شد القلوع يا مراكبي ... مافيش رجوع يا مراكبي

السبت، أبريل 14، 2007

أم الدنيا

إنت عارف إنتم إيه مشكلتكم في مصر؟ مشكلتكم إنكم لسه فاكرين إنكم أحسن ناس في الدنيا وإنكم بس اللي بتفهموا في العالم ده .. مظبوط كلامي ده يا باشمهندس ولا لأ؟
.
الجملة دي قالها لي مهندس عربي عالمي قدير وإحنا بنناقش مشروع برج عالي جدا في قطر خلال الأسبوع اللي فات.. الجملة دي فكرتني بنفسي لما رحت أمريكا أول مرة من 6 سنين .. كنت رايح وأنا شايف إني مسافر من أم الدنيا وكنت دايما بسأل نفسي: إزاي لسة فيه ناس بتهاجر لأمريكا وأوروبا أو تروح تشتغل في الخليج العربي مثلا وتسيب أم الدنيا .. إزاي؟
.
رحت أمريكا وهناك اكتشفت قد إيه إن الاقتصاد المصري ضئيل جدا جدا بالنسبة للعالم الخارجي .. كانت صدمة كبيرة بالنسبة لي .. ومش كده وبس .. ده أمريكا أصلا مش لوحدها في العالم ده .. ده فيه اقتصاد قوي جدا كمان في دول كتيرة تانية زي جنوب شرق آسيا وأوروبا واستراليا والخليج العربي والهند وغيرها كتير .. وياريت الكلام ده في الإقتصاد وبس .. ده كمان في السياحة والصحة والتعليم والإعلام ... إلخ .. لفيت بعد كده بلاد تانيه وإتأكدت من المعلومة دي: أم الدنيا ما بقتش أم الدنيا زي زمان .. وأغلب أولادها مش عارفين حاجة عن اللي بيحصل بره ده .. و لسه فاكرين إنهم أحسن ناس في الدنيا
.
صدقوني .. أنا بأحب بلدي اللي كانت أم الدنيا من كل حتة في قلبي .. لكن الحب ده مش لازم يكون كلام وبس .. وأول خطوة لازم نخطوها هي إننا نعرف إحنا قد إيه بالنسبة للعالم اللي برة ده .. لو عرفنا إحنا فين وحجمنا قد إيه .. هنقدر بعد كده نشتغل في الإتجاه الصحيح بدل ما نفضل فاكرين إننا لسه أحسن ناس في العالم .. والعالم كله يقعد يضحك علينا .. ونتفاجيء في كل مرة ناخد فيها صفر كبير .. صفر ورا صفر ورا صفر
.
والله وحشتيني يا أم الدنيا

التسميات:

110 Comments:

Blogger كراكيب عادل said...

انا لما طلعت من مصر كأني كنت في قمقم ومكنتش فاهم اي حاجة عن اي دولة برة لا لهجة ولا عادات ولا اقتصاد
كنت فاكر اننا محور الكون ولازم الكل يهتم بينا ومش احنا الي نهتم اقولها بالعامية كلنا عايشين في مية البطيخ

الشاب الي عمرة 23 سنة في اغلب الدول شخص لة قيمة ومركز ومشروع ودخل وسيارة وفيلا وزوجة واولاد واصحابة جنبة يعني مش كل واحد واخد في وشة مسكين وبيجري ورا الملاليم اكتشفت زيك برضو ان ناس كتير في امريكا مش عارفة
مصر غير بالاهرام بشوية الحجارة الي بنفتخر بيهم 24 ساعة في اليوم
اما التعليم والاهتمام بالصحة والاقتصاد وحجات كتير ووسائل النقل ولستة كبيرة كلها بنظرية ربنا يسترها معانا ومعلش وهنعمل اية يعني

يا سيدي مشيها وخلاص ... شوية مصطلحات بس في النهاية برضو بحب كل دة

لانها من ناس طيبة وانا منهم يعني كمان انا متناقض مع نفسي ومش عارف اقدم ليهم غير كل الحب وبحب كل حتة في مصر حد فاهم حاجة ؟؟؟

الأحد, أبريل 15, 2007

 
Blogger khaled said...

الصراحه يا مراكبى انا ما بفتخرش انى مصرى
ولا عمرى بصيت ان مصر ام الدنيا
جايز عشان تركيبه شخصيتى ما بتحبش الافتخار بالنسب او جايز العيب فى مصر
الله اعلم بقه جايز مصر دى كانت حاجه كبيره اوى ايام زمان بس اكيد عشان مكنش فى وسائل اتصال بالغرب
ولا انتا ايه رايك

الأحد, أبريل 15, 2007

 
Blogger zordeak said...

معادتش أم الدنيا للأسف


بس هيا بالنسبة لنا كل حاجة برضه


ولا ايييييه ؟

الأحد, أبريل 15, 2007

 
Blogger يا مراكبي said...

كراكيب عادل

أنا برضه إتصدمت لما لقيت 51 ولاية أغلبهم أكبر من مصر في كل حاجة وما حدش يعرف حاجة عن بقية الولايات المجاورة فما بالك بمعرفتهم عن مصر؟

وإحنا اللي فاكرين إن الناس كلها بتفكر فينا ليل نهار وبتهتم بمجريات الأمور عندنا زي الإعلام ما كان مفهمنا كده .. ولازال

مافيش قدامنا غير الحب يا عزيزي في الوقت الحاضر .. للأسف

على فكرة .. أنا مسافر أمريكا وكندا وهأغيب 10 أيام

الأحد, أبريل 15, 2007

 
Blogger يا مراكبي said...

خالد

ده موضوع معقد جدا .. الإفتخار بمصريتنا نابع من تاريخ كان مشرف زمان قوي قوي .. أما دلوقت .. فمافيش ما يدعوا لهذا الفخر في العصر الحديث وبالذات في السنين الأخيرة

يعني بنفتخر بشيء مش موجود دلوقت ومش عارفين إن هناك آخرين لهم الحق أكثر منا حاليا بأن يفخروا بأوطانهم وإنجازاتهم الحالية

الأحد, أبريل 15, 2007

 
Blogger يا مراكبي said...

zordeak

ما عادتش أم الدنيا ده أمر مفروغ منه خلاص

أما بالنسبة لنا إحنا .. فللأسف الزمن ومعرفة ما بالخارج أكثر فأكثر بتقلل الشعور بأن مصر كل حاجة بالنسية لنا شيئا فشيئا

للأسف دي حقيقة

الأحد, أبريل 15, 2007

 
Blogger شادي فايد said...

وحشاك انت لوحدك

والله انا وحشتني جدا

مع اني مقيم في اسيوط

بس كل ارتباطي بيها عن طريق النت

عندي حالة من العزلة

نفسي اخرج منها

ييييييييييييي

انا ح حط هم على همك ليه

سلام

الأحد, أبريل 15, 2007

 
Blogger ادم المصري said...

يااااااااااااااااه
اول مرة اسمع كلمتين يدخلوا دماغي بصحيح

الأحد, أبريل 15, 2007

 
Blogger أحمد سلامة said...

يعني لازم تفكرنا بموضوع الصفر ده
هي مصر ام اي حاجه الا الدنيا
ام الفقر
ام الجهل
ممكن ام الاستبداد والكوسه والبطيخ
لكن ام الدنيا دي تبقى واسعه قوي
هوا لسه فس امل يا مراكبي ؟؟!!

الأحد, أبريل 15, 2007

 
Blogger khaled said...

اهلا بيك فى وطنك
ههههههه
على فكرة هى ام الدنيا فعلا
بس اللى حصل ان الدنيا دى اسم بنت ايام الجاهلية
يا عينى وأدوها و هى صغيرة
اللى جواها عارفين اكتر من اللى براها
ربنا يرجعك بالسلامة

الأحد, أبريل 15, 2007

 
Blogger يا مراكبي said...

شادي فايد

أهلا بيك

أنا واحشاني أم الدنيا اللي هي أم الدنيا بجد بالفعل والعمل .. مش بالإسم والمكان

عموما ولا يهمك .. كلنا في الهم سواء

نورت

الأحد, أبريل 15, 2007

 
Blogger يا مراكبي said...

آدم المصري

هههههه

يعني كل اللي أنا كتبته قبل كده ما دخلش دماغك؟

:-D

بس بجد بجد .. هو ده التفكير اللي المفروض نتبعه علشان نبقى كويسين فعلا

تحياتي

الأحد, أبريل 15, 2007

 
Blogger كراكيب عادل said...

مسافر و10 ايام بس يا حبيبي لازم تنام وتشبع نوم قبل بهدلة السفر انا مش ناسي رحلة بالطائرة 9 ساعات متواصلة
من ميامي فلوريدا لغاية هيثرو وبعدها اتلطعنا في المطار 5 ساعات وبعد كدة 7 ساعات تاني طيران من هيثرو للكويت تخيل اخوك رجع شكلة اية

انا بحب السفر بس بكرة رحلات الطيران الطويلة دي بجد عموما ربنا معاك وهتوحشنا يا هندسة

الأحد, أبريل 15, 2007

 
Blogger خالد وليس بخالد said...

خلاص بقى يا جدعان
انا لسه شوية وهعيك
بشمهندس محمد
انت كده هتخوفنا من السفر بره
علشان لقمة الخبز..اللي مش مسرطنة

يارب تعود سالما
يا استاذنا

الأحد, أبريل 15, 2007

 
Blogger copa said...

مراكبي حبيب قلبي

ايه الغيبه الطويلة دي بس
عارف المشكلة في مصر ان الاعلام و التعليم في مصر محسسينك ان مصر هي المختاره في التاريخ كله من بدايته لنهايته و اننا المفروض نفضل فرحنين بيها كدا و هي لوحدها هتبقي عمرانه و متقدمه اه والله بيخلوا الناس عايشه في الوهم ان مصر هي سباقة في كل شئ و طبعا بما ان الشعب المصري او مش هجمع الشعب كله بس في فئات كتير زو العدات الشرقيه الي مينفعش يسيب اهل بيته و يسافر بره بلده وسيب بيته واهله فتلاقي ان المصريين تقريبا شبه منعزلين يعني متلاقيش مثلا ناس في الصعيد كتير بتسافر امريكا الا نسب قليلة جدا ولا حتي في الارياف فتلاقي معظم الشعب عايش في البلد دي مش شايف غير الي قادمه كل الي حواليه بيقولوا انه في ام الدنيا و هو مصدق فعلا واتفق معاك اننا المفروض نشوف حجم نفسنا اد ايه و اننا نعرف حجمنا اد ايه و كمان بجانب ذلك لازم نعمل بنقطة مهمه جدا وهي نبدا من حيث انتهي العالم و لا نبدا من حيث بدا العالم ودي المعدلة بتاعت الامريكان المستحدثين في الارض وانصحك انك متحطش مقارنة بين مصر و اي دولة تانيه علشان هيبقي مصيرك الصراية الصفرا ابسط حاجه لما المصريين يقدروا يصنعووا ماتور يبقي نقول مصر دخلت اول خطوة في التقدم المستحيل

الأحد, أبريل 15, 2007

 
Blogger يا مراكبي said...

أحمد سلامة

تعليقك مؤلم .. وكمان سؤالك اللي في الآخر محرج جدا جدا

كل اللي أقدر أقوله إن لازم يكون فيه أمل علشان نعرف نعيش لقدام بدل ما نمةت وإحنا واقفين

تحياتي

الأحد, أبريل 15, 2007

 
Blogger عمرو غريب said...

والله مصر في الاصل هي ام الدنيا بس اكبر مشكلة بتواجة كا شاب عايش في مصر هي البطالة والله البطالة اساس لكل المشاكل الموجودة في مصر لو مفيش بطالة تبقي مفيش اي مشاكل في مصر \

الأحد, أبريل 15, 2007

 
Blogger Mohamed A. Ghaffar said...

احنا عارفين حجمنا كويس بس محدش عاوز يعمل حاجه

الأحد, أبريل 15, 2007

 
Blogger يا مراكبي said...

khaled

حلوة وأدوها دي .. فكرة مبتكرة

طبعا اللي جواها أدري بخباياها أكتر .. ربنا يعين الجميع .. برة وجوة

الأحد, أبريل 15, 2007

 
Blogger يا مراكبي said...

كراكيب عادل

أصيل والله .. متشكر قوي

أنا برضه من عشاق السفر بس بأحب أكتر السفريات القريبة لنفس السبب .. 9 ساعات في الطيارة بيبقى عذاب .. غير إنك لما توصل أمريكا ما بتبقاش القصة خلصت على كده .. لسة فيه طيران تاني من أمريكا لأمريكا برضه

تحياتي ليك

الأحد, أبريل 15, 2007

 
Blogger حسام مراد said...

ليه بتفكرنا بغربتنا فى مصر
وحشانى ام الدنيا وليه بتفكرنا بالصفر الكبير
احنا مصدقين نفسنا سبنا نعيش احسن مانموت اكتر ما احنا ميتين

الأحد, أبريل 15, 2007

 
Blogger يا مراكبي said...

خالد وليس بخالد

مازلت أسجل إعجابي بإسمك اللي بتوقع بيه .. بس أنا أحمد مش محمد على فكرة

مؤلم جدا تعبير لقمة العيش اللي مش مسرطنة .. حتى العيش .. حسبي الله ونعم الوكيل

وبعدين أنا مش أستاذ ولا حاجة .. أنا إنسان عادي جدا

تحياتي

الأحد, أبريل 15, 2007

 
Blogger fares said...

كنا ام الدنيا فبما مضي بس خلاص كل شي راح وانفضي تحياتي ليك

الأحد, أبريل 15, 2007

 
Blogger الوردة السوداء said...

مممممممممممم
براحة على الشعب شوية
يامراكبى

كلامك مظبوط
بس برده هنعمل ايه؟

الأحد, أبريل 15, 2007

 
Blogger david santos said...

Hello, my friend!
Thanks for you work and have a good weekend.
I whant a translation, if you can, my Mail is: david_santos_sjm@hotmail.com

Thank you.

الأحد, أبريل 15, 2007

 
Blogger Esmeralda said...

بص يا سيدى
احنا مشكلتنا اننا ديما بنفتخر باللى عملناه و فضلنا نفتخر و نفتخر لحد مانسينا نعمل حاجه فى حاضرنا و نفكر فى مستقبلنا
طول الوقت معتمدين على سمعتنا فى الماضى و لسه لحد دلوقت بنتكلم على الاهرامات و بس
احنا فعلا كنا عايش فى الوهم
دا حتى لما واحد يحب يتفخشر يقول لك انت مش عارف انا ابن مين مش بيقول انا مين
انت عارف هما معندهمش فكره عننا ليه؟
انهم مركزين فى حياتهم و مستقبلهم مش شاغلين نفسهم بالكلام عمال على بطال زينا
احنا محتاجين نبص لقدام شويه كفايه ورا بقي
شكرااااااا

الأحد, أبريل 15, 2007

 
Blogger قصاقيص said...

لازم نعرف.......مكان بلادنا فين في الصورة.....يمكن ساعتها بس نقدر نرمم أوضاعنا المكسورة
............
أنا عن نفسي كبرت لقيتهم بيقولوا...:مصر دي كانت حلوة أوى
.......
بيني وبينك نفسي اشوف مصر اللي سمعت وقريت عنها
تحياتي

الأحد, أبريل 15, 2007

 
Blogger gohayna said...

بجد عندك حق

ميعرفش النظره دي غير الي طلع بره مصر

انا كنت عايشه في الكويت من وانا عندي 14 يوم ولما رجعت مصر كنت فاهمه انها احسن في كل شيئ
وصدقني كانت صدمه عمري خلال اللسبع سنين الي عشتهم هنا

كل حاجه اتغيرت وبالرغم من كدا فاكرين نفسنا احسن ناس

والدنيا بتجري من حولينا واحنا بنتعلم لسه ازاي نقوم نمشي

ربنا يهدينا ويوفقنا

تسلم ايدك علي الموضوع

وتحياتي

الاثنين, أبريل 16, 2007

 
Blogger Just a Reader said...

السلام عليكم....
عندي تحفظ شوية على موضوع الصفر ده لو سمحتوا لي .... احنا في مصر مش لدرجة الصفر يا جماعة احنا لسه كويسين ولسه متفوقين على ناس كتير. أنا احتكيت من خلال عملي بناس أمريكان وهنود وفرنسيين وبجد احنا كنا احسن منهم كتير احنا عندنا عقليات نابغة بجد وكمان أكبر دليل على كده نسبة العمالة المصرية الي شغالة بره مصر ...لو المصريين مش متفوقين مكنتش الدول دي خدتهم وبنت بيهم حضاراتها المختلفة.
مقدرش أنكر طبعا إن مستوى التعليم والتكنولوجيا والإقتضاد في أمريكا ودول شرق آسيا فعلا متقدم علينا حاليا وده يمكن علشان ظروف بلدنا ...بس احنا لو فضلنا ننعي ظروف بلدنا مش هنتعلم ولا هنتقدم ...الموضوع في يد وعقل الشباب
....الصين كانت دولة اقتصادها مش على الخريطة أصلا...بس دلوقتي وبسبب شبابها أصبحت دولة بتصدر لكل العالم.
الموضوع في ادينا احنا...محدش هيشيل الفكرة دي من دماغ الناس اللي برة إلا احنا بمجهودنا وإخلاصنا وشغلنا وطبعا توفيق ربنا قبل كل شيء.

ربنا يكرم الجميع إن شاء الله.

الاثنين, أبريل 16, 2007

 
Blogger سكتم بكتم said...

وتعالي يا دنيا وشوفي الكنز الكنز الكنز الكنز الي أسمة المصريين

طالما أضحكتني هذة الأغنية في دليل السذاجة والغرور المطلق

الطفل المصري أذكي أطفال العالم ..وده لية أن شاء الله من الأكل المضروب الي بياكله ولا جينات الأهل الخارقين

حضارة 3000 سنة...يا حلاوة أمال الضياع ده من أية

الي يشرب من مية النيل لازم يرجعلها تاني..طبعا علشان يتعالج أمال حيرجع لية

أنا بحب بلدي وبموت فيها فبلدي هي ذكرياتي وأهلي لكن كفاية قنعره وفشر بأه وخلونا نشوف شغلنا

الاثنين, أبريل 16, 2007

 
Blogger مُزمُز said...

مصر اصلا عمرها ما كانت أما الدنيا ولا فيه حاجة اسمها بلد أم الدنيا وأبو الدنيا والكلام الجعجعي العبيط ده

ده نوع من أنواع الشوفينية الفارغة

الاثنين, أبريل 16, 2007

 
Blogger أُكتب بالرصاص said...

اصبح لا خلاف على ذلك يا عزيزي

وانسحبت الريادة
وحلت البلادة

ومابقيناش لا قادة ولا حتى

قهوة سادة


وماتقولش ايه ادتنا مصر



اياك

الاثنين, أبريل 16, 2007

 
Blogger Tamer Nabil said...

اولاا حمدالله على السلامة

انا معاك فى كلامك مصر محتاجة للعمل والاخلاص فية مش الكلام عن الماضى والامجاد

ربنا يصلح الحال

تحياتى

الاثنين, أبريل 16, 2007

 
Blogger Rozza!.......فاقد الذاكرة said...

كلامك موزون
وهاي اول خطوة عشان الواحد يعرف هوا فين بالنسبة للباقي
عشان يبدأ يطور نفسه وبلده وغيره من الناس

الاثنين, أبريل 16, 2007

 
Blogger يا مراكبي said...

copa

أشكرك على سؤالك .. معلش إعذروني .. أصلي أغلب الوقت مسافر وبأشوف الإنترنت بالعافيه خطف كده

الإعلام طبعا سبب رئيسي في الحكاية دي بدون شك .. إعلام بيعمل على تغييب الشعب

الناس اللي وصلت لمستوى عالي هما اللي فعلا بدأوا من حيث إنتهى الآخرين .. لكن كان عندهم إخلاص من فوق لتحت

حلو موضوع الموتور ده .. هو إحنا لسة مش عارفين نعمل موتور؟

الاثنين, أبريل 16, 2007

 
Blogger Anima said...

مع احترامي لمصر و للمصريين
أنا كمان بشوف انكم عزلتم نفسكم عن العالم الخارجي

بس في مدونين ما شاء الله عليهم ابتدوا يحسوا بإنهم لازم يتغيروا و ده واضح في كتاباتهم

آسفة بس ده رأيي الشخصي و يمكن أكون غلطانة

الاثنين, أبريل 16, 2007

 
Blogger يا مراكبي said...

عمرو

البطالة مشكلة رهيبة طبعا لكنها نتيجة مشاكل رئيسية أكبر

ربنا يصلح الحال

أهلا بيك

الاثنين, أبريل 16, 2007

 
Blogger Memo said...

كام اشتغلت يا نيل في نحت الصخور
مليون بئونه وأَلف مليون هاتور
يا نيل أنا ابن حلال ومن خِلفتك
وليه صعيبه عليّ بس الأمور
عجبي!!
النخل في العالي والنيل ماشي طوالي
معكوسة فيه الصـور .. مقلوبة وانا مالي
يا ولاد أنا ف حالي زي النقش في العواميد
زي الهلال اللي فوق مدنة بنوها عبيد
وزي باقي العبيد باجري على عيالي
باجري وخطوي وئيد من تقل أحمالي
محنيه قامتي .. وهامتي كأن فيها حديد
وعينيا رمل العريش فيها وملح رشيد
لكني بافتحها زي اللي اتولدت من جديد

على اسم مصر

مصر .. التلات أحرف الساكنة اللي شاحنة ضجيج
زوم الهوا وطقش موج البحر لما يهيج
وعجيج حوافر خيول بتجر زغروطة
حزمة نغم صعب داخلة مسامعي مقروطة
في مسامي مضغوطه مع دمي لها تعاريج
ترع وقنوات سقت من جسمي كل نسيج
وجميع خيوط النسيج على نبرة مربوطة
أسمعها مهموسة والا أسمعها مشخوطة
شبكة رادار قلبي جوه ضلوعي مضبوطة

على اسم مصر

وترن من تاني نفس النبرة في وداني
ومؤشر الفرحة يتحرك في وجداني
وأغاني واحشاني باتذكرها ما لهاش عد
فيه شيء حصل أو بيحصل أوح يحصل جد
أو ربما الأمر حالة وجد واخداني
انا اللي ياما الهوى جابني ووداني
وكلام على لساني جاني لابد أقوله لحد
القمح ليه اسمه قمح اليوم وأمس وغد
ومصر يحرم عليها .. والجدال يشتد

اسم مصر التاريخ يقدر يقول ما شاء
انا مصر عندى احب واجمل الاشياء
بحبها وهية مالكة الارض شرق وغرب
وبحبها وهية مرمية جريحة حرب
بحبها بعنف وبرئة وعلى استحياء
واكرها والعن ابوها بعشق زى الداء
واسيبها واطفش فى درب وتبقى هى فى درب
وتنده تلاقينى جنبها فى الكرب

الاثنين, أبريل 16, 2007

 
Blogger يا مراكبي said...

Mohamed A. Ghaffar

طبعا أنا متأكد إنك تعرف حجمنا كويس لكن المشكلة في بقية العامة من الناس .. على حد معلوماتي: مش عارفين حاجه

أما موضوع محدش عايز يعمل حاجة .. فده موضوع تاني كبير هنتكلم فيه بعدين

الاثنين, أبريل 16, 2007

 
Blogger يا مراكبي said...

حسام مراد

ليه بتفكرنا بغربتنا فى مصر؟

هو ده الإحساس اللي جاني وخلاني أسافر .. لقيت نفسي غريب مع إني كنت لسه في مصر

ربنا يعدلها إن شاء الله

الاثنين, أبريل 16, 2007

 
Blogger يا مراكبي said...

Fares

حلو قوي الوزن والقافية دول .. وكلام مظبوط صحيح

الاثنين, أبريل 16, 2007

 
Blogger يا مراكبي said...

الوردة السوداء

نعمل إيه؟ أولا اللي يعرف المعلومة دي يقول للي ما يعرفش لحد ما الكل يعرف

ساعتها الكل هيشتغل في الإتجاه الصحيح .. كل الناس مش جزء من الناس

الاثنين, أبريل 16, 2007

 
Blogger يا مراكبي said...

david santos

You are always welcome, I have already sent the English translation to your e-mail address, I hope it will be ok.

Thank you very much

الاثنين, أبريل 16, 2007

 
Blogger kaed said...

عزيزى يا مراكبى
لا تبتئس
مصر مش أم الدنيا بس مصر فيها أحسن شباب فى الدنيا
دمت بخير

الاثنين, أبريل 16, 2007

 
Blogger أول مرة said...

تغلغل حب مصر في فؤادي فباديه مع الخافي يسير
تغلغل حيث لم يبلغ شراب
و لم يبلغ حزن و لا سرور
أكاد إذا ذكرت العهد منها
اطير لو أن إنسان يطير

* الشعر ده مش كلامي دامقتبس مع تعديل بس بصراحة ملقتش أجمل منه علشان أكتبه "

المشكله مش فيها المشكلة فينا إحنا إحنا إتعودنا إننا نرمي نتائج أفعالنا علي الأخرين

و طبعاً بالعقل كده أن سكان أمريكا ما صحوش الصبح لقوها بالشكل ده

الاثنين, أبريل 16, 2007

 
Blogger شــهــروزة said...

لاهو انت متعرفش؟؟؟

مش اللقب دة اتسحب مننا من زمان؟؟
مبقاش مذكور الا على شاشة القناة الاولى والتانية فى الزفتليون المصرى ودمتم
ولقب غير معترف به دوليا

بعد ما أم الدنيا
تاهت فى العشةائيات وانشغلت حاضر فى اخصاء عقول ابناءها والغرق فى بئر الجاهلية

أم الدنيا دخلت فى سن اليأس
بعد أن كانت عروس الأرض

تحياتى

الثلاثاء, أبريل 17, 2007

 
Blogger sosa said...

السلام عليكم ورحمة الله وبركاته
انا باحثة واقوم ببحث عن المدونات وحرية الراى
واتمنى تفاعلكم معى من اجل الوصول الى بعض القواعد والقوانين التى تساعد المدونين على نشر ارائهم بكل حرية
وبقيود دينية اخلاقية تمهد وتنير وصول الكتابات الحرة الجيده مباشرة الى المسئولين والى قلوب الناس
اتمنى مساعدتى فى ملأ استبيان به بعض الاسئلة الخفيفة
وانتظر ردكم بالموافقة على معاونتى على المدونة الخاصة بى
http://crazy-sosa.blogspot.com/
او على الايميل
sosa_444@yahoo.com
ارجو تفاعلكم والاهتمام بالامر لجديته واهميته الشديدة
سارة الاسكافى

الثلاثاء, أبريل 17, 2007

 
Blogger خمسة فضفضة said...

السلام عليكم ورحمة الله وبركاته

حاكية ام الدنيادي ، اعتقد انها من اختراعنا احنا المصريين ، كذبه كبيره كذبناها علي نفسنا وصدقناها للاسف
ومن يوميها واحنا كلنا معتمدين يعني علي اننا ولاد ام الدنيا الا ما حدش يقدر يكسر لينا كلمه ولا يعصي لنا امر ولا يقدر يتكبر ولا يعلي عننا

وعلي راي اللي قال :

اذا كانت مصر ام الدنيا..وبيحصل فيها كل ده فين ابوها يسال عنها حد يقد يقولى فين هذا الاب اللى مبيسالش عن اولاده وسيبهم بين حيص بيص...؟؟؟؟؟؟


شكرا ياباشمهندس احمد بتذكيرك لينا اننا ولاد ام الدنيا اللي واخدين الصفر المتين في كل حاجه



---------------------

حضرتك ليك تاج عندي ، ياريت لو وقتك يسمح تجاوب عليه

تحياتي

الثلاثاء, أبريل 17, 2007

 
Blogger يا مراكبي said...

Esmeralda

كلام مظبوط .. إحنا قاعدين نفتخر بحاجات قديمة جدا جدا ونسينا نعمل حاجة نفتخر بيها للحاضر والمستقبل

وفعلا أنا لمست إن الناس برة مشغولين بالحاضر والمستقبل ونادر منهماللييعرف عننا .. زي ماإنتي ما تعرفيش حاجة عن الإكوادور مثلا

وزي ما قلتي .. كفايانا حركة لورا بقى

الثلاثاء, أبريل 17, 2007

 
Blogger يا مراكبي said...

قصاقيص

أكيد مصر كانت حلوة قوي .. أناشفت آخرأيام الحلاوة دي وانا صغير

المهم دلوقت .. هنشوفها تاني حلوة ولا لأ؟ نفسي .. وشكله أمل بعيد

نورتي

الثلاثاء, أبريل 17, 2007

 
Blogger يا مراكبي said...

gohayna

زي ما قلتي .. ميعرفش النظره دي غير الي طلع بره مصر .. إلا من إطلع وسأل وعرف

أنا بحكم شغلي متابع جيد لحركة الإقتصاد الخليجي والصيني وشايف إيه اللي بيتعمل في الدنيا .. وإحنا لسة بنقول ما فايش لا قبلنا ولا بعدنا

عدم المعرفة = جهل

عدم المعرفة بأنك تجهل = جهل مركب

الثلاثاء, أبريل 17, 2007

 
Blogger يا مراكبي said...

Just a reader

تعليقك مهم جدا .. وخصوصا إنه هيخليني أوضح اللبس ده

موضوعنا هو عن تخلف الدولة المصرية بغض النظر عن مستوى تفوق أفرادها اللي إنت إتكلمت عنه

أنا معايا مجموهة كبيرة من المهندسين والرسامين المصريين وتفوقنا بالفعل على جنسيات أجنبية كتيرة

لكن الجنسيات دي كانت بتسأنا: إزاي تبقوا إنتوا على المستوى العالي ده بينما بلدكم ورا كتير؟

الكفاءات المصرية اللي بالخارج .. وأنا أعرف منهم كتير في دول عديدة .. لا خلاف عليها .. لكن ليس لهم تأثير يذكر في تقدم مصر لأنهم ببساطة ليسوا من أولي الأمر

وأولي الأمر مش من الكفاءات الي برة دي .. هي دي المعادلة بتاعة بلدنا

تحياتي الغالية ليك

الثلاثاء, أبريل 17, 2007

 
Blogger يا مراكبي said...

سكتم بكتم

ده إنت قلت كمية أمثلة كلها تحفه .. ف الجون بجد

وزي ما قلت .. كفاية أغاني وقنعرة كدابة .. وروحوا شوفوا دبي مثلا عملت إيه .. وقدامنا كام مائة سنة علشان نبقى زيها

مع إن ماعندهاش أي موارد من أي نوع ولا بترول ولا ناس حتى

الثلاثاء, أبريل 17, 2007

 
Blogger يا مراكبي said...

مزمز

حلوة قوي شوفينية دي .. بقى لي كتير قوي ما سمعتهاش

هي شوفينية دي يعني إيه؟

الثلاثاء, أبريل 17, 2007

 
Blogger يا مراكبي said...

أكتب بالرصاص

إيه إدتنا مصر؟

شوف بيعاملونا برة إزاي علشام إحنا مصريين وإنت تعرف

غيبة طويلة قوي امرة دي

الثلاثاء, أبريل 17, 2007

 
Blogger Hannoda said...

عمري ما صدقت انها ام الدنيا بس بالنسبة لي أم الدنيا

أمنا احنا؟؟.. آه
في نظرنا أم الدنيا .. آه
بس نقولها فسرنا عشان ما نضحكش حد علينا

بس لازم نقولها و نعيدها .. فسرنا.. لحد ما نشوفها بالشكل اللي يخلينا نعلي صوتنا

مصر فيها جمال عجيب يا مراكبي

أنا عمري ما سافرت.. غير لما جيت هنا قطر

ولما جيت هنا آمنت امنت بكلمات ما كنتش أعرفلها معنى

زي مية النيل و الهوا و طيبة الناس
عارف اللي بيضرب بالمطوة اللي بيحكي عنه عادل؟؟
حاتلاقي فيه طيبة
يوم ضرب بالمطوة ويوم بيعيط في حضن أمه زي الطفل

بس الكلام اللي بقوله ده ما يعلّيش دولة و يقدمها و لا يأخرها
بس يكبرها فقلب ناسها

ياريتنا نشوفها كبيرة وسط العالم زي كبرها فقلوبنا

الثلاثاء, أبريل 17, 2007

 
Blogger koukawy said...

انا لما سافرت فرنسا حسيت قد ايه بالجهل و السوقيه اللي احنا بقينا فيها
و افتكرت لما مامتي كانت بتقولي ان الشعب المصري ده كان من ارقي شعوب العالم و كان بيتسم بالأدب العالي و الأخلاق
راحت فين الحاجات دي
يا تري راحت بفعل فاعل و لا دي عوامل التعريه و تأثيرها؟

الثلاثاء, أبريل 17, 2007

 
Blogger 3lool said...

والنبي يامراكبي انا كنت معاك في كل كلمه لحد اخر سطر بقي وبقيت مش معاك

بلاش واحشاني ام الدنيا والكلام ده

تصدق بالله لو رحت مكتب التجنيد وشفت الناس اللي بتطلع تصريح سفر
ولا رحت مكتب هجره وشفت الناس اللي عاوزه تهاجر
ولا رحت امريكا وشفت المصريين اللي بتحفا علشان تاخد جنسيه امريكيه

هتعرف ان مش بقي فيه ام الدنيا ولا بتاع
ومش فيها حاجه عدله والله علشان توحشك او توحش حد

عاوز تقول عليا مش وطني يجوز

بس انا عن نفسي مش بقيت عاوز اسمع اي حاجه عن البلد دي حتي وانا جواها

ولا خيرها ولا شرها

ولا سياستها ولا اقتصادها

ولا اي حاجه

والله فيه ناس في البلد دي خساره فيها

الثلاثاء, أبريل 17, 2007

 
Anonymous Ghost said...

هزرنا كتير يامعلم طلبه
نتكلم بجد شويه

اكيد كلنا حانحب مصر بمنتهى الحماس
مصر مش حاتحبها عشان احسن واحده ف الدنيا

حاحتحبها عشان هى مصر
زى والدتك كدا

مش عشان شقرا او جميله
عشان مامتك
حب مينفعش يخضع لمنطق

تانى حاجه
اكيد اى شعب ف الدنيا جزء من ثقافته الاعتقاد انه احسن شعب ف كل الحضارات الانسانيه

زى حديث النبى عليه الصلاه والسلام اللى عن جنود مصر انهم خير جنود الارض
ف الهند برضه حتلاقيهم بيقولوا الرسول عليه الصلاه والسلام قال اننا خير جنود الارض

نفس الامر تلاقيه عند قبيله مسلمه ف مجاهل افريقى لسه ماتجاوزتش حاجز البدائيه

ثقافه الشعب الاسمى والارقى جزء من تكوين اى شعب ف الدنيا

يعنى مش احنا لوحدنا اللى بنضحك على نفسنا

وبعدين بأه حرام بجد لما تيجى تقيس مصر بدوله اوروبيه او حتى عربيه غنيه

واقتصاديا كمان؟؟؟؟؟؟؟؟؟

دول النفط صنيعه ثراء مفاجئ

والدول الغربيه تقدمها مش كله لاسباب اقتصاديه

مصر مظلومه

استعمار حلبها لما طلع دينها

نظام ابن متناكه برضو مطلع دين ابوها

انشطه البحث العلمى (التقدم الفكرى والعقلى والتكنولوجى مش الاقتصادى) عليه رقابه مريبه

حاتييجى انتا قاعد متنغنغ ف العز ف بلد خليجى

وتقعد تمارس هوايه التريقه على مصر

فاضى وعندك مدونه قاعد تبيض بيها علينا

ما علينا

كنت مره ف قعده ناس مفكرين فواحد بيقول
"الاستوديوهات ف قطر مصروف عليها الشىء الفلانى وببذخ غير محدود ، لكن اللى يضايقك انك تلاقى رغم المصاريف المهوله دى معندهمش ذوق ف التصميم وف حاجات بسيطه بس مؤثره" ـ
دكتور تانى رد عليه قاله "يعنى حايبقى عندهم فلوس وكمان عقل يادكتور" ـ

نياه نياه نياه

تاخذ سجاره ياجعفر

الثلاثاء, أبريل 17, 2007

 
Blogger وجع دماغ said...

مصر كمعنى مجرد كبلد دون الألتفاف الى الظروف تستحق أن تكون أم الدنيا وعندها من الأمكانات التى تؤهلها لذلك
والتاريخ أثبت أن هذا حدث مرات عديدة
الغلطة فى العادة غلطة أهلها
هم الذين قد يستخدموا تلك الأمكانيات لرفعتها ورفعتهم
او يرموا بها فى أسفل سافلين كما يحدث الأن

الثلاثاء, أبريل 17, 2007

 
Blogger david santos said...

My Mil adress is: david_santos_sjm@hotmail.com

WE GO TO CONTINUE TO EXCEED THE BARRIER OF THE LANGUAGE, SO THAT BUSH AND OTHER TERRORISTS NOT TO CONTINUE LIE

لقد أن تنتهي مع باري لغات منها بوش وغيره من الارهابيين لا تزال تكمن

الثلاثاء, أبريل 17, 2007

 
Blogger SaRa said...

مصر ام الدنيا

والعيب مش فيها

العيب على انت عارفة وكلنا عارفين

الثلاثاء, أبريل 17, 2007

 
Blogger No Fear said...

السلام عليكم
متشفش وحش
ده إحنا لسه داخلين علي أيام سودا
أنتم لسه شفتوا حاجة

الثلاثاء, أبريل 17, 2007

 
Blogger يا مراكبي said...

Tamer Nabil

الله يسلمك .. بس أنا لسة في امريكا على فكرة

تمام كده .. كفايانا الماضي وخلينا في المستقبل بقى

أهلا بيك

الثلاثاء, أبريل 17, 2007

 
Blogger يا مراكبي said...

Rozza!.......فاقد الذاكرة said...

ربنا يكرمك .. متشكر قوي

وفعلا . هي د أول خطوة على الطرق الصحيح .. الطوييييل

الثلاثاء, أبريل 17, 2007

 
Blogger يا مراكبي said...

Anima

لا خلاف على الحق ..و النقد البناء عمرة ما يزعل إلا المتعصبين اللي عندهم نقص إدراك

الكلام اللي قلتيه مظبوط .. والإعتراف بيه هو من مباديء النجاح بعد كدة

الثلاثاء, أبريل 17, 2007

 
Blogger يا مراكبي said...

Memo

إخنرني أحلى كلام لجاهين اللي بيلمس القلب من جوة قوي

أنا بأدمع بجد لما بأقرأ الكلام ده .. بجد مش هزار

لكن ياريت الشعر يعمل حاجة للبلد

بس برضه إخترتي أخلى كلام إتقال عن مصر

الثلاثاء, أبريل 17, 2007

 
Blogger يا مراكبي said...

kaed

أنا إتكلمت عن الموضوع ده في تعليقي على الزميل

Just a reader

وخو إن الكفاءات المصرية بالفعل رائعة لكن لا تتماشى تلك الكفاءات مع تخلف بلدهم الملحوظ

عموما فيه بوست جاي فيه كلام أكتر عن الموضوع ده إن شاء الله

تحياتي لك

الثلاثاء, أبريل 17, 2007

 
Blogger يا مراكبي said...

أول مرة

أهلا بيك أول مرة برضه

التعبير ده بجد رائع:المشكله مش فيها المشكلة فينا إحنا إحنا إتعودنا إننا نرمي نتائج أفعالنا علي الأخرين

أحييك عليه

أما أمريكا فدي حكايتها حكاية .. لكن خلينا في حاجة قريبة شوية .. دبي مثلا .. إمارة بلا ي موارد طبيعية في الأصل

نورتني

الثلاثاء, أبريل 17, 2007

 
Blogger يا مراكبي said...

شهروزة

هو اللقب إتسحب؟ هو إحنا كنا مصدقين اللقب ده بجد في العصر الحديث؟ ده إنتي بتاعة آثار وعارفة إمتى آخر مرة كان عندنا فيها اللقب ده

وبعدين الجاهلية كانت أحسن من دلوقت .. حتى في الجاهلية كان مجرد ضرب الستات عيب .. أم دلوقت فاللي بيحصل في ال .. وإلا بلاش ..
أنا ماليش في السياسة

الثلاثاء, أبريل 17, 2007

 
Blogger يا مراكبي said...

Sosa

أهلا بيكي ويسعدنا المشاركة طبعا

الثلاثاء, أبريل 17, 2007

 
Blogger محظوظة said...

مصر بلد الخير والخيرات

عايزة الامانة واللى يحافظ

الثلاثاء, أبريل 17, 2007

 
Blogger يا مراكبي said...

خمسة فضفضة

وعبكم السلام عليكم ورحمة الله وبركاته

هما لما إبتكروا حكاية ام الدنيا دي كانوا بيقصدوا إنها أول وأقدم حضارة على كوكب الأرض

لكن عجبني قوي موضوع أبو الدنيا ده الي سايب ولاده ومش سائل فيهم

أنا بأشكرك على التاج .. وأنا كدة بقى عندي تيجان كتيرة قوي من ناس بأعزهم كتير .. ربنا بقدرني وأرد عليهم كلهم

الثلاثاء, أبريل 17, 2007

 
Blogger يا مراكبي said...

Hannoda

أنا مقدر شعورك الطيب .. ده أمر مفروغ منه وأنا أفهمه كويس

لكن المهم زي ما قولتي . الكلام لا بيقدم ولا بيأخر

إنتظري بوست قادم في الطريق .. ليه علاقة بتعليقك

الثلاثاء, أبريل 17, 2007

 
Blogger يا مراكبي said...

koukawy

دي عوامل التعرية طبعا .. تعرية العقل والتفكير والأخلاق

الحيث عن الدول اللي سابقانا عايز مدونة لوحدها

ربنا ينفخ في صورتنا

الثلاثاء, أبريل 17, 2007

 
Blogger Sampateek said...

حب مصر بس لا اجؤ اني اصرح اني مصرية في اي مكان هنا في السعودية
و حتى في الاسواق بتكلم باللهجة السعودي
عارف ليه
لان المصرية هنا سمعتها مش كويسة
للاسف

بكتب الكلام ده و انا حزينة

ربنا يهدينا جميعا

الثلاثاء, أبريل 17, 2007

 
Blogger daktara said...

السلام عليكم
والله عندك حق
اول خطوة للتقدم هي نعرفة وضعنا الضئيل جدا وسط العالم
كان ليا موضوع سابق عن نفس الفكرة تقريبا
المهم اننا نحاول نتحرك
تحياتي
د. خالد عزب

الأربعاء, أبريل 18, 2007

 
Blogger The Groom said...


بلدنا لم تعد بلدنا أساسا

تحياتي لك من ماناساس البلد

ابقى سلملي على حولي عشان بحبها

:)

الأربعاء, أبريل 18, 2007

 
Blogger mohamed said...

مصر أم الدنيا اه بس للاسف الأم دى كبرت وعيالها اللى هما إحنا معملناش حاجه عشانها

الأربعاء, أبريل 18, 2007

 
Blogger yamen said...

تفتكر ان احنا لسه فاكرين اننا احسن ناس في الدنيا..

والله يا عزيزي انا شايف اننا مشكلتنا اننا ماشفناش ده..

لاننا لو كنا شايفين انا ناس كويسين كنا احترمنا نفسنا اكتر من كده وماكانش ده بقه حالنا..

احنا عندنا فعلا حاجات حلوة كتير بس احنا اللي مش عارفين نشوفها.. وانا مش هاكلمك عن الدنيا وامها والتاريخ والفراعنة والكلام الفاضي ده..

عندك مثلا مسالة الانتماءات الدينية والعرقية..مفيش دولة في العالم فيها القدر ده من الاستيعاب والتفاهم مابين اطيافها المختلفةزي عندنا في مصر..

مع كل الكلام الكتير اللي كل شوية بيتقال عن الفتنة و غيره..انما كلنا عارفين اننا في مصر لا عندنا فتنة ولا حاجة..

و مش بس دي..لا في حاجات تانية كتير..

بس ده مش معناه اننا احسن ناس..
انما ده معناه اننا نقدر نبقي احسن ناس في الدنيا لو امننا بنفسنا وبقدراتنا..

تحياتي ويارب ترجع بالسلامة

الخميس, أبريل 19, 2007

 
Blogger يا مراكبي said...

علول

ياااااااااه

ده إنت شايل منها قوي

لكن هيفضل حق لبلد وحق إخواننا اللي جواها إنا نقف جنبهم مهما كان

ياإما نتبرى منهم ونخلص .. وما حدش فينا يرضى بكده

الخميس, أبريل 19, 2007

 
Blogger يا مراكبي said...

Ghost

حأحضر بوست يوضح فكرتي أكتر من كده علشان يبقى أوضح

الخميس, أبريل 19, 2007

 
Blogger يا مراكبي said...

وجع دماغ

أهلا بيك في المدونة

صحيح إن مصر عندها من الإمكانيات ما يؤهلها أن تكون أم الدنيا

لكن هي مش كده دلوقت

وللي أنا اقصده إننا لازم نفهم إننا مش كده دلوقت .. علشان نشتغل كويس ونرجع كده تاني

نورت

الخميس, أبريل 19, 2007

 
Blogger يا مراكبي said...

david santos

I will write here the Arabic translation of your below statement:

"WE GO TO CONTINUE TO EXCEED THE BARRIER OF THE LANGUAGE, SO THAT BUSH AND OTHER TERRORISTS NOT TO CONTINUE LIE"

This means:

لابدان نستمر في تخطي حاجز اللغة حتى نمنع بوش والإرهابيين الأخرين من لكذب

الخميس, أبريل 19, 2007

 
Blogger يا مراكبي said...

Sara / White Angel

هو ده الكلام .. جوة لجول على طول

أنا نا قلتش حاجة .. غنتي اللي قولتي

أنا ما ليش في السياسة

الخميس, أبريل 19, 2007

 
Blogger يا مراكبي said...

No Fear

هو فيه أسود من كده كمان؟ ربنا يسترها مع لجميع

عموما خلي عندنا أم في لإصلاح .. بس ييجي قبل ما نموت

الخميس, أبريل 19, 2007

 
Blogger يا مراكبي said...

محظوظة

مصر طول عمرها فيها الخير .. هو فيه بلد بتتنهب آلاف السنين وتفضل عايشة؟

المهم إن خيرها ده يكون ليها

الخميس, أبريل 19, 2007

 
Blogger يا مراكبي said...

Sampateek

تعليقك ده محزن ومخزي جدا جدا

كتير بتحصلي حاجات بأحس بيها إن الجنسية لمصرية بتسبب لي مشاكل وبالذات لما أسافر دول تانية مع أجانب .. هما يخشوا على طول فيالمطار لكن انا لازم أتعب وآخد فيزا من السفارات .. إلخ من المواقف المشابهة كتير

الخميس, أبريل 19, 2007

 
Blogger يا مراكبي said...

daktara

بالظبط يا دكترة .. المهم إننا نتحرك بعد ما نعرف حجمنا .. مش نفضل واقفين

دايما منور

الخميس, أبريل 19, 2007

 
Blogger يا مراكبي said...

The Groom

حولي هي اللي بتسلم عليك .. لما ارجع هقولها

ههههههه

أهلا بيك .. بس فين ماتاتسا دي؟

الخميس, أبريل 19, 2007

 
Blogger يا مراكبي said...

mohamed

أهلا بيك

تصحيح: مصر كانت أم الدنيا

أولادها أغلبهم فعلا ما بيعملهاش حاجة .. للأسف

تحياتي

الخميس, أبريل 19, 2007

 
Blogger يا مراكبي said...

yamen

معاك كل الحق .. نقدر نبقي احسن ناس في الدنيا لو امننا بنفسنا وبقدراتنا زي ما قلت

ياريت كل الناس تفكر كده

متشكر على سؤالك .. وأهلا بيك دايما

الخميس, أبريل 19, 2007

 
Blogger دينا فهمي said...

على فكرة بجد إحنا مظلومين
للأسف الإعلام والتعليم المصري عندنا هم السبب في الفكرة اللي زرعوها فينا عن إن مصر أم الدنيا وكل حاجة فيها حلوة والناس لما بتيجي هنا مش عارفة بيحصل لهم ايه وحوارات كده كتير
احنا لما جيبنا الدش جيبناه متأخر نسبيا يعنى من حوالي تلات سنين
وكنا طبعا بنتفرج قبلها على برامج القناة التالتة الخنيقة
بجد اتصدمت لما شوفت ان في بلاد أحسن من مصر وأنظف من مصر وبجد مصر جنبها ولا حاجة
بجد قلت إحنا كان مضحوك علينا

الخميس, أبريل 19, 2007

 
Blogger كلام لوجيك said...

موضوعك جه على اكبر جرح فى صدر كل مصري
مش عارف أقولك ايه
احنا للاسف قعدنا نقول احنا الفراعنه واحنا الحضارة لغاية اما فقدنا الحاضر ومش عارفين مستقبلنا هيبقى شكله ايه
فضلنا عايشين فى ماضينا المزدهر وفرطنا فى يبل نهضتنا الحقيقية
لقد توقف بنا الزمن منذ وقت طويل ولم نراوح مكاننا حتى بتنا فى اخر القائمة بعد ان كنا فى اولها
والاصفار ستتكرر وتزيد طالما استمرينا على هذا المنوال
مصر ام الدنيا لكن مش ام المصريين
لا اريد ان اطيل لأن هذا الموضوع يحتاج الى صفحات وكتب وحواديت

ترجع بسلامة الله وطمنا عنك وهننتظرك بكل شوق
دمت بكل خير اخى الكريم

الخميس, أبريل 19, 2007

 
Blogger Rania said...

مساء الخير
انا جيت
ايه دة مفيش يعنى فرح اتعمل و لا ورد على الارض و لا بتاع
يلا مش مشكله
ازى الصحة كدة و ازى الحال
؟
طبعا فل و عال العال
المهم
مين قال لحضرتك اننا مش عرفين حجمنا الحقيقى
احتومال مكناش عارفين زمان
انما دلوقت و بفضل جهود الدوله المضنيه فى جعل الشعب يكره البلد
خلاص عرفنا و اتاكدنا اننا حجمنا قد كدة
طبعا محدش شايف انا بعمل ايه :))
ما علينا حجمنا صغير و جدا
و تقريبا فى خلال عشر سنوات محدش هيعترف بينا اصلا
بس بردة بنحبها و بنموت فى ترابها
ربنا قادر يغير من حالنا من الاسواء لاحسن

الخميس, أبريل 19, 2007

 
Blogger Ehab said...

المشكله مش ان احنا معتقدين ان احنا فاهمين كل حاجه
المشكله عم جاهين انجزها في كام كلمه صغيرين
علي اسم مصر
علي اسم مصر التاريخ يقدر يقول ما شاء
انا مصر عندي احب و اجمل الاشياء
باحبها و هي مالكه الارض شرق و غرب
و باحبها و هي مرميه جريحه حرب
باحبها بعنف و برقه و استحياء
و اكرها و العن ابوها بعشق زي الداء
و اسيبها و اطفش في درب و تبقي هي ف درب
و تلتفت تلاقيني جنبها في الكرب
و النبض ينفض عروقي بالف نغمه و ضرب
علي اسم مصر


بس
:)

الخميس, أبريل 19, 2007

 
Blogger سمسم said...

من زمان كدة كان وقع فى ايدى كتاب عنوانه " صحفي ضد الحكومة "
الحقيقة مش فاكر الكتاب راح فين وهو أنا قرايته ولا لأ
برضه مش فاكر .
المهم أنى فاكر العنوان وأظن العنوان وحده كفاية
بعيدا عن المقالات الممطوطة والعبارات الرنانة
نخش فى الموضوع بصوا يا سيدنا
من فترة كدة الجيش قرر يخش فى إنتاج الحديد
وقتها طبعا كان لابد من أنشاء مصنع
المصنع يتكلف مليارات
الجيش بالطبع هيستفيد منه، يبقى يتصرف عليه المليارات لأن المصنع هيجيب كتير
المهم تم بناء المصنع بحمد الله واستوردنا مقطعين حديد صلب تمن الواحد 100 مليون جنيه .
وتم بناء محطة خاصة للكهرباء بجوار المصنع لتشغيله .
ومحطة احتياطية
طب كدة الحديد هيرطرط ويملى السوق وده حلو خلى سعر الطن ينزل شوية
المصنع أتصرف عليه نصف مليار تقريبا بالأرض والمعدات
وجه ميعاد رفع السكينة
قائد محترم قوى من الجيش رايح يفتتح المصنع .
هوب كرسي فى الكلوب تليفون المحمول يرن .
سكينة الكهرباء اللى كانت هتترفع عشان المصنع يدور
بالتليفون نزلت
لصالح مين الكلام ده .
مش مشكلة
بعد فترة.
ياعالم ياهو إحنا جيش والمصنع أتصرف عليه ملايين .
التلفون يقول اشتغلوا حديد كريتال زوى مقاطع بيبان صاج أي حاجة.. غير كدة لأ .
المصنع يولع بالى فيه .
- طب مينفعش الآلآت للحديد الصلب .
- عدلوها ولعوا فيها لكن حديد صلب لأ
المهم يا أخونا مطولش عليكم ..
كثرة المحايلات لم تؤدى لنتيجة ونتيجة للخسارة تم عرض المصنع الآن للبيع .
المصنع فيه مقصين حديد بأكتر من200 مليون ومقام على أرض 20فدان
وفيه محطتين كهرباء اقل تكلفة فيهم 100 مليون جنيه غير باقى المكن والمعدات.
سعر المصنع دلوقتى أمام المستثمر اللى هيشتريه220مليون جنيه بأرضه بمبانيه .
والراجل هيخلص والمشكلة أنه برخصة المصنع هيسحب 200مليون جنية كقرض من البنوك يعنى المبلغ اللي دفعه
وبعد شهور هيبيع المصنع حتت ..وزوغلان على بلده وهى ده مصر يا ولاد مصر .

منقول

تحياتي

ويجعلوعاااااااااااااااااااااااامر

الجمعة, أبريل 20, 2007

 
Blogger مسلم said...

أنا عن نفسي دلوقتي في كوريا الجنوبيه

و أحب أقول لحضرتك إن قاعده الحمام هنا ديجيتال بزراير

كوريا.....منتهي الدقه و النظام و التقدم و الإحترام و الأدب

مصر

صفر علي عشره

مبارك

قصدي مبروك

الجمعة, أبريل 20, 2007

 
Blogger يا مراكبي said...

دينا فهمي

بلا شك إن الإعلام هو السبب الأول في الجهل الي إحنا فيه ده .. وزي ما قلتي بالظبط .. أول ما الناس جابت دش .. حصل صدمة حضارية بالنسبة لنا

نورتي

السبت, أبريل 21, 2007

 
Blogger يا مراكبي said...

كلام لوجيك

تعليقك وافي وناضج ومؤلم في نفس الوقت

معاك كل الحق في كل اللي قلته

أشكرك على سؤالك عني .. الله بسلمك إن شاء الله

السبت, أبريل 21, 2007

 
Blogger يا مراكبي said...

Rania


إزاي ما عملوش فرح لما جيتي؟ ده أنا موصي بتوع الزفة إنهم يتوصوا بيكي .. آه .. جايز علشان فرق التوقيت بيننا8 ساعات وكانوا نايميين لما جيتي

وبعدين أنا شايفك كويس وإنتي بتشاوري وتقولي حجمنا قد كده .. أنا شايف كل حاجة

هههههههه

منورة

السبت, أبريل 21, 2007

 
Blogger يا مراكبي said...

ehab

صح .. جاهين جاب كل عيوب البلد في القصيدة دي .. وبعدين قال إنه رغم كل ده بيحبها برضه

ليا واحد صاحبي معاه دكتوراة في كندا لما نزل مصر قال لي: زحمة زي ما هي .. مش منظمة زي ما هي .. بس بحبها زي ما هي

لكن ده مش كفاية ومش حل لتقدم البلد

نورت

السبت, أبريل 21, 2007

 
Blogger يا مراكبي said...

سمسم

أنا بقى أعرف كذا موضوع زي اللي إنت حكيت عنه ده وعشتهم بنفسي .. ومش منقولين عن حد ولا حاجه

آه .. خليني شايل في قلي وساكت

نورتني

السبت, أبريل 21, 2007

 
Blogger يا مراكبي said...

مسلم

ومبارك .. قصدي مبروك علينا كلنا

عموما كوريا كانت أفقر من مصر جدا في بدايات الخمسينيات وأعتقد إنهم افقر مننا أكتر بكتير زي ما إنت بتحكي عنها كده

هههههه

إنت فين في كوريا بالظبط؟

نورتني بجد

السبت, أبريل 21, 2007

 
Blogger الأباصيرى said...

أية دة؟؟؟

يعنى مصر مش أم الدنيا؟؟

يعنى مصر متبقاش أمى؟؟؟؟

يبقى احنا ولاد حرام
عااااااااااااا

ياعم انت فاهم المقولة دى غلط

مصر ام الدنيا عشان جيوش العالم كلها اغتصبتها
:)

يبقى بردة احنا طلعنا ولاد حرام
شفت إزاى
:(

الاثنين, أبريل 23, 2007

 
Blogger Sharm said...

بحبك يا مصر

حتى لو انتى مطلعة عيني

بحبك يا مصر

الأحد, أبريل 29, 2007

 
Blogger يا مراكبي said...

الأباصيري

لأ يا ياعم .. إحنا خير أجناد الأرض أو كما قال رسول الله صلى الله عليه وسلم

المشكلة في قيادة الجنود دي

الإدارة يعني


نورتنا هنا

الأحد, أبريل 29, 2007

 
Blogger يا مراكبي said...

Sharm

وأنا كمان

وعلشان كدة بنكتب الموضوعات دي .. من حبنا فيها

الأحد, أبريل 29, 2007

 
Blogger ايما من السعوديه said...

بس انا شايفتها أم الدنيا
فعلا مصر أم الدنيا
يكفي حضارتها العظيمه
وتاريخها
وطبيعتها
وعلمائها
احب مصر
احب حاراتها وزقهها القديمة
احب مرح أهلها الغلبان
احب قصصهم وحكاويهم
مايحدث في مصر لايتكرر في العالم
مصر نادره
مايحدث في مصر كالشمس كالقمر
لا ثاني له
لا احد يشبه الشعرواي
لا احد يشبه احمد شوقي
لا احد يشبه الغزالي
لا احد يشبه عبد الباسط عبد الصمد والقائمه تطول
لا احد يشبهه قراء مصر الافاضل
لا احد يشبه المنفلوطي
ولا احمد شوقي

بقدر ماخلفت من فن رائع خلفت علماء جبابره

مافائدة المال بدون روح مرحه تفرض نفسها رغم الالم والقهر والتعب
مصر فعلا أم الدنيا
أكن الاحترام والتقدير لاساتذاتي المصريين
تعلمت من البعض منهم قيما رائعه

لكن مصر ام الدنيا هجروها اهلها
هجرتها العقول الذهبيه للابد :(
اليابان افقر دوله اسيويه بثروتها
الان أغني دوله ،،
مصر أغني دوله عربيه وافريقيه بعلمائها

سوري
كنت هنااا
ووقعت بالصدفه على هذا الصفحه

تمنياتي ان تعود الى ام الدنيا سالما
يامراكبي

الأربعاء, أكتوبر 29, 2008

 
Blogger يا مراكبي said...

ايما من السعوديه

أولا أشكرك على زيارتك للموضوع القديم ده .. وبأشكرك كمان على تعليقك الراقي اللي فيه كل التقدير والإحترام للماضي المصري المشرف

لكن زي ما إنتي عارفه .. الماضي وحده لا يكفي بدون حاضر ومستقبل يكملون المسيرة

الوصول للقمة قد يكون صعبا .. لكن الحفاظ عليها هو دائما وأبدا الأصعب والأصعب

خالص تحياتي

الخميس, أكتوبر 30, 2008

 

إرسال تعليق

Links to this post:

إنشاء رابط

<< Home