شد القلوع يا مراكبي ... مافيش رجوع يا مراكبي

الأحد، أبريل 06، 2008

من كندا لميدان التحرير

فاكرين لما كتبت عن رحلتي لكندا السنة اللي فاتت اللي قابلت فيها صديق عمري اللي مهاجر هناك من عشر سنين؟ البوست كان عنوانه: من ميدان التحرير لكندا .. صاحبي ده بقى أخد مراته الأجنبية في رحلة من كندا لمصر .. وبعتلي رسالة إمبارح بيقوللي فيها إنطباعاته الجميلة عن الزيارة دي .. أحب إنكم تقروها معايا .. نشوف كده
.
عزيزي المراكبي
.
إحنا أخيرا رجعنا لكندا والحمد لله إننا خرجنا من المصيدة دي على خير .. لو عايز تعرف إنطباعاتي عن الرحلة دي يبقى لازم تعرف إني بجد ممكن أكتب عنها كتاب كامل .. أنا قدرت أشوف الحاجات الكويسة والحاجات الوحشة عن مصر بعيون السائح الأجنبي .. السائح اللي إحنا كنا دايما فاكرين غلط إنه مبهور بمصر.. بينما الحقيقة مش كده خالص .. الحقيقة إن أفضل وأحسن شيء ممكن يتوفر للسائح الأجنبي مش قد كده خالص زي ما الناس فاكرة
.
ومن غير ما أطول عليك .. أنا بجد محبط جدا لأني شفت بلدي في الحالة السيئة دي .. أنا قمت برحلتي دي بمناسبة مرور عشر سنين على هجرتي من مصر .. وإكتشفت بوضوح إن العشر سنين دول كانوا عشر سنين من التدهور المستمر في مصر .. مصر كانت أحسن من كده بكتير قبل ما أهاجر منها .. ده حتى لما جيت زرتها من 3 سنين كانت أحسن من دلوقت بكتير .. رغم إن فيها حاجات جديدة كتيرة دلوقت
.
أنا على فكرة كنت دايما بأقول لنفسي إن مش من العدل إني أقارن بين مصر وبين الدول اللي أنا إتعودت إني أعيش فيها ومستواها أعلى من مصر .. لكن من حقي بقى إني أقارن بين مصر وبين دول ثانيه في العالم الثالث قدرت أزورها في السنين الأخيرة .. والنتيجة برضه مخجلة
.
أنا شفت بعيني في الأقصر سائح أمريكي (علما بأن ده شيء نادر لأن الأمريكان بطلوا ينجذبوا لزيارة مصر في السنين الأخيرة) كان بيزعق جامد بسبب المعاملة وكان بيقول إن ما فيش إحتراف! وإتنين تانيين بريطانيين قالولي إنهم زعلانين جدا .. وإنهم زاروا المغرب قبل كده وكانوا متوقعين إنهم يلاقوا هنا معاملة أحسن بكتير .. ما إحنا بلد الحضارة زي ما إنت حافظ .. لكن للأسف إكتشفوا إن السياحة في المغرب أنضف وأكثر إحترافية من مصر بكتير
.
الخلاصة يا مراكبي يا أخويا إن القصة مش قصة إني عادل في حكمي على مصر وألا لأ .. القصة إن فيه حاجة حصلت خلت الأمور تتدهور دراماتيكيا بالشكل ده .. وهأكتفي بكده لأني زي ما قلت لك في الأول إني ممكن أكتب عنها كتاب كامل .. المهم .. إنت عامل إيه وأخبارك إيه؟ يا ترى مرتاح في نقلتك الجديدة؟ وياترى إيه خططك للمستقبل على المدى القصير؟ يعني في ال 3 سنين الجايين؟ خلي بالك من نفسك وسلامنا للحاجة والأولاد
.
بس كده .. الرسالة خلصت .. الرسالة وصلت؟

التسميات:

47 Comments:

Blogger fatima said...

عقدونا بقى يا بتوع كندا
يا عم ما احنا عايشين و متحملين
بتقلبوا علينا المواجع ليه بس ؟؟
دا المتوقع على فكرة و اللى عاوز هيكتب ميبطلش كتابة
بس يعنى نهج كلنا و نسيبها ؟؟؟
خلاص نهج
خدونا كندا بقى
تحياتى و تنهداتى
يا نبع الحكمة
و قول صاحبك و النبى براحة على العالم الغلابة دول اللى هما احنا على رأى بلال فضل " السكان الاصليين "

الأحد, أبريل 06, 2008

 
Blogger fatima said...

على فكرة موش قصدى ان صاحبك و انت باعتباركم متغربين و مهاجرين متبقوش من السكان الاصليين .. متفهمونيش غلط لو كانت مكتوبة بانطباع يتفهم كدا ..
و بالمرة قبل ما انسى امسح الرسالة الاولى عشان فيها فيرس ...
تحياتى يا نبع الحكمة

الأحد, أبريل 06, 2008

 
Blogger soma said...

عظيمة يا مصر

!!!

العيب منهم مش من بلدنا على فكرة

الأحد, أبريل 06, 2008

 
Blogger مُزمُز said...

كل سنة وانت طيب

:))))

الأحد, أبريل 06, 2008

 
Blogger حزيــــــــــــــــــن said...

ماشى يا عم ... لما زميلى هاجر من كلم شهر انا كنت متأثر اوى اوى لفتره طويله بس بردو كنت بقوله انا مش حسيب البلد دى ... طبعا كنت مؤمن اوى بالكلمه دى ساعتها ولحد دلوقتى مؤمن بيها بس نفسى اطلع برا البلد
تحياتى

الأحد, أبريل 06, 2008

 
Blogger jehan said...

شوف يا مراكبى بصراحة وعن تجربة ممكن تكون محدودة

انا لسة كنت فى الاقصر واسوان الشهر الى فات الصراحة انا كنت مبهورة سواء بنضافة المدينة او الهتمام بالاثار او بالمعاملة
الشئ الوحيد الى كان مضايقنى هو بس صغر المساحة الى بنتفتش فيها واحنا داخلين المزرات يعنى المفروض انها تكون اكبر وموظفين اكتر لسهولة الدخول غير كدة الصراحة ما شفتش اى شئ وحش والعلم انى مصرية والغالب ان الاجانب بتكون معاملتهم افضل .

اما بقى بالنسبة للاهرامات فحدث ولا حرج قمة فى عدم الاهتمام والاهمال الكبييير جدا فى النظافة المنطقة هناك ريحتة وحشة جدااااااااااا بسبب الجمال والحمير وما فيش خدمات كافتيرات او حمامات او حتى يفط ارشادية كافية او تليق بالمكان الصراحة حاجة اخر بهدلة فى الهرم الصراحة والله يكون فى عون السياح بجد الى بيرحوا الهرم وعلى فكرة انا كنت فية بردة من كام شهر يعنى قريب لا تقول الكلام دة من الماضى .

واسفة انى طولت عليك

الأحد, أبريل 06, 2008

 
Blogger محمد عبد الغفار said...

أحنا شعب نمرود مينفعش نبقى خدامين

رغم ان الناجح هو اللى يكون خدام اكل عيشه

البطران اخرته قطران

مقلتش رأيك فى الأضراب وياريت لو تستطلع راى صحابك بماانه من العالم المتقدم

الأحد, أبريل 06, 2008

 
Blogger خمسة فضفضة said...

السلام عليكم ورحمة الله وبركاته

آااااااااااااااه الرسالة وصلت الحمد لله

الأحد, أبريل 06, 2008

 
Blogger حسن ارابيسك said...

هي البلد بالناس
ولا الناس بالبلد
وحاجات حلوة بتنداس
وحاجات وحشة بتتولد
ويموت فينا الإحساس
ويضيع منا الولد
وياعيني ياعينى ياعينى عالبلد
وياعيني ياعينى ياعيني عالولد

الأحد, أبريل 06, 2008

 
Blogger maii bahaa said...

الرساله آه وصلت.. بس انا باستغرب ان كلنا فاهمين ومش بنعمل حاجة حقيقية يعني ناقصنا ايه ؟؟عدد ؟ داحنا قربنا ننفجر...عقل؟ موجود والحمدلله..ولا احنا اتعودنا على كده خلاص؟
واستسهلنا الهروب
وأحلى حاجة فينا اننا قاعدين نغني لمصر طول النهار والليل والوطنية تنقح علينا..مع ان مصر مش ده اللي هاينفعها
ماعليتا..حضرتك أخبارك ايه؟

الأحد, أبريل 06, 2008

 
Blogger allfollowsome said...

أنا شفت بعيني في الأقصر سائح أمريكي (علما بأن ده شيء نادر لأن الأمريكان بطلوا ينجذبوا لزيارة مصر في السنين الأخيرة) كان بيزعق جامد بسبب المعاملة وكان بيقول إن ما فيش إحتراف! وإتنين تانيين بريطانيين قالولي إنهم زعلانين جدا


يا ريت تشكر صديقك والجماعه الامريكان والانجليز على التعليق المؤدب جدا جدا جدا جدا جدا ده

الأحد, أبريل 06, 2008

 
Blogger سنووايت said...

هو مش بس اللي بيتغرب وبيرجع ومش بس الاجانب اللي حاسين بالتدهور للاسف

الاثنين, أبريل 07, 2008

 
Blogger لماضة said...

وصلت
:((

الاثنين, أبريل 07, 2008

 
Anonymous السيد مجهول معروف المجهول said...

عايز ارقع بالصوت و اقول يالهوى
مش عشان عرفت حاجة ، لا
علشان افتكرت حاجة عمال ادفن فيها من سنين
عمال ادفن جوايا اللى باشوفه و باسمعه
عمال ادفن كل شئ وحش تحت " تعيشي يا مصر " و "مصر ام الدنيا و ست كل عصر " و " سينا رجعت تانية لينا " و
و
و الديك الشركسي صاحب جارتنا رندا
مع السلامة

الاثنين, أبريل 07, 2008

 
Blogger MKSARAT SAYED SAAD said...

وصلت طبعا
بس في طبعا في حاجة تانية مهمة ان الصورة مش سودة قوي كدة
والطبع يغلب التطبع يا مراكبي

اسمحلي الحاجة الصح 100% نقطة الاحترافية في تطبيق السياحة
لكن بقيت اللي اتكلم عليه صديقة نسبي وجدا
تحياتي
سيد سعد

الاثنين, أبريل 07, 2008

 
Blogger tota said...

وايه الحل؟؟؟؟

الاثنين, أبريل 07, 2008

 
Blogger a.aTeYa said...

و الله يا مراكبى هو اللى غلطان .. ايه رجعه البلد بعد 10 سنين؟؟ .. ده كل اللى فيها عايزين يروحوا مكانه .. قوله يخاف على نفسه ..

الاثنين, أبريل 07, 2008

 
Blogger lonlysmily said...

فى الواقع ياسيدى الفاضل
اللى حصله دا طبيعى واحد عايش فى بلد اقل ما يقال عليه انه متحضر وجه بلدنا الحبيبه.هيكون انطباعه ايه يعنى؟
اه بلده وهو عارفهاوعارف الكوارث والمصايب اللى بتحصل جواها بس لازم بردة يعرف ان البلد فى تخلف مستمر سواء من الحكومه او من الشعب ذاته

بس اللى قهرنى نظرة اى سائح هيجى بلدنا....كنت بفتكرهم مبسوطين
لكن....:(:(

الاثنين, أبريل 07, 2008

 
Blogger Tamer Nabil said...

مصر والناس اتغيرت وفى حاجات بتحصل لكن الاسباب ايى وزى التغير يكون الله اعلم

فى نتظار العدل والانصاف يمكن يكون حل


تحياتى

الثلاثاء, أبريل 08, 2008

 
Blogger فى القلب said...

عارف حاجه محيرانى جدا جدا

السياح و العرب وأهل البلد الغتربين

يكلمو عن مصر كلام سيئ جدا والغريبه بقه أنهم بيرجعوا تانى وتالت وعاشر

والسياحه ماليه البلد و الفنادق دخلها بالملاين

و بناء الفنادق بيزيد لانها مش مستوعبه كميه السياح ألى فى البلد

مش غريبه

و الأغرب بقه

أنها أحلى بلاد الدنيا فى عنينا أحنا ولاد البلد

الثلاثاء, أبريل 08, 2008

 
Blogger Rania said...

من ناحية وصلت؟
فهى وصلت و علمت كمان
يا عزيزى مصر هتفضل بخير بس يتعدل الى موقفين حالها
هنروح لبعد كدة فين مش عارفة

تحياتى

الثلاثاء, أبريل 08, 2008

 
Blogger محمد فوزي آل ربيع said...

و يقال ف الأثر: حلوة يا بلدي، عمار يا بلدي، و يقول المؤرخون إن هذه البلاد المقصودة كانت يوتوبيا العصر القديم في مصر و أرض الحضارة و منبع ال.....والحاجات دي كلها اللي بيحفظوها للعيال ابتداء من ابتدائي في مدارس التعليم المجاني الناصرية الفكر

الثلاثاء, أبريل 08, 2008

 
Blogger Hannoda said...

وصلت.. أكيد وصلتنلنا
و أكيد واصلة للي خربينها و قاعدين على تلها
و هي عارفة انها واصلة لكل دول و قلبها واجعها
بتقول مالهم دول هنت عليهم كده ليه
مالهم ناسييني و تاهيين في حياتهم وسايبين خيري يضيع و يموت

واصلة من زمان يا مراكبي و ماحدش عارف آخرتها ايه
مش عافة .. ننسى مصر ولا واسمها وتاريخها و خيرها و نرتاح بقى ولا ايه!!!!!

الأربعاء, أبريل 09, 2008

 
Blogger أُكتب بالرصاص said...

الراجل دا بيتكلم صح
واحنا قلنا كدا من زماااان

تعرف ..انا زوجتي زارت مصر سنة 90 ، قبل ما اعرفها طبعا لانها كانت عيلة صغيرة ، كانت مبسوطة جدا يوميها ، وقعدت تكتب اشعار في مصر بلد الأزهر وبلد سيدنا الحسين ، وبلد المسلسلات والافلام وبلد السكرية وقصر الشوق

لما نزلت زارتها معايا 2005
ما استحملتش قرفها والبهدله اللي فيها

من الجانب الاخر ، فعلا ...رغم ما فيه من قصور ، أنما السياحة في المغرب ....شيء مختلف.. بيعرفوا يتعاملوا مع الاجانب

وسلم لي على نيلها

الأربعاء, أبريل 09, 2008

 
Blogger ست البنات said...

مالها مصر يقى

الا صحيح هيا فين كندا دى ههههههه

تحياتى

الأربعاء, أبريل 09, 2008

 
Blogger hend...hanady said...

هو ده السبب اللى بيخلى فرنسا اللى مهندهاش 1من عشرة من اللى عندنا بتجيب اكتر من 70 مليون من السياحة واحنا يا حسرة علينا
المهم اننا مش بنهتم غير بالاثار بس مع ان عندنا مناطق طبيعية وحاجات تانية اكتر مش كل الناس بتتمتع برؤية الماضى فيه ناس بتفضل الطبيعة وده اللى كل العالم عارفه وبيعمله والاهم عاملنى كويس تلاقينى

الأربعاء, أبريل 09, 2008

 
Blogger يا مراكبي said...

fatima

أنا بجد بجد بيعجبني جدا تعبير "السكان الأصليين ده" حتى من قبل ما أسافر من مصر .. فيه إختصار تعبيري رائع .. وبعدين أنا كنت واحد من السكان الأصليين دول في يوم من الأيام .. ومش هننسى أصلنا مهما حصل

إنتي أثرتي بتعليقك ده نقط مهمة كتيرة .. هنحتاج نناقشها في موضع آخر بتوسع كبير . .أهمهم النقطتين دول:

يعنى نهج كلنا و نسيبها ؟؟؟

موش قصدى ان صاحبك و انت باعتباركم متغربين و مهاجرين متبقوش من السكان الاصليين

ولك دائما تحياتي الخاصة



******************


soma

كلامك سليم

المكان لا يتغير ..الناس اللي في المكان هي اللي ممكن ترفع المكان أو تخفس بيه الأرض



****************


مُزمُز

وإنت بالصحة والسلامة .. عيد إيه المرة دي؟



*****************


حزيــــــــــــــــــن

أنا قعدت أقاوح زيك كده مع صاحبي ده سنين طويله .. لحد ما إقتنعت إني لازم أمشي أنا كمان .. ساعتها قاللي: شفت إزاي طلع كلامي صح؟ قلت له: بس أنا إتحملت لآخر نقطة ممكنة .. وإستحملت كتير قوي .. وما هربتش من أول ضربة



*****************


jehan

المنظومة السياحية مش أماكن الآثار وبس .. دي بتبدأ من نظافة وتنظيم المطار . الجوازات .. سير الحقائب .. معاملة الشيالين وظباط الجمارك .. التاكسيات (وهنا بقى قولي شعر) .. وإستغلال الأجانب في كل المحلات والمطاعم والفسح .. الإرشادات والتنظيم المروي .. دي قصة كبيرة جدا غير موضوع المزارات السياحية والحمامات والفنادق

تقدري تقوليلي بقى إيه اللي فيه إحتراف بجد في كل اللي فوق ده؟

منورة



******************


محمد عبد الغفار

حلو التعبير ده: أحنا شعب نمرود مينفعش نبقى خدامين

إحنا فعلا شعب يتكون من أفراد يغلب عليهم عدم إحتراف أو إحترام ما يمتهنه

الإضراب؟ قبل الإضراب كانت الصورة ضبابية للغاية .. فالمعلومات المتوفرة عن الأهداف والإسلوب والخطط البديلة لم تكن متوفرة على الإطلاق .. كما أنني فقدت الثقة في أن يتحرك الشعب معا في حركة منظمة منذ زمن طويل .. فأفراد هذا الشعب يتحملون جزءا كبيرا من المسؤلية تجاه ما وصل إليه حال البلاد

إنت بقى قول لي: هل نجح الإضراب كما يقولون رغم كا ما سبق من مقدمات سلبية؟ هل هي بداية الإنفجار؟




*******************

خمسة فضفضة

وعليكم السلام ورحمة الله وبركاته

أهم حاجة إن الرسالة توصل ولو لشخص واحد بس .. الحمد لله



*****************


حسن ارابيسك

الإجابة هي: البلد بالناس

وياعيني ياعينى ياعينى عالبلد



*****************


maii bahaa

بالظبط كده .. كلنا فاهمين وارفين وأولنا أولي الأمر .. أمال فيه إيه بقى؟ مطنشين ليه وسايبين الدنيا كده ليه؟ وإيه هي المبررات اللي تخلينا وتخليهم يسيبوا الأمور كده؟

خلينا في الأغاني

أنا عامل إيه؟ مفحوووووت في الشغل لحد 9 مساء كل يوم .. شكرا على السؤال



*****************


allfollowsome

هو في الحقيقة أنا اللي كنت مؤدب وأنا بأكتب البوست .. إفهم إنت بقى هما كانوا بيقولوا إيه في الحقيقة .. هههههه



*******************


سنووايت

زمان كان اللي بيتغرب وبيرجع هما بس اللي حاسين بالتدهور .. لكن طبعا في الأيام المفترجة دي ما بقاش حد بيحس بحاجة .. لأن التدهور بقى هو أساس الحياة وما عكس ذلك هو الشيء الشاذ



*******************


لماضة

الحمد لله إنها وصلت .. ده في حد ذاته أول الطريق الصح



*******************


السيد مجهول معروف المجهول

الشعب كله هيرقع بالصوت قريب .. هيبقى تقليد عام ما تقلقش

للأسف التعتيم الإعلامي موضح لنا إن كله تمام .. بينما إحنا بعيييييد جدا عن الدنيا اللي بره دي

منور



*****************


MKSARAT SAYED SAAD

ياريت يا سيد فعلا الصورة تكون زي ما إنت بتقول كده .. أصل أنا لفيت برة شوية وعارف إن للأسف الكلام اللي في البوست هنا صحيح .. ويمكن اللي إتقال كمان أقل بكتير من الصورة الكاملة للموضوع

ربنا يصلحنا ويصلح لنا الأحوال



*******************


tota

الحل؟ ده موضوع كبير قوي .. يبدأ من إصلاح الفرد .. ثم الجماعة .. ثم الأمة



******************

الخميس, أبريل 10, 2008

 
Anonymous أحمد الحسيني said...

أنا واحد من ملايين المصريين المغتربين وعلى فكرة في الكويت
لكن لما بسمع حد بيجيب سيرة البلد بالشكل ده بزعل وبضايق ويمكن يتخانق معاه لحد ما يغير وجهة نظره
المسألة بسيطة جدا جدا
اللي مش عاجبة حال البلد
ييجي ويورينا هو هيقدر يعمل ايه
لكن نلعن ونقول تدهور ... اسمحلي دا مش مضبوط
العيب فينا مش في بلدنا
مع احترامي الشديد لصاحبك

تحياتي

الخميس, أبريل 10, 2008

 
Blogger اسكندراني اوي said...

وصلت يا هندسه
المصيبه انها واصله من زماااااااااااااان

نهايته
ما تنساش تتصل لما تيجي الدوحه
ولو التليفون مش معاك قوللي ابعتهولك تاني وامري الى الله
ههههههههههههههه

الخميس, أبريل 10, 2008

 
Blogger بالله المستعان > رؤية said...

معتقدش ان ابو الهول ممكن يضايق حد

الخميس, أبريل 10, 2008

 
Blogger دنــــيــــــا مـحـيـرانـي said...

في يا بشمهندس ما تسبنا عايشين فيها و حمدين ربنا و شاكرينه الاي خرج منها يسيبنا بقي في حالنا و مش كل شويه حد يفكرنا بالوكسه الاي احنا فيها
كفاية بقي

الخميس, أبريل 10, 2008

 
Blogger يا مراكبي said...

a.aTeYa

أنا قلتله كده وشتمته كمان .. فيه حد يعمل عملته دي؟ هو عموما حرم خلاص



*******************


lonlysmily

ما هو الموضوع بيطرح نقطتين .. أولهم التدهور المستمر .. وتانيهم نظرة الآخرين لنا .. وهي دي الصدمة اللي بنكتشفها لما بنعرف الحقيقو



*****************


Tamer Nabil

العدل والإنصاف .. بس من مين؟ من أولي الأمر بتوع دلوقت؟ ده اقل عدل وإنصاف إنهم يحترموا نفسهم ويحترمونا ويرحلوا



*******************


فى القلب

أقولك ياستي .. عدد السياح اللي إنتي شايفاه عندنا ده ما يجيش حاجة أبدا جنب إمكانياتنا السياحية اللي مالهاش حصر .. يعني كفاءة السياحة (النتائج مقارنة بالمعطيات) حاجة تكسف .. وصلت؟



*****************


Rania
مين دول اللي موقفين حالها؟ قولي ما تخافيش
تحياتى



*****************

الجمعة, أبريل 11, 2008

 
Blogger koukawy said...

عشان يفضلوا يقولوا مصر ام الدنيا

الجمعة, أبريل 11, 2008

 
Blogger يا مراكبي said...

محمد فوزي آل ربيع

و يقال في الأثر إن القرعة بتتباهى بشعر جدتها الفرعونية اللي ماتت من 7 آلاف سنة

وده اللي الإعلام بتاعنا بيسمعوه لينا كل يوم من يوم ما نتولد



********************


Hannoda


ميب بقى اللي خاربينها و قاعدين على تلها دول؟ أنا أول مرة أسمع عن الموضوع ده

المعلومة واصلة من زمان وماحدش سائل

وما فيش حل هيريحنا أبدا .. لا يمكن نلغي مصريتنا حتى لو أخدنا جنسية تانية



*******************


أُكتب بالرصاص

إحنا طبعا إتكلمنا عندي وعندك في أكتر من موضوع عن التدهور السياحي لمصر .. وإنت بحكم شغلك في المجال ده شايف الموضوع أحسن مني كمان .. واللي قاله صاحبي واللي شافته مراتك هو الشيء اللي جايز ناس كتير جوة مصر مش حاسه بيه قوي وهو: التدهور المستمر

أسلملك على نيلها . بس أسمع إنه إتلوث هو كمان



******************


ست البنات

كندا دي يا ستي قبل دمنهور على طريق بركة السبع .. قرية كده مالهاش لازمة

هههههههه



******************


hend...hanady

المعطيات السياحية المصرية رهيبة ومتنوعة جدا .. آثار من حضارات مختلفة .. فرعونية ويونانية ورومانية وقبطية وإسلامية .. شواطيء ومصايف ومشاتي .. صحة وعلاج وجو جميل معتدل .. أسعار معقولة .. لكن في المقابل .. خدمات منهارة وتاكسيات تكسف ومعاملة تقرف .. عدد السياح عندنا بجد محرج بالنسبة للعناصر اللي عندنا دي كلها



*******************

الجمعة, أبريل 11, 2008

 
Blogger يا مراكبي said...

أحمد الحسيني

أنا زيك كده على فكرة .. ورأيي هو نفس رأيك: العيب فينا مش في بلدنا

وعلشان كده الناس لازم تتعلم إنها تتكاتف علشان الإصلاح .. إيد لوحدها لا يمكن تصقف .. وطول ما كل واحد سلبي لوحده كده يبقى نستاهل كل اللي يجرالنا

أنا قعدت سنين في الكويت .. أخبار الكويت إيه؟



****************


اسكندراني اوي

واصلة من زمان .. هي دي المأساة .. عارف .. لو ما كانتش واصلة كان يبقى أرحم

أنا هأوصل بعد نص الليل لكن يوم الإتنين هأكون موجود طول اليوم



********************


بالله المستعان > رؤية

أبو الهول؟ ده تمثال سكرة والعيبة ما تطلعش منه أبدا .. لكن هو قرب ينطق على فكرة



*******************


دنــــيــــــا مـحـيـرانـي

مشكلة الناس اللي بره دول إنهم نفسهم الحال ينصلح علشان يقدروا يرجعوا لمصر تاني .. الغربة بجد صعبة قوي



********************


koukawy

هي كانت أم الدنيا .. كانت

الجمعة, أبريل 11, 2008

 
Blogger Jana said...

مؤسف جدا هذا الشعور عندما يصدر من اجنبى ..فنشعر بالخزى وياارض انشقى وابلعينا وماشابه ذلك
الحمد لله ان صديقك مصرى ...اهى جات فى بيتها برده
بس ازاى مش خاف من لعنة الفراعنة!!؟؟
:)

تحياتى..
وتقبل مرورى لاول مرة

الجمعة, أبريل 11, 2008

 
Blogger سلسبيل said...

مساء الاحباط ياعم مراكبي
ليه طيب السيره دي
طب اذا كان دا بيتعمل مع السائح الاجنبي..امال السايح المصري بيتعمل فيه ايه..
فكرتني بزيارتي البائسه لمنطقه الهرم انا واسرتي من شهر..واللي اتعمل معانا..اعووووووذ بالله...طبعا مش هتكلم ع النصب علينا..دي حاجات بسيطة...هههههههههههه
بس النصب ع السياح بصورة مبالغ فيها...دول فاكرينهم عبط مع انهم خلاص..شربوا من الفهلوة المصري...
وبعدين اسلوب المعامله فعلا زي الزفت جداا زي ماصاحبك قال...
بس بيقوللك ايه ف الاعلان المصري..السياحة..خير لينا كلنا
انا بقول يسكتو احسن خلاص صاحبك
(سيّح لهم)
تحياتي

السبت, أبريل 12, 2008

 
Blogger مُزمُز said...

هو كان عيد ميلادك ولا بيستهيألي؟؟؟

ماليش دعوة يا عم الفيس بوك هو اللي قال

:)

السبت, أبريل 12, 2008

 
Blogger شــــمـس الديـن said...

اعتقد ان دي جزء من اخر من فصول المهزلة المصرية اللي انت بينتهالنا بردوا بشكل غير مباشر في كتاب ولي عهد الامارات او ما شابه انا مش متذكرة اوي بس بيتكلم عن انهم حطوا هدف و لن يرضوا بدون القمة

تقريبا احنا هدفنا ننا لن نرضي عن القاع بديلا !!!!

خالص التحية

السبت, أبريل 12, 2008

 
Blogger اسكندراني في الغربة said...

وياترى إيه خططك للمستقبل على المدى القصير؟ يعني في ال 3 سنين الجايين؟

متأكد ان الي بيسأل الاسئلة دي اتربى في مصر؟؟
اصل مش معقول عشر سنين تخلية ويصل لمرحلة تفكير و خطط ومستقبل .
---
تخيل لو في شرط ان الوزير يكون عاش برة مصر اكتر من عشر سنين
تفتكر بعديها بي 3 سنين مصر تكون ازاي؟

تحياتي

السبت, أبريل 12, 2008

 
Blogger أنا وصاحبى said...

احمد بعد اذنك هننشر قصة الكاتشب فى سلسلة مدونات مصريه للجيب ويا ريت تدخل تقرا التفاصيل وتبعتلنا ميل
احمد مهنى

السبت, أبريل 12, 2008

 
Blogger يا مراكبي said...

Jana

لعنة الفراعنة مش بتخوف دلوقت .. اللي بيخوف هو اللعنة اللي جايبنهالنا ناس تانية نتي عارفاهم

أهلا وسهلا بيكي .. نورتي



********************


سلسبيل

مساء الإكتاب .. أهلا أهلا

أنا كتير أخدت معايا أصدقاء أجانب لهرم وكنت بأهس النصابين دول زي الذباب كده .. وكان بيبقى شكلي وحش جدا

أمة لا إله إلا الله سيحتلنا يا سلسبيل خلاص .. إحنا بس اللي مش داريانين



*****************


مُزمُز

أيوة كان عيد ميلدي الخامس والعشرين .. كل سنة وأنا طيب .. ههههه
الفيس بوك ده فضحي بصحيح

متشر جدا جدا



*******************


شــــمـس الديـن

برافو عليكي .. المدونة فعلا فيها خط بيربط المقالات كلها في الإطار ده .. إننا لن نرضي عن القاع بديلا .. إنجاز برضه على فكرة

أهلا بيكي



*******************


اسكندراني في الغربة

على فكرة .. دي ملاحظة ذكية وأنا فعلا قصدت إني أعرضها في البوست .. الناس برة شايفة إن التخطيط ل 3 سنين قدام ده تخطيط قصير المدى .. ودي إحدى عناصر التقدم .. إن التخطيط الصحيح بيكون لأبعد من كده بكتير جدا جدا .. بس مين اللي يفهم الكلام ده؟
تحياتي



*****************
أنا وصاحبى

أشكرك جدا على الإهتمام والتقدير ده .. ده شيء يسعدني طبعا



******************

الأحد, أبريل 13, 2008

 
Blogger بالله المستعان > رؤية said...

قرب ينطق من اللي احنا بنعمله قدامة

الأحد, أبريل 13, 2008

 
Blogger أحمد سلامــة said...

انا مش عارف هو شاف مصر بمنظور السايح يعني لفلف في ميدان التحرير والاقصر واسوان وشارم بس ولا دخل الحلمية والدرب الاحمر والسيدة والدمرداش بما انه اصلا مصري
مصر صعبت عليه
وعلينا والله
طب مسابش حاجة كده قبل مايمشي ؟؟!!
انشالله كولديير حتى في موقف عبد المنعم رياض

الأربعاء, أبريل 30, 2008

 
Blogger يا مراكبي said...

بالله المستعان

أنا أسمع كمان إنه نطق وبيشتم



*******************


أحمد سلامــة

هو سابلي 5 جنية مع البواب قبل ما يمشي .. ههههههه

صاحبي مشكلته إنه غتفضح قدام مراته الخواجاية فضيحة المطاهر يوم طلوعه عالمعاش

الخميس, مايو 01, 2008

 
Blogger Yasmina said...

عارفه انو بوست قدييييييييم أوي
بس بما اني اتربيت اساسا برى مصر(في السعودية)
وكنت لما بنزل مصر ببقى مستاءة جدا من اكوام ال..... واكوام البشر واكوام العربيات
اصل كل حاجة هنا فيمصر بالكومة ماشاء الله
بس انا دلوقتي عايشة فيها عشان دراستي
واول ماجيت كنت منهارةومش قادرة أستحمل
وبعد كدة اتعودت
لا وحبيتها
يمكن مصر كلها سلبيات
كلها اكوام حاجات
وشعبها اكتر شعب متغطرس بحضارة مش عرفه كم الف سنه ولسة عايشين في الماضي ومستكبرين يبصو على الناس حواليهم عشان احنا ناس في الدنيا

بس برضو مصر (دافئة جدا وحنينه أوي)
وانا حسيت بكدة مع اني متربتش فيها ولا أي حاجة
اي نعم ساعات بحس انها قاسية أوي على الناس الغلابه
بيصعبو عليا حقيقي
بس مهما كان (دور جواك تلقاها هيا الصحبة وهيا الأهل)
وسيبك بقى من بتوع كندا دول
بس التحرير بصراحة ماينفعش تكون منطقة سياحية
يعني مش قد المقام
ماراحش شرم ليه ؟؟:D:D:D

سؤال اخير يعني ايه (السكان الأصليين)
بجد والله السؤال ده مش هزار

الجمعة, مايو 23, 2008

 
Blogger يا مراكبي said...

Yasmina

حكايتك دي هي حكاية ناس كتير جدا .. بلا شك إن الحاة في أي دولة بيكون ليها مميزات وعيوب .. المهم هو مين اللي أكتر .. المميزات وألا العيوب؟ هو ده المقياس اللي نقيس بيه هل مصر أحسن من الخليج وألا العكس؟

حكايو ميدان التحرير دي قررناها لما كنا لسه ما عندناش المقدرة المادية نروح القناطر الخيرية حتى .. هههه

أما بقى حكاية السكان الأصليين دي فده تعبير بيقولوه للكناية عن إن اللي ما سافروش برة مصر هما اللي لسة متمتعين بكامل الخواص المصرية دون تشويه وأهمها تشويه الفكر اللي بيخلي الواحد يعرف إن فيه حاجة أحسن من مصر

الاثنين, يونيو 02, 2008

 

إرسال تعليق

Links to this post:

إنشاء رابط

<< Home