شد القلوع يا مراكبي ... مافيش رجوع يا مراكبي

الأحد، ديسمبر 03، 2006

بنطلون البيجامة أبو أستك

جالي في يوم ولي العهد وقال إيه عايز يشتري فانلة رونالدو اللي سعرها كذا وتريننج سوت ماركة ماعرفش إيه وسعرها قد كده وجزمة نوع إيه ... قلت له بس .. ستوب .. ليه كل ده؟ قال عايز الفانلة علشان يلعب كويس و التريننج علشان التسخين قبل اللعب ... إلخ
.
قلت له يابني ده أنا فاكر إني رحت أنا و إبن عمي البلد في الصعيد حضرنا دورة كورة لما كنا صغيرين .. وكانت كورة شراب طبعا .. وكان اللاعيبة بييجوا بالجلابية مش بالتريننج سوت .. ولما ينزلوا يلعبوا في الفسحة اللي جنب الترعة كان كل اللي بيتغير إنهم بيشلحوا الجلابية ويحطوها جوة اللباس ويتبتوا علي دكة اللباس وخلاص .. هو ده الزي الرياضي بتاع المباريات .. غير إن اللعب كان عالحافي .. أو بكتيره بشبشب خدوجة
.
طبعا ولي العهد بص لي بانبهار وكأنه بيكتشف إن أبوه من كوكب تاني غير الأرض .. قلت تلاقيه ما فهمش ولا لفظ من اللي أنا قلتهم دول .. خلينا نبسط له الموضوع
.
قلت: ومرة كان عندنا في الشارع ماتش كورة مع فرقة الشارع اللي جنبنا .. وكان أهلي لسة راجعين من الحج وجايبينللي جزمة تشبه بتاعة لاعيبة الكورة أم بزابيز من تحت .. لبستها والناس قالوا بس .. إوعي الواد ده .. ده شكله لاعيب جامد .. والفرقة اللي قصادنا كانوا لابسين فانلات داخلية نص كم علي بنطلونات البيجامة الكستور أم أستك .. بدأ الماتش وطبعا كنت عامل زي سمير غانم في فيلم 4-2-4 وكانت حكاية
.
.
قال لي: يعني إيه بنطلون بيجامة ده؟ قلت أيوه صحيح .. إنت عمرك ما شفت البيجامة أصلا .. على طول لابس ترينجات .. قلت له: بص بأه .. سيبك من اللي أنا قلته ده كله .. الخلاصة هيا إنك ممكن تشتري أحسن لبس رياضي .. لكن ده مش هايخليك لاعب حريف .. زي بالظبط لما تروح تتعالج في أغلى مستشفى بس ما تقدرش تشتري الصحة .. أو تروح تحضر أغلى مسرحية بس ما تقدرش تشتري السعادة

.

حسيت إنه فهم .. وقعد يفكر شوية كده .. وقال: ماشي .. إيدك بقى على فلوس التريننج والجزمة والفانلة وخليك إنت في ذكرياتك مع بنطلون البيجامة أبو أستك

التسميات:

14 Comments:

Anonymous غير معرف said...

this post is really nice ....we miss being(ORIGINAL)...now we think our value lies in what we wear or drive or whatever..not how we think...our acheivments....culture& awarness...I wish I had a father to teach me that stuff...uh..(LIFE IS NOT FAIR)...
el masry affendi

الأحد, ديسمبر 03, 2006

 
Blogger واحد من الناس said...

نفس السؤال الذي يقول هل المنصب هو من يصنع الإنسان ام الإنسان هو من يصنع المنصب

الأحد, ديسمبر 03, 2006

 
Blogger كراكيب نـهـى مـحمود said...

بوست جميل اوي

بياكد لي احساس اننا ماهما حاولنا نقول للجيل ده بننفخ في اربه مقطوعه خلاص ميولهم بقت استهلاكية
معلش الله يرحم البيجاميا وايامها

الأحد, ديسمبر 03, 2006

 
Anonymous غير معرف said...

7elwa keteeer...

i wish i have your enthusiasm..to wrie nice postslike this...

الاثنين, ديسمبر 04, 2006

 
Blogger مُزمُز said...

جميل أوي

بس عندي سؤال برة الموضوع

هو ولي العهد عنده كم سنة؟

تحياتي

الاثنين, ديسمبر 04, 2006

 
Blogger يا مراكبي said...

أنونيموس الأولاني

شكرا على التعليق .. فعلا الدنيا مش معرض .. وده اللي بنحاول نوصله للناس .. بس للأسف أغلب الناس ماشيه وراء المظاهر


واحد من الناس

إضافتك فعلا في صلب الموضوع .. وعمري ماشفت منصب بيعمل إنسان إلا لو كان مجتهد ومخلص .. لكن لو ما يستحقوش .. بيبقى مسخرة


كراكيب نهى

دي مشكلة كبيرة بأواجهها مع أولادي .. أحيانا بأحاول أبص للمواضيع من وجهة نظرهم لو كنت إتربيت زيهم .. بس المشكلة إني نفسي يكونوا مستريحيين أكتر مني لما كنت في سنهم .. وفي نفس الوقت خايف عليهم من الدلع


أنونيموس التاني

متشكر كتير وبأتمنى يجيلك الحماس وتعمل بلوج وتمتعنا



مزمز

ولي العهد قرب يبقى 9 سنين .. غير بنتين 6 سنين و 3 سنين أولياء للعهد برضه

الاثنين, ديسمبر 04, 2006

 
Blogger YASSER said...

T

الاثنين, ديسمبر 04, 2006

 
Blogger مُزمُز said...

بس تعرف

ده بقى اسمه الانجاب النموذجي يعني الفرق بين كل بيبي والتاني تلات سنوات

ماشاء الله لا قوة الا بالله

ربنا يخليهملك ويحفظهملك ويفرحك بيهم دايما يارب

تحياتي لهم جميعا

الاثنين, ديسمبر 04, 2006

 
Blogger كراكيب نـهـى مـحمود said...

طول عمري بقول ان اولادنا ما هم الا الاوبشن التاني لحياتنا
هما مجرد اختراعات بتساعدنا نختار الحل اللي سبناه زمان وسلكنا الاتجاه الاخر
يعني لو كنت علمي احب بنتي تكون ادبي لو اتجوزت عن حب هشيد بجواز الصالونات فاهم ماشية ازاي جوانا
يمكن بقول كده دلوقت لاني لسه مدخلتش التجربة دي لكن دي وجهه نظري

تحياتي وربنا يفرحك بيهم

الاثنين, ديسمبر 04, 2006

 
Blogger FrEe.PhArAoH said...

هههههههههههههههههههه

ما شاء الله .. ربنا يخلى الباشا ولى العهد دمه زى العسل

انا حسيت براحه فمدونة حضرتك

زكرياتك جميله وولى العهد ربنا يبارك فيه ويحفظه يا رب

يا ريت تقبلنى ضيف فمدونتك

تحياتى

الثلاثاء, ديسمبر 05, 2006

 
Blogger يا مراكبي said...

مزمز

متشكر كتير وعقبال ما نفرح بيك في الخير إن شاء الله


كراكيب نهى

اللي بتقوليه فيه شيء من الصحة .. اللي بيحصل إن الواحد بيحاول يجنب أولاده الأخطاء اللي وقع فيها نتيجة إختياراته .. أو يحاول يوجههم لإختيارات أخري بيكون شايف إنها الأفضل لو كان إختارها .. بس هنا ممكن تحصل مشاكل تانية لو الواحد ماكانش عارف إيه عيوب الإختيار التاني ده


FrEe.PhArAoH

أهلا وسهلا بيك .. إعتبر نفسك صاحب بيت مش ضيف .. إديني بس شوية وقت علشان أقرأ كل مواضيع مدونتك لأن شكلها جميل جدا

الثلاثاء, ديسمبر 05, 2006

 
Blogger شــهــروزة said...

ههههههههه
الواد ابنك دة بيحسبها صح
سابك تفرفط فى ذكرياتك وهو حسسك انه مستمع ومنبهر
وفى الآخر
اخد منك تمن استماعه

ههههههههههههههه
انت مطلعتش زى ابنك لية بس يا طيب؟؟
الله يباركلك فيهم

الخميس, ديسمبر 07, 2006

 
Blogger دينا فهمي said...

هي أشياء لا تشترى

الأحد, ديسمبر 10, 2006

 
Anonymous غير معرف said...

[url=http://hopresovees.net/][img]http://bariossetos.net/img-add/euro2.jpg[/img][/url]
[b]business order software, [url=http://bariossetos.net/]i want to sell software[/url]
[url=http://vonmertoes.net/][/url] microsoft windows vista download windows xp activation bypass
adobe acrobat 9 pro upgrade [url=http://hopresovees.net/]adobe creative suite 3 serial numbers[/url] oem software vs
[url=http://bariossetos.net/]discount software non[/url] how to use adobe acrobat 9 professional
[url=http://bariossetos.net/]coreldraw graphics suite x4 with painter x[/url] software purchase canada
software discount price [url=http://vonmertoes.net/]how to sell oem software[/b]

الأربعاء, ديسمبر 16, 2009

 

إرسال تعليق

Links to this post:

إنشاء رابط

<< Home