شد القلوع يا مراكبي ... مافيش رجوع يا مراكبي

الخميس، مارس 01، 2007

حواديت مصرية

بدل ما كل شوية نتكلم عن مشاكل بلدنا وعيوبها .. مش نيجي مرة نشوف عيوبنا إحنا؟ تعالوا كده نتكلم عن التغيير اللي حصل للمصريين من خلال شوية حواديت مصرية كلكوا عارفينها .. ونشوف إيه اللي حصل للمصريين
.
زمان
كان فيه راجل بيموت وحواليه أولاده محاوطين السرير .. والراجل حاطط جنبه شوية عصيان خشب .. قعد يوزع على كل ولد عصاية وبعدين قالهم: كل واحد يحاول يكسر العصاية اللي معاه .. طبعا كل واحد كسر العصاية بسهولة وقعدوا يبصوا لبعض وكأنهم بيقولوا .. إيه العبط ده .. دي حاجة سهلة جدا
.
المهم .. الراجل راح مناول كل ولد حزمة عصيان كبيرة وقالهم إكسروها .. طبعا كل واحد قعد يحزق ويحاول لكن طبعا ما حدش قدر يكسر حزمة العصيان دي .. هنا بقى أبوهم قالهم: شفتوا .. ده اللي أنا عايزكوا تتعلموه .. لو فضلتوا متحدين مع بعض ما حدش هيقدر عليكم زي حزمة العصيان دي .. لكن لو كل واحد فضل لوحده .. هاينكسر زي العصاية اللي إنتوا كسرتوها بسهولة
.
دلوقت
كان فيه راجل بيموت وحواليه أولاده محاوطين السرير .. والراجل حاطط جنبه شوية عصيان خشب .. قعد يوزع على كل ولد عصاية وبعدين قالهم: كل واحد يحاول يكسر العصاية اللي معاه .. طبعا كل واحد كسر العصاية بسهولة وقعدوا يبصوا لبعض وكأنهم بيقولوا .. هو أبونا بيشتغلنا وألا إيه؟
.
المهم .. الراجل راح مناول كل ولد حزمة عصيان كبيرة وقالهم إكسروها .. طبعا كل واحد قعد يحزق ويحاول لكن طبعا ما حدش قدر يكسر حزمة العصيان دي غير أخوهم الكبير الجتة .. كسرها من أول مرة على طول .. هنا بقى أبوهم قالهم: شفتوا .. ده اللي أنا عايزكوا تتعلموه .. طول ما أخوكم البغل ده معاكم .. ما حدش هيقدر عليكم أبدا
.
أرجوا إنكم تكونوا فهمتم حاجة .. والمعنى في كرش الشاعر .. ونلتقي في حواديت تانية قريب

التسميات:

72 Comments:

Blogger أبو محمد said...

بيتهيأ لى اللى كسر حزمة العصيان ماكانش أخوهم الجته ده كان واحد قريبهم شغال غى مكان حساس (ماتفهمنيش غلط) جاب جوز عيال من اللى شغالين عنده كسروا الحزمه والمعنى فى أى مكان فيه اسغلال السلطه والنفوذ وابعد عن كرش الشاعر وكرشى أنا كمان

الخميس, مارس 01, 2007

 
Blogger الأباصيرى said...

هايل هايل هايل يامراكبى

الزمن دة بتاع اللى لة ضهر ميضربش على بطنة

ويابخت من كان الوزير جارة

الناس دلوقتى (وأنا منهم) أن ليهم ضهر
وأنهم يعرفوا الضابط فلان والقاضى علان ويبقوا قرايب وكيل النيابة فلان


وعلى رأى العالم داروين بتاع التطور
الحياة موكب الاقوياء ولامكان فيها للضعفاء

أبقى فكرنى افتخر بيك أنت كمان
وأقول ليا واحد صاحبى كرشة مليان

الخميس, مارس 01, 2007

 
Blogger farida said...

ههههههههه

حلوه مووت

الخميس, مارس 01, 2007

 
Blogger شــهــروزة said...

أمممممممممممم
هذا هو معنى الكوسة المستخبى فى كرش الشاعر
ويختبىء داخل الكرش برضة حاجات تانية كتير ....زى مثلا
المحسوبية
زمن الفهلوة
زمن الفتونة والعضلات
النظام العالمى الجديد (بالجذمة للى بتكلم)
يا غولة عينك حمرا
واللى له ضهر مينضربش على بطنه
وعمااااااار يا بلدى

ازيك كدة؟

الخميس, مارس 01, 2007

 
Blogger حــلم said...

فاكرة القصة دى كويس
بس الاب دلوقتى عنده حق بعد ما ثبت ان مافيش حاجة اسمها اتحاد
غير الاتحاد السكندرى
واهو متنيل بنيلة
ومفضوح بمدربيه على الفضائيات

يعنى مثلا انا عايزة ابنى يدخل كلية الشرطة
وعايزة اعلمه رياضة عنيفة
سومو مثلاً
:)

الخميس, مارس 01, 2007

 
Blogger نوري said...

لعلمك الي انا هقوله لك ده مجرد توضيح
دلوقتي حتي لو قوه من الناس ع حق ونفر واحد هو الي ع باطل بس معاه فلوس اوله سلطه في المكان يبقي يلا السلامه ع الحق الي هيضيع
بس لعلمك فعلا احلي حاجه اتعلمتها اناواخواتي
ان حتي لو الحق ع وحده فينا يبقي نقف كلنا معاهاونقول انها ع حق عشان محدش يشمت فيها او يعتبرها صيده سهله وملهاش رجاله يقفو معاها وطبعا ده تعليم الزمن
شكرا للفلم الابيض واسود الي انت حكيته في اول البوست
تحياااااتي

الخميس, مارس 01, 2007

 
Blogger يا مراكبي said...

أبو محمد

إزيك يا ياسر .. عامل إيه؟ إيه الغيبة الطويلة دي؟ من تاني بوست لسة ما كتبتش حاجة جديدة ليه؟ لعلك بخير

عموما الإسقاط اللي إنت طرحته في القصة دي مسؤولية كرش المتلقي

أنا كرشي مالوش دعوة ياعم .. ماتجيبليش الكلام يا باشمهندس

الخميس, مارس 01, 2007

 
Blogger يا مراكبي said...

الأباصيري

أنا اللي لازم أفتخر بيك لأنك تعرف كل الناس المهمة اللي قلت عليهم دول .. أنا كدة إطمنت إن ليا ظهر

إبقى إفتكر أخوك في الزنقة وأنا هأفكرك علشان تفتخر بكرشي للصبح

الخميس, مارس 01, 2007

 
Blogger يا مراكبي said...

farida

متشكر كتير على تعليقك الجميل .. نورتينا

الخميس, مارس 01, 2007

 
Blogger يا مراكبي said...

شهروزة

أنا كويس والحمد لله

طبعا إحنا متفقين من زمان مع بعض إن مافيش حاجه إسمها نظرية المؤامرة ولا حاجه خالص

أنا قصدي خير زبك كده بالظبط .. وعمار يا بلدي بجد

الخميس, مارس 01, 2007

 
Blogger يا مراكبي said...

حلم

فعلا عندك حق

أنا بقى إبني إتعلم الكراتيه .. بس للأسف .. لما بأضربه ألاقيه بيعرف يصد كويس

بلاش السومو دي .. مش هاتستحملي اللي هايجرا .. لكن دليه شرطة وخلاص .. أهو ينفعنا في الزمن المهبب ده

الجمعة, مارس 02, 2007

 
Blogger يا مراكبي said...

نوري ونوري للكل

ياه .. إنت تقريبا أصغر مدونة سنا على حد علمي .. لكن كلامك كبير

نورتي بجد ومتشكر كتير على تعليقك الجميل .. وربنا يوفقك إن شاء الله

الجمعة, مارس 02, 2007

 
Blogger أُكتب بالرصاص said...

انا فهمت
بس
مافهمتش


ممكن نفتح كرش الشاعر ؟


:)
افصح
ابن

ابلج

الجمعة, مارس 02, 2007

 
Blogger يا مراكبي said...

أُكتب بالرصاص

مقدرش أبلج أكتر من كدة .. الإنكشارية والعسس بيقفشوا المدونين دلوقت

منور والله

الجمعة, مارس 02, 2007

 
Blogger مبرمج حر said...

يعنى حياتهم مرتبطة بحياة أخوهم الكبير
طول ما أخوهم الكبير عايش يبقى هما فى التمام , حسوا أنه قرب يموت , يبحثوا فى أخوتهم عن واحد تانى ينفع أو يعتمدوا على أبن أخوهم الكبير

الجمعة, مارس 02, 2007

 
Blogger يا مراكبي said...

مبرمج حر

إنت اللي قلت .. انا ماليش دعوة ياعم

الإسقاط دايما مسؤلية المتلقي .. حتى لو صحيح

تحليل رائع

الجمعة, مارس 02, 2007

 
Anonymous واحد من الناس said...

هيجي اليوم و الأخ الكبير ياخد كل العصيان ويضرب بيها اخواته
ساعتها كل واحد هيكره ان ده اخوه

وساعتها برده هيطبقوا القصه بتاعت زمان

الجمعة, مارس 02, 2007

 
Blogger يا مراكبي said...

واحد من الناس

هي دي المشكلة بتاعتنا .. دايما ما بنتعلمش من التاريخ وبنعيد التجربة ونخوضها لحدة آخرها وبعد كده بنوصل لنفس النتيجة

طب ما كان من الأول

تحياتي ليك

الجمعة, مارس 02, 2007

 
Blogger No Fear said...

السلام عليكم
فعلا المعني في كرش الشاعر
و في حاجة كمان
بصوا لحاجات كتير
المنافق البلطجي صاحب النفوذ و هلم جرة
فعلا المعني في كرش الشاعر مرة تانية علشان الشاعر شكله جعان

الجمعة, مارس 02, 2007

 
Blogger fares said...

جميله جدا وعجبتني اوي وانتا اسلوبك رائع علي فكره ياريت تشرفني علي مدونتي

الجمعة, مارس 02, 2007

 
Blogger كراكيب عادل said...

ايه ده كله انا جيت ليه متاخر كده

انت متاكد انها كانت عصيان من بتاعة زمان ولا تقليد مهو يمكن يكون عصيان صيني بتتكسر بسرعه والعيال دول الي في الاول استهبلوا فيها علشان ابوهم يقولهم نفس الكلام دة وميحملهمش اي حاجة زيادة

والله ما فاهم حاجة بس حلو المعني في كرش الشاعر

الجمعة, مارس 02, 2007

 
Blogger قصاقيص said...

حلوة اوى
الربط المتناقض اللي عملته بين فعلا سياسة العصر ومبادئه
تحياتي

الجمعة, مارس 02, 2007

 
Blogger كلام لوجيك said...

احب اهنيك فى زيارتى الاولى لمدونتك المتألقة على مجهودك الواضح ومواضيعك المميزة
وعايزك تعتبرنى من زوارك الدائمين منذ هذه اللحظه
اجمل ما فى هذا البوست هو انك كتبته بشكل نفسى مغاير وكأننا بتقرأ هذه القصه الشهيرة لأول مرة
وعجبنى طبعا الاسقاط السياسى الموجود فى كرش الكاتب

تحياتى
موفق دائما ودمت بألف خير

الجمعة, مارس 02, 2007

 
Blogger Sharm said...

الاتحاد قوة

الجمعة, مارس 02, 2007

 
Blogger يا مراكبي said...

No Fear

أولا مبروك للزمالك من أهلاوي صميم

ثانيا أحب أوضح إني معنديش كرش ولا حاجة لحسن تفتكروا إني تخين ولا حاجة

ومتشكر قوي على تعليقك الجميل

السبت, مارس 03, 2007

 
Blogger يا مراكبي said...

fares

أهلا بيك .. شكرا على الزيارة والتعليق وطبعا يشرفني إني أزور مدونتك .. أنا جاي حالا

السبت, مارس 03, 2007

 
Blogger mano said...

حلوه قوى
اظن ده تلخيص بسيط
للواقع زمان
و الواقع الآن
و الفرق واضح
بس عاجبنى قوى حكاية
طول ما أخوكم البغل ده معاكم ما حدش هيقدر عليكم أبدا

السبت, مارس 03, 2007

 
Blogger الوردة السوداء said...

اه
وصلت

اشكرك بشدة

السبت, مارس 03, 2007

 
Blogger يا مراكبي said...

كراكيب عادل

هلا والله

أنا أحب بس أوضح إن الصينيين بينتجوا جميع أنواع الجودة .. وأنا شفت في أمريكا منتجات صينية تفوق المنتج الأمريكي وأرخص

سمعة المنتج الصيني الرديء دي مش موجودة غير في مصر علشان المستوردين المصريين بيستوردوا زبالة الجودة الصينية

وبعدين ولا يهمك القصة يا أفندم .. المهم إن الكرش عجبك

السبت, مارس 03, 2007

 
Blogger يا مراكبي said...

قصاقيص

أهلا بيكي وبأحييكي على فهم المضمون من القصة

نورتينا

السبت, مارس 03, 2007

 
Blogger يا مراكبي said...

ساكاماكا نيوز

أهلا بيك .. شرفتني ونورتني وبأشكرك على الإطراء الجميل ده .. ده بس من ذوقك

كرش الكاتب مليان حواديت .. إبقى شرفني وتابعها

تحياتي

السبت, مارس 03, 2007

 
Blogger يا مراكبي said...

Sharm

طبعا الإتحاد فيه كل القوة .. أمال تفتكر إحنا ليه بقينا ضعفاء في العالم دلوقت؟

أهلا بيك

السبت, مارس 03, 2007

 
Blogger يا مراكبي said...

mano

متشكر قوي

تخيلي بقى لما البغل ده يبقى في بطن الشاعر

شفتي حالنا وصل لفين؟

السبت, مارس 03, 2007

 
Blogger يا مراكبي said...

الوردة السوداء

لا شكر على واجب .. لسه فيه الأصعب بعد كده

تحياتي

السبت, مارس 03, 2007

 
Blogger ادم المصري said...

جامدة موووووووووووووت

بحييك من قلبي

السبت, مارس 03, 2007

 
Blogger khaled said...

الاعداء فهموا الحكاية دى قبل الاخوات ما يفهموها
يبقى لو لقوا واحد حاسين انه ممكن يكون البغل يقضوا عليه علشان الاخوات يبقوا شوية بقر ملفوفين حوالين اخوهم الاوسط اللى عامل زى طور الله فى برسيمه
و برضه المعنى فى كرش الكاتب

الأحد, مارس 04, 2007

 
Blogger أجدع واحد في الشارع said...

كلام جميل

بجد جميلة اوى

بس فيها قوة

ولازم يكون فى قوة

وتحدي اكتر

الأحد, مارس 04, 2007

 
Blogger khaled said...

يا مراااااااااااااكبى
احم احم
هو انت هنا؟
علشان انت سميت البوست ده باسم مدونتى فقررت ان اضع مدونتك فى مفضلتى اللى فى مدونتى
هههههههههههههه
بجد بما انى باتابع مدونتك و بحب مواضعها المتميزة فانا لى الشرف فى وضعها

الأحد, مارس 04, 2007

 
Blogger abdallahalmasry said...

السلام عليكم ورحمة الله وبركاته .
الإخوة والأخوات من أبناء مصر الأبرار ,نقدم إليكم المبادرة المصرية للعفو والإصلاح –مبادرة الإخلاص- والتى تمثل طرحا مصريا لاستنهاض مصر يخاطب المخلصين من أبنائها ,ويتطابق مع الإرادة الجمعية للأغلبية المصرية الصامتة وهو ما يجعله الأقدر على تحقيق أهدافه ,نقدمه إليكم آملين فى تأييدكم له ,وسائلين الله عز وجل أن تعود به مصر كما أراد لها أن تكون .
ونرحب بتفاعلكم وآرائكم من خلال زيارة موقع المبادرة : www.mobadrtalekhlas.blogspot.com

الأحد, مارس 04, 2007

 
Blogger يا مراكبي said...

آدم المصري

أنا اللي بأرحب بيك من كل قلبي .. أهلا بيك ونورت المدونة

الأحد, مارس 04, 2007

 
Blogger يا مراكبي said...

خالد

برضه ده تفسير تاني صحيح .. بس الحل هو إن الإخوات ما يسيبوش فرصة للأعداء إنهم يستفردوا بأخوهم ده

واضح إن كرش الكاتب بقى مشهور جدا أكتر من الكاتب نفسه

الأحد, مارس 04, 2007

 
Blogger يا مراكبي said...

أجدع واحد في الشارع

برافو عليك

لازم نتعلم إننا نرجع نطبق القصة الأولى وأكتر كمان .. علشان الزمن ده عايز كده وأكتر من كده

أهلا بيك

الأحد, مارس 04, 2007

 
Blogger يا مراكبي said...

خالد تاني

ده شرف ليا أنا يا أفندم ويشرفني إني أضيفك عندي برضه .. دايما منور

الأحد, مارس 04, 2007

 
Blogger Hannoda said...

على فكرة انت لخصت عيب مؤلم بقى فعلا فينا في كلمتين

اللي شايفاه في المعنى إننا بقينا بنعتمد على البلطجة و لوي الدراع.. بدل الحكمة والمسانده

وان ((المجانص)) هي اللي بتنفع اليومين دول

مش عارفة أنا كده جبتها ولاّ ايه؟؟

بس اللي قاله أبو محمد برضه صح

المهم اننا بقينا بنقوّي ظهرنا بالبلطجة أو الوسطا بدل ما نقويه بالأخلاق و التدين

عجبني فتح الحوار بالشكل الجديد ده :)

الأحد, مارس 04, 2007

 
Blogger karakib said...

أنا فهمت انه البغل الكبير ده ممكن يكسر دماغ باقي أخواته بعد شوية
أو يمشي و يسيبهم
ساعتها كل واحد هيقعد يحزق يحزق لحد أما ...... بس خلاص

الأحد, مارس 04, 2007

 
Blogger يا مراكبي said...

abdallahalmasry

شكرا للزيارة .. أنا طبعا قرأت الموضوع لكن مشفتش الحل الموضوعي وآليته

عموما شكرا على الدعوة

الأحد, مارس 04, 2007

 
Blogger Memo said...

التواكل
افه العصر

للاسف رغم محاوله سرد الوضع في اطار قصه الا انه مازال مؤلم
تحياتشي يا احمد على اثاره الموضيع الرائعه تشييي

الأحد, مارس 04, 2007

 
Blogger Carmen said...

حلوة قوى يا مراكبى



فعلا بقت هيا دى مصر يا عبلة ...البلطجى هو اللى واخد فيها حقه تالت ومتلت ....


وياسلام بقى لو كان يمت لسلك الشرطة بصلة او مسنود من حد فيها



سلام مربع لحقوقنا اللى ضاعت

الأحد, مارس 04, 2007

 
Blogger hebaz said...

و ال على رأى المثل ألى ليه ضهر مينضرش على بطنة
تحياتى ليك و لكرش الشاعر

الأحد, مارس 04, 2007

 
Blogger يا مراكبي said...

Hannoda

الإستنتاجات اللي قولتيها كلها مظبوطة تماما .. بس إنتي عرفتي المجانص دي منين؟

الأحد, مارس 04, 2007

 
Blogger يا مراكبي said...

Karakib

هو برضة إستنتاج ممكن حدوثة طبعا بس ممكن يطلع منه ريحة مش ولا بد .. كويس إنك ما كملتش وإلا كنت لازم أرش المدونة بمعطر للجو

الأحد, مارس 04, 2007

 
Blogger يا مراكبي said...

memo

حمد اللة على سلامتك .. نزلتي من فوق الدولاب ولا لسة؟

والله عندك حق .. شر البلية ما يضحك

منورة

الأحد, مارس 04, 2007

 
Blogger يا مراكبي said...

Carmen

دي مش مصر يا عبلة .. دول بقوا المصريين يا عبلة

مكن سلام مثلث بدل سلام مربع لحقوقنا اللي ضاعت؟

الأحد, مارس 04, 2007

 
Blogger يا مراكبي said...

Hebaz

المثل ده كان من زمان واللي طلعه كان بيتنبأ باللي هايحصلنا دلوقت

كرش الشاعر بيحي جميع المعجبين

الأحد, مارس 04, 2007

 
Blogger Sampateek said...

هههههههههه
اخوهم ده كان لابس تيشرت مقلمة احمر و ابيض و حاطط صندوق نجوم زارقة على كتفه
صح؟؟

عارفاه ابن الهرمة
طايح

---
تحياتي لقصتك القوية

الأحد, مارس 04, 2007

 
Blogger Hannoda said...

إنت فاكرني قاعدة برة بلعب؟؟؟
:))
أنا متابعة جيده جدا لآخر المصطلحات العجيبة

الاثنين, مارس 05, 2007

 
Blogger محمد said...

بقالي كتير ما شفتكش يا حاج معلش والله ده تقصير مني بس أنتة عارف بقى
الثانوية العامة والمذاكرة
***********************************
كل الحواديت دي حلوة ومفيش ولا واحدة
ملتوتة بجد

وجميل قوي البوستر الحلو بتاع وأعدوا.....
كمان الأغنية دي بتاعت منير جامدة




تحياتي

الاثنين, مارس 05, 2007

 
Blogger محمد said...

على فكرة البوست ده بجد بديع

الاثنين, مارس 05, 2007

 
Blogger MAKSOFA said...

والمصحف دمك زي العسل

الاثنين, مارس 05, 2007

 
Blogger يا مراكبي said...

Sampateek

تفسيرك للقصة برضة سليم .. أصلها بتنطبق على حاجات كتيرة قوي في زماننا ده

متشكر قوى على ذوقك وإبقي شرفينا في القصة اللي جاية

الاثنين, مارس 05, 2007

 
Blogger يا مراكبي said...

hannoda

بجد برافو عليكي إنك متابعة المصطلحات الحديثة .. الواحد بيبقى شكله وحش لما بيكون مش عارف لغة بلده ويفضل يسأل عن معاني الكلمات

الاثنين, مارس 05, 2007

 
Blogger يا مراكبي said...

محمد

ولا مقصر ولا حاجة .. إحنا اللي مقصرين معاك

ربنا يوفقك ونسمع عنك خير السنة دي إن شاء الله

متشكر على إطراءك الجميل

الاثنين, مارس 05, 2007

 
Blogger يا مراكبي said...

محمد تاني

تعليقك ده أعتز بيه جدا لأنه دليل على إن اللي بأقصدة قدر يوصل للناس

متشكر مرة تانية

الاثنين, مارس 05, 2007

 
Blogger يا مراكبي said...

Maksofa

ربنا يكرمك .. متشكر جدا على التعليق الجميل ده

الاثنين, مارس 05, 2007

 
Anonymous حسن محمود said...

أول زياره ليك يامراكبى
طريقك فين يامراكبى؟
رايح فين وجاى منين؟

هى مش مشاكل البلد هى مشاكلنا؟
وعيوب البلد هى عيوبنا؟

كل شىء فى الدنيا بيتغيرالا قانون التغير

سلام

الثلاثاء, مارس 06, 2007

 
Blogger zordeak said...

ههههههه

حلوة جدا كعادتك طبعا

وغير متوقعة يا باشمهندس


ههههههه

بس بينى وبينك

تعبير دقيق اوى عن حالنا اليومين دوول

انت فكرك هايل بجد

تحياتى

:)

الثلاثاء, مارس 06, 2007

 
Blogger frozen love said...

ده المعنى فعلا في كرش الشاعر

الدراع..الدراع ياسادة كله بالدراع
lol

ه انا متوقع منك حكايات تانية جامدة طحن..الفكرة اصلا حلوة وخلاقة تنفع على اكتر من ظاهرة تغير في حياتنا

تحياتي

الثلاثاء, مارس 06, 2007

 
Blogger يا مراكبي said...

حسن محمود

أهلا بيك وشكرا على زيارتك الكريمة

أنا سواح في دنيا الله وشايل مصريتي معايا في كل حتة .. ونفسي تبقى مصر أحلى من كل الأماكن اللي بأروحها .. نفسي نطبق قانون التغيير ده بس للأحسن

الثلاثاء, مارس 06, 2007

 
Blogger يا مراكبي said...

zordeak

ربنا يكرمك ومتشكر على ذوقك

أنا بجد سعيد جدا بإن الجميع عنده الفكر العالي ده وبيلقط كل لمحة وكل فكرة بسهولة

الثلاثاء, مارس 06, 2007

 
Blogger يا مراكبي said...

frozen love

أهو شغل الدراع ده هو أكتر حاجة خليتني أمشي من مصر

ربنا يصلح الحال للناس وبعد كده حال البلد هينصلح لوحده

متشكر كتير على تعليقك الجميل

الثلاثاء, مارس 06, 2007

 
Blogger koukawy said...

الحقيقه يا مراكبي كرشك مليان و معبر اوي

الخميس, مارس 15, 2007

 
Blogger يا مراكبي said...

koukawy

الكرش كله تحت أمرك .. متشكر على متابعتك الجميلة

الخميس, مارس 15, 2007

 

إرسال تعليق

Links to this post:

إنشاء رابط

<< Home