في الذكرى السنوية العاشرة لجوازي .. بأقعد أفكر في حاجات كتير قوي .. ياترى لو رجع بيا الزمن عشر سنين لورا وما كنتش إتجوزت .. مش كان زماني دلوقت بأصحى الصبح متأخر شوية بدل الميعاد السخيف اللي بأضطر أنزل فيه مع الأولاد الصبح علشان باص المدرسة اللي بييجي الساعة ستة ده؟ مش كان زماني بأروح البيت بعد الشغل وأنتخ وأنام بدل ما أقعد أذاكر للأولاد ساعتين بسرعة علشان هيناموا بدري؟ مش كان زماني ما بأروحش السوق كل إسبوع مرتين علشان أشتري طلبات البيت اللي ما بتخلصش؟ أو أفضل كل صيف وكل شتا وكل عيد ألف المحلات كعب داير على شراء ملابس الأولاد وأحتار في المقاسات والألوان والأذواق .. والأسعار؟ . مش كان زماني أقدر أنزل عالقهوة وأقعد مع أصحابي في أي وقت وفي أي يوم زي ما أنا عايز من غير ما أقعد أمهد إسبوع للخروجة دي؟ مش كان زماني أقدر أفتح قناة ميلودي براحتي وأبوس الواوا وأتفرج على الباشمهندسة نانسي عجرم و الباشمهندسة روبي والباشمهندسة كارول سماحة من غير ما أكون خايف من أي قصف جوي بالحلل والأطباق؟ مش كان زماني بأخش البيت وما ألاقيش الأولاد بيقولولي إتأخرت ليه وكنت فين .. والحاجة أمهم ساكتة ولا كأنها مسلطاهم
تعليقات
إنت إيه اللي فكرك بالبوست ده؟ قلبت عليا المواجع
مش قادر أجاوب على سؤالك .. حقيقي ماعنديش إجابة
مركبنا تايهة لسه مش لاقية بر..
آه م الطوفان وآهين يا بر الأمان..
إزاي تبان والدنيا غرقانة شر..
وعجبي
صلاح جاهين
معلش... بكرة تروق وتحلى
إقلع غماك يا تور وبطل تلف
إكسر تروس الساقية وإشتم وتف
قال .. بش لفة كمان .. ولفة كمان
يا أوصل نهاية السكة .. يا البير تجف
وعجبي
أشكرك بشدة
الغربة بحر ملوش شط
ومادام أتغربت مرة. هتلاقى نفسك بتتغرب كل يوم
بتتغرب عن أهلك وأصحابك وحبايبك والاماكن اللى أتعودت عليها
حتلاقى نفسك متغرب حتى عن نفسك وعاداتك
انا ساعات مبعرفش نفسى
وبلاقى أنى شخص غريب معرفهوش
فارس وحيد جوه الدروع الحديد
رفرف عليه عصفور وقال له نشيد
منين .. منين.. و لفين لفين يا جدع
قال من بعيد و لسه رايح بعيد
عجبي !!
أنا فعلا ما بقيتش عارف أنا جاي منين ورايح لفين .. مش قادر أحدد أي حاجة غير إني طاير على طول
وبجد بجد زي ما قلت ما بقيتش عارف نفسي كويس .. كأني غريب عنها
إن شاء الله ينصلح الحال ليك وليا
منكوا لله
الإختيارات الإضطرارية صادمة يا مراكبي فعلا
ولكن زيما بتقول دايما
لكل اختيار ثمن
أيوة بصحيح .. إيه اللي جابك هنا دلوقتي؟ بتقلبي عليكي وعليا المواجع ليه بس؟
إزاي جات لك الفكرة إنك ترجعي لورا قوي كده؟
ده شرف ليا طبعا وتقدير كبير منك .. حقيقي اشكرك
و أشوف .. اذا كنت أنا لوحدي اللي قلبي متقطع عليها ولا لأ
لقيت لأ
بالعكس
أنا اللي كسبت من الجولة و انت اللي تستحق الشكر
تحياتي
شدانى جداا صورة المركب و الشراع و دايما بحب لما اكون بتابع بلوج اقراءة من الاول و دى مش اول مرة اقراء مواضيعك القديمة بس النهردة حسيت انى عايزة اقراء الموضوع دة بالذات و اكتبلك
بجد احسنت جدا
أولا أنا بأتشرف برجوعك لأول بوست .. ده تقدير جامد جدا
ثانيا .. للأسف البوست ده مش عمل أدبي ولا فني .. ده حقيقة .. ووراه حكاية طويلة لسه ما حكيتهاش
أشكرك جدا
واحلى لحظة وانا فى مطار القاهرة وانا راجعة ونفس اللى ودعونى بدموعهم بيستقبلونى بدموعهم برضه
بس المرة دى دموع الفرحة
الله لا يسامح اللى كان السبب فى غربتنا كلنا
انا وانت وغيرنا ملايين من خيرة شباب البلد دى
أنا بقى بعد ثاني سنة بطلت أخلي حد يودعني أو يستقبلني .. وأخلي دموعي جوايا وبس
ربنا يجازي اللي كان السبب وخصوصا إن بجد الواحد ماكانش عايز يمشي من البلد .. بس إضطرونا لكده .. ودي قصة تانية طويلة
لم اجد معني لما تكتب .. ولم اشعر باي احاسيس واضحة
مشكلة المدونات انها فتحت باب لأمثالك من المدعيين ان يخرجوا علي الناس بأفكار لا معني ولا قيمة لها
ركز في شئ اخر غير هذة السخافات وربنا يمكن يوفقك