من ميدان التحرير لكندا
حد فيكوا ممكن يصدق الحكاية دي؟ تصدقوا إن كان عندي ميعاد مع واحد صاحبي في ميدان التحرير في مصر .. لكن إضطرينا إننا نغير مكان اللقاء ده لمكان أبعد شوية .. فين؟ عند موقف الترماي الأحمر اللي جنب محطة القطر بتاعة تورونتو .. أيوة بجد .. تورونتو في كندا
.
صاحبي ده أعرفه من أولى ثانوي .. يعني من سنة 1986 .. وكل أسراره ماحدش في الدنيا كان يعرفها غيري .. نخرج مع بعض ونسافر مع بعض ونعاكس بنات مع بعض .. وكنا عيال متخلفين عقليا من اللي بيقروا كتب ليل نهار .. كان نفسنا نكون علماء في الفيزيا أوالميكانيكا .. هبل بعيد عنكم .. دخلنا كلية الهندسة مع بعض .. وإتخرجنا مع بعض .. وإفترقنا من 9 سنين .. أنا كنت شايف إن مصر ليها مستقبل كبير في التسعينيات .. وهو كان شايف إن مصر مستقبلها مش قد كدة .. أنا إخترت مصر .. وهو هاجر لإنجلترا وبعدها كندا .. هو طلع صح .. وأنا اللي طلعت باصص تحت رجلي
.
كان ميعادنا نتقابل سنة 2003 أو سنة 2004 .. حقيقي مش فاكر .. كل اللي فاكره إننا إتفقنا إننا نتقابل بعد 10 سنين من التخرج علشان نشوف كل واحد وصل لإيه في الدنيا .. وطبعا ماقدرناش نتقابل لأن كل واحد فينا كان في بلد بعيدة .. ولولا إني رحت أمريكا الشهر اللي فات وبقيت قريب من كندا ما كنتش فكرت أعدي عليه وأشوفه .. هو صحيح رحب بالفكرة جدا في الإيميل لكن أنا كنت رايح وفي دماغي مليون فكرة مخوفاني .. ياترى صاحبي إتغير كتير عن زمان وألا لأ؟ ياترى لسة عنده الصفات المصرية والعربية وألا بقى كندي أكتر من الكنديين؟ لو حضنته وبوسته في المطار هيبقى عادي ولا هيفتكر إني شاذ جنسيا؟ ياترى هلاقيه لسة فاكر مصر وألا تنصل منها خلاص؟ كان حقيقي شعور صعب جدا عليا .. ويمكن عليه هو كمان
.
رايحيين شلالات نياجرا .. صاحبي سايق العربية وأنا قاعد جنبه ومراته الأجنبية قاعدة في الكنبة اللي ورانا .. مراته طلعت سي دي وناولتها لصاحبي بظهر إيديها علشان ما أشوفش مكتوب عليها إيه .. صاحبي شغل السي دي .. وبصينا لبعض .. وإبتسمنا
.
كانت أغاني ما سمعنهاش من 9 سنين .. كأن الزمن لسة واقف من ساعتها في ميدان التحرير قدام المتحف المصري عند موقف الأوتوبيس اللي إتشال من زمان .. إسمعوا معايا أغنية مرمرينا لمحمد فؤاد
تعليقات
ربنا يبشرك باخير
أصل أنا و صحابى الأنتيم متفقين نتقابل بعد مرور عشر سنين من التخرج فى محطة الرمل على البحر أو فى نادى الأطباء و نحكى كل واحد عمل إية و المعاد قرب فى ألفين و عشرة
شكلنا على كدة حنتقابل فى كوالالمبور
واللة ممكن لية لأ
بس فكرة ممتازة وواضح ان فيه رصيد من الحب الجامد بينكم اللي خلاكم مصممين علي اللقاء وتحياااااتي
تحياتي
ماتستبعدش أي حاجة .. لو حكيت لك عن الشلة بتاعتنا وكل واحد فيهم حصل له إيه أو هو في أي دولة دلوقت ممكن تقول ده فيلم خيال علمي .. بس هي الدنيا كدة فعلا
وبعدين كوالالمبور حلوة برضة
لو لقيت صديق مخلص ووفي وأمين .. ده يبقى شيء نادر مش بتلاقيه كل يوم .. وبالتالي لازم تكون حريص إنك ما تضيعوش أبدا
حتى لو هتروح له لحد كندا
إنت وصلت لتفاصيل شعورنا بالظبط .. الإبتسامة دي مش معناها السعادة باللقاء أوالسعادة بإسترجاع الذكريات القديمة بس .. إنما كان فيها حسرة على الأيام الجميلة اللي راحت دي
مش هتصدقني لو قلت لك إني كنت متوقع السؤال ده منك إنت بالذات
من عشر سنين أنا ما كنتش موافقه على الهجرة أبدا وبذلت مجهود رهيب علشان أقنعه بعدم السفر .. والحالة الإقتصادية في مصر كانت في عزها ساعتها وناس كتير كانت بترجع من الخليج العربي كمان
بعد كده بخمس سنين حصل الإنهيار الإقتصادي في مصر وحسيت إني أنا وغيري كان مضحوك علينا وإن الطفرة الإقتصادية إياها دي كانت خدعة وغير مخطط ليها إستراتيجيا
بعد كدة إضطريت إني أمشي أنا كمان .. بتوفيق ربنا سبحانه وتعالى طبعا .. واللي رجعوا من الخليج لمصر إضطروا يرجعوا للخليج تاني
ودلوقت تطابقت وجهات النظر بيني وبين صاحبي بعد ما أنا خضت التجربة عمليا .. بينما هو كان متوقعها نظريا
بجد الموضوع دا مليان مشاعر خلت الواحد يفتكر صحابو بتوع الثانوية والجامعة
وتقريبا انا وانت نفس الظروف..باستثناء الصلع
:)
انا ف ي86 كنت في الثانوي
وبرضه مصر واحشاني
سؤال
انت مين في الاتنين دول..
لان الاتنين مافيهومش اي شبه من الصورة اللي في البروفايل
غير ال...
برضه
الصلعه؟
اصلها دوشة خالص كبيرها تشتغل على عربية كشري
و الله و روحت كنكة يا مراكبي يا خويا
الله يرحم نفر عبسية عبسية
رمسيس رمسيس
و كده
اوروفوار
ياااااااااااااااااااااه
فعلاً انا طول عمري نفسي يكون عندي ذكريات كتير ذي اللي كانت عند والدي و ذي الليبتقلوها
ههههههه
تعليقك جميل جدا جدا .. بس هي فين الصلعة دي؟ أنا مش حاسس إني أصلع خالص .. ده أنا حتى دايما بأسوق العربية وأنا قافل الشبابيك علشان الهواء بيطير شعري
هههههههه
أنا اللي علي اليمين .. من غير نظارة .. لابس جاكيت أسود على تي شيرت أبيض .. شبه حسين فهمي
الأروع هو لقاء أصدقاء العمر بغض النظر عن المكان .. المهم إننا نتقابل
أهلا بيك دايما
لأ بقى .. أنا طول عمري لارج وكلاس وماليش في العباسية رمسيس اللي بتقولي عليه ده
أنا كنت ماسك خط الجيزة فيصل فيصل فيصل
وبمنابسة الأغنية اللي مش عاجباكي .. إنتي فكرتيني إني نفسي أفتح مشروع عربية كبدة مش عربية كشري .. لارج وكلاس بقى .. والكبدة الصح الصح من عند أخوكي المراكبي
بونجور
إن شاء الله ربنا يمد في عمرك ويبقى ليك ذكريات كتييييييير
نورتنا
ربنا يخليكوا لبعض
بس مش ملاحظ ان المكان بعيد شوية
يعنى لازم تركبله مواصلة
على الاقل توك توك
:))
تحياتى
و كويس انكوا ااتقبلتوا اخيرااا
يعني بعد البرستيج اللي عملته ده كله وقايل لصاحبي إني جاي من أمريكا علشان يتفشخر بيا قدام مراته .. وبعدين أدخل عليهم بتوك توك؟ ده كلام برضه؟
أنا رحت بالأوتوبيس النهري .. أصل صاحبي ساكن عالنيل علي طول
يا بختك بصاحبك
طب مقولتلناش صاحبك اتغير ولا ايه
عاوزين التفاصيل
لو ممكن
تحياتي
مش مهم فين ولا امتي
المهم اما نبعد عن بعض نبقي ارواح علي موعد
:::::::::::::::
م الصبح هدي اصحابي معاد في ميدان التحرير.......وربنا يكرم
هههههههههههههه
ربنا يسعدك وحمدالله علي سلامتك
أنا ركبت في الرحلة دي 8 طيارات مختلفة .. يعني تقدري تقولي تاكسي طائر .. أو نقول ميكروباص طائر
طبعا دلوقت بقيتي تعرفي الميكروباص .. بقيتي مننا وعلينا
هو فيه ميكروباصات في المغرب؟
سؤال كويس جدا .. طبعا فيه حاجات كتيرة إتغيرت فيا وفيه بعد عشر سنين في طاحونة الحياة
يمكن أهمها هي طريقة التفكير .. بقت أحسن وأكثر نضجا
وأسوأها هي هموم الزمن اللي حفرت خطوط واضحه على وشوشنا
الموضوع دهعايز بوست لوحده
صح .. المهم نتقابل .. مش مهم فين
جربي كدة ميدان السيدة زينب علشان نعرف بيودي لفين بعد كده .. إحنا عرفنا ميدان التحرير بيودي لفين خلاص .. عايزين نجرب بقية الميادين
ههههه
انا عندي اشوف صديق قديم احلي حاجة في الدنيا قلبت علي المواجع
فية ناس صحابي مش شايفهم من زمان
واشكالهم جات قدامي حاليا زي طيف
صاحبك حسبها بطريقتة
وانت برضو حسبتها بطريقتك
بس هي في النهاية لو اطلعتم علي الغيب لاخترتم الواقع
بس سؤال مجاوبتش علية انت وكروتنا في البوست دة صاحبك حاليا فية حجات متشابهة بينكم زي زمان ولا حسيت انك كنت تفضل تحتفظ بصاحبك بتاع زمان حتي ولو كان ذكري
بزمتك مش فية حجات كتير بعدت زي بعدك من ميدان التحرير لكندا
بس جواكم ؟؟
اتمني العكس طبعاااااا
سؤال بسيط هو صاحبك هاجر انجلترا و لا هاجر كندا ؟
انا عارف ان انت اتقابلتوا في كندا
بقولك ايه قول لصاحبك اني بحبه لله في لله
وخليه يجيب لي تأشيرة عاوز اطفش من البلد دي
تحياتي
الدبور
و ابقة قولي حتقف فين علشان ابلغ الصحة
اي خدمة
بعد الحادثة
الأول
صاحبك حاليا فية حجات متشابهة بينكم زي زمان ولا حسيت انك كنت تفضل تحتفظ بصاحبك بتاع زمان حتي ولو كان ذكري
والتاني
بزمتك مش فية حجات كتير بعدت زي بعدك من ميدان التحرير لكندا
بس جواكم ؟؟
وأحب أجاوب وأقول إن إني قبل ما أقول الكلام ده على صاحبي لازم أقول إني أنا كمان إتغيرت كتير برضه .. يعني مش هو بس
عايزنا نرجع زي زمان؟ قول للزمان إرجع يا زمان
من 11 أو 12 سنة كان في إنجلترا بعد كده هاجر لكندا وبقى كندي من 9 سنين
وبعدين عايز تطفش ليه؟ ما هي لا باظت ولا خربت ولا جابت جاز لامؤاخذة .. على رأي مدحت صالح
أنا عارف كويس معزتي عندك .. دايما بتسعي في الخير
أنا مش هأستعمل الكبدة أساسا .. بصل وفلفل أرومي بس
نسيت أقولك .. أنا قبل الحادثة كنت شبه براد بيت .. وبعد الحادثة بقيت حسين فهمي
السؤال
هل حاليا ليك نفس الحماس واللهفة انك تشوف صاحبك مرة تاني زي الحماس الي كان جواك ولا حسيت انها نار وانطفت
وفية احاسيس تاني انك كنت تفضل تحتفظ بالصورة القديمة الي كنت راسمها
علي فكرة انا بسئل نفسي معاك
.
.
تحياتي ليك
والسلام
.
.
اشكرك علي باقة الامل اللي انا خطفتها منك بصراحه بدون ما اقصد
ياريت تسامحني بقي
سؤالك ده يعتبر أصعب سؤال .. مش كده وبس .. ده أصعب سؤال .. ولا أقولك .. ده أصعب سؤال
والأصعب منه لو سألت كمان عن الإخوات والأقارب والجيران .. مش الأصدقاء بس .. علشان نبقى جيبنا من الآخر
الإجابة هي: ياعزيزي .. إطمئن .. إنت إنسان طبيعي .. إحتفظ بالصور القديمة أحسن لك .. واللي يقولك غير كده ما تصدقوش لأنه مش عايش في الواقع .. أو مش عايز يعيش في الواقع
My life is to make to exceed the barrier of the languages against the lie and the evil
فى منتصف التسعينات ..لم يكن خيار السفر مطروحاً أمامى/أمامنا من الأصل لاعتبارات عائلية..ولأن القرارات لم تكن فردية شخصية خالصة..بل أصبحت مشتبكة(على أمل اللقاء) مع رغبات الطرف الآخر..فقد تم ترتيب محل إقامة دائم للحلم القديم فى مكان قصىّ فى تلفيفة مزخنقة من تلافيف مخى..لأن الواحد عادة لا يلقى بأحلامه خارج نطاق الذاكرة بسهولة.. وربما لهذا انتابتنى وعكة نفسية شديدة عندما عبرت/عبرنا عامنا الثلانين والذى وأد بمروره حلم الهجرة التى لم نسع لها
:)
لماذا الهجرة؟.. لأنى كعادتى لم أحسبها من وجهة نظر اقتصادية أو عائلية..لكنى كنت أرى فى اقتحام المجهول أمراً باعثاً على الحياة.. ولم يكن يكفينى فى حلمى سفر قصير مهما طال..كنت أريد أن يتم زرعى أنا وأسرتى الجديدة فى مكان أفضل..لأنى كنت موقنة من رداءة المناخ المتزايدة.. وربما كنت أستشرف إيقاع الحياة المقبل .. العائلة بدأت فى الانقراض. بحكم السن والزمن.. والأصدقاء..كل يسعى فى طريق
!!
المهم
اللقاء فى ميدان التحرير عادة جميــــل لأنه يضم الأصدقاء فى جو قريب من الذكريات.. لكن ما دام المتاح هو كندا.. فمرحبا.. رذاذ الشلالات سينعش الذاكرة
:)
جميل تدفق الذكريات .. والصراحة التى لمستها فى ردود الأخوة المغتربين جميعاً
ان كان يصح اطلاق لفظ اغتراب على ذلك
أنا كل اللي أعرفه انه الميكروباص دي مواصلات بس هوايه الله أعلم
الأغنية حلوة أول مرة أسمعها
أصل أنا كمان متواعد مع صاحبى الأنطيخ أننا نتقابل بعد أربعين سنة فى جهنم
:)
أبقى أتفضل معانا والمكان ميتوهش خالص، تانى شعلة يمين وانت داخل جهنم
من ميدان التحرير فى مصر لكندا
هو بقة فى ازمة مواصلات للدرجة دى
هههههههههه
.........................
بس عجبنى اوى الحنين للصحاب وللأيام الحلوة بجد الايام دى مش بتتعوض ابدا
سلام بقة اروح ادور عالاغنية واسمعها
انا كمان لما اكون مع صحاب قدام و نفتكر الماضي بنكون في منتهى السعاده
حتى لو كانت ذكريات غير سعيده
لكن لما نشوفها بعين لاسخريه بتكون سعيده
وربنا يدوم الود
http://1minelnas.blogspot.com
حانحدفكوا بالطوب
بس الحمد لله اللى جمعكوا بعد طول بعاد ربنا يديم بينكم المعروف
ربنا يوفقك ويكرمك
تحياتى
اهم حاجه تكون استمتعت
مش اقرب؟
:)
والله الواحد بيفرح انه لسه فيه ناس قادره تحافظ علي علاقتها مع غيرها
من غير ما يكون فيه مصلحه بينهم
بجد ربنا يسعدكوم
ويارب اكون انا مع صحابي زيك كدا مع صحبك
ناس عندها وفاء وبتقدر العشره
ربنا يباركلك يارب انت وصحبك
تحياتي
ياعم خد إنت اللي إنت عايزه .. مافيش حاجة تغلى عليك
بس أنا مش شايف في إيدك باقة زهور ولا حاجة .. أنا مش شايف غير جزرة بس
عموما بالهنا والشفا .. ونورتني
بس من تجربتك الواحد ممكن يثق ان جبل جليد ممكن ذكري واحدة تذوبه
تدوينة حلو اوي و لمست حاجات الواحد كان بيفكر فيها فعلا
It is really an appreciated mission, which you choosed for yourself ... for free.
I hope if you can translate to us the title of your blog.
Thank you
تحياتي لك على هذا التعليق الذي أتمنى أن يقرأه الجميع بتركيز .. ذلك لأنه بالفعل يمثل تفسيرا دقيقا لمعنى البوست الذي كتبته أنا هنا
فما ذكرتيه في تعليقك هو تماما ما أعني أن أتحدث عنه .. ولكني آثرت بالطبع إتباع إسلوبي المعهود الذي أتحرى فيه إيصال الفكرة بطريقة غير مباشرة
لكني أحب أن أوضح لك شيئا .. أن الهجرة لا يوجد عمر محدد لها .. وأنا مثلا تركت بلادي بعد أن تخطيت الثلاثين عاما أيضا .. كما أنني كلما تحركت خطوة للأمام أجد نفسي أتفاجأ بخطوات أخرى أبعد يمكنني أن أخطوها ولم أكن قد فكرت فيها قبل ذلك
وللحديث بقية .. فمازال هناك الكثير
الميكروباص ده وسيلة مواصلات .. المفروض إنه يكون باص صغير سعة 12 راكب مثلا .. يقوده أناس لا يعرفون من قواعد المرور شيئا ولا يهتمون بصيانة سياراتهم أبدا
لكنه الأهم والأكثر شعبية لدي الركاب في مصر
أما الأغنية .. آه .. بترجعني 10 سنين لوراء .. كانت أغنية جميلة .. وأيام جميلة في نفس الوقت
يعني يرضيك أسيب شغلي وأجيب الخيشة وأقعد أنشف البلوج؟ كدة غرقت الدنيا؟
وبعدين ميعادك مع صاحبك ده فشنك .. مين قال لك إنك هتقدر تروح جهنم بعد أربعين سنة؟ لازم القيامة تقوم الأول وبعد كده تقدر تروح
إنت فين يا إبني؟ كنت غاطس فين المدة دي كلها؟
مافيش أزمة مواصلات ولا حاجة .. المواصلات موجودة والطيارات موجودة .. بس فين الدوافع الي تخللي الواحد يتحرك؟ هو ده المهم
الأغنية قديمة شوية .. يمكن تكون غريبة عليكي شوية لكن هو ده اللي كنا بنسمعه ساعتها .. كانت أيام مختلفة
ده كلام سليم .. اللي حصل في الماضي البعيد سواء كان مفرح أو مؤلم إسمه برضه ذكريات .. وأنا مش مستغرب من إنك تقول إن الذكريات حتى لو كانت مؤلمة بتكون برضه جميله .. لأن الواحد بيحن للزمن اللي فات وبالتالي لازم يتحمل حزنه وفرحه في نفس الوقت
منورنا .. أنا مبسوط من رجوعك ومتابعتك
أنا اللي شاغلني دلوقت هو إزاي ما نطولش الفراق ده تاني .. هو العمر فيه كام 10 سنين نغيبهم عن بعض؟
أي أي .. بالراحة شوية
إنتي فين؟ إيه الغيبة الطويلة دي؟ ده إحنا إفتكرناكي إعتزلتي
وبجد حلوه اوي
متشكر جدا .. وعلى فكرة .. القصة اللي إنتي كتبتيها حلوة قوي
إستمري
هو فعلا كان ماضى الجميل .. كان
تحياتى الغالية ليك
الله يبارك فيك .. الحمد لله كان وقت ظريف وجميل .. بس قصير قوي .. أثناء الحياة برضه
تحياتي
بلدنا أقرب للقلب بس .. للأسف
منورني
أشكرك جدا يا دكتورة على التعليق الجميل ده .. وأحب أنصحك بإن إنتقاء الأصدقاء هو الحل الوحيد اللي هيؤدي إلى النتيجة دي .. مهما طال الزمن
ربنا يوفقك
صدق الله العظيم
أنا كتير بأفكر كده برضه .. ربنا هنا هو ربنا هناك .. ولن تهرب من قدر الله إلا إلى قدر الله
أينما تولو فثم وجه الله
أحييك بشدة
الواحد مش بيكون مصدق إنه مش هايشوف تاني الناس اللي عاشرهم مدة طويلة .. علشان كده الكل بيتفق على موعد للقاء .. ده فعلا بروتوكول
أنا قبل ما أتخرج بسنة كتبت قصة عن اللقاء ده وكنت متخيل فيها أحداث مختلفه لسيناريوهات مختلفة للشخصيات .. لكن اللي غاب عني ساعتها هو السفر والهجرة وإن اللي ممكن يتقابلوا يصفصفوا على إتنين بس .. زي حالتنا دي
منورة
ربنا يكرمك .. دايما بتجبر بخاطري
أهلا بيك دايما
بجد مفتقده تعليقك عندى
مبسوطه انكوا اتقابلتوا و لسه نفس الحرارةموجوده نادر ما ده بيحصل دلوقت
ايه اغنيه غرغرينه ديه؟؟؟؟
كندا
انجلترا
امريكا
ياجماعة راعو اللى احنا فيه
انا مبحدش انا بنق بس
و لما قابلتها لقيتها حد تاني جوزها نضح عليها
او يمكن انا اللي اتغيرت
تعالى شوف المسلسل
في ميدان التحرير
كان الإتفاق
وفي كندا
كان اللقاء
حقيقة سعدت بكلامك هذا
وان كنت شغوف بمعرفة باقي اللقاء
تحياتي
واحيى بعد نظر صاحبك وعقبالنا وعلى فاكرة ليسى الاحلام الهابلة اللى انت بتقول عليها دى علماء ميكانيكا وفيزياء ليسى فى ناس كتير بيحلموا بيها وبيحلموا انهم ينفذوها فى مصر بس طبعا احنا عارفين ان اخرتهم ينفذوها فى مستشفى المجانين لانه ان كان ممكن يبقى عالم فمستحيل ودرب من الجنون بل الجنون كله ان يكون عالم فى مصر
أنا موجود أهو .. بس أنا كنت متردد في التعليق على موضوع ديفيد سانتوس ده لأني لسة مقلق منه .. وخصوصا إنه بيطلب مني تلاجمة موضوعات بالإيميل ومش عارف هيعمل بيها إيه
أما بقى سؤالك عن أغنية غرغرينا .. لازم أعرف عندك كام سنة الأول علشان أعرف إنتي لحقتيها وألا لأ .. هو إنتي دكتورة جراحة وألا حاجة؟
ما دام بتنقي بس يبقى بسيطة .. أنا كنت بأحسبك بتحسدي وألا حاجة
عموما النهاردة الخميس وإحنا في شهر خمسة .. ربنا يستر
نحسب ونخطط احيانا
لشىء ويحصل وقتها شىء تانى
هيا إتغيرت .. وإنتي كمان إتغيرتي .. هي دي الحقيقة
أنا جاي حالا .. أول مرة هأتفرج على مسلسل بدري في الصبح كده
أشكرك على الشعور الطيب
بغض النظر عن تفاصيل باقي اللقاء .. المهم هو الشعور الذي ينتابك بعد نهاية اللقاء
ستجد نفسك وقد وقفت وقفة للتقييم الشامل لكل عناصر حياتك .. تبتسم لما حققته .. وتتحسر عما فقدته .. وتغفو للحظات في أحلام اليقظة
ثم تأتي الصدمة عندما تعود إلى الواقع مرة أخرى .. طاحونة الحياة اليومية
الله على الصداقة اللي جمعت عقليتين مشابهة جدا لما يرغبه الله في خلقه
الله على الدنيا لما تقرب الناس على قد ما بعدتهم
الله عليك إنت و صاحبك يا مراكبي
و اله على أغنية محمد فؤاد
انا ليا ثلاث من الأصحاب ما يقرب
من 10 سنين
يعنى خمسه وخمسه فى عين الحسود وبنتقابل كل فتره وخصوصا يوم الخميس
أتمنى من الله أنك تفضل انت وصاحبك على طول أصحاب مهما أختلف التفكير والعادات
شىء جميل ان يكون ليك صاحب
كفايه رغى
مش عارف هتفضلو اصحاب بعد البوست ده لآمتى بعد المشاعر والتعليقات الجياشه
متنساش تقرأ ايه الكرسى قبل ما تنام
شوف انتو كنتو متفقين تتقابلو فين
ودار الزمن بيكو واتقابلتو فين
بس بجد ده ان دل فيدل على ان صداقتكم جميله اوى وقويه جدا
لان حتى رغم مرور السنين والزمن والبعد بينكم رجعتو اتقابلتو
بجد مش عارفه اقولك ايه
بس ربنا يخليلك صاحبك
انت انسان جميل وتستاهل
تحياتى
اجمل حاجه في الدنيا ان ربنا ينعم علينا باصحاب مخلصين يفضلوا فاكرنا وماينسوناش ابدا
بجد البوست ده قلب عليا ذكريات كتير اوي ، و خالني نفسي اقابل كل اصحابي اللي ما شفتهمش من زمان ...وفكرني انه فعلا فاتت 10 سنين علي آخر مره كنا متجمعين فيها مع بعض
ربنا ما يحرمش حد من حبايبه واصحابه ابدا
تحياتي
فشكرا لحضرتك
المهم انكم شوقتوا بعض ومش مهم المكان
تتغير الاماكن ومن يعطى لها روح هو الانسان
دعوة مفتوحة من المدونين التونسيين إلى كل مدوني المغرب الكبير
Invitation des bloggeurs tunisiens à tout les bloggeurs Maghrébins
ميدان التحرير دلوقت مابقاش هو نفسه ميدان التحرير بتاعنا اللي كان من 15سنة .. يعني حتى لو إتقابلنا فيه ماكانش هايدينا نفس الشعور القديم
بالنسبة لموضوع العلماء في مصر .. طبعا كلنا عارفين قصة دكتور أحمد زويل وإيه الفرق اللي حصل له لما راح أمريكا وإيه اللي كان هايحصل له لو فضل قاعد في مصر .. وكمان فيه قصص تانية كتيرة أكثر عنفا لعلماء ومهنيين مصريين موجودين في الخارج لكن مش مشهورين إعلاميا .. ولا يهمهم ده أصلا .. الخلاصة .. إحنا نظامنا العام في مصر بيجهض أي نبوغ عن عمد وتعمد مقصود .. ودي حكاية تانية كبيرة قوي
طبعا دي أقدار .. وسبحان الله
بس برضه ماعرفناش .. إنت مييييييين؟
متشكر جدا جدا على تعليقك الجميل ده والشعور الطيب ده
كان نفسي أسمعكوا بقية الأغاني اللي كانت على السي دي .. مرة تانية بقى
أدعو الله إنه يديم عليك الصحبة الطيبة دي بإستمرار .. اللي بتقوله ده شيء جميل جدا ونعمة كبيرة جدا .. بسم الله ما شاء الله
أشكرك على تذكيرك بآية الكرسي .. جزاك الله خيرا
فعلا اللقا نصيب .. والأكتر من كده إن الواحد ممكن يعيش عمر طويل وبعدين يقابل ناس جديدة تغير حياته كلها .. ويكونوا قريبين ليه جدا
أنا حقيقي بأشكرك جدا على الإطراء الجميل ده .. نورتينا
ياه .. إنتي كمان بقى لك 10 سنين ماشوفتيش أعز أصحابك؟
ده إنتي قديمة زينا بقى؟
ربنا يجمعك بيهم على خير
وإنتي كمان بتحبي أغنية مرمرينا؟ ده إنتي كنت معانا في الكلية بقى .. بس إنتي صيدلة
أشكرك على شعورك الجميل ده
أنا برضه قلت لصاحبي كده .. مش مهم نتقابل فين .. أنا أروح له كندا أو هو ييجي لي أمريكا أو الكويت .. المهم إننا نتقابل وخلاص لأن إحنا الأشخاص اللي هندي للقاء معنى
نورتينا
ولقيته لسة برده صاحبك اللى سره معاك اللى بتحبه وواحشك انت كمان وحشته كدة وفرق معاه انك جيت شفته
وبرده ياترى بعد 9 سنين اختار فيهم كندا وانت اخترت مصر حسيت بايه فى الاختيار دة وانت بتكلم معاه شفته احسن منك والا الحال مافرقش كتير كله فى الضياع
معلش اسئلتى كتير
مدونتك وحشتنى جدا يامراكبى على فكرة
اعذرنى على التأخير وياريت ترجع تشرفنى تانى بالزيارة
تحياتى
أهلا بيكي وحمد الله عالسلامة
أسئلتك في منتهى الصعوبة على فكرة
طبعا فيه تغيير في كل شيء لكن علشان أكون منصف ما أقدرش أقول إن التغيير ده كان من ناحيته هو بس وكأني أنا ما أتغيرتش خالص .. إحقاقا للحق أنا كمان إتغيرت برضه
أما بقى حكاية مين فينا الأحسن فده موضوع نسبي جدا .. كل واحد فينا حقق حاجات وفقد حاجات .. فيه حاجات أنا شايف إن صاحبي محروم منها لكنه هو مش فارقة معاه الحاجات دي أصلا .. والعكس صحيح
أنا متشكر جدا على تعليقك الجميل ده ودايما تنوري في أي وقت .. وطبعا يشرفني زيارة مدونتك
التدوينة دي رغم انها بسيطة الا ان احساسهاعلي محصلش
الواحد هيفكر في المستقبل ... هل هقدر اقابل اصحابي تاني ولا لأ بعد 10 سنوات من التخرج
هل هنكون كويسين ولا الزمن الي احنا فيه دا هيبهدل عزيز القوم ؟؟؟
اتمني ان تظل علاقتي باصدقائي كما هي علاقتك بصديقك ...بس افلاقر ان الواحد شوية بشوية الزمن هيفرقة لاني ليا معارف كتير ...
و هيكون بدل التام هتكون محطة مترو انفاق السيدة اللي كنت بقابل قيها اغلب الناس اللي اعرفهم دون سابق ميعاد !!!!
ايام جميلة اوي و اتمني لكماالتفوق دائما و لاازدهار
أهلا بيكي .. أنا حقيقي سعيد جدا بتعليقك ده .. وفي الحقيقة أنا ما كنتش متوقع إن الإحساس اللي مريت بيه ده ألاقيه موجود عند ناس كتير كده
ولو بتسألي عن المستقبل .. أحب أقول لك إن كل الإحتمالات ممكنة .. وممكن يحصل اللي إنتي وأصحابك مش ممكن تتوقعوه أصلا .. هي دي أقدار ربنا وحكمته العليا
أتمنى ليكي كل الخير إنتي وأصدقائك .. مش مهم مترو السيدة وألا مترو دبي .. المهم تتقابلوا بالفعل لأن اللقاء هيكون من أحلى الأوقات في حياتكم .. وأحلى من دلوقت كمان
أتمني أن تزور مدونتى وتدلى برأيك فى مؤلفاتى وشكراً
أهلا وسهلا بيكي في أي وقت .. ويشرفني أزور مدونتك طبعا