التاج .. ياترى مين وراه؟

كنت أشرت من حوالي سنة في التدوينة دي إن موضوع التيجان ده موضوع غريب وغامض .. وساعتها قلت إن فيه إحتمال إن الحكومة هي اللي بتعمل التيجان دي علشان تشغل المدونين عن إنهم ينشروا أي مواضيع أخرى من نوعية الإتهامات الباطلة إياها بتاعتكوا دي

.

واللي بيخليني أشك في الموضوع أكتر وأكتر إن فيه تاج جه لكل الناس والظاهر إني أنا الوحيد اللي لسة ما جاوبتوش على حسب كلام العزيزة رانيا .. والتاج ده تحديدا بأحس منه كده إنه إستطلاع للرأي أو جس للنبض .. هو صحيح أنا هأجاوبه هنا في البوست ده .. لكني أحب أنوه إننا بجد جايز نكون بيتم إستدراجنا لمعرفة آراءنا وتوجهاتنا .. ولازم نكون على وعي أكتر من كده .. وهأسحب كلامي ده إذا طلع إن اللي قام بتأليف التاج ده هو مدون زميل .. والحاج إسماعيل طول عمره بيرجع في كلامة .. أما إذا ما ظهرش الشخص ده .. يبقى إحنا تم إستدراجنا يا جدعان
.
التاج بقى
.
هل توافق على حزف خانة الديانة من البطاقة الشخصية ؟
أيوة أوافق
ما رأيك فى المثليين ؟
رأيي من ناحية إيه بالظبط؟ السؤال كده ناقص
هل هى حرية شخصية ؟
فيه نوع منهم بيبقى مخلوق كده .. وفيه نوع تاني بيختار ده بمزاجه .. النوع الأول لا ينطبق عليه السؤال .. وبالنسبة للنوع التاني هأجاوب وأقول إنها حرية شخصية
هل توافق على الإعتراف بالمثليين ؟
لا يمكن أن نتجاهل وجودهم وندفن رؤسنا في الرمال
هل لديك أصدقاء من المثليين ؟
لأ
هل تعتقد بوجود إضطهاد للمسيحين فى مصر ؟
لو السؤال بيعني إضطهاد من قبل الدولة فالإجابة طبعا لأ
من هو الشخص الذى تختارة لرئاسة مصر؟
أحب أنا أقوم بالليلة دي .. منهى التواضع
أذا قمت بتأسيس حزب سياسى .. من هم الأشخاص الذين ستقوم بضمهم فى الحزب ليشاركوك فى حكم مصر حال فوزك فى الإنتخابات ؟
مجموعة من أصدقائي ما تعرفوهومش ومنتشرين دلوقت في أنحاء المعمورة وتحديدا غربا وبيتميزوا بإنهم بيشتغلوا مخططين إستراتيجيين .. كل واحد في مجال تخصصه .. وده بيكون بناء على قواعد بيانات وإحصائيات وخلافه
هل توافق على مشاركة كل من : الإخوان المسلمين - الأقباط فى الحكم ؟
أيوة أوافق
فى رأيك الشخصى .. ما هى أفضل مدونة على بلوجر قمت بزيارتها ؟
لا توجد مدونة هي الأفضل .. المدونات الرائعة كتيرة جدا
للذكور فقط : أيهما تفضل كزوجة .. إمراءه عاملة ، أم ربة منزل ؟
السؤال ده غلط في غلط .. هو الواحد بيختار زوجة وألا بيشتري غسالة؟ الإنسانة اللي الواحد يحس إنها حلم حياته وفيها كل اللي يتمناه وما يقدرش يعيش من غيرها وعايز يعيش معاها عمره كله مش ممكن بعد كل ده يسيبها علشان هي بتشتغل وهو كان نفسه في ربة منزل مثلا
اذا تزوجت وأنجبت ولدين وبنتين .. أى الأسماء تحب أن تسمى ؟
بما إن الحاجة مراتي بتقول إني مارست ضدها كل أنواع الإضهاد لما جينا نسمي أطفالنا الثلاثة .. فأنا حبيت آخد رأيها في أسماء الأربع عيال الإفتراضيين دول .. هي إختارت: كريم وشادي وبتول وحلا .. ولا إسم منهم طبعا إخترته لأولادنا الحقيقيين على فكرة .. منتهى الديمقراطية
هل تعتقد أن توريث الحكم فى مصر . . سيتم فعلا أم لا ؟
نعم .. لكن بطريقة رسمية سليمة
فى رأيك الشخصى : ماهو أفضل إنجاز لحكومة مبارك ؟
حصول مصر على كأس أفريقيا كذا مرة على مدار ربع قرن وحصول أكتر من واحد على جايزة نوبل .. بلاش تعليقات سخيفة هنا
وما هو أسوأ عمل قامت به ؟
هنفرد مدونة خاصة للموضوع ده فيما بعد
ثم لمن تمرر هذا التاج ؟
أنا كنت آخر واحد خلاص .. والحاج إسماعيل دايما بيرجع في كلامة