شد القلوع يا مراكبي ... مافيش رجوع يا مراكبي

الجمعة، مايو 18، 2007

مصر أم الدنيا مرة تانية

من إسبوعين أو أكتر سمعت في الراديو الصبح إن أمير دبي وهو في نفس الوقت رئيس الوزراء في دولة الإمارات هيعمل مؤتمر صحفي علشان يعرض خطة الوزارة اللي إستغرق إعدادها أكتر من 6 شهور بواسطة العديد من الخبراء .. والخطة دي بيتعهد بيها إنه هيقضي على البيروقراطية والتعقيد الإداري .. إلخ .. طبعا أنا ماصدقتش وداني .. لأن إذا كان سموه شايف إن حكومة الإمارات فيها كل المشاكل دي .. أمال اللي عندنا إحنا في مصر يبقى إسمه إيه عالصبح؟
.
ولمعلوماتكم .. دبي دي النفط فيها قليل مش زي بقية إمارات ودول الخليج .. وممكن تلاقوا إن مصر مثلا عندها بترول أكتر من دبي .. ده غير إن جو مصر أحلى من جو دبي .. وعندنا كمية آثار مهولة مش موجود منها واحد على المليون في دبي .. وعندنا شعب مليان مهندسين وأطباء وعلماء وفنيين في كل التخصصات مش موجودين في دبي .. أمال فيه إيه؟ وهما سبقونا اقتصاديا وإعلاميا قوي كده إزاي؟
.
أفتكر لما رحت دبي لأول مرة .. لفت نظري كتاب من تأليف أمير دبي كاتب فيه إن اللي وصلوا ليه في دبي ما هو إلا البداية .. وإن اللي نفسه يوصل ليه لسة بدري قوي عليه .. وكل اللي إحنا شايفينه في دبي ده ما هو إلا إستعداد لأسرع وأعنف سباق إقتصادي هيحصل في العالم .. حد فيكم يا إخواننا سمع عن السباق اللي هيحصل قريب ده؟ ويا ترى أخبار إستعداداتنا للسباق ده إيه؟ حد يطمني الله يكرمكم
.
الكتاب ده مكتوب فيه شوية كلام حسيت إنه بيوجع جامد .. الكلام بيقول فيما معناه: إحنا مش هندخل السباق ده علشان نجري بس .. إحنا عايزين نفوز .. هو فيه حد يعرف إسم تاني إنسان هبط على سطح القمر؟ الناس دايما بتفتكر الأول بس
.
وبيقول كمان: إذا ما كنتش في المقدمة يبقى أنت ورا .. بتسيب مكانك اللي قدام علشان واحد تاني يآخد مكانك يمكن يكون أقل إبداعا منك .. مش مهم إنك تقع على الأرض .. المهم ماتفضلش واقع ولازم تقوم بسرعة .. ولو مش عايز تقوم يبقى إنت بتعترف إنك ما تستحقش المقدمة دي ويبقى جه وقت إعلان فائز جديد غيرك .. وعيش إنت بقى بتجري ورا الأمم اللي بتجري قبليك قدام .. إنت كده بتخلي الناس التانية تتحكم في مستقبلك وتديك المستقبل اللي يناسب مصالحهم .. مش المستقبل اللي إنت عايزه
.
متهيألي كفاية كده .. بس أحب أقول آخر حاجة وجعتني قوي قوي .. الكتاب بيقول إن أزمة العرب النهاردة مش أزمة فلوس ولا ناس ولا موارد ولا أسواق .. إنما أزمة قيادة وإدارة وأنانية مستحكمة .. أزمة حب كراسي الحكم على حب الشعب .. والإهتمام بمصلحة الشلل المحيطة بالقائد فوق مصالح الشعب .. الكلام ده مكتوب في الكتاب اللي مؤلفه أمير دبي بجد .. أيوة بجد

.

آه .. نسيت أقول لكم إيه علاقة الرغي ده كله بعنوان البوست؟ مافيش علاقة خالص زي ما إنتم شايفين

التسميات:

112 Comments:

Blogger اتفضل عندنا said...

احنا في مصر عندنا كل حاجه لكن بعيدعنك ربنا مولي علينا اللي مخالي ايامنااسود من قلب الكافر....يا رب افرجهاعلينا..قول آمين

الجمعة, مايو 18, 2007

 
Blogger Xee said...

عزيزي الأستاذ أحمد

مين قال إن فيه سباق إقتصادي؟؟ متصدقش يا راجل دي أوشاعات كلها

على فكرة لو لسه فاكر إسم كتاب، كان إسمه "رأيتي" و طبعا باين من عنوان الكتاب مشكلتنا فين
المشكلة سعادتك إن إحنا مركبين أربع فوانيس شابورة و برضه الرؤية عندنا معدومه....يمكن علشان جايين زراعي؟؟

شكرا للبوست الجميل ده و شكرا لتشجيعك ليا ، و الله بترد عليا النفس

تحياتي الحارة
زياد

الجمعة, مايو 18, 2007

 
Blogger REEMOO said...

الأزمه عندنا أزمه عقول للأسف
برغم توافر كل المقومات اللى ممكن تحط مصر على مصاف الدول
لكن فى نفس الوقت فى عقليات غريبه بتتمتع بيها مصر
وأنانيه وحب مصلحه شخصيه
اظن اننا محتاجين نغير العقول الاول
علشان نبتدى نقول الف باء اقتصاد
وبعدها نبقى نفكر فى السباق الاقتصادى
البوست مميز يا مراكبى
تحياتى واحترامى

الجمعة, مايو 18, 2007

 
Blogger Amr Ahmed said...

طب وبعدين

هنفضل احنا نتفرج كده

ويقولك احنا كنا زماااااااااان


يا فرحتي

الجمعة, مايو 18, 2007

 
Blogger عدى النهار said...

مافيش مفاجأة يا مراكبى إحنا ماشيين فى سكتنا وغيرنا ماشى فى سكته

الجمعة, مايو 18, 2007

 
Blogger Blank-Socrate said...

عزيزى
ازمه قيادة
و ازمه شعب
اعتقد اننا المسؤلين اكثؤر من القيادة
الســــــــــــلبيه

الجمعة, مايو 18, 2007

 
Blogger كلام لوجيك said...

السلام عليكم
ازيك يا بشمهندس احمد
انا مش عارف ابدأ منين
بس فعلا الوكسة اللى احنا فيها دي مش من قليل
انا اشتغات وعشت سنتين ونص فى الامارات وخاصة فى امارة ابوظبى
وفى الفترة دي شفت اللى عمري ماهشوفه تانى فى اي دولة تانية
انا عاوز اقول ان 75% من نفط الامارات يتركز فى ابوظبى ، والبقية تتوزع على باقى الامارات
دبى بتعتمد فى دخلها على التجارة والمنطقة الحرة فى جبل على وعلى الاستثمار وتوفير كل التسهيلات وازالة كل المعوقات امام المستثمرين
وعاوز احرق دمكم واقولكم ان دبى بيدخلها 5 مليون سائح سنويا
دون ان يكون لديها اي اثار او تاريخ او ماشابه
دبى اصبحت قبلة المستثمرين ومركز الاقتصاد فى اسيا والشرق الاوسط واصبحت تضم كل الأفرع الرئيسية للشركات الكبري والمتعددة الجنسيات
حتى انه مؤخرا قد تم نقل بعض من تلك الأفرع من القاهرة الى دبى نظرا للتسهيلات الكبري وللتكنولوجيا المتطورة التى تمتلكها دبى الان

الموضوع يا اخوانا مش موضوع امكانيات او اموال
الموضوع موضوع ادارة وتخطيط
وقديما قالوا
ليس هناك مؤسسة فاشله ، بل هناك ادارة فاشلة
وينطبق هذا المثل على كل شيئ حتى فى كرة القدم
فإذا كان هناك مدير فنى واعى وذكى فباستطاعته ان يوظف قدرات الفريق وان يستغل امكانيات لاعبيه على القدر الامثل وان يفوز
ولكن اذا كان هناك مدير فنى فاشل وبحوزته افضل لاعبين العالم فلن يستطيع فعل اي شيء بهم

لقد اعتمدوا فى دبى منهج الرجل المتاسب فى المكان المناسب ولم يبخلوا بأي شيء يكون فى مصلحة العمل

لا اريد ان اطيل اكثر من ذلك لإن دبى تحتاج الى مئات الصفحات وعشرات القصص والحكايات حتى نستطيع حصر كل ما يحدث بها

اكتفى بهذا المقطع الصغير من حرق الدم
دمتم بكل خير

الجمعة, مايو 18, 2007

 
Blogger loumi said...

ازاى يا احمد مش شايف العلاقه بين عنوان البوست والكلام اللى انت كاتبه
ده بالظبط زى العلاقه بين
الصورة والعفريته بتاعتها
تسهيلات هناك
وتعقيدات هنا
ادارة حكيمه هناك
ادارة منيله هنا
تخيل معايا راجل جاى يشترى ارض فى محافظه الوادى الجديد
فدادين كتير قوى
وموافق على كل شروط المحافظه
وبالسعر اللى يحددوه
الراجل ده عايز يزرع ايه؟
قول؟
ما تقول؟








قممممممممممممممممممممممممح
ما وافقولوش
وقالو له تزرع نباتات طبيه
بالله عليك ده كلام؟
الراجل لم خلقاته
قصدى ورقاته وخلع
وخلص الكلام
سلام

الجمعة, مايو 18, 2007

 
Blogger koukawy said...

لأ يا عم مفيش علاقه خالص الصراحع ههههههههههههه
حرام عليك قلبت علينا المواجع

الجمعة, مايو 18, 2007

 
Blogger اسلام رفاعى said...

السبب فى الكلام ده معروف (حسبنا الله ونعم الوكيل فيمن جعل مصر هكذا )و

الجمعة, مايو 18, 2007

 
Blogger mansourawy said...

سلام عليكم الاول
بالنسبة للعنوان فمش هعلق كتير
انت عارف وضعى اللوقتى
تحيا جمهورية مصر العربية
اما بخصوص بقة
البيروقراطية والتعقيد الادارى
فدى سياسة متبنياها الدولة من زمان
والهدف منها
القضاء ع البطالة
بمعنى اخر
لو انت كدا نزلت من بيتكوا
ورحت لموظف مثلا ف مصلحة حكومية
وخلصك مرة واحدة
هتروح فين بعد كدا؟
هتعقد ع القهوة ولا هتروح بقة تفتح التلفزيون وكدا
لا لازم تيجى مرة تانية وتالته
ولازم يبعتك للموظف فلان عشان تختم الورقة الفلانية
والموظف علان عشان يقولك ورقك ناقص وعدى علينا بكرة وبعده
بكرة وبعده دى مش اغنية
دى سياسة زى مقلتلك
وكمان من خلال المشاوير بتاعتك
اكيد هتركب مواصلات سواء تاكسى او باص
وهتفدفع فلوس
وناس تانية تعيش
مش قلتلك سياسة
وفايدة الروتين فى بلدنا
زى فايدة البروتين فى اللحمة
والناس عايشة
تجرى
وتيجى
وتروح
لحد امتى
اما بقة بالنسبة للسباق
فاحنا مشاهدين فى المدرجات لا اكثر ولا اقل
؟
مش كدا ولا ايه
تحياتى الك

بقول ايه صحيح قبل منسى
متعرفش تجيب ليا تاشيرة لدبى
!!!

الجمعة, مايو 18, 2007

 
Blogger يا مراكبي said...

اتفضل عندنا

أهلا بيكي وبكل المصريين اللي في كندا

إنتي اللي بتقولي قلب الكافر .. أنا ماليش دعوة .. أنا ما بأتكلمش في السياسة زي ما إنتي عارفه

ربنا يفرجها إن شاء الله .. دي سنة الله في خلقه

الجمعة, مايو 18, 2007

 
Blogger امام الجيل said...

طيب خلاص مدام مفيش فايدة يبقى كلنا ناخد الجنسية الدببية ونبقى من دبى اصلهم بيحبوا بلدهم المسئولين يعنى وعايزين ينهضوا بيها بس هنا والحمد لله عندهم مشغوليات اهم من البلد تقريبا عايزين يصلحو بس البيروقراطية بتاخرهم بس كل لما يحبو يصلحو يلاقو حاجة تقولهم فوتوا علينا بكرا

الجمعة, مايو 18, 2007

 
Blogger قلب أبيض said...

برست جميل
ورغم كل اللى بيحصل فى مصر هتفضل ام أبو ادنيا كمان
قب ابيض
تمنى ان تزورنى فانا م المعجبينبارائك ونا كنت صاحب مدونة عاوز اتجوز

الجمعة, مايو 18, 2007

 
Blogger كراكيب عادل said...

اخ انا قلت ان يوم الخميس هنا هيخليك تبعبع منا عارفك

انا صورتلك الجو كمان علشان تشوف وتستمر علطول في الحالة دي هههههههههه

تعرف انا مش عارف العيب فين احنا عندنا ثروة بشرية مش موجودة في اي مكان وعقول وطاقات

بس احنا الظاهر بنجري لورا هنلف من الناحية التانية

انا شوفت صورة لدبي قبل المباني وحاليا فقط قلت هكذا يكون الحكم

الله يرحمك يا شيخ زايد

انا عايز اي حد يدخل هنا يدعي لية بالرحمة الراجل دة انا بحبة جداااا

الجمعة, مايو 18, 2007

 
Blogger gohayna said...

صدقني العيب في كوز الذره الي حاكم المزرعه

تخيل بقي لما الذره هيا الي تحكم

بكتير هطلع فشار
مش اكتر

مستغرب ليه

العلم كله بيجري وفيه الي بيقع وفيه الي بيتكسر وبيصلح نفسه

كل حاجه

اما احنا

فلا نتفرج علشان ناخد خبره وان شاء الله لما ربنا يريد نبقي نتحرك

امتي بقي يمكن في القرن القادم

مع وجود الخطه الخمسينيه والستينيه والمئويه
الي كانت بتتزامن مع مئويه الاهلي

هما فالحيتن غير في شرم الشيخ والكوره

ربنا يعينا
يارب

الف شكر علي كل شيء يا احمد

وربنا يكرمك بجد

تحياتي

السبت, مايو 19, 2007

 
Blogger مصراوي أوي said...

الحمد لله مستعدين للسباق.......مجهزين حمارة عرجة ههههه وهنتسابق

عندنا قيادة حكيمة والحمد لله مفيش حب كراسي عندنا شكلنا كدة هنفوز :)

السبت, مايو 19, 2007

 
Blogger kaed said...

العزيز يا مراكبى
ومين قالك إن إحنا الوضع عندنا سيئ
أنت لو تشوف المليارات اللى الجرايد الحكومية بتتكلم عنها داخلة البلد كل يوم تفتكر أن إحنا أغنى بلد فى العالم مش كدة ولا إية حاسب دى مصر أم الدنيا ياجدع

السبت, مايو 19, 2007

 
Blogger حــلم said...

المراكبى
أمنع أولادى تماماً من تناول أى حلوى غير معروفة..ولا تحمل تاريخ صلاحية وزاهية الألوان الصناعية
لأنها من المؤكد مصنوعة تحت بير السلم
وهو مصطلح معترف به لكل صناعة تتم بأردأ الوسائل ودون رقابة.. وفى مكان غير صحى يعيث فيه الفساد


تخيل أن تصبح بلداً بالكامل مصنفة بأنها
تحت بير السلم

السبت, مايو 19, 2007

 
Blogger أحمد سلامة said...

إيه لاملراء اللي بيفهمو دول
مش عايز اظلم شعب دبي
بس لازم يكون ده مستوى البلد اللي فيها امير ومفكر في نفس الوقت زي ده
-----------------------
لن يتحسن المجتمع ما لم يحصل الفلاسفة على سلطة سياسية او يتحول السياسيون الى فلاسفة
---------أفلاطون-------------------

السبت, مايو 19, 2007

 
Blogger شــــمـس الديـن said...

السلام عليكم و رحمة الله و بركاتة

اقول ايه

مفيش كلام كتير ينقال

ازمة ادارة ثم ادارة ثم ادارة

الرجل الغير مناسب في مكان لا يصلح له

لما رجل يكون في مكان بقاله ربع قرن من الزمن و لم يستطع اصلاح و مزال يتحدث عن خطة اصلاح ...يبقي دا اسمة ايه ؟؟؟؟؟

ربنا ياخد و يجحم اللي في بالي
عارفين
بجد مصر موقتها في البشر الرهيبة اللي عندها
بس مفيش استغلال سليم للموارد دي

و يا جماعة مش ملاحظين حاجة ؟
فيه مصداقية بين الحاكم و المحكومين
بيحاول انه يبث روح الحلم في الشعب كلة

الشعب كلة عايش علشان يبقي نمرة واحد و ليس اقل من ذلك و ايضا بدون جعجعة بلا طحن

يعمل في صمت

هنيئا لك يا امارات قياداتك الحكيمة و علي الله بقية الحكام يتعظوا

اقول ايه
قلبت عليا المواجع و الجروح

السبت, مايو 19, 2007

 
Blogger يا مراكبي said...

Xee

طمنتي والله .. ده أنا صدقت إن فيه سباق إقتصادي بجد .. الحمد لله جت سليمة .. طلعت إشاعة

وفعلا إسم الكتاب: رؤيتي

والكتاب كله مليان كلام بيخبط فينا وفي اللي زينا في العالم العربي كله .. بس طبعا ولا بيحوق في حد

وبعدين لا شكر على واجب .. الناس لبعضيها دايما وأنا سعيد جدا بزيارتك دايما

السبت, مايو 19, 2007

 
Blogger Esmeralda said...

اديك قلتها اهه
أزمة قيادة وإدارة وأنانية مستحكمة .. أزمة حب كراسي الحكم على حب الشعب

عندنا كل حاجه حتى زحمه السكان شايفاها مش ازمه بدليل الصين و الهند

و برضه مفيش فايده

الراجل من دول يقعد على كرسيه يعتق
و لا يعرف ايه الجديد و لا الدنيا اتغيرت ازاى

دمغه محجرة بعيد عنك
قال و يقول لك فكر جديد !!!!!!!!

ماليش دعوة لو امن الدوله كبس

السبت, مايو 19, 2007

 
Blogger Tamer Nabil said...

اسباب الازمات والرجوع الى الخلف معروفة ومحفوظة للجميع عن دهر قلب

لكن لاتغير لامحاولة للغتير توجد ازن من اين ياتى التقدم

اذا كان لااحد يسعى لية

تحياتى

السبت, مايو 19, 2007

 
Blogger وجع دماغ said...

المقارنة بين مصر ودبى مقارنة لن تجلب الا الحسرة والغضب
والوضع طبعا فى دبى ليس مثاليا تماما فهم عندهم هوس بالمشروعات الجديدة أيا كانت وهما لا يمكن أن تحدد ما هى الأهداف الأسترتجية للأمارة بالضبط
لكن على كل الأحوال هما فى السما وأحنا فى الأرض
المشكلة فعلا مشكلة عقول وتخطيط وشرف

السبت, مايو 19, 2007

 
Blogger يا مراكبي said...

REEMOO

أنا سعيد إنك بتقولي إننا عايزين نغير العقول .. كويس إنك شايفه إن عندهم عقول أصلا .. لو كان عندهم عقول ماكانوش وصلوا بلدنا الغنية بالموارد للحضيض كده

طبعا عارفه أنا بأتكلم على مين

أنا متشكر جدا على متابعتك وإطرائك الرقيق .. مش غريب عليكي طبعا .. وأهلا بيكي

السبت, مايو 19, 2007

 
Blogger يا مراكبي said...

Amr Ahmed

لأ طبعا .. لازم نفوق ونتغير بدل ما نفضل متفرجين .. وكعادتي دائما .. أنصح بأن تبدأ بنفسك وبعد كده اللي حواليك

منورني دايما

السبت, مايو 19, 2007

 
Blogger يا مراكبي said...

عدى النهار

بالظبط .. كل واحد ماشي في سكته .. بس المهم السكك دي هتوصل لإيه وهتودينا لفين

إحنا سكتنا هتودينا في داهية

السبت, مايو 19, 2007

 
Blogger يا مراكبي said...

Blank-Socrate

بلا شك .. فكما تكونوا يولى عليكم .. وإن الله لا يغير ما بقوم حتى يغيروا ما بأنفسهم

منورني

السبت, مايو 19, 2007

 
Blogger يا مراكبي said...

كلام لوجيك

أنا مش فاهم إنت عايز تبطل كتابة إزاي؟ ده تعلقك ده ينفع بوست جيد جدا لوحده .. كله معلومات أضافت للبوست بتاعي

وأنا أحب أعقب بإن دبي قدمت للعالم البديل الأقرب لهونج كونج اللي رجعت للصين وكانت مستغله بواسطة الإنجليز 100 سنة كاملة

وآلية التنفيذ بتعتمد على فكرة بسيطة جدا .. وهي ما تبصش تحت رجليك .. يعني قدم تسهيلات وتخفيضات النهاردة للمستثمرين وإنت هتجني قدها أضعاف أضعافها في المستقبل

في مصر مرعوبين إنهم يخفضوا الضرائب والجمارك لحسن دخل الدولة يقل .. لكن لو جربوها هيلاقوا نشاط وحركة هتجيب دخل أكتر بكتير .. لكن الكل باصص تحت رجلية

تحياتي الغالية ليك .. منورني دايما

السبت, مايو 19, 2007

 
Blogger tota said...

كلامك وجعني كتير
بس مع ده كله مش عارفه ليه مش قادره احس او اشوف الصوره الوحشه عن مصر ومش لاقيه اي بلد عربي مهما كانت امكانياته ومكانته افضل من مصر فيها حاجه مميزه غير كل بلاد العالم بحبها بكل الوحش اللي فيها
كفايه انها مذكوره في القران وبعد كده ماعنديش حاجه اقولها مدونتك نقيه وجميله يامراكبي
سلامي ليك

السبت, مايو 19, 2007

 
Blogger يا مراكبي said...

loumi

كلام مظبوط .. كل اللي عندنا عكس هناك .. ومش عكس وبس .. ده بره حدود المنطق

عامل زي اللي بيرمي نفسه من عاشر دور ومش شايف إنه ممكن أو أكيد هيتفتفت مائة حتة ويموت

أما بقى حكاية القمح بقى فدي حكاية كبيرة قوي .. ليها قعدة كبيرة قوي بعد كده

السبت, مايو 19, 2007

 
Blogger يا مراكبي said...

koukawy

أخيرا لقيت حد فاهمني .. أنا برضه قلت إن مافيش علاقه خالص

أيوة كده شجعيني

السبت, مايو 19, 2007

 
Blogger يا مراكبي said...

اسلام رفاعى

أيوة .. حسبنا الله ونعم الوكيل .. حسبنا الله ونعم الوكيل

السبت, مايو 19, 2007

 
Blogger واحد من الإخوان said...

متهيقلي إحنا في السبق
صحيح أخر ناس ورا
بس لسة في السبق
صحيح مسيرة التنمية من سنة 81
لكن أهو إحنا في السبق
في ناس غيرنا سابوا السبق خالص
عارفين ليه ؟؟
أصل السبق خلص
وبدأوا سبق جديد
هههههههههه

والله يا مهندس احمد
دي حاجة تخنق
بلد بالموارد البشرية دي والموارد الطبيعية والجغرافية وكل ده
ولسة بنتسول عشان نمشي الميزانية
ونعمل كادر وظيفي وبنية تحتية وما اعرفش إيه !!!!!1
يا ساتر ده الواحد زهق


محمد حمزة

الأحد, مايو 20, 2007

 
Blogger يا مراكبي said...

mansourawy

أنا سعيد بيك جدا لأنك رغم إن وقتك ضيق إلا إنك قدرت تنورني هنا .. منور يادفعة .. وسمعني السلام الجمهوري

أنا ما كنتش واخد بالي من الفكرة الجميلة اللي إنت طرحتها دي .. فعلا لو خلصنا كل حاجة بسرعة ممكن نقعد فاضيين .. ده حتى الوقت اللي هيتوفر ده مش لازم نستغله في حاجة تانية مهمة .. إحنا الوقت عندنا مالوش قيمة زي ما إنت عارف

ههههه

تأشيرة دبي سهلة .. ممكن تآخد تأشيرة سياحة .. بس إنت خلص الجيش الأول

الأحد, مايو 20, 2007

 
Blogger يا مراكبي said...

امام الجيل

هما ربنا أنعم عليهم بالقائد المخلص لبلده .. ودي نعمة كبيرة

وعندنا زي ما قلت .. نفسهم يصلحوا .. بس الروتين ياعيني معطلهم .. مظلومين والله

هههههه

الأحد, مايو 20, 2007

 
Blogger يا مراكبي said...

قلب أبيض

أهلا بيك وأشكرك على الإطراء

كلنا بنقول إن مصر أم أم الدنيا علشان إحنا بنحبها .. لكن للأسف ده مش كفاية .. ولا ريادتها بقت حقيقة .. ده كان زمان

أنا جاي عنك حالا .. متشكر على الدعوة

الأحد, مايو 20, 2007

 
Blogger يا مراكبي said...

كراكيب عادل

أيوة .. الجو يوم الخميس كان شاعري جدا .. رومانسي عالآخر .. حتى إسمه رومانسي برضه: الطوز

ههههه

إحنا بنجري لوراء؟ أول مرة أعرف إننا بنجري أصلا .. كويس إنك قلت لي .. بس إحنا كده مش بنجري لورا .. إحنا راكبين الصاروخ السريع

أمير دبي هو كمان قال إن أستاذه الأول هو الشيخ زايد رحمه الله .. الشيخ زايد كان فعلا سابق عصره بسنين طويلة .. حد كان يصدق إنه يوحد الإمارات السبعة سنة إتنين وسبعين ويوصل للي هما فيه ده في تلاتين
سنة بس؟

وعجبي علينا

الأحد, مايو 20, 2007

 
Blogger يا مراكبي said...

gohayna

إيه موضوع الذرة والفشار ده؟ شكلك كده بتتكلمي في السياسة يا دكتورة .. خدي بالك

بس مين قال لك إننا فالحين في السياحة والكورة؟ أعذريني يا دكتورة .. المعلومتين دول مش صح أبدا

دوري كده على البلاد اللي عندها صناعة سياحة بجد وجد وإنتي هتتفاجئي بدول عندها أعداد سياح وإستعدادات سياحية أحسن مننا مليون مرة .. شوفي تايلاند وماليزيا وسنغافورة .. شوفي أسبانيا وفرنسا وإنجلترا .. شوفي قبرص واليونان وتركيا .. شوفي أمريكا مثلا .. وأخيرا لبنان والإمارات .. وغيرهم كتيييييير

أما الكورة .. فاكرة الصفر المدور الكبير؟ وكأس العالم اللي رحناه مرتين بس في تاريخنا كله؟

المهم .. أرجو إنك تكوني بخير .. إبقي طمنينا عنك

الأحد, مايو 20, 2007

 
Blogger يا مراكبي said...

مصراوي أوي

أيوة كده .. أنا بأحب الناس اللي بتطمنني .. ربنا يطمن قلبك زي ما طمنت قلبي علة بلادنا

منور

الأحد, مايو 20, 2007

 
Blogger يا مراكبي said...

kaed

أيوه .. أنا متابع موضوع المليارات اللي بتدخل البلد كل يوم ده .. حاجة تفرح فعلا

إقرأ كده الموضوع القديم ده

http://yamarakby.blogspot.com/2006/11/blog-post_19.html#links

الأحد, مايو 20, 2007

 
Blogger يا مراكبي said...

حلم

إخترتي وصف فيه قسوة وألم فوق الوصف: تخيل أن تصبح بلداً بالكامل مصنفة بأنها
تحت بير السلم

تعرفي إني لما بأسافر لدول أجنبية بأحتاج أستخرج تأشيرة قبل السفر بمدة وبأحتاج أوراق كتير .. لكن أصحابي الأجانب أو اللي معاهم جوازات سفر أجنبية بيسافروا من غير وجع القلب ده وبيأخدوا تأشيرات الدخول في المطار

لأنهم مش مصنفين بأنهم تحت بير السلم

الأحد, مايو 20, 2007

 
Blogger يا مراكبي said...

أحمد سلامة

هما فعلا ناس متفتحين جدا وأميرهم كمان تفكيره من أرقى ما تتخيل

أحييك وأحيي مقولة أفلاطون كمان .. فيها من الحكمة الكثير .. لمن يعي أصلا

تحياتي الغالية ليك

الأحد, مايو 20, 2007

 
Blogger Rozza!.......فاقد الذاكرة said...

كلام الراجل وكلامك صحيح
بس مين يسمع
الي اكتشفته انو الواحد عشان يطور بلده اقتصاديا لازم يكون معاه فلوس
واصحاب الفلوس معاهم سيوف
وللاسف كل واحد بيفكر يطور نفسه, مش بلده
وفي ناس فنانة, بس البلاد لا تسمح ليهم بالتطور
وهي ده الحال العربة

الأحد, مايو 20, 2007

 
Blogger يا مراكبي said...

شــــمـس الديـن

وعليكم السلام عليكم و رحمة الله و بركاتة

وضع الرجل الغير مناسب في مكان لا يصلح له هو الطريق السريع لهدم الأمم أوتوماتيكيا دون تدخل عسكري .. هذا مبدأ عام

وحديثك عن أي محاولة للإصلاح بعد أن مرت فترة تخطت الربع قرن ما هي إلا هراء .. أي فرصة يحتاجونها أكثر من تلك؟ ربع قرن آخر؟ أما التماس الأعذار بالزيادة السكانية فذلك يجعلني أضحك عندما أنظر للصين مثلا

أما في حديثنا عن دبي .. فهم لا ياتفون حول حلم .. بل أصبح واقعا .. وكل ذلك في أقل من عشرون عاما فقط

أهلا بك دوما

الأحد, مايو 20, 2007

 
Blogger يا مراكبي said...

Esmeralda

أنا ما قلتش حاجة .. الكتاب هو اللي بيقول وإنتي اللي بتلقحي بالكلام اللي في تعليقك ده

ولو أمن الدولة كبس عالمدونة .. أنا أول واحد هيفتن عليكي

إنتي اللي بتقولي لازق في الكرسي دمغه محجرة وحاجات كدة

أنا ما أعرفكيش .. إنتي مين؟

الأحد, مايو 20, 2007

 
Blogger يا مراكبي said...

Tamer Nabil

لا أحد يسعى إلى التقدم؟ هذا ينطبق على أولي الأمر المتهاونين فقط .. أما نحن .. فنحن نريده ونطلبه ولابد أن نسعى إليه .. مهما تهاون الآخرون

أشكرك بشدة

الأحد, مايو 20, 2007

 
Blogger gohayna said...

يا مراكبي

سبيلي الامل حتي

ياسيدي متخدش في بالك

انا فاكره الصفر وعارفه السياحه

بس اهي حاجه الواحد يعني يحسس بيها روحه باالامل


انا كويسه ويخير الحمد لله

ربنا يخليك يارب

مليون وربعوميت شكر
ومتسألش الرقم دا اشمعني ربعوميه

سبيها كدا ببركتهم

تحياتي

الأحد, مايو 20, 2007

 
Blogger Rania said...

يا مراكبى
مسااااااااااء الخير الاول
المشكله فى مصر مشكله فساد و بس فساد مسيطر على البلد
من ناس الجشع ملى قلوبها و ملى حياتها
و طول مهم فيها عمرنا ما هنتقدم خطوة لقدام
ما علينا
فكرتنا بالغلب
المهم
ليك عندى تاج
و اوعى تكسفنى دى اول مرة ابعت لحد حاجة
لحسن تيجيلى عقدة و تبقى انت السبب
و ارجع اغنى اغنية انت السبب لهانى شاكر
تحياتى

الأحد, مايو 20, 2007

 
Blogger Sharm said...

يا عم انا ناقص توهة

!!!!

الاثنين, مايو 21, 2007

 
Blogger يا مراكبي said...

وجع دماغ

للأسف أختلف معاك في رأيك ده لأن دول الخليج وتحديدا الإمارات وخصوصا دبي لهم أهداف إستراتيجيه واضحة جدا ومحدده ومشهورة

هما مهتمين جدا ببناء الإقتصاد القوي اللي هيدعم بلادهم في وقت هيتلاشى فيه البترول من أراضيهم وده متوقع إنه يخلص خلال 120 سنة في الإمارات و170 سنة في السعودية .. يعني مافيش وقت

ده المبدأ العام يا أخي الفاضل

تفاصيل تنفيذ المبدأ ده كتيرة جدا لكنها كلها بتدور حوالين جعل دبي قبلة للإقتصاد في الشرق الأوسط وبالفعل بقى فيها أكبر ميناء وأكبر حركة طيران وأكبر تجارة ترانزيت وتبادل تجاري وأكبر حركة إعادة تصدير ومراكز سياحية مهمه جدا ومطارات عملاقة ومدن للإعلام والإنترنت وناطحات سحاب ومدن ترفيهية عملاقة ... إلخ

الناتج القومي لدبي وصل 136 مليار درهم .. شوفهم يطلعوا كام جنيه مصري

المهم إنك نورتني .. أهلا بيك في كل وقت

الاثنين, مايو 21, 2007

 
Blogger .:.-=- ELGaZaLy-=-.:. said...

مصر دى اغنى بلد وافقر شعب...

بجد ربنا يكرم ونفوق بقى

الاثنين, مايو 21, 2007

 
Blogger يا مراكبي said...

tota

الكلام بيوجع علشان إحنا بنحب مصر بجد مش هزار .. وبالنسبة لمقارنة مصر بالدول التانية اللي أشرتي إليها فأنا هأبقى أكتب تفاصيل أكتر من كده في بوستس تانية تشرح الفكرة بعمق اكتر

أشكرك جدا على رأيك في المدونة وياريت لو كان عندك وقت تبقي ترجعي لمواضيعي الأقدم من كده يمكن تلاقي حاجات تعجبك .. ويمكن لأ طبعا

أهلا بيكي

الاثنين, مايو 21, 2007

 
Blogger david santos said...

It places fhoto of Madeleine in your bloggue


Missing Madeleine!
Madeleine, MeCann was abduted from Praia da Luz, Portugal on 03/03/07.

If you have any information about her whereabouts, please contact Crimestoppers on 0800555111 Please Help

الاثنين, مايو 21, 2007

 
Blogger شادي فايد said...

مصر ام الدنيا

طب مين ابوها
؟؟
:)

الاثنين, مايو 21, 2007

 
Blogger ادم المصري said...

يانهار ابيض
هو في في الدول العربية ينفع رئيس وزارة يمسك وزراة في دولة تانية ولا ايه ؟
.
.
ياعني امير في دبي
ورئيس وزارة في الامارات
ايه دا .. هما طبقوا نظام الاحتراف في السياسة كمان
.
.
.
.
.
.
هههههههههههههههههههههههه
والله ما عارف اقولك ايه
هم يبكي وهم يضحك

الثلاثاء, مايو 22, 2007

 
Blogger khaled said...

والله كلنا نفسنا فى كده
نبقى دبى

الثلاثاء, مايو 22, 2007

 
Blogger يا مراكبي said...

واحد من الإخوان

على فكرة .. اللي بتقوله ده مش نكته دي حقيقة .. الناس فعلا بدأت سبق جديد وإحنا نايمين

وإن شار الله هأكتب بوست قريب عن تفاصيل اللي حصل في دبي خطوة خطوة في العشرين سنة اللي فاتوا وأنا متأكد إن هيجيلكم ضغط وبري بري

أهلا بيك

الثلاثاء, مايو 22, 2007

 
Blogger همسات said...

على فكرة موضوع حلو جداااااا
بس اهو هو ده حاال البلاد العربية كلها
بس امير دبى فعلا بيعمل بكل اللى هو بيقوله بجد ؟
......................
وهو فعلا الوطن العربى مش فيه ازمة موارد ولا الحاجات دى كلها هو فعلا فيه ازمة قيادات
...........
وزى ما قال سلامة
لو كنت قريت افكار لأفلاطون اما كان بيقول ان لازم ده كله يحصل من التعليم من البداية
على تلات مراحل
الاولى اللى مش بيقدر يعديها دول بيبقوا اصحاب الحرف

المرحلة التانية بتأهل العسكرين
المرحلة التالتة بتأهل الحكام اللى هما لازم يكونوا فلاسفة
..................
يعنى لو بصينا على اغلب حكام العرب هتلاقيهم من الطبقة التانية
وياريتهم نافعين فيها
):

الثلاثاء, مايو 22, 2007

 
Blogger يا مراكبي said...

Rozza!.......فاقد الذاكرة

إن شاء الله لما أحكي عن تفاصيل تطور دبي هتعرف إن مش لازم يكون الدولة معاها فلوس علشان تتقدم .. فيه طرق كتيرة لجذب الفلوس من الخارج

الكتاب إياه بيقول بالنص إن من النعم الكبيرة إن ربنا يدي الشعب حاكم أمين ومخلص

ربنا يوعدنا

الثلاثاء, مايو 22, 2007

 
Blogger يا مراكبي said...

gohayna

مادام جيبتي سيرة الأمل يبقى أنا معاكي .. مصر أكبر دولة سياحية وأخدنا كأس العالم مرتين .. إحنا أجدع ناس

ومليون وربعوميت العفو .. وببركتهم برضه

إنتي في مستشفى حكومي وألا قطاع خاص؟

الثلاثاء, مايو 22, 2007

 
Blogger يا مراكبي said...

Rania

الفساد .. هو ده العنوان .. وتفاصيل التفاصيل معروفه بعد كده طبعا

وبالنسبة للتاج .. أنا كان بودي أنتهز الفرصة وأسبب لك عقده بس ماقدرتش

البوست اللي جاي هأفرج عن كل التاجات اللي جات لي

هو صحيح فيه أغنية لهاني شاكر بتقول إنت السبب؟

الثلاثاء, مايو 22, 2007

 
Blogger يا مراكبي said...

Sharm

الموضوع مايتوهش ولا حاجة .. إشرب فنجان قهوة كده وصحصح وإنت تلاقي الحكاية سالكه

منور .. ومبروك الباندويدث

الثلاثاء, مايو 22, 2007

 
Blogger أُكتب بالرصاص said...

دبي راكبة صاروخ ، وإحنا راكيبن سحلفاة
ولسه متخيلين نفسنا في زمن الريادة

ولسه بنتفشخر بما فعله امواتنا الفراعنة
واحنا بنمش لورا
مش لقدام

فيه فرق في السرعات يا سيادة القاضي

الثلاثاء, مايو 22, 2007

 
Blogger قاسم أفندي said...

أستاذي الفاضل
الحقيقة رغم اني متابع لتعليقات حضرتك بصفة مستمرة في مدونات كثيرة الا انني اول مرة يسعدني الحظ وادخل مدونتك الجميلة هذه وان كنت لست من مغرمي التعليق عموما فكثير من المدونات أمر عليها ولا أترك تعليق ولا تسألني لماذا لأني شخصيا لا أعرف
بالتأكيد الموضوع جذبني لأني مقيم بدبي وأشعر تماما بكل حرف كتبته، وهذا الرجل الشيخ محمد بن راشد بالفعل رجل قمة في الإخلاص والعمل ويتمتع بحب الجميع سواء مواطنين أو مقيمين .. سيدي المقارنة ظالمة تماما .. في مصر لدينا نهر النيل ولديهم هنا الخور (وهو كما تعلم مياه مالحة قادمة من البحر ) هل تتخيل أنها محمية طبيعية؟ أنظر كيف تعاملوا هم مع الخور وكيف تعاملنا نحن مع النيل
عندنا حضارة سبعة الاف عام نبول علي جدران معابدها كل يوم عندنا مياه البحر الأحمر وعندنا ساحل البحر المتوسط وعندنا بورسعيد أول منطقة حرة في المنطقة
آلمني يوما زرت مدرسة أولادي هنا في دبي ولفت نظري علي لوحة الاعلانات بالمدرسة موضوع قرأت فيه أن اول مدرسة علي الاطلاق بالامارات شيدت عام 56؟ هل تعلم سيدي أننا في علي ما اعتقد عام 1928 كان الملك يحتفل بمناسبة مرور مئة عام علي انشاء القصر العيني
حاجه مخجلة اوي الحقيقة
أشكرك علي هذا الموضوع الجميل
تحياتي واعتذر للاطالة

الثلاثاء, مايو 22, 2007

 
Blogger sherehan84 said...

كلام موجع أوي
أصلا مجرد ما الواحد يسمع مجرد سمع عن دبي قلبه بيوجعه وللأسف مقيش حد يدلعه :))))

الثلاثاء, مايو 22, 2007

 
Anonymous غير معرف said...

والله مصر برده ام الدنيا

دبى جميله و حلوه.. بس ملفيهاش روح مصر ابدااااا..

ولا فيها ناس زى المصريين..

واصلا اللى عملها و بناها مش ولادها.. دول جابوا ناس تخطط وتبنى وتعمل البلد يعنى..

و الناس دى كان معظمها مصرييييييين...

مصر ام الدنيا.. بس يمكن هيا ظروفها الوقت مش اد كده

بس برده ام الدنيا..

وهاتبقى احسن من دبى و من اى حته بينا احنا..

زى ما انت قلت كده.. لازم الاول كل واحد يفكر ازاى يبقى الاول ..

ولما كل واحد مصرى يبقى الاول فى مجاله... اكييد اكيييييييييد مصر هاتتغير..

بينا احنا :)

بس قول يا رب ;)

الثلاثاء, مايو 22, 2007

 
Blogger koukawy said...

ماشالله انت مش محتاج تشجيع انت
كويس لوحدك بس هشجعك برضو

الثلاثاء, مايو 22, 2007

 
Blogger صاحب البوابــة said...

وكل يوم تتسع الهوة

وكل ساعة نتأخر عن الركب

تحياتي اخي العزيز

الأربعاء, مايو 23, 2007

 
Blogger frozen love said...

بلاش والنبي الكلام اللي يوجع ده تاني..لاحسن الواحد بقى على اخره خلاص


اقولك ايه
nice post...ll2sf
lool

الأربعاء, مايو 23, 2007

 
Blogger أميرة ويلز said...

ازاى مالوش علاقة دة له علاقة ونص

على فكرة الكلام اللى ذكرته دة اللى هو اجزاء من الكتاب انا بفكر فيه بقالى يجى اسبوعين ووجعنى اوى وخرم دماغى برضه بس انا ماقريتش الكتاب

انا سمعت اجزاء منه فى فواصل قناة دبى

وتمنيت انى اقرا الكتاب دة وسألت نفسى ايه الراجل دة ايه الكلام دة
خصوصا ان فى جزء برده علق فى دماغى اوى لما قال ان لكل جواد كبوة ومش خطأ انك تقع وبعدين تقوم لكن الخطا ان تبقى اصلا مش عايز مستسلم وراضى بمكانك
بالنسبة للسباق صلى ع النبى وادعى ربنا يرحمنا برحمته

الأربعاء, مايو 23, 2007

 
Blogger نفسنا said...

تم أفتتاح العدد الأول من مجلة نفسنا
نتمنى منكم زيارتنا

الأربعاء, مايو 23, 2007

 
Blogger شــهــروزة said...

سبقونا يا أفندم

علشان احنا ماشيين على حمارة عرجا
اسمها




حضارة العالم القديم
ومصر أم الدنيا

تحياتشى

الأربعاء, مايو 23, 2007

 
Blogger خمسة فضفضة said...

السلام عليكم ورحمةالله وبركاته

اللي اعرفه كويس ان امارة دبي دي لحد وقت قريب اوي كانت عايشه عاله علي بقية الامارات المجاوره ليها وكانوا بيدوها اعانات ، بس اهلها ماكانش عاجبهم الكلام ده وحالوا علشان يغيروا الوضع ، واستطاعوا انهم يستفيدو من المكان الاستراتيجي بتاع الاماره و عملوها زي ما احنا شايفينها دلوقت مركز للتجاره من كل انحاء الدنيا ، واماكن ترفيه وخدمات 10 نجوم ، وقدروا في خلال فتره قليله انهم يحولوا الاماره الصغيره اللي كانت بتتسول من الامارات التانيه واللي كانت مجرد صحراء الي البلد اللي بتبهر الاجانب قبل العرب واللي دخلها بيكفيها ويفيض مع ان ماعندهاش كميات كبيره من البترول زي ما حضرتك قلت

ياريت نتعلم منهم ونحاول اننا ولو حتي نصهم
بس للاسف علشان ده يحصل لازم حاجات كتير اوي تتغير وعقليات يحصلها غسيل مخ لعل وعسي نقدر نتغلب علي الروتين والبيروقراطيه اللي مودينا في داهيه

تحياتي

الخميس, مايو 24, 2007

 
Anonymous ra2ed fada2 said...

after a long time of being away, i can say that eza kan rabo al bait bel dof darebon, fa shemato ahlo al bait al rakso, faeza kan rabo al bait wal zabaneya fasedoon, fashemato ahlo albait yekono makhooroooooooon.Ghadab min rabena be3eed 3annoko, allahoma enny as2aloka allotf fel kada2.

الخميس, مايو 24, 2007

 
Blogger اعشق فى اليل ضوء القمر said...

هيه طيب
وجعتلى قلبى الله يريح قلبك
مفيش تعليق

الخميس, مايو 24, 2007

 
Anonymous www.fatimatalk.com said...

السلام عليكم ورحمة الله وبركاته

الثروة الحقيقية هي ثروة الإنسان...وكل ما تراه في دبي لايخرج من إطار "العلو في البنيان" !

ومن الؤسف أن نرى الوضع في مصر على ما هو عليه، وقد اختارت القيادة السياسية عدم لعب دور إقليمي على المستوى السياسي، وإهمال المواطن المصري وقمعه

ما قيمة التطور الاقتصادي في ظل غياب للحريات...

الحرية بداية التطور الحقيقي وبدونه تبقى اللوحة ناقصة

فاطمة

الخميس, مايو 24, 2007

 
Blogger يا مراكبي said...

ELGaZaLy

مصر أغنى بلد؟ ده كلام صحيح مائة في المائة

رغم إن الشعب فقير والحالة الإقتصادية سيئة إلا إن الإدارة الحكيمة للموارد تقدر تثبت الكلام ده بجد وجد

أهلا بيك

الخميس, مايو 24, 2007

 
Blogger يا مراكبي said...

david santos

We hope that u will find her soon .. it will be really a good news if happens

Thanks

الخميس, مايو 24, 2007

 
Blogger يا مراكبي said...

شادي فايد

ده سؤال ذكي جدا .. أول مرة حد يسأل عن أبو الدنيا

سؤال جميل

الخميس, مايو 24, 2007

 
Blogger يا مراكبي said...

ادم المصري

والله فكرة حلوة جدا .. بس للأسف مش هينفع الإحتراف اللي بتقول عليه ده .. بس ياريت

بس ياريت نقلدهم حتى على الأقل .. أهم جنبنا ومش بعيد عننا وكمان مستعدين يقدمولنا النصح والمشورة .. بس إحنا اللي مالناش نفس

الخميس, مايو 24, 2007

 
Blogger يا مراكبي said...

khaled أثناء الحياه

أقولك على حاجة تقهر؟ أمير دبي بيقول إنه مش مستعد يقلد حد أبدا .. لازم تكون كل الأفكار و المشروعات جديدة ورائدة وماحصلتش قبل كده .. وهو ده سر التميز .. اللي هو أكبر من مجرد النجاح العادي

منور

الخميس, مايو 24, 2007

 
Blogger يا مراكبي said...

همسات

أمير دبي عمل أكتر من اللي قاله بكتير .. هأبقى أحكيلكم عن اللي إتعمل في بوست تاني بعدين إن شاء الله

وبعدين إنت محترمة جدا .. كويس إنك قلتي إنهم من الطبقة التانية حسب تصنيف أفلاطون .. ده إنتي مجاملاهم على الآخر

الخميس, مايو 24, 2007

 
Blogger يا مراكبي said...

أُكتب بالرصاص

إحنا راكبين سلحفاة؟ ده أنا كان بيتهيألي إننا مش راكبين حاجة أصلا .. كويس والله

وزي ما إنت قولت .. فيه فرق في السرعات يا هاني يا رمزي

منوررر

الجمعة, مايو 25, 2007

 
Blogger سلسبيل said...

استاذ احمد...ليه بتقلب علينا المواجع؟؟
بتقول ايه؟؟ يمكن نفوق؟؟ ههههههههه انسي
سباق ايه بس...المصري مايحبش حد يضغط عليه من فضلك...يموت ف الفهلوة ويعشق تكبير الدمااااااااغ عالاخر...بس من غير ماتقولله بقي عاوزين نبقي ف المقدمة
وبتاع...ومالها الدكة الاخيره...حتي تراااوة...وسلملي عالفول والطعمية والكشري...والمطرب الصاعد سعد الصغنن


معلش انا يمكن اليومين دول محبطة من غير سبب
بس صدقني احنا كده من عهد رمسيس الاول
تفتكر ممكن نبتدي نتغير بعد كام سنه بعد ال 7000 سنه اللي عدو؟؟

الجمعة, مايو 25, 2007

 
Blogger david santos said...

Day 25 of May. World-wide day of the disappeared children.

الجمعة, مايو 25, 2007

 
Blogger يا مراكبي said...

قاسم أفندي

أولا أنا سعيد جدا بزيارتكم الكريمة وأخجلتني جدا بإطراءك العالي جدا .. وهو أكبر مما أستحقه .. فشكرا لك

أعلم أن المقارنة ظالمة تماما .. فالإمكانيات كلها موجودة بمصر بينما لا تملك منها دبي شيئا .. وبالتالي الظلم كله يقع على دبي حينما تقارنها بما حبى الله به مصر

دبي لا تمتلك في الأصل سوى القيادة المخلصة الحكيمة .. وهي بالفعل مثلي الأعلى بين القادة العرب

أسعدتني جدا بتعليقكم وكنت أتمنى أن يطول كلامكم أكثر وأكثر .. وأتمنى أيضا أن نراك هنا كلما سنحت لك الظروف .. مع خالص تحياتي

السبت, مايو 26, 2007

 
Blogger يا مراكبي said...

sherehan84

أنا بقى علشان شغال في وسط المشروعات المختلفة في دول الخليج تلاقي قلبي بيوجعني أكتر وأكتر علي بلدي

الناس بتقول لنا إننا مهندسين كويسين وبلدنا عكس كده خالص .. ومش مصدقين إن البلد المتدهورة دي تطلع الناس دي

ومادام جيبتي سيرة الدلع .. أحب أقول لك إن دبي فيها دلع جامد قوي برضه .. وش بيغمز

السبت, مايو 26, 2007

 
Blogger يا مراكبي said...

مجهول

أنا مقدر تعليقك ده طبعا .. بس هأقولك على حاجة: اللي أخد قرار إنه ينهض بدبي كان القادة الحكماء والأمناء المخلصين في نفس الوقت .. وبناء عليه جابوا طبعا أكفء الناس وعلى رأسهم المصريين طبعا

مافيش أي ظروف مقنعة تخلي مصر بالتدهور ده أبدا .. كل حاجة موجودة ومافيش إستغلال أمثل ليها .. فيه تخبط وفشل وتعمد الإهدار .. مافيش إخلاص ولا حكمة ولا أمانة

إيدي على إيدك نبقى الأوائل

أهلا بيك

السبت, مايو 26, 2007

 
Blogger يا مراكبي said...

koukawyتاني

ربنا يكرمك .. تعليقك لوحده أكبر تشجيع

متشكر جدا

السبت, مايو 26, 2007

 
Blogger عمرو غريب said...

يا عم مصر ام لينا كلنا

السبت, مايو 26, 2007

 
Blogger يا مراكبي said...

صاحب البوابــة

ده ياريت كل يوم بتتسع الهوة .. ده بقت كل ساعة وكل دقيقة

تحياتي الغالية ليك

السبت, مايو 26, 2007

 
Blogger يا مراكبي said...

frozen love

إثبت كده .. ده إنت لسة هتشوف حاجات كتيره أسوأ من كده لما تخش في واقع الشغل وتبقى ترس في عجلة الإقتصاد

عموما .. متشكر جدا على التعليق الجميل .. وربنا يوفقك

السبت, مايو 26, 2007

 
Blogger يا مراكبي said...

أميرة ويلز

أنا اللي جذبني لإقتناء الكتاب ده هو إني كنت متشوق أعرف إيه الفكر اللي وراء الإنجازات الملموسة في دبي دي .. وإزاي إتعملت بالتفصيل .. وإزاي كمان أستفيد منها في حياتي الخاصة

حقيقي أنا بأعتبر الشيخ محمد بن راشد مثل أعلى في الفكر الراقي وحقيقي أثر فيا كتير

منورة

السبت, مايو 26, 2007

 
Blogger يا مراكبي said...

نفسنا

مبروك إفتتاح المجلة .. وإن شاء الله هأزوركم قريب جدا

شكرا على الدعوة

السبت, مايو 26, 2007

 
Blogger يا مراكبي said...

شهروزة

والله عندك حق .. خلينا كده نقعد نقول كنا زمان .. لحد ما الزمان يرمينا بره حكاياته

أهلا بيكي

السبت, مايو 26, 2007

 
Blogger يا مراكبي said...

خمسة فضفضة

كلامك كله مظبوط يا دكتورة .. بس الحل اللي قلتيه في الآخر لازم يسبقه الأول إن أولي الأمر يكونوا مخلصين وأمناء ويهمهم مصلحة البلد مش مصلحتهم .. وبعد كده كل اللي قلتيه هو آليات تنفيذ القاعدة الرئيسية دي

أهلا بيكي

السبت, مايو 26, 2007

 
Blogger يا مراكبي said...

ra2ed fada2

عزيزي رائد الفضاء .. أهلا بيك من جديد

هو بالفعل لو ربنا رضي على شعب .. بيهبهم الحاكم الصالح .. وكما تكونوا يولى عليكم

اللهم إرفع مقتك وغضبك عنا

السبت, مايو 26, 2007

 
Blogger يا مراكبي said...

اعشق فى اليل ضوء القمر

مش مهم التعليق .. كفاية زيارتك ليا

كفاية نورك عليا

نور القمر

السبت, مايو 26, 2007

 
Blogger tota said...

وحشتني مصر يامراكبي وكلي حنين ليها
ومليانه شوق لكل ذره من ترابها
مصري ووطني وارضي وحشتني بجد

السبت, مايو 26, 2007

 
Blogger يا مراكبي said...

فاطمة عبدالرحمن

أهلا ومرحبا بك في مدونتي المتواضعة وأشكرك على تعليقك ومشاركتك

سيدتي أو آنستي .. يبدو لي أنك قد خلطتي بين أمرين في التعليق .. وصححيني إن كنت قد أخطأت

ثانيهما هو تهميش مصر وتفريغها من محتواها الذي بنته على مدار القرون وتبديده خلال الثلاثة عقود الماضية .. وهذا له أسبابه التي نعيها جيدا .. وهذا الأمر أتفق معك عليه

أما أولهما فهو أن ندعي أن أهل دبي وما شابهها يفتقدون للحرية .. وهذا غير صحيح فهم لا يعيشون كبتا أو قهرا

إذا توفرت جميع الأساسيات والرفاهيات للمواطن لن تجدي من يعارض نظام الحكم أبدا .. فالمعارضة لا تنشأ إلا عند تدهور أوضاع الهيئة الحاكمة .. اللهم إذا كان الإعتراض على سياسة خارجية ما

أشكرك مرة أخرى وأهلا بك

السبت, مايو 26, 2007

 
Blogger يا مراكبي said...

سلسبيل

أهلا بيكي يا دكتورة .. أنا سعيد جدا إني بأعرف دلوقت عدد كبير من الصيادلة بعد ما كنت بأعرف مهندسين بس

تعليقك طبعا فيه شقين .. أولهم صحيح تماما وهو إن أغلب المصريين مابيحبوش الإلتزام وبيحبوا الفهلوة .. دي حقيقة والكل يعرفها عننا

أما الجزء الخاص بالسبعة آلاف سنة حضارة فده عكس كده خالص .. إحنا كنا زمان حاجة تانية خالص .. تقدري كده تقولي إن مافيش علاقة بين المصريين بتوع زمان والناس اللي موجودة دلوقت على نفس الأرض

لكن برضه أنا مصر إننا ممكن نتغير

السبت, مايو 26, 2007

 
Blogger يا مراكبي said...

david santos

This is really a new information I never knew, thanks to you.

السبت, مايو 26, 2007

 
Blogger يا مراكبي said...

عمرو غريب

أنا بقيت ملاحظ إنك بتزورني دايما أول ما الأهلي يتغلب أو يتعادل .. إوعى تكون زملكاوي؟

ههههههه

مصر هتفضل غالية عليا .. مهما حصل

السبت, مايو 26, 2007

 
Blogger يا مراكبي said...

tota

وأنا كمان مصر وحشتني جدا جدا جدا

بس لما بأروح هناك ما بالاقيش مصر اللي في بالي

ياريت تكوني بتلاقي مصر اللي في بالك

السبت, مايو 26, 2007

 
Blogger tota said...

طيب يامراكبي هيا مصر اللي في بالك دي مصر كنت تعرفها زمان ومابقيتش تلاقيها ولا مجرد صوره انت راسمها وبتحلم تلاقيها؟؟
المشكله انكم بتقارنوا مصر بدول تانيه أحسن منها ودي مش مقارنه عادله طيب قارنها بدول اقل شأن
وردي علي سؤالك ايوه بلاقيها مصر اللي في بالي اللي اعرفها ومعرفش غيرها هوه مش اللي بيحب شئ بيتقبله بكل مميزاته وعيوبه؟؟
سلامي ليك يامراكبي وشكرا علي سعه صدرك:)

الأحد, مايو 27, 2007

 
Blogger عتيج الصوف said...

لحقنا على البوست
اهلا و مرحبا بك في عالم التدوين

الاثنين, مايو 28, 2007

 
Blogger MAKSOFA said...

لا طبعا العنوان له علاقه أكيده بالبوست
وياخساره عليك يابلدنا

الاثنين, مايو 28, 2007

 
Blogger يا مراكبي said...

عتيج الصوف

أهلا وسهلا بيك وبكل الإخوة في الكويت

شرفتنا ونورتنا

الثلاثاء, مايو 29, 2007

 
Blogger يا مراكبي said...

MAKSOFA

خسارتنا كبيرة قوي قوي .. قلبي بيتحسر لما بأشوف كل الخير ده بيترمي في الأرض بسبب الفشل في إدارته

ده بطر على النعمة اللي ربنا أعطاها لنا

الثلاثاء, مايو 29, 2007

 
Blogger يا مراكبي said...

tota

تعليقك ده عايز رد يآخد مني يوم بحاله .. بس لازم أختصر

مصر اللي في بالي هي مصر من 15 أو 20 سنة وكان فيها مساوئ برضه بس كانت أحلى من دلوقت بكتير .. كل يوم بتنهار البلد أكتر وأكتر وبتتدهور أسرع وأسرع

أما مصر اللي بأحلم إنها تكون .. فدي حاجة تانية خالص ماشوفتهاش قبل كدة طبعا

أنا في كل مقارناتي بأكون موضوعي .. ومش بأقارن دولة زي مصر بقارة زي الولايات المتحدة اللي قد مصر 50 مرة .. ومقارنتي بين دبي ومصر بتكون ظالمة لدبي إذا قارنتي إمكانيات مصر بإمكانيات دبي اللي هي ولا حاجة

بالنسبة للي بيحب حد ويقبله على عيوبه .. اللي بيحب حد لازم ينصحه لصالحه .. وده اللي بيخلينا ننتقد أحوالنا حرصا عليها .. زي ما بأضرب أولادي علشان أصلح من أحوالهم مش علشان أؤذيهم

أهلا بيكي في أي وقت

الثلاثاء, مايو 29, 2007

 

إرسال تعليق

Links to this post:

إنشاء رابط

<< Home