شد القلوع يا مراكبي ... مافيش رجوع يا مراكبي

الأربعاء، ديسمبر 20، 2006

هكذا كان الوطن

عايزة تعرفي أنا ليه سبت باريس وجيت مصر؟ علشان مصر كانت أحلى مليون مرة من باريس
.
أنا عشت أيام جميلة يا بثينة .. زمن تاني .. مصر كانت زي أوروبا .. نظافة وأناقة .. والناس مؤدبة ومحترمة وما حدش بيتجاوز حدوده أبدا .. أنا نفسي كنت حاجة تانية
.
هنا كان فيه بار جميل صاحبه يوناني وجنبه كوافير ومطعم .. وهنا محل لابورصا نوفا للجلود .. كل المحلات كانت قمة في النظافة وبتعرض بضائع من لندن وباريس
.
شايفه الطراز المعماري البديع .. العمارة دي منقولة بالمسطرة من عمارة شفتها في الحي اللاتيني في باريس
.
ده كان كلام زكي الدسوقي (عادل إمام) لبثينة (هند صبري) في فيلم ورواية عمارة يعقوبيان .. الكلام اللي حسيت منه وكأن حد ضربني بالكف .. فهكذا كان الوطن

التسميات:

16 Comments:

Blogger شــهــروزة said...

نفس الموقف اللى حصللى لما سمعت الجملة دى
وبعدها
بقينا فى زمن المســــــــخ
كل حاجة بقت مسخ



مفيش دلوقتى الا قاع المستنقع يطفو على وجة البركة
وجة العزبة المباركة
بعد رائعة نجاة أيظن
تأتى أيظن أخرى للسيد عماد بعرور ملك العنب العنب

بعد احترام أغانى كبيرة مثل أغانى ام كلثوم
تتطل علينا الست فيفى عبدة على شاشات الفضائيات وهى تتراقص وتتمايل عليها بكل اسفاف

اختفت كلمة احترام وتوقير من قاموسنا اللغوى ومن تراثنا الثقافى

قاع المستنقع طفا على وجة البركة يا عزيزى

الأربعاء, ديسمبر 20, 2006

 
Blogger mano said...

لما شفت الفيلم اتضايقت قوى من الكلام دة
لأنى حسيت انه حقيقى
بص حواليك وشوف كل حاجة بقت عاملة ازاى
مش هقولك شوف الشوارع بقت عاملة ازاى
لأ شوف الناس بقت عاملة ازاى
انا حرد عليك بجملة من نفس الفيلم او الرواية نحن فى زمن المسخ

اشكرك جدا على وضعى لينك عندك
و احييك على الموضوع الجامد دة

الأربعاء, ديسمبر 20, 2006

 
Blogger Shadi said...

عاوز/ة كل الناس تعرف مدونتك
اشترك في مشروع الغريب لارشيف المدونات
http://elgharep.blogspot.com/2006/12/blog-post_15.html
............
المدونات العربية
http://arabblogs.blogspot.com/
........
بدل لما تحط لستة طويلة باسماء المدونات
عندك في مدونتك
حط اسم مدونة واحدة تحتوي على اسماء كل المدونات
........
عاوز اسمك يضاف الى قائمة المدونات
ارسل لنا اسم مدونتك وعنوانها و اسمك
على
za_shady@yahoo.com
...........
لو عجبك المشروع أخبر به كل اصدقائك لكي ينجح


امضاء
أعضاء مشروع الغريب لارشيف المدونات

الأربعاء, ديسمبر 20, 2006

 
Blogger shaimaa said...

سمعت جملة اشد منها فى الاعلان لانى مرحتش الفيلم

احنا فى زمن المسخ
المفروض صحيح منسبش الزمن
لان ربنا سبحانه وتعالى امرنا بكده

فممكن نقول
نحن فى بلد المسخ او عصر المسخ
و حسبى الله ونعم الوكيل

الخميس, ديسمبر 21, 2006

 
Blogger frozen love said...

العمارات اللي بقت من فوق مزابل...ومن تحت مسخخخخخخخ

للاسف دي حقيقة مزعجة..اتمنى انه يكون كابوس طويل قوي وهنصحى منه

الخميس, ديسمبر 21, 2006

 
Blogger Shadi said...

عايز كل الناس تعرف مدونتك
ضيف نفسك في ارشيف المدونات العربية
http://arabblogs.blogspot.com/
ارسل لنا اسم مدونتك و عنوناها و اسمك

في كومنت على

http://arabblogs.blogspot.com/2006/12/blog-post.html

ابعت نفس الرسالة دي لكل اللي تعرفهم

الخميس, ديسمبر 21, 2006

 
Blogger rony said...

يامساء التحركات
انا طبعا طبعا مش هاقدر ارد على حضرتك بكلام من الروايه وده طبعا بسبب رايى فى الروايه اللى تقريبا بيختلف مع كل العالم فيكى يامصر بس ماعلينا
اولا..احنا اللى عملنا كده علشان سكتنا واستسلمنا لكل حاجه كنا بناخد كل ضربه وضربه ونفتح دراعنا للنظام ونقوله كمان ومش عايزيهم يركبونا ويدلدلوا رجليهم كمان
الله يرحمه جدى كان بيقول اللى يلاقى دلع وميدلعش ربنا يدخله النار
وثانيا "رنا" معناه الجمال الذى يخطف الابصار ومش فعل النظر للجمال نفسه

الجمعة, ديسمبر 22, 2006

 
Blogger pegasuselmasry said...

اختفى كل شئ
اختفت المبدأى
اختفت اللغة العربية الجميلة
اختفت الحياة الممزوجة بالبسمة
اختفى الاخلاص والعمل

و بقى المسخ
و على راى شهروزه
بقنا فى زمن عماد بعرور

الجمعة, ديسمبر 22, 2006

 
Blogger مُزمُز said...

المشكلة الحقيقية هي تعيرنا نحن كأمة لها خصائصها ونمطها وتحمل قدرا ضخما من المحبة والتسامح والتحضر

لا أعرف هل تغير الناس لأن الوضع تغير

أم أن الوضع تغير نتيجة لتغير طبائع البشر

لو عرفت حاول تقرأ كتاب ماذا حدث للمصريين للدكتور جلال أمين
بس عموما المشهد طبعا كان رائع وبكاني جامد أوي حسرة على زمن لم أعاصره
تحياتي

السبت, ديسمبر 23, 2006

 
Blogger يا مراكبي said...

شهروزة

هو ده بالظبط اللي حصل .. كل حاجة في حياتنا بقت زي بعرور وأمثالة .. وقاع المستنقع بقى هو الشيء اللي الناس فاكرينه إنه هو الصح

أي حد تاني عايز يرجع لجمالنا القديم .. يفتكروه إنه هو المجنون في وسط العاقلين .. حاجة تجنن فعلا



mano

أيوة مظبوط .. أنا شايف إن المشكلة بقت فعلا في الناس .. أغلب الناس دلوقت بقى سلوكها سيء جدا في كل المجالات .. مرة سألوني وقلت: أنا بأحب مصر .. الأرض والأماكن .. بس بيضايقني فيها .. المصريين .. طبعا مش كلهم

شكرا على مجاملتك الظريفة



Shadi

شكرا على الفكرة .. تم اللازم وشكرا



shaimaa

صح .. كل حاجة عندنا بقت مسخ .. ياريتك كنتي شوفتي الفيلم .. الحوار ده بالذات كام مؤلم جدا



frozen love

أهلا بيك .. كلية هندسة وأديب برضه؟ أنا طبعا عديت على مدونتك وقريت آخر بوست .. قصة جميلة جدا .. إنت تقريبا بتفكرني بنفسي في نفس المرحلة بالظبط



rony

والله برضة وجهة نظر .. وزي ما بيقولوا .. من أعمالكم ساط عليكم .. وإن الله لا يغير ما بقوم حتى يغيروا ما بأنفسهم .. وكما تكونوا يولى عليكم



pegasuselmasry

أيوه .. كل حاجة جميلة راحت وضاعت .. كل اللي فاضل .. القبيح في كل شيء




مزمز

كلنا شايفين إيه اللي حصل للمصريين .. بس ليه حصل؟ وإزاي يتصلح؟ هو ده اللي بقى لغز

ياريت يا مزمز لو عندك الكتاب ده .. تقول لنا مرة كده ملخص عن الأسباب والحل .. لما حدث من تغير للمصريين

السبت, ديسمبر 23, 2006

 
Blogger hebaz said...

حرد عليك بسؤال سألتة فى مدونتك
حد فيكوا بيحس إنه متغرب مع إنه لسه مقيم جوه بلده؟
هوة دة بالضبط الى ناس كتير حاساه
مش دية الناس الى أحنا نعرفها فين الأخلاق و الجدعنة و الشهامة و الأبتسامة
وحشتينى يا مصر أوى على الرغم أنى جواكى...

السبت, ديسمبر 23, 2006

 
Blogger يا مراكبي said...

hebaz

لحقتيني قبل لحظات من السفر .. وطبعا أنا اللي حظي حلو .. أهلا بيكي

الأول أنا حسيت إني مش من البلد دي وكأني مسافر بره .. الإحساس ده إستمر أكتر من سنة .. لحد ما سافرت بجد وجد بعد كده

وحشاني أنا كمان مصر .. بس مش هيا اللي موجودة عندك هناك دي

إن شاء الله لما أرجع هأقرأ كل مواضيع مدونتك .. وهأزورك هناك وأقولك رأيي

الأحد, ديسمبر 24, 2006

 
Blogger Hannoda said...

و تقدر تقول كمان ان كان فيه ناس بتقف للستات و العواجيز في المواصلات

و كانت الأسر بتتجمع في بيت العيلة كل جمعة

و كان لما بنت تتعاكس في حيها يبقى يا رحمن يا رحيم ع الصايع اللي عاكسها

أيام ما كان اللي بيعاكس صايع في نظر الناس

قصدي في الآخر اني بضيف لإسم البوست بعد اذنك جملة أخرى وهي

وهكذا كان أهل الوطن

الأحد, فبراير 25, 2007

 
Blogger يا مراكبي said...

وهكذا كان أهل الوطن

تعبير أكثر من رائع

وهو ده كان السبب الرئيسي في قراري للرحيل عن الوطن .. لما بقت الحياة مع أهل الوطن صعبة نتيجة تدهور أسلوب تعاملاتهم بشكل رهيب وإتلخصت في الأنانية ومبدأ أنا ونت بعدي الطوفان

تحياتي ليكي

الاثنين, فبراير 26, 2007

 
Blogger Hannoda said...

مش عارفة

يمكن الحياه في مصر بقت صعبة قوي و المعاملات بقت أصعب

لكن ماتهونش علينا اننا نسبها غاضبانين
نسيبها متغصبين عشان لقمة العيش.. أو ظروف خارجة عن ارادتنا .. ماشي

بابا بيقوللي انت بتقولي كده عشان ما اتدعكتيش فيها
وأنا بقول ان مهما اتألمت منها حاقبل منها كل حاجة

يمكن انتوا صح و يمكن أنا صح

بس نفسي أكون أنا اللي صح

الاثنين, فبراير 26, 2007

 
Blogger ibrahim zakaria said...

omg i'm realy don't know that i can image to see like this artical thxx so much for this special artical اغاني شعبي

الأربعاء, سبتمبر 26, 2012

 

إرسال تعليق

Links to this post:

إنشاء رابط

<< Home