يا خسارة .. الماتش إتلغى

أكتر حاجة تخرجك من الشعور بالغربة وتحسسك إنك فجأة كأنك في مصر هي إنك تحضر ماتش كورة لأي فريق مصري عالقهوة في وسط كذا ألف واحد زيك .. و ياسلام بقى لو الماتش دة في الإستاد .. يبقى بقى تحفة .. عامل كده زي ما تخش السينما وتنجذب للفيلم وفجأة الفيلم يخلص والنور يولع وتكتشف إنه كان زي الحلم
.
السنة اللي فاتت كان فيه ماتش ودي بين مصر والكويت .. إتصلت باتنين صحابي وقلنا نروح الإستاد .. دخلنا لقينا تلات أرباع المدرجات مصريين والتشجيع بقى إيه ..حكاية .. نفس التشجيع في الوطن بالظبط .. يعني كل الكلاسيكيات إياها شغالة زي الصحافة فييييين الت... أهو .. وحكم يا خ... حكم يا خ... إلخ من أساسيات التشجيع المصري الأصيل .. حتى لما جبنا جول تلاقيهم بيقولوا قاعدين ليييه ما تقوموا تروحوا .. مين اللي يروح ياخواننا؟ ده إحنا اللي ضيوف في البلد دي
.
أصل التشجيع بالطريقة دي طبع عندنا .. والطبع يغلب التطبع مهما حاولنا نخبيه .. وده بيفكرني بصاحبي جيمي لما رحنا نشجع منتخب مصر لكرة اليد في نهائي كأس العالم للشباب زمااان .. أول ما نزلنا من العربية وإحنا لسة بعيد عن الصالة المغطاة .. لقيتة بيزعق ويشجع .. هيلا هيلا .. هيلا هيلا هوووو .. ال.. ك.. إلخ .. رغم إنه مش ماتش كورة قدم أصلا
.
المهم أرجع لعنوان البوست .. للأسف كان المفروض يتلعب ماتش تاني اليومين دول زي بتاع السنة اللي فاتت بالظبط بس للأسف إتلغى .. كان نفسي أخش السينما تاني .. وأحلم إني عندكوا هناك في إستاد الكلية الحربية

تعليقات

‏قال واحد من الناس…
المصري هيفضل مصري النيل رواه والخير جواه
الجمعة, نوفمبر 24, 2006
‏قال Hannoda…
طب انت عارف هنا في قطر كان فيه ماتش ودي برضة من كام اسبوع كده وماتسألنيش عن الوقت لإن الأيام بالنسبة لي بقت زي البحر مش عارفة أوله من آخره
المهم.. لما مصر غلبت (كالعادة طبعاً) كانت البلد مقلوبة.. شوارع اتقفلت و كلكسات و هتافات
و الجو ده أساسا غريب على قطر

قلبي كان بيتخلع بجد

ياااه و لاّ لما أسمع صوت القهوة اللي جنب بيتنا لما يكون في ماتش و يقولوا
جووووول

بحس فجأه اني ماشية في شارع زنانيري عندنا في اسكندية

أنا نفسي بقى أعرف اعد كده زيك في قهوة مليانة مصريين و أصرخ لما ييجي جول و أتنطط
الخميس, فبراير 22, 2007
إرسال تعليق

المشاركات الشائعة من هذه المدونة

كفاءة كفاءة

سيداتي آنساتي سادتي (طبعا باين إن سيداتي إتقالت بنفس مفتوحة .. وآنساتي إتقالت بنفس مفتوحه قوي .. وسادتي تأدية واجب وخلاص) نحب نشرح لكم النهاردة نموذج من النماذج الحسابية اللي درسناها في كلية الهندسة الله يرحمها ويرحم أيامها .. والنموذج ده بيبين طريقة حساب الكفاءة العامة .. يعني إيه؟ شوفوا معايا . بيقولوا إن لو عندك إتنين موظفين شغالين في مكتب في مصلحة حكومية وكل واحد منهم بيشتغل بكفاءة 90% (الشر برة وبعيد) يبقى الكفاءة العامة للمكتب كله تتحسب إزاي؟ الكفاءة العامة هي حاصل ضرب كفاءة الإتنين الموظفين يعني 90% × 90% = 81% .. مفاجأة مش كدة؟ . طيب لو عندنا 3 موظفين في المكتب إياه .. وكل واحد كفاءته هي 90% برضه .. يبقى الكفاءة العامة للمكتب ده كام؟ هي حاصل ضرب كفاءة التلاتة موظفين يعني 90% × 90% × 90% = 73% .. شوفتوا الرقم صغر إزاي؟ . طيب لو عندنا 4 موظفين في المكتب اللي زهقنا منه ده .. وكل واحد كفاءته هي 90% برضه .. يبقى الكفاءة العامة للمكتب ده كام؟ هي حاصل ضرب كفاءة الأربعة موظفين يعني 90% مضروبة في بعضها 4 مرات = 66%.. أصغر وأصغر . طيب لو عندنا 5 موظفين .. وكل واحد كفاءته هي 90% برضه ..
قراءة المزيد

من روائع قلة الأدب العربي

أفتكر إن أول ما طلع الدش والريسيفر .. كان ليه سمعة كده مش كويسة .. كانوا بيقولوا إنه بيجيب حاجات قبيحة وقليلة الأدب ولامؤاخذة .. وكنت كل ما أسمع إن فيه حد ركب دش ألاقيه يحلف ويقول لي: بس أنا مش من الناس إياهم يا مراكبي .. أنا والله العظيم ركبت النايل سات بس .. ومن كتر ما الجملة دي إتكررت قدامي كتير .. جه عندي شعور إن النايل سات ده حاجة كده وكأنك داخل مسجد .. ولازم تقلع الجزمة برة على الباب قبل ما تشغل التليفزيون وحاجات كده . لحد ما جه اليوم اللي قررت فيه إني أركب الدش ده أنا كمان .. وطبعا لأني من أهل التقوى والصلاح أصريت على النايل سات بس زيي زي الإخوة الأفاضل إياهم بالظبط .. وأول ما إشتغل التليفزيون لقيت النايل سات ده إيه .. ولعة ولعة ولعة .. وأذكر إن لم تخني الذاكرة إن أول لقطة شفتها كانت لجزء عريان من صدر مغنية مش عايز أقول إسمها وكانت بترقص وتقول: أخاصمك آه .. أسيبك لا .. ما علينا .. أرزاق . ومرة من سنتين كان عندي مدير أمريكي .. لقيته بيشتكيلي ويقوللي: المدير الأمريكي: أنا زهقت قوي من الدش المركزي اللي عندنا في العمارة .. مليان قنوات كتيرة مالهاش لازمة المراكبي: أيوة .. علشان ظابطي
قراءة المزيد

أنص وأم التيتي

من بين ثقافات العالم أجمع .. نتميز نحن المصريين (أو المصريون مش عارف أيهما الأصح) أنه إذا ذكر أحدهم شيئا ما قد لا يصدقه عقل أو قد يكون مستبعد الحدوث كتخفيض الضرائب عن كاهل المواطنين مثلا .. فإنك لابد وأن ترد عليه قائلا: ده عند أنص .. وفي رواية أخرى عند هنص . لم أنجح حتى الآن في معرفة من هو ''أنص'' هذا أبدا .. ذلك الكائن الغريب العجيب الذي إتفق المصريون على أنه الوحيد الذي تتجمع عنده غرائب الأمور والمستحيل من الحدوث .. كما أنني لم أتمكن من تحديد عمره ومكانه .. لكن من الواضح والأكيد أنه كان ذكرا . يتغير الزمان وتتبدل الأجيال وأتفاجأ الآن بأن أنص أو هنص هذا قد تضاءل دوره إلى حد مخجل .. وتربعت مكانه على ذلك العرش شخصية أنثوية أخرى هي أم التيتي .. فإذا قلت لأحدهم مثلا أنه من المؤكد أن تغيير وزير ما بات وشيكا نظرا لأدائه المتدني بوضوح .. يجيبني المستمع قائلا: آه .. ده عند أم التيتي . وفي الحقيقة أنا لا يشغلني أبدا أن تكون أحلامي عن نهضة مصر من جديد هي أحلام مشروعة أم أنها ضربا من ضروب الخيال .. لكن ما يحزنني أن تغادر تلك الأحلام من عند أنص لتسيطر عليها أم التيتي .. فالرجولة و
قراءة المزيد