مصر أم الدنيا مرة تانية

من إسبوعين أو أكتر سمعت في الراديو الصبح إن أمير دبي وهو في نفس الوقت رئيس الوزراء في دولة الإمارات هيعمل مؤتمر صحفي علشان يعرض خطة الوزارة اللي إستغرق إعدادها أكتر من 6 شهور بواسطة العديد من الخبراء .. والخطة دي بيتعهد بيها إنه هيقضي على البيروقراطية والتعقيد الإداري .. إلخ .. طبعا أنا ماصدقتش وداني .. لأن إذا كان سموه شايف إن حكومة الإمارات فيها كل المشاكل دي .. أمال اللي عندنا إحنا في مصر يبقى إسمه إيه عالصبح؟
.
ولمعلوماتكم .. دبي دي النفط فيها قليل مش زي بقية إمارات ودول الخليج .. وممكن تلاقوا إن مصر مثلا عندها بترول أكتر من دبي .. ده غير إن جو مصر أحلى من جو دبي .. وعندنا كمية آثار مهولة مش موجود منها واحد على المليون في دبي .. وعندنا شعب مليان مهندسين وأطباء وعلماء وفنيين في كل التخصصات مش موجودين في دبي .. أمال فيه إيه؟ وهما سبقونا اقتصاديا وإعلاميا قوي كده إزاي؟
.
أفتكر لما رحت دبي لأول مرة .. لفت نظري كتاب من تأليف أمير دبي كاتب فيه إن اللي وصلوا ليه في دبي ما هو إلا البداية .. وإن اللي نفسه يوصل ليه لسة بدري قوي عليه .. وكل اللي إحنا شايفينه في دبي ده ما هو إلا إستعداد لأسرع وأعنف سباق إقتصادي هيحصل في العالم .. حد فيكم يا إخواننا سمع عن السباق اللي هيحصل قريب ده؟ ويا ترى أخبار إستعداداتنا للسباق ده إيه؟ حد يطمني الله يكرمكم
.
الكتاب ده مكتوب فيه شوية كلام حسيت إنه بيوجع جامد .. الكلام بيقول فيما معناه: إحنا مش هندخل السباق ده علشان نجري بس .. إحنا عايزين نفوز .. هو فيه حد يعرف إسم تاني إنسان هبط على سطح القمر؟ الناس دايما بتفتكر الأول بس
.
وبيقول كمان: إذا ما كنتش في المقدمة يبقى أنت ورا .. بتسيب مكانك اللي قدام علشان واحد تاني يآخد مكانك يمكن يكون أقل إبداعا منك .. مش مهم إنك تقع على الأرض .. المهم ماتفضلش واقع ولازم تقوم بسرعة .. ولو مش عايز تقوم يبقى إنت بتعترف إنك ما تستحقش المقدمة دي ويبقى جه وقت إعلان فائز جديد غيرك .. وعيش إنت بقى بتجري ورا الأمم اللي بتجري قبليك قدام .. إنت كده بتخلي الناس التانية تتحكم في مستقبلك وتديك المستقبل اللي يناسب مصالحهم .. مش المستقبل اللي إنت عايزه
.
متهيألي كفاية كده .. بس أحب أقول آخر حاجة وجعتني قوي قوي .. الكتاب بيقول إن أزمة العرب النهاردة مش أزمة فلوس ولا ناس ولا موارد ولا أسواق .. إنما أزمة قيادة وإدارة وأنانية مستحكمة .. أزمة حب كراسي الحكم على حب الشعب .. والإهتمام بمصلحة الشلل المحيطة بالقائد فوق مصالح الشعب .. الكلام ده مكتوب في الكتاب اللي مؤلفه أمير دبي بجد .. أيوة بجد

.

آه .. نسيت أقول لكم إيه علاقة الرغي ده كله بعنوان البوست؟ مافيش علاقة خالص زي ما إنتم شايفين