إبقى إتغطى قبل ما تنام
كان نفسي ما أعملش مدونة بتتكلم عن واحد مشي من بلده غصب عنه .. خلاص كله بقى تمام ومش هاكتب حاجة تاني زي يقولون سافر و وطني الذي أدمى فؤادي و مواطن كارت ولا خط .. أنا شايف إن كل شيء إتصلح .. قررت إني أرجع مصر وأشتري فيللا بجونينة وفسقية .. بسين بالبلدي .. هاشتري عربية موتورها 9000 سي سي بعد ما خفضوا الجمارك من 400% لحد صفر% .. هامشي في شوارع المحروسة وما حدش هايكسر عليا بعربيته فجأة .. هأقف في الإشارة الحمراء وما حدش هاييجي من ورا ويضربلي كلاكس ويشتمني بالأب والأم أو يعمللي إشارات بالصوابع والإيدين .. غالبا شفرة أو سيم .. الله أعلم
.
هامشي عالطريق الدائري بأمان ولو عديت السرعة القصوى مش هايحصل زي زمان وتتسحب رخصتي وألف عليها وأقول عيل تايه يا أولاد الحلال .. ظباط المرور بقى معاهم لاب توب (كومبيوتر محمول والعياذ بالله) ومتوصل بالإنترنت اللاسلكي على وزارة الداخلية .. وهادفع المخالفة وأنا واقف زي الباشا
.
مش هاروح أي مصلحة حكومية .. دلوقت ممكن تطلب الخدمة اللي إنت عايزها باللإنترنت .. وتدفع برضة من خلال الإنترنت .. وتجيلك الحاجة بالبربد لحد الفيللا أم جونينة وبسين (فسقية بالفرنساوي) .. إتمدنوا بقى .. جتكوا البلاوي مليتوا البلد
.
هأقدر أروح مدينة نصر ألعب بولينج كل يوم علشان ما بقاش فيه زحمة مرور .. مرتبي هايكفيني ويفيض ومش هاعيش مديون زي زمان .. يمكن ما يكفيش أروح باريس في الصيف ودبي في الشتاء .. بس مش مشكلة .. المهم إن الحاجة الوحيدة اللي مضايقاني هيا إن مراتي جايبالي إحباط وبتقول لي .. إبقى بس إتغطى كويس قبل ما تنام
تعليقات
لا انا هاقولك على حاجة احلى
اتفرج على مسلسل
انا وانت وبابا فى المشمش
تحياتى
مش قد صيعة بنات زى مكسوفة
الصور يافالح من النت والتصوير محترفين
ومكسوفة عمرها ماخرجت من ابو قتادة بولاق الدكرور
تصدقي .. المسلسل ده بالذات ما شفتوش رغم إنه إتعرض كتير جدا وكان مشهور جدا .. يمكن علشان كده أنا بقيت كده؟
shaimaa.nassar
أنا ممكن أستغنى عن مرواح دبي لكن باريس لأااااه .. إلا دي .. شكرا كتير على الزيارة
كبير المشردين
طيب لو جيبت معايا الكرامة من بره .. ممكن تقوللي الجمرك عليها يطلع حوالي كام؟ نورتني بجد
كراكيب \ بيكيا روبابيكيا
إيه النور ده؟ شرفتنا بجد .. بس هو أنا خرفت قوي كدة؟
Anonymous
لخبطتني يا عم .. أخدت وقت لحد ما أفهم إنك بتعلق على موضوع تاني .. وإنت عارف إنني نايم ومكشوف عني اللحاف .. بس برضه أهلا بيك دايما
تحتاج
ان تتسفلت كويس و انت نايم الغطا مش كفاية
تحياتي
هو أنا كل ما أروح حتة اليومين دول ألاقي حاجة تشجع على الكآبة وأنا أساسا عندي اكتئاب طبيعي ويائس لأقصى
الحدود
يا أخي اتغطىىىىىى
ا ت غ ط ى
لأن اللي انت بتقوله ده هيحصل لما تشوف حلمة ودنك
ولو شفتها يبقى معناه إنك اتجننت
يعني لما تتجنن مش هتستمتع بحاجة ومش هتفرق معاك حاجة
أنا زهقت جدا خلاص
وعلى رأي الشاعر
يا خراب بيت أبوكي يا مصر
هي ناقصة وجع وقهر
مزم بس مش عارف أساين إن في بلوجر بيتا
أنا صاحب التعليق اللي فات بس مش عارف أساين إن في بلوجر بيتا
ابقى قولى و النبى مكان اللى فيه الاحلام الجميلة دى لانى امبارح كنت نايم فى الهواء الطلق و مش متغطى و برده حلمت بكابوس الحكومة و طابور العيش
تحياتى
بيجاسوس المصرى
واقولك اتغطى كويس وانت نايم
الحل الوحيد عندي انك تاخد حبايه مستكه و حبايه مش مستكه وتضربهم في الخلاط كويس وبعدين تخدهم قبل النوم واكيد طبعاً تتغطى كويس
تفتكري هاحتاج كام طبقة أسفلت؟ ولا ما فيش أمل؟ أهلا بيكي في البيتا بللوجلر تاني
مزمز
حلو قوي كلام الشاعر ده .. ياريت تقوللي بقية القصيدة
pegasuselmasry
دي مش أحلام .. دي حاجات موجودة في بلاد قريبة مننا .. بس إحنا اللي نايميييين
أهلا بيك وحاول تنام من غير غطا مرة تانية وما تيأسشي
sherehan84
أسوأ حاجة إن يكون اللي فاضل لنا .. هو الأحلام بس
nor
شكرا على الوصفة .. ممكن كمان أزود عليها شوربة هدهد يتيم؟