شد القلوع يا مراكبي ... مافيش رجوع يا مراكبي

الجمعة، يناير 23، 2009

حكاية نونو

لا يوجد سبب لإنجاب الطفل الأول أبدا .. إنه حدث يرتبط إرتباطا وثيقا بتسلسل الحياة الطبيعية .. أنت تدرس فتتخرج فتعمل فتخطب فتاة ما ثم تتزوجها .. ثم لابد أن تنجبا طفلا في خلال عام واحد على الأكثر وإلا أصبحتما في مشكلة رهيبة قد يتدخل فيها الأقارب والأصدقاء والمعارف والجمعيات الإستهلاكية وربما يصل الأمر إلى أروقة الأمم المتحدة الأمريكية .. تتساقط عليك الآراء من هنا وهناك .. فمنهم من يخشى أن يكون أحدكما عقيما .. وذاك الذي يلمز بوجود عجز جنسي .. وتلك التي تقترح أن تقوما بعملية طفل أنابيب البوتاجاز .. نهاية بزيارة الأولياء وعمل حلقة زار .. إلخ .. المهم جاء الطفل الأول وزغرطي يا سعاد
.
ولا يوجد سبب أيضا لإنجاب الطفل الثاني .. كل ما قالوه لي أن الطفل الأول لا يمكن أن يكون وحيدا وإلا حاصرته الأمراض النفسية والعصبية .. فبرغم أنني أعي جيدا أنني قد أصبت بكل تلك الأمراض رغم أن لي العديد من الإخوة .. ولقناعتي بأن تلك الأمراض هي من صميم الجينات المصرية الحديثة التي تكونت بعد عام واحد وثمانين .. إلا أنني رضخت لفكرة إنجاب ذلك الطفل الثاني .. قال يعني بمزاجي
.
لم أجد عند أي شخص رأيا مقنعا ليوضح لي لماذا ولابد أن ننجب الطفل الثالث .. ففكرة أن يأتي أخ ما للطفل الأول أو أخت ما للطفلة الثانية فكرة فاشلة تماما .. ففي كل الحالات سيكون أحدهما مظلوما .. وقد تكون تلك ذريعة لإستدراجي إلى طفل رابع مستقبلا .. لم أقتنع ورفضت الفكرة بشدة .. فجاء الطفل الثالث
.
إنشغلت زوجتي في تربية الأطفال الثلاثة .. كانت مشغولة بهم ليل نهار .. حاولت أن أن أذكرها بأني زوجها وأنها لابد وأن تهتم بي أنا أيضا لكن دون جدوى .. لم تكن تستمع إلى ما أقول .. بل لم تكن تنظر إلي وجهي أصلا .. لدرجة أنه إنتابني بعض الشك أنه قد تم طلاقنا في يوم ما ولم يقم أحدهم بإخطاري بذلك .. كما إنتابني إحساس مرعب بأنني ربما أكون قد تحولت إلى شبح .. أنا شبح .. هي الشبح بكام دلوقت؟
.
تزوجت .. نعم تزوجت من أخرى .. كان ذلك هو الحل الوحيد المتاح أمامي حينذاك .. أذكر أن زوجتي الجديدة قالت أنه من الظلم لها أن أحرمها من إحساس الأمومة الجارف .. هذا بخلاف الوحدة التي تعانيها عندما أتركها لأزور بيت الأشباح الأول .. كان ذلك سببا مختلفا لإنجاب الطفل الأول .. لا أذكر هل قاومتها أم لا .. لكن في كل الأحوال جاء طفلها الأول
.
لكن العجيب هو إشتراك زوجتي الجديدة والقديمة معا في طرح نفس السبب لإنجاب الطفل الثاني .. راجع الفقرة الثانية فوق .. إنتابني إحساس خفي بأن حياتي الشبحية قد إقتربت لتتحقق في منزلي الثاني أيضا .. المهم أن طرح ذلك السبب تبعه إلحاح وتحايل من جانب زوجتي الجديدة .. وقوبل ذلك بالرفض التام من جانبي بالطبع .. كلمتي لا يمكن تنزل الأرض أبدا
.
وعندما أنجبت زوجتي الجديدة الطفل الثالث .... ء

التسميات:

73 Comments:

Blogger Shimaa Esmail said...

السيد الأستاذ/ أحمد ثروت القاضي
صاحب مدونة / يا مراكبي
اعتذر عن الخروج من موضوع التدوينة لقد أرسلت لك الجزء الثالث من الاستمارة (7صفحات)، أرجو منك إرسال رسالة توضح أن الجزء قد وصلك وأنه ليس هناك مشكلة في إرساله أحالت وصله لسيادتك .
تحياتي وتقديري
شيماء إسماعيل
باحث ماجستير- كلية الآداب جامعة القاهرة.

الجمعة, يناير 23, 2009

 
Blogger فاتيما said...

ياااااه عليك يا نبع الحكمة
و الله تحليلاتك للظاهرة دى منطقية قوى
بس سؤال فى الخباثة يعنى
إشمعنى بعد سنة 81 يعنى
هه
هه
أبطل غلاسة ؟؟!!!
طييييييييييب
يا مراكبى بطل قصتك مش واخد باله من معلومة تاريخية موثقة
و احب أقولهالك بصفتى من حزب النساء
البنت مخلوقة لتكون ام
آه محتاجة لراجل على عدة أصعدة
بس غريزة الامومة بتطغى على كل شىء
مش معنى كدا إنها تهمل جوزها بعد ولادة الأطفال
بس يعنى يفترض إن طفلها الاكبر اللى هوه الزوج بياخد دور اكبر و مسئولية مشتركة معاها فى الحمل الجديد
و هوه رعاية الأطفال و تربيتهم
و لو ملوش خلق يبقى أضعف الإيمان يتاخر على جنب شوية لحد ما تخلص هيا اللى وراها
و بالتالى لازم يبقى ساعتها فيه اولويات
يعنى الاطفال مش هتنستنى و تتفهم
لكن الأب ممكن يستنى الدنيا ماطرتش
و خلى بالك كمان ...
الزوجة دورها بيتوارى و بعد الأمومة بتتحول هيا روخرا لشبح
يعنى من الآخر كدا
كلنا رجالا و نساء بييجى علينا وقت عاوزين نبقى فيه عيال
و ينتهى بنا الامر إلى أشباح
وتحياتى يا نبع الحكمة
و بمناسبة إن أحباب ليا لهم كتب نزلت السنة دى
فعقبال إن شاء الله ما ييجى معرض الكتاب السنة الجاية و احضرلك حفل توقيع مجموعتك القصصية
يا رب

الجمعة, يناير 23, 2009

 
Blogger لماضة said...

اللي جابلك يخليلك
ههههههه
لما انتوا مش عاوزنا بتجيبونا ليه
انا اقولك
الطفل التالت ده على طول بيجي غلطه
اما الطفل الاول بيجي عشان يبقى كبير العيله وتعذبوه زي حلاتي كده رغم انه بيكون جي بعد شوق وعطش :))
اما الوسطاني بقى
عشان يدلع
والطفل الرابع

الجمعة, يناير 23, 2009

 
Blogger آلام وآمال said...

D:
الل جاب لك يخليلك
يمكن التالة يكون عندها اسباب مختلفة عن الاتنين الاولانيين
خليه يجرب كده ويقولنا النتيجة
اهو بردو الواحد بياخد خبرة من اللي سبقوه
D:

الجمعة, يناير 23, 2009

 
Blogger marmar said...

كلمتك نزلت الارض المرادي يا حنفي ههههه

الجمعة, يناير 23, 2009

 
Blogger انا حره said...

لقيت الحاجه واقفه ورايا وقفشتنى وشافت الكلام وطااااااااااااخ هووووب سكينه الكهربا اللى فدماغى وقعت

السبت, يناير 24, 2009

 
Blogger شيمـــــاء said...

الا لمؤاخذة ده فيلم واقيعيى و لا سسبنس ؟؟

السبت, يناير 24, 2009

 
Blogger نفرتارى said...

والله انت غلطان .. فى حد يا أخى يتجوز مرة ويعيش حياة مثل ما ذكرت .. ويفكر فى زواج مرة اخرى ..
معذرة. ما اسمى هذا ... ؟!!!!
حرم عليك يا ابو العيال .. واقعد ربيهم . ومبروووك اللى جابلك يخليلك .

نفرتارى

السبت, يناير 24, 2009

 
Blogger بثينــــــة said...

مش ممكن .. دي دراسة حالة لكل أسباب الخلفة واللي بيخلفوها
بجد ضحكتني يا مراكبي
بس زي ماتقول كدة الولاد دول هييجوا هييجوا .. انها ارادة السماء
واحدة صاحبتي عندها أربع أطفال وبتلف حوالين نفسها ستين لفة في الدقيقة ورغم كدة في انتظار الخامس و السادس مافيش حاجة عادي
وجهات نظر
عجبتني حكاية بيت الأشباح .. واحد واتنين .. دوامة شبه إرادية‎‏ ‏.. في الولاد بس يعني :) لكن برضه إنت ضحكتني أوي من قلبي
بوست هايل بجد

السبت, يناير 24, 2009

 
Blogger عدى النهار said...

"أنت تدرس فتتخرج فتعمل فتخطب فتاة ما ثم تتزوجها" مصداقيتك إتهزت أوي يا مراكبي
:)

السبت, يناير 24, 2009

 
Blogger gana magde said...

هههههههههههههههه

انت كده عملت فريق كوره

ياله شد حيلك علشان تعمل فريق تانى بجوزتين كمان وهم يلاعبو بعض

يعنى الفريق الاول هيلعب لوحده

ده يعنى اذا لو ممكن يفضل عندك حيل


تقبل تحياتى

السبت, يناير 24, 2009

 
Blogger صدى الصمت said...

ههههههههه
جميل قوى البوست ال إتملى عيال فجأة دة هههههههه
وعجبتنى قوى فكرة إنك بقيت شبح دى
ههههههههه
سلام ياحبيبى

السبت, يناير 24, 2009

 
Blogger يقول أنى امرأة said...

هو بوست كومدى بس بيحمل جواة مشاكل كتيرة
بس بجد خلينى اقلك ايوة انا معاك ان فية ستات كتير و كتير جدا بيسطعيتو من بعد الطفل الاول مش الثالث بس
بس محدش ينكر ان فية رجالة كتير بردة محتاجة تضرب بالنار
يعنى هو من نفسة من بعد اول طفل و المعاملة و النظرة للست بتكون مختلفة
ممكن يحس و يحسس مراتة انهم خلاص بقى كبرة و هما لسا فى العشرينات مثلا
الموضوع كبير و معتمد على الثقافة بوجة عام

السبت, يناير 24, 2009

 
Blogger Dr Ibrahim ... said...

ظاهرة غريبة تجتاح المجتمع المصرى..

السبت, يناير 24, 2009

 
Blogger Tamer Nabil said...

تعرف ياعم احمد

بجد انت واصف بالقصة احداث واقعية فعلاا تحدث ومازالت

بجد قصة رائعة

ربنا يكرمك

تحياتى

السبت, يناير 24, 2009

 
Blogger وميض ابتسامة said...

ياعزيزى كلنا هذا الرجل .. فلا تبتئس الحكاية وما فيها اننا اصحاب كلمة ولكن مفيش مانع انها تنزل المرة دى .. لكن المرة الجاية لايمكن ابداااااااا

تفتكر فى مشروع طفل أول من زوجة ثالثة.. ده مجرد سؤال برئ!!

السبت, يناير 24, 2009

 
Blogger Ahmed Mubarak said...

في ايه بس .. انا كنت ناوي لما اتجوز اقعد سنه من غير اولاد .. هتلعب في دماغي ليه؟
مشكله كلام الناس ده

الأحد, يناير 25, 2009

 
Blogger dodda said...

لو رحتى الوحده الصحيه وسمعتى كلامى يا شلبيه
كنتى يا بنتى فضلتى صبيه...

الأحد, يناير 25, 2009

 
Blogger david santos said...

Brilliant posting!
Congratulations!!!

الأحد, يناير 25, 2009

 
Blogger zordeak said...

أنا رأيى ان الزوجة الرابعة ممكن تتحل معاها المشكلة دى

مش علشان هى مش عايزة عيال

لأ

علشان حتى لو كانت عايزة عيال

مش هييجو

مظنش هينفع ساعتها

ولا ايييييييييييه

:D

الأحد, يناير 25, 2009

 
Blogger ادم المصري said...

مش عارف اقولك ايه بصراحه النص مشكلة وطريقتك في منتهي العبقرية
تحياتي

الأحد, يناير 25, 2009

 
Blogger زمن الشيكابالالالا said...

يا أبو فادى قول كلام معقول هوه ال بيتجوز ممكن يتجنن ويعملها تانى ؟!!!
وانت سيد العارفين
ههههههه

الأحد, يناير 25, 2009

 
Blogger يا مراكبي said...

Shaimaa Esmail

علم وجاري التنفيذ

الأحد, يناير 25, 2009

 
Blogger يا مراكبي said...

Fatima

إيه رقم 81 ده اللي بتتكلمي عليه؟ أنا مش فاهم حاجة؟ .. هههه

كلامك سليم وأنا متأكد منه برغم من إني من حزب الرجال .. حتى بناتي بتلاقي عندهم إحساس الأمومة من دلوقت .. سبحان الله

أشكرك على أمنياتك الطيبة

الأحد, يناير 25, 2009

 
Blogger يا مراكبي said...

لماضة


أن أعرف ناس قالولي إن الطفل الأول جه غلطة .. هههه

وماذا عن الطفل السادس؟ أهو ده مش ممكن يكون غلطة طبعا

الاثنين, يناير 26, 2009

 
Blogger يا مراكبي said...

آلام وأمال

أنا أعتقد إن الزوجة التالتة هتتفق مع التانية في أسباب إنجاب الطفل الأول

وهتتفق مع الأولى في أسباب إنجاب الطفل التاني

وهيتفقوا كلهم على بطل القصة وهيموتوه

الاثنين, يناير 26, 2009

 
Blogger يا مراكبي said...

marmar

بس أؤكد لسيادتك إن المرة الجاية كلمتي لا يمكن تنزل الأرض أبدا .. نورماندي تو .. تو .. تو .. ههههه

الاثنين, يناير 26, 2009

 
Blogger يا مراكبي said...

انا حره

أؤكد ليكي إني راجل البيت وما بأخافش وما بيهمنيش حد .. أنا بس قاعد يومين كده في المستشفى عشان شوية خدوش بسيطة في الجمجمة على كام كسر مضاعف .. مش عارف مين عمل فيا كل ده

الاثنين, يناير 26, 2009

 
Blogger ـ-ـ- أحمد عبد العدل-ـ-ـ said...

هههههه
فينك من بدرى ياباشمهندس
هى مدام حضرتك متابعة المدونة دى ؟

وبعدين ايه يعنى اللى حصل سنة واحد وتمانين .. علشان أنا مكنتش موجود الحقيقة .. ياسلام على دى أيام .. تخيل كان الواحد مش موجود أصلاً وبعدين لما جينا بقى نلاقى آثار واحد وتمانين وكمان الناس تشتكى مننا وعاملين زحمة وبطالة ومحدش طايقنا .. طب ليه كده بس؟ هما الناس زمان مكانوش بيتولدوا برضه ولا كانوا بيزرعوهم ولا ايه؟
ــــــــ
دمتَ جميلاً

الاثنين, يناير 26, 2009

 
Blogger norahaty said...

السلام عليكم ورحمة
الله تعالى وبركاته
ربنا يخليهم لك:)
ويخليك لهم:):):):)
(ولا تلمُن الا نفسك)
الطفل الثالث والرابع
بقى حاجة عادية خالص
واللى مخلف 2 بس فده العجيب!!
انا فاكرة فى افلام الستينيات
موضة الطفل الواحد كانت شغالة
بعد كده انتهت الموجة دى وبدات
موضة الطفل الثانى فى السبعينيات
اما الثمانيات الحمد لله جابت لنا التالت والرابع وساعات الخامس وحياتك!

الاثنين, يناير 26, 2009

 
Blogger norahaty said...

(أنا بس قاعد يومين كده في المستشفى عشان شوية خدوش بسيطة في الجمجمة على كام كسر مضاعف .. مش عارف مين عمل فيا كل ده)
الف لاباس عنك
ياباشمهندس سلامتك !
حادثة ولا بفعل فاعل :)

الاثنين, يناير 26, 2009

 
Blogger koukawy said...

انا جدا مع فكرة الطفل الواحد و بعد 4 5 سنين جواز منطلقين زي العصافير
و ده ما حققته
و كل الناس يدخلوا الله مش هتجيبي بيبي بقي
انتوا مالكوا انا مبسوطه كده
اتهموني بتجدري من الأمومه و لا يهمني طالما انا مبسوطه خلاص

الاثنين, يناير 26, 2009

 
Blogger يا مراكبي said...

شيماء

ولا واقعي ولا ساسبنس .. ده خيال علمي .. هههه

الاثنين, يناير 26, 2009

 
Blogger يا مراكبي said...

نفرتارى

مش أنا .. دي قصة .. والله قصة

مرة سألوني: إيه رأيك في الجواز؟

قلت: حلو جدا لدرجة إني ممكن أجربه تاني .. ههههه

الاثنين, يناير 26, 2009

 
Blogger يا مراكبي said...

بثينة

كون إن البوست عجبك ده لوحده شهادة أعتز بيها يا باشمهندسة

عندكوا أشباح برضه؟

ههههه

الاثنين, يناير 26, 2009

 
Blogger يا مراكبي said...

عدى النهار

ياراجل

إنت لسة واخد بالك؟

ده المصداقية دي حاجة قديمة قوي مش فاكر كانت عندي من إمتى .. ههههه

الاثنين, يناير 26, 2009

 
Blogger يا مراكبي said...

gana magde

يا إخواننا مش أنا والله .. دي فانتازيا .. مش حقيقة

بس بيني وبينك .. عجبني إقتراحك بخصوصوالزوجتين التانيين .. أشكرك على الإقتراح .. هههههه

الاثنين, يناير 26, 2009

 
Blogger allfollowsome said...

جامدة جدا يا باشا

انا لسه فى مرحلة الطفل الاول ربنا يستر بقى

هههه

الأربعاء, يناير 28, 2009

 
Blogger Jana said...

الآن فقط فهمت سبب الظواهر العجيبة عندى فى البيت ...أشياء تظهر وأخرى تختفى ...وزوجى يتواجد فى الصالة تارة وفى نفس اللحظة فى الليفنج
وتارة أخرى يحدثنى فى الهاتف وهو امامى يقرأ جريدته
فأفادكم الله يا مراكبى

عمر ولولى وجنى اولادى التلاتة بيسلموا عليك على فكرة
:))

الأربعاء, يناير 28, 2009

 
Blogger نفرتارى said...

ما انا قصدى مش انت .. اقصد بطل القصة .

نفرتارى

الأربعاء, يناير 28, 2009

 
Blogger Hannoda said...

ماتقولش اتجوز الثالثة....

بحسها أنانية من الراجل لما يفكر وسط الحدث الكبير جدا وهو إنجاب طفل يقوم ييجي في وسط جم المشاعر الكتير الجديدة و القوية و المتدافعة ده كلها و يتكلم عن الاهتمام بيه هو

طيب مايصب اهتمامه هو كمان بالأطفال
ويبقوا أطفالهم محور إهتمامهم هم الاتنين

مش عارفة
ساعات اللي على البر بيقعد و يحط رجل على رجل و يتكلم في كلام فاضي مالهوش علاقة باللي بيحصل

بس بقى الترسبات النفسية للأطفال مالهاش علاقة بالمكان و البيئة الخارجية
صدقني مالهااااااش علاقة - في ده أنا مش من اللي ع البر
:)


اللي بجد فعلا بيحصل هو ترصد الكل لأول مولود و التوتر اللي بيحصل لما يتأخر..

وبيستفزني جدا انطباق تسلسل السنوات الدراسية و الدروس الخصوصية على الخطوبة و الجواز و الانجاب

هو منهج؟؟
بعدين انت لسة بتسأل عن الشبح لحد انهاردة؟؟
:))
يوووووه
نسيتني ده إنت ولا هو؟
:)

أنا حجزت خلااااااااااااص
أسلملك عليها؟

الخميس, يناير 29, 2009

 
Blogger اعشق فى اليل ضوء القمر said...

هارون الرشيد فى زمانه
أنا أعرف إن كل لما الواحد يتزنق يقلع
جديده كل لما يتزنق يتجوز
هههههه
بس السؤال هنا ليه مبيلحقش يجيب الطفل الرابع علشان الحسد يجيب الخامس وربنا يكرم ويعمل فريق كوره
طبيب نفسانى حضرتك
سلامى ليك

الجمعة, يناير 30, 2009

 
Blogger أحمد كمال said...

داوها بالتي كانت هي الداء ، كل لما يجيبوا عيل ، جيبلهم ضرة ، و رب ضرة نافعة :)

الجمعة, يناير 30, 2009

 
Blogger بس خلاص ... said...

طيب كده هنعيد الجرة ونروح بيت تالت ونعمله بيت اشباح ثالث .... دى كده بقينا فى فيلم رعب ابطاله شويه عيال
هى دى اخرة اللى يقول ياجواز
هييييييييييييه كاس وداير
اضم صوتى لصوت ام البنين اشمعنى من 81 طيب ده له علاقة بجنون البقر

الجمعة, يناير 30, 2009

 
Blogger يا مراكبي said...

صدى الصمت

شفتي بقى التجديد؟ ست عيال وشبح ... أظن بطل القصة ما خلاش في نفسكم حاجة .. ههه

الأحد, فبراير 01, 2009

 
Blogger يا مراكبي said...

يقول أنى امرأة

بالطبع .. فالفانتازيا الكوميدية شيء والحقيقة شيء آخر .. والواقع ملئ بالفعل بحالات إنعدام المسؤلية من الطرفين .. كثيرا ما أرى أن الأزواج قد يحتاجون لقدر من التربية أكثر من الأطفال

الأحد, فبراير 01, 2009

 
Blogger يا مراكبي said...

Dr Ibrahim

أنهي ظاهرة دي يا دكتور؟ فيه ظاهرة جديدة أنا مش واخد بالي منها وألا إيه؟

الأحد, فبراير 01, 2009

 
Blogger يا مراكبي said...

Tamer Nabil

بجد واقعية؟ فيه كده فعلا بجد؟

كويس .. إنت كده بتشجعني على التطبيق .. هههه

الأحد, فبراير 01, 2009

 
Blogger يا مراكبي said...

وميض ابتسامة

لأ بقى .. مش كلنا هذا الرجل .. نا مثلا كلمتي ما بتنزلش الأرض أبدا .. بنتزل تحت الأرض

أنا متأكد من إن سؤالك عن الطفل السابع ده سؤال برئ ومش أسفين ولا حاجة .. هأجاوب عليه إن شاء الله لما يبقى فيه زوجة ثالثة أصلا

الأحد, فبراير 01, 2009

 
Blogger يا مراكبي said...

Ahmed Mubarak

إوعى تسمع لكلام الناس .. وحاول تقاوم الضغوط .. ما حدش هينفعك لو بوظت مخططاتك علشانهم .. وما حدش بيعجبه حاجة أبدا

الأحد, فبراير 01, 2009

 
Blogger يا مراكبي said...

dodda

وحسنين ومحمدين .. زينة الشباب الإتنين .. ههههه

منورة

الأحد, فبراير 01, 2009

 
Blogger يا مراكبي said...

david santos

Thanks for your kind appreciation

welcome all the time

الأحد, فبراير 01, 2009

 
Blogger يا مراكبي said...

zordeak

وليه بس بتفترض إن الزوجة الرابعة هتكون عقيمة؟ هه؟

وش خبيث وبيغمز

الأحد, فبراير 01, 2009

 
Blogger يا مراكبي said...

ادم المصري

أشكرك أشكرك

أخجلتم تواضعنا

منور

الأحد, فبراير 01, 2009

 
Blogger يا مراكبي said...

زمن الشيكابالالالا

أصل أنا الجواز عجبني جدا جدا لدرجة إني نفسي أعملها تاني .. هههههه

هما المجانين كده .. بيكرروا أفعالهم السابقة من غير ما يفكروا .. هههه

الأحد, فبراير 01, 2009

 
Blogger GHARAM said...

حنفي


حاتنزل المره دي


فعلا البوست ده مصري قوي

من اول سنه أولى زواج وسؤال الأهل والصحاب والجيران والمم المتحده عن آخبار الحمل ايه ، وفيه بيبي والا مفيش بيبي؟، وتبادل نظرات الشك والريبه بين أهل العروسه والعريس

وبعدين هاتو التاني علشان لازم تخووه

والخ الخ


حاجه تزهق

المهم في الموضوع أسلوبك الساخر الجميل اللي بيخدني مطبات صناعيه شمال ويمين


وفي النهايه


لما الواحد يحب يزأطط نفسه ويتجوز ينقي واحده مابتخلفش من الأول علشان مايوجعش دماغه ، أو تكون مخلفه وياخدها زوجه تيك اواي أو مسيار أو اي حاجه موش رايح يعيده من الأول والا أيه ياحنفي

الأحد, فبراير 01, 2009

 
Blogger واحده من أصحاب القمر said...

مراكبي

طبعا قصه حقيقيه جدا ومشكله البطل ده انه " ....... " بلاش اقول مصري طبيعي جدا .
العادات والتقاليد المصريه والدجل الشعبي المتوارث المتمثل في كلمه واحده فقط " حتميه "
حتميه التخرج
حتميه الخطوبه
حتميه الزواج
حتميه الخلفه
وكأننا خلقنا لنحقق مجموعه حتميات لا لنحيا الحياه كما هي
انا عن نفسي فوقت بعد الحتميه رقم 4
بعد اول طفل قلتلهم المصنع قفل ( no way (
وطبعا بتحارب بكل الطرق بس لا تراجع ولا استسلام بنتي وحيده وحيده بس نعيش في سلام .
ومش ملاحظ حاجه كمان يا مراكبي مجتمع الحتميه ده فقير جدا جدا يعني لا بيعلم ولا بيعالج العيال اللي هانخلفهم.
حقيقي اي حد يخلف اكتر من طفل ودخله مش كفايه يبقي مش طبيعي وسلم علي عاداتك وتقاليداتك يا اسماعيل بيه لانها فاشله توماما .
معلش اول مره اجي وانفعلت

أميره جمال

الاثنين, فبراير 02, 2009

 
Blogger koukawy said...

فينك يا استاذ
بقالك كتير مش بتمتعنا ببوستايه حلوه
ان قلت امسي

الأربعاء, فبراير 04, 2009

 
Blogger يا مراكبي said...

أحمد عبد العدل

هههه

مين واحد وتمانين ده؟ ده رقم أوتوبيس نقل عام وألا إيه؟ هه؟

طبعا الحاجة متابعة المدونة وأنا أؤكد إني ما بخافش .. سامعني؟ ما بخافش

أنا بأترعب بس

الأربعاء, فبراير 04, 2009

 
Blogger يا مراكبي said...

norhaty

مش أنا يا دكتورة مش أنا .. هههه

أن معاكي في موضوع "الموضة" ده في إنجاب الأطفال .. فعلا المجتمع مر بعدة مراحل لأن فعلا فيه عائلات كتيرة إكتفت بطفل أو بطفلين .. ولما إكتشفوا إن العائلة بقت صغيرة جدا وإن ما فيش ثراء عائلي في الأعمام والخيلان .. حصلت حاجة عكسية وبقينا نسمع عن الأطفال التلاتة والأربعة

أصحابي وصلوا 5 و6 كمان .. هههه

الأربعاء, فبراير 04, 2009

 
Blogger يا مراكبي said...

norahaty
تاني

حادثة طبعا

مخك راح لبعيد يا دكتورة

مش أنا اللي أنضرب في البيت أبدا

ده كان عالسلم

الأربعاء, فبراير

الأربعاء, فبراير 04, 2009

 
Blogger يا مراكبي said...

koukawy

معاك بعض الحق .. بس كل حاجة ليها وجهين

أنا معاكي إن الزوجين ممكن يستمتعوا جدا بحياتهم منفردين من غير أطفال في البداية

لكن ده في حدود الحفاظ على السن المناسب للإنجاب وخصوصا إن سن الزواج بيتأخر اليومين دول قوي

أم الفرق الكبير بين الأطفال فزي ما هو راحة للوالدين زي ما هو برضه مش كويس في العلاقة بين الطفلين بسبب الفرق الكبير بينهم

كل حاجة ليها ميزة وعيب

الأربعاء, فبراير 04, 2009

 
Blogger يا مراكبي said...

allfollowsome

إنت بس كمل المراحل اللي حكينا عليها دي كلها وإبقى إدعيلي .. هههه

الأربعاء, فبراير 04, 2009

 
Blogger يا مراكبي said...

Jana

إحم

الأعراض اللي بتقوليها عن زوجك لعزيز دي هي صحيح أعراض شبحية لكن ده مش معناه إنه متجوز واحدة تانية ولا حاجة لا سمح الله

إحنا بس بنهدي النفوس .. هههه

سلميلي على الولاد كتير قوي .. ربنا يخليهم ويحميهم

الأربعاء, فبراير 04, 2009

 
Blogger يا مراكبي said...

نفرتارى

أشكرك على التوضيح

إنتي عارفة إن المدونة متراقبة

الأربعاء, فبراير 04, 2009

 
Blogger يا مراكبي said...

Hannoda

الفانتازيا هنا وبالذات في جملة الزوجة الثالثة بتحمل أفكار كتيرة جدا .. من ضمنها مثلا شوية الأفكار اللي إنتي طرحتيهم عن الأنانية وعدم تحمل المسؤلية .. إلخ

لكن النقطة المهمة عندك هي: المنهج .. فعلا المجتمع راسم لنا منهج ثابت وبيغصبوا علينا نمشي عليه

***

سلميلي عليها أوي .. توصلي بالسلامة إن شاء الله

الأربعاء, فبراير 04, 2009

 
Blogger يا مراكبي said...

اعشق فى اليل ضوء القمر

كل ما يتزنق يتجوز .. هههههه

سؤالك عن الطفل الرابع ده سؤال وجيه جدا .. أنا مستعد أغير البوست وأدخل الطفل الرابع .. بس ممكن نوصل للزوجة الرابعة برضه

الأربعاء, فبراير 04, 2009

 
Blogger يا مراكبي said...

أحمد كمال

عجبتني قوي كلمة "الداء" دي في وصفك للزوجة

إنت متأكد إنك متجوز زينا؟ لسه سليم؟

الأربعاء, فبراير 04, 2009

 
Blogger يا مراكبي said...

بس خلاص

المهم إننا عرفنا إن بيت الزوجية = بيت الأشباح

ده أهم درس ... ههههه

مين جاب سيرة واحد وتمانين دي؟ مش السنة اللي كسبنا فيها كأس العالم؟

الأربعاء, فبراير 04, 2009

 
Blogger يا مراكبي said...

GHARAM

صح كده .. طول عمرك كلامك في الجون .. خبرة كبيرة جدا

وفعلا الواحد ينقي واحده مابتخلفش أوياخدها تيك اواي أو مسيار .. هو ده الكلام .. نفسي أتخطى مرحلة الكلام .. بس إنتي عارفة .. أنا حنفي جامد جدا .. هههه

منورة

الأربعاء, فبراير 04, 2009

 
Blogger يا مراكبي said...

واحده من أصحاب القمر

معاكي كل الحق

مجتمع "الحتمية" ده راسم لينا مسبقا قضبان قطار ولازم نمشي عليها .. ولو رفضنا بنلاقي مقاومة وضغوط شديدة جدا بتتعب أعصابنا

الغريب إن ما حدش بيشيل حد .. ولا حد بيساعد في حاجة .. ولو حبينا إننا نخطط حياتنا على مزاجنا أو في حدود إمكانياتنا .. تلاقي الناس عايزانا نمشي على المخطط العام للمجتمع بغض النظر هل هو يناسبنا أو لا

أهلا بيكي

الأربعاء, فبراير 04, 2009

 
Blogger يا مراكبي said...

koukawy

متشكر جدا على سؤالك .. كلك ذوق

أنا بس كنت مسافر ولسة راجع

هأنشر قريب جدا بوست جديد

الأربعاء, فبراير 04, 2009

 
Blogger التكعيبة للتنمية الفنية و الثقافية said...

مهرجان النشر الجماعى الاول

تقيم التكعيبة للتنمية الفنية و الثقافية مهرجان سنوي للنشر الجماعي للقصة و القصة القصيرة و الشعر بالعامية و الفصحى، سيكون موسمه الأول هو عام 2009.

و مفهوم النشر الجماعي هو مجموعة قصصية أو مجموعة شعرية لأكثر من مؤلف بين ضفتي كتاب واحد يجمع تلك الأعمال التي سيتم اختيارها عن طريق لجنة تحكيم في كل مجال على حدا، و يتم تحديد أعضاء اللجنة لكل دورة مهرجان.
و يصدر بتلك الأعمال مطبوع/ كتابين أحدهما للقصة و الآخر للشعر سيتم نشره في عامه الأول بالتعاون مع دار دَون، و يتم توزيعه و بيعه في الأسواق
لمساعدة الكتاب أصحاب العمل الواحد و كذا الكتاب الجدد الذين لم تتكون لديهم مجموعة قصصية أو شعرية بعد، في نشر أعمالهم المميزة بدون مقابل مادى

و ترسل الأعمال مرفق بها اسم الكاتب، عنوانه,رقم تليفونه,ايميله، وظيفته، سنه، سابقة نشره للعمل المقدم من عدمه او فوز العمل فى اى مسابقات ادبية
و ذلك في رسالة إلكترونية معنونه باسم المجال الذي يريد المشاركة في مسابقته مرفق بالرسالة العمل بصيغة وورد، و يفضل أن تكون تلك الأعمال مسجلة باسم أصحابها لكنه ليس شرطا لقبول العمل

ترسل الاعمال على ايميل
nashrgama3y@gmail.com

لمزيد من المعلومات حول المهرجان
http://eltak3eiba.blogspot.com
او
http://www.facebook.com/group.php?gid=94334335985#/group.php?gid=94334335985

مزيد من المعلومات حول التكعيبة
http://www.facebook.com/groups.php?ref=sb#/group.php?gid=29491316206

ملاحظات :
الاعمال المشاركة بالمهرجان هى فقط التى ترسل عبر الايميل او تسلم باليد
مسموح بالاشتراك بأكثر من عمل فى اى مجال
اخر موعد لتلقى الاعمال 15-7-2009

مع تمنياتنا للجميع بفرصة عادلة فى النشر
احمد حسن
0193953620
رقم محمول داخل جمهورية مصر العربية

الجمعة, يونيو 12, 2009

 

إرسال تعليق

Links to this post:

إنشاء رابط

<< Home