شد القلوع يا مراكبي ... مافيش رجوع يا مراكبي

السبت، مارس 28، 2009

أنص وأم التيتي

من بين ثقافات العالم أجمع .. نتميز نحن المصريين (أو المصريون مش عارف أيهما الأصح) أنه إذا ذكر أحدهم شيئا ما قد لا يصدقه عقل أو قد يكون مستبعد الحدوث كتخفيض الضرائب عن كاهل المواطنين مثلا .. فإنك لابد وأن ترد عليه قائلا: ده عند أنص .. وفي رواية أخرى عند هنص
.
لم أنجح حتى الآن في معرفة من هو ''أنص'' هذا أبدا .. ذلك الكائن الغريب العجيب الذي إتفق المصريون على أنه الوحيد الذي تتجمع عنده غرائب الأمور والمستحيل من الحدوث .. كما أنني لم أتمكن من تحديد عمره ومكانه .. لكن من الواضح والأكيد أنه كان ذكرا
.
يتغير الزمان وتتبدل الأجيال وأتفاجأ الآن بأن أنص أو هنص هذا قد تضاءل دوره إلى حد مخجل .. وتربعت مكانه على ذلك العرش شخصية أنثوية أخرى هي أم التيتي .. فإذا قلت لأحدهم مثلا أنه من المؤكد أن تغيير وزير ما بات وشيكا نظرا لأدائه المتدني بوضوح .. يجيبني المستمع قائلا: آه .. ده عند أم التيتي
.
وفي الحقيقة أنا لا يشغلني أبدا أن تكون أحلامي عن نهضة مصر من جديد هي أحلام مشروعة أم أنها ضربا من ضروب الخيال .. لكن ما يحزنني أن تغادر تلك الأحلام من عند أنص لتسيطر عليها أم التيتي .. فالرجولة والنخوة التي لا تزال بداخلي لا تقبل هذا التنازل أبدا
.
فلنطلق معا حملة كلنا أنص .. ولنتضامن ضد أم التيتي .. وما حدش يقول لي ده عند أم التيتي

التسميات:

102 Comments:

Blogger أحمـــــــــــــد أبو العلا said...

وراك ياباشا طبعا
ههههههههههههه

كلنا عند أنص
أم تيتي ديه بأه لعلمك ن مجلس حقوق المرأه وحركه سوزي المتطرفه والمحظوره دوليا

سرقوا مننا أحلامنا في التغيير والتطوير, لكن يسرقوا مننا أنص ويودوه لأم تيتي يبأه لأ

بوست جاااااامد كالعاده

الأحد, مارس 29, 2009

 
Blogger لماضة said...

ههههههههههه
طيب اسمع دي كمان
لما حد يطلع يقول حاجه غلط عن علم او ما شابه
يقوله انت متخرج منين
من كلية البوسطه في طنطا
ابقى سلملي على خالتي تيتي بقى

الأحد, مارس 29, 2009

 
Blogger اسكندراني اوي said...

هههههههههههه
يا خبر والله ضحكتني لحد ما عيوني دمعت
اقولك حاجه
عند ام الكني دي عندنا من اسكندريه
ههههههههههههههههههههههههههه

الأحد, مارس 29, 2009

 
Blogger اسكندراني اوي said...

وفي قول اخر عند امه يا ادهم
وماتسألنيش مين ادهم ولا فين امه
ههههههههههههههههههههههه

الأحد, مارس 29, 2009

 
Blogger Epitaph1987 said...

انا كنت اعرف
عند أم لالي
:D

اما
"ده عند امه يا ادهم"
فدي من فيلم اللي بالي بالك
لما رياض المنفلوطي (محمد سعد) بيقول لأدهم (حسن حسني)
:D

الأحد, مارس 29, 2009

 
Blogger kochia said...

ههههههههههههه
يا سيدي انص
ام تيتي
المهم نعرف الحقيقة فين
والمعلومات فين
ويمكن نلاقيهم نتسند عليهم عند الحاجة
وعلي فكرة فيه اشخاص مجهولين اخريم زي انص وام التتيتي دول
الظاهر انهم قبيلة وهيطلعوا هم صحاب وانت هتدخل نفسك في مشكلة
يمكن انص كبر في السن واتنازل عن المعلومية لام تيتتي
ولا ايه
خلي بالك من عش الدبابير

تحياتي

الأحد, مارس 29, 2009

 
Blogger اسكندراني في الغربة said...

هو انا اخلص من التيتي على الفيس بوك الاقي انص هنا
انت بتجر شكل الناس دي لية
وعم اسكندراني اوي جايب سيرت ام الكني
حيقلب علينا بحري كلها
خلينا في عند امة يا ادهم
اهو ادهم بردوا معرفة و مش بيزعل

الأحد, مارس 29, 2009

 
Blogger عاشقه وغلبانه said...

ده عند امه يا أدهم
ههههههههههههههههههههههههههه


هو عندي كان اسمه ننص
وبقيت ام ترتر
الناس بتتغير
هههههههههههههههههههههههههه

الأحد, مارس 29, 2009

 
Blogger تخاريف خاصه! said...

هههههههههههههههههههههههههه
معا ضد انص...كلنا..ام تيتي..!!!

الأحد, مارس 29, 2009

 
Blogger ـ-ـ- أحمد عبد العدل-ـ-ـ said...

يتفع كده ياباشمهندس .. جاى معشم نفسى بقصة وقلت هتكون قصة فى منطقة شعبية
بغض النظر عن الاحتمال الكبير لوجود تعاون أو علاقة قرابة أو مصاهرة بين أنص وأم التيتى .. احنا فى كل الأحوال نفضل أن يمتلك حلول مشكلاتنا ناس تانيين .. من أجل ما تحلم به من نهضة مشروعة يجب أن ندرك أننا كلنا أنص و كلنا أم التيتى

الأحد, مارس 29, 2009

 
Blogger خمسة فضفضة said...

السلام عليكم ورحمة الله وبركاته

اللي اعرفه يا هندسه انها كانت ام انص وبعدين بقت ام لالو وبعد كده في مراحل متقدمه بقت ام تيتي

وماكانش فيه انص دا خالص كانت مامته يا هندسه مامته مش هو

سلام

الأحد, مارس 29, 2009

 
Blogger mohamed ghalia said...

الحمد لله طلقناها من زمان
بس عاجبنى أحلامك المشروعة بجد
ليه يعنى مستبعدين ده يحصل

الأحد, مارس 29, 2009

 
Blogger محمد عبد الغفار said...

ومين قالك ان انص كان راجل !!!!!

الأحد, مارس 29, 2009

 
Blogger gana magde said...

هههههههههههههههههههههههههههههههه

زى مانت متغيرتش ومش هتتغير

بس انا مليش دعوه انا عند ام التيتى

تحياتى

الأحد, مارس 29, 2009

 
Blogger Appy said...

حكيكه الامر يعنى انا متشرفتش بمعرفه ام انص ولا ام تيتى ولا ام ترتر ولا عند امه يا ادهم ولا حد من دول
وضيف على دول اشرف يا وهبه اللى فى الاغنيه اللى انا مش فاهماها
عموما المصرين بتوع البدع اذا كانونا حولوا كلمه موزاليندا اللى معناها البنت الجميله او المراه فائقه الجمال الى مززة يبقى جاى تسال مين ام انص ولا تيتى دى لا كده حرام وكتير فعلا

الأحد, مارس 29, 2009

 
Blogger د. إيمان مكاوي.. أم البنين said...

أولا حمدا لله على السلامة
ثانيا :نحن المصريون وليست المصريين لأن نحن الفاعل وهو مرفوع والمصريون مضاف إليه مرفوع أيضا..دي بس توضيحه صغيره بما أن حضرتك حيران فيها
ثالثا:المشكله مش في أنص ولا أم التيتي المشكله في مين إللي بيختع الكلام ده ..ومعناه إيه وجابه منين ..كنت دايما أفكر في الموضوع ده وخاصة إننا إحنا المصريين عندنا مخزون رهيب من الألفاظ إللي مالهاش صاحب
رابعا: تدوينة دائما إمرأة أخرى ..جميلة جدا ..جسدت فيها أطماع الرجال في أن يجدوا في المرأة كل شيء مما يدفعهم لح أكثر من واحدة ..وما تعانيه المرأة من ذلك

تحياتي

الأحد, مارس 29, 2009

 
Blogger بثينــــــة said...

ومالها أم التيتي
دة حتي من زمان ودة حال العرب
مش قالوا زمان
وعند بثينة .. قصدي جهينة .. الخبر اليقين :)ا :)ا

الأحد, مارس 29, 2009

 
Blogger SAYED SAAD said...

يا مراكبي
ازيك يا باش مهندس
من المؤكد عندما تتحدث عن شئ خرافي سوف يكون الرد شئ خرافي
وانت عارف حاجة دايما بتتقال ان الشعب المصري ابن نكته وده طبعا كنايه عند سرعةالرد والبديهه في الكلام شعبنا المصري امتص كل التقافات اللي اتعرض ليها من الاحتلالات اللي جت علية وقدر يحتفظ بهويتة وكمان لية كيانه الخاص
انص او هنص او ام تيتي وغيرها من المصطلحات التى اشبة بالمساكن العشوائية ستظل موجوده وسيظهر اكيد كل يوم جديد
المهم ان الاشياء الوهمية اللي اللي بنوجدها متكترش لدرجة اننا نعيش فيها وننسى واقعنا
تقبل مروري
سيد سعد

الأحد, مارس 29, 2009

 
Blogger نبض اسكندرية said...

هههههههههههههههههه

دى عنصرية وتمييز وتفرقة

هو دلوئتى فى حاجة اسمها ذكر يتربع على عرش

الكلام دة كان زمن ياباشمهندس

اظن خالتى تيتى خلفت واحد اسمة كنى بقينا نقول بية فى اسكندرية ونحلف بحياتة هنا

حلو قوى انا فضلت اضحك حتى ادمعت عيناى والله

تسلم ايدك
تحياتى

الأحد, مارس 29, 2009

 
Blogger esraa said...

لأ طبعا
هتفضل أم التيتي

الأحد, مارس 29, 2009

 
Blogger اللؤلؤة said...

يا مراكبى
السلام عليكم
يا باشمهندس أنا بيجيلى حالة صرع من هذه الألفاظ التى يتداولها بغض الشباب
وهى ألفاظ سطحية تنم عن ثقافة هشة
أما صلب الموضوع فقد فقدت الناس الثقة باالدولة متمثلة فى النظام
مهما تغيرت الحكومات
دمت بكل الخير

الاثنين, مارس 30, 2009

 
Blogger Blank-Socrate said...

احدث اغنيه شعبيه و للاسف شلتها من الميل اسمها
" ابو امك "
الاغنيه كدا متفهمش غلط
:)

الاثنين, مارس 30, 2009

 
Blogger marmar said...

اصل انص معروف مين هوا وام التيتي معروفه مين هنا
ال ويقولوك احنا بنخدم الطفل المصري وبندفعه لتحقيق طموحاته واحلامه
هيا دي بقى الاحلام اللي كلهم مترمين عل ارصفه الشوارع ومحدش سائل فيهم
لا بجد تحيا ام التيتي وليموت انص
ولا اقولك يموت انص وتبقى ام التيتي انص
اهو كده خدنا حقنا منهم الاتنين

الاثنين, مارس 30, 2009

 
Blogger نفرتارى said...

هههههههههه

بجد دمك خفيف يا هندسة .


تحياتى ،،


نفرتارى

الاثنين, مارس 30, 2009

 
Blogger اعشق فى الليل ضوء القمر said...

يا مركبى
بص بقى يا هندسه حقيقتا انا معرفش مين أنص ده
ده لو كان رجلا كما فهمت وش بإبتسامه
لكن الأخباردائما بعرفها
من عند أم اللالى وساعات لما حاجه مبعرفهاش بيتقالى وده عند خالتك نفوسه
مين خالتى نفوسه ديه انا مليش خاله إسمها كده
ولم بقول لحد عن تغير مافى سياستنا الأول كان بيقال لى فى المشمش
دلوقتى عند خالتك ام علاء
سلام بقى علشان ابو علاء بيودع قبل ما يحس بيا حد
صحيح لو متقفشتش أشوفك عند ام جلامبو

الثلاثاء, مارس 31, 2009

 
Blogger allfollowsome said...

هههههههههههههههه

ياباشا انص تعب وخوخ

ده فيه ام تيتى وام ترتر وام لاللى دول عصابه يا باشا

معا فى سبيل رد اعتبار انص

الثلاثاء, مارس 31, 2009

 
Blogger aidy said...

لو أنص وام تيتى هما اللى هيعدلوا حال البلد ممكن ننتخبهم فى مجلس الشعب

بس واضح انهم زى الديناصورات مبقاش ليهم اثر وعشان كده الناس بتحلف بحياتهم


تحياتى لحضرتك ...

الثلاثاء, مارس 31, 2009

 
Blogger الشاعر محمد عبدالرحمن said...

موضوعك مميز دمت مبدع ومتألق
وعلى فكره هي نتميز نحن المصريون هي الأصح

الأربعاء, أبريل 01, 2009

 
Blogger صدى الصمت said...

يعنى حتى فى أقل الكلمات بتضهدوا حقوق المرأة ؟؟؟
يا ساتر عليكم يارجالة
ايه يعنى لما أم تيتي تحمل الراية شوية بمناسبة عيد الأم
هههههه

الأربعاء, أبريل 01, 2009

 
Blogger GHARAM said...

بصراحه مافيش عندي تعليق



لأني ميته من الضحك


دمك عسل والله

الأربعاء, أبريل 01, 2009

 
Blogger MǿиY El-Shreef said...

ههههههههههههه

والله اول مره اسمع عنهم اساسا

انا دايما بسمع عند امه يا ادهم :D

بس الحمله مادام فيها يارجال اتحدوا يبقى انا عند ام التيتي تيتي تيتي ومالو :D

ههههههه

مدونه حلوة اوي يا يامراكبي :p

متابعه

الأربعاء, أبريل 01, 2009

 
Blogger بس خلاص ... said...

طيب لو خلصت من ام تيتى هتروح فين من ام الللاالى .. وام ترتر ...وام اربعه واربعين .. وام قويق
دول عصابه يابا
شوفت احنا اغلبيه لايمكن تعرف ترجع السلطه تانى للسيد انص لانها راحت عليه وعليكوا ياباشا
نحن لكم بالمرصاد
قال انص قال فلتحيا ام تيتى واخواتها

الأربعاء, أبريل 01, 2009

 
Blogger أنسانة-شوية وشوية said...

يا عينى حتى مستخسرين فينا ام التيتي يا عم العالم كل ذكورى

نزلا المرة دى وسيب لنا حتى أم التيتي

علي فكرة انا كسمعتش عن أنص ده عمرى

الأربعاء, أبريل 01, 2009

 
Blogger Tamer Nabil said...

انت كدة نسيت بقى

عند ام ترتر وام ننى ههههه

شوفت نسيت ودخلت بغير معرف ههه
تحياتى

الأربعاء, أبريل 01, 2009

 
Blogger شمس said...

تيتى انص

كلة على حساب الزبون ههه

تحياتى

الخميس, أبريل 02, 2009

 
Blogger hana said...

يااربي يعني حتى العنصرية هتدخل فى دة
طب سيبولنا حاجة شوية أهو نشم نفسنا
هههههههههههههههههههههههه
بس بجد بجد أنص دي ملوش وجود عالساحة
مالبدااية
الموضوع كله فى ام التيتي من زمان هههههههههههههه
طريقتك في السرد ساحرة جذابة
أرق تحيااتي

الجمعة, أبريل 03, 2009

 
Blogger يا مراكبي said...

أحمد أبو العلا

أشكرك على تضامنك

يعملوا فينا أي حاجة إلا إن أنص يخسر عرشه .. لا وألف لا

أشكرك جدا

الجمعة, أبريل 03, 2009

 
Blogger يا مراكبي said...

لماضة

مش هأسلملك على خالتك تيتي طبعا .. أنا مقاطعها .. هههه

هي كلية البوسطة دي بتخرج مهندسين وألا إيه؟

الجمعة, أبريل 03, 2009

 
Blogger يا مراكبي said...

إسكندراني أوي

حبيبي والله .. مش عارف أشكرك إزاي عالتصييت الجامد اللي عملته للبوست ده

أنا أول مرة أعرف أم الكني دي .. ست دي برضه زي أم التيتي كده؟ ده إحنا محاصرين بقى يا جدعان .. هههه

الجمعة, أبريل 03, 2009

 
Blogger يا مراكبي said...

إسكندراني أوي تاني

أظن أمة دي ست برضه مش كده؟

لأ الموضوع النسائي ده وسع قوي كده

الجمعة, أبريل 03, 2009

 
Blogger يا مراكبي said...

Epitaph1987

وكمان أم اللالي .ز لأ أنا هأنتحر كده يا هاجر .. ده الموضوع طلع أكبر مما أتخيل بكتيييير .. أنا كده فهمت ليه أنص إختفى بسرعة .. الكترة تغلب الشجاعة

الجمعة, أبريل 03, 2009

 
Blogger يا مراكبي said...

كوشيا

شكلك كده عندك معلومات مهمة .. تحذيراتك في آخر التعليق بتقول إن الموضوع أكبر مما أتخيل

ياريت تقوليلي لو كنت عكيت ولا حاجة .. يمكن أرجع في كلامي وأتضامن مع أم التيتي ولا حاجة .. ههههه

الجمعة, أبريل 03, 2009

 
Blogger يا مراكبي said...

اسكندراني في الغربة

يا سلام على العقل والحكمة

خلينا في عند امة يا ادهم

إنما الباقيين دول شكلهم ظهرهم مسنود وهيعملولنا مشاكل جامدة .. بلاش منهم أحسن

الجمعة, أبريل 03, 2009

 
Blogger يا مراكبي said...

عاشقه وغلبانه

وكمان أم ترتر؟

الدنيا بتتغير جامد صحيح

التكنولوجيا الحديثة عاملة عمايلها جامد

الجمعة, أبريل 03, 2009

 
Blogger يا مراكبي said...

تخاريف خاصه

التعليق ده شكله مدسوس عالمدونة دي .. هههه

أنص أنص يحيا أنص

الجمعة, أبريل 03, 2009

 
Blogger يا مراكبي said...

ـ-ـ- أحمد عبد العدل-ـ-ـ

إنت كده مسكت العصاية من النص .. تضامنت مع الإتنين .. شكلك كده مخبي علينا حاجة .. هما الاتنين مرشحين لمنصب مهم وألا حاجة؟

الجمعة, أبريل 03, 2009

 
Blogger يا مراكبي said...

خمسة فضفضة

واضح إن الموضوع دخل في العائلات والأنساب

مامة أنص دي جديدة

يعني الموضوع كله كان نسائي من الأول وأنا مش دريان؟ الحكاية كده تبقى أسوأ بكتييييير

الجمعة, أبريل 03, 2009

 
Blogger يا مراكبي said...

mohamed ghalia

الأحلام دايما مشروعة .. المهم التنفيذ كمان يكون مشروع

تحياتي

الجمعة, أبريل 03, 2009

 
Blogger يا مراكبي said...

محمد عبد الغفار

إوعى تقوللي إن عايش طول عمري مخدوع

قصدك إنه مش مذكر؟

وألا قصدك إنه ما كانش بيتسم بالرجولة؟

الجمعة, أبريل 03, 2009

 
Blogger koukawy said...

ده حتي من فات (انص ) تاه ه ه ه
ههههههههه

الجمعة, أبريل 03, 2009

 
Blogger ملكة بحجابى said...

ههههههههه
أنص وأم تيتى
المطلع كان جامد
فهمت على طول انه تايتل وراه حاجة بين السطور
ابدعت يا ريس
تقبل مرورى

ملكة بحجابى

الجمعة, أبريل 03, 2009

 
Blogger يا مراكبي said...

gana magde

من غير ما تحلفي .. أنا أول ما بأشوف تعليق نسائي أو بناتي بأبقى عارف مسبقا إن صاحبة التعليق مع أم التيتيي طبعا .. ده غير اللي جابوا أمهات تانية زي أم ترتر وكني وأمة ولاللي .. هتروحوا من ربنا فين؟

السبت, أبريل 04, 2009

 
Blogger يا مراكبي said...

Appy

نشكر جناب الإمبراطورة على المعلومة المهمة جدا اللي ما حدش كان يعرفها بتاعة المززة دي .. أنا طول عمري بأسمعها ومش عارف يعني إيه

بس أكيد ما كانش ينفع حد يعاكس واحدة ويقولها يا موزاليندا .. كانت البنت تفتكرها شتيمة وألا حاجة .. مش كده؟

السبت, أبريل 04, 2009

 
Blogger يا مراكبي said...

د. إيمان مكاوي.. أم البنين

شكرا على التوضيح .. أنا نسيت إن فيه حاجة في النحو إسمها مضاف إليه .. ذكريات

الشعب المصري مبدع جدا .. فيه دراسة قرأتها عن النكتة في حياة المصريين .. طلع الموضوع فعلا كبير ويعد الإبتكار اللغوي فعلا أحد إبداعات المصريين اللي بيتفردوا بيها دونا عن كل الجنسيات الأخرى

أهلا بك

السبت, أبريل 04, 2009

 
Blogger يا مراكبي said...

بثينــــــة

هنتمحك في التاريخ العربي وألا إيه؟

ما كانش فيه أم التيتي ولا أم جهينة دي في التاريخ العربي خالص

أنا ناقص أم جهينة دي كمان؟

ههههه

السبت, أبريل 04, 2009

 
Blogger يا مراكبي said...

SAYED SAAD

شعبنا المصري امتص كل التقافات اللي اتعرض ليها من الاحتلالات اللي جت علية ده كلام سليم

لكن جملة إنه قدر يحتفظ بهويتة وكمان لية كيانه الخاص دي أنا مس معاك فيها

أنا شايف إن الجملة الأولى صحيحة بمفردها وهي دي خصائص الشخصية المصرية .. لكن بجد أنا مش شايف هوية قديمة أصلية قدر يحتفظ بيها .. حتى شوية الخصائص الفرعونية الباقية .. دي برضه جوة الخليط اللي المصريين فيه دلوقت

خالص تقديري

السبت, أبريل 04, 2009

 
Blogger Rania said...

ام انص و ام االلاى و ام توتا ام ترتر
و تحيا الامه العربيه كلها

كل سنه و انت طيب يا بشمهندس

السبت, أبريل 04, 2009

 
Blogger اعشق فى الليل ضوء القمر said...

اولا ربنا يبارك فيك و فى أختك صدى الصمت
ثانيا كل سنه و أنت طيب يا هندسه و عقبال 100 عام إضافيه على عمرك بالعمر المديد فى طاعه الله و رضاه

محبتش أجى بيد فاضيه فجبتلك معايا
<يارب تعجبك

السبت, أبريل 04, 2009

 
Blogger يا مراكبي said...

نبض اسكندرية

أنا برضه اللي بأدعوا للعنصرية؟

مش إنتي اللي بتعترفي وتقولي: هو دلوئتى فى حاجة اسمها ذكر يتربع على عرش؟

مين فينا اللي عنصري بقى؟ هه؟

المهم دلوقت .. كني ده طلع ولد مش بنت؟ بجد الكلام ده؟

السبت, أبريل 04, 2009

 
Blogger يا مراكبي said...

esraa

كلهم باعوك يا مراكبي

حتى إنتي كمان يا إسراء؟

ما كانش العشم

هههه

السبت, أبريل 04, 2009

 
Blogger يا مراكبي said...

اللؤلؤة

وعليكم السلام ورحمة الله

تعليقك فيه شقين .. إنهيار الدلالات اللغوية .. وهو أمر متدهور بإستمرر وله دلالة قوية على المستوى العام من منطلق: كل إناء ينضح بما فيه

أما الشق الآخر فهو عدم الثقة في النظام الحاكم وهي حقيقة باتت واقعا .. فالناس لا تنتظر تحركا إيجابيا من الحكومة ولا تثق في صدق نواياها أبدا .. وإعادة جذور الثقة بين الشعب والحمونة تحتاج إي رأب للصدع في وقت طويل

السبت, أبريل 04, 2009

 
Blogger يا مراكبي said...

Blank-Socrate

طيب حد يبعتلي الأغنية الشهيرة دي عشان أبقى متابع الدنيا بدل ما أنا عامل زي الأطرش في الزفة كده

السبت, أبريل 04, 2009

 
Blogger يا مراكبي said...

marmar

أنا مركز جدا في التعليق وما تضحكيش علينا .. إنتي موِتِي أنص في الحالتين

ليحيا أنص بغض النظر عن إن أم التيتي تعيش وألا لأ

السبت, أبريل 04, 2009

 
Blogger يا مراكبي said...

نفرتارى

أشكرك جدا .. أهلا بيكي دايما

السبت, أبريل 04, 2009

 
Blogger ذو النون المصري said...

لا
هقول ان عندك ام التيتي
ههههههههه

السبت, أبريل 04, 2009

 
Blogger Tamer Diab said...

للأسف يا مراكبي
الأنوثة في المواضيع دي غلبت خلاص
دي مش أن تيتي بس
ده فيه ام تيتي
وام ترتر
وام لالي
والي سمعته جديد اخر حاجة بقي
عند ام أنص
يعني حتي انص جابه امه بداله
احنا لازم نكون حزب يا باشا يطالب بأحقيتنا في حدوث كل ما هو غير معقول ويكون اسمه
ده عند المراكبي :)

السبت, أبريل 04, 2009

 
Blogger يا مراكبي said...

اعشق فى الليل ضوء القمر

بأقولك إيه .. المدونات متراقبة .. فخلينا في خالتنا نفوسة أحسن وبلاش خالتنا أم علاء دي .. ههههه

ما قلتليش فين ام جلامبو دي اللي غالبا هألاقيك عندها بعد تعليقك ده؟

إكتبلي العنوان

السبت, أبريل 04, 2009

 
Blogger يا مراكبي said...

allfollowsome

أم ترتر
أم لاللي
أم تيتي

كله محصل بعضه .. هههههه

المهم عندي هو أنص

معرفة الأوانص قصدي الرجالة كنوز .. هههه

السبت, أبريل 04, 2009

 
Blogger يا مراكبي said...

aidy

أنص هو اللي إختفى بس

أما أم التيتي شكلها كده حوت كبير

عموما لو هي واصلة قوي كده ممكن أفكر أنتخبها وخلاص .. يمكن تنفعنا

السبت, أبريل 04, 2009

 
Blogger يا مراكبي said...

الشاعر محمد عبدالرحمن

أشكر إطراءك وتقديرك وتوضيحك المفيد

خالص تحياتي

السبت, أبريل 04, 2009

 
Blogger يا مراكبي said...

صدى الصمت

لو تضمنيلي إن أم التيتي تحمل الراية في عيد الأم بس ترجعها تاني أنا موافق

لكن تستهبل فيها على طول يبقى لا وألف لا

الحرية لأنص

السبت, أبريل 04, 2009

 
Blogger يا مراكبي said...

Gharam

أخجلتم تواضعنا يافندم .. من بعض ما عندكم زي ما إنتي عارفة .. ههههه

منورة

السبت, أبريل 04, 2009

 
Blogger يا مراكبي said...

MǿиY El-Shreef

وأنا بقى على النقيض أول مرة أسمع عند امه يا ادهم دي .. هههه

ما فيش واحدة متضامنة مع أنص خالص كده؟

السبت, أبريل 04, 2009

 
Blogger يا مراكبي said...

بس خلاص

فعلا الموضوع شكله أكبر من أحلامي وطموحاتي بكتير .. دول رباطية جامدة جدا جدا

بس برضه .. لن أستسلم

أنص إلى الأبد

السبت, أبريل 04, 2009

 
Blogger يا مراكبي said...

أنسانة-شوية وشوية

إتنازلوا إنتم الأول عن كل الأمهات اللي طلعت فجأة دي (تيتي ولالي وترتر) .. ده إنتوا الأغلبية الغاشمة مش إحنا

إزاي ما سمعتيش عن أنص؟ ده هو الأصل

السبت, أبريل 04, 2009

 
Blogger يا مراكبي said...

Tamer Nabil

وكمان أم نني؟ دي جديدة قوي قوي

ولا يهمك الغير معرف .. أنا عرفتك من الإيميل

السبت, أبريل 04, 2009

 
Blogger يا مراكبي said...

شمس

أيوة يعني مين اللي هيدفع في الآخر؟

المشاريب على مين؟

هههه

السبت, أبريل 04, 2009

 
Blogger يا مراكبي said...

hana

كان بودي إنكم كزملاء تدوين تقفوا جنبي وجنب أنص شوية .. لكن ما حصلش

حتى الدور التاريخي اللي كن بيقوم بيه أنص بتنكروه

حقيقي أنا محبط

هههههه

السبت, أبريل 04, 2009

 
Blogger يا مراكبي said...

koukawy


صقفة جامدة جدا هنا .. أول واحدة تقول الحق بعد ألف تعليق

هات شاي هنا يابني لكوكو الجميل

السبت, أبريل 04, 2009

 
Blogger يا مراكبي said...

ملكة بحجابى

أنا مش قصدي أيها حاجة بين السطور خالص .. أنا ماشي جنب الحيط دايما

والجديد إني بأمشي جوه الحيط كمان

هههه

الأحد, أبريل 05, 2009

 
Blogger يا مراكبي said...

Rania

وإنتي بالصحة والسلامة

بس أنا أحب أوضح إن إتحاد الأمهات التابعين لأم التيتي دول صناعة مصرية خالصة ويمكن مش موجود ويهم في الوطن العربي كله

الأحد, أبريل 05, 2009

 
Blogger يا مراكبي said...

اعشق فى الليل ضوء القمر

ألف شكر على ذوقك وهديتك الجميلة دي

حقيقي مفاجأة جميلة جدا

أشكرك مرة تانية

الأحد, أبريل 05, 2009

 
Blogger يا مراكبي said...

ذو النون المصري

كده برضه؟ ما كانش العشم .. المفروض كنت تنضم لينا .. والا انا بس للي لوحدي مع انص والا ايه؟

ههههه

الأحد, أبريل 05, 2009

 
Blogger يا مراكبي said...

Tamer Diab

الله .. ده عند المراكبي .. جديدة دي وجميلة جدا .. منها تجديد ومنها إعادة الإعتبار للرجالة

تحية جامدة جدا جدا

الأحد, أبريل 05, 2009

 
Blogger فتافيت said...

يا ساتر يا رب حتى ام تيتي ماسلمتش من الذكورية بتاع المجتمع

مالها ام تيتي ده حتى تيتي بنتها ست البنات.. بيمت راجل من عينة انص ده

بس على فكرة معلومة لحضرتك.. انا ساعات بقول عند ام تيتي او ابو انص

بس الحاج انص كبر خلاص ومش حمل كل شوية واحد يروح له.. علشان نروح لابه

انما الست الفاضلة ام تيتي .. خدمة 24 ساعة

حلو البوست جدا بجد

وكانا ام تيتي ضد الحاج انص

وام تيتي يا بلاش حد غيرها ما ينفعناااااااااااش

اول مرة اجي.. ويا خوفي تقوللي اوعي تطبيها تاني :(

الأحد, أبريل 05, 2009

 
Blogger يا مراكبي said...

فتافيت

هو إنتي صحيح لبختي جامد في أبو أنص ده وإنتي عارفة إنه حبيبي وعلاقتي بيه جامدة .. لكن هنعديهالك المرة دي

المرة الجاية تيجي وإنتي متنصلة من تأييدك لأم التيتي دي .. ماشي؟

قال 24 ساعة قال .. ده أنص كان خدمة 27 ساعة في اليوم بس الزمن هو اللي مش قد كده .. ههههه

الأحد, أبريل 05, 2009

 
Blogger أُكتب بالرصاص said...

الله يرحمك يا ست ام لالو

بعد ما انتقلت إلى جوار ربها ، سلمت كل العهدة اللي معاها للاجيال الجديدة ، للست ام تيتي


بأقولك ايه يا حاج

تعرفش مسجد قريب من الحرم علشان نبقى نصلي فيه ، لاني جاي الاسبوع القادم بإذن الله عندكم نعمل عمرة
:)
مش عايز حاجة من المشرق العربي؟

الاثنين, أبريل 06, 2009

 
Blogger nana said...

انا ما فهمت شو أنص او ام التيتي لأنو انا مش من مصر الحبيبة
على كل حال انا مع ام التيتي لأني مع الستات طبعا

ههههههههه

:)

الاثنين, أبريل 06, 2009

 
Blogger أحمد فياض said...

كنت أسمع أن المشاكل دائما في يد أمينة..صحيح أنني لا رأيت أمينة ولا أي حل للمشاكل ..لكن لا يهم..أما أن تذهب لأنص ثم لأم التيتي من بعده فهي مشكلة يجب أن نتكاتف جميعا لحلها..واعادة الأمور الى يد أمينة أو سي السيد ايهما على قيد الحياة
تحياتي لك

الاثنين, أبريل 06, 2009

 
Blogger !!! عارفة ... مش عارف ليه said...

أنا كنت قريت الموضوع من كام يوم بس مسمحتش الظروف أني اعلق عليه وقتها

إنما طبعا مواضيعك دايماً بتفضل عالقة في الأذهان ..

-----------
أفتكر ان ثقافة المفردات الغريبة على اللغة دي بدأت في الظهور بعد الإنفتاح عند بداية تغيير تركيبة المجتمع وظهرت طبقة اشبه ما يكونوا بأثرياء الحرب والطبقة دي طبعا على اعتبار انهم اصحاب النفوذ والمال بدأت ثقفتهم تسيطر وتطغى على الذوق العام

ومن هنا كان بذوغ نجم أحمد عدوية كمطرب شعبي وكتكوت الأمير وما شبه ذلك
واختفاء جيل المطربين الشعبين الحقيقيين

وظهور مصطلح زي "السح الدح امبو" اللي كان حدث وقتها ... وهكذا توالت المصطلحات وهلم جرررررا إلى مزيد من الإنحطاط الثقافي

شكراً على موضوعك القييم والذي يتمتع بخفة ظل لتخفيف هول الصدمة


تحياتي
وليد

الاثنين, أبريل 06, 2009

 
Blogger يا مراكبي said...

أُكتب بالرصاص

إنت بتطلب طلبات صعبة جدا .. أنا بأروح الحرم كتير بأعمل عمرة وحج لكن ما إتعرضتش لموضوع الصلاة ده خالص .. بجد مش عارف الناس هناك بتصلي فين .. عموما هأسأل .. ولو غلبنا خالص ممكن نصلي في الحرم وخلاص

المهم إنك تبعتلي تفاصيل تحركاتك وأنا إن شاء الله هأظبط وقتي وأشوفك .. في إنتظارك

إنت جاي حج وألا عمرة صحيح؟

الاثنين, أبريل 06, 2009

 
Blogger يا مراكبي said...

nana

يعني هتؤيدي أي شيء نسائي حتى لو مش فاهماه؟ ما كانش العشم .. ههههه

أنص وأم التيتي عبارة عن ألفاظ تدل على إستحالة الحدوث .. ألفاظ للتعجيز يعني

أهلا بيكي

الاثنين, أبريل 06, 2009

 
Blogger يا مراكبي said...

أحمد فياض

طيب أهو كلامك ده دليل قوي جدا على إن الحلول النسائية فاشلة .. يعني طول العمر ده وأمينة فشلت في حل المشاكل .. نقوم نكمل على نفس النهج ونتعامل مع أم التيتي؟

الاثنين, أبريل 06, 2009

 
Blogger يا مراكبي said...

!!! عارفة ... مش عارف ليه

شكرا على هذا التعليق القيم وعلى المتابعة الجيدة

وبالفعل فقد كان الثراء المفاجئ لمجموعة من الجهال دون قواعد منطقية نقطة فاصله في تاريخ المجتمع المصري حيث فرضوا قوعدهم وثقافاتهم وأسلوبهم على الجميع بفعل السطوة المادية التي لديهم .. فحدث الإنهيار في الذوق العام في كافة مناحي الحياة

الاثنين, أبريل 06, 2009

 
Blogger Hana said...

طب يعني نقف وياأنص يا باشمهندس
دي عنصريةههههههههههه
طب وحقوقنا تضيع هههههههههه

الثلاثاء, أبريل 07, 2009

 
Blogger يا مراكبي said...

hana

ولا حقوقكوا هتضيع ولا حاجة .. أنص هو اللي هيحميكم ويجيب لكم حقوقكم .. هو اللي هيبقالكم

تنتخبوا مين .. أنص

وحبيبكم مين .. أنص

هههههه

الثلاثاء, أبريل 07, 2009

 
Blogger hana said...

هههههههههههه
يااربي
بقا أنص هو اللي هيجبلنا حقوقنا
ههههههههههه
معنى كدة أنه أنت بتنادي بالعنصريةوليه ماتكونش ام التيتي
شكلها هتقلب مظاهرة
ونقول تعيش أم التيتي تعيش
تعيش
تعيش
ههههههههههه

الخميس, أبريل 09, 2009

 
Blogger gana magde said...

ههههههههههههههههههه
هنروح عند ام ترتر
مستكتر علينا لقب نستلفه شويه او شويتين

الخميس, أبريل 09, 2009

 
Blogger يا مراكبي said...

hana

ممنوع المظاهرات هنا .. الأمن المركزي محاصر المدونات

خلاص ما فيش أمل .. أنص إتمكن من الحكم .. هههه

الخميس, أبريل 09, 2009

 
Blogger يا مراكبي said...

gana magde

خلاص .. ما عنديش مانع إنكم تستلفوا اللقب شوية .. لكن تمسكوا الحكم لا وألف لا .. أنص إلى الأبد .. أنص وأولاده من بعده كمان .. ههههه

الخميس, أبريل 09, 2009

 
Blogger Hana said...

يااربي لا بقا دة أنص دة شكله مش هيعديها
وايامه اللي جاية هتبقى باللون البلاااااااااك
ههههههههههههههههه

الاثنين, أبريل 13, 2009

 
Blogger يا مراكبي said...

hana

طيب عشان خاطري أنا عديها المرة دي وخلي أنص يمسك الحكم شوية .. أنا هأشحت عليه بعد كده

الاثنين, أبريل 13, 2009

 

إرسال تعليق

Links to this post:

إنشاء رابط

<< Home