أبو لمعه والخواجة بيجو

من حوالي ييجي عشر سنين كده قريت في كتاب لأحمد رجب عن فكرة ظريفة جدا وهي إن الواحد يبدأ يجمع تصريحات الحكومة من الجرايد على مدي فترة طويلة وساعتها هانكتشف حاجات مثيرة جدا
.
أنا قلت نشوف إيه الحكاية دي .. قلت أتتبع موضوع معين واخترت موضوع تصريحات الحكومة عن خلق فرص عمل جديدة .. لقيت في يوم تصريح عن مناقشة فكرة مشروع "الهوبا لالا" وهايوفر بتاع سبعمية ألف فرصة عمل جديدة .. بعدها بعشر أيام لقيت تصريح تاني عن إن بنك شلح هايقوم بتمويل منطقة حره هاتوفر ييجي خمسمية ألف فرصة عمل .. و بعدها باسبوع خبر تالت عن مخطط لمدينة صناعية تقع غرب صحراء الواوا و تستوعب كمان تمنمية ألف فرصة عمل جديدة وهكذا
.
قعدت أجمع الأرقام دي كلها على مدار سنة كاملة لقيت المجموع رقم مخيف .. اكتشفت إنهم بقدرة قادر وفروا فرص عمل تكفي عدد سكان مصر كلها بالإضافة لسكان قارتي أفريقيا و شبرا الخيمة مجتمعين! وطبعا لا يخفى عليكم إن المجموع الحقيقي كان قريب من الصفر
.
وده طبعا كان سببه إن ماحدش كان بيفتكر إيه اللي إتقال في التصريحات السابقة قبل ما يطلع تصريح جديد بأرقام جديدة .. و قديما قالوا "إذا كنت كذوبا فكن ذكورا" يعني لو إنت متعود على الفشر فلازم تكون ذاكرتك قوية علشان ما تلخبطش الدنيا لما تفشر فشرة جديدة

.
ياللا كل واحد فيكوا يبدأ يتابع موضوع زي كده وقولولي آخر السنة مجموع التصريحات طلع كام و الحقيقة الفعلية كام وسلمولي على أبو لمعة والخواجه بيجو بالمره