شد القلوع يا مراكبي ... مافيش رجوع يا مراكبي

الجمعة، أبريل 25، 2008

هما اللي بيقولوا


إيه الصورة اللي فوق دي؟ الصورة دي ما هي إلا غلاف العدد الإسبوعي من مجلة إقتصادية دولية شهيرة متخصصة في الشئون الإقتصادية للشرق الأوسط القديم .. المجلة دي إسمها "ميد" وأنا بحكم إني غاوي وجع دماغ بأتابعها بإستمرار .. دي مجرد مقدمة علشان تعرفوا منها إني راجل مثقف وحركات كده .. المهم
.
المجلة دي خصصت نص عدد صفحاتها للكلام عن مصر.. وعنوان الغلاف اللي إنتوا شايفينه فوق ده بيتكلم عن الدعم اللي بتقوم بيه الحكومة المصرية تجاه الشعب المصري برضه .. ماحدش يبتسم هنا لو سمحتم .. المهم فتحت أول الموضوع لقيت كلام غريب جدا بيقول: عبر تاريخ مصر الطويل كانت الأراضي الخصبة حول ضفتي أطول أنهار العالم هي المورد الرئيسي لهذا البلد العريق .. وقد كانت مصر هي أهم مصدر للقمح بالنسبة للإمبراطورية الرومانية لمدة تزيد عن 500 عام .. لكن حال مصر الحديثة في يومنا هذا لا يمكن أن يكون أسوأ مما هو عليه الآن .. فقد أصبحت مصر هي أكبر مستورد للقمح في العالم .. ده بتوع المجلة هما اللي بيقولوا كده مش أنا
.
ومكتوب كمان: إن التقارير الحكومية توضح أن معدل النمو للناتج المحلي في تزايد مستمر فقد وصل معدل النمو إلى أكثر من 7% وإنخفضت نسبة البطالة من 12% عام 2004 إلى 9% في عام 2007 كما أنه مخطط أن يقل عجز الميزانية من 7% هذا العام إلى 3% فقط بحلول عام 2011 لكن الواقع بين الناس وفي الشوارع يعكس شيئا مختلفا .. فالناس يقفون لمدة قد تصل إلى 7 ساعات في طوابير للحصول على الخبز .. كما أنه قد توفي 15 شخصا في تلك الطوابير .. إما بسبب العراك أو بسبب التعب وحرارة الشمس .. كما أن هناك 40% من أفراد الشعب يتقاضون أقل من 2 دولار في اليوم الواحد .. بالإضافة إلى أن مصر تستورد سنويا 7 مليون طن قمح وهو ما يعادل نصف ما تحتاجه مصر من قمح .. ده بتوع المجلة هما اللي بيقولوا كده مش أنا
.
ومكتوب كلام تاني غريب جدا عن إن فيه إضراب عملوه أساتذة الجامعات يوم 15 مارس .. وإضراب تاني عملوه عمال النسيج وإنضم ليه طوائف كتير من الشعب يوم 6 إبريل .. وإن الحكومة المصرية بتفكر في إنها تقلص من دعمها للمواد الأساسية للمواطنين وإن ده بيعيد للأذهان أحداث يناير 1977 لما حاولت الحكومة ساعتها إنها تقلل من دعم رغيف الخبز وحصلت أحداث شغب كبيرة مات فيها 70 شخص .. ده بتوع المجلة هما اللي بيقولوا كده مش أنا
.
ده غير بقى شوية كلام مغرض عن إنتخابات المحليات والمعارضة والإخوان المسلمين والوزارة الحالية ونظام الحكم وحاجات كده .. أنا مش عارف إيه علاقة كل الحاجات دي بالإقتصاد؟ وإيه اللي دخل مجلة إقتصادية متخصصة في إنها تتكلم عن الأمور السياسية دي؟ وأنا من موقعي هنا وأنا قاعد على السرير بأشجب كل الكلام المغرض اللي إتقال ده وبأقول إن كل شيء زي الفل وسمعني سلام ما شربتش من نيلها وبالمرة كمان أحب أسمع أغنية كايدة العزال أنا من يومي .. إيوه أه

التسميات:

43 Comments:

Blogger خمسة فضفضة said...

السلام عليكم ورحمة الله وبركاته

من الواضح كده ان المجله دي مجله عميله ومغرضه هدفها زعزعة الامن القومي الداخلي ببث افكار ومعلومات مغلوطه عن حال مصر المحروسه ،وحاكمها طويل العمر يطول عمره وينصره علي مين يعاديه ...هاي هي

الجمعة, أبريل 25, 2008

 
Blogger مـحـمـد مـفـيـد said...

يا عم يا عم ثقافه وأطلاع
:))
مين قال ان في ازمه عيش
الطوابير انتهت يا احمد
اجازه لمده اسبوعين
علشان في طوابير تانيه هتبدأ وهي طوابير الجرادل علشان الميه والحر
تحيا مصر يا عم الحاج

الجمعة, أبريل 25, 2008

 
Blogger Ahmed Mubarak said...

دائما علشان مصر في الصداره بتيجي علينا اشاعات مغرضة ..

مش عارف زعلانين مننا ليه .. يمكن علشان حنا شبعانين ومتقدمين ومن دول العالم الاول المتحضر اقتضاديا وعلميا وصحيا وكوسيا!!..

طابور العيش ده مجرد وسيله للتسليه وتربيه الاولاد انهم يطلعوا رجاله ..

وهما بيقولوا .. وانا بقول .. وعجبي

الجمعة, أبريل 25, 2008

 
Blogger بثينــــــة said...

أكيد القلة المندسة دي عندها اختلال عقلي ومش مقدرين إن صحافتهم الحمرا دي بتعمل زعزعة وخلخلة ونطورة في أم مجتمعنا الهادئ
أنا'أربأ' بك يا باش مهندس انك تتابع الناس'الموتورة'دي لأنهم مش شايفين غير نص الجردل الفاضي
وبعدين ما انت عارف المبدأ
القافلة تعوي والكلاب تسير
‏*‏
سيبك انت دة حتي الحياة بأة لونها بمبي

الجمعة, أبريل 25, 2008

 
Blogger A.SAMIR said...

في حد يجيب مجلات مغرضة زي دي؟
المجلات اللي تقرا مجلات تانية خالص
مجلة روتانا مثلا
سيدتي
هي دي الثقافة المطلوبة
تحياتي

الجمعة, أبريل 25, 2008

 
Blogger اسكندراني اوي said...

برضه كده يا هندسه
سلام ما شربتش من نيلها
ماشي
عموما بلاش تجيب المجلات اللي من النوع ده عشان بيقفشو بره
ههههههههههههههههههههههههههه

الجمعة, أبريل 25, 2008

 
Blogger мσнη∂ιš said...

كل دي إشاعات و كلام ملهوش عندك إثبات

الجمعة, أبريل 25, 2008

 
Blogger allfollowsome said...

ههههههههههههههههههههههههه

على رايك هما اللى بيقولى بس سمعنى انا بقى سلام

تاتتك يا مصر وتاتت نيلك تاتت اللى يخرج منك ويرجع يجيلك

قصيدة تاتيات اللى هى بتساوى

........

الجمعة, أبريل 25, 2008

 
Blogger Nsreen Bsunee said...

يا تري مين ورا بتوع المجله ؟؟؟

الجمعة, أبريل 25, 2008

 
Blogger بنت القمر said...

يا عم مركبي الخط اصفر ومش باين خالص ورفيع طب خليه بولد حتي!!
عنيا باظت وانا ببص!!
************
هي الجله دي بتطلع منين او تبع ايه؟؟ بجد مش هزار
تحياتي

الجمعة, أبريل 25, 2008

 
Blogger سنووايت said...

وهم مين اللي قالهم يقولوا كدة!!
مش خايفين

السبت, أبريل 26, 2008

 
Blogger يا مراكبي said...

خمسة فضفضة

وعليكم السلام ورحمة الله وبركاته

طبعا من الواضح إن المجله دي عميله طبعا وكلامها كله غلط في غلط .. ده حتى ما فيش أي إشارة عن الرخاء الإقتصادي اللي بننعم بيه من ربع قرن .. ناس وحشة



**********************


مـحـمـد مـفـيـد

أي خدمة

وبعدين ده هما اللي بيقولوا إن فيه طوابير عيش مش أنا .. وإنت أهو بتؤكد إن مافيش طوابير ولا حاجة .. لكن أفهم من تعليقك إن العدد الجاي هيكون صورة الغلاف عن الجرادل؟ دي تبقى مسخرة



*******************


Ahmed Mubarak


صح .. دائما علشان مصر في الصداره بتيجي علينا اشاعات مغرضة .. وفيه مثل صيني بيقول: إذا ركلك البعض من الخلف فأعلم أنك في المقدمة

شفت بقى الفولة فين؟

وعجبي برضه



********************


بثينــــــة

حلوة قوي كلمة أربأ دي .. بقى لي 10 سنين ما سمعتهاش

ليا بس سؤال: ياترى نص الجردل الفاضي اللي تقصديه .. هو نفسه الجردل الي إتكلم عنه مفيد فوق؟

ملحوظة: الحياة كانت لونها بمبي .. دلوقت بقت فوشيا



******************


A.SAMIR

أنا معاك . .أنا لازم أتابع مجلات أقيم من كده .. ممكن أرجع لميكي وماجد وتان تان هيكون أفيد ليا وليكم وللشعب كله



**********************

السبت, أبريل 26, 2008

 
Blogger يا مراكبي said...

اسكندراني اوي

ياريت توضح: اللي بيقرأ المجلات دي بيقفشوه بره وألا بيروقوه جوة؟

ياريت تحدد ضروري الله يكرمك



**********************


мσнη∂ιš

أنا معاك يا معلم .. ما فيش إثبات طبعا .. وهما اللي بيقولوا

ههههههه




******************


allfollowsome

حلوة قوي قصيدة تاتيات دي .. تحفة

تبيعها بكام؟



*******************


Nsreen Bsunee

بيبسي طبعا .. أنا حافظها من ساعة مباريات كأس الأمم الأفريقية



********************


بنت القمر

أولا بالنسبة للخط .. المشكلة عندك في تظبيط الشاشة .. والحل كالتالي:

روحي فوق ناحية
View

إختاري
Text Size

وبعدين إختاري
Largest

هتلاقي الخط بقى واضح وزي الفل

ثانيا .. المجلة دي مجلة إقتصادية متخصصة شهيرة جدا ومنتشرة في الخليج العربي وأغلب الشركات مشتركه فيها بإشتراك شهري لأن تمنها بيصل إلى أكتر من 1500 دولار في السنة

ممكن تشوفي موقعهم على الإنترنت لكن مش هتقدري تحصلي على تفاصيل دقيقة إلا للمشتركين .. وأي شركة بتحب تحصل على معلومات إقتصادية عن السوق والمشروعات اللي في المنطقة لازم يعتمد على المجلة دي .. الموقع أهو
http://www.meed.com/index.html




******************


سنووايت

أكيد زمانهم خايفيين دلوقت .. هما فاكرين إن الحكومة بتاعتنا مش هتجيبهم؟

السبت, أبريل 26, 2008

 
Blogger إنـســـانـة said...

لالالالالا .. انا اهو خريجة اقتصاد وبقولك الكلام ده مش صح خالص

مصر؟ .. هو فى بلد زى مصر؟

زوق ايه .. واخلاق ايه .. ورفاهية ايه .. وفلوس ايه

ايييييييه اقول ايه ولا ايه انا .. دى بلد زى الفل يا جدعان .. بس ظالمينها المفتريين

اوعى كدة ماتحوشنيش لازم ينضرب اللى قال كدة على بلدنا فى المجلة دى

بلا كلام فارغ .. قال طوابير وعيش قال .. ايه الناس دى؟

السبت, أبريل 26, 2008

 
Blogger دنــــيــــــا مـحـيـرانـي(ده حالي اما اسمي ايناس لطفي said...

هههههههههه
احلي حاجه كايده العزال ديه
انا بضحك علي حالي و حالي بلادي
شر البليه ما يضحك
تحياتي يا مثقف

السبت, أبريل 26, 2008

 
Blogger عدى النهار said...

مش فاهم ليه بيقولوا معدلات النمو ومش بيقولوا معدلات التدهور مع إنها أنسب؟ ماعلينا.. أعتقد إن كل طرف - المجلة والحكومة - حسب المعدلات من وجهة نظره وحسبها صح ويقدر يدافع عنها رغم الفارق الكبير بين الحسبتين. كان فى وزير إقتصاد أيام السادات حلف بأمّه إن الميزانية حققت فائض كبير.. كل طرف بيحسبها بالطريقة اللي تريحه

السبت, أبريل 26, 2008

 
Blogger HafSSa said...

يا فندم اذا كانت الوول ستريت بنفسها نشرت تحقيقات عن الموضوع
و مجلات امريكية تانية محلية جابت سيرة لكن ده ميمنعش ان الحكومة كلامها صح و ان كل مصادر اخبارك يا امريكا غلط
شفت انت بقى
طيب بذمتك انت حتصدق الحكومة و لا شوية جرايد مش مهمة امريكانيه ممكن تكون لفقت الخبر بالفوتوشوب؟؟
استغفر ربنا
:)

السبت, أبريل 26, 2008

 
Blogger محمد عبد الغفار said...

الحقائق يعرفها الجميع سواء نشرت اولم تنشر تم تصديقها او تكذيبها

انما الكل يتعامى عن دوره كسبب فى هذه الحقائق ولا يرى الا ادوار الأخرين

السبت, أبريل 26, 2008

 
Blogger Esmeralda said...

ايه داااااااااااااااااااااااااااه يعني بتوع القناه الاولي و البيض بيضك و الاهرام و الاخبار كدابين ؟؟؟
اووووووووووووووووووووووووووو

السبت, أبريل 26, 2008

 
Blogger Ahmed Essawy said...

بصراحه عندهم حق و هما مغلطوش و الناس في مصر عارفه الكلام دا كلو .... رغم ان هما ملهمش دعوه بينا ... بس برضو هما ماتبلوش علينا .. :$:$

السبت, أبريل 26, 2008

 
Blogger رؤية said...

هما بتوع المجله المغرضه دي مقلوش
ان الواقع اللي هما بيتكلموا عنه دا
اقصي بكتير من ان الارقام تجسده

السبت, أبريل 26, 2008

 
Blogger allfollowsome said...

مش انا المالك للاسف

عموما هى ملكة عامية ممكن تلاقيها على اى موبايل

السبت, أبريل 26, 2008

 
Blogger a.aTeYa said...

بالنسبه لقصيده "التاتيات" .. عندى دى يا هندسه .. ارفعهالك قريب .. تصدير عبد الحميد نسخه اوريجينال على فكرة :D

و بالنسبه للمجله فدى مجرد مجلللللللله .. يا جماعه صدقونى .. دى زوبعه فنجان :S

الأحد, أبريل 27, 2008

 
Blogger يا مراكبي said...

********


إنـســـانـة

نداء إلى المغرضين بتوع المجلة .. أهو الباشمهندسة إنسانة (أم مها) خريجة إقتصاد منزلي قد الدنيا وعلى وش جواز وبتقول إن الكلام ده كله مغرض وفيه تشويه للحقيقة .. لازم تنزلوا تكذيب وإلا هتوريكم العين الحمرا

أي خدمة



*******************


دنــــيــــــا مـحـيـرانـي(ده حالي اما اسمي ايناس لطفي

بجد والله .. الواحد فعلا بيضحك من غلبه

المرة الجاية هنطلب أغنية أمه نعيمة .. نعمين

مثقف دي شتيمة؟



********************


عدى النهار

إنت بس تعكس المقالة وهتلاقي الأرقام الفعلية الصحيحة اللي بتعبر عن التدهور

وعلى فكرة .. هما لسة لحد دلوقت بيحلفوا وممكن تطلع فتوى بإن الميزانية فيها فائض كمان



*******************


HafSSa

منورة يا فندم

أنا أحب أجاوب على سؤالك اللي في التعليق: طبعا هأصدق الحكومة المصرية .. أنا عايو أعيش متصان برضه

وهأستغفر ربنا لأني قريت مجلة إباحية زي المجلة الإقتصادية المغرضة دي

أهلا بيكي



********************


محمد عبد الغفار

وجهة نظر سليمة .. فالكل مشارك في المشكلة بسبب أو بآخر دون أن ندري .. أو أننا ندري لكننا ننكر



********************

الأحد, أبريل 27, 2008

 
Blogger يا مراكبي said...

*********


Esmeralda

ما عاش اللي يقول عليهم كدابين .. دول أسيادنا وتاج رأسنا كمان

خلينا جوة الحيط يا أزميرالدا



******************


Ahmed Essawy

المجلة محايدة جدا .. هي بتقدم خدمة دراسات السوق الإقتصادية للمشتركين ولازم ما تخبيش الحقايق اللي ممكن تأثر على القررات الإقتصادية وتوجهات المستثمرين .. وهي دي المصيبة .. إن الأخبار دي بتطفش الإستثمار



******************


رؤية

هما ما قالوش إن الواقع أسوأ .. بس عرضزا صور كتير بتعبر عن الواقع الأكثر إيلاما .. والصورة بتساوي ألف كلمة زي ما كلنا عارفين



*****************


allfollowsome

لما أنزل مصر بقى إبقى إبعتهالي بالبلوتوث .. ماشي؟



****************


a.aTeYa

واضح إني مغيب عن مصر وألا إيه؟ الكل عارف القصيدة دي إلا أنا؟

حلوة زوبعة في فنجان دي .. نفسي أشوف زوبعة كبيرة جوة فنجان قهوة بتيقى عاملة إزاي

الأحد, أبريل 27, 2008

 
Blogger أحمد كمال said...

على فكرة أنا أخاف حد يعتبر المجلة دي منشورات ، و بصراحة بقى شكلك كده مغرض و عايز تعمل مشكلة ، و بعدين في الأول و في الآخر يقولوا اللي يقولوه و أعلى ما في خيلهم .. يركبونا

الأحد, أبريل 27, 2008

 
Blogger Najwan said...

ايه دا دي فضيحه هي الصورة دي بجد!
بس ايه بقى اوعي وشك من الثقافه الى انت فيها (:

الأحد, أبريل 27, 2008

 
Blogger hend...hanady said...

طب مشربتش من نيلها ده برضه بتوع المجلة اللى بيقولوه
بس اظاهر ان المجلة دى متعرفش المصريين كويس لانها لو عرفت ان فيه ناس بيشتروا العيش للطيور وجيرانهم مش لاقييين ياكلوا ولو عرفت ان فيه ناس مش لاقية تاكل وبتشترى حشيش ومخدرات وتقولك علشان ننسى هتقول علينا بلد العجائب

الأحد, أبريل 27, 2008

 
Blogger shreef said...

و الله يا بشمهندس الناس ديه بتقول كلام زي الفل .. مين دول اصلا ؟؟ .. و بعدين يا بشمهندس الناس ديه ينزلوا يقعدوا معانا كام يوم في مصر اسبوعين كدا ولا حاجة يكلوا عيشنا و يشربوا ميتنا و يركبوا موصلاتنا علشان يكتشفوا ان اد ايه هما كانوا غلطانين بأن مصر لا ينطبق عليها اي كلام من الكلام الفاضي اللي بيقولوه ده

هينطبق عليها انيل من كدا بكتير
مش كدا بردو
:(

تحياتي ليك يا بشمهندس وللناس اللي كتبوا الكلمتين دول

سلام

الأحد, أبريل 27, 2008

 
Blogger Tamer Nabil said...

مدام اغراب اللى طلعت اللى الاشاعات دى


اية رايك نرفع عليهم قضية

واكيد الصحافة ختتكلم عننا

وختبقى من المشهورين هههه


تحياتى

الأحد, أبريل 27, 2008

 
Blogger فاتيما said...

يعنى انت مصمم تحرق دمك ليه بس ؟؟
بلاش الحاجات المغرضة دى هيا اللى هتوقف عجلة الانتاج و تصيب المستقبل المشرق فى مقتل
لا تقرأ هذه التفاهات دى عالم عايزة تبيع و توزع
بص بقى أنا بمررلك تاج يا مراكبى يا ريت تقبله منى و تجاوب بقى
أكتب 10 حاجات عن نفسك
و مرر التاج ل5 مدونات لم تجب عن هذا التاج بعد و أذكر السبب فى أختيارك للخمسة دول تحديدا اذا أمكن
و تحياتى يا نبع الحكمة بتاعى

الاثنين, أبريل 28, 2008

 
Blogger حزيــــــــــــــــــن said...

لا حول ولا قوة الا بالله
للاسف الشديد المفروض ان دى بلدى

الاثنين, أبريل 28, 2008

 
Blogger Hannoda said...

هههههه

عارف ؟؟ كلامك دمه خفيف جدا ويضحك و تلاقيك كده فوسط الضحك تحس بحاجة مغروسة في قبك فتلاقيعنيكبتدمع و انت ولا عارف نفسك بتضحك و لا بتعيط
الضحك مصدقه و حاسه
و احزن برضه و بنفس الصدق

نفسي أوف البلد ده واخدة امكان اللي تستاهله
بجد نفسي

تعرف؟
لما حد يسألني اذا رجعتي مصر حاتخدي كام و أقوله آخري 600 جنيه- بغض النظر عن إني أجنبية يعني- بيزبهل
وبعدين يقول .. آه.. تلاقي الاسعار عندكوا مش زي هنا
فأفكر
ألاقي ان الزيت هنا 8 ريالو مصر تسعة جنيه
و الموبايل هنا 1200 ومصر 1500

فأقوله لأ هي هي
و أخبي جواي إنها أكتر

بس حارجع
حارجع يعني حارجع

الاثنين, أبريل 28, 2008

 
Blogger dodda said...

يا مراكيى
تكتب اللى يعجبك وثقرا اللى يعجبك وتصدف اللى يعجبك...احنا فى بلد ديموقراطى..يس ليا غتاب واحد
ازاى تفول سلام مشربتش من نيلها
وتتجاهل سلام القمح الليله مع ان نفسى فى البليله من شهر..!!!
ارجو تدارك هذا الخطأ

الاثنين, أبريل 28, 2008

 
Blogger يا مراكبي said...

*************

أحمد كمال

هههههه .. حلوة يركبونا دي .. قفشة حلوة بجد

القفشة دي مغرضة برضة وتعتبر برضه منشورات على فكرة



*******************


Najwan
أنا هأوعى وشي وقفايا كمان بسبب الثقافة الل جايبالي الكافية دي

ههههههه



******************


hend...hanady
لأ التعليق الأخير ده من عندي أنا .. لازم أعترف بالذوق

مصر بلد العجائب .. 80% من شعبها بيتقاسم 6% من دخل البلد .. وفيه 6% من شعبها بيتقاسم 67% من دخلها

وعجبي قوي



*****************


shreef

لأ والنبي بلاش موضوع ينزلوا مصر يومين ده .. خلينا كده مستورين الله يكرمك

بلاش نقول تحياتنا للمجلة دي .. ماحدش عارف بكرة فيه إيه .. خلينا نشجبها أحسن

هههههه



*******************


Tamer Nabil
أنا معاك في موضوع رفع القضية ده .. إيدي على كتفك .. أهو يبقى إسمنا مؤيدين للحكومة ونبقى في السليم



********************


فاتيما
علشان خاطركم إنتم هأبطل أقرأ الحاجات دي .. وأهو نبقى في السليم برضه
وبعدين إيه ده؟ تاج ليا أنا؟ ده أنا غلبااااااان
صعب قوي التاج ده .. قوي .. بس هأحاول فيه جامد

عجبتني جملة: أذكر السبب فى أختيارك للخمسة دول تحديدا اذا أمكن ؟
حسيت كده كأنك بتقولي: علل
خالص تحياتي



*******************


حزيــــــــــــــــــن

أيوة للأسف .. هي دي أكتر كلمة بتعبر عن اللي جوايا بجد

منور



*****************


Hannoda

شوفي .. دايما شر البلية ما يضحك .. وإحنا بنضحك من غلبنا مش أكتر

تعرفي إنتي بقى .. أنا فيه أجانب كتير قالولي إنهم لما بيشووا مستوياتنا العالية في شغلنا كأفراد .. ما بيبقوش مصدقين إن البلد المتهورة هناك دي هي بلدنا

يا بختك .. هناخدي 600 جنبة .. ده رقم كويس جدا على فكرة



*******************


dodda
وعندك واحد سلام بتاع البليلة للمعلمة دودا وصلحه

أي خدمة

يعني الناس مش لاقية العيش .. نقوم نعمل بالقمح بلييلة؟ ده كلام برضة؟

الثلاثاء, أبريل 29, 2008

 
Blogger Sampateek said...

اه طبعا الامن مستتب و الناس اللي بتموت في طابور العيش دي ناس مقطعة بطاقتها و بيموتوا من كتر اكل البطارخ اللي الكيلو منها ب300 جنيه
انما الحكومة بتشاعتنا
دي روحي روحي روحي

و ربنا يسامحني
تحياتشي

الثلاثاء, أبريل 29, 2008

 
Blogger Rainbow said...

و الله هم يبكى و هم يضحك
سيبك من ليه كتبوا فى السياسة مع انهم اقتصاد
اللى يحزن بجد ان يكون العالم كله عارف عن حال مصر ده و تلات تربع المصريين ميعرفوش ان ده حالهم .. و اللى عارفين ان ده حالهم بيسخروا من قلة الحيلة و الكبت
كل واحد علق هنا و كان تعليقه ساخر و مضحك وجعنى اوى لانى حسيت بالمرارة جواهم اكتر من التعليقات الجادة :(

ربنا معاكى يا مصر و مع اهلك


تحياتى

الثلاثاء, أبريل 29, 2008

 
Blogger Rania said...

هقول ايه بيجيبوا فى سيرتنا ليه بس
و بعدين فعلا ازمة العيش الحمدلله قربت تتنهى
هقول ايه
المؤمن ديما منصاب
:)
لك عندى تاج طازة
صباح السكر

الأربعاء, أبريل 30, 2008

 
Blogger أحمد سلامــة said...

ياساتر يارب على المجلات الخضرا دي وسنينها البيج
يعني مش شايفين الازدهار والخير والهنا اللي احنا فيه
متقوللهم ي امراكبي
طب انت شفت الهنا اللي احنا فيه ؟؟

الأربعاء, أبريل 30, 2008

 
Blogger loumi said...

ناس وحشين

ده أنا إللي باقول
وما تبقاش تشتري المجله دى تاني

كل حاجه فُن الفُن

سلاااااااام

الأربعاء, أبريل 30, 2008

 
Blogger يا مراكبي said...

*********


Sampateek

أولا .. يعني إيه البطارخ دي؟

ثانيا .. الحكومة بتاعتنا دي روحنا كلنا .. البوست اللي جاي هأنزل فيها قصيدة شعر أحسن من بتاعة اللمبي

وربنا يسامحني أنا كمان .. مضطر أعنل كده



*******************


Rainbow

أيوااااه .. تلات تربع المصريين ميعرفوش ان ده حالهم .. جهل مركب .. وتعتيم إعلامي

والناس هنا بتضحك من غلبها .. ومن وجع قلبها على بلادنا .. هو أنا متغرب للفسحة مثلا؟ ما هو من غلبي هأعمل إيه

ربنا يصلح الحال



*********************


Rania

ناس ما عندهاش دم بعيد عنك .. قدرنا كده .. الدول الكبرى قدرها كده


والتاج ده بجد صعب قوي .. ما فيش إختيارات؟
طيب حاجة أسهل من كده شوية؟

قصدك صباح السكر من اللي عليها سكون على حرف الكاف وألا اللي عليها شدة؟



********************


أحمد سلامــة

أولا إحنا سنيننا لونها بمبي مش بيج ..اللي هو زي الكحلي كده

أنا هأسمع كلامك وهأراسل المجلة دي وهأحكيلهم عن الإزدهار المتلقح في كل حتة مش لاقي حد يشيله من عالأرض .. من عينيا الإتنين ومناخيري كمان



*********************


loumi

خلاص حرمت بجد .. أنا هأقاطع المجلة دي وشوفي بعد كده هيعيشوا منين

ده أنا اللي بأقول برضه

الخميس, مايو 01, 2008

 
Blogger غراب said...

السلام عليكم ورحمة الله و بركاته
..............................

تؤ تؤ تؤ تؤ
بقي دة اسمه كلام
يا اخوانا الامن مستتب و كله بياكل عيش
و الدنيا زي الفل همة بس اللي غاوين خبطات صحفية
و النبي دي كلها اشاعات D:
شكلهم مش بيتفرجوا علي أخبار مصر بتاعت الساعة 9

و لسة يا ما هنشوف

الخميس, مايو 01, 2008

 
Blogger يا مراكبي said...

غراب

بالظبط كده .. هي الخبطات الصحفية بتيجي من تهويل الأمور وتزييف الحقائق .. مع إن الواقع زي الفل .. أنا بأحيي الحكومة

الجمعة, مايو 02, 2008

 

إرسال تعليق

Links to this post:

إنشاء رابط

<< Home