شد القلوع يا مراكبي ... مافيش رجوع يا مراكبي

السبت، فبراير 02، 2008

كان ذلك عندما قرأت


أخذت قرارا جريئا بأنا تقتحم مكتبة زوجها لتنظفها .. خمس سنوات مرت وهو يمنعها من أن تحرك ورقة واحدة من تلك التلال التي تملأها .. لكن عدد الكتب وحجم الأوراق زاد عن الحد لدرجة تنذر بخطر شديد من وجود الحشرات والقوارض .. كان ولابد أن تنظف تلك المكتبة ولو بالقوة
.
إستغلت سفره لعدة أيام وبدأت في مهمتها الصعبة .. كانت مهمة غاية في القسوة .. لاحظت أن زوجها على إطلاع واسع بشتى فروع العلم والأدب والدين .. بل إنها وجدت كتبا تتحدث أيضا عن ممارسة الجنس .. ضحكت كثيرا عندما عرفت عنه ذلك .. وبينما هي ترتب وتنظم وتنظف .. وجدت ملفا كبيرا مكتوب عليه: مذكراتي .. تصفحته في فضول سطحي .. وجدت أن الأوراق تحمل تاريخا قديما .. يسبق سنوات زواجهما بكثير .. نظفت الملف بعناية وجلست على الأرض وقد بدأ الفضول يتملكها أكثر وأكثر
.
وقرأت: السنة الأولى بعد تخرجي من الجامعة .. أكان كل ذلك وهما؟ لقد كنا على إتفاق تام في كل الطباع .. يندر الزمان بأن أجد مثلها في مثل هذا التوافق .. وأنا متأكد أنها لن تجد من يتوافق معها مثلي .. كيف تركتني هكذا عند أول إختبار لحبنا؟ ألم يكن ما بيننا حبا أم وهما؟ أتتركيني هكذا وقلبي ينزف دمعا؟
.
ثم قرأت: السنة الرابعة بعد تخرجي من الجامعة .. مللت من كل تلك الضغوط التي تمارسها أسرتي علي لكي أتزوج .. قابلت فتيات كثيرات من كل نوع .. عبثا أن أجد من تتوافق معي كما كانت حبيبتي الأولى .. هل أستمر في البحث عنها أم أستسلم للحياة التقليدية؟ مللت الإنتظار .. ومللت البحث
.
وقرأت: السنة العاشرة بعد تخرجي من الجامعة.. أتزوج الآن كما تزوج أبي وجدي .. أتزوج لأنني لابد أن أتزوج .. لا أدري كيف شعور زوجتي هي أيضا الآن .. أخالها سعيدة بالزواج .. ولا أنكر بعضا من السعادة بداخلي أنا أيضا .. لكنها ليست متوافقة معي كحبيبتي الأولى .. وأنا لن أرهق نفسي بالبحث عن نسختها المستحيلة الوجود
.
ثم قرأت: السنة الحادية عشرة بعد تخرجي من الجامعة .. السنة الأولى بعد زواجي .. بيني وبين زوجتي حائط ضخم وطفلة صغيرة .. لا أستطيع تحطيم هذا الحائط .. والحائط يزداد علوا يوما بعد يوم .. ولا أستطيع أن أغادر المكان .. كائن ما يربطني بها ولا أريد أن أسبب له ألما في المستقبل
.
ثم قرأت: السنة الثالثة عشرة بعد تخرجي من الجامعة .. السنة الثالثة بعد زواجي .. زوجتي لم تشعر بعد بأن بيني وبينها حواجز كثيرة .. تلح علي في أن ننجب طفلا آخر .. لا أدري لما أتردد .. فالرابط بيننا موجود بالفعل .. هل ستقوى الروابط إذا زاد عدد الأطفال فيما بيننا؟ فلننجب طفلا آخر .. لن يغير ذلك من الأمر شيئا .. ولربما أزال ذلك الطفل بعضا من الحواجز
.
وقرأت: السنة الخامسة عشرة بعد تخرجي من الجامعة .. السنة الخامسة بعد زواجي .. لم تتغير حبيبتي القديمة رغم كل تلك السنوات الطويلة .. أرهقتنا الحياة ونحن متباعدان وأخيرا وجدنا أنفسنا من جديد .. ندمت حبيبتي كثيرا على أنها تركتني .. وأنا سامحتها لأنني لا أريد أن أفتقدها مرة أخرى .. لكن يكون هناك في العمر خمسة عشرة سنة أخرى كي نضيعها .. فلنستعيد كل ما فاتنا في الماضي إبتداء من الآن
.
قلبت الصفحة التالية .. وكتبت: السنة السادسة عشرة بعد تخرجي من الجامعة .. السنة الأولى بعد طلاقي
.

المجموعة القصصية الكاملة

التسميات:

59 Comments:

Blogger يا مراكبي said...

ملحوظة لغوية

الصحيح أن نقول "تخرج في الجامعة" وليس "تخرج من الجامعة" لكني أردت ألا أعقد المعنى على من لا يعلم تلك المعلومة اللغوية

السبت, فبراير 02, 2008

 
Blogger واحد مش فاهم حاجة said...

تفتكر ان سبب بعدة عنها
انها مكنش عندها فضول انها تعرف اسرارة اللى كان عاوز هو يخبيها

اعتقد لو كانت قربت شوية وكانت عندها فضول اكتر

كانت خدت مكان حبيبتة الاولى

الأحد, فبراير 03, 2008

 
Blogger إنـســـانـة said...

اولا يا بختك انت فى السعودية والنت عندكم مش قاطع

عااااااااااااااا


احم احم .. اما بالنسبة للقصة فرائعة كالعادة .. مصيبة بجد ان الواحد يكتب مذكراته او اسراره بمعنى اصح

هى ليها متعة انا عارفة بس بردو ممكن اوى تبقى خطر


تحياتى

الأحد, فبراير 03, 2008

 
Blogger fatima said...

يا عم مراكبى
هتزعلنى من بطل قصتك ليه..؟؟!!
دى قصة من الواقع و لا ايه؟؟
..بص ..أنا شخصبا عدى عليا الاحساس ده بالفعل ..بس لم يتعدى مجرد التمنى و دنيا الخيال..الأنسان الى تمنيته من الدنيا أتجوز واحدة تانية ..أنسانة تعرف عليها بشكل تقليدى ..بس الحمدلله هو سعيد ومستقر معاها وعنده ولدين..ربنا يخليهملو و يخلى مامتهم كمان..موش هبقى فشلت فى حياتى وهوه كمان ؟ حد فينا يكون سعيد طيب ...بس دا ميمنعش أنه ساكن فى قلبى وعمره ما طلع منه..أنا بعشق محمد فوزى لأنه مطربه المفضل وكل ما اسمعه و أشوفه بيفكرنى بيه..بس لو حصل و هو حب زى ما بتقول ام كلثوم..جددت حبك ليه .. طبعا قلبى هيرفرف مل الفرح ..بس هعمل زى زمان ما عملت ..هبعد عنه عشان ما سببش ليه الأذى ..
موش احطم حياته فى لحظة ..
طب يا أخى كان بطل قصتك يتجوزها على مراته..كانت الصدمة تبقى مخففة عل الغلبانة دى .. ..
قطعة جميلة وأنيقة ..
تحياتى و أعجابى

الأحد, فبراير 03, 2008

 
Blogger خمسة فضفضة said...

السلام عليكمورحمة الله وبركاته

جميله طبعا كالعاده

اعتقد انه لو حاول هو يقربها منه وياخد باديها ويعدوا سوا الحواجز دي كان مممكن اوي في مده قصيره جدا ان كل الحواجز اللي بينهم تدوب مع الزمن والعشره و حبه حبه يكبر الحب بينهم

بس للاسف هو كان عازل نفسه عنها او بمعني اصح دافن نفسه بين اطنان الكتب اللي كان مش بيسمحلها انها تقراها او حتي تنضفها
كان عايش علي ذكري الماضي وعنده امل انه يلاقي نسخه تانيه من حبيبتها اللي فقدها وده اللي وسع الهوه بينهم


احسن انه لقي حبيبته القديمه وعرف ان الصوره اللي في خياله ماكنتش صح ميه في الميه

الأحد, فبراير 03, 2008

 
Blogger لماضة said...

جمله يا مراكبى
بس الاحساس مؤلم جدا فيها
مش عارفه اعاطف معاه ولا معاها
مين فيهم المخطىء
طيب والعيال للى فى رقبتهم دى
:((

الأحد, فبراير 03, 2008

 
Blogger esraa said...

طب وهي ذنبها ايه؟

كل غلطها انها اتجوزت واحد كان بيحب واحده قبل ماتعرفه ب10 سنين

وانه ماقدرش ينسي الواحده دي ولا ادي نفسه الفرصه اصلا لأنه كان دايما بيدور علي شبيهه ليها

المشكله انه مايعرفش ان اللي يبيع مره يبيع 100 مره

الأحد, فبراير 03, 2008

 
Blogger mesh2dra said...

السلام عليكم

هو ماحاولش يقربها منه
ماحاولش يشركها ف الكتب اللي بيقراها
يحببها اصلا في القراءة عشان تبقى ليهم اهتمامات الي حد ما مشتركة
يجر رجليها للقراءة عن طريق مناقشتها.. استفزازها.. اى حاجة
يحاول مجرد محاولة

طب هو فضل فاكر حبيبته الاولانية
مش دي خيانة؟!!
مجرد التفكير ف حد تاني مش من نصيبك يبقى خيانة للطرف اللي انت مرتبط بيه
وبالتالي زوجته ما تزعلش عليه
لانه كان بيخونها فكريا

امممممممم
والسؤال اللي بيزق نفسه ناو
على كده بقى نسأل الاول الشحص اللي حنرتبط بيه
"هل حبيت قبلي؟"
ولو كانت اجابته آه يبقى اركن على جمب .... ماهو ايه اللي يضمنلي ان حبه القديم مش حيصحى تاني:D

وبما ان اصلا صعب انك تلاقي حد مبيحبش ولا حب قبل كده
انشاله حب في خياله
فبالتالي كلهم يركنوا على جمب
مالها القعدة مع ماما
ماله بيت بابا:D
ههههههههههههه

أسلوب حضرتك أكثر من رائع
ماشاء الله

سلاماتي

الأحد, فبراير 03, 2008

 
Blogger طهقان said...

شوف يا عم ماراكبي

اتجوز حبيبته ، اتجوز مراته .!..!. مش هاتفرق
لانه لو اتجوز حبيبته في الاخر برضه هاتبقى مراته!!!! فاهمني؟

يعني الخمستاشر سنة دول لم يخسر شيئا

انا أفضل هذه النهاية
على ان يتزوج حبيبته وبعدين يكتشف انها زيها زي اي ست،
بتاكل فص توم بالليل علشان الكرسترول، وبتحط في شعرها ابر وابور

تحياتي....!
وخد بالك....الشبكة مراقبة

الأحد, فبراير 03, 2008

 
Blogger mo'men mohamed said...

هههههههههه
بقالى كتير مدخلتش عندك
بس برده نفس الإسلوب الساخر اللى بحبه
جزاك الله كل خير
السلام عليكم

الأحد, فبراير 03, 2008

 
Blogger الساحرة said...

تفتكر لو كانت نظفت اوراقه من زمان كانت النهايه اتغيرت يمكن كانت قربت منه حاولت تكسر الحائط القصه حميله جدا تحياتي

الأحد, فبراير 03, 2008

 
Blogger عدى النهار said...

أنا شايف إنه راجل ماعندهوش إحساس كافى بالمسؤلية. يعنى هو مش المفروض إنه كان يتزوج وهو عارف إنه مشغول كليةً بواحدة أخرى. وبعد الزواج كل اللي شافه هو إن فى جدار كبير بينه وبين زوجته ، طب ماهو السبب.. لكن تفكيره فى نفسه فقط أعماه

الأحد, فبراير 03, 2008

 
Blogger No Fear said...

السلام عليكم
جامدة جدا بجد
جميلة قوي
تحياتي

الأحد, فبراير 03, 2008

 
Blogger hend...hanady said...

تصدق فعلا الواحد المفروض يقر على كل اللى فى الخليج عايشين ومهيصين بالنت واحنا الله اعلم بينا
المهم لو هو رجع فعلا لحبيبته هيصدم مش لانها اتغيرت لا بس لانه مهما كان حبه ومعرفته بها فهو معشرهاش ومقضاش معاها صعوبة الحياة وتدبير امور البيت والازمات المالية زى ما حصل مع زوجته وساعتها هيكتشف انه بيحب زوجته اكتر

الأحد, فبراير 03, 2008

 
Blogger Rivendell** said...

رررررررررررررررائعة وبشدة
مش قادرة احط ايدي على سبب معين لروعتها لكن احساسي العام بيها احساس باني اتكيفت تمااااما

ررائع

الأحد, فبراير 03, 2008

 
Blogger يا مراكبي said...

واحد مش فاهم حاجة

مش هو ده السبب المباشر طبعا في بعده عنها .. لكن زي ما إنت قلت .. هي كان لازم تقرب أكتر أو تكتشفه أكتر .. هي شكلها ما حسيتش بأي حاجة خالص طول السنين دي .. يعني عمرها ما كانت قريبة

منور



**********************


إنـســـانـة

قل أعوذ برب الفلق .. حتى النت .. يا ساتر

نيجي بقى للإحم إحم

كتابة المذكرات ضرورة للتنفيس وإلا الواحد يفرقع .. لكن في نفس الوقت بتطلع من الصدر الضيق للعالم الواسع .. فضايح يعني

خدي بالك بقى



********************


fatima

واقع إيه بس ما توديناش في داهية .. المدونة متراقبة من الحاجة مراتي

مش عارف أقولك إيه لما قولتي هنا إن الإحساس ده عدى عليكي .. وكمان تضحياتك بجد حاجة نادرة في العصر اللي إحنا فيه

وكمان حاجة مهمة .. إنتي قلتي في آخر التعليق إنه لو إتجوز حبيبته على مراته هيكون أخف من إنه يطلق مراته .. الموضوع ده محتاج مناقشة موسعة لأني أنا سمعت آراء مختلفة في النقطة دي تحديدا

أشكرك على الإطراء



*******************


خمسة فضفضة

وعليكم السلام ورحمة الله وبركاته

أنا معاكي تماما في إن بطل القصة كان لازم يبذل مجهود في كسر الحواجز اللي بينه وبين مراته .. لكن إيك رأيك في الزوجة اللي من النوع ده اللي مش حاسة إن فيه حواجز أصلا ولا كأن فيه حاجة؟

نورتي



*******************


لماضة

ليه السؤال الصعب ده .. نتعاطف معاه وألا معاها؟ .. أنا المؤلف ومش عارف

العيال بقى قصة تانية .. وجودهم لوحده ممكن يغير قراره أو قرارها .. بغض النظر عن شعورهم

في المستقبل إبقي خدي بالك وخلاص



********************


esraa

هي مش دي غلطتها بالظبط .. غلطتها إنها ما شعرتش بأحاسيسه اللي هو كتبها دي .. الزوجة الحقيقية هي اللي يكون إحساسها عالي وعندها الحواس السادسة والسابعة والعاشرة كمان

أما الشق الآخر للقصة وهو اللي إنتي قولتيه فهو صحيح جدا .. لو حد فيهم باع التاني مرة يبقى خلاص .. ممكن يبيع كمان وكمان وكمان

تحياتي



*******************


mesh2dra

وعليكم السلام ورحمة الله وبركاته

من أخطاء الزوج إنه فعلا ما حاولش يشركها في عالمه .. ولو إن القصة ما وضحتش إذا كان هو حاول فعلا المحاولة دي وألا لأ

نيجي بقى لسؤالك: مش دي خيانة فكرية؟ هنا بقى الناس ياما قالت في الموضوع ده .. وفي النهاية أنا أقدر أجزم ليكي إن مهما الإنسان حاول إنه يكون مخلص .. هيفشل فكريا .. وسبحان مقلب القلوب والأفئدة .. القلب وما يريد .. حتى ولو إستقامت الأفعال

وأخيرا بقى موضوع إختبار "حبيت قبلي" ده .. رغم طرافة الفكرة جدا جدا إلا إن الموضوع بجد مستحيل .. وإلا هتلاقي 99% من الشباب والشابات هيركنوا على جنب .. ومش ده الحل .. الحل هو إن الطرفين يحاولوا إنهم يقربوا من بعض وكل طرف منهم يجتهد في إنه يخلي التاني ينسى أي ماضي بسبب حلاوة الحاضر والمستقبل

خالص تحياتي



*******************


طهقان

حمد الله عالسلامة يا أخويا في الجهادية .. والله ليك وحشة كبيرة قوي

ياريت كل زوار المدونة ييجو يشوفوا الحكم الجامدة بتاعة الخبير الإستراتيجي طهقان

أي يوم هيتجوز فيه حبيبته هتبقى مراته .. ياسلام على الحكم الجامدة .. أفهم من كده إنهم يخلوهم حبايب أحسن .. صح؟ أنا معاك يا ريس .. أؤيد وأبايع

وبعدين إحنا ولا يهمنا شبكة متراقبة ولا حاجة .. إحنا جامدين جدا .. أي أي



*******************


mo'men mohamed

أهلا وسهلا .. نورتنا من تاني .. أشكرك على الإطراء

وجزاكم الله خيرا

وعليكم السلام ورحمة الله وبركاته



********************


الساحرة
ممكن آه وممكن لأ .. فيه ستات بتعرف المشكلة وما بتحاولش حلها وكأن ما فيش مشكلة أصلا .. وفيه ستات بتهتم

ياريت الكل يهتم ... والكلام ده بينطبق على الرجالة برضة



*********************


عدى النهار

إممم .. موضوع إنه يرفض الإنسياق لضغوط الزواج دي صحيح 100% لكن ضغوط مجتمعاتنا الشرقية تفوق الوصف .. الموضوع ده محتاج مقاومة + تفهم من المجتمع وتقبله للشخص .. الموضوع كبير بجد



******************


No Fear

وعليكم السلام ورحمة الله وبركاته

متشكر قوي يا محمد على الكلام الجميل ده .. منورني دايما



******************


hend...hanady

يا ساتر على القر .. أنا عايز أجيب عروسة ورق وأسخنها وأخرم عينيها بدبوس علشان الحسد

حاسس إن سقف المدونة هيقع

أنا معاكي إن بريق الحبيبة شيء وتفاصيل الحياة بصعوبتها شيء تاني .. وممكن لو عاش تفاصيل الحياة دي مع الحبيبة .. يكتشف فعلا إن زوجته برقبتها .. لأن الحياة وتفاصيلها اليومية مش حب وعشق وهيام وبس



*****************



Rivendell**

أنا اللي أشكرك على الإطراء ده والتقدير الجميل ده .. حقيقي شهادة أعتز بيها

أهلا وسهلا دايما

الأحد, فبراير 03, 2008

 
Blogger fatima said...

يا عم مركبى
انا ما ضحيتش ولا حاجة متكبرش الموضوع..انا انسحبت عشان محرجوش اكتر من كدا..حاجة كدا زى هشام سليم وسمية الألفى فى الراية البيضا وأوعى تقول ماشفتوش ..لما قالها انه هيبعد عشان يتقدم فى مستقبله ..لكن لو فضل معاها هتعقدله حياته بمشاكلها و عقدها..انا بقى مرضيتش استنى اللحظة دى تيجى مكونتش هتحملها منه قولت احافظ على برستيجى قدامه عشان نفضل أصدقاء و متحرمش فى وجودى فى محيطه....يعنى بيدى لا بيدى عمرو مل الأخر ...
اما موضوع يتجوزها مع احتفاظه بأم الاولاد ..فرغم صعوبته لكن بصفتى ست اقدر أقولك ان احتمال الزوجة خيانة زوجها ولو خيانة شرعية - جواز يعنى - فدا أرحم الف مرة من انه يهجرها ويطلقها ..لا يمكن لراجل انه يتخيل وقع ده بيبقى بشع اد ايه؟؟..جوزى يطلقنى عشان واحدة تانية ؟؟موش قادر حتى يسيبنى على ذمته برو عتب ولو حتى لخاطر الابناء ؟؟..دا بايع وخاين وأب مهمل ..و..و...
اخف الضررين تبقى الزوجة الأولى على مضض.. لو جوزى موش عاوزنى بعد كل العشرة..يبقى للدرجة دى أنا ست سيئة ؟؟
و بعدين ياعم مراكبى .. زى الأخ طهقان الى سيادتك بتتريأ على حكمه ما بيقول بس كلامه والله صح ..حبيبته الى قاعد يبكى عليها 15 سنة دى ..مجرد ما يحصل عليها ..من كل النواحى ..لأ هتبقى زى الأولانية ..بعد مدة يتعود ..ويمكن يمل ويتهرب منها ..ساعتها يندم ويرجع يدور على الغالية أم العيال الى صبرت واستحملت ..
يبقى تفضل على ذمته بقى و لأ ؟؟
تحياتى

الاثنين, فبراير 04, 2008

 
Blogger تخاريف خاصه! said...

جميله جدا...

تعاطفت معاها اوى...

الاثنين, فبراير 04, 2008

 
Blogger Gid-Do - جدو said...

المثلين دول يمكن يعبروا عن اللى حصل

Curiosity killed the cat
حب الاستطلاع مرض لانها كان المفروض متقراش المذكرات.

One man's meat is another man's poison

الطفاسة وحشة ـ تحياتى.

الاثنين, فبراير 04, 2008

 
Blogger خمسة فضفضة said...

السلام عليكم ورحمة الله وبركاته
مش معقوله ان يكون فيه حوتجز هو محسسها بوجودها وهي مش واخده باله

اكيد حاجه من الاتنين

يا اما هو اللي حاسس بالحواجز دي ومش مبين لها حاجه ، وهنا العيب يبقي عليه هو لانه عايش في وهم البحث عن الحبيبه ومش شايف غيرها قدامه لدرجة انه عاوز مراته تبقي نسخه منها ، و الحاله دي حتي لو الزوجه عملت ايه باللذي مش بيتقبله منها ودايما بيحملها ذنوب مالهاش يد فيها


او هي حاسه بيها بس مطنشه دوامة الحياه وتربيةالعيال والبيت وخدنها وفي الحاله دي بقي تبقي تستاهل اللي يجرالها لان بالرغم من انها عارفه بس ماخدتش موقف ايجابي ولا اي خطوات علشان تقرب منه وتكسر الحواجز دي


وراي ان الحاله الاولي بتبقي الارجح والاكثر انتشار لان مافيش زوجه ممكن انها تطنش عن حاجه زي دي ممكن تزلزل حياتها وتهد بيتها

الاثنين, فبراير 04, 2008

 
Anonymous Ahmed Maher said...

مش هقولك غير حرام عليك تعبتنى قصه تحفه جداً جداً شكراً ليك

الاثنين, فبراير 04, 2008

 
Blogger TAM said...

كان حقها تكتب كده

لانه مش تمام واللى سابته كمان مش تمام



فكرتها ممتازة

تحياتى

الاثنين, فبراير 04, 2008

 
Blogger barb michelen said...

Hello I just entered before I have to leave to the airport, it's been very nice to meet you, if you want here is the site I told you about where I type some stuff and make good money (I work from home): here it is

الثلاثاء, فبراير 05, 2008

 
Blogger أحمد سلامــة said...

يا عناوينك :)
جميلة وكان فيها من ريحة المفاجأة من أولها
جميل جدا اسلوب تغيير حرفي العطف و ، و ثم في بداية كل فقرة موزع تبادلي تقريبا بطريقة كاسرة لاي نوع من الملل التكراري لكلمة قرأت ودي عجبتني قوي
قفز بالسنين من سنة لأربعة لعشرة في اختزال المذكرات الخاصة بالحبيبة فقط واعتبر دي رخصة لاقدامه على جرمه ده لان حياته تقريبا كانت متلخصة في ذكراها
ماشاء الله عليك حلوة جدا يا باشمهندش

الثلاثاء, فبراير 05, 2008

 
Blogger Nsreen Bsunee said...

احمد يا قاضي ازيك الاول

بص فيه نقطه هو اتجوز حبيبته ولا لأ
لو ماتجوزهاش يبقي لازم يتجوزها هو للاسف ضحيه لمجتمع اجبره انه يتجوز لمجرد الجواز وهو مش غلطان ولا مراته غلطانه هو يتجوز حبيبته ويسيب لمراته حريه الاختيار بين الاستمرار او الطلاق وواضح انه انسان محترم محسسش مراته بحاجه كل السنين ديه وحاول يحافظ على البيت يبقي اكيد فى جميع الاحوال هو حيراعي ربنا فى مراته ام اولاده

تحياتى

الثلاثاء, فبراير 05, 2008

 
Blogger MKSARAT SAYED SAAD said...

ازدواجية
ازدواجية
من لا يرضي بالظلم لا يرضاه على غيرة
لم يتمكن من الخروج من اسر حبة القديم كيف يأسر قلب آخر ليس له ذنب
هل نسلم بضغوط الحياه كمبرر له هل نتوسم فيه الوفاء اعتقد اخر سطر هو خير جواب
تحياتي

الثلاثاء, فبراير 05, 2008

 
Blogger آلام وآمال said...

جميلة يا باشمهندس تسلم ايدك

وعجبني تعليق أحمد سلامة
فعلا اسلوبك ف الكتابة يخلي اللي يقرا ميحسش بالملل

تحيتي

الثلاثاء, فبراير 05, 2008

 
Blogger أُكتب بالرصاص said...

أه يا ماراكبي
انت جيت على الجرح


الله يخليك
اقعد على جنب
وخلينا قاعدين على جنب

وأهو ضل زوجة ولا ضل حبيبة

الثلاثاء, فبراير 05, 2008

 
Blogger نوراى said...

يا مراكبى

اية اخبارك

حلوة اوى اوى القصة ويبقى السوال

هل يجب الانتظار حتى لقاء الشخص الذى يماثل حبيبك الاول

ام نرتبط للتخلص من الم الوحدة وعدم الاستقرار

تحياتى الشديدة لكتباتك الرائعة

الثلاثاء, فبراير 05, 2008

 
Blogger اسلام رفاعى said...

الواحد كل ماييجى مدونتك يحس انه بيعمل دماغ يعنى مدونة بتكيف(بالعامية المصرية )
الله عليك يامراكبى

الثلاثاء, فبراير 05, 2008

 
Blogger maii bahaa said...

السلام عليكم

أنا جديدة في المنطقة هنا..جاية أمسي

وأسمحلي أمسك المدونة الحلوة دي من أول السطر وأرجع أعلق

والقصة اللطيفة دي مشجعاني أوي
بحييك جدا على فكرتها

ألف وارجع بأه
سلام :)

الثلاثاء, فبراير 05, 2008

 
Blogger sherehan84 said...

أحسن يستاهل .. رجالة ناقصة رباية :)
متألق كالعادة

الثلاثاء, فبراير 05, 2008

 
Blogger عندما ترهقنى الحياة said...

بالرغم من أنى مليش تجربة شخصية مشابهة..لكن..قصتك جرحتنى
احييك على الاسلوب اللي اخترقنى

الثلاثاء, فبراير 05, 2008

 
Blogger احمد الجيزاوى said...

بصراحه
المذكرات سلاح ذو حدين اذا كان لا يريد ان تعرف زوجته اسرار الماضى الذى يتنظر ان يجد من يحبه بطريقه مثلايه طيب كتب مذكراته له مكنش فى حسابه انى لو كتب معنى كدة نى هيكون فى من يقراء ومعنى كدة واحتمال كبير انى زوجته تكون هى من تقراء هذة المذكرات تحياتى لك
القصه اكثر من رائعه فعلا
احمد الجيزاوى

الأربعاء, فبراير 06, 2008

 
Blogger Esmeralda said...

لو مذكراته ان شالله وقعت فى ايدي حاقراها , اصله موضوع مش سهل يطنش يعني
يعني طلقها و فضل عليش معاها ؟؟؟؟؟
اكرم له مكانش اتجوزها اصلا لانه كده ظلمها هي,
هي ملهاش ذنب, اعتقد كل اللى كانت بتتمناه زوج يحبها و بيت مستقر و اولاد , مش ذنبها انه محبهاش او مقدرش

منتهي الرومانسيه الحب ده بس برضه بيبقي منتهي القسوة لما بيكون على حساب حد
كرهته و مفيش اي تعاطف

الأربعاء, فبراير 06, 2008

 
Blogger loumi said...

يا ابو حميييييييييد

إللي يحب بالطريقه دى
لازم ما يتجوزش
وإن إتجوز يحاول ينسى
عشان ما يظلمش حد
وإن ما عرفش يرمي نفسه
في المالح
ههههههههههههههههههههههههههه

تحياتي لك ولمكتبتك
:):):)

الأربعاء, فبراير 06, 2008

 
Blogger Hannoda said...

رائعة كالعادة يا مراكبي

مالاحظتش حاجة؟؟

كان دايما بيكتب عدد السنين اللي بعد تخرجه في الجامعة
يعني هو اعتبر حياته بدأت مع السنة الرابعة في الجامعة وبيعد عمره معاها

أو يمكن إعتبرها إنتهت عندها فبيسجل سنين موته

وواضح انه توقف عن التدوين عند السنة الخامسة عشر.. أما قابلها تاني

وده أكدلي انه كان بيعد سنين موته و انه توقف أما رجعتله الحياه
عشان كده مش حايهمه التدوين تاني ولا حايهمو دفتر مذكراتهأساسا بما فيه اللي اتكتب في الصفحة الأخيرة

الحب ده على قد ما هو جمييييل
على قد ما هو قاسي

الأربعاء, فبراير 06, 2008

 
Blogger يا مراكبي said...

fatima

للأسف ماشوفتش المسلسل ده .. لكن فهمت اللي تقصديه من تاني سطر .. ولو إني برضه شايف إنه إختيار صعب جدا

أما الجزء التاني من تعليقك والخاص بإن الزوجة ممكن تتحمل وجود زوجة تانية أفضل من طلاقها نهائيا فده رأي أنا بأيدك فيه تماما .. رغم إني إتناقشت مع ناس كتير – رجاة وستات - كان رأيها هو التعصب الأعمى للطلاق وخلاص .. أحييكي على تفهمك ده



******************


تخاريف خاصه!

متشكر جدا .. تعاطفك لوحدة ده دليل نجاح القصة



*******************


Gid-Do - جدو

أقول إيه بس .. جدو منبع الحكم كلها .. حتى باللغة الفرنسية .. تحية جامدة لجدو



********************


خمسة فضفضة

وعليكم السلام ورحمة الله وبركاته

إتكلمتي عن حالتين .. الحالة الأولى إنه هو لوحدة اللي حاسس بالحواجز اللي بينه وبين مراته دي .. ودي إستفضنا فيها قبل كده من خلال القصة

لكن الحالة التانية وهي الأخطر بقى .. وهي إن الزرجة تكون حاسة ومطنشة .. وهنا بقى بتبقى قمة اللامبالاه لو هي سابت الحالة كده دون علاج .. وإطمئنانها بإن كل شيء تحت السيطرة وفي حدود الأمان ده غير مبرر إطلاقا

خالص تحياتي



*******************


Ahmed Maher

متشكر جدا على إطراءك ده .. أهلا وسهلا بيك



*****************


TAM

إنت معانا وألا معاهم؟ ها؟

:-))

نورتنا



******************


barb michelen

I think it is the wrong blog



****************


أحمد سلامــة

أول ما شفت إسمك منور هنا وأنا توقعت إنك هتحلل القصة بالحرف والنقطة والكلمة واللي بين السطور كمان .. ده إنت ما سيبتش حاجة خالص

في الحقيقة مش لاقي كلام أقوله غير إني أشكرك جدا جدا .. بجد نورتني



*****************


Nsreen Bsunee

أهلا وسهلا .. أنا كويس والحمد لله

ده إيه الرأي الجريء جدا ده؟ أنا إتفاجئت بصراحة .. ومش معنى كده إنه رأي مؤيد للرجال ضد النساء .. لكن هو رأي بيقول إن الأفعال لازم تكون أبيض وأسود .. وبلاش اللون الرمادي .. يعني لازم نكون قاطعين في أمور حياتنا



******************


MKSARAT SAYED SAAD

في الحقيقة هما الإتنين ضحايا لمجتمعاتنا اللي ما بترحمش .. واللي إنت قولته ده محتاج مقاومة كبيرة جدا .. مقاومة للمجتمع كله



*******************


آلام وآمال

أنا بأشكرك وبأكرر شكري لأحمد سلامة

تعليقك ده شهادة ليا بجد وأعتز بيها



*******************


أُكتب بالرصاص

ضل زوجة ولا ضل حبيبة؟ المثل ده أنا سمعته قبل كده .. إنت قصدك إن فيه علاقة بين الزوجة والحيطة؟ ها؟ إعترف

شكلك شايل قوي




*****************


نوراى

أنا كويس والحمد لله .. متشكر قوي

سؤالك ده ما هو إلا صورة أخرى من موضوع أزلي .. وهو هل نستجيب لما يفرضه علينا مجتمعنا حتى لو بيدوس علينا إحنا .. وإلا نقاومة ونعيش منبوذين من وجهة نظر المجتمع ونكسب نفسنا قدام نفسنا إحنا بس؟

تحياتي



*********************


اسلام رفاعى

متشكر جدا جدا .. أنا كده أخاف نتمسك تعاطي في المدونة هنا

هههههه



*******************

الأربعاء, فبراير 06, 2008

 
Blogger يا مراكبي said...

maii bahaa

وعليكم السلام ورحمة الله وبركاته

نورتي المنطقة كلها .. والمدونة كلها تحت أمرك .. في إنتظارك من تاني



*****************


sherehan84

إنتي دايما كده ضدنا؟ ماشي

نورتينا بجد



******************


عندما ترهقنى الحياة

شهادتك دي وسام على صدري

نورتي .. وأهلا بيكي دايما



*******************


احمد الجيزاوى

بلا شك إن خروج الأسرار من القلوب إلى الورق سلاح ذو حدين .. فبرغم إنه بيفرغ الضغوط ويزيل جزء من الهموم إلا إن الأسرار بتبقى عرضة للنشر .. وزي ما إنت قلت .. الإحتمال الأول هو إن الزوجة تكون أول من يقرأ .. شفت المصيبة

تحياتي



*******************


Esmeralda

أكرم له إنه ما كانش إتجوزها أصلا .. ما هي المشكلة بتكمن هنا .. سواء للولد أو البنت .. المشكلة في مدى القدرة على مقاومة ضغوط المجتمع

أما الزوجة المسكينة .. فطبعا كانت طموحاتها عادية ومحدودة .. ماجاش في بالها ما هو أعمق من كده في الحياة .. مشكلة أغلب بنات الشرق

بالراحة عالرجالة شوية



*****************


loumi

والله كلامك حكم .. اللي يحب كده يبقى ما يتجوزش علشان ما يظلمش اللي هيتجوزها أو يظلم نفسه .. لكن لو قرر إنه يتجوز لأسباب ما .. يبقى ينسى حبيبته دي خالص برضه علشان ما يظلمش اللي هيتجوزها أو يظلم نفسه

إيه الأسفين اللي من تحت لتحت ده؟ إيه اللي جاب سيرة مكتبتي دلوقت؟ لازم يعني التلميح ده؟ ما إنتي عارفه إن المدونة متراقبة من الحاجة .. وإنتي ما ترضيليش الأذية .. وألا علشان هي بلدياتك؟



*****************


Hannoda

تعليقك ده جديد جدا من نوعه .. توقفت الحياة لما ساب حبيبته .. وعادت إليه الحياة لما رجع لحبيبته .. تصفيق حاد جدا ليكي

الحب جميل لكن بيخلي الواحد في قمة البهدلة . .كل اللي حبوا عرفوا كده

منورة بجد

الأربعاء, فبراير 06, 2008

 
Blogger امرأة تقول الذي لا يقال said...

بص يا باشمهندس أنا خايفة أقول إني مش فاهمة تقول عليا غبية بس أنا بجد مش فاهماها

الخميس, فبراير 07, 2008

 
Blogger Rania said...

بجد يا بشمهندس احمد
بوست ملوووووش حل
حلو قوى بجد
D:
تحياتى لك
على فكرة ليك عندى تاج بما انك الوحيد الى بين المدونين لسه مجوبتهوش

رانيا رضا مراسلتكم من امام شاشة التليفزيون بعد تقدم مصر بهدف واحد

الخميس, فبراير 07, 2008

 
Blogger sarah la tulipe rose said...

القصة اسلوبها جميل و جذاب جدا .من نظرة للمحتوي الفني قصة عالية الجودة..من نظرة انثوية بحتة بقي متغاظة من البطل بصراحة!..اصل مش ذنبها كونه مقدؤش يتخلص من ذكري الحب الاول و ليه محاولش هو يحتويها عشان يحتوي نفسه
اما لو نظنالها من وجهة نظر رجولية..فبرضه متغاظة!..هو كدة!
بس الاسلوب فعلا بيشد

الخميس, فبراير 07, 2008

 
Blogger يا مراكبي said...

امرأة تقول الذي لا يقال

دي قصة مش موضوع .. لقطة من الحياة مش أكتر ولا أقل

راجعيها تاني بس وكأنك بتتفرجي على فيلم وألا مسلسل



*******************


Rania

المراكبي مراسلكم من أمام التليفزيون بعد ما خلص الماتش 4 ل 1 بيشكرك على إطرائك الجميل ده .. وبعدين ليه الإحراج بتاع التاج ده؟ ده أنا عندي كدع 7 تيجان هيحمضوا على فكرة

نورتينا



********************


sarah la tulipe rose

وإحنا نيجي إيه جنب مؤلفة زيك فازت بجايزة من جوايز الساقية؟ إحنا بس بنحاول

أما بقى كونك إنك متغاظة من الإتنين فده من حقك .. المهم ما تتغاظيش من المؤلف كمان

ههههه

نورتي

الجمعة, فبراير 08, 2008

 
Blogger Rania said...

بشمهندس احمد
كتبت قصة كنت عايزاك تنقدها و تقولى رايك
بما انك غاوى احراجى
يلا بقى
ادباء و بيغيرروا من بعض
مفيش مشاكل D:
http://raniaotherfeelings.blogspot.com

الجمعة, فبراير 08, 2008

 
Blogger يا مراكبي said...

feelings

أشكرك على ثقتك في نقدي .. جاي حالا

الجمعة, فبراير 08, 2008

 
Blogger بنت القمر said...

لكل فعل رد فعل
يستاهل
يا مراكبي مش ملاحظ انك بتظلم نفسك كل ما حد يخش يعلق لازم يديك موقفه الاخلاقي تجاه البطل ولا البطله وبقينا بناقش سلوك مش كتابه ادبيه وصياغه
الحل ايه مش عارفه؟
تحياتي

الجمعة, فبراير 08, 2008

 
Blogger يا مراكبي said...

بنت القمر

سبحان الله .. أنا لسه كنت في حوار مع أحد الزملاء المدونين بخصوص نفس موضوع تعليقك ده

أنا من الحاجات اللي بتسعدني جدا إن كل واحد بيدخل ويقرأ هنا بيحس القصص من خلال تجربته ومنظورة الشخصي وفيه كمان ناس بتحس وكأني بأتكلم عنها على وجه الخصوص

يعني أحيانا كتير بأحس إننا إتجمعنا هنا في عيادة نفسية .. وأنا أول المرضى طبعا

عموما دي شهادة أعتز بيها منك ومن جميع الزملاء

وحمد الله على سلامتك

الجمعة, فبراير 08, 2008

 
Anonymous طهقانة said...

و بعد ان كتبت هذه السطور ذهبت الى المطبخ و جهزت الساطور و الاكياس البلاستيكية الفاخرة و انتظر المحروس بسلامته حتى وصل و قامت معه باحسن واجب يقوم بيه جزار نظيف في صباحية يوم عيد
و هكذا اعزائي كانت هذه نهاية كل من تسول له نفسه ان يكتب مذكراته



ازيك يا مراكبي عليا الطلاق وحشني

الأحد, فبراير 10, 2008

 
Blogger يا مراكبي said...

طهقانة هانم

يخرب بيت اللي يزعلك يا شيخة .. أنا مع صبي الجزار يا معلمة وكلامك هو اللي ماشي طبعا

ههههه

ليكي وحشة كبيرة بجد .. المدونات مضلمة من غيرك

الأحد, فبراير 10, 2008

 
Blogger حسن ارابيسك said...

بعد الدقيقة الأولى من قراءة البوست
لقيت ان فكرة البوست حلوة قوي
بعد الدقيقة الثانية من قراءة البوست
عرفت ان عندك مخزون كبير من الأفكار خيالية على حقيقية
بعد الدقيقة الثالثة من قراءة البوست
قلت ايه الرطل ده اللي يسيب اوراق كده مهمة لا يصح الاطلاع عليها الا بعد خمسه وعشرون سنة يحق الاطلاع عليها لأي شخص في العالم
بعد الدقيقة الرابعة عرفت ان اللي يعمل عاملة ويخيبيها لازم هايجي يوم وتنكشف وتبقى فضيحته بجلاجل
وبعد الدقيقة الخامسة من قراءة البوست
قلت الراجل ده مش غبي ولا حمار ده عرف ازاي يوصلها معلومة ان هو طلقها خلاص عشان كيت وكيت وكيت
وبعد الدقيقة السادسة من قراءة البوست
احب أقولك عشرة على عشرة..يامراكبي

الأحد, فبراير 10, 2008

 
Blogger يا مراكبي said...

حسن أرابيسك

أنا مش عارف أقولك إيه وألا إيه .. أنا عايز آخد التعليق ده وأوريه لكل الناس .. رأيك أصلا بيهمني جدا لأن فهمك للأمور بيدخل فيه العامل النفسي كمان وبالتالي بأحس إنك فعلا بتلقط اللي أنا أقصده تماما

أشكرك ألف شكر على الكلام الجميل ده .. بجد شهادة أتشرف بيها

الأحد, فبراير 10, 2008

 
Blogger loumi said...

بالصلاه على النبي
النهارده النت زي السكينه في الزبده
ههههههههههههههه
ودى عاشر مرة أدخل عشان أعلق

شوف يا سيدي

اللي يحب بالشكل ده
مش لازم يتجوز من أصله
عشان ما يظلمش بنات الناس والاولاد
الحب شىء جميل بس بيتكرر على مدى عمر الإنسان
وإللي يفضل حابس نفسه في صورة قديمه
ويفضل يدور عليها في كل إللي حواليه
حيتوه

اللهم إكفنا شر التوهان
تحياتي
إجابات ممتازة على التاج
:)

الاثنين, فبراير 11, 2008

 
Blogger loumi said...

معلش لخبطة النت يقا
أتاريني
علقت قبل كده وإنت رديت
بس ما فيش أسافين ولا حاجه
ده إنت قلبك إسود كده ليه
بلدياتي يا عم
هههههههههههههههه

الاثنين, فبراير 11, 2008

 
Blogger يا مراكبي said...

loumi

آمين .. أحسن التوهان ده وحش قوي .. وخصوصا في الحاجات دي .. علشان الناس بتتبهدل فيها جدا

إنتي ما جاوبتيش التاج إياه ده لسه؟

الاثنين, فبراير 11, 2008

 
Blogger lonlysmily said...

هو ضحى بحبه للبنت الاولى واتجوز علشان دا العادى بتاع البشر انه يتجوز
بس لو مش قادر ينسى الاولى يبقى حرام عليه انه يتجوز
مينفعش يبنى بيت بحب مزيف على اطلال حبه الاول

هو الغلطان مش حد تانى
هو غلط فى حقه وفى حق مراته
ظلمها اوى

الاثنين, فبراير 11, 2008

 
Blogger Bongo said...

السلام عليكم
مدونة متميزة

تحياتي

الاثنين, فبراير 11, 2008

 
Blogger يا مراكبي said...

lonlysmily

أنا معاكي في إنه غلط .. لكن مش هي دي المشكلة .. المشكلة هي في المجتمع اللي بيخليه يغلط الغلط ده من غير ما المجتمع يسميه غلط

هنا تكمن المشكلة



**********

Bongo

أهلا وسهلا بيكي .. نورتي

الأربعاء, فبراير 13, 2008

 
Blogger klmat said...

جميله جدا الجمال فى صدقها بتحصل
الحائط هو اللى وضعه لانه راغب فى نسخه
من حبيبته الظاهر انى حاقرأ المدونه
كلها حقيقى جديره بالقرأه
مابين الطور كثير
تحياتى

الجمعة, فبراير 15, 2008

 
Blogger يا مراكبي said...

Klmat

الدنيا فيها من الي أنا بأحكيه بجد .. وده فعلا بيحصل .. وبالذات إستحضار صورة الحبيبة القديمة ومحاولة تطبيقها على الزوجة .. وده طبعا حلم مستحيل تحقيقه

أهلا وسهلا بيكي .. المدونة كلها تحت أمرك .. ده شرف لينا

السبت, فبراير 16, 2008

 

إرسال تعليق

Links to this post:

إنشاء رابط

<< Home