هما اللي بيقولوا

إيه الصورة اللي فوق دي؟ الصورة دي ما هي إلا غلاف العدد الإسبوعي من مجلة إقتصادية دولية شهيرة متخصصة في الشئون الإقتصادية للشرق الأوسط القديم .. المجلة دي إسمها "ميد" وأنا بحكم إني غاوي وجع دماغ بأتابعها بإستمرار .. دي مجرد مقدمة علشان تعرفوا منها إني راجل مثقف وحركات كده .. المهم
.
المجلة دي خصصت نص عدد صفحاتها للكلام عن مصر.. وعنوان الغلاف اللي إنتوا شايفينه فوق ده بيتكلم عن الدعم اللي بتقوم بيه الحكومة المصرية تجاه الشعب المصري برضه .. ماحدش يبتسم هنا لو سمحتم .. المهم فتحت أول الموضوع لقيت كلام غريب جدا بيقول: عبر تاريخ مصر الطويل كانت الأراضي الخصبة حول ضفتي أطول أنهار العالم هي المورد الرئيسي لهذا البلد العريق .. وقد كانت مصر هي أهم مصدر للقمح بالنسبة للإمبراطورية الرومانية لمدة تزيد عن 500 عام .. لكن حال مصر الحديثة في يومنا هذا لا يمكن أن يكون أسوأ مما هو عليه الآن .. فقد أصبحت مصر هي أكبر مستورد للقمح في العالم .. ده بتوع المجلة هما اللي بيقولوا كده مش أنا
.
ومكتوب كمان: إن التقارير الحكومية توضح أن معدل النمو للناتج المحلي في تزايد مستمر فقد وصل معدل النمو إلى أكثر من 7% وإنخفضت نسبة البطالة من 12% عام 2004 إلى 9% في عام 2007 كما أنه مخطط أن يقل عجز الميزانية من 7% هذا العام إلى 3% فقط بحلول عام 2011 لكن الواقع بين الناس وفي الشوارع يعكس شيئا مختلفا .. فالناس يقفون لمدة قد تصل إلى 7 ساعات في طوابير للحصول على الخبز .. كما أنه قد توفي 15 شخصا في تلك الطوابير .. إما بسبب العراك أو بسبب التعب وحرارة الشمس .. كما أن هناك 40% من أفراد الشعب يتقاضون أقل من 2 دولار في اليوم الواحد .. بالإضافة إلى أن مصر تستورد سنويا 7 مليون طن قمح وهو ما يعادل نصف ما تحتاجه مصر من قمح .. ده بتوع المجلة هما اللي بيقولوا كده مش أنا
.
ومكتوب كلام تاني غريب جدا عن إن فيه إضراب عملوه أساتذة الجامعات يوم 15 مارس .. وإضراب تاني عملوه عمال النسيج وإنضم ليه طوائف كتير من الشعب يوم 6 إبريل .. وإن الحكومة المصرية بتفكر في إنها تقلص من دعمها للمواد الأساسية للمواطنين وإن ده بيعيد للأذهان أحداث يناير 1977 لما حاولت الحكومة ساعتها إنها تقلل من دعم رغيف الخبز وحصلت أحداث شغب كبيرة مات فيها 70 شخص .. ده بتوع المجلة هما اللي بيقولوا كده مش أنا
.
ده غير بقى شوية كلام مغرض عن إنتخابات المحليات والمعارضة والإخوان المسلمين والوزارة الحالية ونظام الحكم وحاجات كده .. أنا مش عارف إيه علاقة كل الحاجات دي بالإقتصاد؟ وإيه اللي دخل مجلة إقتصادية متخصصة في إنها تتكلم عن الأمور السياسية دي؟ وأنا من موقعي هنا وأنا قاعد على السرير بأشجب كل الكلام المغرض اللي إتقال ده وبأقول إن كل شيء زي الفل وسمعني سلام ما شربتش من نيلها وبالمرة كمان أحب أسمع أغنية كايدة العزال أنا من يومي .. إيوه أه