شد القلوع يا مراكبي ... مافيش رجوع يا مراكبي

السبت، مايو 26، 2007

إلحق التاج قبل ما أمسحه

السنة دي حسب الأبراج الصينية المفروض إنها تكون سنة الحلوف لكن في الحقيقة هي قلبت معانا بالعكس وبقت سنة التاج .. وأفتكر إننا أول ما بدأنا التدوين كان المدونين عايزين يتعرفوا أكتر على بعضهم علشان كده إخترعوا حكاية التاج دي .. لكن بعد كده الظاهر والله أعلم إن فيه حد بيتربص بالمدونين .. حلوة يتربص دي؟ حد كده عمال يألف كل يوم تاج ويزحلقه على المدونين علشان يدحلبهم ويآخد منهم معلومات بطريقة سهلة بدل الطريقة الحكومية إياها اللي إنتوا عارفينها طبعا .. وطبعا إخواننا المدونين يروحوا بحسن نية يمرروا لزملائهم نفس التاج زي ما هو بالظبط ونقعد نلف وراء بعض لحد ما إنشغلنا عن التدوين نفسه ولدرجة إني فكرت أعمل مدونة جديدة للتيجان بس .. لكن عموما أنا أحب أطمنكم بإني جمعت معلومات عن اللي بيألف تاج كل يوم ده وقدرت تقريبا أحدد إنه بيقعد على قهوة متفرعة من شارع شريف
.
وبالمناسبة السعيدة دي أحب أطلع من التلاجة كل التيجان اللي جات لي من إخواننا المدونين بحسن نية .. وعلشان أنا عارف إنهم كتير جدا ياريت تلحقوا تقرأوهم بسرعة علشان هأمسحهم قبل ما الواد بتاع قهوة شارع شريف يلحق يجمع معلومات عني .. وياريت كمان لو أي حد كان بعت لي تاج وأنا نسيت أرد عليه بحكم السن والزهايمر يبقى يفكرني علشان ألحق أعمل ملحق .. وأسيبكم بقى مع التيجان اللي جاتني علشان عايز ألحق أشتري تذاكر مباراة الأهلي والقادسية اللي هيتلعب يوم الاثنين
.
أول تاج من مبرمج حر وروني اللي كان عمرها عشرين
هل كنت طالب شاطر فى المدرسة ؟
جدا جدا .. كنت من المتفوقين .. كنت
ايه كانت احب مادة و اكره مادة ليك فى المدرسة والكلية ؟
الرياضيات والإنجليزي في المدرسة
الكومبيوتر والخرسانة في الجامعة
ماكنتش بأكره أي مادة .. كنت بأعرف أذاكر أي حاجة
و كنتِ عايز تطلع ايه وانتِ صغير؟
مهندس يعني مهندس .. وإلا كنت هأنتحر .. شفتوا العبط؟

.
ُثاني تاج من كوكو الكميل بس بالفرنصاوي
1-last beverage?
قهوة تركي سكر زيادة
2- last phone call?
من مهندس من اللي شغالين معايا
3-last instant message?
مشكلة في أحد المواقع .. سخيفة كالعادة
4- last cd played?
جت بظروفها .. إيهاب توفيق
5-last time u cried?
بكيت في الطواف أثناء الحج هذا العام
hv u evers
1-date some one twice?

زمااان .. بس بإحترام من غير قلة أدب
2- been cheated on?
ماتعدوش .. على طول متأسفن
3-lost some one special?
أيوه .. فقدت ناس كتير
4- been depressed?
كتير يا معلم .. كل يومين بيجيلي إحباط من تحت الباط على رأي ريكو
5- been drunk & throw up?
لأ لسة .. بس ناوي على الحشيش قريب .. كابيتشينو يعني على رأي أحمد حلمي
6- favorite colors?
أهلييي .. أهلي .. بأحب اللون الأبيض طبعا
this month hv u
1-made anew friend?

على وشك (الشين عليها فتحه) أصاحب شخص محترم جديد
2-fallen out of love?
أنا متجوز يا إخواننا بلاش الأسئلة دي.. وإنتوا ما ترضوليش الأذية
3-laughed untill u cried?
أيوه .. واحد صاحبي بيخاف من الطيارة هيموتني من الضحك وإحنا مسافرين .. وهيموتني من الرعب كمان
4-met some one who changed ur life?
الشهر ده لأ .. بس من سنتين آه
5-found out who ur true friends were?
أيوه طبعا .. هما زي الإبرة في كوم القش
6- is there some thing u want to tell some one?
مفروس من إلغاء مشروع الجسر بين مصر والسعودية .. بس مش هأقول لكم لمين عايز أوجه الكلام ده
7- how many kids do u want to hv?
عندي بالفعل ثلاثة أندال لحد دلوقت والحمد لله
8-do u wanna change ur name?
لأ .. أنا مبسوط كده
9-wt did u do 4 ur last birth day?
ولا حاجة .. ولا كأنه يوم عيد ميلادي أصلا
10-wt time u wake up to day?
أربعة ونص علشان ألحق صلاة الصبح قبل الشروق
11-most visited web page?
يامراكبي

.
ثالث تاج من دينا فهمي صاحبة مدونة بالعربي الفصيح
تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها
الكتابة والتدوين .. أنا توقفت عن الكتابة لمدة عشر سنوات وما صدقت إن الإلهام رجع لي من تاني .. لو أي حد جديد بعت لي أي تعليق لازم قبل ما أرد عليه أكون قريت هو كاتب إيه علشان أتعرف على إتجاهاته وتفكيره .. علشان كده بآخد وقت عقبال ما أخلص رد على التعليقات .. وبأفكر كتير قبل ما أكتب أي تعليق عند الغير
.
رابع تاج من مدونة صاحب البوابة ومشاعر رانيا
أحب شخص لقلبك فى الدنيا؟
هو مش شخص واحد .. دول كتير .. ومش هأذكر أسماء علشان ما حدش يزعل
انسان مستعد تضحي بحياتك – ركز فى كلمة حياتك - عشانه؟
نفس الأشخاص اللي كانوا في السؤال الأول
انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟
هو مش شخص واحد .. دول برضه كتير .. ناس صادفتهم في حياتي العملية لكن مايفرقوش عن إبليس كتير
ما هو:اسم أجمل كتاب كتبه بشر قرأته ومحتفظ به حتى الان؟
رؤيتي .. من تأليف محمد بن راشد آل مكتوم أمير دبي
اسم كتاب -كتبه بشر برضة- انت متعلق بيه وبتقرأه كل فترة؟
المجموعة الكاملة لفاروق جويدة
اهم جهاز منزلى انت متعلق بيه او بتستخدمه كتير؟
الكومبيوتر
شىء تحس بالراحة النفسية عندما تنظر اليه؟
الأطفال
مكان تحس فيه بالحنين الى شىء لا تدرى ماهو و ذكريات جارفة الى لاشىء؟
شط إسكندرية .. والنيل في القاهرة
مكان تحس بالراحة عندما تدخله؟
المسجد
اجمل مدينة زرتها داخل مصر؟
الإسكندرية
أجمل مكان طبيعي رأيته داخل مصر؟
جميع مناطق جنوب سيناء
شخصية كارتونية بتحبها؟
لاكي لوك
نوع هاتفك المحمول؟
سوني إريكسون
سرعة بروسيسور جهازك؟
ثلاثة جيجا هيرتز
حجم ذاكرة –هارد- جهازك؟
ستين جيجا بايت
المساحة التى تشغلها المواد الاسلامية على جهازك؟
مائة وثلاثة وثمانون ميجا بايت
نفس المساحة السالف ذكرها فى قلبك -الاجابة لنفسك عشان الرياء يا اخواننا -؟
نصف القلب أو أقل
أهم هدف انت واضعه لحياتك الآن؟
ألا أتوقف عن تحقيق الإنجازات بعون الله ومشيئته سبحانه .. فالإنجازات تعطي القوة .. فالمؤمن القوي أحب إلى الله من المؤمن الضعيف
مواصفات فتاة الأحلام بالنسبة لك؟
وبعدين بقى في اسئلة الأذية دي؟ ما قلنا متجوز ياإخواننا .. ماينفعش أقول مواصفات فتاة أحلامي كده على الملأ علشان الرقابة
صف ما يأتى:شعورك لما بتسمع كلمة مصر ؟
هو ذلك المكان الذي لم يعد له وجود سوى في قلبي
شعورك لما بتسمع كلام عن اليهود؟
أتذكر سورة الإسراء
شعورك لما بتشوف ظابط شرطة؟
أفتكر يوم ما طلعت نتيجة الثانوية العامة
شعورك لما بتشوف الكناس العجوز فى الطريق؟
الألم الشديد
افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟
شعور مختلط بين أن يكون ذلك الشاب معتدلا سمحا أو فظا متشددا
احساس يراودك فى اشارة مرور مغلقة بسبب مسئول كبير؟
أتذكر عمر بن الخطاب
رضي الله عنه

التسميات:

58 Comments:

Blogger سلسبيل said...

هيييه ولحقت التاج ولحقت التاج...

اروح اكمل العقاقير بقي ف الليله دي عشان بكره ماتذلش قدام الدكتور ف الشفوي ...متخيلاه بيقوللي ماذاكرتيش الجزء ده ليه يادكتوره بس حقولله كفاية قريت التاج ياعمووو
دعواتكم

السبت, مايو 26, 2007

 
Blogger LOJAIN said...

لذيذه جدااااااااااا المدونة
قريت كل المواضيع تقريبا
اجابات حلوة قوى كمان

Regards
Lojain :)

الأحد, مايو 27, 2007

 
Blogger Esmeralda said...

حمدالله على سلامتك
بركه ان ربنا نجاك يا خويا

الأحد, مايو 27, 2007

 
Blogger Esmeralda said...

و الله بجد موضوع التيجان ده كويس
بتبين حاجات عن الشخص
ربنا يوفقك :)

الأحد, مايو 27, 2007

 
Blogger REEMOO said...

الأجابات فى السريع كده
تحس انها مستعجله
ولا انت مش عايز حد من القهوه يعرف عنك حاجه:D
فكره المدونه التانيه حلوه على فكره
أصل التاجات كترت أوى بصراحه
كل تاج وانت طيب
تحياتى

الأحد, مايو 27, 2007

 
Blogger زحل الفلكي said...

اجابات مركزة وفي الجول
عجبني اخر رد في اخر سؤال

لو المسئولين دول يبصوا بصة ولو بسيطة على سيدنا عمر ابن الخطاب
بجد حاجات كتير اوي حتتغير هنا

ربنا يكون في عونك في غربتك
ومبسوط اني عديت من هنا
وكمان البوست لسه طازة

الأحد, مايو 27, 2007

 
Blogger Rania said...

ياه ياه ياه ياه
اخيرا
كنت هفقد الامل
بس كويس,, احنا كنا فين و بقينا فين حلوة الاجبابات بس فى السريع
زى ما تكون مستعجل او الرقابه على المصنفات شغاله
:)))
تحياتى لك و عقبال التاج الجاى
بقولك صحيح
انت قلتلى الواد بتاع التيجان اسمه ايه؟:((((

الأحد, مايو 27, 2007

 
Blogger صاحب البوابــة said...

اجابتك رائعة كعادتك اخي المراكبي

تحياتي

الأحد, مايو 27, 2007

 
Blogger koukawy said...

هههههههههههههههههههه
صاحب تاجين كداب و صاحب تلاته منافق
مش عارفه صاحب اربعه ده ايه
هههههههههههههههههههههههههههههه
يا عيني عليك

الأحد, مايو 27, 2007

 
Blogger Amr Ahmed said...

يا عيني

كل دي تيجان

ربنا معااااااااااك

بس برضو معرفتش ايه مواصفات

فتاة احلامك؟؟؟؟؟؟؟

ياراجل قول متخافش

الأحد, مايو 27, 2007

 
Blogger Xee said...

العزيز مراكبي

إجابات جامده تدل على راجل جامد

عجبتني جدا إجابتك بتاعة إسكندرية دي

:)

إنت من الأحرار يا باشمهندس

:)))

تحياتي
زي

الأحد, مايو 27, 2007

 
Blogger gohayna said...

اجابتك بتاعت الاسكندريه عجبتني وجامده

وكلامك كله جامد وبعدين كل دي تيجان

اللهم لا حسد

تحياتي كتييير جدا من الحر الي احنا فيه

الأحد, مايو 27, 2007

 
Blogger يا مراكبي said...

سلسبيل

برافو عليكي إنك لحقتيه .. أنا عايز أمسحه بسرعة علشان حاسس إني متراقب

إبقي طمنينا عملتي إيه في الشفوي .. وإوعي تكوني جيبتي سيرتي قدام الداكتور

فيه مادة في الدنيا يبقى إسمها عقاقير؟ ده إسم ده؟

الأحد, مايو 27, 2007

 
Blogger يا مراكبي said...

LOJAIN

ياه .. قريتي أغلب مواضيع المدونة؟ أشكرك جدا على المجهود الجامد ده .. ياريت تكون عجبتك

أهلا بيكي ونورتينا

الأحد, مايو 27, 2007

 
Blogger اتفضل عندنا said...

هو اللي يلحق التاج ليه جايزه ولا ايه؟ عموما يا باشا كان المفروض انك تجاوب علي سؤال مواصفات فتاة احلامك و تقول" شوفو مراتي و انتو تعرفو " ...هنفضل نعلم فيكو لحد امتي؟

الأحد, مايو 27, 2007

 
Blogger عمرو غريب said...

اجابات رائعة

الأحد, مايو 27, 2007

 
Blogger مصرى said...

يا نهار مدوحس

إيه يا عم التاجات دي كلها المدونين كلهم معلمين عليك ليه
بس إجاباتك حلوة
:D

الأحد, مايو 27, 2007

 
Blogger واحد من الإخوان said...

مش عارف ليه حسيت بالتقارب لما قريت إجاباتك يا بشمهندس
؟؟؟
فعلا مش هقدر اجيب جمل معينة ولا إجابات بعينها
لكن
الإجابات كلها على بعض بتحمل بين السطور شعور بالتقارب ده

واضح إنك من النوع الإجتماعي

وفي نفس الوقت في جزء في حياتك إنت
عاوز اعبر عنها كويس !!!!!!!!!!1

كأن في جزء من حياتك إنت قصيتة او بتحاول تقصة

ده بردة مجرد إنطباع غير مبنى على اى تحليل منطقي
إجمالا

ردودك كلها أظن إنها فعلا معبرة عن شخصيتك بشكل كبيير
صادقة يعني

محمد حمزة

الاثنين, مايو 28, 2007

 
Blogger كراكيب عادل said...

انت من غير تاجات معروف

ربنا يوفقك يارب

ويكثر من امثالك

الاثنين, مايو 28, 2007

 
Blogger أحمد سلامة said...

ايه ده
انت كنت شاطر في الدراسة
يابختك
عندي امتحان بعد 24 ساعه تقريبا ومكنتش زيك
----
هيا الاسئلة دي ايه الهدف من وراها : - last phone call?
3-last instant message?
----
ذلك المكان الذي لم يعد له وجود سوى في قلبي
أول ما قريتها ما اخدتش بالي من كلمة سوي وصعبت على مصر قوي
----

الاثنين, مايو 28, 2007

 
Blogger يا مراكبي said...

Esmeralda

شكلك كده بتحبي التيجان .. تحبي أدبسك قصدي أبعت لك شوية؟

التيجان طبعا بتوضح حاجات عن الشخص .. بس المهم إنه يجاوبها بصدق

الاثنين, مايو 28, 2007

 
Blogger nirfana said...

طيب يللا بسرعه الحق سافر لبلد تانية قبل ما يجة الواد بتاع قهوة شارع شريف يخبط على بابا بيتك



:):):)



اسلوبك ظريف


تحياتى

الاثنين, مايو 28, 2007

 
Blogger يا مراكبي said...

REEMOO

أنا ما باخافش من حد .. بس الواد بتاع القهوة ده إيده طايلة وشغال مخبر

:-D

كل تاج وإنتي طيبة وبالصحة والسلامة

الاثنين, مايو 28, 2007

 
Blogger يا مراكبي said...

زحل الفلكي

أهلا أهلا .. منور

متشكر جدا على تعليقك .. أنا مبسوط إن ردودي عجبتك وخصوصا إني ما كنتش متخيل إن فيه ناس هتستحمل وتقلرأ للآخر

أما موضوع عمر بن الخطاب .. فده موضوع تاني كبير جدا .. وبالذات لو قارناه بأحوالنا دلوقت

الاثنين, مايو 28, 2007

 
Blogger يا مراكبي said...

Rania

أنا ما أقدرش أطنش مهما طال الزمن .. بس المهم إن التيجان تخف شوية

بتسألي عن الرقابة؟ طبعا شغالة على ودني .. ده سؤال برضه؟

الواد بتاع التيجان ده مخبر تبع أمن الدولة .. يجعل كلامنا خفيف .. بلاش نجيب سيرته أحسن

الاثنين, مايو 28, 2007

 
Blogger يا مراكبي said...

صاحب البوابــة

أشكرك جدا على الإطراء ده .. دايما بتجبر بخاطري

تحياتي

الاثنين, مايو 28, 2007

 
Blogger MAKSOFA said...

بصي بقي ياعم المراكبي بعد ماشفت شلالات نباجرا بطل تيجان
بصراحه نفض بقي
وهوي دماغك

الاثنين, مايو 28, 2007

 
Blogger Hannoda said...

طي بايه علاقة ضابط الشرطة بنتيجة الثانوية العامة .. مش فاهمة
:)

وطبعا أنا جاية أسقف و أعمل دوشة كبيرة جدا عشان كتبت إن اسكندرية أجمل مدينه فمصر

وثالثا جاية أعمل دوشة تانية أكبر منها عشان إ،ت فينك من زمان .. ما بتجليش خالص
:(

ماشي خلاص نعدّيها المرة دِه
:)

تحياتي

الاثنين, مايو 28, 2007

 
Blogger سمسم said...

"الواد بتاع قهوة شارع شريف يلحق يجمع معلومات عني"
علي فكرة دي مش مجرد جملة عابرة
اعتقد ان الموضوع ممكن يكون فيه شئ من الصحة
علي العموم الواد بتاع شارع شريف نقل نشاطه لقهوة البورصة
تحياتي
ويجعلو بالتلميح عااااااااااااااامر

الاثنين, مايو 28, 2007

 
Blogger خمسة فضفضة said...

السلام عليكم ورحمة اله وبركاته

ايه دا كله يا باشمهندس اربعه مره واحده
دا انت مبخت بقي

اشمعني الظابط يعني اللي بيفكر بنتيجة الثانويه العامه ..؟؟؟؟

الثلاثاء, مايو 29, 2007

 
Blogger loumi said...

كويس انى لحقته قبل ما يتمسح
تحياتى

الثلاثاء, مايو 29, 2007

 
Blogger Tamer Nabil said...

عارف انا عندى تاجات كنير بس بعتذر لااصحابها لانى مش بحبها مش عارف لية

ربنا يوفقك

تحياتى

الثلاثاء, مايو 29, 2007

 
Blogger يا مراكبي said...

koukawy

يعني تعملي العملة وبتضحكي عليا؟ طب ما إنتي واحدة من الأربعة دول .. وألا عاملة مش واخدة بالك؟

ماشي .. ماشي .. التيجان جاية كتير

هأوصي الواد إياه عليكي

الثلاثاء, مايو 29, 2007

 
Blogger يا مراكبي said...

Amr Ahmed

أنا ما بأخافش من حد .. أنا جامد جدا .. وأقدر أقول مواصفات فتاة أحلامي بعلو صوتي زي ما أنا عايز

بس لما مراتي تسافر الشعر اللي جاي

الثلاثاء, مايو 29, 2007

 
Blogger يا مراكبي said...

Xee

أنا ولا جامد ولا حاجة .. ده أنا غلبااااان

أنا بأحب إسكندرية وأهل إسكندرية .. بس من غير زحمة يوليو وأغسطس .. ساعتها ما باشوفش إسكندرية خالص .. بأشوف ناس وبشر بس

نورتني

الثلاثاء, مايو 29, 2007

 
Blogger يا مراكبي said...

gohayna

أنا عارف إني وقعت في وسط شلة إسكندرانية
علشان كده إخترت إسكندرية تجنبا للمشاكل

ههههههه

هو فين الحر ده؟ ده إحنا لسة في الطراوة .. لما نعدي الخمسين مئوية نبقى نتكلم عن الحر

الثلاثاء, مايو 29, 2007

 
Blogger يا مراكبي said...

اتفضل عندنا

والله إنتي جيتي لي من السماء .. ده أنا قعدت يومين محتار أجاوب السؤال ده إزاي وإنت نجدتيني بالإجابة اللوزعية دي

فتاة أحلامي زي مراتي
فتاة أحلامي زي مراتي
فتاة أحلامي زي مراتي

حفظتها خلاص

لما أتزنق في سؤال تاني زي كده هبقى أرجع لك تاني .. أصلي باتسئل أسئلة كتير زي كده

الثلاثاء, مايو 29, 2007

 
Blogger يا مراكبي said...

عمرو غريب

أشكرك جدا .. ودايما بالتوفيق

الثلاثاء, مايو 29, 2007

 
Blogger يا مراكبي said...

عمرو غريب تاني

الكلام ده ليك للنشر لو تحب

بصفتي واحد من الجماهير اللي حضرت مباراة الأهلي والقادسية هنا في الكويت إمبارح بالليل لتكريم لاعب القادسية والمنتخب الكويتي جمال مبارك والمباراة طبعا مش مذاعة.. فأحب أقول لكم الآتي عنها

أولا .. كان الحضور للجماهير المصرية يمثل 75% من إجمالي الجماهير اللي حضرت

ثانيا .. كان فيه تشجيع غير عادي للنادي الأهلي لاعب لاعب ومدرب مدرب وفيه أمل كبير في إحراز الفوز لإسعاد الجالية المصرية رغم إنها مباراة ودية

ثالثا .. عدد كبير من المصريين إصطحب أولادة لتمنية الإنتماء داخلهم بإنهم يشوفوا التشجيع المصري الحقيقي على الطبيعة

رابعا .. المباراة بدأت بهدف مبكر في الدقيقة العاشرة للنادي الأهلي من عرضية أرضية لشديد قناوي أسكنها أسامة حسني الشباك

خامسا .. وأثناء وجود كرتين في الملعب .. أحرز نادي القادسية هدف المفروض ما كانش يتحسب

سادسا .. مع نهاية الشوط الأول .. إحتسب الحكم ضربة جزاء للقادسية مشكوك فيه لأن المدافع عبدالله جلال كان بيطلع الكرة من قدام لاعب القادسية بلعبة الفرملة

سابعا .. الشوط التاني كله كان من أسخف ما لعب الأهلي .. لعب كله بالعرض ودون إيجابية أبدا وكأن لا يعنيهم أبدا شعور الجماهير دي كلها اللي تعبت وراحت الملعب ودفعت تمن التذاكر وقعدت في درجة حرارة 42 مئوية .. علما بأن الأطفال كمان ليهم تذاكر بنفس سعر الكبار بالظبط

ثامنا .. نزل جيلبرتو بدل شديد .. وأحمد جلال بدل أحمد بلال .. وعبد الحميد حسن بدل أسامة حسني ليزداد عقم النادي الأهلي أكتر وأكتر

مش مقتنع أبدا بعبد الحميد حسن .. أبدا

تاسعا .. تحول الدفاع إلى شوربة .. والقادسية طول الشوط بيلعبوا الكرة طويلة ورا الونجين اللي بيروحوا عالمرمى أو يلعبوا عرضيات خطيرة .. جه الهدف التالت وأميرعبد الحميد أنقذ هدفين تلاتة كمان

عاشرا .. الجمهور المصري مشي حزين جدا والأطفال حصل لها صدمة .. والجمهور الكويتي القليل قال حاجات كتير زي: قاعدين ليه ما تقوموا تروحوا .. والأهلي حديد والقادسية سيحه .. إلخ

ليه الأهلي عمل كده وزعل الجالية المصرية اللي زحفت وراه .. مش عارف

أنا زعلان .. ومش هيفرحني غير إن مصر تكسب مباراة 12 يونيو .. وهأروح أشجع برضه

الثلاثاء, مايو 29, 2007

 
Blogger يا مراكبي said...

مصري

ههههه

مش كل المدونين معلمين علي .. لسة ما وصلتش للمرحلة دي .. بس تفتكر الباقيين هينتهزوها فرصة وأتخصص في الرد على التيجان بس؟

الثلاثاء, مايو 29, 2007

 
Blogger عمرو غريب said...

الف شكر يا مراكبي علي تلك الهدية انا بالفعل كتبت البوست الف شكر ليك تحياتي واتمني لك التوفيق

الثلاثاء, مايو 29, 2007

 
Blogger يا مراكبي said...

واحد من الإخوان: محمد حمزة

تعليقك ده شهادة أعتز بيها فعلا

ردودي كلها بالفعل بتدور حوالين تفاصيل حياتي إلى حد كبير .. لو كنت معاصرني كنت هتعرف على طول كل إجابة بتعني أي موقف بالظبط

أشكرك على إطراءك .. خالص تحياتي

الأربعاء, مايو 30, 2007

 
Blogger يا مراكبي said...

كراكيب عادل


إنت اللي كلك ذوق .. أنا مش كويس قوي كده زي ما إنت فاكر .. عموما قربنا نتقابل
وهتشوف

:-D

الأربعاء, مايو 30, 2007

 
Blogger يا مراكبي said...

أحمد سلامة

متشكر جدا

بالنسبة للأسئلة اللي الهدف من وراها مش معروف .. هي جات لي كده زي ما هي ومش عارف برضه اللي حاططها عايز يوصل لإيه .. لكن مش مشكلة كبيرة

لكن بأحييك تحية كبيرة جدا جدا لأنك الوحيد اللي أخد باله من التعبير اللي قولته عن مصر .. إنت فعلا لماح

أهلا بيك دايما

الأربعاء, مايو 30, 2007

 
Blogger يا مراكبي said...

nirfana

أنا فعلا بعيد عن إيدين الواد ده .. المشكلة إنه يكون مستنيني في المطار لما أنزل مصر في الصيف

أهلا بيكي .. ونورتينا

الأربعاء, مايو 30, 2007

 
Blogger LOJAIN said...

ده نورك

الأربعاء, مايو 30, 2007

 
Blogger يا مراكبي said...

MAKSOFA

كل ما تفكريني بشلالات نياجرا هأفكرك بسويسرا .. وإنتي اللي بدأتي

:-D

أنا فعلا بدأت أتضايق من كترة التيجان .. لكن مش هأقدر أكسف الزملاء اللي قدروني وبعتوها ليا .. هي دي مشكلتي

إحنا نبدأ ندشن حملة مدونات ضد التيجان .. إيه رأيك؟

الأربعاء, مايو 30, 2007

 
Blogger يا مراكبي said...

Hannoda

ايه علاقة ضابط الشرطة بنتيجة الثانوية العامة؟ مافيش علاقة أبدا .. دي تخاريف الحر .. وبلاش تدبيس بقى

أنا بس كنت مشغول شوية ومسافر شوية لكن هآجي وأقرأ كل اللي فاتني .. وإعملي دوشة زي ما إنتي عايزة .. البيت بيتك

الأربعاء, مايو 30, 2007

 
Blogger يا مراكبي said...

سمسم

أنا لا بألمح ولا حاجة .. ماتعمليش مشاكل ياعم الحاج

أنا ماليش في السياسة .. يجعل كلامنا خفيف

:-D

الأربعاء, مايو 30, 2007

 
Blogger shaimaa said...

د ول حمضوا
كل دى تيجان متاجلة
والله عيب كده

الخضار الفريش
قصدى التيجان الفريش مفيش احسن منها
بس على العموم
ليك وحشة يا راجل
:)

والحاجة وحشانى موت وانت عارف طبعا ليه
:)

الأربعاء, مايو 30, 2007

 
Blogger يا مراكبي said...

خمسة فضفضة

وعليكم السلام عليكم ورحمة اله وبركاته
أيوة أربع تيجان بأحوش فيهم بقى لي شهرين .. إتفضلي اللي إنتي عايزاه

يادي الظابط والثانوية العامة اللي كل الناس هتسأل عليها .. دي ذلة لسان ياإخواننا .. هاتودونا في داهية كده

أنا بأفتكر خيبتي أنا في الثانوية العامة اللي خليتني أبقى مهندس .. تمشي كده؟

الأربعاء, مايو 30, 2007

 
Blogger يا مراكبي said...

loumi


أيوة كده خليكي شاطرة .. برافو عليكي

منورة

الأربعاء, مايو 30, 2007

 
Blogger يا مراكبي said...

Tamer Nabil

هو أي شيء بيزيد عن حده بينقلب لضدة .. خير الأمور الوسط

إن شاء الله تكون بقيت كويس؟ أحسن دلوقت؟

الأربعاء, مايو 30, 2007

 
Blogger يا مراكبي said...

عمرو غريب

أنا اللي بأشكرك على إستجابتك للنشر

مع خالص تحيات مراسلكم الرياضي في الكويت: المراكبي

:-D

الأربعاء, مايو 30, 2007

 
Blogger يا مراكبي said...

LOJAIN

أشكرك مرة تانية .. ومنورة تاني

الأربعاء, مايو 30, 2007

 
Blogger يا مراكبي said...

shaimaa

ده إنتي اللي ليكي وحشة؟ فينك من زمان؟

ماصدقنا الحاجة كويسة معايا اليومين دول .. ما تشعليليهاش بقى

شرفتينا

الأربعاء, مايو 30, 2007

 
Blogger khaled said...

يا تاجاتك يا مراكبى

الجمعة, يونيو 08, 2007

 
Blogger يا مراكبي said...

khaled

شفت الهناء اللي أنا فيه؟ سنة التاج بقى

السبت, يونيو 09, 2007

 

إرسال تعليق

Links to this post:

إنشاء رابط

<< Home