من القلب للقلب
يا ترى إنت واحد من دول؟
.
يا ترى ممكن تكون بتسمع أغنية وفجأة تتنح وتبرق عينيك وتقول للي جنبك .. شوفت؟ شوفت لما دخلوا بالكمنجة بدل المطرب في الكوبليه ده؟ شفت إيقاع الطبلة إتغير هنا مع معاني الكلمات إزاي؟ وطبعا اللي جنبك ده يبص لك بإستغراب ويندهش .. إزاي إنت بتاخد بالك من الحاجات اللي زي كده؟
.
أو تبقى ماشي مع شلة أصحابك وفجأة يلاقوك مش معاهم .. ويبصوا ورا يلاقوك واقف متسمر قدام لوحة عجبتك .. وواقف تصورها بالموبايل؟ أو تكون بتقرأ مقال أو شعر .. ويكتشفوا إن إنت من الوحيدين اللي حسوا وفهموا إيه اللي الكاتب كان بيقصده بالظبط؟
.
لو إنت واحد من دول .. يبقى إنت من القليلين قوي اللي بيشوفوا بقلبهم .. بيسمعوا بقلبهم .. بيقروا بقلبهم، لو إنت واحد من دول .. يبقى إنت من القليلين قوي اللي ما بيحسوش إلا للي بيطلع من القلب .. علشان يقدر يخش قلبهم
.
لو بتلحن وعايز لحنك يعيش .. لو بترسم وعايز رسمك يعيش .. لو بتكتب وعايز كلماتك تعيش .. إعزف بقلبك .. إرسم بقلبك .. إكتب بقلبك .. ساعتها إبداعك اللي طلع من القلب .. أكيد هايخش القلوب وهايعيش فيها .. حتي لو اللي فاضل من العمر .. فتافيت
تعليقات
شكرا لك ودمت
تبقى حاسس ازاى
انا ربنا انعم عليا بناس كده
بوست اكتر من رائع
قال حاجات كتير بحسها و معرفتش اعبر عنها
تحياتى
مكونتش بقدر اوصف ولا افهم ايه الفرق
بين الناس دول وبقيت الناس
لما تشوف لوحة وتحاول تلمسها بإيديك عشان تحسها .. او تبكي وانت بتسمع فيروز او الست بدون اي سبب .. او صوتك يعلا (الله) لقصيدة او كلمة حلوة تحسها
والناس تشوفك غريب ...
يبقى بتشوف بقلبك ... الله
ربنا يكرمك
بيتهيألي الموضوع ان كل انسان ليه اهتماماته
يعني ممكن لوحة جميلة تلفت نظري لكن متلفتش نظر صديق ليا اما لأنه غير متذوق أساسا أو انه غير مؤمن بجدوى الشئ ده
ويمكن يتوقف على ثقافة الانسان ودرجة اطلاعه فمثلا محدش ممكن قصيدة جميلة تلفت نظره الا لو كان ذو اطلاع واسع على الشعر وقدر يستوعب القصيدة جيدا بناء على ذوقه اللي اتكون من كثرة اطلاعه وتعدد قراءاته
ولكن تبقى دائما الأشياء الجميلة ملفتة وجاذبة للانسان مهما كانت اهتماماته أو ميوله ولكن المعيار هنا درجة الفهم فلكي تحس اللوحة السريالية أو التجريدية مثلا لابد من فهمها المبني بالطبع كما قلت على ثقافتك وهكذا الحال مع الموسيقى أو الفن المركب عموما
تحياتي
متشكر كتير ويا رب دايما تمتعينا بكتاباتك ..اللي من القلب
Shaimaa
شكرا لزيارتك .. طبعا لما يكون اللي حواليكي بيحسوا كده .. بتبقى نعمة كبيرة أغلب الناس مفتقداها في الزمن ده .. ربنا يكترهم حواليكي إن شاء الله
عندك مدونة جميلة محتاج أقراها كلها وبعدين أرجعلك أول ما أخلصها
bluestone
أسعدتيني بزيارتك وإحساسك العالي وتعليقك الجميل
وبرضه إنتي كمان عندك مدونة جميلة .. محتاج أقراها كلها
مزمز
واضح من تعليقك إنك أكتر واحد بيعاني من عدم فهم الناس للفن .. وده متوقع لأنك من النادرين اللي بيهتموا بحاجة زي كدة .. ومدونتك أصلا موضوعها غاية في التخصص عكس آلاف المدونات الأخرى .. تحياتي الغالية ليك
تختلف من شخص لأخر
يعنى مثلا نفس الشخص اللى انت بتقول عليهه مستغرب انك فهمت أو حسيت النقطة دى
تلفت نظره ويحس احساس غريب بحاجة تانية تفوت عليك أنت نفسك وانت ماشى جنبه
تباين الأحاسيس عند البشر
وتباين التقاط المؤثرات البصرية والسمعية والخارجية بوجة عام لدى كل البشر
هى السبب فى تنوع الأذواق يا عزيزى
دة بنترجمه كدة بالبلدى
لولا اختلاف النظر
لبارت السلع
لو الجميع نظروا نفس النظرة للوحة الموناليزا مثلا
محدش حيبص بنظرة مختلفة للوحة ليدا وطائر البجع مثلا
حتبور اللوحة ولن تلقى الا سلة المهملات
لديك سهولة وسلاسة فى حل أعقد المشاعر وترجمتها الى حروف
تحياتى
طبعا أنا سعيد جدا بزيارتك .. وخصوصا إني بقى عندى حد يحمينا وإحنا ماشيين في الشارع
كده بقى عندي 3 مدونات هأقراهم في الويك إند .. متشكر كتير وتحياتي ليك
شهروزة
طبعا بنحترم وجهة نظرك .. وبأشكرك علي تشريفك وعلى مجاملتك اللي فعلا بأعتز بيها جدا جدا
وأثبتت التجربة نجاحها
فكلما كتبت كلاما -حقا- من قلبي نال الإعجاب أكثر مما كتبته لمجرد الكتابة
ومعني أنه نال الإعجاب أنه وصل إلي القلب
تحياتي لك
و على رأى الست ليلى مراد من القلب للقلب رسول
البوست بجد جميل أوى:) و فهمت قصدك طبعاً
ربنا يتقبل الصيام
كدة ليك عندى أفطار و شاى :)
فيقوم حد جاي حاططها قدامك كده عادي جدا
ساعتها مش حاتعرف تقول حاجة.. حاتكتفي بالابتسام
إنت غريب يا مراكبي على فكرة
:)
عارف فايه؟
في قدرتك على التركيز و الربط بين الأشياء و تحويل الحاجات الطايرة المتشتته لمعنى ملموس
تحياتي و شكرا لإنك وريتني البوست الرائع ده
وعموما ده دليل على إنك من الناس القليلة جدا اللي أنا بأتكلم عنهم هنا .. و
أنا متوقع فيكي كده
نورتيني بجد
رغم انك تلاقيكي كل اللي حواليك يستغربوة انت خدت بالك ازاي او لما تتكلم مع حد وتحسوة اوي لدرجه انك بتعرف هو بيفكر في ايه او الكلمه اللي هيقولها هي ايه فعلا احساس القلب جميل جدا شبه البوست اللي انت كاتبه علشان هو من القلب وصل للقلب تحياتي
ياااه .. إنتي وصلتي لحد هنا؟ ده إنتي رجعتي كتير قوي
عموما أشكرك على اللفتة الطيبة دي وبكده أقدر أقولك إنك من الناس اللي أنا إتكلمت عنهم في البوست ده
منورة
حسيته لانه دخل للقلب
حلوه اوي اوي يا احمد عندك حق في كل اللي قلته
ايه رأيك لما تكون انت من الناس القليلين دول بيحسو ويفكروا ويكتبو ويعبروا بقلبهم وأقرب الناس ليهم ولا هما هنا
ليه يا مراكبي بتضغط اوي علي الجرح