شد القلوع يا مراكبي ... مافيش رجوع يا مراكبي

الجمعة، فبراير 20، 2009

كوريا؟

لا تندهش كثيرا يا عزيزي إذا ما وجدت أن أغلب الشباب لا يعرفون عن كوريا سوى أنه إسم لتلك الراقصة الذي ظهرت في فيلم عسكر في المعسكر لتقول جملتها المشهورة: البيت ده طاهر وهيفضل طول عمره طاهر .. يا أم المطاهر رشي الملح سبع مرات .. ترللم ترللم .. إسمها حنان الطويل على فكرة
.
أما بالنسبة للجزء الآخر من الشعب والذي يعرف جيدا أن كوريا هي دولة وليست راقصة .. فإن معلوماتهم عن كوريا هي أنها تلك الدولة التي غزت العالم بمنتجاتها التي تشبه كثيرا تلك المنتجات التي كانت تأتينا من اليابان لكنها أقل سعرا .. فقد إنتشرت فجأة تلك السيارات من نوع هيونداي ودايو لتكون بديلا أرخص من التويوتا والنيسان اليابانيتين الصنع .. وإنتشرت أيضا التليفزيونات والأجهزة الكهربائية من نوعية إل جي وسامسونج كبديل للتوشيبا والنشيونال والباناسونيك وغيرهم
.
لكن لتعلم يا عزيزي أن شركة هيونداي مثلا ليست شركة لتصنيع السيارات فقط كما نعتقد .. بل هي تحتوي على سبيل المثال لا الحصر على أكبر شركة لتصنيع السفن العملاقة في العالم .. وتحتوي كذلك على أحد أكبر مصانع صهر الحديد والصلب وتشكيلهم .. بالإضافة إلى قطاع ضخم للمقاولات الإنشائية والصناعية .. وهذا القطاع بالتحديد يفوز بحصة كبيرة من المناقصات الدولية بالشرق الأوسط .. وكل هذا الكلام الذي ذكرته عن شركة هيونداي ينطبق أيضا على الشركات الكورية الأخرى التي تعرف عليها الشعب المصري .. وكذلك الشركات التي لم يتعرف عليها بعد

ومن عجائب القدر أن إعلان الدولة الكورية كان في عام ألف وتسعمائه وثلاثة وخمسون أي بعد ثورة مصر بعام واحد .. ومن عجائب القدر أيضا أن الكوريين قاموا بإلغاء نظام الحكم الدكتاتوري وحولوه إلى النظام الديمقراطي في عام 1987 أي بعد مصر بستة أعوام كاملة .. وش بيغمز
.
ولنستكمل معا عجائب القدر لنجد أن الكوريين قد نجحوا في تنظيم دورة الألعاب الأوليمبية عام 1988 أي قبل مصر بقرن كامل .. ونجحوا في تنظيم كأس العالم لكرة القدم مناصفة مع اليابانيين (ثاني إقتصاد في العالم) عام 2002 أي قبل مصر بقرن ونصف
.
نسيت أن أذكر لكم أن الإقتصاد الكوري هو الثاني عشر على مستوى العالم ونسيت أن أقول لكم أنني قمت بعمل إحصائية خلال إقامتي بكوريا أسفرت عن أن نصف الإناث يرتدين الميكروجيب (رغم أن درجة الحرارة دائما تحت الصفر) وأن ربع الإناث يرتدين الميني جيب .. ولم أشاهد أو أسمع عن حالة تحرش واحدة

.

يقول لي أحد الخبراء الكوريين: لقدت زرت مصر وأعجبت جدا بالمعابد والأهرامات والمسلات .. تبدو الحضارة المصرية القديمة عظيمة ومتطورة للغاية .. ولكن أين أنتم الآن في هذا العالم؟ وماذا حدث لكم؟ فيا عزيزي القارئ .. سواء كنت مصرا على أن كوريا هي راقصة .. أو أن كوريا هي من تأتي إلينا بالغسالات والتليفزيونات والمكانس الكهربائية .. أو أنك تعرف أنها أكبر من ذلك بكثير .. أطلب منك أن تساعدني في البحث عن مصر .. الناس بتسأل عليها اليومين دول

التسميات:

65 Comments:

Blogger نوري said...

بص يابشموهندس
الي يسألك عن مصر قوله
الخبر النهارده بفلوس
بعد قرنين يبقي ببلاش
لان بعد قرنين انشاء الله انشاء الله
هنرجع معروفين تاني

بس ابقي افتكرني ساعتها والنبي واترحم عليا

بست وشز فور يو

الجمعة, فبراير 20, 2009

 
Blogger Eng. Ahmed Abo El-Ella said...

بص يابشمهندس

لو حد سألك تاني قوله ناقص في السوق

ماهو يانتريق يانموت من الغيظ
انا متهيألي نتريق أحسن

الجمعة, فبراير 20, 2009

 
Blogger بنت القمر said...

مصر متوعكه في حالة مخاض علي فكرة المخاض ده بدأمن سنه 52 الحكم العسكري البيروقراطي ودانا في تلاتين داهية لا تقول لي ناصر ولا سادات مصر معتقلة من ايام الحكم العسكري حتي نصر اكتوبر نصر رد علي هزيمة للاسف يا مراكبي مفيش امل طول ما الحكم العسكري قائم في مصر
ظابط وابن ضابط وشويه ضباط بيروقراطيين اللي ماسكين البلد
ما تدروش علي مصر قريب
:(

الجمعة, فبراير 20, 2009

 
Blogger fahd said...

ربنا يسامحك ياعم

كده تقلب علينا المواجع

كلامك مؤلم جدا

احصائياتك تشير باصبع قوي لمدي البهدلة والتوهان اللي احنا فيهم

المفروض نفكر

ازاي نحل المعادلة الصعبة

لو فيه حاجه معينه هي السبب في التخلف نحط ايدنا عليها ونعمل علي ازالتها

بص يا اخي والله انت لوعملت مدونة او ورشة عمل او جلسات فكرية عصف ذهني لمعرفة السبب وكيفيه النهوض باعتبار انك اطلعت علي العالم الاخر يعني خرجت من الصندوق

انا معاك واعتقد ان كتير مستعدين للفكره دي

كفاية نقعد نشتكي ونندب يلا نعمل حاجه

وتسلم ايدك علي الاسلوب

وصحيح نسيت اقولكم

ههههههههه

انت طول التدوينة ناسي

بارك الله فيك

الجمعة, فبراير 20, 2009

 
Blogger تخاريف خاصه! said...

ربع ساعه يا باشمهندز بضحك على اول 3 اسطر من البوست
هههههههههههههههههههههههههههه

وبقيت البوست ..حسيت انى لو لم اكن مصريا...لوددت ان اكون كوريا مش اصلى حتى!!!

الجمعة, فبراير 20, 2009

 
Blogger اعشق فى الليل ضوء القمر said...

كوريا العملاق المستقبل
أنا بحكم شغلى تعاملة مع بعض الأجهزه الكوريه للتحكم من ماركت LG
محكم السرعة طريقة برمجته و الأمكانيات التى وجدة به أحسن بكثير من محكم سرعه )(Inverter)
اليابانى إتشا بكثير
و أظن حديث الساعه فى قول يحكم العالم صفر الوجوه ممكن يكون هم أو الصين

أما عن سؤالك فى البحث عن مصر
فقل مصر الحضارة مصر العراقة مصر بلد الحضارات ونهد لأديان السماوية
وإللى يسألك عن أكثر قل له بلا خيبه عليك وعلى ــــــ (أزيلت فى المونتاج)
بس صحيح هى مصر ديه فين

السبت, فبراير 21, 2009

 
Blogger ـ-ـ- أحمد عبد العدل-ـ-ـ said...

وش بيغمز
وش زعلان
وش بيدور
وش مستنى
وش بيتمنى
وشششششششششششششششششششششششش

دمتَ جميلاًى بس اوعى تكون محبط
وحمد الله على السلامة

السبت, فبراير 21, 2009

 
Blogger marmar said...

مصر في دمنا وفي دم 80 مليون مصري فخورين بمصر مش اقتصاديا لا بمصر كنيل
كبحر
كحب الناس لبعضها
ألفه محبه تعاون خير ضحك فرح خفة دم
دول بفلوس وكنوز الدنيا كلها
هيا وصلت لأهل الصراصير والحشرات دول يتكلموا !!
احنا مصريين بروحنا ودمنا هنموت مصريين طيبين شعب وامة واحده

السبت, فبراير 21, 2009

 
Blogger Hannoda said...

البوست ده كئيب قوي يا مراكبي

مصر فين؟؟

فايد ناس بتسرق
و بتنادي على ناس مابتفكرش غير في ازاي تعيش بس بكرة

كنت زمان متفائلة

بس مافيش مكان للتفاؤل
لإن ماحدش فاضي يصلحها

اللي شفته لما جيت انهم متقسمين
ناس مشغولة بالسرقتها
وناس مشغولة بالعيشة و مصاريفها
وناس بيفكروا فيها وببقولوا كلام جامد قوي
بس كلام و بس

وشوية صغيرييييين قوي بيعملوات حاجة لكن اللي بيعملوه مش حايحوق في الباقي لإنهم بجد شوية

ده اذا أنا أساسا بفهم

السبت, فبراير 21, 2009

 
Blogger حسن ارابيسك said...

صديقي العزيز
مراكبي
بالطبع أنت محق وبالطبع لكونك مصري وتعرف معنى مصريتك التي إستفزت فيك الكثير وحرضت على كثير من التساؤلات للكشف عن عورات يجب الا نخجل بالفعل من كشفها لهذا كانت تساؤلاتك في محلها وعن صدق من داخلك
وكما قالت ستي
يابخت من بكاني وبكى الناس عليا
ولا ضحكني وضحك الناس عليا كما فعلت كوريا في فيلم هنيدي

تدوينتك السابقة
الاستعانة بالخبرات الاجنبية لاضرر فيها لكن الضرر يقع عندما نعتمد عليها بشكل كامل ولانتعلم منها ونصبح من أصحابها ثم تصبح الخطوة الثانية لدينا في إستفادة كاملة من علماؤنا وخبراءنا وليس تطفيشهم

إحساس أمرأة
تدوينة من تدويناتك التي دائماً تدعبث وتنكش بشكل صحي عن زاوية بعينها تحمل خطراً كبيراً إن لم نتداركه في حينها تصبح الخسارة لدينا هائلة يصعب تعويضها اذا فات الأوان
تحياتي ياباشمهندس

السبت, فبراير 21, 2009

 
Blogger نفرتارى said...

لى سؤال هل انت تضع مقارنة بين تقدم كوريا وما نحن عليه الان ؟؟
فهذه ليست مقارنة عادلة فلا يوجد وجه للمقانة لاننا اصبحت شعب مستهلكة وليس منتج جميع الشعوب المستهلكة التى كانت ليس بها اقتصاد اساساً ولا كنا نعلم اسماء هذه الدول .. جاهدت واغلقت ابواب عليها وتقدمت وازدهرت واصبحت الان من اكبر الدول انتاج فى العالم .
اما نحن بعد ما كنا من الدول المنتجة والمصدرة رجعنا الى الوراء واصبحنا من اكثر الشعوب المستهلكة والمستوردة وضعف اقتصادنا وقلة مواردنا ..
فنحن الان نعيش على ماضينا وحضارة اجدادنا الفراعنة ولكن نحن فماذا نعمل ونفعل غير كثرة الاستهلاك ....
فالى اين سنذهب ؟؟!!! ............

تحياتى ،،

نفرتارى

السبت, فبراير 21, 2009

 
Blogger tota said...

ليه بتقولنا كده؟؟يعني بالكلام ده مثلا يعني هتتغير حاجه؟؟مصر حتفضل زي ماهيا سواء كانت عايشه علي عظمه ماضيها او غيره مش هتتغير حاجةبالكلام اللي هيحصل بس انه حيزيد الاحباط جوانا يمكن حد يقول هنعمل ولا هنغير بس اللي هيحصل بجد هوه "ولاحاجه" الحال هيفضل زي مهوه وانا بحبه زي ماهوه كده سلامي ليك وكل الود

السبت, فبراير 21, 2009

 
Blogger وميض ابتسامة said...

بصراحة احنا المصريين شعب محير ,, دائما نخلم .. واحلام اليقظة عاملة معانا شغل جامد ... يعنى الحيوية والعزم والهمة دول نتائج الاحلام وليس كلام اغانى والحمد الله ..
شوف من الاخر فى حاجة غلط .. بس اكيد اكيد .. ح نعرفها .. بس امتى؟ الله اعلم!

السبت, فبراير 21, 2009

 
Blogger hend...hanady said...

تصدق انا اول مره اعرف ان اسمها كوريا اصلى مبحبش الفيلم ده انا اعرف عن كوريا الشمالية والجنوبية والنووى الى اخره
المهم هم مش قد كده بس جبارين على راى محمد صبحى
هما عانوا فى الحرب العالمية سواء هما او اليابان وعرفوا ازاى يتعلموا من الماضى ويسترجوا عظمة تاريخ الشرق القديم كالحضارات القديمة هى اه مكنش فيه تقسيمه كانوا مغول وهنود بس يبقى اسمه تاريخهم عقبالنا لما نتعلم ازاى نرجع كرامتنا اظاهر اننا لازم نشوف هيروشيما ونجازاكى زى اليابان علشان نتعلم

السبت, فبراير 21, 2009

 
Blogger يا مراكبي said...

نوري

أنا سعيد جدا بإن مصر هترجع زي زمان تاني ولو حتى بعد قرنين من الزمان .. على الأقل هترجع من تاني .. ده لوحده قمة التفاؤل بجد

الأحد, فبراير 22, 2009

 
Blogger يا مراكبي said...

Eng. Ahmed Abo El-Ella

أنا معاك .. نتريق أحسن طبعا

مش ناقصة ارتفاع في ضغط الدم وانفجار في المرارة

اهل بيك

الأحد, فبراير 22, 2009

 
Blogger يا مراكبي said...

بنت القمر

نظرية الحكم العسكري دي في مصر فيها جزء كبير من الصحة على فكرة .. مش لأن الرئيس منشأه هو الجيش وبس .. لأ .. لأن جميع المسيطرين على جميع أركان الحكم من فوق لحد تحت كلهم عسكريين .. وده بغض النظر عن انهم متخصصين في الشيء اللي بيديروه ده او لأ .. وطبعا هما مش متخصصين

والغرض من نشر العسكرين في جميع اركان الدولة هو تثبيت اللي فوق اكتر واكتر

الأحد, فبراير 22, 2009

 
Blogger يا مراكبي said...

fahd

انا مش ول ولا آخر واحد مطلع على الدنيا برة مصر .. ومش انا بس اللي عندي افكار عن مواطن الخلل وطرق علاجها .. فيه ناس احسن مني بكتير كمان

طبعا انا مستعد جدا للمشاركة في ابداء رأيي في المسائل دي كلها .. لكن مش ده المهم .. المهم مين اللي ناوي يصلح البلد؟ مافيش

يعني هل المشاكل دي كلها خافية عن النظام الحاكم؟

يعني هل الحلول و نقل تجارب الآخرين بعيدة عن معلومات القائمين على السلطة؟

بالطبع لأ .. دول عارفين أحسن مني ومنك كمان .. لكن هم مش عايزين يصلحوا .. هما بس بيقولوا انهم مش قادرين وان الظروف اقوى منهم وده غير صحيحي بالمرة

الأحد, فبراير 22, 2009

 
Blogger يا مراكبي said...

تخاريف خاصه!

أول 3 سطور دول هما المفيد .. هما دول بقى ملخص حال مصر بالظبط ..بس كان فيهم تورية أو استعارة مكنية .. هههه

لو لم اكن مصريا؟ انا نفسي اكون كوريا ويابانيا وماليزيا وحاجات حلوة كتيرة

الأحد, فبراير 22, 2009

 
Blogger يا مراكبي said...

اعشق فى الليل ضوء القمر

ياسيدي وانت بتعمل مونتاج .. ههههه

إل جي تخليك تعمل اكتر من كده .. انا عارف .. هههه

على فكرة .. مصر دي كانت في قارة أفريقيا .. اول حتة على ايدك الشمال .. بس اعتقد عزلت من زمان

الأحد, فبراير 22, 2009

 
Blogger عاليا حليم said...

الموضوع جميل و شيق جدا

بس الحقيقة أنصدمت من بدايته ( أزاى فى شباب مش عارفين غير كوريا بتاعة الفيلم ؟ ) و لا حضرتك بتهظر ؟ :)

الأحد, فبراير 22, 2009

 
Blogger أحمد فياض said...

تدوينة جميلة ومحزنة..
خاصة أنني قرأتها بعد وقت قصير من مقال ابراهيم عيسى (الفيل والتنين )عن تقدم الصين والهند في سنوات قليلة ..يبدو بداية الحل كما قال عيسى في :التخطيط والنزاهة
لا أرانا نملك شيئا منهما الى الان..
أنا واثق أن هذا البلد سينهض مما هو فيه..لكن الخوف أن أموت أنا قبل أن يحدث هذا..
تحياتي

الأحد, فبراير 22, 2009

 
Blogger بثينــــــة said...

يامراكبي بعد ما قريت البوست دة كان ممكن أقول في لحظة يأس
إن الجهل نور
يعني زيارتك لكوريا هي اللي كدرتك كدة وخلتك تشوف وتسمع وتتسأل وماتعرفش ترد
طيب هتقول مصر فين ! بتأيل شوية لأنها لسة سالتة ايدها من حرب اكتوبر ! وللا في غيبوبة من خمسين سنة بعد عملية لوز! خصوصا كمان ان مفيش أي إجابة علي الأسئلة دي غير أنك تعمل مش سامع وتطنش .. يبقي صحيح الجهل نور .. ولا سفر ولا مقارنات ولا يحزنون
بس مش عارفة ليه باقول ان فيه أمل .. أمل ان مصر ألفين وتلتمية مثلا هتبقي تمام

الأحد, فبراير 22, 2009

 
Blogger يا مراكبي said...

ـ-ـ- أحمد عبد العدل-ـ-ـ

نسيت تقول وش بينتحر .. ههههه

أنا لا محبط ولا حاجة طبعا .. ده انا التفاؤل كله .. مش قريتلي وانا باقول قرن ونصف؟ هههه

اشكرك جدا على سؤالك واهتمامك

الاثنين, فبراير 23, 2009

 
Blogger يا مراكبي said...

marmar

من أهم خصائص المصريين إنهم بيحبوا بلدهم مهما عملت فيهم

وتلاقيهم بينتقدوها أملا في إصلاحها .. نقد ممزوج بالحسرة والأمل

المهم بقى إن العواطف دي كلها لا تكفي .. والتقدم عمره ما هييجي بالعواطف بس

وأديكي شوفتي بتوع الصراصير بقوا إزاي .. بالعمل والعواطف معا .. مش عواطف بس

الاثنين, فبراير 23, 2009

 
Blogger يا مراكبي said...

Hannoda

إنت فعلا كده فهمتي

فعلا الناس مشغوله جدا ومطحونة جدا

وده مقصود عشان ماحدش يلاقي وقت يفكر فيه انه يعارض

عشان كده ما فيش حد فاضي للبلد

الاثنين, فبراير 23, 2009

 
Blogger يا مراكبي said...

حسن أرابيسك

أولا بأشكرك على تعليقك الكومبو ... هههه .. ربنا يكرمك .. الف شكر على آراءك القيمة

البوست اللي هنا ده بأعتبره نوع من النقد البناء اللي فيه الأخ خايف على أخوه ونفسه ينصحه ويصلح منه .. يعني مش نوع من جلد الذات ولا حاجة .. المهم إن الكلام يجيب نتيجة .. ولو نص نتيجة .. ولو ثمن نتيجة حتى .. انا راضي

الاثنين, فبراير 23, 2009

 
Blogger يا مراكبي said...

نفرتارى

من يملك غذاؤه .. يملك مصيره وقراره

تلك هي القاعدة الرئيسية التي - عمدا - تتجاهلها حكوماتنا فأصبحنا إلى ما نحن فيه من ذل وهوان ومن ثم تخلف

والغذاء هنا لا يعني المأكل والمشرب فقط .. بل هو كل ما نستهلكه في أمور حياتنا

الاثنين, فبراير 23, 2009

 
Blogger يا مراكبي said...

tota

أنا مقدر شعورك كويس .. فعلا الموضوع يدعوا إلى يأس طبيعي .. بجد طبيعي .. لا ألومك

أما لماذا نكتب؟ فذلك تحقيقا لقول الله عز وجل: وإذ قالت أمة منهم لم تعظون قوما الله مهلكهم أو معذبهم عذابا شديدا .. قالوا معذرة إلى ربكم ولعلهم يتقون

أنا أكتب معذرة إلى ربي .. ولعل كلماتي قد تؤثر في ي شيء

الاثنين, فبراير 23, 2009

 
Blogger يا مراكبي said...

وميض ابتسامة

أيوة فاكرها حكاية الحيوية والعزم والهمة دي .. هههه .. سمعتها وأنا صغير .. بس لسه ما شفتهاش .. ههههه

أقولك على سر؟ إحنا عارفين كويس فين المشكلة بس إحنا عاملين نفسنا مش عارفين .. تمويه عشان نخدع الأعداء يعني .. هههه

الاثنين, فبراير 23, 2009

 
Blogger يا مراكبي said...

hend...hanady

تصدقي اللي بتقوليه ده فكرة نيرة جدا؟ إحنا فعلا محتاجين زلزال أو قنبلة تصحصحنا من أول وجديد .. تلغي القديم ده كله ونبدأ من جديد

هو ده الحل بجد

الاثنين, فبراير 23, 2009

 
Blogger يا مراكبي said...

عاليا حليم

من غير صدمات ولا هزار .. إنزلي بنفسك وإعملي إستفتاء بين الناس عن اي معلومة .. مش عن كوريا بس .. وإنتي هتتفاجئي .. لأ ده إنتي هتتصدمي من المستوى الثقافي العام للشعب

منورة

الاثنين, فبراير 23, 2009

 
Blogger يا مراكبي said...

أحمد فياض

أطال الله في عمرك أولا .. لكنني أيضا لا أستطيع أن أعدك بأن ترى الأمور أفضل مما نحن عليه الآن في وقت قريب .. فالنتائج الجيدة تحتاج لزمن طويل حتى تأتي ثمار الإصلاح لأمة تنهار منذ عقود

الاثنين, فبراير 23, 2009

 
Blogger يا مراكبي said...

بثينة

أيوة كانت بتعمل عملية لوز ولحمية ... ههههه

يعني إنتي شايفة إني أتلم في بيتنا أحسن بدل ما عينيا تتفتح على حاجات تانية تحسسني إننا مش كويسين؟ برضه وجهة نظر سليمة

عموما سنة ألفين وثلاثمئة مش بعيده .. هانت .. هانت قوي

الاثنين, فبراير 23, 2009

 
Blogger Blank-Socrate said...

ولم أشاهد أو أسمع عن حالة تحرش واحدة
-----------
و على الجانب الاخر من العالم احصائيه تقول ان اكثر شعوب العالم تدينا هى مصر
نعم تدين شكلى بلا حياة
اما اكثر شعوبا العالم احتراما و اخلاقا هى شعوب كافرة
:)
ليست يهوديه او مسيحيه او اسلاميه

ليس لى سو حلم واحد ان ينضج الشعب المصرى

الاثنين, فبراير 23, 2009

 
Blogger maha zein said...

تصدق بالله
انت جيت علي الجرح
هو انت سافرت كوريا؟
يا بختك
انا ان شاء الله ابقه اسافرها بردو
اصلي بعمل رسالة الماجستير بتاعتي عن النخبة ودورها في التنمية في كوريا الجنوبية

وكمان بدرس كوري في السفارة بقالى سنتين وادي التالتة اهه
فعلا النموذج الكوري للتنمية جذبني لدرجة خلتني احارب عشان يكون موضوعي عن كوريا

وفعلا اللى هيضع مصر مع كوريا في مقارنة هيصعق
يعني البدء في برامج التنمية كان في نفس العام واللى هو 1961
برغم ان مصر في هذا العام كان الناتج المحلي الاجمالى يزيد عن كوريا
مؤشرات التنمية الاقتصادية بها كانت تزيد عن كوريا
لكن سبحان الله
اللى يخلي مصر دلوقتي متجيش في كوريا حاجة

هي بقه نظرية استاترياتيجيات تنموية واخلاقايت واتقان للعمل بالاضافة لدور نخبة حاكمة في عملية التنمية وتطبيقها فعليا بالاضافة لعوامل تانية كتير
بس صدقني اهم شىء الناس اللى حاكمينها والشعب المحكوم

بس انت دلوقتي بتعرف تتكلم كوري كويس؟

الاثنين, فبراير 23, 2009

 
Blogger صدى الصمت said...

والله حاجة تكسف يعنى الدول تبدأ من لاشىء وفى سنوات تصبح أكبر وأحسن دول العالم وإحنا ال بدنا بحضارتنا من قبلها بآلاف السنين نكون متأخرين عنها بمراحل
حاجة تحزن
أحييك على البوست الجميل والموضوع الرائع
تحياتى للأسرة

الثلاثاء, فبراير 24, 2009

 
Blogger !!! عارفة ... مش عارف ليه said...

والله احنا ممكن نتبرع ونأجر منادي
ينده عليها ويقول

يا عدووووووووووي

يمكن تقب تاني

"ولا تعوم على وش الفتة"
على رأي محمد هنيدي

خالص تحياتي لموضوعك
المثير للآسى
وليد

الثلاثاء, فبراير 24, 2009

 
Blogger bastokka طهقانة said...

لو لم اكون مصريا لوددت ان اكون كوريا

قطع لسان اللي يقول عليها رقاصة


خالص تحياتي
اوروفوار

الثلاثاء, فبراير 24, 2009

 
Blogger Rania said...

عارفه اننا بنموت فى حاجة اسمها مصر بس الحب فعلا لوحدة مش كفايه و لو بنحبها و بنعمل علشان خاطرهات هتبقى من احسن الدول ان شاء الله

اما مصر فين دلوقت
للاسف هتلاقى محبوسه جوة البيت و بيقولوا عليها البيت طاهر و هيفضل طاهر
تحياتى

الثلاثاء, فبراير 24, 2009

 
Blogger esraa said...

مصر هترجع تاني قريب ان شاء الله
معرفش الصراحه التفاؤل ده جايلي منين
بس المهم انه موجود

الثلاثاء, فبراير 24, 2009

 
Blogger يا مراكبي said...

Blank-Socrate

أن ينضج الشعب

إنه تعبير أكثر من رائع .. يحتاج هذا الشعب لأن ينضج بالفعل ويسمو فوق توافه الأمور وتحجر الفكر .. يحتاج هذا الشعب لأن ينظر إلى الأمور بمنظور أشمل .. منظور الكبار .. حتى يستطيع أن ينافس الكبار بالفعل

الأربعاء, فبراير 25, 2009

 
Blogger يا مراكبي said...

maha zein

موضوع الماجستير ده موفق جدا .. ان شاء الله نسمع منك الأخبار الكويسة .. وياريت فعلا تروحي كوريا وتشوفي المواضيع على الطبيعة .. هتفرق معاكي كتير .. وهما كلهم عارفين إن بداية نهضتهم قريبة جدا مش من زمان

أنا بقيت رهيب في الكوري

كام سا هامينيداي
Kam Sah Hamnidai

الأربعاء, فبراير 25, 2009

 
Blogger يا مراكبي said...

صدى الصمت

شوفتي بقى؟

يعني بلاش نقول إننا سابقينهم بسنة وألا اتنين .. ده احنا سابقينهم ب 7 الاف سنة بحالهم .. رحوا فين السنين دي والحضارة دي كلها؟ اكلتها القطة؟

الأربعاء, فبراير 25, 2009

 
Blogger يا مراكبي said...

!!! عارفة ... مش عارف ليه

روعة يا وليد .. حلوة قوي فكرة المنادي دي .. أهو ياخد لفة في أسيا وأفريقيا يمكن يلاقيها .. ياولاد الحلال بنت تايه طول كده .. هههه

الأربعاء, فبراير 25, 2009

 
Blogger يا مراكبي said...

bastokka طهقانة

قطع لسانهم كمان وكمان وكمان .. ولو ان الرقاصة حلوة برضه

منورة يام العيال

الأربعاء, فبراير 25, 2009

 
Blogger يا مراكبي said...

Rania

فعلا مصر محبوسة

وبيضحكوا علينا ويقولوا ان البيت طاهر .. وهو ولا طاهر ولا حاجة .. فساد فس فساد

اللي فوق مش بيحبوها .. بيحبوا نفسهم بس

الأربعاء, فبراير 25, 2009

 
Blogger يا مراكبي said...

esraa

هههههه

حلوة حكاية التفاؤل اللي مصدرة مجهول ده .. ههههه

بس فعلا كلنا عايشين على امل التغيير .. عايشين بالأمل

الأربعاء, فبراير 25, 2009

 
Blogger اعشق فى الليل ضوء القمر said...

وحشتنى قلت أعدى و امسى و أرمى السلام
السلام عليكم ورحمه الله وبركاته

الأربعاء, فبراير 25, 2009

 
Blogger maha zein said...

انيون هاسيو
شونن هانجوك اورل كونبو هايو
بانجبسبنيدا

كومبسبنيدا علي ردك علي تعليقي
اه ما احنا ناس جامدين اوي بردو

بجد بقيت رهيب في الكوري؟

الأربعاء, فبراير 25, 2009

 
Blogger يا مراكبي said...

اعشق فى الليل ضوء القمر

وعليكم السلام ورحمة الله وبركاته

منور في أي وقت

الخميس, فبراير 26, 2009

 
Blogger يا مراكبي said...

maha zein

شوفي .. الكدب خيبة .. أنا بقيت رهيب في الياباني مش في الكوري .. هههه

انيونج هاشيمنيكا .. ههههه

الخميس, فبراير 26, 2009

 
Blogger rona said...

مصر الله اعلم هى فين
ولكن علينا ان نبحث معا عنها فنحن فى النهايه مصريين
ولنفكر معا حقا ونفتح دائره حقيقيه من الحوار الهادف الفعال

الخميس, فبراير 26, 2009

 
Blogger محمد ابراهيم said...

تشكر جدا جدا يا بشمهندس
معلوماتك قيمة جدا جدا
و انا استفدت منها كتير
انا اعرف عن كوريا شوية كدة
بس مكنتش اتصورها بالعظمةدي كلها
انا عن نفسي بعتبرها تاني الدول المتقدمة بعد اليابان علي طول في منطقة الشرق الاقصي

تحياتي
محمد

الخميس, فبراير 26, 2009

 
Blogger يا مراكبي said...

rona

وانا كمان بادور عليها من زمان .. وبادافع عنها في كل مكان .. ومستعد جدا جدا لطرح كل اللي اعرفه وشفته عشان مصر تبقى الأحسن

الجمعة, فبراير 27, 2009

 
Blogger Tamer Nabil said...

السلام عليكم

ازيك ياصاحبى

اخبارك اية

---

بجد بوست رائع ومعلومات قيمة ومهمة عن كوريا

مصر احنا بنتمنى تكون كدة واحلى وافضل بس فين اللى اللى يمد ايدة ليها ويديها بدل ما يسرقها

ربنا يصلح الحال

تحياتى

الجمعة, فبراير 27, 2009

 
Blogger يا مراكبي said...

محمد ابراهيم

بالنسبة للشرق الأقصى هي كانت التانية بس دلوقت الصين أخدت مكانها .. وشوية شوية الصين هتبقى الأولى كمان

المهم إحنا فين من السباقات دي كلها؟

الجمعة, فبراير 27, 2009

 
Blogger يا مراكبي said...

Tamer Nabil

إزيك إنت وعامل إيه دلوقت؟

مصر؟

دي حكايتها حكاية كبيرة .. عايزة ناس مخلصين ييجيوا من الشعب ويحكموها بأمانة .. مش مفروضين من فوق

ربنا يعافينا

الجمعة, فبراير 27, 2009

 
Blogger koukawy said...

مين فيه حيل يدور بقي
الله يرحمها الست كوريا تعرف انها ماتت

السبت, فبراير 28, 2009

 
Blogger ادم المصري said...

كلامك بيوجع قوي يا باشمهندس

السبت, فبراير 28, 2009

 
Blogger يا مراكبي said...

koukawy

ماتت؟

بجد ماتت؟

لا حول ولا قوة إلا بالله

زعلتيني قوي قوي

بس كده أحسن لينا برضه .. مش كده؟

الاثنين, مارس 02, 2009

 
Blogger يا مراكبي said...

ادم المصري

عرف انه بيوجع

بس هي دي الحقيقة اللي مش لازم نهرب منها .. لأن الهروب من الحقائق ده جزء كبير من مشكلتنا

الاثنين, مارس 02, 2009

 
Blogger الأباصيرى said...

عايز أقولك حاجة واحدة بس

انا حاليا بحاول أخد جنسية اجنبية عشان مش لاقى البلد اللى معايا جنسيتها واللى المفروض أسمها مصر

أدعيلى أخد الجنسية وهدعيلك تلاقى اللى بتدور علية

الاثنين, مارس 02, 2009

 
Blogger يا مراكبي said...

الأباصيري

كلام في سرك وما تقولش لحد؟

وأنا كمان هأعمل زيك كده

الاثنين, مارس 02, 2009

 
Blogger مهندس مصري said...

دا انت كنت سايب الشغل و بتعد في الميني و الميكرو يا هندسة :)
طيب و أم العيال رأيها إيه في الكلام ده :)

و أظن خلاص لقينا مصر بعد 25 يناير

الاثنين, مارس 28, 2011

 

إرسال تعليق

Links to this post:

إنشاء رابط

<< Home