شد القلوع يا مراكبي ... مافيش رجوع يا مراكبي

السبت، فبراير 09، 2008

التاج .. ياترى مين وراه؟

كنت أشرت من حوالي سنة في التدوينة دي إن موضوع التيجان ده موضوع غريب وغامض .. وساعتها قلت إن فيه إحتمال إن الحكومة هي اللي بتعمل التيجان دي علشان تشغل المدونين عن إنهم ينشروا أي مواضيع أخرى من نوعية الإتهامات الباطلة إياها بتاعتكوا دي
.
واللي بيخليني أشك في الموضوع أكتر وأكتر إن فيه تاج جه لكل الناس والظاهر إني أنا الوحيد اللي لسة ما جاوبتوش على حسب كلام العزيزة رانيا .. والتاج ده تحديدا بأحس منه كده إنه إستطلاع للرأي أو جس للنبض .. هو صحيح أنا هأجاوبه هنا في البوست ده .. لكني أحب أنوه إننا بجد جايز نكون بيتم إستدراجنا لمعرفة آراءنا وتوجهاتنا .. ولازم نكون على وعي أكتر من كده .. وهأسحب كلامي ده إذا طلع إن اللي قام بتأليف التاج ده هو مدون زميل .. والحاج إسماعيل طول عمره بيرجع في كلامة .. أما إذا ما ظهرش الشخص ده .. يبقى إحنا تم إستدراجنا يا جدعان
.
التاج بقى
.
هل توافق على حزف خانة الديانة من البطاقة الشخصية ؟
أيوة أوافق
ما رأيك فى المثليين ؟
رأيي من ناحية إيه بالظبط؟ السؤال كده ناقص
هل هى حرية شخصية ؟
فيه نوع منهم بيبقى مخلوق كده .. وفيه نوع تاني بيختار ده بمزاجه .. النوع الأول لا ينطبق عليه السؤال .. وبالنسبة للنوع التاني هأجاوب وأقول إنها حرية شخصية
هل توافق على الإعتراف بالمثليين ؟
لا يمكن أن نتجاهل وجودهم وندفن رؤسنا في الرمال
هل لديك أصدقاء من المثليين ؟
لأ
هل تعتقد بوجود إضطهاد للمسيحين فى مصر ؟
لو السؤال بيعني إضطهاد من قبل الدولة فالإجابة طبعا لأ
من هو الشخص الذى تختارة لرئاسة مصر؟
أحب أنا أقوم بالليلة دي .. منهى التواضع
أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟
مجموعة من أصدقائي ما تعرفوهومش ومنتشرين دلوقت في أنحاء المعمورة وتحديدا غربا وبيتميزوا بإنهم بيشتغلوا مخططين إستراتيجيين .. كل واحد في مجال تخصصه .. وده بيكون بناء على قواعد بيانات وإحصائيات وخلافه
هل توافق على مشاركة كل من : الإخوان المسلمين - الأقباط فى الحكم ؟
أيوة أوافق
فى رأيك الشخصى .. ما هى أفضل مدونة على بلوجر قمت بزيارتها ؟
لا توجد مدونة هي الأفضل .. المدونات الرائعة كتيرة جدا
للذكور فقط : أيهما تفضل كزوجة .. إمراءه عاملة ، أم ربة منزل ؟
السؤال ده غلط في غلط .. هو الواحد بيختار زوجة وألا بيشتري غسالة؟ الإنسانة اللي الواحد يحس إنها حلم حياته وفيها كل اللي يتمناه وما يقدرش يعيش من غيرها وعايز يعيش معاها عمره كله مش ممكن بعد كل ده يسيبها علشان هي بتشتغل وهو كان نفسه في ربة منزل مثلا
اذا تزوجت وأنجبت ولدين وبنتين .. أى الأسماء تحب أن تسمى ؟
بما إن الحاجة مراتي بتقول إني مارست ضدها كل أنواع الإضهاد لما جينا نسمي أطفالنا الثلاثة .. فأنا حبيت آخد رأيها في أسماء الأربع عيال الإفتراضيين دول .. هي إختارت: كريم وشادي وبتول وحلا .. ولا إسم منهم طبعا إخترته لأولادنا الحقيقيين على فكرة .. منتهى الديمقراطية
هل تعتقد أن توريث الحكم فى مصر . . سيتم فعلا أم لا ؟
نعم .. لكن بطريقة رسمية سليمة
فى رأيك الشخصى : ماهو أفضل إنجاز لحكومة مبارك ؟
حصول مصر على كأس أفريقيا كذا مرة على مدار ربع قرن وحصول أكتر من واحد على جايزة نوبل .. بلاش تعليقات سخيفة هنا
وما هو أسوأ عمل قامت به ؟
هنفرد مدونة خاصة للموضوع ده فيما بعد
ثم لمن تمرر هذا التاج ؟
أنا كنت آخر واحد خلاص .. والحاج إسماعيل دايما بيرجع في كلامة

التسميات:

42 Comments:

Blogger мσнη∂ιš said...

يا سلام على أفكارك يا بشمهندس
ربنا يخليك لمصر

السبت, فبراير 09, 2008

 
Blogger خمسة فضفضة said...

السلام عليكم ورحمة الله وبركاته

مبروك التاج ..بالشفا ان شاء الله

ههههههههههههه
اظاهر كده ان ابواسماعيل هايرجع في كلامه المره دي ، بس المره الجايه نعمل حسابنا ..لااا ممكن ابداااااااااااا

التاج ده ياباشمهندس تاليف احمد الصباغ صاحب مدونة خالو احمد الصباغ

http://ahmedelsabbagh.blogspot.com/

السبت, فبراير 09, 2008

 
Blogger عدى النهار said...

شيل الليلة يا عم لوحدك.. المهم مين اللي هايشيلك؟

أوافقك على فكرة إن بعض التاجات ممكن تكون مٌصممة لجس النبض الحقيقي للناس تجاه قضايا معينة

السبت, فبراير 09, 2008

 
Blogger Nsreen Bsunee said...

ايه ده ايه ده
انا الاسبوع ده بجد امى دعيالى فيه

نزلت اجازه

مصر كسبت الكاميرون وفوز مشرف كمان

واحمد القاضي جاوب على تاج

وكمان تعليقي عند احمد القاضي التعليق رقم اربعه

للللللووووووووووووووووولىيييييييي


انا دايما بابقي التعليق بعد التمانين اول مره الحقك فى الاول كده

طبعا اجابات هايله بس التاج اللى عمله خالو احمد الصباغ وهو اللى مررهوللى بس شكوكك وظنونك فى محلها ووارده جدا

تحياتى يا حضره الديكتاتور يعني خليت الحاجه تسمي اولادكم الافتراضيين اللى فى التاج

لا والنبي جيت على نفسك ليه ياراجل
:)

السبت, فبراير 09, 2008

 
Blogger Nsreen Bsunee said...

تصحيح
اقصد مصر كسبت كوديفوار
بس فال حلو انى قلت الكاميرون
خير باذن الله

السبت, فبراير 09, 2008

 
Blogger Gid-Do - جدو said...

ابوحميد

فكرتنى باول علاقة ليا مع التاج وافتكر ان التاج كان من تصميم ـ حلم سابقا ـ بثينة حاليا ـ وافتكرت انه استطلاع راى ـ زى اللى بتفلق منه فى امريكا ـ وكنت فاكر ان فية حد راح يستفاد من هذة الاراء ويشوف راى الناس قبل اتخاذ قرار معين ـ لكن اكتشفت انها تسلية ـ ان الاوان ان الدولة ممثلة فى الجامعات ومراكز جمع البيانات انها تستفيد من الكم الموجود من مدونين ومعلقين بدون مدونات انها تستطلع الراى فى المواضيع اللى تخص الناس زى مثلا خانة الديانة فى البطاقة ـ وطبعا لما المتخصص حيكتب الاسئلة حيكون فية طرق علمية لصياغة السؤال ولكل صيغة هدف معين ـ اتمنى ان دة يحصل ـ
====
وانا موافق انك تشيل الليلة بس على الله مغنيش بعدها ـ انا اللى استاهل كل اللى يجرالى .

السبت, فبراير 09, 2008

 
Blogger ض/خالد said...

ربما :)...
نظرية المؤامرة

السبت, فبراير 09, 2008

 
Blogger آلام وآمال said...

اجابات حضرتك مختلفة كتير عن اجابات التاج ده لحد دلوقت وجريئة كمان
بس بتمنى من حضرتك توضحلنا أكتر وجهة نظرك من حكاية حذف خانة الديانه دي

وبقية الاجابات بصراحة جميلة وعجبتني

السبت, فبراير 09, 2008

 
Blogger موجة said...

زاضح جدا يا باشمهندس
ان كامك في البداية كان له انعكاس واضح على اجاباتك من الشك في كون التاجات دي مجرد مقياس للرأي العام لفئة غير عادية و ذات وعيو ثقافة كافية و ايجابية و هيا فئة المدونين بدليل واحد فقط وهو انهم لم يخفوا آراتءهم في ادراج مكتبهم بل فضلوا نشرها بهذا الشكل
اجاباتك متحفظة قوي
اختلفنا في اجابات كتير زي ما ممكن تشوف عندي في البوست اللي قبل قبل الاخير اللي كان فيه اجابة التاج

خالص تحياتي
احمد

السبت, فبراير 09, 2008

 
Blogger Ahmed Al-Sabbagh said...

السلام عليكم

اشكرك على اهتمامك واجابتك للتاج

لانى فعلا كنت محتاج اعرف اراء مجموعة من صفوة المجتمع - وهما المدونين - فى الموضوعات المطروحة دى

بالمناسبة انا اللى واضع التاج ده

;)

يعنى مش التاج ده مش مدسوس ولا حاجة

هههههههه

تحياتى لك على اجاباتك القوية والجريئة

اخوك

أحمد الصباغ

السبت, فبراير 09, 2008

 
Blogger hend...hanady said...

من هو الشخص الذى تختارة لرئاسة مصر؟
أحب أنا أقوم بالليلة دي .. منهى التواضع
------------------------------
انت كده بتدخل فى منطقة خطرة بالتصريح ده احذر فهناك دائما من يراقب والعيش والحلاوة غلوا ومش هنعرف نزورك بيهم

الأحد, فبراير 10, 2008

 
Blogger mariamagdolen new said...

هوه التاج شديد بس انت رديت تمام

الأحد, فبراير 10, 2008

 
Blogger david santos said...

Congratulations Egypt!!!!!!!!!!

الأحد, فبراير 10, 2008

 
Blogger fatima said...

انا موش عارفة ايه موضوع التاج دا بالظبط يا عم مراكبى بس يعنى فاهمة طشاش انه عامل زى لعبة كرسى الاعتراف الى كنا بنلعبها زمان ايام الجامعة عشان تحصل بيها على اسرار اصدقائك بس بمقابل ..يعنى ابتزاز عاطفى تحت بند ان انتو الاتنين بتتبادلوا الاسرار و محدش احسن من حد ..
اجاباتك متوازنة ومتعقلة ..كعادتك ..دماغ كبيرة يعنى
انت نموذج للبنى ادم المصرى الحقيقى الى البلد دى بنيلها وبحرها وأرضها وناسها علموه السماحة والتعامل مع الآخر اى كان هو..
لأ دانت كمان واخد الكرم الحاتمى من جذورنا العربية و عايز تقوم باليلة وتشيلها أنت .يا سلاااااام!!
..بس خلى بالك لو اتمسكت أنا كنت ضدك على طول الخط ..هه..
شوفت ندالة ندالة يعنى
تحياتى و اعجابى

الأحد, فبراير 10, 2008

 
Blogger esraa said...

لأ اطمن يابشمهندس

التاج ده بتاع أحمد الصباغ

الحكومه دايما كده بريئه من افترائات الشعب

حرام عليكم

(:

الأحد, فبراير 10, 2008

 
Blogger حسن ارابيسك said...

تصدق انا مش عارف ايه موضوع التيجان
أولا أنا لاأفضلها وحتى مابعرفش بتيجي ازاي للواحد ولو جت مش هاجاوب على اي سؤال عشان مابحبش الأسئة الكتير وأحب أقولالحاجه وقت ما احب اقولها

على فكرة قد فاتني البوست اللي فات ولذلك لم أتواني أن اقرأة وقد علقت عليه هناك ولكن.....

الأحد, فبراير 10, 2008

 
Blogger الساحرة said...

بتحطوة نفسكو في مواقف بايخه اتفضل اعتذر للحكومه ههههه دايما مظلومه معاكو

الأحد, فبراير 10, 2008

 
Blogger يا مراكبي said...

мσнη∂ιš

متشكر يا هندسة .. تحب تآخد شوية أفكار كمان؟



******************


خمسة فضفضة

وعليكم السلام ورحمة الله وبركاته

ما قلتيش يادكتورة .. هو التاج بيتاخد قبل الأكل وألا بعده؟

وكويس إنه طلع تاج من مدون زميل .. الحمد لله .. والحاج إسماعيل بيرجع أهو في كلامه



********************


عدى النهار

إنت بس صوتلي في الإنتخابات وأنا هأروقكم كلكم

والحمد لله إن التاج ما طلعش مدسوس



*******************


Nsreen Bsunee

زيارتك دي ده شرف لينا يا فندم .. وبعدين أنا لازم أرد على التاج علشان ما نزعلش الناخبين .. دي إنتخابات رئاسية مش لعبة يعني

وبعدين إن شاء الله مصر هتكسب الكاميرون تاني .. يعني كسبنا الأصعب وهنخيب في الأسهل؟

أما بقى التاج فأنا بأحمد ربنا إنه ما طلعش مدسوس وجت سليمة

أما بقى موضوع الأولاد فأنا في قمة الديمقراطية مش ديكتاتور زي ما إنتي فاكرة .. ده أنا حتى قلت للحاجة مراتي على إختياراتي وما خبيتش عليها الأسماء



*****************

الاثنين, فبراير 11, 2008

 
Blogger يا مراكبي said...

Gid-Do - جدو

أنا معاك يا جدو .. لكن إحنا لسه بدري علينا عقبال ما الهيئات البحثية تستفيد من تجمع زي مجتمع المدونين أو حتى تحس بوجودهم وتأثيرهم أو آراءهم

وبعدين إنتخبني إنت بس يا جدو وأنا هأظبطك .. المهم معاك بطاقة إنتخابية مصرية؟



*****************


ض/خالد

طبعا لا تستبعد نظرية المؤامرة من أي حاجة .. أي حاجة



******************


آلام وآمال

أشكرك على إعجابك ده

بالنسبة لموضوع الديانة

أولا .. جميع التعاملات اللي بنتعامل فيها بالبطاقة الشخصية لا تحتاج لتعريف الديانة على الإطلاق .. ولا داعي لإختلاف طريقة المعاملة مع الناس بناء على خلفية دينية

ثانيا .. أنا لقيت إن كل المبررات اللي كانت في ردود الإخوة المدونين بتدور حوالين إحتمالات النصب والإحتيال وإختلاط الأنساب في الزواج ... إلخ .. وأنا شايف إن المخاوف دي كلها بتدل على شيء صعب حدوثة جدا إلا إذا كانت الناس بتتجوز مثلا من أول لقاء من غير سؤال وتعارف دقيق ولقاءات متعددة



*****************


موجة

ولو إني مش شايف إني كنت متحفظ قوي لكن الحقيقة أنا حاولت أجاوب على قد الأسئلة وما أخرجش بأي إسهاب خارج حدود السؤال

وعموما الإختلاف لا يفسد للود قضية



******************


Ahmed Al-Sabbagh

وعليكم السلام ورحمة الله وبركاته

هو إنت بقى اللي ورا الموضوع ده؟ طيب إفتكر كده إذا كان حد من الحكومة مررهولك ألا حاجة؟

ههههههه

عموما تاج جميل وأسئلة في الصميم

خالص تحياتي



*****************

الاثنين, فبراير 11, 2008

 
Blogger يا مراكبي said...

hend...hanady

إحنا في عصر ديمقراطي وأي حد مسموح ليه بإنه سرشح نفسه للرئاسة ..عادي

وأنا هو بأكتب التعليق ده من المعتقل .. عادي جدا



******************

mariamagdolen new

متشكر جدا أهلا وسهلا



******************


david santos

Thank you very much for your participation



*****************

الاثنين, فبراير 11, 2008

 
Blogger يا مراكبي said...

fatima

متشكر جدا على التعليق الجميل ده .. وعلى إطراءك اللي أعتز بيه ده

عموما في عالم التدوين ياما هتشوفي يجان كتييييرة قوي .. فيه منها الث وفيه منها السمين

أما عن الندالة .. أنا واخد على كده من زمان .. ده حتى صديق عمري اللي بقى ظابط في أمن الدولة قاللي يالفم المليان إنه ما يعرفنيش . .عادي جدا

نورتينا



*******************


esraa

أنا مع الحكومة .. بأعتذر للحكومة .. بأبوس راس الحكومة

قال تاج متلفق قال .. هو أنا اللي قلت كده؟ الحاج إسماعيل رجع في كلامه



*****************


حسن ارابيسك

أنا برضه زهقت من كتر التيجان المتداولة لدرجة بقت محتاجة لمدونة مخصوصة ليها

شفت تعليقك على القصة هناك .. حقيقي مش عارف أشكرك إزاي



******************


الساحرة

أكلتوا وشي كلكم .. إرحموا عزيز قزم ذل بقى

ما الحاج إسماعيل رجع في كلامه خلاص

هههههه

الاثنين, فبراير 11, 2008

 
Blogger Gid-Do - جدو said...

يااحمد

مبروك على مصر كلها الفوز بالكاس ـ وشوف لما بنحط دماغنا فى حاجة ونستغل امكانياتنا ومواهبنا بنوصل لفين ـ

يظهر انى حبتدى اعمل بطاقة انتخابية لو استمر الحال فى كل مؤسسة مصرية زى الحال مع الكورة ويكون عندنا فى كل موقع قيادى واحد زى حسن شحاتة

الاثنين, فبراير 11, 2008

 
Blogger Nsreen Bsunee said...

مبروووووووووووووووووووك يا احمد يا قاضي

لو كنت لسه فى الدوحه فا انا سمعت ان الدوحه مصهلله وكلها احتفالات يارب تكون هيصت انت وكل العيله واتبسطو كان يوم حلو على كل المصريين الحمدلله
حسن شحاته معلم كبيييييييييييييير

الاثنين, فبراير 11, 2008

 
Blogger Rania said...

ماشى يا بشمهندس احمد
نجاملك فى الافراح باذن الله
و مبروووك لمصر
و على فكرة موضوع رئيس مصر
رشح نفسك انت يا بشمهندس
و كلنا ورااااك
و اخترناك اخترنااااااااك
:))
تحياتى

الاثنين, فبراير 11, 2008

 
Blogger يا مراكبي said...

Gid-Do - جدو

الله يبارك فيك ياجدو .. مبروك لينا كلنا

سبب إنهيار أي دولة أوتوماتيكيا هو وضع الناس الغير أكفاء في مواقع القيادة .. والعكس تماما لو فعلا عندنا في كل موقع قيادي واحد زي حسن شحاتة

وده اللي أنا ناوي أعمله فعلا لما هأبقى رئيس إن شاء الله .. وده اللي بأنفذه فعلا في شغلي بجد وجد



*******************


Nsreen Bsunee

الله يبارك فيكي .. مبروك علينا كلنا .. الف مبروك

أنا في جده مش في الدوجة على فكرة .. لكن الأفراح هنا نفسها .. المصريين هما المصريين حتى لو في أمريكا

إنتي أول واحدة قولتي إننا هنفوز على الكاميرون .. كان فأل كويس



***************


Rania

الله يبارك فيكي

أيوة كده خليكي معايا إنتي وأهل الدايرة في إنتخابات الرئاسة دي وأنا هأبسطكم جامد .. الحاج إسماعيل لا يمكن يرجع في كلامه

الاثنين, فبراير 11, 2008

 
Blogger hana said...

دة ايه التاج الجامد دة
بجد عجيبتنى اوى ردودك الجريئة
والقوية على الاسئلة

كل الود

الاثنين, فبراير 11, 2008

 
Blogger محمد فوزي آل ربيع said...

يبدو إن هيكون في خلاف على السيادة هنا
أنا كمان من موقعي هذا في المكتبة، أطالب بترشيحي أمين لجنة السياسات للحزب اللي هتعمله، جمال أحسن مني ف إية؟

بالنسبة للجكومة ف لا أعتقد إنهم وصلوا للدرجة دي من حسن التصرف و الإنفتاح و استخدام الموارد الجديدة لأن دول لحد دلوقتي آخرهم الحكومة الإلكترونية و بوابة التعليم على الإنترنت، شغل مراقبة النشاط السياسي على الإنترنت دا مش من مهام الدولة لسة، هو حالياً شغل المحامين الفاضيين

الاثنين, فبراير 11, 2008

 
Blogger امرأة تقول الذي لا يقال said...

أنا بأه اول مرة أشوف التاج ده على فكرة ((:

الاثنين, فبراير 11, 2008

 
Blogger Rozza!.......فاقد الذاكرة said...

اهم حاجة لفتت انتباهي "هو الواحد بيختار زوجة ولا بيشتري غسالة؟"

اتوقع ان الواحد المفروض يتحضر شوية ويتذكر اننا بشر من مسلمين ومسيحية
وانا بشجع شيل الديانة من البطاقة الشخصية.

الاثنين, فبراير 11, 2008

 
Blogger dr.Roufy said...

اجابات..محدددة
ومميزة

تحياتي

الثلاثاء, فبراير 12, 2008

 
Blogger يا مراكبي said...

hana

متشكر قوي على الإطراء ده .. منورانا دايما



********************


محمد فوزي آل ربيع

جمال أحسن منك طبعا .. عندك إعتراض؟

وبعدين إنت شكلك كده مش مدي جهاز الشرطة حقه .. اللي لازم تعرفه إنهم مراقبين كل حاجة عالإنترنت وكله .. وحتى بالأمارة .. فيه بوكس مستنيك تحت من الإنتربول



*******************


امرأة تقول الذي لا يقال

طيب مادام ماجالكيش التاج ده يبقى إحمدي ربنا .. الحاجات دي بتتحسد

هههههه



*****************


Rozza!.......فاقد الذاكرة

في الحقيقة وحسب خبرتي في مجتمعاتنا .. الواحد بيشتري غسالة

متشكر على تشجيعك لآرائي



*******************


dr.Roufy

أشكرك جدا .. أهلا بيكي

الثلاثاء, فبراير 12, 2008

 
Blogger maii bahaa said...

لأ يابشمهندس كده حضرتك بتزاحمني

فيها إيه لو جربنا ست تمسك الحكم؟ أنا ممكن أشيل الليله دي...والوزارة كلها ستات برضه

وهاتشوفوا أحلى شغل...جربونا بس
وشوفوا

النساء قادمات
:)

الأربعاء, فبراير 13, 2008

 
Blogger نـــــــور said...

بجد اجابات قوية وجريئة وغير متوقعة!!

انا عديت على اجابات مدونين كثر بس اجاباتك متميزة بينهم ..

وعلى فكرة انا لسة ماجاوبتش عليه :)
ومش ناوية :)

تحياتي لك يا باشمهندسنا .. ووجهة نظر حلوة في موضوع التاجات دا

الأربعاء, فبراير 13, 2008

 
Blogger دوحة said...

اه فعلا جس نبض يامعلم
انا بعتقد كدة برضه
ماعلينا
افضل انجاز برضه انت نسيته الصعود لكاس العالم سنة تسعين
انت نسيت ولا ايه
سلام ياريس

الأربعاء, فبراير 13, 2008

 
Blogger أحمد سلامــة said...

بردو اتورطت وجاوبت التاج
انا مقموص مني كتير بسبب موضوع التاج ده بس لسه كدخلش دماغي
اعتقد تبقى الفكرة الذ لو كل واحد يألف تاجو بمزاجو
شفت تاجو بمزاجو دي
حتة شعر بقى
:)
اجوبتك غير مفاجأة طبعا لأن شخصيتك ظاهرة من كتاباتك جدا يا باشمهندس
ادام الله عليك نعمة العقل

الخميس, فبراير 14, 2008

 
Blogger يا مراكبي said...

maii bahaa

لا يمكن .. على جثتي .. يعني أول ما كرسي الرئاسة يفضى .. ما ألحقش أتمتع بيه انا وأحفادي؟

شوفيلك بلد تانية تحكميها .. أنا أحكمت قبضتي خلاص

هههههه



*******************


نـــــــور

متشكر جدا على الكلام الجميل ده وعلى التقدير ده

أحسن إنك هتهربي من التاج .. أنا عايز أدشن حملة ضد التيجان .. إبقي إشتركي معايا فيها



*******************


دوحة

كأس العالم .. كأس العالم .. مش عارف سمعت الإسم ده قبل كده فين؟ أيوة إفتكرت .. وكمان أحب أضيف من ضمن الإنجازات وصولنا لكأس العام ده سنة أربعة وخمسين



*******************


أحمد سلامــة

أنا متضامن معاك .. وكمان بأقترح إن كل واحد يطنش تاجو بمزاجو برضة

شعراء زي بعض بقى

هههههههه

متشكر جدا على تقديرك ليا ده

الخميس, فبراير 14, 2008

 
Blogger احمد الجيزاوى said...

احب اعرفك بس انى اى عامل التاج دة
الرائد احمد الصباغ فخلى بالك
هههههههههههههههههههههه
لا متخفش موضوع التجات والحكومه تبستطلع الراى لا هى عندة حجات اكتر من كدة بس دة اصل التاج كان بيعمله المدونين فى فرنسا من اجل ان يعرف كل مدون مين يتفق معه فى افكارة ويتقرب منه ويكونه جماعات ضعظ

دة حاجه بخصوص الاجابات انا مختلف معاك بنسبه 100 % لانى خانه الديانه محتجنه من اجل اسقرار المعاملات على الاقال الزواج
اما الشواذ كل العالم بيعتبرهم مرضه احنا اى هنيجى نديهم اعتراف بمعصيه عندما تتعارض الحريه الشخصيه مع اوامر خالق الشخص والحريه نفسه لا ناخز طبعا امر الله الذى خلق هذا الشخص وخلق له حريته التى يتكلم عنه وهو اعلم بها
احمد الجيزاوى

الخميس, فبراير 14, 2008

 
Blogger بيجاسوس المصرى said...

اولا شكرا يا باشمهندس على زيارتك الدائمة لمدونتى رغم تقصيرى على المتابعة

بجد شكرا لحضرتك جدا جدا

و اجاباتك بسم الله ما شاء الله

محددة و صريحة

ابقى طمنا عليك بخير دايما

الخميس, فبراير 14, 2008

 
Blogger اعشق فى اليل ضوء القمر said...

انت معانا ولا معاهم
انت مع مين بالضبط
إجابات نموذجيه مع بعض التحفظ على بعض الإجابات
دايما بتعجبنى ارائك
لكن

الخميس, فبراير 14, 2008

 
Blogger يا مراكبي said...

احمد الجيزاوى

ليه بس كده؟ ده أنا قلت إنك إنت المحامي الوحيد اللي أعرفه وما دام مدون زميل يبقى ممكن يدافع عني ويطلعني من المعتقل

أنا طبعا لفت نظري عند أكتر من واحد موضوع أهمية خانة الديانة في البطاقة الشخصية علشان الزواج .. طيب هو من المعقول إن فيه عريس هييجي لواحدة ونلاقي أهلها ما يسألوش عنه كويس لدرجة إنه ممكن يكون من ديانة مخلفة وهما ما يعرفوش؟ إحتمال مستبعد جدا

أما الشواذ .. ياريت تقولي إنت إيه الحل اللي تقترحه؟ نقلتهم جميعا؟ لا نتعامل معاهم في بيع وشراء لحد ما يموتوا من الجوع؟

وعموما .. الخلاف لا يفسد للود قضيه .. مادام إنت المحامي اللي هتدافع عني



*******************


بيجاسوس المصرى

لا شكر على واجب .. بس إنت لسه مصر إنك تغيب كتير في كل مرة

منورني دايما وبأسعد بيك دايما



*******************


اعشق فى اليل ضوء القمر

أنا مع اللي هينتخبني

هههههه

إيه بقى اللي بعد لكن؟ قول ما تتكسفش

الجمعة, فبراير 15, 2008

 
Blogger klmat said...

حققى اجابات جميله ومميزه
بس حته الانجازات ...خلاص علشان ماكونش سخيفه

الجمعة, فبراير 15, 2008

 
Blogger يا مراكبي said...

Klmat

إيه؟ كنتي هتقولي إيه؟ شكلك كده كنتي هتلخبطي في الكلام وتعيبي على الإنجازات

المدونة متراقبة . .أنا بأحذر أهو

هههههه

السبت, فبراير 16, 2008

 

إرسال تعليق

Links to this post:

إنشاء رابط

<< Home