شد القلوع يا مراكبي ... مافيش رجوع يا مراكبي

الأحد، فبراير 25، 2007

السنة دي هنقضيها تيجان

السنة دي يا إخواننا سنة التيجان .. شكلها كده بالصلاتو عالنبي هنقضي التدوين كلة في الرد على التيجان وإختراع التيجان وتدبيس بعض في التيجان .. أنا حاسس إن ده مقلب من الحكومة علشان يشغلوا المدونين عن النقد .. طبعا قصدي المدونين الوحشين اللي ضد الحكومة مش المدونين الحلوين اللي زيي كده
.
وطبعا فهمتوا من المقدمة دي إن وصلني تاج .. فكرت في الأول أستسمح اللي بعتهولي إني أعتذر عنه .. بعدين وصلني نفس التاج من مدون تاني .. قلت أستسمحه علشان يعفيني هو كمان .. وبعدها بيومين لقيت نفسي هأستسمح كل المدونات اللي في أفريقيا وآسيا وصفط اللبن .. قلت مابدهاش .. نرد على التاج وخلاص .. وإن شاء الله هاعمل مدونة جديدة للتيجان بس .. إسمها إتفضل إلبس ولبس التاج
.
وطبعا نشكر الأعزاء اللي دبسوني في التاج وهم بالترتيب .. شيماء صاحبة مدونة الصراحة خنقة .. والوردة السوداء صاحبة مدونة بريق عينيك وأحمد فؤاد اللي اسمه زورديك صاحب مدونة مع نفسي وعم علي صاحب البقالة اللي تحت البيت والحلاق الهندي في العمارة اللي جنبنا
.
التاج

اسم مدونتك ؟

هو سؤال بيدل على الذكاء لكن أنا هيكون ردي أذكى .. إسم المدونة يا مراكبي .. منتهى الذكاء

لماذا خترته .. ماذا تقصد بـه ؟

أغنية محمد منير .. يا مراكبي .. بتعبر تماما عن الحالة اللي أنا فيها وهي الإضطرار للرحيل عن الوطن واختلاف الوطن عما كان .. شد القلوع يا مراكبي .. مافيش رجوع يا مراكبي

هل فكرت فى إغلاق المدونة ... و السبب ؟

لأ .. وهي دي أحسن إجابة علشان أهرب من نص السؤال التاني

صورتك فى المدونة ، رمزيتها ؟

دي صورتي أنا .. عارف إني أشبه حسين فهمي كتير .. وبترمز للوضوح والمواجهة وعدم الإختفاء
طبيعة كتابتك فى المدونة بشكل عام .. سياسة .. قصة .. عبث .. كلام فاضى ؟

كل اللي أحس إنه ذو قيمة فكرية حتى لو كوميدي .. لكن عبث وكلام فاضي .. لأ

.لماذا تدون أصلاً ؟

أولا .. التنفيس عن الصراعات الداخلية في القلب والعقل
ثانيا .. عرض بعض المؤلفات التي لن تجد طريقها للجمهور
ثالثا .. التوجيه لمن هم أصغر سنا وأقل خبرة .. فأنا أحب أن أعلق أكثر ما أكتب
رابعا .. تغيير المنكر بالقول .. وهذا أضعف الإيمان

أحلى جملة قيلت لك فى وصف مدونتك ؟

أسلوبك سهل ومنظم وواضح
الموضوع يدعوا إلى الفكر مش كتابة وخلاص

التعليقات بالنسبة لك .. أهميتها ؟

حاجة بتقول لي إن رسالتي اللي أقصدها من الكتابة وصلت للناس

أحلى بوست كتبته .. ضع اللينك .. ثم أذكر لماذا ؟

أنا راجل متواضع وما أقدرش أشكر في نفسي .. كل المواضيع اللي كتبتها رائعة .. ههههه
أحلى موضوع عندي هو اللي بأشرح فيه إحنا ليه بندون وإسمه .. بقى العنب هو اللي في الأمان
http://yamarakby.blogspot.com/2006/11/blog-post_29.html#links
.

وفيه موضوع مأثر فيا قوي قوي بالذات من ساعة لما كنت في مصر آخر مره وهو .. هكذا كان الوطن
http://yamarakby.blogspot.com/2006/12/blog-post_20.html#links

.
أفضل مدونة قرأتها .. يمكن اختيار عدة مدونات ؟

أغلب الناس اللي بأتابعهم رائعين .. أداؤهم أحسن من اللي بيكتبوا في الجرايد بجد

أفضل بوست قرأته .. يمكن اختيار أكثر من بوست .. ومتنساش اللينك ؟

أي بوست بينكتب من القلب وبيكون فيه فكرة جديدة عليا .. ويخش قلبي على طول

هل خسرت صديق بسبب كتابة هنا ؟

لأ .. لسة

حد قل أدبه ف التعليق .. ايه رد فعلك ؟

لأ .. لسة

أسوأ مدونة ... هى كتيرة أصلاً : ) ؟ ويمكن اختيار عدة مدونات ؟

فيه مدونتين بيكتبوا كلام على وزن آيات القرآن الكريم .. مش فاكر إسمهم ومش عايز أفتكرهم أصلا

أسوأ بوست .. لازم تجاوب .. ويسمح بتعدد الأختيارات ؟

الموضوعين اللي كان فيهم كلام على وزن آيات القرآن الكريم

أسوء مدون .. ما هو حاتجاوب حاتجاوب ؟

الإتنين المدونين اللي بيكتبوا كلام على وزن آيات القرآن الكريم .. أنا بدأت أتعصب على فكرة

انشر الآن بشكل حصرى بوست لم تجرؤ على نشره من قبل .. ومش محتاج أقول اجبارى

الفيلم اللي مش هندي
فيه حاجة مش مفهومة بالنسبة لي .. من كام يوم شفت فيلم هندي .. إسمه كده .. بطولة أحمد آدم وصلاح عبد الله .. بيحكي عن إتنين صحاب .قوي .. مسلم ومسيحي .. وكل واحد بيضحي علشان التاني تضحيات جامده
وبعد كده الاقي إعلان بيتكلم عن نفس الموضوع .. وشوية وألاقي مدونات بتتناقش في حاجات تحس فيها بتنافس بين الإتنين في مصر .. وأحداث هنا وأحداث هناك .. وخلافات هنا وتطمينات هناك .. الخلاصة .. موضوع المسلمين والمسيحيين في مصر بقى فيلم هندي كبير
تسألوني أنا مستغرب ليه؟ تعالوا أحكيلكم أنا عالفبلم اللي مش هندي اللي أنا عشته .. إلخ البوست
.

وده تاج تاني وصلني من شيماء اللي خنقتني بصراحتها

هل كنت طالب شاطر فى المدرسة ؟

جدا جدا .. كنت من المتفوقين .. كنت
ايه كانت احب مادة و اكره مادة ليك فى المدرسة والكلية ؟

الرياضيات والإنجليزي في المدرسة
الكومبيوتر والخرسانة في الجامعة
ماكنتش بأكره أي مادة .. كنت بأعرف أذاكر أي حاجة

و كنتِ عايز تطلع ايه وانتِ صغير؟

مهندس يعني مهندس .. وإلا كنت هأنتحر .. شفتوا العبط؟
.
وأحب أهدي الأغنية قصدي التاج لكل من .. متهيألي حرام وكفاية كدة .. إحنا هنقضي السنة دي كلها تيجان والا إيه؟

التسميات:

48 Comments:

Blogger Hannoda said...

أولا سبب تسميتك للمدونة عجبني جدا أكتر من اسمها لأني بحترم الإختيارات اللي فيها عمق

ثانيا: صباح البلوماسية اللي انت فيها .. ولى اسم مدونة ورد في الإجابات.. أوصاف بس .. لكن الأوصاف أدت الغرض
أما البوست بتاع
العنب هو اللي في الأمان و هكذا كان الوطن
أنا روحت شفتهم و عجبوني قوي وسبتلك رد عليهم هناك

وعلى فكرة التاج ده أنجح من التاجات اللي بتسأل عن البرج و الأكلة المفضلة ولو انهم برضه خلوني أحس بالقرب من المدونين

تحياتي

الأحد, فبراير 25, 2007

 
Blogger الســـاحر said...

واضح تقريبا على كل اجاباتك الذكاء وخفه الدم
والخبره
بجد اسلوبك واجاباتك بسيطه ولكن وراها افكار كتير
ذى يغنى لما هربت من نص السؤال فى هل اردت ان تغلق المدونه؟
بجد اسلوبك شدنى
وفى النهايه سلامى وربنا يوفقك

الأحد, فبراير 25, 2007

 
Blogger يا مراكبي said...

Hannoda

الحقيقة أنا بأخصك بالشكر على الإطراء الجميل ده وعلى الإهتمام بقراية الموضوعات القديمة والتعليق عليهم كمان .. ده في حد ذاته مجهود تشكري عليه

أنا سعيد جدا إن لسة فيه ناس زيك كده

تحياتي ليكي ودايما بالتوفيق

الأحد, فبراير 25, 2007

 
Blogger يا مراكبي said...

الساحر

أهلا بيك في زيارتك الأولى ليا وأرجوا إنك تكررها .. ومتشكر كتير على التعليق الجميل ده

نورتني

الأحد, فبراير 25, 2007

 
Blogger Malk Almasria said...

صباح الخير

دائما تتسم اجاباتك بالصراحة والدبلوماسية التى احييك عليها


تحياتى


ملك المصرية

الأحد, فبراير 25, 2007

 
Blogger mano said...

تاج تانى
قصدى عاشر
ربنا يعينك

انا عجبنى جدا اختيارك لأسم المدونه
خصوصا ان اسمها مرتبط بحاله
و الأجمل هو تعبير اغنية منير عن الحاله دى
تحباتى

الأحد, فبراير 25, 2007

 
Blogger يا مراكبي said...

Malk Almasria

أهلا بيكي .. فينك من زمان؟

متشكر على الإطراء ده وتمنياتي ليكي بالتوفيق

الأحد, فبراير 25, 2007

 
Blogger يا مراكبي said...

mano

هي السنة دي سنة التيجان حسب التقويم الصيني .. وأنا مارضيتش إني أدبس حد فيه علشان مش هانخلص وماحدش هايكتب حاجة غير إنه يتفرغ للتيجان

تصدقيني لو قلت إن إسم المدونة ده في دماغي من زمان من قبل ما يخترعوا التدوين؟

نورتي

الأحد, فبراير 25, 2007

 
Blogger مـحـمـد مـفـيـد said...

صراحتك رائعه
وجامده اوي حكايه حسين فهمي دي

الأحد, فبراير 25, 2007

 
Blogger Sampateek said...

افتكر ان حسين فهمي بعد التاج ده حيعتزل


بساء الخير يا هندزة

الأحد, فبراير 25, 2007

 
Blogger bastokka said...

مهندس مراكب يعني؟
ولا؟؟



يا دحيح انت يا بتاع المذاكرة

الأحد, فبراير 25, 2007

 
Blogger يا مراكبي said...

محمد مفيد

متشكر كتير .. وبالنسبة لحسين فهمي .. أنا قلت أتواضع وما أقولش إني أحلى منه

نورت

الأحد, فبراير 25, 2007

 
Blogger يا مراكبي said...

Sampateek

طبعا حسين فهمي لازم يعتزل لأنه لحد دلوقت ما يعرفش إن فيه حد أجمل منه

بساء الفل علكي

الأحد, فبراير 25, 2007

 
Blogger يا مراكبي said...

bastokka

أهلا أهلا بالطهقانة

بلاش موضوع مهندس مراكب ده لحسن كل مراكبنا بتغرق

وعلى فكرة .. أنا لسة بأدح لحد دلوقت .. أصلها بقت عادة بعيد عنك

سلمي لي على أخويا وحبيبي الطهقان

الأحد, فبراير 25, 2007

 
Blogger hebaz said...

تيجان تانى!!!
أحمدك يا رب أنك مدبستش فيها حد
يلا ولا كأنى قريت حاجة هىهى
و طبعا الإيجابات بسيطة و صادقة كالعادة:)
تحياتى

الاثنين, فبراير 26, 2007

 
Blogger zordeak said...

تشكر يا باشمهندس احمد على الاجابة

الاجابات كما توقعت


عسل زيك


:)

الاثنين, فبراير 26, 2007

 
Blogger يا مراكبي said...

Hebaz

ممممممم

والله أنا بدأت أفكر إني أدبس التاج لناس معينة .. خدي بالك علشان قربت آخد قرار في الموضوع ده

الاثنين, فبراير 26, 2007

 
Blogger يا مراكبي said...

zordeak

ده إنت اللي عسل .. بس هتبقى عسل أكتر لو قلت لي معني زورديك دي يبقى إيه؟

الاثنين, فبراير 26, 2007

 
Blogger Memo said...

و الله يا ثروت ربنا وحده يعلم انا متعاطقه معاك اد ايه
بس الاجابات جميله و حقيقيه لدرجه التاثر بكل اجابه منها بشكل او باخر
الي غريب فعلا ان ردك في مدونتك او في اي مدونه و ان دا فهو يدل علي بصيره بالحياه و عمق للافكار مع الاحتفاظ بالمصريه الجميله في كل راي
مش مصدقه الكلام الكبير اللي بقوله ده انا كدا هعيط
تحياتشييييي

الاثنين, فبراير 26, 2007

 
Blogger يا مراكبي said...

memo

وأنا كمان .. الدمعة بدأت تفر من عيني لما قريت تعليقك

ههههه

بجد بجد متشكر كتير على الإطراء ده .. وده من بعض ما عندكم .. ودايما بالتوفيق

الاثنين, فبراير 26, 2007

 
Blogger الأباصيرى said...

انت وصلت ياباشا

التاج دة وصلنى ومش عارف أجاوبة ولا لأ

شكلى كدة هتدبس وأمرى لله

الاثنين, فبراير 26, 2007

 
Blogger يا مراكبي said...

الأباصيري

إحنا عايزين نعمل تحري ونعرف مين اللي بيألف التيجان دي؟

إوعى تكون إنت؟

الاثنين, فبراير 26, 2007

 
Anonymous ra2ed fada2 said...

Sorry for being late this time ya bashmohandis, I just came back, i was flying over alexandria this time, it is not beautifull anymore lelasaf, even min foo2!!!!! wasalna lella3awda ya bek,(Irriversable), Sorry to say that.

الاثنين, فبراير 26, 2007

 
Blogger يا مراكبي said...

ra2ed fada2
رائد الفضاء

أهلا بيك تاني وحمد الله على السلامة

فعلا وصلنا لنقطة اللا عودة زي ماقلت .. وأنا زيك شايف مصر من فوق أكتر من اللي مطحونين جواها ومش شايفين كل حاجة

شرفتنا بزيارتك

الاثنين, فبراير 26, 2007

 
Blogger حــلم said...

انت مقتضب جدا
:)
يعنى مهندس زى الكتاب ما بيقول
وكمان مدنى
والدليل: خرسانة

تحب اقوللك ايه اكتر عيوبك
ودة سؤال ماجاش فى التاج

ان عينك دايما بتقع على الاخطاء.. وفقط
شغلتك تطلع ملاحيظ
وتبرز عيوب الاخرين

قول لأ كدة
:)
هاعرف انك مزور شهادتك يا باشا

اجاباتك حلوة بجد
تحياتى

الاثنين, فبراير 26, 2007

 
Blogger حــلم said...

أزال المؤلف هذا التعليق.

الاثنين, فبراير 26, 2007

 
Blogger مبرمج حر said...

ما شاء الله على أجاباتك
أول مرة أجى مدونتك الرائعة دى يا باشمهندس احمد , مش عارف كانت تايهه عنى فيين مدونتك بس بأذن الله هاتابعها من أول دلوقتى

الاثنين, فبراير 26, 2007

 
Blogger shaimaa said...

اغيب يومين الاقيك مشرد لى كده
ماشى ماشى يا احمد
لما اشوف الحاجة بس و الله لاوريك

:))
اجاباتك عجبتنى وبقالك كتير مكتبتش حاجة دمها خفيف كده

و اللى اسمه ايه بيكتب ايات زى القران
اسمه يحيى مجاهد .. كتب العنقاء ... مدونة الله الوطن فاطمة

الاثنين, فبراير 26, 2007

 
Blogger يا مراكبي said...

حلم

شكلك كده ياباشمهندسة من الأعداء اللي مش مدني

ههههه

تعليق جميل بجد ومقدرش أقول لأ

عموما أحب أطمنك .. أنا من يوم ما إتخرجت وأنا غيرت المجال خالص .. بقى لي تلات تاشر سنة شغال في مجال المنشآت الحديدية وتحديدا في إدارة المشروعات .. اصل ربنا كرمني وكملت في الجامعة الأمريكية بعد كدة وحياتي كلها أغلبها شغل مع الفرنجة

وموضوع المنشآت الحديدية ده نادر وتفاصيله كتيرة .. جامعاتنا ما بتدرسش منه غير التصميم وبس .. أما باقي العلم الكبير ده زي التصنيع والدهانات واللوحات التفصيلية واللحام والتركيب والإختبارات غير إتلافيه فللأسف إتعلمناه من الأجانب

الثلاثاء, فبراير 27, 2007

 
Blogger يا مراكبي said...

التعليق الممسوح

التعليق الممسوح ده بتاع حلم .. عرفت صاحب التعليق من الإيميل

شغل مخابرات

الثلاثاء, فبراير 27, 2007

 
Blogger حــلم said...

steel structure
بعيد بعيد

:)

انا كتبت تعليقى من واقع حياتى الزوجية
:)

مهندسين المدنى كدة حتى لو غيروا الكارير يا فندم

أما شبهة التعليق الممسوح اللى بتنفيها عنك.. فهو لى فعلاً
لأن النت علق وتنّح وظهر لى تعليقان متماثلان

ودة مش شغل مخابرات
دة تأكيد على كلامى فى رغبة اخواننا بتوع مدنى.. على تقصى الحقائق

ربنا يكون فى عون الحاجّة
:)

الثلاثاء, فبراير 27, 2007

 
Blogger يا مراكبي said...

مبرمج حر

أنا اللي سعيد جدا بزيارتك وبأنك عرفتني بمدونتك الجميلة .. وطبعا يشرفني متابعتك ليا

أهلا بيك

الثلاثاء, فبراير 27, 2007

 
Blogger يا مراكبي said...

shaimaa

تعبير حلو قوي وأول مرة أسمعه: علشان توريني .. هتشوفي الحاجة؟

ربنا عالمفتري

وبعدين مين اللي شرد للتاني .. ده إنتي فضحتي المدونين اللي مارضيتش أكتب أسماؤهم هنا

ماشي

الثلاثاء, فبراير 27, 2007

 
Blogger يا مراكبي said...

حلم تاني

حتى إنت كمان بقيتي في صف الحاجة؟ ده إنت لسة معرفة جديدة .. قوام كدة؟

هو إنتي قريتي حكاياتي مع الحاجة في البوستس الآخرانيين ولا إيه؟

الثلاثاء, فبراير 27, 2007

 
Blogger farida said...

التيجان زياده فعلا اليومين دول

تحياتي ليك
و للحاجه
و بس

الثلاثاء, فبراير 27, 2007

 
Blogger يا مراكبي said...

farida

متشكر كتير على زيارتك .. وبس

إنتي كمان تعرفي الحاجة؟

الثلاثاء, فبراير 27, 2007

 
Blogger كراكيب عادل said...

باشمهندس مراكبي

ضحكتني ضحكتني انا اكتر حاجه عجباني من قبل الاجابات حتي المواجهه الي فيك والصراحة اسمك وصورتك دي معناها كبير

بتدي نوع من المصداقية لكل زوار مدونتك وبيحسوا انك صديق مش مجرد مدون

اكيد فاهمني انا والله عايز اتعرف عليك

adeL29@hotmail.com

ضيفني مسنجر يا هندسة انا ساكن في السالمية

الثلاثاء, فبراير 27, 2007

 
Blogger يا مراكبي said...

كراكيب عادل

متشكر جدا على التعليق الجميل ده وعلى الشعور الطيب والثقة دي

أنا يشرفني طبعا معرفتك والتواصل معاك

بس هو إنت ليه عندك 234 سنة؟

الأربعاء, فبراير 28, 2007

 
Blogger الأباصيرى said...

والنبى مانا
بورىء يابية

عيب عليك

انا مش بتاع تيجان انا بتاع الفضايح

:)

أنا أتفضحت يامراكبى
نص المدونين دخلوا عندى على حس الفضايح
انا بفكر أنتحر

الأربعاء, فبراير 28, 2007

 
Blogger يا مراكبي said...

الأباصيري تاني

طبعا لازم تتفضح .. ده حتى كفاية الصورة اللي إنت حاططها في البوست

عموما لما تنشر الجزء التاني .. نص المدونين التانيين هييجوا على طول

إوعى تنتحر قبل ما تنشر الجزء التاني من الفضايح

الأربعاء, فبراير 28, 2007

 
Blogger وجع البعاد said...

حلوة أوى البلوج السابق بتاع يوميات متزوج....ان قريتها لمراتى و جبتها جداً......و تصدق ان دى أول مرة من 3 أو أربع شهور أقرأ أى بلوج......
ان شاء الله لما ارجع كندا هنتظم فى البلوج بتاعى و اكون اكثر نشاطاً و تفاعلاً مع سيادتك.....
فين ميلاتك يا ريس

الأربعاء, فبراير 28, 2007

 
Blogger tamer said...

وبعدين ياعم حمادة

مش هنخلص بقى من حكاية التاج دة اختراع بتنجانى هههههه

كل سنة وانت والتاج طيب

المرة الجاية هتجد تاج جديد

على فكرة الحكاية فيها سر

وانت قولت وخمنت وتصدق ممكن يطلع صح

تحياتى

الخميس, مارس 01, 2007

 
Blogger يا مراكبي said...

وجع البعاد

إزيك يا دكتور .. إيه النور ده .. إنت لسة في مصر؟

أنا كنت لسه هأبعت لك علشان نتقابل في كندا في إبريل اللي جاي

عموما هأقول لك على التفاصيل في الإيميل

الخميس, مارس 01, 2007

 
Blogger pegasuselmasry said...

السلام عليكم

ازيك يا هندسة وحشتنى جدا جدا

رودوك جميلة جدا و طبيعية و بدون اى تكلف

و بجد فى كل مرة بقراء فيها تاج ليك بتزداد مقدار اعتزازى بيك

الخميس, مارس 01, 2007

 
Blogger يا مراكبي said...

tamer

لأ بقى .. تاج تاني؟ يا إخواننا خلينا نتفق على تاج واحد بس كل ست شهور

عموما لو جالك تاج بعد كدة .. إبقى إمسحه

نورتني يا أفندم

الخميس, مارس 01, 2007

 
Blogger يا مراكبي said...

pegasuselmasry

ياه .. إنت رجعت من الأجازة؟ حمد الله على السلامة يا دكتور

متشكر كتير على ذوقك ده .. ده من بعض ما عندكم

الخميس, مارس 01, 2007

 
Blogger دينا فهمي said...

جميلة ردودك كعادة كل كلامك
انا كنت عايزة أوضح فكرة
انا مش عملت المدونة بدعوة لناس وانت مش منهم طبعا
انا قفلتها بأيت انا بس اللي اقدر ادخلها لاني مش هاين عليا امسحها
وانا بوضح النقطة دي بجد لكل الناس اللي يهمني انهم مايفتكروش اني منعت مدونتي تظهر لهم

الاثنين, مارس 05, 2007

 
Blogger يا مراكبي said...

دينا فهمي

خسارة إنك قفاتي المدونة .. ياريت تراجعي نفسك مرة تانية .. وأهلا بيكي في أي وقت

الثلاثاء, مارس 06, 2007

 

إرسال تعليق

Links to this post:

إنشاء رابط

<< Home