شد القلوع يا مراكبي ... مافيش رجوع يا مراكبي

الخميس، فبراير 12، 2009

الموضوع ليس فلافيو

في اللحظة التي ''رفع'' فيها اللاعب ''جيلبرتو'' الكرة بقدمه اليسرى لتصل إلى مهاجم النادي الأهلي ''فلافيو'' الذي أودعها برأسه في مرمى النادي الصفاقصي التونسي .. كان المذيع يؤكد لي ولكم بأن هذا المهاجم الأنجولي بات المنقذ الوحيد للنادي الأهلي في جميع مبارياته الأخيرة
.
قد يبدو الموضوع عاديا بالنسبة للكثيرين .. لكنه في واقع الأمر يطرح سؤالا مهما: هل نضب الشعب المصري (والذي نتفاخر باقتراب تعداده من الثمانين مليونا) في أن يكون لدينا مهاجمين مصريين يكونون هم المنقذين في جميع مبارياتنا الأخيرة؟ أسمع أحدكم يقول إن لدينا أبوتريكه لكنه كان مصابا .. ولدينا زيدان وأحمد حسام وعمرو زكي وحسام غالي لكنهم محترفين بالخارج .. وكان لدينا متعب والذي أعرف أنه يقطن هنا في مكان ما بمدينة جده
.
إذا لم ينضب الشعب المصري بعد .. لكنها الأرض التي تلفظ أغلب المتميزين فتبدو جرداء من المواهب .. ثم نجد أنفسنا مضطرين لإستيراد مواهب بديله بأموال طائلة كان الأحق بها هو إبن البلد .. وربما في مجالات أخرى قد لا نستورد أي موهبة من الخارج لنزداد تخلفا وإبتعادا عن الركب العالمي
.
وفى إطار الحديث عن الركب العالمي .. والتطور الذى تكاد تلمسه بيديك ما دمت مغترباً ..أنت تلمسه وتكاد تبكى لأنك أدركت الفارق .. لأنك تسأل نفسك فى كل لحظة .. ما الذى صنع هذا الفارق؟ وكيف لا يدركون عندنا "مجرد وجود" هذا الفارق؟ لماذا يستكين الذين عبروا الحدود لإحساسهم بالفهم .. وخلاص.. ويستكين من ظلوا بالداخل للفهم المطموس المغلف بالشعارات والتصريحات وخلاص؟
.
لماذا تجيب بفخر عندما يسألونك عن جنسيتك: أنا مصرى .. وكأنك تسكن كتاب التاريخ ولا تريد مغادرته .. وربما تنتبه بعدها (أو لا تنتبه) إلى أن السؤال كان بسبب تميزك الذى يشير إلى انك من المفترض أن تنتمي لجنسية اخرى غير مصر .. فسألوك ليتأكدوا: بجد إنت مصري؟

.
ويظل سؤالى: لماذا كتب على كثير منا أن يحرز أهدافاً فى صالح الآخرين؟ ولماذا يشترون فلافيو .. بينما هناك رؤوساً كثيرة فى الداخل زي الفل يمكنها ان تشوط وتحرز اهدافاً وتحصد بطولات؟
سمعت أن فلافيو سيرحل عما قريب
.
على الهامش: منير يغني لمصر
ليه تستكتي للزمن؟ إتكلمي
ليه تدفعي وحدك الثمن؟ إتكلمي
وتنامي ليه تحت الليالي؟ إتكلمي
المشربيات عيونك
بتحكي عاللي خانوكي
واللي سنين هملوكي
جوه البيبان سلسلوكي
ليه تستكتي للزمن؟ إتكلمي
المشربيات عيونك
بتحكي على خلق ولت
سهرت .. وصلت .. وعلت
في الصخر شقت ما كلت
أنا إبن كل اللي صانك
رمسيس وأحمس ومينا
كل اللي زرعوا في وادينا
خيمة تضلل علينا

التسميات:

44 Comments:

Blogger david santos said...

Excellent posting!
Have a nice day!!!!

الخميس, فبراير 12, 2009

 
Blogger قوس قزح said...

هى المشكلة فى البلد انها مش بتعرف قيمة ولادها ولا المشكلة فينا اننا لما نتغرب بنمشى عدل

الجمعة, فبراير 13, 2009

 
Blogger tota said...

سامعه سيرة حد بيتكلم عن مصر وبيشتكي ؟؟؟؟؟؟؟؟؟؟؟؟؟؟ مين ده اوعي تكون انت يامراكبي لالالالا اكيد مش انت
طب وهوة بره مصر ده مفبهوش وحش يعني وكله حلو وكامل؟؟
مرجعش يعني يامراكبي وافضل في غربه يعني ولاايه؟؟

الجمعة, فبراير 13, 2009

 
Blogger ـ-ـ- أحمد عبد العدل-ـ-ـ said...

مش لاقى كلام والله ياباشمهندس
مكتوب الحكاية تبقى ناقصة جواها والدنيا صعبة أو براها وعايشين فى دنيا تانية وبرضه الدنيا صعبة
ياننساها زى ما كتير عملوا وتاهوا ومبقوش يحسوا لا بصعب ولا بسهل

هنشوفها بخير أكيد يامراكبى ولاً ايه بقى؟

عدتَ بخير أستاذى

الجمعة, فبراير 13, 2009

 
Blogger marmar said...

المشكله اننا عايزين نكون احسن واحسن واحسن ف كل المجالات عشان كده بنعمل المستحيل عشان نرفع من مستوى الشعب ادام غيرهم
فبنشتري وبنعمل ونسوي مع اننا لو دورنا كويس جوا بلدنا هنلاقي فيها احسن من فلافيو وجلبرتو
اديني انت المليون يورو بتوعهم كل سنه وانا اعملك مصر من جديد ههههههه

الجمعة, فبراير 13, 2009

 
Blogger esraa said...

انا شايفه فعلا ان عندنا لاعيبه كتير بره احنا محتاجينها أكتر
لكن بيقولو ان ده مستقبلهم ولازم نسيبهم يشوفوه

كلامك عن مصر بصفه عامه صح جدا

أتمني ان في حد يفهمه ويقدره

الجمعة, فبراير 13, 2009

 
Blogger مـحـمـد مـفـيـد said...

لاء
لان كل الناس بتعطي الفرصه وبعدين تحكم
الا احنا
مش بنأخد الفرصه كامله
وحتي لو خدناها بتحس وكأنها حسنه بيجودوا بيها علينا

الجمعة, فبراير 13, 2009

 
Blogger Nsreen Bsunee said...

والله يا احمد انا عيطت و انا باقرا التدوينة ديه
:(
كلامك صح مليون المية
ده عامل البوفيه البنغالي"آركس" مش مصدق ان انا مصرية عشان باعرف اتكلم انجليزى مع ان كلامي معاه لا يتعدي عاوزه كباية شاي ولا قهوة و شكرا و خلاص
عندي هنا مديري الادارات المصريين مش يعرفو انجليزى ابدا ولا بيفهموا في اقل قواعد الذوق عشان كده في كل موسم تفنيشات المصريين بيكون ليهم حظ الاسد لاننا للاسف كمان مش بنحسن من نفسنا ابداً في حين ان زميل و صديق لبناني عزيز جه الكويت و هو حلاق دلوقتى بقي مهندس كمبيوتر
و المصريين بييجوا خريجين جامعه و بينتهوا لانهم يبقوا حراس امن
:((
:(
:(

الجمعة, فبراير 13, 2009

 
Blogger دردشة على الماشى said...

على فكرة إنت ناسى إن السبب فى إن فلافيو وصل للمستوى دة هو جوزية اللى كان شايف فية حاجة إحنا مش شايفينها وفضل صابر علية سنة كاملة وفجأة بقى فلافيو الخطير
يعنى أنا عايزة أقول إن إحنا فعلاً ما بنعرفش نكتشف أى حد ولو كان فية مدرب تانى غير جوزية أو كانت إدارة الأهلى بتتدخل كانت هذة الموهبة ماتت من زمان
يعنى العيب فينا إحنا
تحياتى للبوست الجميل
وكل سنة وانت طيب
سلام

الجمعة, فبراير 13, 2009

 
Blogger صدى الصمت said...

عموماً أنت عارف إن أنا علاقتى بالكورة ضغيفة ومابأعرفش اللعيبة من بعضها بس شايفة فى البوست كلام أهم من الكورة بكتيير فعلاً الموضوع ليس فلافيو المشكلة مشكلةشعب كامل بعاداتة وتقاليدة وتصرفاتة وأهدافة وطموحاتة و و و و
كفاية كدة
سلام

الجمعة, فبراير 13, 2009

 
Blogger dodda said...

منير
دا انا مفروسه منه

سكت غنى دهرا ولما عمل لقاء بعد طول السنين دى هرتل لما شبع!!!
انا مش مسامحه قناة الحياه اللى تاجرت بيه

ولا مسمحاه لان معتقدش انه محتاج اللى اتدفع فى اللقاء ده بشكل ملح
اعتفد ان الفلوس ادمان اللهم احفظنا..


البوست مؤلم اوى يا مراكبى
وخصوصا انك شديت القلوع....
المشكله هى التشويه
حاى الحلو اللى جوانا مستكترين علينا نحتفظ بيه...

الجمعة, فبراير 13, 2009

 
Blogger Rania said...

احنا مش واثقين فى نفسنا و ديما عيونا على اللى فى الخارج على انهم احسن و افضل مننا
و دة فى حد ذاته اكبر كارثه

الجمعة, فبراير 13, 2009

 
Blogger kochia said...

هو مين فلافيلو ده ؟؟؟
حلو اوي سؤال لماذا كتب على كثير منا أن يحرز أهدافاً فى صالح الآخرين

انت قلته كدة ومش هتجاوب عليه ؟؟
مش عارفة ليه
يمكن عشان بنعتقد ان الاخر افضل دائما
ايا كان هذا الاخر !!!
لا يوجد عندنا ثقة في بعض ربما
او ربما لان البعض منا لا يخلص العمل فاكتسب السمعة السيئة ثم عممت

العيب في المنظومة ؟؟ ام في الفرد ؟؟

بحب اغنية محمد منير اوي
حلوة
تحياتي

الجمعة, فبراير 13, 2009

 
Blogger اعشق فى الليل ضوء القمر said...

يا هندسه فى بلادناعقده الخواجه موجوده منها عقده الخواجه فعلا ومنها لا مينفعش يعمل ده وبعد كده يبقى أحسن منى لا نجيب واحد من بره ومنهم نجيب ن بره ننفع و نستنفع
انا فى شغلى حصل مشكله فى أحد المكينات وقلت أعملها أنا أنا شايف قدراتى تسمح بكده وخد بالك إنى بشتغل فى نفس المكان إللى فيه مشكله
لقيت كل ما قلته من قبل حدث
وجابوا واحد من بره وصلح الدنيا وهبش هبشه كان بياخد 500 يورو فى الساعه غير تكلفه السفر والمكوث و الفسح و إللى .... إنت فاهم
وبعد كده مطالب منى إنى أعرف هو عمل إيه علشان أعمل أنا مش عايز أقولك إنى كنت بعمل كل حاجه مجرد يتكلم و المترجم بيقول إيه إللى عايزه وأنا أنفذ
مش عايز أقولك كنت حاسس بـ إيه وقتها
تخيل وقت وتكلفه وخساره
انا كنت هعملها من غير فلوس ده لو إدانى 50 جنيه كنت هنبسط و أزقطت
من عارفنا بنحب الكلمه الحلوه و التقدير خصوصا فى شغلتنا ديه بس انا مسكتش عرفت صاحبه المصنع بذلك وطبعا إنت عارف بقيت القصه
لعنت اليوم إللى فكرت أقول لها و اليوم إللى قلت إنى بفهم و بعرف

السبت, فبراير 14, 2009

 
Blogger سلسبيل said...

مش عارفه انا بدات اقتنع ان المصريين بقي ينطبق عليهم المثل القائل
مالهمش ف الطيب نصيب
بجد انا بقول الكلمه دي وانا كلي غيظ وصعبان عليا اننا وصلنا للحال ده
كل المواهب الجميله اللي وسطنا يااما هربو بره البلد يااما مدفونين بالقهر ومحدش يسمع عنهم
حاجه تزعل فعلا
اعتقد الحل الوحيد هو اننا نتبع المبدأ القائل انسف حمامك القديم
ونبدأ من اول وجديد علي نضافه بحكام جداد وشعب جديد مستورد هههههههه
يمكن ساعتها يبقي فيه امل

السبت, فبراير 14, 2009

 
Blogger !!! عارفة ... مش عارف ليه said...

كل ما هو في الوطن لافظ لأبنائه
رافض لإباعهم مكتفي بالواطويط
التي تعشش في خباياه

وبغض النظر عن رأي فلافيو فهكذا العولمة وذوبان الهويات .. ولم يعد لنا سوى التمسك بالموروث الثقافي لنا

فهل نحن فاعلون ؟


تحياتي
وليد

السبت, فبراير 14, 2009

 
Blogger يا مراكبي said...

david dantos

thanks for your regular follow up and appreciation

الأحد, فبراير 15, 2009

 
Blogger يا مراكبي said...

قوس قزح

مشكلة عدم تقييم ولاد البلد دي مشكلة كبيرة .. وما أكثر المتميزين جدا الذين خرجوا خارج لبلاد .. تخيلي لو دول كلهم كانوا لسة جوة البلد ولقوا التقدير المناسب .. كان شكل البلد يبقة إيه؟

الأحد, فبراير 15, 2009

 
Blogger يا مراكبي said...

tota

وبعدين بقى في الأسئلة الصعبة دي اللي ما بأقدرش أجاوب عليها؟

نرجع وألا لأ؟

مش قادر أجاوب .. بس نفسي قوي مصر تبقى أحسن دولة في الدنيا

الأحد, فبراير 15, 2009

 
Blogger يا مراكبي said...

ـ-ـ- أحمد عبد العدل-ـ-ـ

الظاهر كده زي ما إنت بتقول: مكتوب علينا إن الفرحة ما تكملش .. لا برة ولا جوة

بس أكيد أكيد كل تدهور وليه آخر .. هي الحياة كده .. فوق وتحت .. فوق وتحت

إن شاء الله مصر تطلع فوق من تاني

الأحد, فبراير 15, 2009

 
Blogger يا مراكبي said...

marmar

إحنا كمصريين رائعين على مستوى الأفراد .. وفاشلين على مستوى العمل الجماعي .. وبالذات لو العمل الجماعي ده تحت إدارة الدولة .. هو ده ملخص الموضوع

أنا كمان عايز المليون يورو .. دول يطلعوا أكتر من 5 ألاف جنية .. مش كده؟

الأحد, فبراير 15, 2009

 
Blogger يا مراكبي said...

esraa

فيه أكتر من 5 مليون لعيب برة مصر .. كل واحد بيلعب في مجال غير التاني .. وكلهم بيجيبوا أهداف .. لكن للأسف: للغير

وممكن كمان يكونوا أسباب تقدم الغير عننا

الأحد, فبراير 15, 2009

 
Blogger يا مراكبي said...

مـحـمـد مـفـيـد

ودي كمان أحد أوجه المشكلة بخلاف العمل الجماعي اللي إتكلمت عليه فوق

عدم إعطاء الفرص وعدم الصبر على النتائج .. نظرة قصيرة المدى بإستمرار

فيه دول بتحضر أجيال عشان مهمات هيقوموا بيه بعد 20 سنة

الأحد, فبراير 15, 2009

 
Blogger يا مراكبي said...

Nsreen Bsunee

فعلا .. مرة واحد أجنبي قال لي: اللي يشوف مستواكم العالي ده ما يتخيلش أبدا إنكم من البلد المنهارة اللي هناك دي

شوفتي هم أكتر من كده؟

الأحد, فبراير 15, 2009

 
Blogger يا مراكبي said...

دردشة على الماشى

ملاحظة في الجول بجد

فعلا كل الناس كانت ضد فلافيو ده .. وجوزية كان الوحيد اللي متأكد إنه موهبة حقيقية

ده فعلا مثال صرخ على عدم قدرتنا على تقدير وإستكشاف المواهب

برافو عليكي

الأحد, فبراير 15, 2009

 
Blogger يا مراكبي said...

صدى الصمت

فعلا الموضوع مش موضوع كرة القدم .. الموضوع أكبر من كده بكتير .. بيشمل كل مجالات الحياة .. وكل مجالات الحياة فعلا محتاجة لعيبة زي الكرة بالظبط

منورة

الأحد, فبراير 15, 2009

 
Blogger يا مراكبي said...

dodda

أول مرة سمع عن موضوع منير ده .. إنتي عرفة إني ما بأشوفش تليفزيون .. المسموح بيه عندنا هو إم بي ثري بس .. حكم الأقوياء

موضوع البوست بقى .. ده واجعني قوي من قبل ما أسيب مصر بسنين .. ولسة واجعني

الأحد, فبراير 15, 2009

 
Blogger يا مراكبي said...

Rania

اللي في الخارج مش أحسن ولا حاجة .. وياما شفت أجانب ما يسووش 3 تعريفة وبيعتبروهم هنا خبراء


احنا فعلا مش واثقين فى نفسنا عن جهل

الأحد, فبراير 15, 2009

 
Blogger يا مراكبي said...

kochia

العيب في المنظومة

الدولة لا يمكنها أن تعلوا لمجرد وجود أفراد متميزين فقط .. لابد من أن يعملوا معا عملا جماعيا منظما موحد الهدف .. وتنظيم هذا العمل الجماعي هو مسؤلية الدولة .. وهو ما لا تفعله دولتنا أبدا

وفتشي عن ملايين المصريين بالخارج لتكتشفي حقيقة كلامي

الأحد, فبراير 15, 2009

 
Blogger يا مراكبي said...

اعشق فى الليل ضوء القمر

أهو المثال اللي إنت قلته ده بيتكرر في كل مكان كل يوم

أي حد بشعر أصفر وعينين خضرء بيعتبروه خبير حتى لو كان في بلده مجرد عامل عادي

ولو رحت بلدهم هتلاقيهم فعلا كده .. عاديين .. وفيه عندنا احسن منهم مليون مرة

لكن تقول إيه؟ جهل لدى اللي في إيديهم القرار .. تخلف

الأحد, فبراير 15, 2009

 
Blogger يا مراكبي said...

سلسبيل

وإن كان اللي بتقوليه قد يكون طرفة إلا أنه حقيقي: نحتاج أن ننسف حمامنا القديم بحق

الدولة كلها في حاجة لبداية جديدة تماما .. سيكون من آثارها بعض الهدم هنا وهناك

الأحد, فبراير 15, 2009

 
Blogger يا مراكبي said...

!!! عارفة ... مش عارف ليه

حتى التمسك بالموروث الثقافي ده كمان بقى أمر مشكوك فيه

فيه ناس من مصلحتها إننا نبعد عن أصولنا

وفيه عملاء كتير بيساعدوهم في كده

الأحد, فبراير 15, 2009

 
Blogger اعشق فى الليل ضوء القمر said...

عملت حاجه صغيره
زى زمان
كنت عايز أعرف رأيك

الاثنين, فبراير 16, 2009

 
Blogger بثينــــــة said...

مراكبي
بيقولوا في المثل الشيخ البعيد سره باتع .. في إشارة إلي أن البعيد أقدر
وهي إشارة أيضا لعدم احساسنا بقدراتنا الحقيقية
المصريين اتعرضوا لسحق متواصل .. احتلال خارجي وداخلي وضغوط اقتصادية تخلي المصريين يدخلوا موسوعة جينيس كأكتر بلاد الدنيا ظلمها ابنائها .. وكويس أوي ان لسه فيه حد بيرفع راسنا حتي لو كان برة
يا عزيزي .. ولو طبقت علي المثل بتاعك- الفساد ممكن يخليهم يسيبوا فلافيو دة من غير فلوس صدقني .. هو بس الأهلي اللي ماسك نفسه بشوية ناس محترمة
لو بس حد بزنس .. خلصت يا معلم

الاثنين, فبراير 16, 2009

 
Blogger يا مراكبي said...

اعشق فى الليل ضوء القمر

جايلك حالا

الاثنين, فبراير 16, 2009

 
Blogger يا مراكبي said...

بثينة

وطبعا مش مستبعد برضه إن الإدارة المحترمة دي تحتاج إنها "تبزنس" وتبيعه برضه .. قبل ما اللاعب يكبر ويقل مجهوده

كل الموضوع: بيزنس + عمالة .. والبلد لو هتروح في داهية مش مشكلة

الاثنين, فبراير 16, 2009

الاثنين, فبراير 16, 2009

 
Blogger hend...hanady said...

البلد زى ماهى مكان مبيتغيرش انما اللى فيها واللى ماسكينها ويأس بعضهم اه خيرنا بره وعقولنا الجامدة وحتى لاعبتنا بيبدعوا بره بس زى ما بيقولوا دور على السبب المسئول الفلانى اللى ماسك الحته الفلانى ماهو كان مواطن عادى ولما بقى كالبقية وكل واحد صغير بيتجبر على اللى اهغر منه وهى دايرة بس زى مابيقولوا انما للصبر حدود وان شاء الله الحال يتعدل وعقولنا ومتميزينا اللى فى الخارج يرجعولنا وصدقنى ارقام المصريين بالذات اللى فى الخارج وناجحين مهولة وكل ما تعرف مجالاتهم تنصدم اكتر واكتر لما يطلقوا علينا عقول رجعية

الاثنين, فبراير 16, 2009

 
Blogger محمد ابراهيم said...

يا بشمهندس
المشكلة في اكتر من حاجة
البلد مش بتقدر عقول
و عاوزة تخلي كل الي في البلد همه الوحيد هو رغيف العيش
او الفلوس
او الموبايل الي في ايده يكون اخر حاجة
و مفتكرش انه في حاجة اكتر من كدة البلد عاوزاها من الناس الي فيها
عشان كدة الناس التوب هي الي بتطلع بره قبل متبقي زي بقية الناس
همها رغيف العيش و منظرها قدام الناس

تحياتي
محمد

الأربعاء, فبراير 18, 2009

 
Blogger نوري said...

تقريبا
احنا بنحاول نبني اي حاجه ع الاطلال
يمكن يكبر لنا بيت
بس دي مش غلطتنا ولو كان لينا يد فيها
بس ده عيب الفلوس
الي بيعتنا اغلي مالينا
وهي نفسنا
بقي سهل حد يشتريها ويبعها لو لقي احسن منها

بست وشز فور يو

الأربعاء, فبراير 18, 2009

 
Blogger koukawy said...

ارجع و اقول قولي الشهير
لو لم اكن مصريا ... لوددت ان اكون انجوليا

منك لله يا مصطفي يا ابن كامل

الأربعاء, فبراير 18, 2009

 
Blogger يا مراكبي said...

hend...hanady

طبعا مصر مش هي المكان وبس .. مصر هي المكان والناس وحاجات تانية كمان


مصر "المكان" بقى شكلها سيء وجه بسبب مصر "الناس" اللي ماسكين مقدرات البلد

أما مصر "الناس" الكويسين فهما دول اللي بره مصر "المكان" دلوقت

الجمعة, فبراير 20, 2009

 
Blogger يا مراكبي said...

محمد إبراهيم

طبعا العملية مقصودة .. لازم المواطن المصري يكون مش شايف قدامه من كتر الضغوط اللي عليه عشان ما يفكرش في اي حاجة .. لكن لو المواطن ارتاح ساعتها ممكن يفكر .. وده خطر على النظام الحاكم

الجمعة, فبراير 20, 2009

 
Blogger يا مراكبي said...

نوري

ياريت بجد كانت المشكلة في الفلوس وبس .. لو على كده كانت الناس اللي سافرت استحملت وقعدت .. لكن المشكلة اكبر من كده .. انعدام ضمير وامان ومستقبل

الجمعة, فبراير 20, 2009

 
Blogger يا مراكبي said...

koukawy

إيه ده؟ أنجوليا؟ ماسمعتهاش دي قبل كده .. أنا اللي أعرفها: موزمبيقيا .. لكن أنجوليا دي جديدة

هههه

الجمعة, فبراير 20, 2009

 

إرسال تعليق

Links to this post:

إنشاء رابط

<< Home