شد القلوع يا مراكبي ... مافيش رجوع يا مراكبي

السبت، ديسمبر 15، 2007

أنا وجحا والعيد

جاء جحا بعامل بناء ليبني له بيتا في أرض جديدة .. فأخذ العامل يتجول في الأرض ويقول لجحا: هنا نبني غرفة للنوم .. وهنا غرفة للطعام .. وهنا غرفة للضيوف .. وبينما هو يتجول ويشرح إذ خرج منه ريح ذو صوت عظيم .. فقال له جحا: وهنا نبني حماما
.
هههههه .. أنا قلت بس أعطر الجو قبل ما أبدأ البوست .. مساء الخير عليكم جميعا .. وكل سنة وإنتم طيبين .. العيد بعد كام يوم وإن شاء الله ده هيكون أول عيد من سنين طويله أنزل أحضره في مصر .. هو صحيح الحاجة مراتي سبقتني هناك من يومين وجابتلي إكتئاب من كمية المشاكل اللي هي واجهتها هناك .. وبرضه صحيح إني بدأت أتردد في النزول أصلا .. لكن لازم أنزل علشان لازم بنتي الصغيرة تعرف الفرق بين الخروف والكلب .. لازم أجيبلها خروف .. مش ممكن يعني وهي في كي جي وان وما تعرفش من الحيوانات كلها غير القطة والكلب .. ما يصحش
.
سبحان الله .. عدت سنة بسرعة البرق .. زي اليومين دول كنت أنا والحاجة مراتي بنؤدي مناسك الحج .. فاكرين الموضوعين دول:
لبيك اللهم لبيك .. وعدنا ولله الحمد؟ كان معايا مجموعة من الأطباء المصريين اللي كانوا فعلا مفخرة لينا كلنا .. أدب وأخلاق وعلم .. وفوق كل ده فيهم كوميديا المصريين المعهودة .. أفتكرواحد منهم وهو بيقول في أول يوم: إحنا لو شدينا حيلنا في المناسك شوية وكنا رجولة وكفاءة كده .. ممكن نخلص المناسك بدري ونرجع نلحق أول يوم العيد مع أولادنا.. ههههه .. وإلا الراجل العجيب اللي كان شبه أحد رجال كفار قريش في فيلم الهجرة وكان كل يوم يعدي علينا بميكريفون وإحنا في الفندق ويفتح علينا الباب فجأة ويزعق ويقول: رمي الجماااار .. ياللا علشان رمي الجماااار .. لدرجة إني إفتكرت إنه في مرة هيزعق ويقول: ياللا علشان رمي الجمار يا كفرة .. ههههه
.
عدت سنة وما كنتش متخيل إني هأجمع كمية ذنوب جديدة كبيرة بالشكل ده بعد ما كنت غسلت الذنوب القديمة .. يعني لسة محتاج أحج تاني .. ويمكن تالت ورابع .. ربنا يغفر لينا جميعا ويشملنا برحمته .. آمين .. المهم .. كل سنة وإنتم طيبين .. وهأكمل البوست بقى بشوية نوادر لجحا الظريفة علشان مش طالبه نكد المرة دي ونتقابل في بوست نكد بعد العيد على طول إن شاء الله
.
سألوا جحا ذات يوم: هل يمكن لرجل عمره مائة عام أن ينجب ولدا؟
فأجاب: نعم .. إذا كان له جار عمره عشرون عاما
.
جلس جحا مع زوجته ليتناولا طعام الغذاء .. فشربت زوجته ملعقة من الشوربة وكانت حارة مملوءة بالفلفل .. فدمعت عيناها .. فسألها: ماذا يبكيكي؟ فقالت: تذكرت أمي رحمها الله .. فقد كانت تحب هذه الشوربة

ثم شرب هو ملعقة من الشوربة فسالت دموعه بشدة .. فسألته: وأنت ماذا يبكيك؟

قال: تذكرت أمك رحمها الله التي ماتت وتركتك لي
.
توضأ جحا ذات يوم ولم يكن هناك ماء يكفيه فبقيت قدمه اليسرى دون غسل .. فوقف يصلي ورجله اليسرى مرفوعه كالبجعة .. فسألوه: لماذا تصلي هكذا؟ قال: رجلي اليسرى غير متوضئة
.
وأخيرا .. ونقلا عن النسخة التركية لنوادر الشيخ نصر الدين جحا الرومي المتوفي سنة 673 هجرية وهو بالمناسبة غير جحا العربي أبو الغصن الفزاري الكوفي .. أن حمارة كان لا يصعد الجبل رغم ضربات العصا .. فأوصوه بأن يضع النشادر في "أسفله" علشان الرقابة .. فأخذ الحمار يصعد بسرعة عالية جدا ولم يستطع جحا أن يلحق به .. فعمل بالنصيحة ووضع "بأسفله" هو أيضا بعضا من النشادر .. فأحس بإلتهاب شديد وأخذ يجري سابقا الحمار حتى وصل البيت وأخذ يدور حوله كالمجنون .. فقالت له زوجته: ويحك .. ماذا أصابك؟ فقال لها: لاشيء .. لكن إذا أردتي اللحاق بي فضعي في "أسفلك" شيئا من النشادر
.
وكل سنة وإنتم طيبين .. وربنا يكفيكم شر النشادر.

التسميات:

57 Comments:

Blogger إنـســـانـة said...

هييييييييييييييه اول تعليق

بحجز مكان بس ورايحة اقرا
:D

السبت, ديسمبر 15, 2007

 
Blogger Esmeralda said...

ياااااااااااااااااااه
حمدالله عالسلامه
فينك يا حاج
كل سنه و انت طيب :)
ربنا يكتبها لي يا رب
ايه الروقان ده يا سيدي
ربنا يبعد عنا النكد
مش طالبه و الله اليومين دول خاااااااالص
ضحكتني و ربنا :)
اضحك الله سنك :)
ربنا يكرمك و مطولش كده

السبت, ديسمبر 15, 2007

 
Blogger إنـســـانـة said...

ههههههههههههههه

عايز تدبح خروف عشان البنت تعرف الفرق بين الخروف والكلب هههههههههه

ربنا يسامحك على كمية الضحك دى كنت حموت بجد هههههههههه

على فكرة المجنون كان فى شارع الضياء .. اوعى تقربله هههههههه

وكل سنة وانت والحاجة والعيال بألف خير يارب

السبت, ديسمبر 15, 2007

 
Blogger مبرمج حر said...

ههههههههههههههههههههههههههههه

ضحكتنى من قلبى والله

:)

كل سنة وأنت طيب

:)

السبت, ديسمبر 15, 2007

 
Blogger حسن ارابيسك said...

انا حاسس انك وانت بتكتب البوست ده
كنت لابس عباية وعمامة كبيرة وراكب حمار وحاطط اللاب توب على ضهر الحمار وبتكتب البوست ده

كل سنة وانت طيب

السبت, ديسمبر 15, 2007

 
Blogger Amr Ahmed said...

ماشي يا سيدي

جحا جحا

فين اللحمة بقي

كل سنة وانت طيب

السبت, ديسمبر 15, 2007

 
Blogger عدى النهار said...

وأنا عمال أقول المدونة ريحتها متغيرة كده ليه!؟

كل سنة وإنت والأسرة والمسلمين جميعاً بخير غصب عن عين الحكومة واللي بيحكموا

السبت, ديسمبر 15, 2007

 
Blogger كراكيب عادل said...

توصل مصر بالسلامة وتعيد هناك مع اني كنت اتوقع وانت في السعودية تروح الحج يا عم

فية حد يكون قريب كدة وميروحش كل سنة

انا فات علي الحج 3 سنين اهو

عموما خلي بنتك تعرف الخروف من الكلب

وخاصة لو تجيب لها واحد من النوع الي بينطح كنا زمان نفضل ورا الخروف لغاية ما نعلمة النطح هههههههههه

واوعي تحط فلفل في الشوربة زي جحا

مش ناقصين مشاكل

السبت, ديسمبر 15, 2007

 
Blogger بيجاسوس المصرى said...

كل سنة و انت طيب يا هندسة
و السنة الجاية تدبح ديناصورات مش خرفان كمان
الا بالحق هو مفيش خرفان عندكم ولا ايه ، احنا الخرفان اتلغت من عندنا السنةدى علشان استراليا بتقول اننا محترمناش خرفانها
المهم سلملى على حجا كتير و قوله كل سنة و انت طيب

السبت, ديسمبر 15, 2007

 
Blogger اسكندراني اوي said...

هههههههههههههههههههه
ايه يا هندسه اللي انت عامله ده
كل سنه وانت طيب يا سيدي

للعيد في مصر طعم تاني خالص
ولكل المناسبات رونق تاني لما تقضيها في مصر
رغم كل المضايقات والمشاكل ووجع القلب

تحياتي ليك وللاسره كلها وكل عام وانتم جميعا بخير

السبت, ديسمبر 15, 2007

 
Blogger القلم السكندري said...

السلام عليكم

أولا كل سنة وانت طيب ياباش مهندس


وإن شاء الله عيد سعيد عليك وعلي الأسرة كلها

وبيني وبينك مدام جبت البنت مصر هي هتعرف جميع أنواع الحيوانات مش الخروف بس

أنا مقصدش حاجة طبعا.. أنا نيتي سليمة

أنا بس عارف أننا عندنا حدائق حيوانات مفتوحة

الا صحيح ياباش مهندس

فكرة النشادر دي متنفعش مع المواظفين الكسالي؟؟ يمكن تنشطهم شوية؟؟



بوست جميل وعلي نغمة أخري المرة دي

بس مش ناسيين ... أنت واعد ببوست نكد بعد العيد إن شاء الله


تحياتي

السبت, ديسمبر 15, 2007

 
Blogger حسن ارابيسك said...

كل سنة وانت طيب ياباشمهندس بمناسبة عيد الأضحى أعاده الله عليك بالخير واليمن والبركات

السبت, ديسمبر 15, 2007

 
Blogger doha said...

حج مراكبى
نقول حج بقى
طول مانا بقرا البوست وان حاطط ايدى على مناخيرى
هههههههههههه
كل سنة وانت طيب وعيد مبارك عليك
وهتنور بلدك نوادر جحا هلكتنى من الضحك الحقيقة
هو احسن حاجة عملتها فى الايام المفترجة دى
فعلا الناس محتاجة تطلع من الهم اللى هى فيه
خالص تحياتى

السبت, ديسمبر 15, 2007

 
Blogger خمسة فضفضة said...

السلام عليكم ورحمة الله وبركاته

هههههههههههه
كل سنةوانت طيب يا مراكبي
ويارب يكتبهالنا جميعا كمان مره واتنين وتلاته وتلتميه

فيه سؤال واقف في زوري هو ايه العلاقه بين العيد والروايح الوحشه دي ، ولا ده من تاثير قرب نزولك لمصر ، ولا علشان الحاجه سيباك لوحدك

السبت, ديسمبر 15, 2007

 
Blogger мσнη∂ιš said...

و الله العظيم الجملة هادي ضخكتني من كلبي (قلبي): ياللا علشان رمي الجمار يا كفرة
ههههههههه
مرسي يا مراكبي، ليك وحشة يا عم ، إنتا مبتزرنيش ليه ؟؟؟؟

السبت, ديسمبر 15, 2007

 
Blogger Gid-Do - جدو said...

احمد

كل عيد وانت واسرتك وكل احبائك ومعارفك وجيرانك وكل الدنينا بصحة وسعادة

دة انت فدائى علشان تسافر فى اليومين دول اللى فيهم ثلاث مناسابات كبار ـ العيد الكبير والكريسماس واول السنة الميلادية ـ يخلوا المطارات زحمة لاتطاق والحجز وتاخير الرحلات بيكون مولد وصاحبة غايب ـ استمتع بوقتك بس متنساش تحكى وتقول اذا كلامى دة بينطبق على السفر فى المنطقة عندك ولا دة بس عندى هنا ـ تحياتى

السبت, ديسمبر 15, 2007

 
Blogger امرأة تقول الذي لا يقال said...

هههههههههههههههه
بجد لازم لما آجي عندك أضحك (:

كل سنة وانت طيب يا باشمهندس يا رب

مصر هتنور

السبت, ديسمبر 15, 2007

 
Blogger لماضة said...

هههههههههههههههههههه
اتوقع بعد العيد هيكون بوست جحا وخروفه
ضحكتنى يا هندسه والله
كل سنه وانت بخير يارب والاسره الكريمه ويعود عليكوا الايام بخير وسلملى على فادى كتيييير

السبت, ديسمبر 15, 2007

 
Blogger hend...hanady said...

عيد مبارك وكل سنة وانت طيب ولا اقولك خليها يا جمال العيد كده او كده مش فارقة المهم نلاقى اللحمة

السبت, ديسمبر 15, 2007

 
Blogger دكتور حر said...

أضحك الله سنك
موتني من الضحك والله



كل سنه وانت طيب

الأحد, ديسمبر 16, 2007

 
Blogger mohamed said...

كل سنة وانت طيب يا باشمهندس بس شكلك لما رجهعت مصر دمك اخفف اكتر

الأحد, ديسمبر 16, 2007

 
Blogger صاحب المضيفة said...

شوية رايقين بجد

ربنا يبسطك كمان وكمان

كدونة رايقة وجميلة

دمت بكل الخير

الأحد, ديسمبر 16, 2007

 
Blogger البرديــــــة المصرية said...

كل سنة وانت طيب يا باشمهندس

وحياتك ابقى الحقنا كل فترة بتدوينة أو اتنين من قصص جحا , اصلها بجد تموت من الضحك

دمت بخير وصحة

الأحد, ديسمبر 16, 2007

 
Blogger Hannoda said...

ههههههههههه

وبتقول مش طالبه نكد المرة دي؟؟!!

أنا ماعهدتش ي بوستاتك النكد قبل كده
لا بجد.. حتى مرارتك اللي تظهر أحيانا تكون زي قطر سريع
بيثبتلنا انه كبير قوي بس بيعدي بسرعة وفجأه مايبقاش موجود

كل سنة و انت طيب يا مراكبي و انزل مصر بسرعة قبل ما المكالمات تزيد و النبي
:)

وانشاء الله عيد سعيد و يجر وراه سنة مقبولة من الرحمن بلا ذنوب

الأحد, ديسمبر 16, 2007

 
Blogger بنت القمر said...

بعد رش جليد في الجو
وجميع المعطرات
كل سنه وانت واسرتك بخير
زعلانه منك لازم البنت تعرف الحيوانات ولو من الدش من قنوات الاطفال
كي جي كبيره اوي
كان لازم تعرفهم من تلات سنين
لان كتر المعلومه بيزود الذكاء
او من قصص اطفال مصوره
عيد مبارك

الاثنين, ديسمبر 17, 2007

 
Blogger Nsreen Bsunee said...

احمد يا قاضى
كل سنه وانت طيب والاسره الكريمه بالف خير وان شاء الله البنوته تتعرف ع الخروف ويبقو صحاب كمان وعقبالى لما انزل مصر العيد الجاى ان شاء الله
ومرسى على الخمسه فرفشه بتوع جحا والله الواحد كان محتاجهم

الاثنين, ديسمبر 17, 2007

 
Blogger الشنكوتي الكبير said...

كل سنه وانت طيب

الاثنين, ديسمبر 17, 2007

 
Blogger قلب أبيــض said...

السلام عليكم
لا أقول هذا العيد
كل عام وانتم بخير
ولكن اقول
انتم الخير لكل عام
ولا تنسوا اخواننا فى فلسطين
وندعوكم لمتابعة
( العيد وضياع اقصانا )
مدونة قلب أبيض

الاثنين, ديسمبر 17, 2007

 
Blogger alzaher said...

كل عام وانتم بخير بمناسبة الأعياد الإسلامية والمسيحية على السواء

الاثنين, ديسمبر 17, 2007

 
Blogger None said...

انا عندي كتاب نوادر جحا الكاملة احم احم.. للأطفال ..اصله بتاعي من وانا صغيرة

بس جحا التاني دا انا سمعت عنه بس ما اعرفش ايه اسم الكتاب اللي فيه النوادر بتاعته قولي اسم كتابه ايه عشان اجيبه

اصلي عايزة علي البنات ماتكبر اكون عملتلهم مكتبه شاملة زي اللي عند بابا في البيت

وعيد سعيد وكل عام وانتم بخير

وارجوك ارجوك ماتصدمش لما تنزل تقضي العيد في مصر ..وحاول تخليك فريش وتعتبر نفسك في رحله

الاثنين, ديسمبر 17, 2007

 
Blogger мσнη∂ιš said...

عيد مبارك سعيد يا مراكبي

الاثنين, ديسمبر 17, 2007

 
Blogger بيتنا القديم said...

جيت اقولك كل سنة وانت طيب
ويارب يارب تكون بخير وسعادة
لا تنس فقيراً او يتيماً او محتاجاً في هذا العيد..
لا تنس ان تبادر بالصلح مع من تخاصم
لا تنس قريب او قريبة بزيارة في العيد
لا تنس كف مرفوع ولسان يستغفر وعين تدمع..مع الله في هذا العيد
تك كير
(:

الثلاثاء, ديسمبر 18, 2007

 
Blogger tota said...

ياااااااااااااه يابختك هتعيد في مصر
انا مش بحسد انا بقر وبحقد بس
---------------------------
كل سنه وانت طيب يامراكبي ويارب يكون عيد سعيد عليك وعلي كل اهلك واحبابك
كل سنه وانت طيب
سلامي لمصر كلها وماتنسانيش في اللحمه

الثلاثاء, ديسمبر 18, 2007

 
Blogger همسات said...


كــل سنة وحضرتك طيب

عجبنى اوى حكاية بوست نكد بعد العيد
فكرنى بالست النكدية اللى كانت بتقول لجوزها بكرة النكد بكرة
:)
وحكايات جحا دى عسل اووووووى
وترجع مصر بالسلامة

الأربعاء, ديسمبر 19, 2007

 
Blogger اعشق فى اليل ضوء القمر said...

يا مراكبى
كل عام وانت بخير
وفى وسط اهلك دائما بالعيد فارحا
وتعرف بنتك الفرق بين الخروف المصرى و الأسترالى الممنوع نزوله مصر
يعنى بقى شوف
فعلا بتيجى بحاجات فى وقتها قعدت ابتسم على نوادر جحا
بعد عمل متواصل لمده 3 اسابيع من 6.30 ص
الى 10 م
فى المصنع عملى بحجت إنى مهندس الكهرباء الموجود ومدير الصيانه بعيد عنك

الأربعاء, ديسمبر 19, 2007

 
Blogger رينـــــــــــا said...

السلام عليكم ورحمه الله
كل سنه وانت با الف خير يارب
والسنه الجايه فى عرفات قول امين

الأربعاء, ديسمبر 19, 2007

 
Blogger М€ŝЋМΣŞĦ said...

كل سنه وانت طيب

تحياتي

الأربعاء, ديسمبر 19, 2007

 
Blogger Blank-Socrate said...

كل سنه و انت طيب و اجازة سعيدة

الأربعاء, ديسمبر 19, 2007

 
Blogger بالله المستعان said...

بصوت عالي جدا بقولك
كل سنه وانت طائع

بس مقولتش يا كفره برضو اهو
ههههههههههههههه

كل سنه وانت طيب وطائع يا مركبي

الخميس, ديسمبر 20, 2007

 
Blogger اسلام رفاعى said...

خالص التهانى القلبية بمناسبة عيد الاضحى المبارك
كل عام وانتم بخير

الخميس, ديسمبر 20, 2007

 
Blogger شيمـــــاء said...

طب واللى يحب يتصل بالحاجة يعمل ايه
؟

الجمعة, ديسمبر 21, 2007

 
Blogger شيمـــــاء said...

طب واللى يحب يتصل بالحاجة يعمل ايه
؟

الجمعة, ديسمبر 21, 2007

 
Blogger esraa said...

كل سنة وانت طيب

ويارب السنه الجايه نكون كلنا في السعوديه

(:

الجمعة, ديسمبر 21, 2007

 
Blogger فى القلب said...

ههههههههههههههههه

كل سنه وأنت طيب يا راجل يا طيب

الأحد, ديسمبر 23, 2007

 
Blogger MKSARAT SAYED SAAD said...

عزيزي المراكبي
كل سنة وانت طيب
خروف ولا كلب .. خروف ولا كلب تصدق حاجة تلخبط
يمكن يكون من ريحة النشادر
جميلة جدا
تحياتي ومودتى

الأحد, ديسمبر 23, 2007

 
Blogger daktara said...

كل سنة وانت طيب

سألوا جحا ذات يوم: هل يمكن لرجل عمره مائة عام أن ينجب ولدا؟
فأجاب: نعم .. إذا كان له جار عمره عشرون عاما


عايزين توضيح اكتر بس بعد العيد بقي

الأحد, ديسمبر 23, 2007

 
Blogger يا مراكبي said...

إنـســـانـة

أهلا بيكي وكل سنة ونتي طيبة .. طبعا لازم البنت تعرف الفرق بين الخروف والكلب عمليا علشان هي فاكرة إن كل الحيوانات قطط وبس ومؤخرا بدأت تعرف الكلب .. ههههههه

شارع ضياء ده أنا مادخلتوش من أكتر من 6 سنين .. الظاهر المجنون ده إتربى وإترعرع وأنا غايب عن البلد .. إن غاب القط إلعب يا فار

ههههههه


********************



Esmeralda

الله يسلمك .. كل سنة وإنتي طيبة وإن شاء الله نقولك ياحاجه قريب

هو مش روقان بالظبط بالظبط .. هو الناس كلها أجازة وما حدش واكل دماغي .. فقلت فرصة بقى

ربنا يكرمك إن شاء الله


********************



مبرمج حر

المدونة نورت والله .. كل سنة وأنت طيب وبالصحة والسلامة يا رب


********************


حسن ارابيسك
حلو قوي التعليق ده .. بس بيني وبينك .. أنا برضه حسيت إني كنت راكب حمار وبالمقلوب كمان .. بس ده بيني وبينك بس .. ماشي؟ السر في بير؟


********************


Amr Ahmed

لحمة؟ لحمة مين؟ إحنا دبحنا كلب .. إنت مش مركز في البوست وألا إيه؟
ههههههههههه
كل سنة وانت طيب


********************


عدى النهار


دي ريحة الحبايب إياهم اللي ريحتهم فايحة في كل الدنيا .. يمهل ولا يهمل
كل سنة وإنت بألف صحة وسلامة


**********************


كراكيب عادل

خلاص لو لينا عمر وأنا لسه في السعودية السنة الجاية هأستناك نحج مع بعض .. ماشي؟

ربنا يتقبل منا جميعا


أنا متوقع وخصوصا إنك رجل المقالب الأول في العصور الغابرة إنك علمت الخروف يدبح نفسه ويخلص من مقالبك .. هههههههه

كل سنة وإنت بألف صحة وسلامة


*********************


بيجاسوس المصرى

كل سنة و انت طيب يا دكتور .. وجحا كمان بيسلم عليك قوي
ههههههههه

أنا سمعت إن خرفان إستراليا زعلانة مننا وطالبين إننا نعامل المواطنين المصريين زي خرفان إستراليا .. زمن العجايب
منور


*********************


اسكندراني اوي
ده بوست منوعات على تخاريف على حاجة كده بين النوم واليقظة
ههههههههه

فعلا العيد له طعم تاني .. بس المشاكل اللي شفتها ليها طعم تالت ورابع وخامس
ياللا .. هنعمل إيه؟ نتبرى منها يعني؟

كل عام وانتم جميعا بخير وبألف صحة وسلامة


************************


القلم السكندري

وعليكم السلام ورحمة الله وبركاته
وكل سنة وانت طيب وعيد سعيد عليكم جميعا

وبالنسبة لموضوع الحيوانات .. فعلا شوارعنا فيها أنواع كتيرة من الحيوانات وعربيات الكارو وخلافة .. منظر مش موجود في دول أحقر مننا بكتير

فكرة النشادر دي عايزين نطرحها على المسؤلين .. نطرحها مش نجربها .. ماتودنيش في داهية
ههههههههههه .. وإلى لقاء قريب مع البوست النكد .. ما تقلقش .. مافيش أكتر من النكد


**********************



doha

أهلا بيك دايما .. أنا حذرت من الريحة في أول البوست .. ماليش دعوة بقى

أنا برضه قلت خلينا في جحا ونوادرة ومش طالبة غم في العيد .. كويس جدا إنها عجبتك

كل سنة وإنت طيب


*************************


خمسة فضفضة

وعليكم السلام ورحمة الله وبركاته
يارب يكتبهالنا جميعا جمعا إن شاء الله يا حاجة

سؤالك اللي واقف في زورك ده سؤال حسيت منه إنك تعرفي الحاجة مراتي أو هي مسلطاكي عليا .. أو توارد خواطر بينك وبينها .. هههههههه .. الستات على أشكالها تقع

كل سنة وإنتي طيبة والأسرة جميعا بخير


***********************


мσнη∂ιš
مهندسنا السري المغربي .. أهلا بيك وكل عام وإنت جميعا بخير

أنا مقصر معاك صحيح .. هآجي أزورك طبعا .. أعذرني مشاغل الدنيا


************************

الاثنين, ديسمبر 24, 2007

 
Blogger امرأة تقول الذي لا يقال said...

هو اللي بينزل مصر بينقطع عن الدنيا كده؟؟ ((:

الاثنين, ديسمبر 24, 2007

 
Blogger يا مراكبي said...

Gid-Do - جدو

كل سنة وإنت طيب ودايما كده منورنا وتكون بألف صحة وسلامة

لخبطة مواعيد الطيران في المنطقة العربية مش متاجة أي مناسبات .. ده العادي يعني .. طبعا السعودية كان الله في عونها بتستقبل ملايين في مدة قصيرة جدا والطيارات شغالة زي ميكروباس فيصل الجيزة .. لكن في مصر ماأعرفش التأخير كان ليه

المهم إني لقيت مكان على الطيارة رايح جاي .. الحمد لله


********************


امرأة تقول الذي لا يقال

ده أنا سعيد جدا إني بأقدر أضحك حد في الزمن ده .. كل سنة وإنتي طيبة ودايما منورانا



*******************



لماضة

خروف إيه بقى؟ ما قلنا كلب .. إنتي هتفهمي أكتر من بنتي الصغيرة؟

هههههههههههه


كل سنة وإنتي والأسرة بخير وسعادة .. فادي كمان بيسلم عليكي قوي .. لازم يقول كده
ههههههههه



*******************



hend...hanady

عيد مبارك وجمال العيد هي التحية الرسمية اللي تخلينا في السليم .. لكن ما أضمنش إن الشعب هيلاقى اللحمة بعد كده رغم كل التحيات والصلوات دي

ههههههههههه


*********************


دكتور حر

ربنا يكرمك ويبارك فيك .. كل سنه وانت طيب



*****************



mohamed

كل سنة وانت طيب .. بس أنا كتبت البوست ده قبل ما أسافر مصر .. عالريحة يعني
ههههههههههه


******************


صاحب المضيفة

أهلا وسهلا .. المهم نكون أسعدناكم .. وكل عام وأنتم بخير



******************



البرديــــــة المصرية

كل سنة وانت طيب .. منور .. هأبقى أنشر كتاب جحا كله مادام عجبك كده

دمت بخير


*******************



Hannoda

بيني وبينك وإنتي مش غريبة: شر البلية ما يضحك .. والواحد بيحاول يتخطى همومه بالضحك .. وده اللي مخلي المصريين بيعرفوا يعيشوا . دي قاعدة عامة

وبعدين لسه هأحكيلك عن مغامراتي في مصر .. حدوتةتانية خالص .. ده هو ده الضحك اللي بجد

أما فاتورة التليفون .. فأنا أحب أقولك إني حبيب شركات الإتصالات .. لقطة يعني .. ربنا يهدهم
كل سنة وإنتي دايما طيبة


********************


بنت القمر


حلو رش جليد في الجو ده .. مافيش بيروسول؟

عندك حق .. بس البنت الصغيرة دي ما بتتفرجش غير على اللي بيشوفوه إخواتها .. ضرب ومعارك وحاجات كده .. وكل الحيوانات بالنسبة لها هي القطة وبس .. ومؤخلرا الكلب .. عموما إنا جبنا فعلا كتب للموضوع ده وفيه مشروع إنها تقضي يوم في جنينة الحيوانات علشان تأكل اليوانات والجراس كمان
ههههههه
كل سنه وانتي طيبة .. نورتينا


*********************


Nsreen Bsunee

عاش من شافك؟ كنتي مختفيه فين؟

نورتينا بجد .. شكرا على المفاجأة الجميلة دي


*******************


الشنكوتي الكبير

وإنت بالصحة والسلامة .. أشكرك جدا جدا


*******************


قلب أبيــض

وعليكم السلام ورحمة الله وبركاته
أشكرك جدا على التعليق الجميل ده
كل عام وأنتم بخير .. ولن ننسى القدس ما حيينا .. ان ننسى أبدا


********************


alzaher

كل عام وانتم بخير .. أعاده الله بالخير على كل المصريين


*******************


None

حلوة إحم دي .. ما تتكسفيش يا أم العرايس .. كلنا عندنا كتب الأطفال دي .. إحم برضه
هههههههه

فيه كتاب عن جحا العربي .. وفيه كتاب تاني عن جحا اللي كان في تركيا .. أنا قلت أسماؤهم في البوست .. إبقى زوري جناح لبنان أو المكتبات اللبنانية لما ييجي معرض الكتاب

أما بقى مصر واللي حصل في مصر .. هو نفسه اللي بيحصلي كل مرة وبأحلف إني ما أنزلش تاني .. لكن لازم أشوف الوالد وإخواتي .. مافيش حل

كل سنة وإنتي طيبة ودايما بالصحة والسلامة


*********************


мσнη∂ιš

ألف شكر .. عيد مبارك سعيد عليكم جميعا


*******************


بيتنا القديم

العزيز أسامة

كل سنة وإنت طيب وبألف صحة وسلامة .. وأشكرك على النصايح الغالية جدا دي .. ربنا يباركلك



********************


tota

هو مش يل بختي قوي يعني .. لكن الحمد لله .. أن برضه حسيت إن فيه حد عينه في السفرية دي .. مش قصدي عليكي ولا حاجة
هههههههه

كل سنه وانتي طيبة وبخير وسعادة
ما قلنا مافيش لحمة .. قلنا دبحنا كلب .. ما فيش تركيز في القراية وألا إيه؟
هههههههه


*******************


همسات

حلوة حكاية الست النكدية بتاعة بكرة النكد بكرة .. هههههه

كــل سنة وإنتي طيبة وأشكرك جدا على شعورك ده


*******************


اعشق فى اليل ضوء القمر

كان الله في العون .. دايما شغل الصيانة في المصانع بيبقى حرق أعصاب .. إسألني أنا بأبقى عامل إزاي لما حاجة تعطل وبأمسك في مهندسين الصيانة .ز أصل وقفة الإنتاج وحشة جدا على إقتصاديات التشغيل

حلوة مدير الصيانة بعيد عني دي .. ملعوبة

كل سنة وإنت طيب ويارب تكون إستريحت شوية


********************


رينـــــــــــا

وعليكم السلام ورحمه الله وبركاته

نتجمع بإذن الله في الحج على الخير .. آمين
سلميلي على الكويت


**********************


М€ŝЋМΣŞĦ

وإنت بالصحة والسلامة .. أشكرك جدا جدا .. منور بجد



*****************



Blank-Socrate

وإنت بالصحة والسلامة .. أشكرك .. نورتني



*******************



بالله المستعان

الراجل بتاع قريش ده كان فعلا شكله كده بجد مش هزار
هههههه

كل سنه وانتي طيبى وطائعة برضه


**********************


اسلام رفاعى

ولك مني أيضا خالص التهانى وكل عام وانتم بخير



********************


شيمـــــاء

نفسي مرة واحدة تكوني محضر خير .. وهأقفل المدونة بعدها على طول .. عايزة الحاجة في إيه بس؟

كل سنة وإنتي طيبة



******************


esraa


كل سنة وانتي طيبة .. ويارب نتجمع فعلا على الخير في الأماكن المقدسة الجميلة دي



**************************



فى القلب

كل سنه وإنت طيبة يا ست يا طيبة .. ههههههه .. تحياتي ليكي وللأسرة جميعا



*******************



MKSARAT SAYED SAAD

عزيزي صاحب المكسرات الجميلة .. منورني

هو كان كلب .. علشان ما حدش يرجع ويقوللي هات حتة لحمة تاني
هههههههههه

كل سنة وانت طيب


***********************

daktara

كل سنة وانت طيب بقى .. لازم الإحراج ده يعني؟ ما الشباب كلهم فهموها وما حدش علق .. إشمعنى بقى؟
هههههههههههههه

نورتني بجد


********************



امرأة تقول الذي لا يقال


طبعا كان لازم أتقطع عن الدنيا .. مافضيتش ثانية واحدة من الزيارات والخروج .. ناس كتير ما شفتهمش من سنين طويلة

عموما أنا رجعت أهو .. لسة عايش

ههههه

شكرا على سؤالك يادينا

الثلاثاء, ديسمبر 25, 2007

 
Blogger دنــــيــــــا مـحـيـرانـي said...

ههههه
كل سنه و انت طيب

الأربعاء, ديسمبر 26, 2007

 
Blogger السكندرى said...

كدة ياراجل فى اول زيارة لمدونتك كدة
أصاب بإلتهاب فى أنفى

من كتر الكلام اللى ريحته وحشه

هههههههههههههه

لا بس واضح إن رجوعك انت وزوجتك مصر خلاك من كتر الصدمة تهيس فى الكلام

عموما رغم الروائح الكريهة
إلا انى معجب بمدونتك

تقول إيه بقى غاوى قرف
ههههههههههههههههههههه

تقبل تحياتى
ونورت ديارك ووطنك
وكل عام وانت بخير

الأربعاء, ديسمبر 26, 2007

 
Blogger يا مراكبي said...

دنــــيــــــا مـحـيـرانـي

كل سنة وإنتي طيبة ونورتينا من تاني

الخميس, ديسمبر 27, 2007

 
Blogger يا مراكبي said...

السكندري

أهلا بيك .. معلش الدو ما كانش قد كده في أول زيارة لك بس ده من تأثير ريحة الوطن .. شامم الريحة؟

هههههه

نورتنا

الخميس, ديسمبر 27, 2007

 
Blogger мσнη∂ιš said...

:)
شكرا على الإضافة يا بشمهندس، إنتا أول مدون مش مغربي بيضيفني عندو، وبذلك تفوز معنا بثلاث جوائز:
ـ إقامة لمدة ثلاث أشهر في جزيرة تايلاندية.
ـ سيارة مرسيدس class cem AMG Turbo TDI super power مع تزويد بالوقود مدى الحياة.
ـ تي شيرت عليه صورتك.

سلام

السبت, ديسمبر 29, 2007

 
Blogger يا مراكبي said...

мσнη∂ιš

بس دول 4 جوايز مش ثلاثة كده

هههههه

ده شرف لينا إحنا يا فندم .. دايما منورنا

السبت, ديسمبر 29, 2007

 
Blogger الأباصيرى said...

أية ياعم المراكبى
أسيبك شوية أرجع ألاقيك مبوظ ريحة البلوج

يعنى بدايتها ريح وأخرتها نشادر
:)

أنا قولت أبأها بالنكت وبعدين أشوف النكد والكأبة... حكم أنت متتوصاش

الأحد, يناير 06, 2008

 
Blogger يا مراكبي said...

الأباصيري

أنا نزلت بوست تاني بعدها على طول علشان أغطي عالريحة وهويت المدونة أهو

لسه شامم حاجة؟

الأحد, يناير 06, 2008

 

إرسال تعليق

Links to this post:

إنشاء رابط

<< Home