حصة عربي

النهاردة ما فيش لا قراءة ولا تعبير ولا إملاء .. حصة النهاردة من كتاب النصوص .. سامعكم ياللي بتقولوا ييييه .. هو ده النظام .. النهاردة هنطلع كتاب النصوص .. طلع منك له
.
يا ترى كلكم سمعتم عن الشعر الجاهلي؟ لأ؟ إيه الخيبة دي؟ الشعر الجاهلي يا إخواننا هو الشعر اللي كان في عصر ما قبل الإسلام .. وأشهر حاجة وصلت لينا منه هي القصائد الطويلة قوي اللي كان إسمها المعلقات .. وسموها كده ليه؟ لأ طبعا مش علشان الواحد كان بيعلق بيها حبيبته .. سموها كده علشان بيقولوا إنها كانت معلقة على جدار الكعبة بسبب شهرتها العالية وقتها
.
نبتدي بقى بالمعلقة بتاعة إمرؤ القيس اللي كان مطلعها بيقول
قفا نبك من ذكرى حبيب ومنزل .. بسقط اللوى بين الدخول فحومل
عارف إن ما حدش فاهم حاجة .. ولا أنا كمان .. لكن أحب أفكركم إن المعلقة دي بتتكون من 81 بيت .. وأغلبنا درس منها جزء صغير أيام ثانوي أيام ما كان فيه تعليم .. الجزء اللي درسناه كان بيبدأ من البيت رقم 44 واللي كان فيه
وليل كوج البحر أرخى سدوله .. على بأنواع الهموم ليبتلي
مكر مفر مقبل مدبر معا .. كجلمود صخر حطه السيل من عل
والله عارف إن ما حدش فاهم حاجة .. ما تقطمونيش كل شوية بقى .. المهم إني هأظبطكم وهأحكيلكم حكاية المعلقة دي دلوقت: كان يا ما كان يا سعد يا إكرام .. كان إمرؤ القيس إبن حجر إبن عمرو الكندي بيعشق بنت عمه اللي إسمها عنيزة بنت شرحبيل .. ما حدش يضحك .. وفي يوم خرجوا الرجالة كلهم من الحي وهو فضل مستخبي وما خرجش معاهم .. وبعديها بشوية خرجوا كل البنات ومشيوا بعيد لحد البحيرة اللي بيستحموا فيها .. ما كانش فيه لا حمامات ولا دش ساعتها طبعا .. وكانت عنيزة من بين البنات دول .. المهم إن إمرؤ القيس مشي وراهم وإستناهم لحد ما قلعوا هدومهم ونزلوا البحيرة .. القصة مشوقة مش كده؟ هتموتوا تعرفوا حصل إيه .. صح؟
.
المهم إن إمرؤ القيس قام ولم كل الهدوم بتاعة البنات ورصها فوق بعض وقعد عليها .. وحلف على البنات وشرط عليهم إنهم لازم يخرجوا من المياة عريانين علشان يديهم هدومهم تاني .. طبعا مافيش واحدة رضيت تطلع .. لكن الحكاية طولت قوي وهو دماغ أمه جزمة قديمة .. لحد ما خرجت أوقح واحده فيهم راح مديها هدومها .. وبعدها خرجوا واحدة وراء التانية وهكذا .. أرزاق .. لحد ما فضلت في المياة بنت عمه .. إتحايلت عليه إنه يعفيها من الخروج عريانه لكن هو ما رضيش .. لحد ما خرجت زيها زيهم .. مبخت
.
بعد ما كلهم لبسوا هدومهم راحوا قالوله: إخص عليك .. أخرتنا وجوعتنا (هو ده اللي هاممهم) .. قام إمرؤ القيس عامل حركة جدعنة ودبح الناقة بتاعته .. وشوى ليهم اللحمة وأكلوا .. وبعدين جم يرجعوا فطبعا كل واحدة ركبت الناقة بتاعتها وهو الوحيد اللي فضل من غير ناقة .. قعد يتحايل عليهم يركبوه معاهم لحد ما بنت عمه رضيت تركبه معاها .. وبيقولوا إنه قعد يبوسها طول السكة .. بيقولوا
.
حلوة مش كده؟ أكتر حاجة عجبتني بقى في المعلقة دي هو البيت الثالث اللي بيوصف فيه المكان الفسيح اللي كانوا فيه .. وبيقول
ترى بعر الآرام في عرصاتها .. وقيعانها كأنه حب فلفل

والآرام هي الغزلان .. أما تفسير كلمة "عرصاتها" فجاء على لسان الإمام عبدالله الحسن الزوزني الذي قال: العرصة هي ساحة الدار .. وهي البقعة الواسعة التي ليس فيها بناء .. وجمعها عراص .. وكل بقعة ليس فيها بناء فهي عرصة .. وسميت كذلك لأن الصبيان يعرصون فيها .. أي يلعبون ويمرحون

.

أي خدمة .. الحصة خلصت