شد القلوع يا مراكبي ... مافيش رجوع يا مراكبي

الجمعة، فبراير 09، 2007

قلب الوطن مجروح

قلب الوطن مجروح
لا يحتمل أكتر
نهرب و فين هانروح
لما الهموم تكتر؟

نحمي غصون الورد
من دمع سال عالخد
آه يا حبيبة الروح
قلب الوطن مجروح

.
.
لو حتى قلبي تاه
بين الشجن والآه
ياللي لقاكي حياة

أنا حبي ليكي صلاة
يا مطيره العصافير
رجع الهوا بالخير

لو قلبي عاد ضميه
إديه حنان وداديه
ده الصمت مش لينا

فين الولد مايروح
لازم يعود أسمر
قلب الوطن مجروح
لا يحتمل أكتر

.

.
لو ينطق الموال
لازم يروق الحال
محتاج ليا دراع
وشراع وراحة بال
محتاج ليكي نجوم
نايمه في حضن بلادي

لو بحرنا نسقيه
صحيه وبوسي عينيه
ياما بكره يسقينا
خلي طريق الجوع
يصبح طريق مرمر
قلب الوطن مجروح
لا يحتمل أكتر

التسميات:

59 Comments:

Blogger karakib said...

كمان الكلمات دي بصوت و احساس محمد منير الملك

الجمعة, فبراير 09, 2007

 
Blogger مـحـمـد مـفـيـد said...

الصور اكثر من رائعه ومعبره عن الكلام

اختيار موفق

الجمعة, فبراير 09, 2007

 
Blogger يا مراكبي said...

Karakib

أيوة .. كمان تحس من كلمات الأغنية إنها لسة مكتوبة إمبارح بس

الجمعة, فبراير 09, 2007

 
Blogger يا مراكبي said...

محمد مفيد

متشكر كتير لتشجيعك ودايما منورني

الجمعة, فبراير 09, 2007

 
Blogger bluestone said...

الصور اعطت للكلمات بعدا جديدا اكثر وجعا

الجمعة, فبراير 09, 2007

 
Blogger mano said...

الكلمات حلوه جدا
و الصور مختاره بعنايه
اضافت على الكلمات جمال
حقيقى الكلام زى ما يكون مكتوب امبارح
تحياتى

الجمعة, فبراير 09, 2007

 
Anonymous واحد من الناس said...

مفيش رد اكتر من اللي انت قولته
قلب الوطن مجروح

1minelnas.blogspot.com

الجمعة, فبراير 09, 2007

 
Blogger يا مراكبي said...

bluestone

أنا ترددت كتير قبل ما أحط الصور دي .. علشان بجد الوطن مش ناقص وجع زيادة

دايما منورة

الجمعة, فبراير 09, 2007

 
Blogger يا مراكبي said...

mano

متشكر كتير على التعليق الجميل ده .. فعلا الكلام جه على الجرح وحسينا وكأنه مكتوب مخصوص دلوقت

أهلا بيكي دايما

الجمعة, فبراير 09, 2007

 
Blogger يا مراكبي said...

واحد من الناس

صح ..مجروح وكمان لا يحتمل أكتر

إنت فين بقى لك مدة؟ مافيش بوست جديد ولا إيه؟ بقى لك أكتر من شهر مافيش حاجة جديدة

الجمعة, فبراير 09, 2007

 
Anonymous Ra2ed Fada2 said...

Magroo7 awy, this is what u say about Egypt,although it is gameela gedan gedan; MIN FOO2, as i see it, but am sure what u say is true as u r MAD3OKEEN FEEHA, u should find a way, i did 2 years ago (HEREBT), u did the same 3 years ago! SA7?

الجمعة, فبراير 09, 2007

 
Blogger يا مراكبي said...

Ra2ed Fada2

إيه النور ده .. زيارتين ورا بعض؟ ده شرف كبير

أنا فعلا هربت من الوطن من 3 سنين بسبب مشاكل الوطن والشعب ومشاكلي أنا كمان .. بس الحقيقة إن قبل كده بسنتين كنت عايش ومش عايش .. يعني كنت في مصر صحيح بس كنت حاسس إني مش معاهم .. عايش بجسمي بس

قلبي بقى موجوع وما يحتمل أكتر .. زي قلب الطن بالظبط

تحياتي .. ويا ريت تعرفني عليك أكتر ولو على الإيميل

الجمعة, فبراير 09, 2007

 
Blogger No Fear said...

السلام عليكم
ليه تقلب المواجع كده كلها مرة واحدة هو كويس علشان مننساش زي عادتنا بس مش كده

سلام

السبت, فبراير 10, 2007

 
Blogger يا مراكبي said...

no fear

على فكرة .. أنا قلبي موجوع أكتر وأكتر .. أنا نفسي أقعد في وسط عيلتي وأبويا وإخواتي .. نفسي أتمتع بحاجات كتيرة إفتقدتها .. ومش قادر آخد قرار الرجوع .. قلبي موجوع على البلد .. وكمان موجوع علي اللي بحبهم

السبت, فبراير 10, 2007

 
Blogger mansourawy said...

الكلمات والصوت روعة
والصور اللى انت حاططها اروع كمان
قلبت علينا المواجع يراجل
السؤال قلب الوطن المجروح
والجرح بقة مزمن
علاجه فين؟
ومين يعالجه؟
سؤال محتاج جواب
تحياتى

السبت, فبراير 10, 2007

 
Blogger الوردة السوداء said...

فعلا
الصور ملائمة جدا للحال الراهن

السبت, فبراير 10, 2007

 
Blogger Carmen said...

رائع يا مراكبى

اغنية جميلة جدا والصور موفقة فى الاختيار بطريقة حلوة قوى


ومش هاقولك قلبت علينا المواجع ...لان المواجع دى على طول صاحية وقدام عنينا كل لحظة

السبت, فبراير 10, 2007

 
Blogger يا مراكبي said...

mansourawy

بتسأل عن علاج الجرح يا دكتور؟

سؤالك ده جميل وعلى عيني ورأسي .. بس بلاش أنا اللي توجهله السؤال ده .. أنا قلبي موجوع بقى له سنين .. ودلوقت موجوع أكتر وأنا بعيد

السبت, فبراير 10, 2007

 
Blogger يا مراكبي said...

الوردة السودة

الحال الراهن ده بقى له زمان وطول قوي

ده أنا حتى حاسس إنك كنت وردة بيضاء وإسودت من اللي بيحصل ده

أنا سعيد إنك دايما منوراني .. بالتوفيق دايما

السبت, فبراير 10, 2007

 
Blogger يا مراكبي said...

Carmen

متشكر كتير على تعليقك الجميل .. صحيح .. المواجع بقت فعلا قدام عينينا على طول

أهلا بيكي وماتطوليش علينا

السبت, فبراير 10, 2007

 
Blogger Amr Ahmed said...

روعة يا مراكبي

لا اجد كلمات

فقد عبرت انت بالصور والكلمات

تحياتي

الأحد, فبراير 11, 2007

 
Blogger Sharm said...

اخيار موفق للغاية .. الكمات و الصور معبرة بشده

اشكرك

الأحد, فبراير 11, 2007

 
Blogger zordeak said...

قلب الوطم مجرووح



الله


الاختيار تحفة

والصور ماشية اوى مع الكلام


تحياتى

الأحد, فبراير 11, 2007

 
Blogger واحـــد مـــــن الـنـــاس said...

بسم الله ماشاء الله
ادي الابداع ولا بلاش
ابدعنا يا باشا

الأحد, فبراير 11, 2007

 
Blogger khaled said...

الاغانى بتبقى ليها معنى تانى و هى مكتوبة
معنى حلو
و احساس جديد
شكرا ليك

الأحد, فبراير 11, 2007

 
Blogger يا مراكبي said...

Amr Ahmed

متشكر كتير يا عمووور على تعليقك الجميل .. ومتشكر على إضافتي عندك

الأحد, فبراير 11, 2007

 
Blogger يا مراكبي said...

Sharm

أنا اللي بأشكرك كتير على تشريفك وعلى إنك عرفتني بالبلوج الجميل بتاعك

تحياتي

الأحد, فبراير 11, 2007

 
Blogger يا مراكبي said...

zordeak

متشكر كتير على ذوقك وإحساسك العالي .. منور

الأحد, فبراير 11, 2007

 
Blogger يا مراكبي said...

واحـــد مـــــن الـنـــاس

متشكر قوي .. بس ده مش إبداع ولا حاجة .. ده مجرد إحساس مني بأطلعه بالشكل ده


تحياتي ومتشكر عالصورة بتاعة الراجل الغلبان ده

الأحد, فبراير 11, 2007

 
Blogger يا مراكبي said...

khaled

فعلا عندك حق .. دايما الناس اللي عندها إحساس عالي بتحس بالحاجات دي على طول

متشكر كتير لتشرفك تاني

الأحد, فبراير 11, 2007

 
Blogger MAKSOFA said...

والله انا موش ناقصه وجع قلب يامراكبي
بس نعمل ايه هي دي الحقيقه
ربنا معانا ويشفي قلب وطنا

كلمات جميله وصور معبره عن الجرح والألم

الأحد, فبراير 11, 2007

 
Blogger hebaz said...

الصور بتستغيث و بتنطق من وجع قلب الوطن
قلبة هو شعبة

الأحد, فبراير 11, 2007

 
Blogger Memo said...

لولولوي شعر شعر انا جيت و لقيت شعر
البلوج ده فيه شعر

انا كدا هاجي كل يوم
يا سلام يا حبيبتشي يا مصر يا مصر يا حبيبتشي يا مصر

اصل الكلام قصر فيا معلش

و الوطنيه و الصور مش عايزه اقلك

ولا شاف النيا تيرارارا



تحياتشييييييي

الأحد, فبراير 11, 2007

 
Blogger يا مراكبي said...

مكسوفة

متشكر كتير على تعليقك .. وأنا معاكي إننا مش ناقصين وجع قلب .. وزي ماالأغنية فعلا بتقول .. ما يحتمل أكتر

الأحد, فبراير 11, 2007

 
Blogger يا مراكبي said...

hebaz

الله عليكي .. حلو قوي التعبير ده .. قلبه هو شعبه

جميل قوي

الأحد, فبراير 11, 2007

 
Blogger يا مراكبي said...

ميمووو

متشكر جدا .. نجاملك في الأفراح دايما إن شاء الله

ده البلوج كان حزايني وإنتي قلبتيه فرح كده أول ما جيتي .. كل ده من حب مصر؟

بس هو فين الشعر ده؟ أنا شعري وقع من كذا سنه

ههههه

الأحد, فبراير 11, 2007

 
Blogger ست البنات said...

كلام جميل

شكرا ليك

الأحد, فبراير 11, 2007

 
Blogger إنـســانة said...

قلب الوطن مجروح وصوت شعوبنا منبوح وقلب كل واحد من الشعب مدبوح

الأحد, فبراير 11, 2007

 
Blogger يا مراكبي said...

بنت البدو

أنا اللي أشكرك على زيارتك وياريت تشرفينا دايما .. مبروك البلوج الجديد

الأحد, فبراير 11, 2007

 
Blogger يا مراكبي said...

إنـســانة

تعليق جميل جدا .. ينفع كوبلية نزوده على الأغنية

نورتينا ومش هأوصيكي على جايزة ال 75 قرش .. يا مبذرة

الأحد, فبراير 11, 2007

 
Blogger bastokka said...

اللي قالقني في تاني صورة ان يكون كيس الدم ده مخلوط
من الاكياس الملوثة اياها

ربنا يستر

كلمات عالية
و منير ملعلع



تعالى زور
طهقان و طهقانة

الاثنين, فبراير 12, 2007

 
Blogger الأباصيرى said...

حرااااااام عليييييك
مش كفاية الغربة ياعم المراكبى

أنا عينى دمعت ودى صعب جداً أنها تحصل

قلب المواجع ياعم أحمد

الاثنين, فبراير 12, 2007

 
Blogger الأباصيرى said...

حرام عليك كمان مرة ياعم

بجد حراااااام أنا كل ما أجى اقفل الصفحة أرجع وأقراها تانى

ينفع كدة اللى أنتى عملتة فيا

الاثنين, فبراير 12, 2007

 
Blogger Hannoda said...

الأغنية ده روعة و بتخلع قلب أي واحد قاعد بعيد عن الوطن
و علمتني أحس بمصر وكأنها حضن اتخلعت منه
يس مش عارفة فيه كلمات أنا بسمعها في الأغنية بمعنى غير اللي انت كاتبه و مش عارفة مين فينا اللي صح؟؟؟


محتاج ليا دراع
وشراع وراحة بال
محتاج ليكي نجوم
نايمه في حضن ((بلادي))
***************
ولاّ:
محتاج ليكي نجوم
نايمه في حضن ((هلال))
**************

لو بحرنا نسقيه
صحيه وبوسي عينيه
ياما بكره يسقينا
*************
ولاّ:

لو ((بحري نام اسقيه))
صحيه وبوسي عينيه
ياما بكره يسقينا
أعتقد انه يقصد بـ (بحري) عطاؤه هو كمواطن إذا نام يعني أصابه الخمول فعاوزها (مصر) تسقسه لإنها العطاء الأكبر و عاوزها تصحيه و تبوس عنيه وإن عطاءها مش حايضيع هباء لإنه ياما بكرة حايرد الجميل و يسقينا
ده اللي بحسه من الكلام كل ما بسمعه فا مش عارفة رأيك ايه؟؟
بس أحلى حاجة فكلام منير إنه متفصل على قد قلب كل حد بيسمعه


معجبة جدا بالبوست بتاعك
تحياتي

الاثنين, فبراير 12, 2007

 
Blogger يا مراكبي said...

bastokka

عزيزتي الطهقانة

ما أخبيش عليكي .. هو فعلا من الأكياس إياها .. ربنا يسترها معانا جميعا

متشكر كتير على زيارتك ودعوتك للبلوج الجديد بتاعكوا .. عجبني كتير كتير

تحياتي ليكي ولزوجك العزيز أخويا طهقان

الاثنين, فبراير 12, 2007

 
Blogger يا مراكبي said...

الأباصيرى

أنا كنت متأكد إن عينك هاتدمع لأننا في الهم سوا

غربة هناك وغربة هنا وغربة جوانا

يعني أنا وإنت واللي زينا هايكون إيه اللي جابهم هنا لولا أحوال البلد .. أكيد مش جايين نعمل سياحة

الاثنين, فبراير 12, 2007

 
Blogger يا مراكبي said...

الأباصيرى تاني

أنا متشكر قوي إنك رجعت تاني وإعذرني بسبب النكد ده .. هانقلب ضحك تاني المرة الجاية

الاثنين, فبراير 12, 2007

 
Blogger يا مراكبي said...

Hannoda

أهلا بيكي تاني

فيه كام أغنية زي كده شايلهم لوقت تاني علشان الجرعة ماتبقاش زيادة عليا وعليكوا

بالنسبة لكلمات الأغاني .. كل اللي بتقولية يمكن يكون هو اللي صح وأنا يمكن اللي وداني مش ولابد .. حكم السن بقى

نورتي

الاثنين, فبراير 12, 2007

 
Blogger Hannoda said...

أنا منتظرة جرعاتك بفارغ الصبر لإني مدمنة محمد منير

الثلاثاء, فبراير 13, 2007

 
Blogger مُزمُز said...

الله

موضوع فعلا حلو جدا

مزج جميل وموجع بين الكلمات البديعة والصور الكاشفة

تحياتي

الثلاثاء, فبراير 13, 2007

 
Blogger يا مراكبي said...

Hannoda

على فكرة .. أغلب المدونين والناس اللي بتوجع دماغها بالتفكير لازم يحبوا أغاني محمد منير .. دي صفة مشتركة وطبيعية

بس البوست اللي جاي جايز مايبقاش فيه أغنية لمنير .. معلش

الثلاثاء, فبراير 13, 2007

 
Blogger يا مراكبي said...

مزمز

كان نفسي يكون عندي رصيد من اللوحات زيك علشان أخفف من الحقيقة المرة شوية

تحياتي

الثلاثاء, فبراير 13, 2007

 
Blogger tamer said...

كلمات جميلة واكثر من رائعة

تسلم ومشكور عليها

تحياتى

الثلاثاء, فبراير 13, 2007

 
Blogger يا مراكبي said...

tamer

متشكر كتير على تشجيعك .. نورتني

الثلاثاء, فبراير 13, 2007

 
Blogger frozen love said...

انا سيبتلك تعليق على التجوينة دي..يبدو انه متعملش او حاجة...تدوينة رائعة..وهاقولك تفاصيلها تانني بسرعى

اشد ما اعجبني هو تعبير كل مقطع عن صورته..الكلام ده كان ماثر فيا من زمان قوي

جميل انك جبتهولنا تاني

الأربعاء, فبراير 14, 2007

 
Blogger توتة توتة said...

اغنية تحفة
و صور بتوجع

الاثنين, مارس 26, 2007

 
Blogger يا مراكبي said...

توتة توتة

متشكر قوي علي زيارتك للبوست ده

للأسف فيه صور بتوجع أكتر وأكتر .. هي دي بلادنا .. نهرب وفين هنروح؟

تحياتي

الثلاثاء, مارس 27, 2007

 
Anonymous حدوته مصريه هادى said...

الله عليك بجد احسنت الاختيار فمنير هو حاله متفرده ف الصوت الاداء الاحساس
انه فعلا حفيد النيل
ايه يابلاد ياغريبه عدوه ولا حبيبه

الأحد, مايو 04, 2008

 
Blogger يا مراكبي said...

حدوته مصريه هادى

وأنا معاك في الرأي ده .. أهلا بيك

الأربعاء, مايو 14, 2008

 

إرسال تعليق

Links to this post:

إنشاء رابط

<< Home