إصحوا

تعرف لو إنك كنت في الصين وبتعتبر نفسك عبقري زمانك وإن اللي زيك نسبتهم واحد في المليون من عدد السكان .. يبقى فيه زيك 1300 واحد زيك كده برضه؟ ولو كنت في الهند يبقى فيه زيك 1100 واحد برضه؟ طيب تعرف إن ربع سكان الصين عندهم معدلات ذكاء كويسة .. وده معناه عدد أكبر من سكان أمريكا وكندا مع بعض؟ طيب تعرف إن الصين قربت تبقى أكبر دولة في العالم ناطقة باللغة الإنجليزية؟ وإنك عقبال ما تخلص قراية البوست ده هيكون فيه 60 طفل إتولدوا في أمريكا .. و244 في الصين و351 في الهند؟
.
طيب بلاش كل ده .. تعرف إن أكتر 10 وظائف الطلب عليها شديد في سنة 2010 هتكون وظائف مش موجودة ومش مطلوبة سنة 2040؟ يعني الأولاد بيتعلموا في المدارس دلوقت علشان يشتغلوا في المستقبل حاجات لسة ما نعرفش هي إيه؟ يعني هيستخدموا تكنولوجيا لسه ما طلعتش؟ يعني لازم نكون مخططين إننا نحل مشاكل لسة ما نعرفهاش؟
.
بلاش ده .. تعرفوا إن فيه حالة من كل 8 حالات جواز في أمريكا إتعرفوا على بعض عن طريق الإنترنت؟ وإن عدد المشتركين في برنامج ماي سبيس كان 106 مليون مستخدم من سنة ونص؟ يعني لو ماي سبيس ده كان دولة .. كانت تبقى الدولة اللي ترتيبها ال 11 في عدد سكان العالم؟ تعرف إن عمليات البحث عن طريق جوجل وصلت ل 207 مليار عملية بحث كل شهر؟ طيب الناس دي كلها كانت بتسأل مين قبل ما يطلع اللي إسمه جوجل ده؟
.
تعرفوا إن عدد الرسائل القصيرة اليومية عبر المحمول أكبر من عدد سكان العالم؟ وإن اللغة الإنجليزية دلوقت بقى فيها 540 ألف كلمة يعني أكتر 5 مرات من أيام شكسبير؟ تصدقوا إن السنة دي هتدخل معلومات على الإنترنت تقدر ب 1ونص مليار مليار بايت؟ وده معناه إن المعلومات في العالم بتتضاعف كل سنتين؟ يعني لو حد دخل جامعة دلوقت هيبقى اللي إتعلمه ده بقى معلومات قديمة وبايتة وهو لسة في سنة تالتة؟ تعرفوا إن الجيل الثالث من كابلات الفيبر هتوصل كل ثانية 10 تريليون بيت يعني أكتر من 1900 سي دي و150 مكالمة تليفون؟
.
ألا صحيح.. هو إيه آخرأخبار طوابير العيش في مصر؟
.
على الهامش

سعد زغلول قال من 90 سنة: مافيش فايدة ياصفية .. غطيني وصوتي عليا