شد القلوع يا مراكبي ... مافيش رجوع يا مراكبي

الثلاثاء، مارس 20، 2007

يوميات متزوج ثالث مرة

جرس المنبه بيرن وكأنه بيقول لي أبوس رجلك إرحم أهلي وإصحى بقى علشان صوتي إتنبح .. قلت ما بدهاش نقوم بقى .. بصيت على الكومودينو بتاعي لقيت الحاجة مراتي مش عاملة لي ساندوتشات زي ما هي معوداني .. لحظة كدة وإفتكرت إننا كنا متخانقين قبل ما ننام .. كانت الخناقة رقم 76 لسنة 2007 .. وهو ده أكيد سبب الحصار الغذائي .. قلت لنفسي: مش مشكلة .. النهارده بالذات عندنا مناسبة رومانسية سعيدة لازم نحتفل بيها وأكيد لما أرجع من الشغل هتكون راقت وممكن كمان نخرج نتعشى برة البيت جنب الأسانسير ولا حاجة .. أصل عقبالكوا كده النهارده يبقى عيد الفلاح .. وأنا بأحب أحتفل بالمناسبة دي جدا
.
رحت شغلي وإنشغلت جدا جدا .. على الظهر كده لقيت السكرتيرة بتتصل بيا وبتقول إن فيه إجتماع مهم بعد ربع ساعة وصاحب الشركة عايزني أحضر ضروري .. والجدير بالذكر .. بأحب كلمة جدير دي قوي .. الحاجة مراتي بتكره البنت السكرتيرة دي لله في لله مع إنها ما شافتهاش غير في صور حفلات الشركة بس .. ثم إن السكرتيرة دي مش حاجة جامدة ولا حاجة .. هي يمكن شعرها أطول وناعم شوية .. يمكن وسطها أرفع شوية .. يمكن شكلها دلوعة شوية .. لكن مش بنت حكاية ولا حاجة
.
المهم .. لبست جاكيت البدلة وظبطت الكرافتة وبدأت أجمع الملفات اللي هأحتاجها في الإجتماع .. ولسة هأخرج من مكتبي لقيت الحاجة بتتصل بيا .. قلت: بس .. راقت والحمد لله .. أكيد إفتكرت عيد الفلاح وهتديني شوية رومانسية قبل الإجتماع .. لقيتها بتقول: إلحقني .. بلاعة المطبخ مسدودة والأرض غرقت .. أعمل إيه دلوقت؟
.
نزل عليا سهم الله .. بقى بتكلمني علشان البلاعة؟ بصيت للملفات اللي في إيدي وتخيلتها خضاضة سوداء من اللي بنسلك بيها الأحواض والبلاعات .. وتخيلت نفسي وأنا مشمر أكمام جاكيت البدلة وفاكك ربطة الكرافته وضارب غطس جوه البلاعة ومديها تسليك .. فقت بسرعة وقلت لها: خلاص .. سيبيها لحد ما آجي .. هأبقى أتصرف .. وقلت لنفسي: الظاهر إن النهارده مش عيد الفلاح وألا إيه؟
.
أول ما روحت البيت .. غيرت هدومي وبدأت بتسليك البلاعة .. شوية كده وسلكت بنجاح منقطع المجاري .. قصدي منقطع النظير .. ندهت للحاجة بفخر وإعتزاز علشان تيجي تشوف شطارتي .. ولسة هأقوم علشان أخرج من المطبخ .. طرااااااخ .. الشبشب ما بيمسكش في المياة وإتزحلقت ووقعت .. فجأة لقيت الحاجة بتجري عليا وكلها قلق ولهفة وحب وحنان وخوف عليا .. نسيت الخناقة وبقى كل همها إنها تطمئن عليا .. شعورها ده حرك جوايا كل الأحاسيس الرومانسية الجميلة .. ولقيت نفسي بأوطي عالأرض .. وأحضن الشبشب اللي كان السبب في إن الحاجة تفتكر عيد الفلاح

التسميات:

126 Comments:

Blogger karakib said...

:) ربنا يخليكم دايما متهنيين ببعض
بس أيه موضوع عيد الفلاح ده :)

الثلاثاء, مارس 20, 2007

 
Blogger Sampateek said...

ههههههههههه
بوست زي السكر
ربنا يخليهالك و يخليك ليها
انتم الاتنين اطيب من بعض
بس مش كنت تقول يا راجل ان كان عيد الفلاح امبارح كنت خليت جوزي جابلي سلاكة حوض هدية


تحياتي
لكما

الثلاثاء, مارس 20, 2007

 
Blogger عمرو غريب said...

الموضوع جميل اوي

الثلاثاء, مارس 20, 2007

 
Blogger koukawy said...

ههههههههههههههههههههههههههه
ده انت الشبشب ده لازم تعمله تمثال مش تبوسه و لما يتقطع بروزه ازعي ترميه
ده شبشب الهنا و السعد
و يا تري احتفلتوا بعيد الفلاح و لا لأ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

الثلاثاء, مارس 20, 2007

 
Anonymous nada said...

حمدالله ع السلامة . كيف الاصابة انشالله تكون سليمة.... كل عيد فلاح و انت بخير و الحجة بالف خير .
تحياتي بجد ضحكتني , رائع و خفيف دم و كله يعني .. بعدين مش بس الحجة الي تكره السكرتيرة بظن كل الستات بتكره السكتيرات مش كل الستات و مش السكريترات..خلي حد يقول سكرتيرة بالبيت يوه دا قصص و روايات ساعتها
اكيد ده شبشب من الشباشب الصديقة على ما اظن؟

تحياتي لكما و ادام الله الفرح و الحب و السعادة عليكما
مودتي

الثلاثاء, مارس 20, 2007

 
Blogger مصرى said...

هههههههههههههههه

إنت راجل زي العسل
حلو موضوع عيد الفلاح ده
زي ما كنت بسأل حكيم العيلة عندنا مرة
راح قايلي الجواز شر لابد منه

الثلاثاء, مارس 20, 2007

 
Blogger مبرمج حر said...

هههههههههههه

ربنا يديم حبكم لبعض دائما و أبدا يارب

الثلاثاء, مارس 20, 2007

 
Blogger khaled said...

لازم نعمل الشبشب رمز لعيد الفلاح
الشبشب يا يعيش
يا يعيش
و الفضل يرجع للبلاعة المسدودة

الثلاثاء, مارس 20, 2007

 
Blogger Amr Ahmed said...

ههههههههههه

الف مبرووووووووووووك

انت ايه حكايتك مع الشبشب بقي

كده مش كويس عشانك

وبعدين انا عاوز اعرف هي المدام

بتعرف عن اللي انت بتكتبه ده

ولا في الخباثة

الثلاثاء, مارس 20, 2007

 
Blogger أحمد سلامة said...

أولا كل سنه وانت طيب بمناسبه عيد الفلاح اللى واكل لك دماغك ده
والله ما اعرفش هو امتي أصلا
بجد دمك زي العسل ولذيذه منك قوى الفكره دي
وتستاهل المتابعه بجد
برافو
تحياتي

الثلاثاء, مارس 20, 2007

 
Blogger الراقص مع الذئاب said...

مش عارف ليه ديما الناس بتغفل عن عيد الفلاح وتحتفل بأعياد تانية كتير
مع ان عيد الفلاح من اهم الاعياد اللي لازم تتحط في اجندة المواطن

في اعياد مينعش تعدي علي الواحد كدا بسهولة
ايام ما كنت في الكلية كان عيد ميلاد ابن رئيس القسم برضو من الاعياد المهمة في حياة الطالب جدا


انا بقترح من الاستاذ (يا مركبي) تخصيص يوم للشبشب والاحتفال بيه لأنه كان سبب تحول في مصار العلاقة الزوجية

تحياتي لك...بوست دمه خفيف

الثلاثاء, مارس 20, 2007

 
Blogger كراكيب عادل said...

انا برضو قلت الموضوع لة علاقة بالشبشب

من صورتة فوق باين علية شبشب مش عادي

كل عيد فلاح وانت طيب

بس ضحكتني بوصفك للسكرتيرة
خلي بالك من البوست دة
انا بحذرك

الثلاثاء, مارس 20, 2007

 
Blogger الأباصيرى said...

ياراااااااااجل
صحيح إن بعض الظن إثم

أصلى أول لما قريت يوميات متزوج
وشفت شكل الشبشب
وعرفت أنكم متخانقين
وسمعت كلمة طرااااخ
أتخيلك طرااخ دى فى حتة تانية خااالص
وقعدت اضحك وقولت ياخسارة الرجالة
هههههههههههههه

بس أنك لرجلاً.... والرجال قليلو

إنما اية نظام السكرتيرة؟؟؟
ولا الحاجة لسة بتراقب الكومنتات

دمك زى العسل يامراكبى

الثلاثاء, مارس 20, 2007

 
Blogger Mohamed A. Ghaffar said...

مش عارف ليه عيد الفلاح مبيجيش الا اما يحصل للراجل مصيبه

الثلاثاء, مارس 20, 2007

 
Blogger ست البنات said...

رائع جدا الموضوع

بس صحيح فية عيد
للفلاح

الثلاثاء, مارس 20, 2007

 
Blogger tamer said...

انت لازم تحتفظ بالشبشب دة لانة كان فال خير اهو عليك

وبطل بص للسكرتارية قال شعرها طويل طيب بايص علية لية ههههه

تحياتى

الثلاثاء, مارس 20, 2007

 
Anonymous أنيما said...

شفت الحاجة طيبة إزاي
و إنت عمال تبص للسكرتيرة

ربنا يخليكوا لبعض

الثلاثاء, مارس 20, 2007

 
Blogger يا مراكبي said...

كراكيب / هاني جورج

متشكر قوي .. بس إزاي ما تعرفش عيد الفلاح؟ ده أهم عندي من الفلانتاين

الثلاثاء, مارس 20, 2007

 
Blogger يا مراكبي said...

Sampateek

متشكر كتير على ذوقك

بس إيه الرومانسية اللي إنتي فيها دي؟ نفسك في سلاكة حوض هدية؟

ربنا يسعدك على طول .. وتحياتي لجوزك الكريم

الثلاثاء, مارس 20, 2007

 
Blogger يا مراكبي said...

عمرو

متكر جدا جدا .. وأهلا بيك دايما

الثلاثاء, مارس 20, 2007

 
Blogger يا مراكبي said...

koukawy

طبعا أنا موافقك .. ده شبشب حبنا ولا يمكن أعامله وحش ولا ألبسه في رجلي حتى

طبعا إحتفلنا بعيد الفلاح .. قعدنا نقرقض جزر وخس

الثلاثاء, مارس 20, 2007

 
Blogger يا مراكبي said...

nada

جت سليمة الحمد لله .. شكرا على سؤالك

أنا لاحظت فعلا صحة كلامك بالنسبة لكراهية السيدات للسكرتيرة .. حتى إخواتي البنات بيكرهوا سكرتيرتي مش عارف ليه

عموما شكرا كتير على ذوقك ومتابعتك للمدونة .. وأحب أوضح إن الشبشب ده مش من الشباشب الصديقة .. ده كان شبشبي أنا

الشباشب الصديقة دي تبقى بتاعة الحاجة

الثلاثاء, مارس 20, 2007

 
Blogger يا مراكبي said...

مصرى

حكيم عيليتكوا ده شكله كده مش متجوز أو مراته كانت برة البيت وهو بيتكلم معاك

عموما أنا ما أقدرش أقول حاجة على كلامة ده علشان الرقابة

تحياتي

الثلاثاء, مارس 20, 2007

 
Blogger يا مراكبي said...

مبرمج حر

ربنا يكرمك ويسعدك .. متشكر قوي على تعليقك الجميل

الثلاثاء, مارس 20, 2007

 
Blogger يا مراكبي said...

khaled

والله فكرتني أروح أحضن البلاعة كمان .. أنا مقصر معاها جامد

الثلاثاء, مارس 20, 2007

 
Blogger يا مراكبي said...

Amr Ahmed

حكايتي مع الشباشب حكاية قديمة من يوم ما كنت صغير

راجع البوست ده

http://yamarakby.blogspot.com/2006/09/blog-post_06.html#links

وبعدين الحاجة بتقرأ كل حاجة بأكتبها .. أنا واضح وصريح ودوغري .. وجبان

الثلاثاء, مارس 20, 2007

 
Blogger يا مراكبي said...

أحمد سلامة

كل سنة وإنت طيب ومتشكر قوي على الثقة الغالية دي .. بس برضه لازم تبدأ تحتفل بعيد الفلاح

الثلاثاء, مارس 20, 2007

 
Blogger hebaz said...

هىهىىهىهى
كل عيد فلاح و أنتوا بخير
الشبشب دة تعلقوة فى الصالون و تكتبوا تحتة "شبشب حبنا" هييية
و بعدين مفيش سباكين فى الكويت ولا أيه ؟

الثلاثاء, مارس 20, 2007

 
Blogger يا مراكبي said...

الراقص مع الذئاب

أحييك بشده على إحترامك لعيد الفلاح وعيد ميلاد إبن ال.. الرئيس .. رئيس القسم بتاع الكلية

فكرة حلوة فكرة يوم الشبشب دي .. وبعد كدة هنفكر في يوم الجزمة كمان

تحياتي الغالية ليك

الثلاثاء, مارس 20, 2007

 
Blogger يا مراكبي said...

كراكيب عادل

مالها السكرتيرة يس؟ هو هتبقى إنت والحاجة عليا؟ ما أنا وضحت إن السكرتيرة مش حاجة جامدة ولا حاجة

مش مصدقيني ليه؟

الثلاثاء, مارس 20, 2007

 
Blogger يا مراكبي said...

الأباصيري

لأ .. إطمئن عليا يا معلم .. أنا رجل كالسيف ولا يمكن أنضرب أبدا .. والمرة اللي فاتت اللي إنت بتشير إليها دي كانت غير مقصودة .. عديها بقى

هأكلمك عن السكرتيرة عالإيميل علشان الحاجة مش سايبة حاجة .. دي حتى بتتابع تعليقاتي عند المدونات التانية

متشكرين ياباشا

الثلاثاء, مارس 20, 2007

 
Blogger يا مراكبي said...

Mohamed A. Ghaffar

دي زيارة كريمة جدا .. نورتني والله

وبعدين ليه السمعة الوحشة دي عن عيد الفلاح؟ ده قدم السعد والهنا .. إسألني أنا

:D

أهلا بيك

الثلاثاء, مارس 20, 2007

 
Blogger Hannoda said...

:)))
بجد انهاردة عيد الفلاح؟؟؟؟


بس بجد ايه البوست الروعة ده؟؟...

عيد الأم بكرة.. ربنا يستر
أنصحك .. خبي الشباشب كلها بكرة

ربنا يخليكوا لبعض بجد

الثلاثاء, مارس 20, 2007

 
Blogger نبيــذ said...

:)

?الحاجه قرأت البوست ده

;)

الثلاثاء, مارس 20, 2007

 
Blogger كلام لوجيك said...

بوست جامد
وربنا يخليكم لبعض ويديم عليكم المحبة والسعادة
سواء فى عيد الفلاح او فى باقى ايام السنة منزوعة الاعياد
وابقى هات شبشب ضد الزحلقه
المرادي جت سليمة الحمدلله

تحياتى يا غالى

الثلاثاء, مارس 20, 2007

 
Blogger Rivendell** said...

والنبي الحاجة دي عسل

الأربعاء, مارس 21, 2007

 
Blogger دينا فهمي said...

أنا قلت آجي ألقي نظرة وأشوف مختفي عننا ليه
ودلوقتي عرفت الأسباب (:

الأربعاء, مارس 21, 2007

 
Blogger مبرمج حر said...

I tagged you

الأربعاء, مارس 21, 2007

 
Blogger يا مراكبي said...

بنت لبدو

متشكر لتعليقك وأحب أؤكد لك إن فيه فعلا عيد للفلاح كان موجود من أيام الخمسينيات في القرن اللي لسه خلصان قريب ده

ده لما كنا دولة زراعية بتكفي نفسها

تحياتي

الأربعاء, مارس 21, 2007

 
Blogger علي الألفي said...

ربنا يخليهالك و ما يحرمكش منها



و ما يحرمكش ابدا من شبشب الرومانسية العجيييييييييييب

الأربعاء, مارس 21, 2007

 
Blogger يا مراكبي said...

tamer

ما تقلقش عالشبشب .. ده في قلبي من جوه

وبعدين أنا لا يمكن أبص على السكرتيرة أبدا .. هي اللي بتعدي قدامي غصب عني

الأربعاء, مارس 21, 2007

 
Blogger يا مراكبي said...

أنيما

الحاجة طيبه آه

أنا بأبص على السكرتيرة .. لأ

ده كان فضول بس

تحياتي

الأربعاء, مارس 21, 2007

 
Blogger يا مراكبي said...

Hebaz

للأسف ما عندناش صالون في الكويت .. هأبقى أعلقه عندنا في مصر

وطبعا فيه سباكين هنا .. إحنا جبناه فعلا بص طلب 20 دينار .. يعني حوالي 400 جنيه مصري

إحنا طردناه طبعا وخصوصا إن لسة ورانا مصاريف لبس العيد .. عيد الفلاح

الأربعاء, مارس 21, 2007

 
Blogger يا مراكبي said...

Hannoda

متشكر قوي على ذوقك .. وإذا كان فاتك عيد الفلاح مش مشكلة .. عيد الفلاح بييجي مرتين في السنة

هو فيه شباشب كمان يوم عيد الأم؟ متهيألي نقضيها حافيين أحسن

الأربعاء, مارس 21, 2007

 
Blogger hebaz said...

400 جنيه مصري علشان البلاعة؟
لأ البركة فيك بأة هية دية ميزة المهندسين بنعمل كل حاجة هىهى
متنسوش تتصوروا فى عيد الفلاح بالهدوم الجديدة و تبعتلنا الصور :)

الأربعاء, مارس 21, 2007

 
Blogger david santos said...

Hello!
Very, very nice. Thank you.
have good day

الأربعاء, مارس 21, 2007

 
Blogger سمسم said...

جدير بالذكر

إن سموك طبعاً مش لاقي سبب جذري لغيرة

الحاجة مراتك من السكرتيرة اللي شعرها

طويل ووسطها ضيق ودلوعة

شوية...حاجات متخليش المدام تنفرس

وتكره عيد الفلاح...والفلاح نفسه

واللي جابوة

شكر وتقدير لبلاعة بيتكم اللي جمعت بين

حبيبين

شكر وتقدير لشبشب سموك الذي فجر

طاقات الإبداع العاطفي عند مرات سموك

شكر وتقدير لمدونتك الرائعة

ملحوظة

البواب بيؤولك ابقا شيل صينية الأكل

من جنب الأسانسير بعد ما تعزم مراتك

ملحوظة كمان

ربنا يديم الحب بينك وبين المدام...وما

يسدلكم بلاعة

تحياتي...لك...وللمدام...وبلاش

السكرتيرة

الأربعاء, مارس 21, 2007

 
Blogger يا مراكبي said...

نبيذ

طبعا الحاجة قرت البوست ده قبل كل الناس

نورتينا

الأربعاء, مارس 21, 2007

 
Blogger يا مراكبي said...

كلام لوجيك / ساكاماكا سابقا

ألف ألف شكر على التهنئة بحلول عيد الفلاح .. يعوده عليك بالصحة والسعادة

أنا فعلا عملت بنصيحتك وإشتريت شبشب جديد .. بس لسة تحت التجربة

تحياتي الغالية ليك

الأربعاء, مارس 21, 2007

 
Anonymous غير معرف said...

انت المفروض تشيل الشبشب دة للاعياد والمناسبات الرسمية تطلعوة انت والحاجة تتفرجوة علية علشان يفكركو انه شبشب الهنا الحاجة دي باين عليها زي العسل ربنا يخليهالك وكل عيد فلاحين وانتو طيبين

الأربعاء, مارس 21, 2007

 
Blogger يا مراكبي said...

Rivendell**

دايما الحاجة بتاخد تشجيع أكتر مني .. ماشي

بس هي عسل فعلا .. ساعات عسل أبيض .. وساعات .. مشيها أبيض برضه

تحياتي

الأربعاء, مارس 21, 2007

 
Blogger Memo said...

اخيراااااا عرفنا قيمت الشباشب

احنا كنا مدينو حجم اقل من حجمو
هوا الشبشب ده الي هيظبط الماده 76
و حسبي الله و نعم الوكيل

انا بقول برضه التعديلات كان ناقصها حاجه

عشان كدا خدنا بالشبشب

تحياتشي

الأربعاء, مارس 21, 2007

 
Blogger bastokka طهقانة said...

يا سيدي يا سيدي
القر اللي حتاخده بعد البوست ده

حيسد البلاعة العمومية في شارعكم
انت حر

ماتبقى تيجي

الأربعاء, مارس 21, 2007

 
Blogger حــلم said...

عندما يكون الأمر صادماً كحديث عن بلاعة فى ساعة صفا.. يمكن ان يؤدى ذلك لضم الشبشب.. تقديراً لمسببات ولبدايات مقدمات مبشرات لحظة الصفا

انه" التشعلق" بأسباب السعادة
:)

الأربعاء, مارس 21, 2007

 
Blogger fares said...

ههههههههههههههه بوست جميل اوي يامراكبي هو فيه احسن من الشطه في الجواز انتا فاهمني ولا لالا تحياتي ليك

الخميس, مارس 22, 2007

 
Blogger أُكتب بالرصاص said...

يعني يا راجل بدل ما تحضن الحاجة وتقول لها
كلمتين ..
تقوم تحضن الشبشب؟؟؟


بأقول لك ايه
كلمة بيني وبينك
انت تعرفني...

يعني متأكد انك بتكتب مذكراتك انت ؟

وبعدين شكلكم عاملين محاضر اجتماع للخناقات ومأرشفنهم
طالما بتديها ارقام :)

يا عم الف سلامة عليك
اسيبك بقا علشان عندي بلاعة عايز اسلكها

الخميس, مارس 22, 2007

 
Blogger الكونتيسة الحافية said...

فكرتني تدوينتك بمذكرات زوج سعيد جدا إللي كانت في من الحاجات اللي بحب أقراها جدا في فلاش
تدوينة شيقة تلعب على وتر (هم يضحك) وأسلوب بسيط يشي بحالة حميمية جميلة بينك وبين مدونتك
عيد فلاح سعيد يا عزيزي
وربنا يدوم المحبة بينك وبين ست الحاجة

الخميس, مارس 22, 2007

 
Blogger shreef said...

أزال المؤلف هذا التعليق.

الخميس, مارس 22, 2007

 
Blogger shreef said...

علشان كده انت حاطط صورة الشبشب انا استغربت لما شوفته قلت ايه اللي هيجيب الشبشب هنا عموما ربنا يخليلك الشبشب و تنعم بحياة زوجية سعيدة اقصد مع الحاجة يعني..قول آمين

الخميس, مارس 22, 2007

 
Blogger مُزمُز said...

من ألذ الحاجات اللي قرأتها في المدونات هي يومياتك دي

بجد مالهاش حل

بصراحة كده بسخسخ على نفسي من أول سطر وبعدين أفشاتك غير متوقعة يعني تلاقي الضحك طلعلك من حيث لا تدري

وبعدين أنا قلت مرة الحاجة دي سممممممحة بشكل غريب
ربنا يخليهالك يا عم ويخليلك الشبشب والبلاعة

أنا هاروح أصلي العصر وأرجع أقري البوست ده لأخواتي

هسيحلك في مصر كلها
نياههههاهاهاه

الخميس, مارس 22, 2007

 
Anonymous واحد من الناس said...

كل سنه وانت طيب

الخميس, مارس 22, 2007

 
Blogger shaimaa said...

هههههههههههه
و الله انت مسخرة انت و الحاجة
موتنى من الضحك و انا مكنتش طايقة اضحك


ههههههههههه
وكل سنة وعيد الفلاح بخير
و سلامى الخاص للحاجة
:)

الخميس, مارس 22, 2007

 
Blogger يا مراكبي said...

دينا فهمي

أنا مش مختفي ولا حاجة .. إنتي اللي مدونتك ما كنتش عارف أدخلها

وبعدين هأكرر تاني وتالت

أنا رجل كالسيف .. جامد جدا

ده بيني وبينكم طبعا

الخميس, مارس 22, 2007

 
Blogger يا مراكبي said...

مبرمج حر

you tagged me?

ربنا يسامحك ويديك على قد نيتك

متشكر قوي

الخميس, مارس 22, 2007

 
Blogger يا مراكبي said...

علي الألفي

منور المدونة يا بورسعيدي يا أصيل

بما إني متخصص شباشب .. أخبار أسعار الشباشب إيه بعد ما إتلغت المنطقة الحرة؟

الخميس, مارس 22, 2007

 
Blogger يا مراكبي said...

Hebaz

طبعا 400 عفريت يركبوه .. ده أنا أسلكها بفسي حتى لو قعدت للصبح

دي مافيهاش مهندسين ولا غير مهندسين

لما نتصور بهدوم العيد هاغسلها وانشرها في المدونه

الخميس, مارس 22, 2007

 
Blogger يا مراكبي said...

david santos

Than you for your kind follow up, it is really so kind effort fom you

الخميس, مارس 22, 2007

 
Blogger يا مراكبي said...

سمسم

تعليقك ده تحفه لوحدة .. يستاهل يبقى بوست

ده غير إني بأحب كلمة جدير دي جدا .. وخصوصا لما تتعلق بالسكرتيرة

أنا بأشكرك على نصايحك الغالية وأهلا بيك .. نورت المدونة

الخميس, مارس 22, 2007

 
Blogger يا مراكبي said...

Anonymous

الشبشب ده خاص بمناسباتنا العاطفية الخاصة .. لكن المناسبات الرسمية لأ

متشكر قوي .. يعود عليك عيد الفلاح بالصحة والهناء

الخميس, مارس 22, 2007

 
Blogger يا مراكبي said...

Memo

إنت كده بتعملي إسقاط سياسي للشبشب وأنا ما باتكلمش في السياسة زي ما إنتي عارفه

لكن ده ما يمنعش إن كلامك مظبوط وإن اللي قولتيه ده سبب كافي إننا ناخد بالشبشب والجزمة القديمة كمان

الخميس, مارس 22, 2007

 
Blogger يا مراكبي said...

bastokka

النهاردة الخميس خمسة وعشرين مارس

إبقي جربي موضوع البلاعة ده يمكن ربنا يكرمكوا

أنا جاي عندكوا حالا

الخميس, مارس 22, 2007

 
Blogger يا مراكبي said...

حــلم

حلوه جدا نظرية التشعلق بأسباب السعادة دي .. ده من أساسيات علم النفس

أنا برضه عمال أقول ليه أنا مرتبط قوي بالشبشب كده؟

الخميس, مارس 22, 2007

 
Blogger يا مراكبي said...

fares

لا مش فاهمك

أنا لسه صغنون وماليش في الحاجات دي

ههههههههه

منور بجد

الخميس, مارس 22, 2007

 
Blogger يا مراكبي said...

أُكتب بالرصاص

كان لازم أحضن الشبشب لأنه قدم السعد .. وإلا أبقى ناكر للجميل

وطبعا أنا أعرفك كويس ..مش متجوز من زمان زيي؟ يبقى أعرف عنك حاجات كتيره من غير ما تآخد بالك

كلنا لها

أرجو إنك تكون إتوفقت في تسليك البلاعة .. ولو إني متأكد من إنك هتقدر على أبوها .. مش متجوز من زمان زيي؟

الخميس, مارس 22, 2007

 
Blogger يا مراكبي said...

الكونتيسة الحافية

متشكر قوي على الزيارة الجميلة دي وكل عيد فلاح وإنت طيبة وبالصحة والسلامة

أهلا بيك

الخميس, مارس 22, 2007

 
Blogger يا مراكبي said...

Shreef

قفشتك يا معلم .. إنت صاحب التعليق الملغي ده

الخميس, مارس 22, 2007

 
Blogger يا مراكبي said...

shreef

آمين يا رب

شكرا على تعليقك وشعورك الطيب ناحيتي وناحية الشبشب الغالي

الخميس, مارس 22, 2007

 
Blogger يا مراكبي said...

مزمز

متشكر قوي على ذوقك وإطراءك الجميل .. ده كلام كبير قوي

وبعدين مش ناقصة تسييح في مصر كمان .. كفاية الخليج العربي .. كله عرف

نورتني

الخميس, مارس 22, 2007

 
Blogger يا مراكبي said...

واحد من الناس

وإنت طيب يا ريس

ياعم فين كتاباتك الجديدة؟ بقى لك أكتر من شهر ما كتيتش حاجة؟

الخميس, مارس 22, 2007

 
Blogger يا مراكبي said...

Shaimaa

نورتينا وكل سنة وإنتي طيبه

متشكر على تعليقك الجميل ولو إنك دايما دايما دايما .. في صف الحاجة

مع إنك بحكم زمالة التدوين المفروض تكوني في صف .. الحاجة .. نمشيها كده المرة دي

الخميس, مارس 22, 2007

 
Blogger قصاقيص said...

كل سنة وإنتم طيبين ومحتفلين بعيد الفلاح وأعياد الطفولة وعيد الشرطة كمان...بس من غير خناقات مسلسلة الأرقام ولا شباشب حمام ولابلاعات ولا إي حاجه خالص
أكيد في طرق كتير نكتشف بيها حب وحنان اللي قدامنا غير الزحلقة والحوادث دي
بجد بوست لذيذ جدا ودمه خفيف

الخميس, مارس 22, 2007

 
Blogger محظوظة said...

هههههههههه

حلوة الحكاية دى اوى طعمة ثلاث حبات ونصف ههههه

الجمعة, مارس 23, 2007

 
Anonymous حسن محمود said...

أزيك يامراكبى ؟
كويس؟
أخبار عيد الفلاح ايه؟

المشكلة انى مابقتش أتفرج على التلفزيون فعلشان كده ماعرفش امتى يوم الفلاح
انما عارف انه مع موسم الحصاد
بس غريبه باسمع الراديو ولا جابوا أى اغنيه ولا حتى عملوا برنامج
يالا معلش
كويس انه حصاد الزرع والمحصول مش حاجه تانيه

خد بالك من نفسك بقى
مش كل مره تسلم الجره
وأدى العيش لخبازه
:)
سلام

الجمعة, مارس 23, 2007

 
Blogger Epitaph said...

هههههههههههه

زي العسل و الله


ربنا يخليكوا لبعض يا رب

ويا يعيش عيد الفلاح

الجمعة, مارس 23, 2007

 
Blogger david santos said...

Hello!
My name is Fernando David Moreira dos Santos, (David Santos).
I was born in Cucujães, Portugal.
I live in São João da Madeira, Portugal.
I`m 62 years old I am poetry and love Arabic culture.
Thank you

الجمعة, مارس 23, 2007

 
Blogger ibn nasser - ابن ناصر said...

ههههههههههه انا اول مره أجي عندك
والبوست زي السكر طلعت الاحد من الهم شوي
تحياتي

الجمعة, مارس 23, 2007

 
Blogger bluestone said...

:))))
بحب انا رومانسية المتزوجين دي ..
بتطلع في أوقات غريبة
كل فلاح وانتوا طيبين

الجمعة, مارس 23, 2007

 
Blogger يا مراكبي said...

قصاقيص

كل سنة وإنتي طيبة بس بلاش عيد الشرطة ده علشان بيجيلي حساسية

وطبعا فيه طرق كتيره نكتشف بيها حب وحنان اللي قدامنا بس إنتي تابعي حاديتي .. دول عشر سنين

منورة

الجمعة, مارس 23, 2007

 
Blogger يا مراكبي said...

محظوظة

الله يحظك كمان وكمان

بس النص ده جه منين؟

أهلا بيكي

الجمعة, مارس 23, 2007

 
Blogger يا مراكبي said...

حسن محمود

أنا بجد سعيد جدا بمتابعتك

عيد الفلاح مش هاتسمع عنه خلاص لأن ما فيش حصاد ولا زراعة أصلا .. أنا مش قصي إننا لغينا الزراعة بس قصدي إنها لا شيء بالنسبة لعدد السكان الرهيب

وبعدين أنا أكتر واحد يحب يدي العيش لخبازه .. بس خبازه ده طلب 400 جنيه .. يبقى في الحالة دي أديه لخبازه برضه؟

منورني دايما

الجمعة, مارس 23, 2007

 
Blogger يا مراكبي said...

Epitaph

ده إيه الزيارة الجميلة دي؟ متشكر كتير وكل سنة وإنتي طيبة

الجمعة, مارس 23, 2007

 
Blogger يا مراكبي said...

david santos

Really I do thank you for your nice reply to my question. Sorry for not knowing a poet like you, but really the language is an obstacle.

What is amazing is thatr how you understand our Arabiceven the slang?

Thanks again

الجمعة, مارس 23, 2007

 
Blogger يا مراكبي said...

ibn nasser- ابن ناصر

أهلا بيك وتنورني في أي وقت

أهو الواحد بيحاول يضحك شوية علشان ينسى اللي بيحصل للبلد

تحياتي

الجمعة, مارس 23, 2007

 
Blogger يا مراكبي said...

bluestone

حلوة كلمة رومانسية المتزوجين دي .. فعلا جديدة

هو فيه رومانسية للمتزوجين؟ أيوه .. وتلاقوها مع البلاعات والحاجات اللي بايظة في البيت ومشاوير السوق اللي ما بتخلصش

تحياتي

الجمعة, مارس 23, 2007

 
Blogger mansourawy said...

السلام عليكم اولا
ثانيا وحشتنى يمراكبى كتير بجد وبدون مجاملة
ثالثا بقة
انا مدخلتش هنا من زمان
اول مفتحت المدونة بتاعتك لقيش شبشب
قلت هى وصلت معاك لكدا بصراحة خفت عليك
الحمد لله اتارى الشبشب كان بطل ثانوى المرادى ولم يذكر الا ف نهاية الحلقة
اما بالنسبة لعيد الفلاح فعمر الحاجه اكيد مهتنساه
انا عارف هى مرتباها
عشان تعملها حجه وتتصل بيك
وبعدين تزحلق
تقوم تتخض عليك
وتعيش بقة يوم عيد الفلاح
عموما كل سنه وانتو كلكم طيبين والاسلوب بتاعك مش هقول حلو لانى اتعودت ع كدا خلاص وانت اول واحد ازوره بعد غيابى
تحياتى للجميع

السبت, مارس 24, 2007

 
Blogger soosa el-mafroosa said...

عشان ماتبقوش تظلموا الحكومة

يعني حتى هيئة الصرف الصحي بتعمل حاجات رومانسية أهه

ربنا يخللي كل بتوع المجاري

السبت, مارس 24, 2007

 
Blogger Sharm said...

ههههههههه

فكرتنى بايام كنا نيجي و انا صحابي لا بسين اخضر بالصدفة الناس يسألونا هو المصري كسب و لا ايه نقولهم لا بنحتفل بعيد الفلاح

:)))

السبت, مارس 24, 2007

 
Blogger يا مراكبي said...

mansourawy

يااااه .. أنا سعيد جدا جدا بعودتك للتدوين .. حقيقي إفتقدناك الفترة اللي فاتت

ومتشكر جدا على الإطراء ده .. وخصوصا إنك لفت نظري لأن الحادثة كانت مدبرة ومقصودة .. لازم آخد بالي أكتر من كده

حمد الله عالسلامة

السبت, مارس 24, 2007

 
Blogger يا مراكبي said...

soosa el-mafroosa

أولا دي تبع مصلحة المجاري الكويتية مش المصرية .. يعني حكومتنا مالهاش فضل علينا في الموضوع ده

لكن المهم إن الرومانسية ممكن تيجي مع المجاري .. فكرة عجيبة وغريبة

نورتينا

السبت, مارس 24, 2007

 
Blogger يا مراكبي said...

Sharm

عموما لفتة مهمة

أنا هأعمل بحث في الموضوع .. يمكن فعلا عيد الفلاح ليه علاقة بالنادي المصري أو نادي الإتحاد السكندري وخصوصا إن ما عندناش زراعة بجد وجد دلوقت

بس هو إنتوا ليه كنتوا بتلبسوا زي بعض صحيح؟

السبت, مارس 24, 2007

 
Blogger Rozza!.......فاقد الذاكرة said...

السلام عليكم
بلوج حلو كتيييير
الله يخليكم لبعض يا رب
وما يوقعك بالشبشب الا عند الحاجة:-)
اجمل تحياتي

السبت, مارس 24, 2007

 
Blogger يا مراكبي said...

Rozza!.......فاقد الذاكرة

هلا بيك

زيارة كتير حلوة وبأتشكرك كتير ع هالأماني الطيبة

كلك ذوق والله

السبت, مارس 24, 2007

 
Blogger Fo2sh said...

hhhhhhhhhhhhhhhhhhhhhhhh
http://engafm.blogspot.com/

السبت, مارس 24, 2007

 
Anonymous مدحت said...

أنا ركزت فى صورة الشبشب وبصراحة كده ابتديت أشك فى سبب حضنك ليه . رغم أهمية عيد الفلاح ومكانته القومية فى عموم مصر خاصة بعد زيادة رقعة الفلاحة الا ان ماركة الشبشب على ما يبدو "ecco"
وهذا فى حد ذاته يستاهل ألف حضن وحضن. عيد فلاح ( عايز أقول مبارك بس خايف) وسلم لى على توشكى والريف الانجليزى بطريق اسكندرية الصحراوى.

السبت, مارس 24, 2007

 
Blogger كراكيب عادل said...

انت بعد كدة خد اجازة من الشغل علشان ترد علي التعليقات هههههههههههههه

السبت, مارس 24, 2007

 
Blogger يا مراكبي said...

Fo2sh

أهلا بيك ومتشكر على زيارتك .. مدونتك حقيقي جميلة

الأحد, مارس 25, 2007

 
Blogger يا مراكبي said...

مدحت

إنت وصلت لماركة الشبشب كمان؟ ده إيه الدقة دي كلها؟ ماشي ياعم

وبعدين كلمة عيد مبارك دي مش عيب ولا حرام .. هي مكروهه بس

تحياتي

الأحد, مارس 25, 2007

 
Blogger يا مراكبي said...

كراكيب عادل

ربنا يكرمك .. ملاحظة في محلها

بس ده إن دل على شيء فإنما بيدل على إن الناس مهمومة جدا وبالتالي بتهتم بأي كوميديا أكتر من أي حاجة

شر البلية ما يضحك

الأحد, مارس 25, 2007

 
Blogger david santos said...

Hello!
Thank,s for you work and have a good weekend

الأحد, مارس 25, 2007

 
Blogger hend said...

ربنا يخليكوا لبعض وكل عيد فلاح وانت طيب بس المره الجاية ابقى البس قبقاب علشان متتزحلقش وسلملى على الحاجة

الأحد, مارس 25, 2007

 
Blogger sarah la tulipe rose said...

حلوة حكاية عيد الفلاح دي بوست دمه خفيف

الأحد, مارس 25, 2007

 
Blogger همستى said...

السلام عليكم
أولا انا أسف انى هخرج عن الموضوع لان
ووأحب أدعوك الى ان تنضم معنا الى رابطة عملناها للعزاب
أنا عارف ان الوقت مش مناسب
والرابطة دى عملنا لها مدونة تسمى
( عاوز اتجوز )
ونأمل ان تشارك معنا بمواضيعك
وحاول مشكورا ان تنشرها بين اصدقاءك والفكرة هتعجبك ان شاء الله
وجزاكم الله خيرا

الأحد, مارس 25, 2007

 
Blogger عمرو غريب said...

اية ياعم وحشتني مواضيعك الرائعة

الاثنين, مارس 26, 2007

 
Anonymous حسن محمود said...

معلش بقى ياعم مراكبى

حملتك انت المسؤلية على كل اللى بيجرى لينا عند اكتب بالرصاص

قولت ان انت اللى غرقت المركب
:)
مش انت وقعت
يبقى خلاص انت السبب بقى

يلا خير
موضوع الكسرولة ده لسه شغال ولا انتهى خلاص؟

يلا دمت بخير
سلام

الاثنين, مارس 26, 2007

 
Blogger يا مراكبي said...

david santos

Dear our great poet, we are the ones who have to thank you a lot for your care and kind folllow up for our blogs.

الاثنين, مارس 26, 2007

 
Blogger يا مراكبي said...

hend

ربنا يكرمك وأشكرك على نصيحة القبقاب دي .. ولو إن الجيران اللي تحت هيصدعوا .. بس مش مشكلة .. المهم ما نتزحلقش تاني

نورتي

الاثنين, مارس 26, 2007

 
Blogger يا مراكبي said...

sarah la tulipe rose

متشكر قوي .. ولسة هأفكركوا بأعياد تانية كتيرة زي عيد الفلاح كده

أهلا بيكي

الاثنين, مارس 26, 2007

 
Blogger يا مراكبي said...

كاستر

متشكر كتير على الزيارة والدعوة الكريمةدي .. وهأحاول أشارك طبعا بس لما الرقابة المنزلية تخف شوية

الاثنين, مارس 26, 2007

 
Blogger يا مراكبي said...

عمرو

ربنا يكرمك .. هتخليني أفتكر نفسي بأعرف أكتب وألا إيه؟

عموما أشكرك كتير على المتابعة

الاثنين, مارس 26, 2007

 
Blogger يا مراكبي said...

حسن محمود

ياعم إنت هتلبسنس تهمة ليه في يوم الإستفتاء؟ أنا لا غرقت المركب ولا لابس كسرولة ولا حاجة

أنا المركب بتاعتي لسة سليمة بس المراكبي بتاعها أودعوه مستشفى الأمراض العقلية .. حاجات بسيطة يعني

تحياتي

الاثنين, مارس 26, 2007

 
Blogger يعقــــوب .... said...

دايما أصغر الحاجات و اتفها بتوكن سبب يا اما في اندلاع حرب أو اخمادها...و الشبشب الكريم ده لازم تحطه على رف المكتبة او تبروزه

الاثنين, أبريل 02, 2007

 
Blogger يا مراكبي said...

يعقوب

ما تقلقش على الشبشب .. ده بالنسبة لي بقى رمز الحب والسلام

منور بجد

الثلاثاء, أبريل 03, 2007

 
Blogger أحمد الدرعه said...

ديفيد سانتوس :
http://ctybrd.blogspot.com/2007/04/blog-post_17.html

الأربعاء, أبريل 18, 2007

 
Blogger أحمد الدرعه said...

بلوج جمييل :)

الأربعاء, أبريل 18, 2007

 
Blogger max.adams said...

يعيش الشبشب العظيم يعيش

هي الدنيا كده يا مستر مراكبي تعمل ايه

ربنا يخليكوا لبعض و يهنيكوا ببعض

الجمعة, يناير 18, 2008

 
Blogger يا مراكبي said...

الفنكوش

طبعا هي الدنيا كده .. مقامها هو مقام الشبشب

ههههه

أشكرك على الزيارة الجميلة دي

الثلاثاء, يناير 22, 2008

 

إرسال تعليق

Links to this post:

إنشاء رابط

<< Home