شد القلوع يا مراكبي ... مافيش رجوع يا مراكبي

السبت، فبراير 03، 2007

من يوميات متزوج

كل يوم لازم أول ما أروح من الشغل أقعد أذاكر للأولاد بتاع ساعتين كده .. وعلشان ما حدش منهم ورث مني الذكاء الدراسي بتاعي فطبعا بيجيبولي ضغط وبوادر شلل رعاش وأرتكاريا في العصاعيص .. المهم .. خلصنا المذاكرة ودخلوا يتخمدوا .. قصدي ينامو .. قلت أفتح التليفزيون أتفرج على أي حاجة تهدي أعصابي
.
فتحت التليفزيون وهوبااا .. الباشمهندسة هيفاء وهبي بتغني يا جدعان .. فجأة راح التعب وبدأت أركز في التليفزيون علشان أشوف الواوا كويس .. أو تقدروا تقولوا إني دخلت جوه التليفزيون .. وفجأة ألاقي مراتي جنبي وبصوت حازم بتقول: هاااه .. وبعدين يا حاج .. عيب عليك يا حاج .. عيب
.
طبعا في أقل من فيمتو ثانية طفيت الواوا قصدي طفيت التليفزيون وأنا كلي خجل .. حلوة خجل دي .. وطبعا أنا مش عارف هي فعلا قصدها إن الفرجة على الفيديو كليب دي تبقى حاجة وحشة ولا هي بتغير من الباشمهندسة هيفاء .. المهم إتحسب عليا موقف وخلاص
.
تاني يوم رجعت البيت لقيتها بتقرأ الجرنال وفجأة قالت لي: تعالى يا حاج .. تعالى شوف .. قلت: خير فيه إيه؟ قالت لي: شايف .. شايف كارول سماحة اللي عينك هاتطلع عليها .. طلع عندها أربعين سنة .. يعني أكبر منك بست سنين بحالهم .. شفت بقى يا حاج؟ قلت في سري طبعا: وبعدين بقى .. إتنين صفر لحد دلوقت .. مسيري أكسب في يوم إن شاء الله
.
شوية كدة ولقيت مراتي بتجري ورا إبننا الكبير بالشبشب علشان تضربه .. ماعرفش كان عامل إيه .. المهم وقف فجأة وقال لها: إيه ده؟ ده منظر واحدة حجت ده؟ فيه حاجة بتعمل كده؟ طبعا أنا سمعت كده وحسيت إن الواد أخد لي حقي أخيرا .. لقيت نفسي بأصقف وكأن أبوتريكة جاب الجول التالت في الزمالك .. هييه .. هييه .. ودي كانت آخر كلمة قولتها قبل الشبشب ما يقلش ومايجيش في الواد وييجي فيا أنا .. ماأعرفش بقى كان مقصود ولا إيه .. ولا كانت شباشب صديقة .. قصدي نيران صديقة .. إن بعض الظن إثم .. والطيب أحسن
.
والجدير بالذكر .. حلوة الجديردي .. إن ترتيبي في الأهمية جوه البيت بيكون رقم 5 .. وده ترتيب متقدم جدا .. فالحاجة مراتي ترتيبها رقم 4 .. والأولاد قبلينا طبعا .. ده أنا حتى ليا واحد صاحبي متجوز وعنده بنت واحدة وبرضة ترتيبه الخامس في البيت علشان تعرفوا إني جامد جدا

.

أنا بس حبيت أحكيلكوا عن مزايا الحياة الزوجية علشان أشجعكوا على الجواز .. ولسة هأحكيلكوا عن مزايا كتير في الأيام الجاية .. ده أنا معبي قوي يا إخواننا

التسميات:

63 Comments:

Blogger frozen love said...

انا مت من الصحك في حوار هيفاء..وموضوع الشباشب الصديقة ده...جامد جدا اسلوبك والموقف اجمد...هكذا هي الحياة الزوجية...كاس ودوار على كل الناس بقى يا حج
lol

السبت, فبراير 03, 2007

 
Blogger mano said...

انا كمان مت من الضحك
متزعلش لسه فى نانسى و ماريا و اليسا
و مالها شيرين

السبت, فبراير 03, 2007

 
Blogger tamer said...

دة بقى تشويق للجواز ولاتطفيش

هههههههههه

لازم ترسينا بقى اصل كنت نواى على الموضوع ويعدين رجعت فية تانى زى كل مرة ههههههه.

بوست جميل

تحياتى

السبت, فبراير 03, 2007

 
Blogger No Fear said...

السلام عليكم
و الله كلامك ده بيجببني في الجواز جدا ربنا يخليكوا لبعض دايما
و حرص المرة الجاية أيدك علي زر باك و تكون قناة الجزيرة جاهزة
أبعد عن الأوروبي و في حد في البيت

السبت, فبراير 03, 2007

 
Blogger هانى said...

موضوع لذيذ يومية من يوميات زوج

جميلة جداا الحكاية

السبت, فبراير 03, 2007

 
Blogger hebaz said...

هىهى
بجد حموت من الضحك
أخر حاجة تخطرلى على بال موضوع الشباشب الصديقة دة لأ و لمين للمراكبى :)
ماشاء الله 3 أولاد ربنا يعينك و يعين الحاجة يا حاج :)
و بعدين المهندسة هيفاء وهبى لألأ زعلت منك هوة لقب الهندسة ببلاش كدة لازم تعملنا حلقات من يوميات زوج حاج :)

السبت, فبراير 03, 2007

 
Blogger يا مراكبي said...

frozen love

طبعا إنت بتضحك ولسه إيديك في المياه .. بكرة نقعد جنب الحيطة ونسمع الزيطة

حمدالله عالسلامة

السبت, فبراير 03, 2007

 
Blogger يا مراكبي said...

mano

وأنا لسة هأتضرب علشان كل دول؟ هما يستاهلوا بصراحة

وبعدين قصدك أنهي شيرين فيهم؟

السبت, فبراير 03, 2007

 
Blogger يا مراكبي said...

tamer

توكل على الله وماتخافش .. خش بقلب جامد

هو أنا هأتبهدل لوحدي وإلا إيه؟

السبت, فبراير 03, 2007

 
Blogger يا مراكبي said...

no fear

هو ده قصدي .. إني أحببكوا في الجواز زي ما أنا بحبه كده

وبعدين قمر أوروبي إيه اللي أنا هاشوفه .. كفاية النايل سات ما هو ولعه أهو

السبت, فبراير 03, 2007

 
Blogger يا مراكبي said...

هاني

فرحان قوي؟ ماشي .. بكره نشوف

منورني

السبت, فبراير 03, 2007

 
Blogger يا مراكبي said...

hebaz

ده هي دي الهندسة بعينها .. فكري شوية بس

عندي يوميات زي كده كتييييير .. ماتقلقيش

السبت, فبراير 03, 2007

 
Blogger hebaz said...

سؤال محيرنى
ماذا ستفعل لو الحاجة عرفت و قرت بلوج الحاج؟:)

السبت, فبراير 03, 2007

 
Blogger يا مراكبي said...

hebaz

الحاجة قاعدة جنبي دلوقت وبتقرأ كل حاجة

أشوف وشكوا بخير

السبت, فبراير 03, 2007

 
Blogger Amr Ahmed said...

ههههههههههههههههههه

عسل والله يا استاذ احمد

هي ايه حكاية هيفاء معانا

خاي بالك من المدام

بس بصراحة نفسي افتن عليك

واخليها تقرا البوست

معلش بقي

علشان نعرف باقي الحكاية

علي فكرة اخنا عاوزين كتير
من يومياتك

ياريت

الأحد, فبراير 04, 2007

 
Blogger يا مراكبي said...

متشكر كتير .. أنا ما باخافش من مراتي .. ده أنا جامد جدا .. بس إوعى حد يقولها حاجة

لو قعدت أكتب اليوميات دي هيبقى عندنا مجلد كبير قريب

نورتني

الأحد, فبراير 04, 2007

 
Blogger الأباصيرى said...

لألألألأ

خلى بالك أحنا
رجالة أوى
وجدعان أوى
ومبنخاقش من حاجة خالص
وكلمتنا لاممكن تنزل الأرض أبداً

م الأخر كدة أحنا اللى دهنا الهوا دوكوا بعد ما أديناة وش معجون


بص يفضل تقفل اليوميات دى على كدة منعا للفضايح
مش فضايحنا طبعا.. عشان أية!! أييييوة
عشان أحنا رجالة حمشين

هاااااااااايل يا حاج وربنا يديم الشجاعة

الأحد, فبراير 04, 2007

 
Blogger الأباصيرى said...

hebaz
الحاجة قاعدة جنبي دلوقت وبتقرأ كل حاجة
أشوف وشكوا بخير

----------

ههههه
والله هتوحشنا
العزاء فى قاعة المعارض مش كدة

الأحد, فبراير 04, 2007

 
Blogger MAKSOFA said...

علي فكره وهيفاء وهبي عندها 48 سنه
ابقي قول لمراتك
شوفي الأتنين فوق الآربعين وقربوا من الخمسين
بس عاملين ازاي في نفسهم
حاجه تطول العمر يا حاجه

الأحد, فبراير 04, 2007

 
Blogger يا مراكبي said...

الأباصيري

وأنا بأضم صوتي لصوتك .. إحنا جدعان قوي ودهنا الهوا وحاجات تانية كتير

بس خلينا إحنا الكبار .. والعفو عند المقدرة أحسن حاجة

حلوة المقدرة دي؟

الأحد, فبراير 04, 2007

 
Blogger يا مراكبي said...

الأباصيري تاني وهبة

الحمد لله جت سليمة .. شوية إصابات سطحيه مش محتاجة غرز

الأحد, فبراير 04, 2007

 
Blogger يا مراكبي said...

مكسوفة

نفسي أقول لها كده بس مش قادر .. الله يكرمك إبقي قوليلهل إنتي ينوبك فيا ثواب

بجد هيفاء 48 سنة؟
أرزاق

الأحد, فبراير 04, 2007

 
Blogger الوردة السوداء said...

ههههههههههههه
انا كنت عايزة بس رقم تليفون المدام
عشان اخد منها دروس فى الحياه الزوجية

الأحد, فبراير 04, 2007

 
Blogger كراكيب نـهـى مـحمود said...

حلوة يا حج
اعتقد ان النيران مكنتش صديقه خالص بهدي النفوس
كل التحيةبوست جميل

الأحد, فبراير 04, 2007

 
Blogger يا مراكبي said...

الوردة السوداء

طب وردة سوداء وقلنا ماشي .. كمان قلب أسود؟ ليه بس كده؟

هي المدام بقى ليها شعبية كبيرة قوي كدة؟

الأحد, فبراير 04, 2007

 
Blogger يا مراكبي said...

كراكيب نهى

أنا طبعا مقدر إنك بتهدي النفوس .. مجهود تشكري عليه

إنتوا كلكوا عليا وإلا إيه؟

الأحد, فبراير 04, 2007

 
Blogger Amira said...

ههههههههههههه

طمنتنى على المستقبل من دلوقتى بقى هجهز الاسلحة وخلافة استعداد لمعركة الجواز

تحياتى

الأحد, فبراير 04, 2007

 
Blogger Memo said...

ابوس ايدك الرجاله متعقده من الجواز خلقه
مش هتبقا انت والزمن
بس و قعتني من الضحك
الله يكرمك و يسعدك
تحياتشي للحاج و الحاجه

الأحد, فبراير 04, 2007

 
Blogger يا مراكبي said...

amira

مش هاتحتاجي أسلحة ولا حاجة إلا لو متعودة تقعدي في البيت من غير شبشب

هههههه

نورتينا

الاثنين, فبراير 05, 2007

 
Blogger يا مراكبي said...

memo

غريبة .. فيه ناس متعقدين من الجواز؟ ليه؟ ماهو حلو وجميل أهو زي ما إنتوا شايفين

ربنا يسعدك زيي كده إن شاء الله

الاثنين, فبراير 05, 2007

 
Blogger mansourawy said...

موضوع الشبشب ده بتكرر ولا صدفة وحيدة
قول اعترف دحنا ناويين نرتبط يدوبك كمان سنتين او حاجه
قولى عشان اطول المدة عشان اعمل حسابى واقوم باتحصينات اللازمة للتغلب ع النيران الصديقة

بس بصراحة حلوة والترتيب كخامش نعمة كبيرة خمسة وخميسة عشان الحسد

الاثنين, فبراير 05, 2007

 
Blogger يا مراكبي said...

mansourawy

إنت أحلى حاجة تعملها هي إنك تقفل شبشب المدام بقفل زي ما فوزي إتعمل فيه في البوست اللي إنت كتبته قبل كده

وإلا إيه يا دكتور؟

الاثنين, فبراير 05, 2007

 
Blogger دينا فهمي said...

أسلوبك حلو أوي بجد (:
بس بردو مش هتكرهنا في الجواز
مازلنا متمسكين بالفكرة

الاثنين, فبراير 05, 2007

 
Blogger يا مراكبي said...

دينا فهمي

إنت متمسكة بالفكرة علشان بتتكلمي وإنتي في صف مراتي مش في صفي .. ماشي

عموما ربنا يسعدك وتتجوزي بس إبقي إعزميني .. بقالي أكتر من 4 سنين ماحضرتش فرح

الاثنين, فبراير 05, 2007

 
Blogger الوردة السوداء said...

الله يسامحك

بقى انا قلبى اسود
اهىء اهىء

الاثنين, فبراير 05, 2007

 
Blogger يا مراكبي said...

الوردة السوداء

لأ .. كله إلا الدموع .. ما تزعليش

عندي بنتين دايما بيضحكوا عليا بالطريقة دي برضه وخصوصا الصغيرة خالص .. انا بس أشوف الدموع أقوم أعمل اللي هما عايزينه على طول بمنتهى السذاجة

تحياتي ليكي وبالتوفيق

الاثنين, فبراير 05, 2007

 
Blogger mansourawy said...

بالنسبة للشبشب وقفله بالقفل
ده فكر جديد وانا مش من المتبعين للفكر الجديد
بص هو الحل
منع دخول الشباشب البيت من اصله
شكلك هتخوفنى من الجواز

الثلاثاء, فبراير 06, 2007

 
Blogger يا مراكبي said...

mansourawy

منع الشباشب ده فكر أجدد من الفكر الجديد كمان .. نمشيها حافيين في البيت وخلاص


وبعدين ماحدش يخاف من الجواز ولا حاجة .. ماهو زي الفل أهو

الثلاثاء, فبراير 06, 2007

 
Blogger farida said...

ضحكتني مووت

جوزي بقى بيموت في هيفاء
هي مثله الاعلى في الجمال النسائي

انا اقعد اقول له دي كلها سيليكون
هو فيه احلى من الجمال الطبيعي؟
طيب من الصبح حركب عدسات ملونه

بس كلام في سرك عمليات مش عمليات 48 سنه و لا حتى 50 هي حلوه
كلهم حلوين
و متظبطين
نعمل ايه؟
زمن

استمر في كتابة يومياتك دي
خلينا نتعلم من الحاجه

الثلاثاء, فبراير 06, 2007

 
Blogger يا مراكبي said...

farida

أنا سعيد جدا بزيارتك ولو إن كلكوا واقفين في صف الحاجة .. شعبيتها زادت جدا

بس باين من كلامك إن عندنا حق برضه .. مش كده؟

الثلاثاء, فبراير 06, 2007

 
Blogger rony said...

طب يعنى راى حضرتك اخدها من قصيرها وبلاش اتجوز ولا بلاش اجيب تليفزيون ولا بلاش اجيب دش
انا بقول اموت هيفاء من الاخر وخلاص
وبعدين حضرتك يعنى رايك الشبشب احسن ولا نجيب شويه اكياس سوده وسكينه مسنونه
بس انا ليا وجهه نظر فى الموضوع ده
هايتفرج على هيفاء واخواتها هاطلع عين اللى جابوه
هايتفرج على ماتشات الكوره هايتحرم من الغدا اسبوع
هاتسوله نفسه يخرج من غيرى معنديش غير الكنبه ينام عليها
هو مش متجوز كرسى فى البيت عدم اللامؤاخده يعنى ..هو متجوز واحده بيحبها وبتحبه ولازم يحافظ عليها
بس بصراحه مش هتوصل عندى للشبشب علشان انا عندى لسان اقوى من الشبشب بمراحل
سلملنا بقى على ام العيال

الثلاثاء, فبراير 06, 2007

 
Blogger شــهــروزة said...

انا لسة بعقلى يا أحمد
ومش حأتعقد من الجواز
دة حتى الرجالة نعمة واللى يكرهها يعمى

بس مفيهاش حاجة يعنى لما تفرفش نفسك وتاخدلك ساعة افراج من التأبيدة بمشاهدة الصاروخ الأرض أرض هيفاا ذات الثامنة والربعين ربيعااا

انا مؤيداك فى وقت الفسحة اللى انت اخدته

كارول سماحة على فكرة 41سنة بس

تحياتشى للمودام
وقولها تبقا تظبط الشبشب على زاوية 90درجة عمودى
كى يصيب الهدف مباشرة

نيااهاااهااااااا

الثلاثاء, فبراير 06, 2007

 
Blogger يا مراكبي said...

rony

يا إخواننا .. حد يحوش عننا البنوتة المفترية دي

يابنتي بالراحة شوية .. هاتطفشي منك العرسان كده .. داري شوية الحاجات دي لحد ما يتم المراد وبعدين إعملي فيه اللي إنت عايزاه

كان الله في عونه

الثلاثاء, فبراير 06, 2007

 
Blogger يا مراكبي said...

شهروزة

ده أنا قلت أخيرا فيه حد فاهمني وبيأيدني ووقف جنبي أخيرا .. لكن آخر التعليق إتقلبتي عليا برضه .. ماشي .. ليكي يوم

أنا حاسس إن مراتي بقت أشهر مني مع إني أنا اللي عامل المدونة مش هيا

ماشي

الأربعاء, فبراير 07, 2007

 
Blogger sherehan84 said...

البوست ده سكر
حلو جدا جدا جدا جدا لغاية آخر الصفحه
تحياتي ليك وياريت تكتر من البوستات دي

الأربعاء, فبراير 07, 2007

 
Blogger shaimaa said...

انا كنت سايبة كومينت هنا
ايه ده البلوج بتاعك بياكل الكومينتات
نقول من تانى


سلم لى على المدام كتيييييييييير
وقولها انى حبيتها لله فى الله من غير ما اشوفها
يا حاااااااااااااج
:D

الأربعاء, فبراير 07, 2007

 
Blogger يا مراكبي said...

Sherehan

متشكر كتير يا دكتورة .. طبعا هاحكيلكم عن حاجات زي كده كتيييير .. بس الأول هأكتب كام بوست نكد

تحياتي وبالتوفيق

الخميس, فبراير 08, 2007

 
Blogger يا مراكبي said...

Shaimaa

وإنتي كمان حبيتي المدام؟ أنا كنت فاكر إنكوا هاتبقوا جنبي علشان إحنا زملاء في التدوين .. بس طبعا الدم يحن

سلامي وتحياتي

الخميس, فبراير 08, 2007

 
Blogger أحمد الشمسي said...

الخامس ترتيب متقدم جدا؟
هو البيت كله كام نفر بالضبط؟
على فكرة كله كوم وموضوع المذاكرة اللي يرفع الضغط ده كون تاني!
أنا ليا تجارب في الموضوع ده مع اخواتي، وبدعي للمدرسين كل يوم ربنا يصبرهم على البلاوي اللي بنبعتهالهم من بيوتنا.

الخميس, فبراير 08, 2007

 
Blogger No Fear said...

السلام عليكم
خير
سبب الإختفاء أية؟

الخميس, فبراير 08, 2007

 
Anonymous Ra2ed Fada2 said...

This was really g8, i read all ur posts since we got back from Hajj ya hajj!!!I liked the smooth way u present marriage to whome r going to make this om el step. Take care and show us more ya haj

الخميس, فبراير 08, 2007

 
Blogger يا مراكبي said...

أحمد الشمسي

إحنا كلنا خمسة .. والحمد لله إن أنا مش السادس أو السابع .. يعني أنا لسه مهم جدا

شفت بقى إن المذاكرة للولاد تحرق الدم .. يعني مش كان عندي حق إني أرفه عن نفسي شوية؟

منور يا دكتور

الجمعة, فبراير 09, 2007

 
Blogger يا مراكبي said...

no fear

ماتخافش عليا .. انا جامد ومتين .. شوية كدة وهأنزل بالبوست الجديد .. شوية نكد بقى

متشكر على السؤال .. ولو غبت شوية إبقوا إسألوا عني في المستشفيات

الجمعة, فبراير 09, 2007

 
Blogger يا مراكبي said...

Ra2ed Fada2

أهلا أهلا برائد الفضاء .. ده شرف كبير ليا إن واحد من بره قوي كدة يقرأ لي

متشكر كتير على مجهودك وتعبك إنك قريت كل المواضيع اللي فاتت

نورتني وشرفتني ومتخافش من الجواز .. مش بيوجع قوي

الجمعة, فبراير 09, 2007

 
Blogger دينا فهمي said...

ادعي انت بس وليك عليا أعزم مصر كلها (:

السبت, فبراير 10, 2007

 
Blogger zordeak said...

هههههههههههه


دمك زى العسل


اسلوبك كوميدى جدا


هههههههههههههه


كرهتنى فى الجواز حرام عليك


ههههههههههههه

الأحد, فبراير 11, 2007

 
Blogger أُكتب بالرصاص said...

انت قد الكلام ده يا عم الحاج ؟؟

يا خوفي تكون الحاجة بتدخل على البلوج
ولو حتى مش عارفة انك صاحبه...وتقرأ الكلام ده ، وتعرف المواقف دي ..بتاعة الشباشب الصديقة

وتبقا بعد كده !!!
هدف دائم

الأحد, فبراير 11, 2007

 
Blogger يا مراكبي said...

دينا فهمي

دعيت ليكي خلاص .. هاه .. حصل؟

الأحد, فبراير 11, 2007

 
Blogger يا مراكبي said...

zordeak

الله يكرمك .. شكرا لذوقك

أنا مش قصدي من البوست ده إن حد يكره الجواز .. بالعكس ده جميل جدا .. المهم إنك ما تتجوزش وخلاص .. لكن تكرهه لأ

الأحد, فبراير 11, 2007

 
Blogger يا مراكبي said...

أكتب بالرصاص

أنا أصلا هدف دائم من قبل البلوج

هههههههههههه

إطمئن .. الحاجة بتابعني زيكوا بالظبط وأنا مايهمنيش .. أنا جامد جدا .. وبأستحمل كويس

الأحد, فبراير 11, 2007

 
Blogger Hannoda said...

على فكرة انت موتني من الضحك
بس واضح جدا انكم أسرة جميلة جدا و رغم انك فاكر نفسك بتطفشنا من الجواز بس معلش اندماجك مع اسرتك و تقبلك ليها واضح قوي وواضح استمتاعك باسلوب حياتكم
معلش هاردلك... جت معاك بالعكس المرة دي... و ((التشجيع)) اللي بتقول عليه جه معاي تشجيع بجد
بس أنا عاوزة أفهم
انت ترتيبك الخامس و مراتك الرابع عشان الأولاد أول حاجة .. صح؟؟
بس الترتيب ده بالنسبة لمين بقى؟؟

الاثنين, فبراير 12, 2007

 
Blogger يا مراكبي said...

Hannoda

أهلا بيكي ومبروك على البلوج الجميل

الترتيب ده بالنسبة للي بيمشي كلامه في البيت .. يعني أصغر واحدة عندنا بتمشي كلامها عالكل وإلا تفضحنا وتجرسنا وممكن إنتي تسمعيها في الدوحة

أنا سامع تشجيعك من هنا .. نورتي

الاثنين, فبراير 12, 2007

 
Anonymous hennoda said...

أهو كده أنا فهمت
طيب ما ده الطبيعي جداًً انهم يكون كلامهم هو اللي ماشي
انت مستهون بالجيل ولاّ ايه؟؟
:))

الاثنين, فبراير 12, 2007

 

إرسال تعليق

Links to this post:

إنشاء رابط

<< Home