك جدا على رأيك فيا ده

منورني

الأربعاء, أغسطس 29, 2007

 
Blogger يا مراكبي said...

عدى النهار

هو مضروب وبس .. ده مضروب بالجزمة القديمة

ههههههه

منور

الأربعاء, أغسطس 29, 2007

 
Blogger يا مراكبي said...

Rania

وجهة نظرك في محلها طبعا وممكن تحصل زي ما إنتي قلتي كده

لكن أنا قصدي من القصة هنا هي إن الزوجة قدرت تكتشف في جوزها الحاجة اللي تعرف تستعيده بيها من تاني

الطفل الصغير المريض مجرد رمز

أهلا بيكي

الأربعاء, أغسطس 29, 2007

 
Blogger حسن ارابيسك said...

كل ست شاطره بتعرف مفاتيح زوجها فين
لكن العقلية التي طرحتها لنا لم تكن بالمعنى المتخلف الذي يتصوره البعض
بالعكس لانها تحب ومتمسكه بهذا الحب وهذا الرباط المقدس أرادت ان توثق عروة ذلك الحب أكثر وأكثر وأن تجعل من ابنائها عقد من اللولي يطوق عنقها هي قبل ان يطوقه هو

الأربعاء, أغسطس 29, 2007

 
Blogger يا مراكبي said...

خمسة فضفضة

وعليكم السلام ورحمة الله وبركاته

الستات كلهم في قمة الذكاء .. إسأليني انا

هههههه

كل سنة وانتي وأسرتك جميعا طيبين وبخير

الأربعاء, أغسطس 29, 2007

 
Blogger يا مراكبي said...

حــلم

الناس بتوع موقع القصة عمرهم ما قالوا عني حاجة زي كده .. دول بيقطعوني ويشرحوني وبيطلعولي أخطاء بالهبل

عموما دي شهادة أعتز بيها من كاتبه قديرة زيك

نورتي

الأربعاء, أغسطس 29, 2007

 
Blogger يا مراكبي said...

A L A B D E L R H M A N . said...


أهلا بيك بعد طول غياب

كل عام وإنت بخير

هنفضل طول العمر في حيرة .. صدقني

الأربعاء, أغسطس 29, 2007

 
Blogger يا مراكبي said...

Hannoda

سألتي أسئلة كتيرة قوي .. بس كلها جميلة جدا

فيه زوجة بالعقل ده كله؟ بجد مش عارف .. ماشفتش لسه بصراحه

تفتكر ده عقل؟ أيوة أفتكر طبعا

وده مش يأس .. بالعكس .. ده الأمل كله

لكنه فعلا تحايل على المشاعر و الطبيعة

ومش تسليم بأمر واقع ومش ده المعتاد عليه في حياتنا طبعا

لو كا ليا شرف إن البوست فعلا عمل معاكي التأثير اللي قلتي عليه ده يبقى السبب هو ده
http://yamarakby.blogspot.com/2006/12/blog-post_05.html#links

الأربعاء, أغسطس 29, 2007

 
Blogger بنوتة من وسط البلد said...

البوست رائع
يا لقوة المرأة

بس هى لازم تفكر كويس

ايش عرفها انها مش هتقعد بعد كده هى بالطفلين وهو يكون قاعد فى نفس المطعم


التغيير لازم يبقى جذرى
وبارادة وتصميم وباسلحة الدمار الشامل

:)

اسلوبك اكتر من رائع

الأربعاء, أغسطس 29, 2007

 
Blogger يا مراكبي said...

كراكيب نـهـى مـحمود

أهلا بيكي يا مؤلفتنا الكبيرة

متشكر جدا على دعمك ده

الأربعاء, أغسطس 29, 2007

 
Blogger يا مراكبي said...

أميرة ويلز


طبعا .. مين يشهد للعروسة

مش كل الستات يستاهلوا إن الواحد يلف ويرجعلهم .. ومش كل الرجالة بيجروا ورا أي شعر أصفر .. وفيه رجالة أندال كتير برضه

كل حاجة موجودة ومتوفرة

أنا طبعا بأشكرك جدا على إهتمامك بس حقيقي أنا بأشتغل لحد 10 و11 بالليل اليومين دول .. كويس جدا إني لسه متواصل معاكم وده الأهم

منورة يا أميرة

الأربعاء, أغسطس 29, 2007

 
Blogger يا مراكبي said...

أحمد المصري

أنا متشكر قوي على رأيك ده .. بس إنتوا يا جماعة ضامنين موضوع إن التأليف بيأكل عيش في الزمن الثقافي اللي إحنا فيه ده؟

إزاي الوالد دلوقت؟

الأربعاء, أغسطس 29, 2007

 
Blogger يا مراكبي said...

Anima

معلش أصل أنا دفعة قديمة شوية

إيه اللي جاب سيرة الحاجة دلوقت بس؟ دايما كده أسافين؟

أنا بعيد عن إيديها اليومين دول

الأربعاء, أغسطس 29, 2007

 
Blogger يا مراكبي said...

اسكندراني في الغربة

صح يا معلم

كلامك كله حكم بجد

نورت

الأربعاء, أغسطس 29, 2007

 
Blogger يا مراكبي said...

Gid-Do - جدو

ولو إن تعليقك ده ممكن يسببلي مشكلة جامدة جدا مع الحاجة .. لكن أنا معاك جدا في موضوع منع الحمل ده .. كلام سليم

هو كان صاحبك قوي يا جدو؟

الأربعاء, أغسطس 29, 2007

 
Blogger يا مراكبي said...

بالله المستعان

الله يخليكي ويجبر بخاطرك

الكلام ده كبير قوي ومبدع وبأشكرك عليه جدا: متجول في بحور الحياة
ولا يسكن الا بقلوب البشر

نورتيني

الأربعاء, أغسطس 29, 2007

 
Blogger يا مراكبي said...

coca

أشكرك بشده

نورتي

الأربعاء, أغسطس 29, 2007

 
Blogger يا مراكبي said...

حسن ارابيسك

برافو عليك يا بوعلي

فعلا النموذج ده مش متخلف .. ده نموذج ناضج ومتفتح وذكي

دايما بتفهمها وهي طايرة وقبل ما تنزل على الأرض

منور

الأربعاء, أغسطس 29, 2007

 
Blogger يا مراكبي said...

بنوتة من وسط البلد

دي زيارة كريمة جدا وتعليقك فيه أكتر من وجهة نظر محتمله وممكنة في نفس الوقت

أهمهم أسلحة الدمار الشامل طبعا

نورتيني بجد

الأربعاء, أغسطس 29, 2007

 
Blogger همسات said...

رائعة حقا
بجد بجد
والنهاية تحفة تحفة
احيك بجد
:)

الأربعاء, أغسطس 29, 2007

 
Blogger يا مراكبي said...

همسات

ده من بعض ما عندكم

متشكر جدا جدا

منورة

الأربعاء, أغسطس 29, 2007

 
Blogger Epitaph said...

The Plot is just moulded in the right way!Though the story is not much descriptive, but it was to the point and I liked how it ended!!

women are indeed unpredictable!!

:)

الخميس, أغسطس 30, 2007

 
Blogger يا مراكبي said...

Epitaph

جميل قوي النقد الجميل ده .. وفعلا ردود أفعال المرأة دايما غير منوقعه .. شهادة وإعتراف من نفس الجنس اللطيف

نورتي

الخميس, أغسطس 30, 2007

 
Blogger Reemo said...

بص يا مراكبى
اى شخص فى الدنيا لو قرر انه ينهى علاقه ما فى حياته
مفيش حاجه فى الدنيا ترجعه
وخاصه الرجال لو قرر انه ينهى زواجه
ولا طفل ولا ميه هيرجعوه عن قراره
العلاج مش فى زياده الأطفال
العلاج فى محاوله لاستعاده المشاعر والموده مره اخرى

بس بجد ايه المواهب دى
القصح حلوه بجد
:)))
تحياتى

الخميس, أغسطس 30, 2007

 
Blogger hend said...

والله هو لا عيل ولا غيره هيقدر يربطه المهم انها تحاول تفهمه وتفهم هو ليه بيعمل كده يمكن يكون الغلط منها

الخميس, أغسطس 30, 2007

 
Blogger القلم السكندري said...

طفل آخر ايه..

أنظر حولك

بس بصراحة قصة لذيذة

وأعتقد فعلا ان اهمال المرأة في نفسها هو اللي بيسهل الطريق علي زوجها انه يبص برة

واهو كله تغيير برده

:D

تسلم يا هندسة علي القصة المتهندسة

بس علي فكرة

حتي لو حد تاني بينتقد وبيطلع اخطاء علي مستوي فني فده دليل علي أن عملك يرتقي لمستوي النقد الفني

ودليل تفاعل مع العمل برده

تسلم يا جميل

الخميس, أغسطس 30, 2007

 
Blogger julieeet said...

هي بجد تحفه
بس ده هيزيد المشكله تعقيد
بس الزوجه دي عاقله جدا وواضح انها
بتحب زوجها جدا وعايزه تحافظ علي بيتها
ياريت تزورني وتقولي رايك


سلاماتي

الخميس, أغسطس 30, 2007

 
Blogger اعشق فى اليل ضوء القمر said...

يا مركبى
بجد أزهلنى أسلوب القصه القصيره
لكن نتكلم عنها شويه تفتكر لما واحده يتسلل فى قلبها إن زوجها بيخونها أو يتعامل مع أنثى أخرى لما تسأله عنها يقول إنه معاها ولاى يخبى
لكن موضوع العيال وإنجاب طفل جديد عجبتنى يعنى كان حل منها تقرب المسافاتفى حين طفلها الأول مريض إلا قلب الزوج تلهف على إبنه
قصه جميله

الخميس, أغسطس 30, 2007

 
Blogger يا مراكبي said...

Reemo

هو فيه وفيه

فيه ناس أعرفها ما بيهمهاش الأولاد وبينهوا علاقاتهم بسهولة زي ما قلتي

وفيه ناس أعرفها بتيجي على نفسها وتستحمل علشان الأولاد لحد آخر العمر

المهم .. متشكر جدا على إطرائك الرقيق

الخميس, أغسطس 30, 2007

 
Blogger يا مراكبي said...

hend

ممكن طبعا يكون الغلط منها .. ده إحتمال كبير

لكن العيل ده مش هيربطه طبعا .. هو بس رمز للشيء اللي هي لازم تكتشف إنه ممكن يربطه بيها

منورة

الخميس, أغسطس 30, 2007

 
Blogger يا مراكبي said...

القلم السكندري

يااااه .. إنت لحقت أيام أنظر حولك؟

اهمال المرأة في نفسها هو أحد الإحتمالات اللي بتسهل الطريق علي زوجها انه يبص برة طبعا .. ده لو خو أصلا ما كانش خلبوص .. لكن لو خلبوص يبقى مش هتفرق

واهو كله تغيير برده

:D

متشكر جدا على رأيك فيا .. الله يجبر بخاطلرك

الجمعة, أغسطس 31, 2007

 
Blogger Rozza!.......فاقد الذاكرة said...

صراحة القصة حلوة اوي
بس بعد الطفل ده والاطفال القادمة
حيحصل ايه
هوا انشغال بالاطفال وامور الحياة
ولا البحث عن كل جديد؟
وبصراحة مرة ثانية , تفكير النساء غريب

الجمعة, أغسطس 31, 2007

 
Blogger يا مراكبي said...

julieeet

طبعا هنا في القصة بنلاقي الزوجة ست العاقلين .. ذكية ومتفتحة وبعيدة النظر

أنا جيت عندك مالاقيتش فيه مدونة .. إنتي مخبياها فين؟ ممكن تبعتيلي اللينك يتاعها؟

نورتيني

الجمعة, أغسطس 31, 2007

 
Blogger يا مراكبي said...

اعشق فى اليل ضوء القمر

لاحظ إن أبطال القصة هنا ليهم عقليات متفتحه وصريحة إلى حد كبير .. إحنا هنا بنطرح نماذج جديدة من الرجال والنساء

يعني هو ما خباش زي ما العادي بيحصل ولا هي كمان زعلت وسابته زي ما في العادي بيحصل

عموما عجبني رأيك وأهلا بيك دايما

الجمعة, أغسطس 31, 2007

 
Blogger دنــــيــــــا مـحـيـرنـي said...

ايه الجمال و التجديد ده في تناول الفكره و الشخصيات بجد تحفه مع اني مختلفه في رد الفعل
الراجل لو عايز يسيب بيته و لا الف عيل ممكن يرجعه و الاي عايز يمشي ما يستحيلش ان الست تجري وراءه معلشي بقي ده و جهة نظري جدا لو كنت في مكان الست ده
الاي يبيعك بيعه و اكسر وراءه كمان قلل الدنيا كلها معلشي اصل الموضوع ده بينرفزني جدا
بس بجد اسلوبك و سردك للقصه حلو جدا جدا
تحياتي

الجمعة, أغسطس 31, 2007

 
Blogger امرأة تقول الذي لا يقال said...

انت قاطعتنى خلاص؟ ):

الجمعة, أغسطس 31, 2007

 
Blogger القلم السكندري said...

بالنسبة لرأيي أنا قلت ان البوست رائع

وأن حتي لو في حد انتقده ده برده في صالح ابداعاتك ودليل تفاعل

لكن لم أوافق منتقد




للتوضيح فقط

ولك موفور التحية

الجمعة, أغسطس 31, 2007

 
Blogger يا مراكبي said...

Rozza!.......فاقد الذاكرة

هو صحيح كل الإحتمالات اللي قلتها ممكنة .. لكن هنا قصتنا بتتنبأ بإنه هيرجع لها .. وبقوة

إن شاء الله تكون إستقريت من جديد

الجمعة, أغسطس 31, 2007

 
Blogger يا مراكبي said...

دنــــيــــــا مـحـيـرنـي

أولا أنا متشكر على إطراءك وتقديرك وخصوصا إنك بتمثلي برضه خبرة حياتية يعتد برأيها في المواضيع اللي زي كده

رد فعلك اللي إتكلمت عنه ده شعور طبيعي للمرأة ما أقدرش أنكر كده .. وده بالنسبة للرجالة برضه على فكرة

عكس كده زي ما أنا قصدت في قصتي هنا بيكون نادر وبيتطلب تفكير من نوع مختلف يندر وجودة لكن لا يستحيل وجودة

أشكرك مرة تانيه .. نورتيني

الجمعة, أغسطس 31, 2007

 
Blogger يا مراكبي said...

امرأة تقول الذي لا يقال

قاطعتك؟ إزاي بس تقولي كده؟ أنا جايز أكون بأتأخر لكن مش ممكن أعمل كده أبدا

الجمعة, أغسطس 31, 2007

 
Blogger يا مراكبي said...

القلم السكندري

يافندم إنت منورني سواء كنت مؤيد أومعارض .. وأنا فاهم طبعا إنك واقف جنبي دايما

مش عارف أشكرك إزاي على إهتمامك ومتابعتك

الجمعة, أغسطس 31, 2007

 
Blogger Tamer Nabil said...

بوست جميل.

الى الامام ياصاحبى

تحياتى

الجمعة, أغسطس 31, 2007

 
Blogger مُزمُز said...

ازيك يا باشمهندس أحمد

ليك وحشة والله

ابقى زور مدونتي الجديدة بقى يا ريت

هي نفس اللينك القديم

الجمعة, أغسطس 31, 2007

 
Blogger يا مراكبي said...

tamer nabil

متشكر قوي يا تامر .. حمد الله عالسلامة

الجمعة, أغسطس 31, 2007

 
Blogger يا مراكبي said...

مُزمُز

إنت اللي ليك وحشه جامدة قوي .. وكنت حاسس إنك راجع

غيبة طويلة قوي .. بس حمد الله عالسلامة

جايلك حالا

الجمعة, أغسطس 31, 2007

 
Blogger gohayna said...

والله لو هو دا الحل يا مراكبي كانت كل الستات

خلفوا ومالوا الدنيا عيال يا مراكبي

بس هيا عقله اوي اوي


بس تفتكر الحل في الصبغه يا مراكبي

هههههههههههههههههههه

انا طبعا بهزر معاك انت عارف


بس انا هقولك حاجه بجد

الانثي اول ما تحس بالخطر بتحاول

انها ترجع جوزها لحضنها تاني باي شكل وباي طريقه دفاعيه مهمها كانت



تحياتي لقلمك يا مراكبي

وبجد اسلوبك هايل في السرد

تسلم ايدك والله

الجمعة, أغسطس 31, 2007

 
Blogger يا مراكبي said...

gohayna

طبعا الحل في الصبغة مش عايزة كلام

:-D

طبعا عندك حق .. الأنثى عندها حاسة سادسة بتستشعر بيها الخطر وبتدافع بكل ما أوتيت من أفكار وقدرات وغالبا بتنجح كمان

نورتي

الجمعة, أغسطس 31, 2007

 
Blogger مصراوي أوي said...

اولا قصة جميلة وفعلا تشد لاخر كلمة فيها


الحل مش في الاولاد الحل في استعادة المشاعر واستعادة الاهتمام

السبت, سبتمبر 01, 2007

 
Blogger sherehan84 said...

مبحبش أكتب تعليق بعد تعليقات كتيره كده ..بحس انه مش هيتقري أو على الأقل انك أصبحت مشغول بالتدوينه الجديده اللي هتكتبها عن التدوينه اللي أنا هحط فيها التعليق..ودا اللي بيخليني كتير أدخل المدونه وأقرا وأمشي من غير ما أعلق .. بس بصراحه مقدرتش أمسك نفسي عن التعليق .. غبيه أوي .. غبيه جدا .. غبيه بشكل مستفز فعلا .. هو الحل انها تحمل وتزيد الحمل (بكسر الحاء)عليه وعد ما تواد تقعد سنتين مبهدله ومقرفه بسبب البيبي الجديد وتهمله أكتر وأكتر .. تفكير غبي ومستفز
انا انفعلت معاها جدا ودا ان دل على شيء فيدل اني صدقتها جدا
تحياتي ليك :)

السبت, سبتمبر 01, 2007

 
Blogger يا مراكبي said...

مصراوي أوي

منور يا دكتور

طبعا الحل مش في الأولاد زي ما قلت .. وهو ده المغزى الحقيقي: كيفية إستعادة الإهتمام

أهلا بيك

السبت, سبتمبر 01, 2007

 
Blogger يا مراكبي said...

sherehan84

أولا نورتينا تاني بعد الغيبة الطويلة

ثانيا .. أنا مش بأطنش أي تعليق حتى لو على بوست قديم .. وكده كده كفاية زيارتك طبعا

ثالثا .. ده إنتي شايلة من بطلة القصة قوي .. ضرب ضرب .. ما فيش شتيمه؟

عموما وجهة نظرك فيها طبعا قدر من الصحة وخصوصا لو كان الطفل الآخر هو طفل بجد ومش رمز

أهلا بيكي

السبت, سبتمبر 01, 2007

 
Blogger loumi said...

العزيز الباشمهندس احمد
ده قرار سياسي فاشل
تحياتي

السبت, سبتمبر 01, 2007

 
Blogger أحمد سلامــه said...

ياسيدي عالروقان
ما اروعك
هوا ده الشغل اللي بحبو
لمحة
وانعكاس
وتفريغ قلمي
اوجزت
وابدعت جدا
:)
تعتمي والله يا مراكبي

الأحد, سبتمبر 02, 2007

 
Blogger يا مراكبي said...

loumi

وهو فيه قرار سياسي ناجح؟

هههههه

نورتينا

الأحد, سبتمبر 02, 2007

 
Blogger يا مراكبي said...

أحمد سلامة

بس إيه رأسك في جرعة التفاؤل المعتمة دي؟

:-D

بس بجد بجد ومن غير مجاملة .. اللي مكتوب ده من بعض ما عندكم

الأحد, سبتمبر 02, 2007

 
Blogger Hannoda said...

أنا مش عارفة أقول حاجة

أنا لسة جاية من بوست
من القلب للقلب
ومزبهلّة جدا

بجد شكرا

الأحد, سبتمبر 02, 2007

 
Blogger يا مراكبي said...

Hannoda

أهلا بيكي في أي وقت .. كفاية تعبك وزيارتك للبوست القديم ده .. بس هو بجد بوست أنا بأعتبره مهم بالنسبة لي جدا

الأحد, سبتمبر 02, 2007

 
Blogger عصفور بلا أجنحة said...

جيت بس عشان اقول كل سنة وانت بالف خير

الأربعاء, سبتمبر 12, 2007

 
Blogger يا مراكبي said...

عصفور بلا أجنحة

كل سنة وإنتي طيبة .. متشكر جدا على الزيارة .. وكل عام وأنتم بخير

الأربعاء, سبتمبر 12, 2007

 

إرسال تعليق

Links to this post:

إنشاء رابط

<< Home