إعلان تاني .. مش هنخلص كده
إلحق الخبر الطازة
إلحق الخبر السخن
العائلة تحتل التدوين المصري
وسع منك له
وسع منك له
.
أختى التانية .. قصدي أختي الأولانية
المدرسة المصرية المطحونة
تفتتح أحدث مدونات العائلة
مدونة دردشة على الماشي
تابعوها
كفاءة كفاءة
سيداتي آنساتي سادتي (طبعا باين إن سيداتي إتقالت بنفس مفتوحة .. وآنساتي إتقالت بنفس مفتوحه قوي .. وسادتي تأدية واجب وخلاص) نحب نشرح لكم النهاردة نموذج من النماذج الحسابية اللي درسناها في كلية الهندسة الله يرحمها ويرحم أيامها .. والنموذج ده بيبين طريقة حساب الكفاءة العامة .. يعني إيه؟ شوفوا معايا . بيقولوا إن لو عندك إتنين موظفين شغالين في مكتب في مصلحة حكومية وكل واحد منهم بيشتغل بكفاءة 90% (الشر برة وبعيد) يبقى الكفاءة العامة للمكتب كله تتحسب إزاي؟ الكفاءة العامة هي حاصل ضرب كفاءة الإتنين الموظفين يعني 90% × 90% = 81% .. مفاجأة مش كدة؟ . طيب لو عندنا 3 موظفين في المكتب إياه .. وكل واحد كفاءته هي 90% برضه .. يبقى الكفاءة العامة للمكتب ده كام؟ هي حاصل ضرب كفاءة التلاتة موظفين يعني 90% × 90% × 90% = 73% .. شوفتوا الرقم صغر إزاي؟ . طيب لو عندنا 4 موظفين في المكتب اللي زهقنا منه ده .. وكل واحد كفاءته هي 90% برضه .. يبقى الكفاءة العامة للمكتب ده كام؟ هي حاصل ضرب كفاءة الأربعة موظفين يعني 90% مضروبة في بعضها 4 مرات = 66%.. أصغر وأصغر . طيب لو عندنا 5 موظفين .. وكل واحد كفاءته هي 90% برضه .....
تعليقات
ثم ان انت كدة بتستغل نفوذك ودة واضح جداااا
شوف يا مراكبى احنا بعد كدة اذا ما كنتش هتعلن عن مدونتنا احنا كمان هنقدم فيك بلاغ انك بستغل نفوذك فى اعمال خارجية
يجي الواحد من دول يمسك موقع .. تلاقيه جاب أهله وقرايبه من البلد وجاب معارفه يشغلهم معاه
ماينفعش كده ...
((:
بس عندي ملاحظه.. أنت سايبهم يشتغلوا وأنت مقلل.. مش بتكتب ليه؟؟
تحياتي
بجد ألف مبروك وعقبال العائلة الكريمة كلها.و أحنا بندعم مشروع مدونة لكل طفل
و لسة بكرة حنشوف ايام بمبى
رمضان كريم
تنور البلوجر كله يا مراكبي
انها حقا عائلة محترمه
انا هروح انط عندها دلوقتى اشوف ايه الاخبار
بس الموصلات دي على مين وبدل انتقال
دة اية النور دة اللي حل علي بلوجر
هاروح وارحب بيهم نفراية نفراية
واضح ان العيلة رافعة شعار مدونة لكل مواطن
:D
ربنا يوفقهم ان شاء الله
بس والله ..أحب اعرف الاعلانات دى بفلوس ولا نظام عشان خاطر عيونك
المرة دى سماح لكن المرة الجاية ..لايمكن ابدا..." كدة وكدة يعنى "
عموما ياسيدى الف مبروك على المدونة السرية ..ياكاتم "؟" الاسرار!!
تحياتى لك وللاسرة
يعني هي جت عليا أنا ووقفت .. سيبوني أستغل منصبي بقى مرة من نفسي
بس منصب إيه بقى اللي أنا بأستغله ده؟ ههههه
***********
ماماتو
أشكرك جدا .. حلوة قوي حكاية مدونة لكل طفل دي .. بس نخليها للكبار الأول وبعدين نشوف الأطفال
***********
سمباتيك
ثري عربي مرة واحدة؟ يسمع من بقك ربنا .. إدعيلي وأنا هأسمي البلوجر على إسمك
***********
لماضة
خلاص خليكي هنا وما تروحيش حته .. حتى بدل الإنتقال عايزاه؟ مافيش حاجة لله أبدا؟
عموما فيه توك توك على باب المدونة بيودي لهناك وببلاش كمان
************
COPA
والله منور بعد غياب .. وأدينا بنعمل إعلانات لله في لله من غير أي حاجة (وداد حمدي ماده إيديها)
ههههه
***********
بثينة
إنتي تشرفينا يا فندم .. بس بالراحة شوية عشان هما لسه مش حمل النقد الفني المتخصص .. أشكرك يا كاتبتنا القديرة
********
وميض إبتسامة
والله كله ببلاش لحد دلوقت .. وأهو الواحد بقدم السبت عشان يلاقي الأحد
شفتني وأنا كتوم جدا؟
أيوة أنا كتوم جدا جدا .. دي أهم صفة فيا
وطبعا ما أخدتش فلوس على الإعلان .. أمال أنا فتنت عليها ليه؟ علشان ما دفعتش تمن سكوتي